Category تازہ ترین

سندھ ہائیکورٹ نے دنیا بھر میں مشہور لپ سنکنگ ایپ ٹک ٹاک پر پابندی عائد کردی۔

سندھ ہائیکورٹ میں ٹک ٹاک بند کرنے سے متعلق درخواست پر سماعت ہوئی۔ درخواست گزار کے وکیل نے مؤقف اختیار کیا کہ پشاور ہائیکورٹ نے بھی پہلے ٹاک ٹاک پر پابندی عائد کی تھی، ٹک ٹاک پر غیر اخلاقی اور غیر اسلامی مواد رکھا جارہا ہے۔

درخواست گزار کے مطابق پی ٹی اے میں شکایت کی مگر اس پر کچھ عمل نہیں ہوا

سماعت کے دوران عدالت نے ملک بھر میں ٹک ٹاک پر پابندی عائد کردی۔ سندھ ہائیکورٹ نے اٹارنی جنرل پاکستان کو نوٹس جاری کیے اور 8 جولائی تک فریقین سے جواب طلب کرلیا۔

خیال رہے کہ اس سے قبل پشاور ہائیکورٹ نے بھی ٹک ٹاک پر پابندی عائد کردی تھی تاہم بعد میں یہ پابندی ہٹادی تھی۔

سندھ اسمبلی کا اجلاس ہنگامہ آرائی کی نذر ہوگیا اور اپوزیشن اراکین خصوصاً پاکستان تحریک انصاف (پی ٹی آئی) کے اراکین نے اپنے رہنما کو ایوان سے خطاب کی اجازت نہ ملنے پر ایوان میں بھرپور احتجاج کیا۔

صوبائی اسمبلی میں ہنگامہ آرائی اس وقت شروع ہوئی جب اپوزیشن لیڈر حلیم عادل شیخ نے کارروائی کے آغاز کے ساتھ پہلے تقریر کرنے کی کوشش کی لیکن اسپیکر آغا سراج درانی نے یہ کہہ کر اجازت دینے سے انکار کردیا کہ پہلے سے شیڈول امور پر بات کی جائے گی اور اراکین کو ان کے نکات پر بعد میں بات کرنے کی اجازت دی جائے گی۔

اس سے اپوزیشن اراکین نے اسپیکر کے خلاف احتجاج شروع کردیا، ایوان میں نعرے بازی کے دوران مظاہرین میں سے کچھ اراکین ‘فولڈنگ چارپائی’ لے کر آگئے اور اسے ‘جمہوریت کا علامتی جنازہ’ قرار دیتے ہوئے اسپیکر کے روسٹرم کے سامنے رکھنے کی کوشش کی۔

اپوزیشن اراکین نے چارپائی کو اسپیکر ڈائس کی طرف لے جانے کی کوشش کرتے ہوئے نعرے لگائے کہ جمہوریت کا جنازہ ہے، ذرا دھوم سے نکلے، چند منٹ کی جدوجہد کے بعد سارجنٹ انہیں روکنے میں کامیاب رہے۔

اسپیکر نے اپوزیشن کے اس اقدام پر ناراضی کا اظہار کرتے ہوئے اسے ایوان کی ‘توہین’ قرار دیا۔

بعدازاں پی ٹی آئی کے حلیم عادل شیخ نے اسمبلی میں ایک قرارداد پیش کی جس میں شکایت کی گئی کہ اپوزیشن اراکین کو ایوان میں بولنے کے حق سے روکا جا رہا ہے اور اراکین کو بولنے سے روکنا اسمبلی قوانین کی خلاف ورزی ہے۔

حزب اختلاف کے احتجاج کے بعد وزیر اطلاعات ناصر حسین شاہ نے پی ٹی آئی کو تنقید کا نشانہ بناتے ہوئے کہا کہ مرکز میں تحریک انصاف حکومت نے مہنگائی سے غریبوں پر بوجھ ڈالا ہے۔

اس سے قبل رواں ماہ کے اوائل میں سندھ اسمبلی کا اجلاس اس وقت افراتفری اور ہنگامہ آرائی کا شکار ہو گیا تھا جب حزب اختلاف کی تین بڑی جماعتوں کے اراکین نے ایوان میں شدید احتجاج کیا تھا۔

اس موقع پر متحدہ قومی موومنٹ (ایم کیو ایم) پاکستان، گرینڈ ڈیموکریٹک الائنس اور پی ٹی آئی مل کر صوبائی حکومت سے یہ پوچھنے کے لیے ایک قرارداد پیش کرنا چاہتی تھیں کہ کووڈ-19 کے پھیلاؤ کو روکنے کرنے کے لیے انہوں نے کیا اقدامات اٹھائے ہیں تاہم اسپیکر آغا سراج درانی کی جانب سے ایجنڈا آئٹم سے ہٹ کر کسی بھی معاملے کو بحث کا حصہ بنانے سے انکار کردیا تھا جس پر اپوزیشن جماعتوں نے شدید احتجاج ریکارڈ کرایا تھا۔

