Category تازہ ترین

وفاقی وزیر منصوبہ بندی و ترقیات اسد عمر نے کہا ہے چین سے رشتہ نیا نہیں، جب بھی دوست کی ضرورت پڑی تواس کی طرف دیکھا۔
چینی کمپنی سینچری اسٹیل کیلیے پہلی کنسائنمنٹ کی آمد کے موقع پر تقریب سے خطاب کے دوران وفاقی وزیر نے کہا حکومت جس طرح کورونا پر قابو پانے کی کوششیں کررہی ہے، اسی طرح سی پیک کی کامیابی کیلیے دن رات کام کررہی ہے، اس کے تحت منصوبے تیزی سے تکمیل کی جانب بڑھ رہے ہیں،اس کے تحت منصوبے صرف انفرااسٹرکچر تک محدود نہیں رہے،راشاکئی ایس ای زیڈ میں بجلی اور دیگر سمیت بنیادی ضروریات کی فراہمی کیلیے کام تیزی سے جاری ہے۔ چینی کمپنی سینچری اسٹیل 240 ارب ڈالر کی سرمایہ کاری سے سٹیل مل قائم کرے گی جو 15 لاکھ ٹن اسٹیل تیار کرے گی۔ وہ پہلے مرحلے میں 600 اوردوسرے مرحلے میں 1000 سے زائد پاکستانیوں کو ملازمتیں دے گی۔
وفاقی وزیر نے چیئرمین سی پیک اتھارٹی لیفٹیننٹ جنرل (ر) عاصم سلیم باجوہ کی کاوشوں کو سراہا۔ چینی قونصل جنرل لی بیجیان نے کہا کورونا کے باوجود حکومتی کوششوں سے ملکی معیشت مستحکم ہو رہی ہے ، تعمیراتی شعبہ تیزی سے ترقی کررہا ہے، جس کی بدولت سٹیل کی طلب بڑھ رہی ہے، سی پیک کا پہلا مرحلہ مکمل ہوگیا،سپیشل اکنامک زون میں زیادہ سے زیادہ سرمایہ کاری کے لئے پراعتماد ہیں۔

اگرچہ آکٹوپس بہت ذہین جانور ہے لیکن ایک بہت انوکھے واقعہ میں آکٹوپس نے ایک شخص پر حملہ کیا ہے۔
آسٹریلیا کے نوجوان ماہرِ ارضیات لانس کارلسن کو 18 مارچ کے روز یہ واقعہ پیش آیا۔ وہ آسٹریلیا کے جیوگراف بے کے ساحل پر اسنارکلنگ کررہے تھے کہ انہوں نے پہلے ایک جانور دیکھا جس پر اسٹنگ رے کا گمان ہوا جو پانی سے چھلانگ لگا کر ان کی جانب بڑھی۔
بعد ازاں انہوں نے اس کی ویڈیو بنانا شروع کی اور وہ ان کی جانب بڑھی لیکن فوراً ہی پانی میں غائب ہوگئی۔ اس واقعے کے بعد وہ اپنے کام میں مصروف ہوگئے اور قریب ہی کیکڑوں کے خول کے ڈھیر کو دیکھنے لگے۔ اچانک انہیں اپنے الٹے بازو پر سرسراہٹ محسوس ہوئی اور ساتھ ہی ان کی گردن اور کمر پر کوڑے کی طرح کوئی شے لگی۔انہون نے سوچا کہ شاید یہ کوئی آکٹوپس ہے جس کے گھر پر انہوں نے بے دھیانی پر پاؤں رکھ دیا تھا۔ تیرتے دوران ان کی آبی عینک دھندلاگئی اور شاید آکٹوپس سے خارج ہونے والی سیاہی سے پورا منظر دھندلاگیا تھا ۔ اب خوفزدہ ہوکر انہوں نے ساحل کا رخ کیا۔اس پورے عمل میں وہ بہت خوفزدہ تھے کیونکہ آکٹوپس خطرے کی صورت میں پانی میں سیاہی خارج کرتی ہیں لیکن اس واقعے میں آکٹوپس نے ان پر حملہ بھی کیا تھا۔ چند منٹوں بعد ان کی گردن پراور پیٹھ پر سرخ نشان نمایاں تھے۔ تاہم کارلسن نے اس سارے عمل کو بہت تکلیف دہ قرار دیا۔ اس سے 20 منٹ قبل کی ویڈیو میں بھی آکٹوپس کو غصے میں دیکھا جاسکتا ہے۔

