Category پاکستان

لاہور ہائی کورٹ نے پی ٹی آئی کے 72 ارکانِ قومی اسمبلی کے استعفوں کی منظوری کے خلاف درخواستوں پر فیصلہ جاری کر دیا۔

عدالتِ عالیہ نے اسپیکر قومی اسمبلی راجہ پرویز اشرف اور الیکشن کمیشن آف پاکستان کی جانب سے پی ٹی آئی ارکانِ قومی اسمبلی کے استعفوں کی منظوری کا نوٹیفکیشن کالعدم قرار دے دیا۔

لاہور ہائی کورٹ نے ارکان کو استعفے واپس لینے کے لیے اسپیکر کے سامنے پیش ہونے کی ہدایت کر دی۔

عدالتِ عالیہ نے اسپیکرِ قومی اسمبلی راجہ پرویز اشرف کو تمام ممبران کو دوبارہ سن کر فیصلہ کرنے کی ہدایت بھی کی۔

لاہورہائی کورٹ نے فواد چوہدری، حماد اظہر، شاہ محمود قریشی، شفقت محمود اور ریاض فتیانہ سمیت 72 ارکانِ قومی اسمبلی کے استعفے منظور ہونے کا نوٹیفکیشن کالعدم قرار دیا ہے۔

اسلام آباد:ادارہ شماریات نے ہفتہ وار مہنگائی کے اعدادوشمار جاری کردئیے۔ادار ہ شماریات کے مطابق ایک ہفتے میں مہنگائی کی شرح میں 0.16 فیصد کی کمی ہوئی ،مہنگائی کی مجموعی شرح 45.72 فیصد پر آگئی، ایک ہفتے میں 23 اشیاء ضروریہ کی قیمتوں میں اضافہ ہوا، 13 اشیاء کی قیمتوں میں کمی ہوئی، ایک ہفتے میں زندہ مرغی کی فی کلو قیمت میں 32 روپے تک اضافہ ہوا، ایک ہفتے زندہ مرغی کی فی کلو قیمت 460 روپے تک پہنچ گئی۔ادارہ شماریات کے مطابق ایک ہفتے میں برانڈڈ چائے کا 190 گرام پیکٹ 24 روپے تک مہنگا ہوا، انڈوں کی فی درجن قیمت میں چھ روپے کا اضافہ جبکہ ٹماٹر 1 رو پے سے زائد اور دہی دو روپے فی کلو مہنگا ہوا، ایک ہفتے میں دال مونگ 3 روہے 38 پیسے مہنگی ہوئی اور ٹوٹا باسمتی چاول 2 روپے فی کلو تک مہنگا ہوا۔

چیئرمین پی ٹی آئی عمران خان نے نیب کے طلبی نوٹس کا جواب دے دیا۔

عمران خان نے 5 صفحات پر مشتمل جواب جمع کرایا، جس میں چیئرمین پی ٹی آئی نے کہا ہے کہ نیب کا بنایا گیا کیس غلط اور جھوٹا ہے۔

عمران خان کا جواب میں کہنا ہے کہ نیب کا کیس انکوائری سے انویسٹی گیشن میں بدلنا سیاسی کیس ہے۔

عمران خان نے کہا ہے کہ ‏مختلف مقدمات میں قبل ازگرفتاری ضمانتیں کرانے کے لیے لاہور میں ہوں، اسلام آباد ہائی کورٹ نے 22 مئی تک مقدمات میں ضمانتیں لینے کا وقت دیا ہے۔

نیب طلبی نوٹس پر جواب دیتے ہوئے سابق وزیر اعظم نے کہا کہ نیب میں پیش نہیں ہو سکتا۔

پی ٹی آئی چیئرمین کا کہنا ہے کہ نیب انکوائری کو انویسٹی گیشن میں تبدیل کرنے کا کام غیرقانونی ہے، نیب قانون آئین سے متصادم ہے۔