کنٹینر کی سیاست کا الزام
وزیر اعلیٰ سندھ کے مشیر مرتضیٰ وہاب نے آج سندھ اسمبلی میں حزب اختلاف کے طرز عمل کی مذمت کرتے ہوئے الزام لگایا کہ وہ سندھ اسمبلی میں ‘کنٹینر سیاست’ لانے کی کوشش کر رہے ہیں۔

مرتضیٰ وہاب نے صحافیوں سے گفتگو کرتے ہوئے کہا کہ آپ کو ایسی کوئی مثال یا نظیر نہیں ملے گی کہ کوئی چارپائی کے ساتھ اسمبلی میں داخل ہونے کی کوشش کرے اور اپوزیشن لیڈر اس کی فلمبندی کر رہا ہو، سندھ کے عوام کو سوچنا چاہیے کہ انہوں نے اپوزیشن لیڈر کو تصاویر اور فلمی ویڈیو لینے کے لیے بھیجا ہے یا قراردادیں پیش کرنے کے لیے۔

انہوں نے اس واقعے کو شرمناک قرار دیتے ہوئے کہا کہ اس کی جتنی مذمت کی جائے کم ہے، وزیر اعلیٰ کے مشیر نے اپوزیشن پر طنز کرتے ہوئے کہا کہ پی ٹی آئی کے رکن صوبائی اسمبلی شاید چارپائی لے کر آئے تھے کیونکہ وہ کراچی میں لوڈشیڈنگ کی وجہ سے رات کو نیند کی کمی کا شکار تھے اور ان کے حلقے کے عوام ان سے گیس اور بجلی کی قلت کے بارے میں شکایت کرتے ہیں۔

انہوں نے کہا کہ ہم انہیں خوش آمدید کہتے ہیں کہ سندھ اسمبلی میں اپوزیشن لیڈر کے دفتر میں ایئرکنڈیشنر سے لطف اندوز ہوں لیکن خدا کے لیے ایسی غلط اور بدقسمت روایات کو جنم نہ دیں۔

مرتضیٰ وہاب نے کہا کہ کیا آپ کو اچھا لگے گا کہ آپ حکومت میں ہوں اور دیگر سیاسی جماعتیں ایسا کریں، مجھے لگتا ہے کہ یہ نامناسب ہے اور ہمیں یہ سب اس لیے دیکھنا پڑ رہا ہے کیونکہ یہ افراد نامناسب ہیں۔

انہوں نے کہا کہ ہو سکتا ہے کہ پیپلز پارٹی اور ایم کیو ایم پاکستان میں بہت زیادہ اختلافات ہوں لیکن اس طرح کے واقعات ان کی جانب سے بھی کبھی دیکھنے کو نہیں ملے، مجھے نہیں معلوم کہ یہ کس قسم کے لوگ ہیں اور کہاں سے آئے ہیں جو ہماری اسمبلی میں ایسی روایات قائم کرنے کی کوشش کر رہے ہیں۔

وزیراعلیٰ کے مشیر نے پی ٹی آئی کو نشانہ بناتے ہوئے کہ یہ الزام تراشی کی سیاست میں اس لیے مصروف ہیں تاکہ یہ انہیں بتانا نہ پڑے کہ انہوں نے قوم اور سندھ کے عوام کے لیے کیا کیا ہے، انہوں نے الزام لگایا کہ ‘یہ لوگ الیکٹڈ نہیں سلیکٹڈ ہیں اور یہی وجہ ہے کہ یہ سندھ کے عوام کے مسائل کو اجاگر کرنے میں ناکام رہے ہیں’۔

انہوں نے زور دے کر کہا کہ صوبائی اسمبلی کے اسپیکر ایوان کے محافظ ہیں اور اس کے تقدس کو پامال کرنے والے ذمے دار افراد کے خلاف کارروائی کا حق رکھتے ہیں۔

لاہور: جوہرٹاؤن میں دھماکے سے بھری کار پارک کرنے والا ملزم راولپنڈی سے گرفتار کرلیا گیا۔

تفصیلات کے مطابق لاہور کے علاقے جوہر ٹاؤن میں ہونے والے دھماکے کی تحقیقات میں اہم پیشرفت سامنے آئی ہے، جائے وقوعہ پر گاڑی چھوڑ کرآنے والا ملزم بھی گرفتار کرلیا گیا ہے۔ ملزم کو راولپنڈی سے گرفتار کیا گیا ہے۔

تفتیشی ذرائع کا کہنا ہے کہ گرفتار دہشت گرد کی شناخت عید گل کے نام سے ہوئی ہے، ملزم کی گرفتاری کے بعد پہلے سے گرفتار گاڑی کے آخری مالک پال ڈیوڈ نے بھی دہشت گرد کی شناخت کر لی ہے، پیٹر پال ڈیوڈ نے دھماکے میں استعمال ہونے والی گاڑی عید گل کو ہی دی تھی، اور خود پیٹر پال ڈیوڈ نے یہ کار دھماکے سے 7 روز پہلے گوجرانولہ سے خریدی تھی۔

