Category پاکستان

سردیوں میں کے-ٹو سرکرنے کی مہم کے دوران لاپتا ہونے والے پاکستان کے مشہور کوہ پیما علی سدپارہ اور ان کے ساتھیوں جان اسنوری اور موہر کی لاشوں کو ساجد سدپارہ نے کیمپ فور میں محفوظ کرلیا۔

سوشل میڈیا کی ویب سائٹ ٹوئٹر پر ساجد سدپارہ نے کہا کہ ‘میں نے اپنے ہیرو کی لاش کیمپ فور میں محفوظ کرلی ہے’۔

انہوں نے کہا کہ ‘ارجنٹینا کے ایک کوہ پیما نے لاش کو بوٹل نیک سے کیمپ فور لانے میں بڑی مدد کی، میں نے پوری قوم کی جانب سے دعا اور قرآن خوانی کی’۔

ساجد سدپارہ نے لکھا کہ ‘محفوظ جگہ پر پاکستان کا پرچم نصب کردیا ہے’۔

قبل ازیں ساجد سدپارہ کے ساتھ کینیڈین فلم ساز ایلیا سکلے اور نیپال کے پسنگ کاجی شیرپا نے محمد علی سدپارہ، آئس لینڈ کے جان اسنوری اور چلی کے جوآن پابلو موہر کی لاشیں تلاش کرنے کے مشن پر گئے تھے اور اس دوران کے-ٹو بھی سر کرلیا۔

یاد رہے کہ رواں برس فروری میں دنیا کی دوسری بلند ترین اور پاکستان کی سب سے بلند ترین چوٹی کے-ٹو (8،611 میٹر بلند) سر کرنے کی کوشش کے دوران محمد علی سدہ پارہ اور ان کے 2 ٖغیرملکی ساتھی جان اسنوری اور چلی کے جوآن پابلو موہر 4 اور 5 فروری کی درمیانی شب کو بیس کیمپ تھری سے چوٹی تک پہنچنے کا سفر شروع کیا تھا۔

موسم سرما میں کے-ٹو سر کرنے کی مہم میں شامل تینوں کوہ پیماؤں کا 5 فروری کی کی رات کو بیس کیمپ سے رابطہ منقطع ہوگیا تھا اور اس کے بعد وہ لاپتا ہوگئے تھے۔

محمد علی سدپارہ کے بیٹے ساجد علی سدپارہ بھی ان کی ٹیم کا حصہ تھا لیکن وہ ‘بوٹل نیک’ ( کے ٹو کا خطرناک ترین مقام جہاں کئی جان لیوا حادثے رونما ہوچکے ہیں) تک لاپتا ہونے والے تینوں کوہ پیماؤں کے ساتھ تھے لیکن آکسیجن ریگولیٹر میں مسائل کی وجہ سے انہوں نے مہم ادھوری چھوڑ کر بیس کیمپ 3 پر واپس آگئے تھے۔

بعد ازاں تلاش کا کام سمیٹتےہوئے 18 فروری کو تینوں لاپتا کوہ پیماؤں محمد علی سد پارہ، جان اسنوری اور جان پابلو مہر کی موت کی سرکاری طور پر تصدیق کردی گئی تھی۔

تاہم ساجد سدپارہ نے اپنے ساتھیوں کے ہمراہ گزشتہ ماہ اپنے والد اور دیگر کوہ پیماؤں لاشوں کی تلاش شروع کرنے اعلان کیا تھا اور وہ کے-ٹو میں ان کی تلاش میں مصروف رہے اور بالآخر لاپتہ کوہ پیماؤں کی لاشوں کو ڈھونڈ نکالا۔

ساجد سدپارہ کی ٹیم کو لاجسٹک سپورٹ فراہم کرنے والی کمپنی جسمین ٹورز کے سربراہ علی اصغر پوریک نے بتایا کہ اس وقت لاشوں کو محفوظ مقام پر منتقل کردیا گیا۔

انہوں نے کہا کہ جب ساجد سدپارہ پہاڑ سے نیچے آئیں گے تو پھر مکمل منصوبہ ترتیب دیا جائے گا اور انتظامات کیے جائیں گے۔

ان کا کہنا تھا کہ لاشوں کو 6 ہزار میٹر کی بلندی پر لانا ہوگا اور نیچے لانے کے لیے ہیلی کاپٹر استعمال کیا جائے گا۔

اسلام آباد: جوڈیشل کمیشن آف پاکستان (جے سی پی) نے کثرت رائے کی بنیاد پر سنیارٹی لسٹ میں پانچویں نمبر پر آنے والے سندھ ہائی کورٹ کے جج کے سپریم کورٹ میں تقرر کی منظوری دے دی۔

رپورٹ کے مطابق مذکورہ فیصلے کے نتیجے میں پاکستان بار کونسل (پی بی سی) کی جانب سے سخت ردعمل سامنے آیا اور انہوں نے 5 اگست کو تمام صوبائی بار کونسلز اور انجمنوں کا جنرل باڈی اجلاس طلب کر لیا۔

