Category تازہ ترین

9مئی کے فسادات کے ایک اور شر پسند سر غنہ کی شناخت ہو گئی، محمد ناظم عباس کا 9مئی کے حملوں میں کلیدی کردار رہا۔شر پسند کی نو مئی کو املاک کو نقصان پہنچانے کی ویڈیو منظرِ عام پر آگئی، محمد ناظم عباس کا تعلق پی پی 95 چنیوٹ سے ہے اوروہ نثار کالونی لاہور میں رہتاہے۔وہ 9مئی کے توڑ پھوڑ اور حملوں میں صفِ اول میں شامل رہا، ناظم عباس شرپسندوں کی سرپرستی کرتے ہوئے انھیں اشتعال دلاتا رہا

پاکستان تحریک انصاف (پی ٹی آئی) کے سابق رہنما جہانگیر ترین نے آنے والے دنوں میں قائد مسلم لیگ ن نواز شریف سے ملاقات کرنے کیلئے لندن جانے کا فیصلہ کرلیا۔
مسلم لیگ ن سے مستقبل کی انتخابی حکمت عملی پر مشاورت اور انتخابی اتحاد کیلئے جہانگیر ترین نے نواز شریف سے ملاقات کا فیصلہ کیا ہے۔ آئندہ عام انتخابات میں ن لیگ سے ایڈجسٹمنٹ کیلئے جہانگیر ترین چند دنوں میں لندن جائیں گے
جہانگیر ترین آج بھی اسلام آباد میں کئی اہم شخصیات سے ملاقاتیں کریں گے۔ اس حوالے سے پنجاب سے تحریک انصاف چھوڑنے والی اہم شخصیات کا بھی رابطہ ہوا ہے جبکہ گروپ کے دیگر ممبران سے بھی ٹیلیفونک رابطے جاری ہیں

ملک میں سالانہ بنیادوں پر مہنگائی تاریخ کی بلند ترین سطح 38 فیصد تک پہنچ گئی،یہ ملکی تاریخ کی بھی بلند ترین شرح ہے جبکہ جنوبی ایشیا میں بھی سب سے بلند سطح ہے۔موقر قومی اخبار کی رپورٹ کے مطابق مئی میں مہنگائی تخمینے سے تقریبا 4 فیصد زیادہ رہی، تعلیم، صحت، بجلی، گیس اور ایندھن سمیت ہر چیز مہنگی ہوگئی۔وفاقی ادارہ شماریات کے مطابق شہری علاقوں میں مہنگائی 35.1فیصد کی سطح پر ریکارڈ کی گئی جبکہ دیہی علاقوں میں مہنگائی 42.2فیصد کی بلند ترین سطح تک پہنچ گئی۔وفاقی ادارہ شماریات کی جانب سے جاری مہنگائی کے اعداد و شمار کے مطابق قومی سطح پر ایک سال میں کھانے پینے کی اشیا 48.65فیصد جبکہ ٹرانسپورٹ کرائے 53فیصد مہنگے ہوگئے۔ایف بی ایس کے مطابق تفریحی سہولیات گزشتہ سال کی نسبت 72فیصد مہنگی ہوئیں جبکہ ریسٹورنٹ اور ہوٹل چارجز میں بھی 42فیصد سے زیادہ اضافہ ریکارڈ کیا گیا۔دوسری جانب یوٹیلٹی سٹورز پر گھی کی قیمتوں میں کمی کے بعد دیگر کئی اشیائے ضروریہ کے نرخ بڑھادئیے گئے، مختلف اشیاء کی قیمتوں میں تین روپے سے ایک سو نوے روپے تک کا اضافہ کردیا گیا۔یوٹیلیٹی اسٹورز پرمختلف اشیاء کی قیمتوں میں اضافے کا نوٹیفکیشن جاری کردیا گیاجس کے مطابق 450 گرام جیمزکی قیمت میں 74روپے،500 گرام شہد کی قیمت میں 101روپے اورایک کلو چکن سپریڈ کی قیمت میں 190روپے کا اضافہ ہوا،ایک کلو مایونیز100روپے تک مہنگی کی گئیں۔نوٹیفکیشن کے مطابق کیچپ کی800 گرام قیمت79 روپے،ساسز کی800 گرام قیمت میں 79روپے کا اضافہ اورایک کلو اچار80 روپے تک مہنگا کردیا گیا۔اسی طرح یوٹیلیٹی اسٹورز پر دستیاب جوشاندہ کی قیمت میں 3روپے جبکہ اسپغول کی قیمت میں 30 روپے تک کا اضافہ کیا گیا،نئی قیمتوں کااطلاق فوری طور پر کردیا گیا ہے