واضح رہے کہ گزشتہ روز لاہور کے علاقے جوہر ٹاؤن میں ہونے والے دھماکے میں 5 افراد جاں بحق اور متعدد زخمی ہوگئے تھے، جب کہ دھماکے سے 3 گاڑیاں اور 3 موٹر سائیکلیں مکمل طور پر اور ایک رکشہ جزوی تباہ ہوگیا۔ رات گئے تک پولیس نے دھماکے میں نے استعمال ہونے والی گاڑی کا سراغ لگایا اور بتایا کہ دھماکے میں استعمال ہونے والی گاڑی نمبر ایل ای بی 9928 گیارہ سال قبل 29 نومبر 2010 کو صبح پونے 10 بجے گوجرانوالہ سے چھینی گئی تھی، جس کا مقدمہ تھانہ کینٹ گوجرانوالہ میں درج ہے۔

25 جون کو قانون نافذ کرنے والے اداروں نے لاہور ایئرپورٹ سے پیٹر پال ڈیوڈ نامی ایک مشتبہ شخص کو گرفتار کیا تھا۔ جو غیر ملکی شہری بتایا جارہا ہے۔ گرفتار ملزم پیٹرپال نے اعتراف کیا کہ دھماکے سے 7 روز قبل اس نے گاڑی گوجرانوالہ سے خریدی تھی۔

اسلام آباد: قومی اسمبلی میں پارلیمانی کمیٹی برائے قومی سلامتی کا اجلاس طلب کرلیا گیا۔

پارلیمانی کمیٹی برائے قومی سلامتی کا اِن کیمرا اجلاس یکم جولائی کو سہ پہر3 بجے ہوگا جس کی صدارت اسپیکر قومی اسمبلی اسد قیصر کریں گے جب کہ اجلاس میں قومی سلامتی سے متعلق امور ایجنڈے کا حصہ ہوں گے، اس دوران افغانستان کی موجودہ صورتحال اور اس کے پاکستان پر اثرات کے حوالے سے بات ہوگی۔

پارلیمانی کمیٹی برائے قومی سلامتی کے اجلاس میں حکومت کی طرف سے وزیر خارجہ شاہ محمود قریشی، وزیر داخلہ شیخ رشید، وزیر دفاع پرویز خٹک شریک ہوں گے جب کہ اپوزیشن لیڈر شہباز شریف، بلاول بھٹو زرداری سمیت ارکان پارلیمنٹ اور وزرا بھی کمیٹی کے ارکان میں شامل ہیں۔

اس کے علاوہ چیئرمین سینیٹ، وزرا ، اراکین پارلیمنٹ و سینیٹ کو بھی کمیٹی میں خصوصی طور پر مدعو کیا گیا ہے۔

اسلام آباد: وزیراعظم کے مشیر برائے پارلیمانی امور بابر اعوان نے اوورسیز پاکستانیوں کے حوالے سے شہباز شریف کا پلان فراڈ قرار دے دیا۔

انہوں نے کہا کہ ووٹ کا اختیار سمندر پار پاکستانیوں کا بنیادی حق ہے، حزب اختلاف آئین سے کھلواڑ نہ کرے، حکومت پارلیمنٹ کو سپریم سمجھتے ہوئے تمام کام پارلیمنٹ کے ذریعے کرنا چاہتی ہے۔ اپوزیشن لیڈر پارلیمنٹ میں آکر بات کریں، پتلی گلی سے نہ نکلیں، مذاکرات کیلئے دروازے کھلے ہیں، اپوزیشن جماعتوں کو دعوت دیتا ہوں کہ جوڈیشل ریفارمز پر حکومت کے ساتھ بیٹھیں۔

وزیراعظم کے مشیر برائے پارلیمانی امور ڈاکٹر بابر اعوان نے اسلام آباد میں پریس کانفرنس کرتے ہوئے کہا کہ شہباز شریف نے 2 بار پارلیمان کی بالادستی کو ماننے سے انکار کیا، پاکستانی جس بھی خطے میں ہو ووٹ اس کا حق ہے، شہباز شریف چاہتے ہیں ایک کروڑ پاکستانیوں کو ووٹ کے حق سے محروم کر دیا جائے۔ بابر اعوان کا کہنا تھا کہ اگر اسمبلی بھی اوورسیز پاکستانیوں سے ووٹ کا حق چھیننا چاہے تو آئین اس کی اجازت نہیں دیتا، شہباز شریف پتلی گلی نا ڈھونڈیں، جو گفتگو کرنی ہے پارلیمنٹ میں کریں۔