قندھار میں افغان سیکیورٹی فورسز کے آپریشن کے دوران 37 طالبان ہلاک اور 28 زخمی ہوگئے۔
افغان وزارت دفاع کے مطابق صوبہ قندھار کے ضلع زہیرائی اور آرغنداب میں سیکیورٹی فورسز کے آپریشن کے دوران 37 طالبان ہلاک اور 28 زخمی ہوگئے، آپریشن کے دوران سیکیورٹی فورسز کو فضائیہ کی مدد بھی حاصل تھی جب کہ بڑی تعداد میں ہتھیاروں کو بھی تباہ کردیا گیا۔
افغان سیکیورٹی حکام کا کہنا ہے قندھار کے متعدد اضلاع پر طالبان کا قبضہ تھا تاہم گزشتہ روز آپریشن کے بعد ان اضلاع کو طالبان کے قبضے سے چھڑالیا گیا ہے جب کہ طالبان اپنی گاڑیاں اور لاشیں بھی چھوڑ کر بھاگ گئے ہیں۔

فیس بک نے آپ کی پوسٹ پر کسی مطلوبہ شخص کا تبصرہ یا کمنٹس روکنے کا آپشن پیش کردیا، یعنی پوسٹ کے ساتھ ہی اسے جزوی طور پر طنزیہ جواب یا ہراساں کرنے سے باز رکھا جاسکتا ہے۔
فیس بک پر کھلاڑیوں اور دیگر شخصیات نے اس جانب اپنی توجہ مبذول کرائی تھی کیونکہ ان کی پوسٹ پر رنگ، نسل اور دیگر تعصبات کی بنیاد پر ہر شخص نے اپنا منہ اور کمنٹس کا دہانہ کھول رکھا تھا۔ فیس بک نے اب اپنے پلیٹ فارم پر نفرت اور نسل کی بنا پر نازیبا جملوں کو روکنے کا ایک اہم ٹول پیش کردیا ہے۔
کمپنی کے مطابق اس ٹول سے لوگ ایک جانب تو پوسٹ کو تمام افراد، مخصوص افراد یا گروپ کے لیے منتخب کرسکتےہیں۔ اس طرح یہ پوسٹ وہی دیکھ سکیں گے اور عوامی پوسٹ پر بھی مخصوص افراد کو کمنٹس سے روکا جاسکے گا۔ یہ سہولت پہلے ہی فیس بک کے ایک اور پلیٹ فارم انسٹاگرام پر بھی پیش کی جاچکی ہے۔
’لوگوں کو عوامی پوسٹ پر مزید کنٹرول فراہم کرکے، ہم پرامید ہیں کہ وہ اپنے مندرجات میں مدد لیتے ہوئے غیرضروری مداخلت کو روک سکیں گے،‘ فیس بک نے اپنے اعلامئے میں کہا۔
فیس بک نے مزید کہا کہ اگر آپ عوامی شخصیت، کوئی تخلیق کار یا کسی برانڈ سے وابستہ ہیں تو آپ بھی کمنٹ کرنے والے افراد کو محدود رکھ سکتےہیں۔ اس سے آپ کا تحفظ بڑھے گا اور آپ کمیونٹی میں بامعنی گفتگو شروع کرسکیں گے۔
واضح رہے کہ برطانوی فٹبال کھلاڑیوں کو فیس بک پر ایسے ہی مسائل کا سامنا تھا اور وہ اس پلیٹ فارم سے دور ہوتے جارہے تھے۔ تاہم کئی کھلاڑیوں نے کہا تھا ان کی پوسٹ پر نسلی منافرت کے کمنٹس روکنے میں فیس بک ناکام رہا ہے۔ اس کے بعد ہی فیس بک نے یہ قدم اٹھایا ہے۔