لاہور کی انسداد دہشتگردی عدالت کے جج اعجاز احمد بٹر نے درخواست ضمانت پر سماعت کی، پی ٹی آئی رہنما عدالت کے روبرو پیش ہوئے۔ عدالت نے ایک لاکھ روپے کے ضمانتی مچلکوں کے عوض اسد عمر کی 13 جون تک ضمانت منظور کی۔دوسری جانب 9 مئی کے مقدمات میں گرفتار پی ٹی آئی رہنما اعجاز چوہدری سے متعلق پولیس کا کہنا ہے کہ دوران ریمانڈ اعجاز چوہدری سے پستول برآمد کرکے فرانزک لیب بھجوا دی گئی ہے۔پولیس کا کہنا ہے کہ برآمد اسلحے کی فرانزک رپورٹ تفتیش کا حصہ ہوگی، اعجاز چوہدری پر 9 مئی کو مسلح ہو کر احتجاج کا الزام ہے، ملزم کا فوٹو گرامیٹک ٹیسٹ کروایا جا چکا ہے، جو ملزم کی 9 مئی کی ویڈیوز کا تعین کرے گا

نیب ترمیمی ایکٹ 2023کا نوٹیفکیشن جاری کردیا گیا جس کے بعد نیا قانون نافذ العمل ہو گیا۔نئے قانون کے تحت چیئرمین کے اختیارات میں اضافہ ہوگیا اور وہ کیسز اور انویسٹی گیشنز بند کرسکیں گے،نیب کے سیکشن5 کے برعکس بننے والے تمام کرپشن کیسز بند کر دئیے جائیں گے۔چیئرمین نیب کرپشن کیسز کی انکوائریز، انویسٹی گیشن بند کرنے اور دیگر متعلقہ اداروں کو بھجوا سکیں گے،چیئرمین نیب کی عدم دستیابی کی صورت میں ڈپٹی چیئرمین کو مکمل اختیارات حاصل ہوں گے

اسلام آباد، راولپنڈی کے مختلف علاقوں میں تیز بارش سے نشیبی علاقوں میں پانی جمع ہو گیا، مری، گلیات اور گردونواح میں بارش ژالہ باری کا امکان ظاہر کیا گیا ہے۔
بارش کی وجہ سے ملتان،ہری پور میں درجہ حرارت میں کمی واقع ہوئی، بارش سے کوہاٹ کا موسم بھی خوشگوار ہو گیاہے،میرپور اور گردونواح میں رات سے بارش کا سلسلہ جاری ہے۔بارکھان، موسٰی خیل، لسبیلہ، خضدار اور گردونواح میں بارش کی پیشگوئی کی گئی ہے، بھکر،میانوالی، ڈی جی خان سرگودھا،جوہر آباد،خوشاب،بہاولپور، بہاولنگر، لیہ، فیصل آباد، ساہیوال، لاہور میں بھی بارش کاامکان ہے۔قصور،گوجرانوالہ، گجرات، سیالکوٹ، راولپنڈی، جہلم،اٹک، سیالکوٹ، نارووال، گوجرانوالہ، گجرات،سکھر، لاڑکانہ، جیکب آباد، کراچی اور گر دو نواح میں بارش کی پیشگوئی کی گئی ہے۔چیف میٹرولوجسٹ سردار سرفراز کا کہنا ہے کہ شمال مشرقی بلوچستان،جنوبی پنجاب میں بارش کا سلسلہ 2دن تک جاری رہے گا،بالائی خیبرپختونخوا میں بھی بارش کا اسپیل 2دن رہے گا،آج بھی ملک کے مختلف شہروں میں بارش کا سلسلہ جاری رہنے کی پیشگوئی کی گئی ہے۔