سابق وزیراعظم نواز شریف سے متعلق بات کرتے ہوئے مشیر برائے پارلیمانی امور کا کہنا تھا کہ نواز شریف کے خلاف جو عدالتی فیصلہ آیا ہے اس کے بعد وہ بند گلی میں چلے گئے ہیں، ان کی ضمانت کا آرڈر ختم ہوگیا ہے۔ نواز شریف کو قانون کے سامنے سرنڈر کرنا پڑےگا، انہیں پاکستان آکر قید کاٹنی ہے، مفرور کے پاس آئینی حقوق نہیں رہتے۔

اس موقع پر وزیر مملکت فرخ حبیب نے کہا کہ شہباز شریف نے ضمانت دیتے ہوئے کہا تھا کہ نواز شریف کو واپس لاؤں گا، آپ دوسروں کو نصیحت، خود میاں فصیحت بنے ہوئے ہیں، شہباز شریف کے پاس کوئی اخلاقی جواز نہیں کہ اپوزیشن لیڈر رہیں، ان کو اصلاحات، صاف شفاف انتخابات میں کوئی دلچسپی نہیں، ان کو سب سے بڑی رکاوٹ وزیراعظم نظر آتے ہیں، یہ عدالتی فیصلوں کو بھی نہیں مانتے، نواز شریف متحدہ بانی تو بن سکتے ہیں، نیلسن منڈیلا نہیں بن سکتے۔

وزیراعظم عمران خان نے کہا ہے کہ بدقسمتی سے ہمارے بزرگوں نے پاکستان کے ساتھ انصاف نہیں کیا۔

دورہ ناران کے موقع پر ٹائیگر فورس کے اراکین سے خطاب کرتے ہوئے انہوں نے کہا کہ پہلے لوگوں نے درختوں، جنگلات کو تباہ کیا اور یہ نہیں سوچا کہ آنے والی نسلوں کے لیے وہ بھی ویسا ہی پاکستان چھوڑ کر جائیں جیسا ان کو ملا تھا۔

وزیراعظم کا کہنا تھا کہ میں ساری دنیا میں گھوما اور یورپ کے خوبصورت ترین مقامات دیکھے ہیں، لیکن میں آپ کو یقین دلاتا ہوں کہ پاکستان میں جیسی خوبصورتی ہے شاید ہی دنیا میں کوئی ملک ملے جسے اللہ نے ایسی نعمت بخشی ہو۔

انہوں نے کہا کہ اللہ کی نعمتوں کا شکر ایسے ادا کیا جاتا ہے کہ ان کا دھیان رکھا جاتا ہے، شکر تو اس وقت ہوتا ہے جب ان کی حفاظت کی جائے۔

انہوں نے وزیراعلیٰ خیبرپختونخوا کے معاون خصوصی ریاض خان کو ہدایت کی کہ ان مقامات کی نگہبانی کے لیے مقامی افراد کو چنا جائے جنہیں معلوم ہے کہ درخت کون کاٹتا ہے، یہی ان درختوں کی صحیح سے حفاظت کرسکیں گے اور یہی افراد ان علاقوں کی صفائی کرسکیں گے۔

وزیراعظم نے مزید کہا کہ پاکستان میں ہر سال سیاحت میں تیزی سے اضافہ ہورہا ہے اس لیے کاغان ڈیولپمنٹ اتھارٹی کا چیلنج یہ ہے کہ جو قانون بنائے جائیں ان پر سختی سے عملدرآمد کیا جائے، ہوٹلز مالکان پر بھی گندگی نہ پھیلانے کی پابندی لگائی جائے۔

ان کا کہنا تھا حضور ﷺ نے صفائی کو نصف دین قرار دیا، ہمارے دین میں صفائی اور پاکیزگی کی بہت زیادہ اہمیت ہے۔

بات کو جاری رکھتے ہوئے انہوں نے صوبائی حکام کو ہدایت کی کہ صفائی کے لیے پورا زور لگایا جائے، سخت سزائیں دی جائیں، گندگی کو ٹھکانے لگانے کا بندوبست کیا جائے۔

انہوں نے کہا کہ نئے پاکستان میں یہ نئی سوچ ہے، پہلے ہر جگہ گندگی پڑی ہوتی تھی کوئی فکر نہیں کرتا تھا لیکن اب ہم نے اپنے ملک کو صاف کرنا ہے۔

وزیراعظم نے کہا کہ دریائے کنہار میں پائی جانے والی ٹراؤٹ مچھلی کو پورے پاکستان میں پسند کیا جاتا ہے اس لیے مجھے یہ جان کر خوشی ہوئی کہ اس کی حفاظت کی جارہی ہے اور اس کی آبادی میں اضافہ کرنے کے اقدامات کیے جارہے ہیں کہ اتنی مچھلیاں نہ پکڑی جائیں کہ یہ ختم ہی ہوجائیں۔