عمران خان نے جواب میں نیب سے انکوائری رپورٹ بھیجنے کی بھی درخواست کی۔

عمران خان کا کہنا ہے کہ نیب کے 2 مارچ کو دیے نوٹس کا مکمل تفصیلی جواب جمع کرایا تھا۔

انہوں نے کہا کہ نیب نے توشہ خانہ کیس میں جس انداز سے نوٹس دیا وہ طریقہ کار اس نوٹس میں اپنایا گیا۔

برطانیہ سے رقم منتقلی کیس کوبھی اسلام آبادہائی کورٹ میں چیلنج کیا گیا،عمران خان کا جواب

واضح رہے کہ گزشتہ روز نیشنل کرائم ایجنسی برطانیہ کے 190 ملین پاؤنڈ کے کیس میں قومی احتساب بیورو (نیب) نے چیئرمین پی ٹی آئی عمران خان کو طلبی کا نوٹس دیا تھا۔

نوٹس میں عمران خان کو آج صبح 10 بجے نیب راولپنڈی میں پیش ہونے کی ہدایت کی گئی تھی۔

راولپنڈی میں پُرتشدد مظاہروں کے دوران جی ایچ کیو پر ہونے والے حملے کے کیس میں اہم پیش رفت ہوئی ہے، نعرے بازی اور جی ایچ کیو گیٹ پر حملے کے مزید 15 ملزمان کی شناخت کر لی گئی۔

پولیس ذرائع کے مطابق شرپسندوں کی گرفتاریوں کے لیے چھاپے مارے جا رہے ہیں، 15 شر پسندوں کو جی ایچ کیو پر حملے کے مقدمے میں شامل کر لیا گیا ہے۔

پولیس ذرائع کا کہنا ہے کہ جی ایچ کیو حملہ کیس میں آرمی ایکٹ کی دفعات شامل کر کے تحقیقات حساس اداروں کے سپرد کی جائیں گی۔

پولیس ذرائع نے بتایا ہے کہ شر پسندوں کے خلاف مختلف تھانوں میں 18 مقدمات درج ہیں۔

جی ایچ کیو پر حملے کی ایف آئی آر تھانہ آر اے بازار میں درج کی گئی ہے۔

پولیس ذرائع نے یہ بھی بتایا ہے کہ جی ایچ کیو پر حملے میں ملوث 76 سے زائد شر پسندوں کو اب تک گرفتار کیا جا چکا ہے۔

آرمی چیف جنرل عاصم منیر نے کہا ہے کہ کسی کو شہداء کی یادگاروں کی بےحرمتی کرنے کی اجازت نہیں دی جائے گی۔

پاک فوج کے شعبہ تعلقات عامہ آئی ایس پی آر کے مطابق آرمی چیف نے سیالکوٹ گیریژن کا دورہ کیا اور شہداء کی یادگار پر پھول رکھے۔

اس موقع پر بات کرتے ہوئے جنرل عاصم منیر نے کہا کہ شہداء مسلح افواج، قانون نافذ کرنے والے اداروں کیلئے فخر کا باعث ہیں۔

ان کا کہنا تھا کہ شہداء سرکاری اہلکاروں اور پاکستانی عوام کیلئے فخر کا باعث ہیں، پاکستانی عوام کے دلوں میں شہداء کا عظیم مقام ہمیشہ قائم رہے گا۔

سپہ سالار نے کہا کہ منصوبہ بندی سے کیے گئے حالیہ المناک واقعات کی دوبارہ اجازت نہیں دی جائے گی۔

ان کا کہنا تھا کہ 9 مئی کے تاریک دن پر قوم کیلئے شرمندگی لانے والے ذمہ داروں کو انصاف کے کٹہرے میں لایا جائے گا۔

آرمی چیف نے کہا کہ پاکستان اور مسلح افواج تمام شہداء اور ان کے اہلخانہ کو ہمیشہ مقدم رکھتے ہیں۔