فخر زمان کے بیٹ کی ضرب سے ریکارڈز کا طوفان جاری ہوگیا، ون ڈے کرکٹ میں ہدف کے تعاقب میں سب سے بڑی اننگز کھیل ڈالی، وانڈررز اسٹیڈیم میں بھی اپنا جھنڈا گاڑ دیا،اننگز میں سب سے زیادہ چھکے جڑنے والے دوسرے پاکستانی بن گئے۔
تفصیلات کے مطابق جنوبی افریقہ کے خلاف دوسرے ون ڈے میں پاکستان کے اوپنر فخر زمان نے 193 رنز کی اننگز کھیلی، اگرچہ وہ ٹیم کو فتح سے ہمکنار نہیں کرپائے مگر کئی ریکارڈ اپنے نام کرنے میں ضرور کامیاب رہے، یہ ون ڈے انٹرنیشنل کرکٹ میں ہدف کے تعاقب میں کھیلی جانے والی سب سے بڑی اننگز ہیں جبکہ شکست سے دوچار ہونے والی ٹیم کے کسی بھی کھلاڑی کی جانب سے دوسری بڑی اننگز بھی ہے۔ فخر زمان نے جوہانسبرگ کے وانڈررز اسٹیڈیم پر سب سے بڑی انفرادی اننگز کا ریکارڈ بھی اپنے نام کرلیا ہے۔
اس سے قبل یہاں پر سب سے زیادہ 175 رنز بنانے کا اعزاز ہرشل گبز کے پاس تھا۔ جنوبی افریقہ میں کسی بھی مہمان کھلاڑی کی جانب سے سب سے بڑی ون ڈے اننگز کھیلنے کا ریکارڈ بھی اب فخر کے نام ہوچکا ہے، ان سے قبل اس ریکارڈ پر آسٹریلیا کے ڈیوڈ وارنر قابض تھے جنھوں نے 2016 میں 173 رنز بنائے تھے۔ پاکستان کی جانب سے ون ڈے انٹرنیشنل کرکٹ میں سب سے بڑی اننگز میں فخر زمان کی تازہ کاوش تیسرے نمبر پر رہی، ٹاپ پر بھی فخر 210 رنز ناٹ آؤٹ کے ساتھ موجود ہیں جوکہ انھوں نے 20 جولائی 2018 کو بولاوایو میں زمبابوے کے خلاف اسکور کیے تھے۔دوسرے نمبر پر سعید انور 194 رنز کی اپنی شہرہ آفاق اننگز کے ساتھ موجود ہیں جوکہ انھوں نے 21 مئی 1997 کو چنئی میں بھارت کے خلاف کھیلی اور طویل عرصے تک یہ ایک روزہ کرکٹ کی سب سے بڑی انفرادی اننگز رہی تھی۔ فخر زمان نے اتوار کے میچ میں 10 چھکے جڑے، یہ کسی بھی پاکستانی کھلاڑی کے ایک ون ڈے میں دوسرے سب سے زیادہ چھکے ہیں، اس فہرست میں ٹاپ پر 11 چھکوں کے ساتھ شاہد آفریدی موجود ہیں۔

مسلم لیگ ن کے قائد اور سابق وزیراعظم نوازشریف سے متعلق نیب کی متفرق درخواستیں سماعت کیلئے مقررکر دی گئیں۔
نجی ٹی وی اے آر وائی نیوز کے مطابق اسلام آبادہائیکورٹ کا ڈویژن بنچ آٹھ اپریل کودرخواستوں پر سماعت کرے گا،ڈویژن بنچ میں جسٹس عامر فاروق اورجسٹس محسن اخترکیانی شامل ہونگے ۔
نیب نے العزیزیہ کیس میں نوازشریف کی سزا14 سال کرنے کی استدعاکی ہے ،نوازشریف کی فلیگ شپ ریفرنس میں بریت کیخلاف اپیل سماعت کیلئے مقررکردی گئی،نیب نے آرٹیکل 151 کے تحت درخواستیں دائر کیں ۔
نیب کی درخواست میں موقف اختیارکیاگیاہے کہ نوازشریف سزایافتہ مجرم ہیں ،نوازشریف کی اپیلوں پرآخری سماعت نودسمبر2020 کو ہوئی تھی ،نوازشریف کو عدالت طلب کرکے قانون کے مطابق کارروائی کی جائے ،نوازشریف میگاکرپشن کیسز میں ملوث ہیں ۔

کیپٹل سٹی پولیس پشاور نے بین الصوبائی سمگلر گروہ کا سراغ لگا لیا، تھانہ بڈھ بیر پولیس نے کامیاب کارروائی کرتے ہوئے آئس فروخت کرنے والے گروہ کی خاتون رکن کو گرفتار کرلیا۔
ایس ایس پی آپریشنز یاسر آفریدی کے مطابق ملزمہ کے قبضے سے ساڑھے پانچ کلو گرام سے زائد اعلی کوالٹی کی آئس (منشیات) برآمد ہوئی جسے راولپنڈی اور پنجاب کے دیگر شہروں میں سپلائی کیا جانا تھا۔ایس ایس پی آپریشنز کے مطابق برآمد کی گئی منشیات کی مالیت کروڑوں روپے ہے۔ دوران تفتیش ملزمہ نے اپنے پورے نیٹ ورک کی نشان دہی کردی ہے جن کی گرفتاری کے لیے خصوصی ٹیم تشکیل دے دی گئی ہے۔