ان کا مزید کہنا تھا کہ سیاحت کی وجہ سے ان علاقوں میں اتنا پیسہ آئے گا کہ ہم یاں بہت ترقیاتی منصوبے بنا سکیں گے اور اس کا ایسا دھیان رکھ سکیں گے جیسے سوئٹزر لینڈ نے اپنے علاقوں کا رکھا، حالانکہ وہ رقبے کے لحاظ سے ہمارے شمالی علاقہ جات کا نصف ہے لیکن انہیں سیاحت سے 80 ارب ڈالر ملتے ہیں۔

انہوں نے کہا کہ ہمارا پورے ملک کی برآمدات ہی صرف 25 ارب ڈالر ہے، سوئٹزرلینڈ خوبصورتی میں اس علاقے کا مقابلہ نہیں کرسکتا لیکن وہاں قانون اور ان پر عملدرآمد ایسے ہیں کہ کوئی انہیں توڑ نہیں سکتا، وہ اپنے ملک کا دھیاں رکھتے ہیں، صفائی رکھتے ہیں اس لیے وہ اتنے خوشحال ہیں۔

بات کو جاری رکھتے ہوئے وزیراعظم نے کہا کہ اب ہم نے بھی اپنے تمام سیاحتی مقامات کا اسی طرح خیال رکھنا ہے اور یہیں سے ہم اتنا پیسہ کمائیں گے اور مقامی افراد کو اتنی نوکریاں ملیں گی انہیں روزگار کے لیے ان علاقوں سے باہر نہیں جانا پڑے گا۔

علاوہ ازیں وزیراعظم نے اپنے اراکین صوبائی و قومی اسمبلی کو ہدایت کی کہ آپ کی ذمہ داری ہے کہ اس علاقے کو بچائیں اور یہاں درختوں کو محفوظ کریں کیوں کہ اس کا سب سے زیادہ فائدہ آخر میں آپ ہی کو ہوگا۔

اسلام آباد: نیشنل کمانڈ اینڈ آپریشن سینٹر (این سی او سی) نے ملک بھر کے تعلیمی اداروں میں موسم گرما کی تعطیلات کی تجویز دے دی۔

تفصیلات کے مطابق این سی او سی کی جانب سے 18 جولائی سے ملک بھر کے تعلیمی اداروں میں موسم گرما کی تعطیلات کی تجویز پیش کی گئی ہے تاہم پنجاب نے اس سے اختلاف کیا ہے۔

این سی او سی نے اپنی تجویز میں 18 جولائی سے یکم اگست سے موسم گرما کی تعطیلات کا کہا ہے جب کہ پنجاب حکومت کا مؤقف ہےکہ موسم گرما کی تعطیلات ایک ماہ کے لیے دی جائیں جو 2 جولائی سے 2 اگست تک ہوں۔

ذرائع کا کہنا ہےکہ اس حوالے سے اب بین الصوبائی وزرائے تعلیم کی کانفرنس میں فیصلہ کیا جائے گا جو جلد طلب کیے جانے کا امکان ہے۔

وزیر اعظم کے سابق معاون خصوصی برائے اوورسیز پاکستانی زلفی بخاری نے ایک مرتبہ پھر اسرائیل کا خفیہ دورہ کرنے کی رپورٹس مسترد کر دیں۔

یہ دوسرا موقع ہے جب زلفی بخاری نے اسرائیل کا دورہ کرنے سے متعلق رپورٹس کی تردید کی ہے۔

اس سے قبل گزشتہ سال دسمبر میں انہوں نے اسی طرح کی رپورٹس مسترد کی تھیں اور دعویٰ کیا تھا کہ نومبر میں مبینہ دورے کے وقت ڈپٹی کمشنر راولپنڈی کے ساتھ تھے۔

نجی چینل ‘جیو نیوز’ کی رپورٹ کے مطابق اس وقت ان افواہوں کا اس نیوز رپورٹ کے بعد آغاز ہوا تھا جس میں دعویٰ کیا گیا تھا کہ وزیر اعظم کے معاون خصوصی نے امریکا سے دورے کی منظوری کے بعد نومبر 2020 میں تل ابیب ایئرپورٹ پر اسرائیلی حکام سے ملاقات کی تھی۔

رپورٹ میں دعویٰ کیا گیا تھا کہ برطانوی پاسپورٹ رکھنے والے نامعلوم مشیر کو اسرائیل کی وزارت خارجہ لے جایا گیا جہاں انہوں نے متعدد سیاسی عہدیداران اور سفارت کاروں سے ملاقات کی اور پاکستان کے وزیر اعظم کا پیغام ان تک پہنچایا۔

چونکہ زلفی بخاری برطانوی شہری بھی ہیں اس لیے سوشل میڈیا پر کئی افراد نے یہ قیاس آرائی شروع کردی کہ یہ رپورٹس ان سے متعلق ہیں۔