انہوں نے کہا کہ مستقل طور پر شہداء کی عظیم قربانیوں کو انتہائی عزت و وقار سے دیکھتے ہیں۔

ان کا کہنا تھا کہ شہداء افواج پاکستان کی رینک اینڈ فائل کیلئے فخر کا باعث ہیں۔

جنرل عاصم منیر نے قوم کی عظمت، عزت، وقار کیلئے شہداء کی قربانیوں کو خراج عقیدت پیش کیا۔

آرمی چیف نے ماتحت فارمیشنز کی محنت، لگن، بلند حوصلے اور پیشہ ورانہ مہارت کو سراہا۔

پاکستان تحریک انصاف (پی ٹی آئی) کے سابق رہنما فیصل واوڈا نے کہا ہے کہ کچھ دیر میں لوگ 9 مئی کے شرمناک واقعات کروانے پر مذمتی بیان دیں گے۔

ایک بیان میں فیصل واوڈا نے کہا کہ جو لوگ مذمتی بیان دیں گے، دوسرے فیز میں پی ٹی آئی سے اعلان لاتعلقی کریں گے اور ملبہ دوسرے پر ڈال دیں گے۔

انہوں نے مزید کہا کہ پہلے ہی کہہ چکا ہوں کہ یہ لوگ عمران خان کو بند گلی میں لے آئیں گے۔

وفاقی وزیر خزانہ اسحاق ڈار کا کہنا ہے کہ پاکستان کو کسی بھی صورت میں ڈیفالٹ نہیں ہونے دیں گے، بہتر منصوبہ بندی اور مشکل فیصلوں سے پاکستان معاشی استحکام حاصل کرلے گا۔

روزنامہ جنگ سے خصوصی گفتگو کرتے ہوئے اسحاق ڈار کا کہنا تھا کہ عمران خان نے ساڑھے تین سال تک منصوبہ بندی سے پاکستان کو معاشی طور پر تباہ کرنے کی کوشش کی لیکن اللّٰہ تعالیٰ کا فضل ہوا کہ بر وقت فیصلوں سے پاکستان کو معاشی تباہی سے بچالیا ہے۔

انہوں نے کہا کہ سابقہ حکومت میں عمران خان نے پوری مسلم لیگ (ن) کو انتقامی کارروائی کا نشانہ بنایا۔

ان کا کہنا تھا کہ میاں نواز شریف سے لے کر مریم نواز، میاں شہباز شریف سے لے کر حمزہ شہباز سمیت پوری مسلم لیگ (ن) کے خلاف انتقامی کارروائیاں کی گئیں جس سے معیشت تباہ ہوئی۔

وزیر خزانہ نے کہا کہ میرے ساتھ جس طرح انتقامی کارروائیاں کی گئیں اس کی مثال نہیں ملتی، میرے 45 سال پرانے گھر کو نیلام کرنے کی کوشش کی گئی۔

اسحاق ڈار کا کہنا تھا کہ میرے اکاؤنٹ منجمد کیے گئے، خاندانی خیراتی ادارے کو تباہ کرنے کی کوشش کی گئی، ملک کو معاشی طور پر مضبوط کرنے کی خدمات کا صلہ اشتہاری بنا کر دیا گیا۔

انہوں نے کہا کہ عمران خان اور اس کے سہولت کاروں نے اپنے انتقام میں ملک کی معیشت کو تباہ کر دیا جسے بحال کرنے کے لیے اب ہمیں مشکل فیصلے کرنا پڑ رہے ہیں۔

ان کا کہنا تھا کہ مسلم لیگ (ن) پاکستان بنانے والی جماعت ہے اور میاں نواز شریف کی قیادت میں یہی جماعت پاکستان بچائے گی بھی۔

وزیر خزانہ نے مزید کہا کہ میاں شہباز شریف اور ان کی پوری کابینہ 18، 18 گھنٹے کام کر رہی ہے، ہم جلد سیاسی استحکام کے ساتھ ساتھ معاشی استحکام بھی حاصل کرلیں گے۔