بلاگر عظیم خان کے ساتھ محبت کے ڈراپ سین کے بعد پاکستانی اداکارہ صبا قمر نے اپنی آنے والی میوزک ویڈیو کی تاریخ کا اعلان کردیا۔
صبا قمر نے سوشل میڈیا پر 25 سکینڈ پر محیط ‘چنگاریاں’ کا ویڈیو کلپ شیئر کیا جس میں وہ ہنسنے اور مسکرانے کے بعد روتی ہوئی نظر آتی ہیں۔انہوں نے ویڈیو کے کیپشن میں لکھا کہ محبت ایک خاص قسم کی بہادری چاہتی ہے جس میں ہم بار بار چوٹ کھا کر بھی سنبھل جائیں، ‘چنگاریاں’ جو میرے دل سے بہت قریب ہے اور یہ ایک ایسی کہانی پر مبنی گیت ہے جو آپ سب سے متعلق ہے، یہ گیت 5 اپریل کو (آج ) میری سالگرہ کے موقع پر ریلیز ہوگا۔

پاکستان پیپلز پارٹی کے چیئرمین بلاول بھٹو زرداری کا کہنا ہےکہ جن جماعتوں نے گیلانی کو نا اہل کروایا، انہی کے ووٹوں سے ہم گیلانی کو پارلیمنٹ میں لے آئے۔

نوڈیرو میں سابق وزیراعظم اور بانی پیپلز پارٹی ذوالفقار علی بھٹو کی برسی کی تقریب سے خطاب کرتے ہوئے بلاول کا کہنا تھا کہ 3 سال میں ملکی معیشت کو جتنا نقصان پہنچا ، ملکی تاریخ میں نہیں پہنچا ، ایسی مہنگائی آپ کے بزرگوں نے بھی نہيں دیکھی۔

بلاول بھٹو کا کہنا تھا کہ آج ہمیں ہر پاکستانی کو مہنگائی ، غربت اور بے روزگاری سے آزادی دلوانی ہے۔

چیئرمین پیپلز پارٹی کا کہنا تھا کہ ہم نے ان لوگوں کے ساتھ کام کیا جن لوگوں نے آصف زرداری پر تشدد کیا،11 سال جیل میں رکھا، بڑے مقصد کے لیے ہمارے ساتھ جو ہوا وہ بھولنے کے لیے تیار ہیں،جن جماعتوں نےگیلانی کو نااہل کروایا، انہی کے ووٹوں سے ہم گیلانی کو پارلیمنٹ میں لےآئے۔

ان کا کہنا تھا کہ پیپلزپارٹی چاہتی ہے اپوزیشن کی سیاسی جماعتیں مل کربرابری اور عزت کے ساتھ کام کریں، پیپلزپارٹی اپوزیشن کے ساتھ مل کریا اکیلے اپوزیشن کے لیے تیار ہے ، افسوس ہےجب لانگ مارچ کے موقع پرسب تیاری تھی تو اپوزیشن نے اپوزیشن کے ساتھ اپوزیشن شروع کی۔

وزیر خارجہ شاہ محمود قریشی نے دنیا پر زور دیا ہے کہ وہ بھارت کے غیرقانونی زیرقبضہ جموں و کشمیر میں بھارتی مظالم کا نوٹس لے۔

انہوں نے آج ملتان میں ایک پریس کانفرنس سے خطاب کرتے ہوئے کہا کہ بھارتی قابض افواج کی جانب سے مقبوضہ کشمیر میں انسانی حقوق کی سنگین خلاف ورزیوں کے باعث مقبوضہ وادی کی صورتحال انتہائی خراب ہو گئی ہے۔

وزیر خارجہ نے کہا کہ مقبوضہ کشمیر کا خصوصی درجہ ختم کرنے کے بھارت کے غیرقانونی اقدام کے باعث خطے کی صورتحال پیچیدہ اور غیریقینی ہو گئی ہے۔

انہوں نے کہا کہ پاکستان نے مسئلہ کشمیر کو ہربین الاقوامی فورم پر اٹھایا ہے اور وہ اس تنازعے کو مذاکرات کے ذریعے حل کرنا چاہتا ہے۔

وزیر خارجہ نے کہا کہ فریقین کے پاس خطے میں امن و استحکام کے قیام کا واحد راستہ مذاکرات ہیں کیونکہ دونوں ملک ایٹمی قوت ہیں اور وہ جنگ کے متحمل نہیں ہو سکتے۔

انہوں نے کہا کہ اگر بھارت پاکستان کے ساتھ تعلقات معمول پر لانا چاہتا ہے تو اسے اس کیلئے سازگار ماحول قائم کرنا ہوگا۔