یہ معاملہ عبرانی اخبار ‘اسرائیل ہایوم’ میں نیوز رپورٹ شائع ہونے کے بعد آج ایک مرتبہ پھر منظر عام پر آیا، جس میں اسلام آباد کے نامعلوم ذرائع کا حوالہ دیتے ہوئے مبینہ دورے کا ذکر کیا گیا ہے۔

ہاریتز اخبار کے اَوی اسکارف نے کہا کہ رپورٹ کے مطابق زلفی بخاری نے انٹیلی جنس ایجنسی موساد کے سربراہ یوسی کوہن سے ملاقات کے لیے اسرائیل کا دورہ کیا۔

ان کا کہنا تھا کہ نیوز رپورٹ میں ‘اسلام آباد کے ذرائع’ کا حوالہ دیا گیا ہے اور اسے اسرائیلی ملٹری سینسر کی اجازت کے بعد شائع کیا گیا ہے۔

زلفی بخاری نے ان دعوؤں کو مسترد کرتے ہوئے کہا کہ ‘مذاق کی بات یہ ہے کہ پاکستانی اخبار ‘اسرائیلی نیوز ذرائع’ کی بنیاد پر کہہ رہا ہے کہ میں اسرائیل گیا جبکہ اسرائیلی اخبار ‘پاکستانی ذرائع’ کی بنیاد پر کہہ رہا ہے کہ میں نے اسرائیل کا دورہ کیا، تعجب ہے کہ یہ خیالی پاکستانی ذریعہ کون ہیں’۔

انہوں نے کہا کہ ‘بظاہر صرف میں وہ شخص تھا جو کسی الزام سے بچا ہوا تھا’۔

زلفی بخاری کے علاوہ وزیر اعظم کے فوکل پرسن برائے ڈیجیٹل میڈیا ارسلان خالد نے بھی ان دعوؤں کو مسترد کیا۔

انہوں نے کہا کہ ‘زلفی بخاری نے گزشتہ سال واضح کیا تھا کہ انہیں کبھی حکومت نے اسرائیل نہیں بھیجا، یہ اسرائیل ۔ بھارت ۔ پاکستان جعلی نیوز پیڈلرز کا نیٹ ورک بہت بورنگ اور قابل پیش گوئی ہو رہا ہے’۔

انہوں نے میڈیا سے بھی مطالبہ کیا کہ ‘وہ تھوڑی سنجیدگی کا مظاہرہ کریں اور جعلی خبروں کو فروغ نہ دے’۔

ان کا کہنا تھا کہ ‘آخری مرتبہ جب یہ پروپیگینڈا کیا گیا تھا تو زلفی بخاری نے نہ صرف اسے مسترد اور قانونی نوٹس بھیجا تھا بلکہ اسے رپورٹ کرنے والے ادارے مڈل ایسٹ مانیٹر نے معذرت بھی کی تھی’۔

وزیر خارجہ شاہ محمود قریشی نے کہا ہے کہ پاکستان نے امریکا کو فوجی اڈے دینے سے انکار ملکی مفاد کے پیشِ نظر کیا اور آئندہ بھی جو فیصلے کریں گے وہ ملکی مفاد کو مدِ نظر رکھتے ہوئے کریں گے۔

ایک بیان جاری کرتے ہوئے انہوں نے کہا کہ ہم نے فنانشنل ایکشن ٹاسک فورس (ایف اے ٹی ایف) کے معاملات کو سلجھانے کے لیے بھی جو کچھ کیا وہ ملکی مفاد میں کیا۔

سفارتی حمایت سے متعلق بات کرتے ہوئے ان کا کہنا تھا کہ اس مسئلے پر چین، سعودی عرب، ملائشیا، انڈونیشیا اور خلیجی ممالک نے کھل کر ہمارا ساتھ دیا۔

وزیر خارجہ نے بتایا کہ انہوں نے مختلف ممالک کے وزرائے خارجہ کے ساتھ دو طرفہ گفتگو میں، اس حوالے سے تبادلہ خیال کر کے انہیں اپنی تشویش سے آگاہ کیا ہے۔

انہوں نے ایک مرتبہ پھر دہرایا کہ بھارت ایف اے ٹی ایف کو سیاسی مقاصد کے لیے استعمال کر رہا ہے، ایف اے ٹی ایف ایک تکنیکی فورم ہے اسے سیاسی مقاصد کے لیے استعمال نہیں ہونا چاہیے۔

وزیر خارجہ کا کہنا تھا کہ اگر ایف اے ٹی ایف کا مقصد، منی لانڈرنگ اور دہشت گردی کی مالی معاونت کو روکنا ہے تو ہمارا ہدف بھی یہی ہے، یہاں ایف اے ٹی ایف اور ہماری سوچ یکجا ہے وہ اپنے طور پر کام کر رہے ہیں اور ہم اپنے مقاصد کے تحت اس پر عملدرآمد کر رہے ہیں۔