قومی احتساب بیورو (نیب) لاہور نے سابق وزیراعلیٰ پنجاب عثمان بزدار کو طلب کرلیا۔ 

نیب لاہور نے عثمان بزدار کو آمدن سے زائدا ثاثہ جات کی انکوائری میں 18 مئی کو طلب کیا ہے۔ 

واضح رہے کہ نیب اس سے قبل بھی عثمان بزدار کو آمدن سے زائد اثاثہ جات کی انکوائری میں 3 بار طلب کرچکا ہے۔

خیال رہے کہ عثمان بزدار ایک بار نیب میں پیش ہوئے تھے جبکہ دو مرتبہ وہ پیش نہیں ہوئے۔

چیئرمین پبلک اکاؤنٹس کمیٹی (پی اے سی) نور عالم خان نے کہا ہے کہ 9 مئی کے مظاہروں میں شریک نوجوانوں کو سرکاری نوکری نہ دی جائے اور پنشنرز کی پنشن روکی جائے۔

اسلام آباد میں چیئرمین پی اے سی کی زیر صدارت اجلاس ہوا، جس میں انہوں نے 9 مئی کو رونما ہونے والے واقعات کی مذمت کی۔

انہوں نے کہا کہ جو ریٹائرڈ لوگ مظاہروں میں گئے ان کی پنشن روکنے کی ہدایت کرتے ہیں۔

اس پر سینیٹر مشاہد حسین سید نے استفسار کیا کہ کیا ہم کسی کی پنشن روکنے کا حکم دے سکتے ہیں؟

نور عالم خان نے جواب دیا کہ یہ ہدایات صرف اینٹی اسٹیٹ کارروائیوں میں شرکت کرنے والوں کے لیے ہے۔

انہوں نے مزید کہا کہ جو نوجوان 9 مئی کی کارروائیوں میں ملوث ہیں ان کو سرکاری نوکریاں نہ دی جائیں۔

چیئرمین پی اے سی نے یہ بھی کہا کہ 9 مئی کو سرکاری املاک پر حملے کرنے والوں کے خلاف کارروائی کی جائے، اس دن کی کارروائیوں میں ملوث ریٹائرڈ سرکاری افسران کی پنشن روکی جائے۔

ان کا کہنا تھا کہ 9 مئی کے حملوں میں ملوث افغان باشندوں کے خلاف بھرپور کارروائی کی جائے۔

مسلم لیگ (ن) کے سینئر رہنما طلال چوہدری نے کہا ہے کہ پاکستان ڈیموکریٹک موومنٹ ( پی ڈی ایم) کا کل کا احتجاج ٹریلر تھا، فلم ابھی باقی ہے۔

ایک بیان میں طلال چوہدری نے کہا کہ کل پی ڈی ایم کا دھرنا مؤخر ہوا ہے ختم نہیں ہوا، عوامی عدالت کو ہی آخری فیصلہ کرنا ہوگا۔

انہوں نے کہا کہ مجرم کو مہمان بنایا جائے گا تو عوام احتجاج کریں گے، آج ازخود نوٹس کا اختیار حرکت میں ہے، پارلیمنٹ کو دبانے کی کوشش کی جارہی ہے۔

ن لیگی رہنما نے مزید کہا کہ بلوائیوں کے ساتھ ادب سے پیش نہیں آيا جاتا، کور کمانڈر کے گھر اور جی ایچ کیو میں آگ لگانے والے کے مقدمے ملٹری کورٹس میں چلنے چاہئیں۔

ان کا کہنا تھا کہ ایک بار پھر الیکشن مینج کرنے کی کوشش کی جارہی ہے، 9 مئی کو آگ لگانے والے تحریک انصاف کے عہدے دار اور ٹکٹ ہولڈر ہیں، عمران خان کو تمام فسادات کی پلاننگ کا علم تھا۔