خرطوم : سوڈان کے دارالحکومت خرطوم میں فوج اور پیرا ملٹری فورسز کی جنگ میں درجنوں بچے بھوک اور پانی کی کمی سے جان کی بازی ہار چکے ہیں۔

برطانوی خبررساں ایجنسی کی رپورٹ میں انکشاف کیا گیا ہے کہ سوڈان میں 15 اپریل سے جاری فوج اور پیراملٹری فورسز کے درمیان جھڑپوں کے دوران دارالحکومت خرطوم کے ایک یتیم خانے میں 50 سے زائد بچے غذائی قلت کی وجہ سے ہلاک ہوگئے ۔

رپورٹ میں بتایا گیا ہے کہ جنگ شروع ہونے کے بعد سے خرطوم میں واقع میوگوما کے سرکاری یتیم خانے میں بچوں کی دیکھ بھال کے لیے درکار عملہ موجود نہیں چونکہ ہر تین گھنٹے بعد بچوں کو کھانا کھلانا ہوتا ہے توعملے کی غیر موجودگی نے صورتحال کو تشویش ناک بنا دیا ۔

جنگ شروع ہونے کے بعد سے خرطوم کے یتیم خانوں میں کام کرنے والا عملہ گھر رہنے یا پھر نقل مکانی پر مجبور ہوگیا۔

رپورٹ کے مطابق غذائی قلت کی وجہ سے ہونے والی زیادہ تر اموات نوزائیدہ بچوں کی ہیں، جن کی عمر ایک سال سے کم ہے اور شدید غذائی قلت اور پانی کی کمی کے باعث صرف جمعہ کے روز ہی 13 بچے جان سے ہاتھ دھو بیٹھے ۔

ریاست خرطوم میں سماجی ترقی کی وزارت کے ڈائریکٹر جنرل صدیق الفارینی نے کہا ہے کہ  اموات کی بڑی وجہ بنیادی طور پر عملے کی کمی اور لڑائی کی وجہ سے بجلی کی بار بار بندش تھی۔

دوسری جانب سوڈان کی فوج اور ریپڈ سپورٹ فورسز ( آر ایس ایف ) کی جانب سے جنگ بندی میں توسیع پر اتفاق کیا گیا ہے، اپریل کے وسط میں جنرل عبدالفتاح البرہان کی قیادت میں فوج اور آر ایس ایف کے رہنما جنرل محمد حمدان دگالو کے درمیان لڑائی شروع ہونے کے بعد سوڈان افراتفری کا شکار ہے۔

تنازعہ نے دارالحکومت اور دیگر شہری علاقوں کو جنگ کے میدانوں میں تبدیل کر دیا ہے جس کی وجہ سے تقریباً 1.4 ملین افراد سوڈان کے اندر اپنے گھر بار چھوڑ کر محفوظ علاقوں کی طرف یا پڑوسی ممالک میں جانے پر مجبور ہو گئے ہیں۔

سوڈان کی طبی تنظیموں کے مطابق لڑائی کے دوران کم از کم 866 شہری ہلاک اور ہزاروں زخمی ہوئے ہیں۔

واضح رہے 49 ملین کی آبادی والا سوڈان دنیا کے غریب ترین ممالک میں سے ایک ہے، اس ملک میں لڑائی نے قبل ہی صحت کی دیکھ بھال کی خدمات ناقص ہیں۔

ملتان : پنجاب کے ضلع ملتان میں مخالفین کی جانب سے دکان پر فائرنگ کے نتیجے میں 4 افراد زخمی ہوگئے۔