ان کا مزید کہنا تھا کہ گزشتہ دو برسوں کے دوران ہمیں ایف اے ٹی ایف کی جانب سے جو پروگرام دیا گیا اس پر عملدرآمد بہت مشکل تھا لیکن ہم نے کیا، ہم نے 14 قوانین میں ترامیم کیں، نئی قانون سازی کی اور انتظامی نوعیت کے اقدامات اٹھائے۔

انہوں نے کہا کہ ہم نے ذمہ داران کی نہ صرف نشان دہی کی بلکہ ان کے خلاف کارروائی بھی کی، اس ضمن میں پاکستان کی عدلیہ اور انتظامیہ اپنا اپنا کردار ادا کر رہی ہیں جبکہ ہماری مقننہ نے بھی اپنا ذمہ دارانہ کردار ادا کیا۔

وزیر خارجہ نے عزم ظاہر کیا کہ ہم اپنے مفاد کے پیش نظر، منی لانڈرنگ اور دہشت گردی کی مالی معاونت کو روکنے کے لیے آگے بڑھتے رہیں گے۔

شاہ محمود قریشی نے کہا کہ امریکی صدر جو بائیڈن نے کہا کہ ہم نے افغانستان میں 10 کھرب ڈالر خرچ کیے، فوج کو تربیت دی، ادارے کھڑے کیے تاہم امریکی رائے عامہ، امریکی افواج کے مزید افغانستان میں رکنے کے حق میں نہیں اور انخلا کے بعد بھی امریکی حکومت نے انہیں مالی معاونت جاری رکھنے کا یقین دلایا ہے۔

شاہ محمود قریشی کا کہنا تھا کہ افغانستان میں امن کا فیصلہ افغانوں نے خود مل بیٹھ کر کرنا ہے، یہ فیصلہ انہوں نے کرنا ہے کہ قانون کیسا ہونا چاہیے، کس کو کیا اختیارات حاصل ہوں گے، کس کے کیا حقوق ہوں گے، وغیرہ۔

وزیر خارجہ نے کہا کہ پاکستان بطور پڑوسی، افغانستان میں امن کے لیے دعاگو ہے اور جو معاونت بھی ممکن ہوئی ہم کرتے رہیں گے، ہماری پالیسی بہت واضح ہے ہم افغانستان میں امن و استحکام اور خوشحالی کے خواہش مند ہیں، چاہتے ہیں کہ افغانستان کے ساتھ ہماری تجارت دگنی ہو۔

وزیر خارجہ کا مزید کہنا تھا کہ افغانوں کے فیصلے ہم نہیں کر سکتے، ہم ان کے فیصلوں کا احترام کر سکتے ہیں، افغان عوام کو فریقین پر معاملات کے تصفیے کے لیے دباؤ ڈالنا چاہیے۔

جنوبی پنجاب کے حوالے سے بیان میں ملتان سے تعلق رکھنے والے رکن قومی اسمبلی کا کہنا تھا کہ میں اہلیان جنوبی پنجاب کو مبارکباد پیش کرتا ہوں کہ پہلی مرتبہ ان کے لیے بجٹ میں اس قدر خطیر رقوم رکھی گئیں اور اس بات کو یقینی بنایا گیا کہ جنوبی پنجاب کا بجٹ، جنوبی پنجاب کی ترقی پر خرچ ہو۔

شاہ محمود قریشی کا کہنا تھا کہ سابقہ ادوار میں 33 فیصد آبادی پر محض 17 فیصد ترقیاتی فنڈ خرچ ہوتا رہا۔

انہوں نے بتایا کہ جنوبی پنجاب سیکریٹریٹ کے لیے 63 ایکٹر زمین کی منتقلی مکمل ہو چکی ہے اور اگست کے پہلے ہفتے میں جنوبی پنجاب سیکریٹریٹ کا عملی طور پر کام شروع ہو جائے گا۔

وفاقی وزیر اطلاعات و نشریات فواد چوہدری کا کہنا ہے کہ عمران خان کی حکومت کو ہر ادارے کی بنیاد سے عمارت کھڑی کرنی پڑ رہی ہے کیونکہ ماضی میں سرکاری اداروں میں سیاسی بھرتیاں کرکے ان کا بیڑا غرق کردیا گیا۔

قومی اسمبلی میں اظہار خیال کرتے ہوئے فواد چوہدری نے کہا کہ ‘موجودہ دنیا میں رائے کی جنگ ہے، ہم اپنی بات کسی طرح بیان اور لوگوں تک پہنچا سکتے ہیں یہ اصل لڑائی ہے اور یہ لڑائی پاکستان کی لڑائی ہے’۔

انہوں نے کہا کہ ‘گزشتہ حکومتوں نے مسلسل وزارت اطلاعات کے اداروں کو ایسے محکمے بنانے کی کوشش کی جس کا مقصد ووٹرز کو نوکریاں دینا تھا، 10 سالوں میں صرف پی ٹی وی میں 2 ہزار 200 لوگ بھرتی کیے گئے، یہ لوگ یومیہ اجرت پر بھرتی ہوئے، جنہیں کمیٹی نے مستقل کردیا، ان لوگوں کو پی ٹی وی 32 کروڑ روپے تنخواہ ادا کر رہا ہے اور ان میں سے 5 فیصد بھی لوگ ایسے نہیں ہیں جنہیں کوئی ذمہ داری دی جاسکے’۔

ان کا کہنا تھا کہ ‘اس طرح پوری کارپوریشن بٹھا دی گئی، دیگر اداروں میں بھی اسی طرح سیاسی بھرتیاں کرکے ان کا بیڑا غرق کردیا گیا، آج عمران خان کی حکومت کو ہر ادارے کی بنیاد سے عمارت کھڑی کرنی پڑ رہی ہے، وزیر خزانہ نے اس بجٹ میں کوشش کی ہے کہ ہم اس جنگ میں آگے بڑھیں’۔

وفاقی وزیر نے کہا کہ ‘وزارت اطلاعات کو گزشتہ حکومتوں نے صرف حکمراں جماعت کا ترجمان بنا دیا، ہم اسے حکمراں جماعت کے بجائے ریاست کی ترجمان کا درجہ دے رہے ہیں اور اداروں کو مضبوط کر رہے ہیں، اگست کے پہلے ہفتے میں سرکاری ٹیلی ویژن (پی ٹی وی) مکمل ایچ ڈی ہوجائے گا جبکہ نیوز ایجنسی ایسوسی ایٹڈ پریس آف پاکستان (اے پی پی) کو غیر ملکی نیوز ایجنسیوں کی سطح پر لے جارہے ہیں، ہم ڈیجیٹل نیوز ایجنسی بنائیں گے اور اگست میں عالمی معیار کی نیوز ایجنسی اپنا کام شروع کرے گی’۔

انہوں نے کہا کہ ‘تیسری بڑی اصلاحات ریڈیو پاکستان کی پروگرامنگ کی صورت میں سامنے آئے گی، اسے ہم مکمل طور پر ڈیجیٹلائز کر رہے ہیں اور اگست میں ریڈیو پاکستان کی نئی پروگرامنگ سامنے آئے گی’۔

صحافیوں کے تحفظ کے حوالے سے ان کا کہنا تھا کہ ‘ملک میں کچھ عناصر کی طرف سے مسلسل ایک بین الاقوامی پروپیگنڈے کو سہارا دیا جارہا ہے، پاکستان کی صحافتی تاریخ میں صحافیوں پر سب سے زیادہ حملے پیپلز پارٹی کے دور میں ہوئے، 39 حملوں میں 32 صحافی جاں بحق ہوئے، مسلم لیگ (ن) کے دور میں 18 حملوں میں 14 صحافی جاں بحق ہوئے، تحریک انصاف کے دور میں 8 حملے ہوئے لیکن فرق یہ ہے کہ تمام مقدمات میں تفتیش ہوئی، ملزمان پکڑے گئے جن کے عدالتوں میں کیسز چل رہے ہیں’۔

فواد چوہدری نے مجوزہ میڈیا ریگولیٹری ادارے پاکستان میڈیا ڈیولپمنٹ اتھارٹی (پی ایم ڈی اے) سے متعلق بات کرتے ہوئے کہا کہ ‘مسلم لیگ (ن) کی رہنما مریم اورنگزیب نے پی ایم ڈی اے آرڈیننس کے خلاف بھرپور مہم چلائی، بعد میں معلوم ہوا کہ یہ جعلی خبر تھی اور اس طرح کا کوئی آرڈیننس جاری نہیں ہوا تھا، مریم اورنگزیب اور ان کے دوستوں کو جعلی خبر پر مہم چلانے پر معافی مانگنی چاہیے تھی’۔

انہوں نے کہا کہ ‘بھارت میں 3، 4 مقامات سے جعلی خبریں چلتی ہیں، جعلی ٹوئٹس وجود میں آتی ہیں، ان کو افغانستان سے طاقت ملتی ہے، پھر وہ ہمارے ملک میں آتی ہیں اور ہمارے کچھ نادان دوست اس کا حصہ بن جاتے ہیں، اس لیے ہمیں آزادی اظہار رائے کے بھاشن نہ دیے جائیں، ہمارے ملک میں چینلز آزادانہ طور پر کام کر رہے ہیں’۔

ان کا کہنا تھا کہ ‘ہمارے درمیان ان معاملات پر اتفاق ہونا چاہے جن کا تعلق پاکستان کے مفاد سے ہے، ہمیں اپنے چھوٹے چھوٹے سیاسی مفادات کے لیے بین الاقوامی اسٹیبلشمنٹ کے ہاتھوں استعمال اور دشمنوں کے ہاتھوں استعمال نہیں ہونا چاہیے’۔