ملتان پولیس کے مطابق گھنٹہ گھر چوک میں واقع دکان پر مخالف گروپ کی جانب سے فائرنگ کی گئی جس کے نتیجے میں چار افراد زخمی ہوئے جبکہ زخمی ہونے والے تمام افراد کو نشتر ہسپتال منتقل کر دیا گیا ہے جہاں انہیں طبی امداد فراہم کی جارہی ہے۔

پولیس نے مزید بتایا کہ واقعے میں ملوث ملزمان کی گرفتاری کے لئے کارروائی کا آغاز کر دیا گیا ہے۔

فیصل آباد : فیصل آباد ایئر پورٹ پر ایئر پورٹس سکیورٹی فورس کے عملے نے کارروائی کرتے ہوئے شارجہ جانے والے مسافر سے 3.2 کلو گرام آئس ہیروئن برآمد کر لی۔

ترجمان کے مطابق مسافر اشرف علی نے سفری بیگ کے اندر موجود سوہن حلوے کے 2 ڈبوں میں حلوے کی تہہ کے نیچے مہارت سے منشیات چھپا رکھی تھی۔

ترجمان نے بتایا کہ اے ایس ایف کے عملے نے سامان کی تلاشی کے دوران منشیات برآمد کر کے سمگلنگ کی کوششں ناکام بنا دی۔

ملزم کو ابتدائی تفتیش کے بعد برآمد شدہ منشیات سمیت مزید قانونی کارروائی کے لیے اینٹی نارکوٹکس فورس (اے این ایف) کے حکام کے حوالے کر دیا گیا۔
 

اردن میں ولی عہد شہزادہ الحسین بن عبد اللہ الثانی کی سعودی خاتون انجینئر رجوۃ خالد السیف کے ساتھ شادی کے 2 روزہ جشن کا آغاز آج سے ہوگیا ہے۔

اردن کے سرکاری خبررساں ادارے کے مطابق شاہ عبداللہ الثانی اس موقع پر الہاشمی ایوان شاہی میں عشائیہ دیں گے جس میں چار ہزار سے زیادہ اردنی شہری شریک ہوں گے۔ عشایے کے دوران اردن کے گیت اور نظمیں پیش کی جائیں گی جن کے ذریعے ملک کے رنگا رنگ ثقافتی ورثے کا اظہار ہوگا۔

کل زہران محل میں نکاح کی رسم ادا ہوگی جس کے بعد شاہی جوڑے کا کارواں سرخ جلوس کے جلو میں الحسینیہ محل کا رخ کرے گا۔ اس موقع پر شاہی جوڑے کا کارواں دارالحکومت عمان کی متعدد سڑکوں سے گزرے گا۔ جنہیں قومی پرچموں سے آراستہ کر دیا گیا ہے۔

شادی کی خوشی میں ملکہ اردن رانیہ العبداللہ الحسینیہ محل میں استقبالیہ دیں گی جس کے بعد باقاعدہ عشایے کا اہتمام ہوگا۔

اردن کے شاہی جوڑے کی شادی کی تقریبات میں شرکت کے لیے مہمان عمان پہنچنے لگے ہیں جس میں برادر اور دوست ممالک کے سربراہ، ولی عہد اور ممتاز شخصیات شامل ہیں۔

واضح رہے کہ اس سے قبل ان کی شادی کی تقریبات کا آغاز گزشتہ دنوں مہندی کی تقریب سے ہوا تھا جس میں ملکہ رانیہ کی جانب سے پرتکلف عشائیہ دیا گیا تھا۔ اس تقریب میں شاہی اور دلہن کے خاندان کے افراد کے علاوہ اہم شخصیات نے شرکت کی تھی۔

مہندی کی تقریب اور عشایے میں اردنی اور سعودی روایتی گیت گائے گئے تھے جب کہ نامور گلوکاروں اور میوزیکل گروپ نے بھی پرفارم کیا تھا۔اس تقریب کے لیے ولی عہد کی ہونے والی دلہن رجوۃ خالد السیف نے مہنگے ترین سعودی برانڈ کا لباس زیب تن کیا تھا۔