چیف جسٹس پاکستان جسٹس گلزار احمد کی زیر صدارت دو گھنٹے سے زائد طویل اجلاس کے دوران جے سی پی نے سپریم کورٹ میں جج کی خالی آسامی کو پُر کرنے کے لیے کشیدہ ماحول میں جسٹس محمد علی مظہر کی نامزدگی کی منظوری دے دی۔

باخبر ذرائع نے بتایا کہ جے سی پی اجلاس کے دوران جن لوگوں نے اس خیال کی مخالفت کی ان میں جسٹس قاضی فائز عیسیٰ، جسٹس مقبول باقر، سابق سپریم کورٹ جج دوست محمد خان اور پی بی سی کی نمائندگی کرنے والے ایڈووکیٹ اختر حسین شامل تھے۔

جے سی پی کے دیگر اراکین چیف جسٹس، جسٹس مشیر عالم، جسٹس عمر عطا بندیال، اٹارنی جنرل خالد جاوید خان اور وزیر قانون ڈاکٹر فروغ نسیم تھے۔

اس فیصلے کے فوراً بعد ہی ‘پی بی سی’ کے وائس چیئرمین خوشدل خان نے 5 اگست کے لیے جنرل باڈی کا اجلاس بلایا جس میں تمام صوبائی بار کونسلز اور بار ایسوسی ایشن کے وائس چیئرمین اور ان کی ایگزیکٹو کمیٹیوں کو آئندہ کا لائحہ عمل طے کرنے کی دعوت دی گئی ہے۔

خوشدل خان نے بتایا کہ ہم جے سی پی کے اس فیصلے کو یکسر مسترد کرتے ہیں۔

انہوں نے کہا کہ اس فیصلے نے وکلا برادری کو مکمل طور پر مایوسی کا نشانہ بنایا ہے اور اکثریت کے فیصلے کو آئین اور سنیارٹی اصول کی خلاف ورزی قرار دیا۔

جے سی پی نے 13 جولائی کو اپنے آخری اجلاس میں بلوچستان ہائی کورٹ کے چیف جسٹس جمال خان مندوخیل کی سپریم کورٹ میں تعیناتی کی سفارش کی تھی لیکن جسٹس محمد علی مظہر کے معاملے پر وکلا نے سنیارٹی کے اصول نظر انداز ہونے سے متعلق خدشات ظاہر کیے تھے جس پر ان کا معاملہ مؤخر کردیا گیا تھا۔

جسٹس فیصل عرب 4 نومبر 2020 کو اور جسٹس منظور احمد ملک 30 اپریل 2021 کو اپنی مدت ملازمت پوری کرچکے تھے لیکن نئے تقرر میں کئی مہینے لگ گئے۔

حالیہ تقرر کے بعد سپریم کورٹ کے 17 ججز کی مجموعی تعداد مکمل ہوگئی ہے۔

جے سی پی کے فیصلے کے مطابق جسٹس محمد علی مظہر کو سندھ ہائی کورٹ کے چیف جسٹس احمد علی شیخ، جسٹس عرفان سعادت خان، جسٹس عقیل احمد عباسی اور جسٹس حسن اظہر مرزا پر ترجیح دی گئی۔

تاہم ایک سینئر وکیل نے اس اقدام پر تشویش کا اظہار کرتے ہوئے حیرت کا اظہار کیا کہ کیا سارے سینئر ججز جنہیں زیر غور نہیں لایا گیا، وہ معیار پر پورا اترنے کے اہل نہیں تھے۔

انہوں نے کہا کہ یہ پہلا موقع نہیں ہے جب ہائی کورٹ سے تعلق رکھنے والے کسی جونیئر جج کا سپریم کورٹ میں تقرر کیا گیا ہو، اس سے قبل اپریل 2018 میں جسٹس منیب اختر جو سندھ ہائی کورٹ کی سنیارٹی لسٹ میں چوتھے نمبر پر تھے انہیں ترقی دی گئی تھی۔

خیال رہے کہ پاکستان بار کونسل سمیت مختلف بار کونسلز اور انجمنوں نے 28 جولائی کو ‘یوم سیاہ’ کے طور پر منایا تھا۔

علاوہ ازیں پی بی سی کے علاوہ سندھ بار کونسل (ایس بی سی)، سندھ ہائی کورٹ بار ایسوسی ایشن (ایس ایچ سی بی اے) اور لاہور ہائی کورٹ بار ایسوسی ایشن (ایل ایچ سی بی اے) نے بھی بدھ کے روز یوم سیاہ منانے اور عدالتی کارروائی کا بائیکاٹ کرنے کا عندیہ دیا تھا۔

کراچی کے ضلع کورنگی کے علاقے زمان ٹاؤن سے لاپتا بچی کی تشدد زدہ لاش کچرا کنڈی سے برآمد کرلی گئی جبکہ حکام نے بتایا کہ بچی کو ریپ کے بعد قتل کردیا گیا۔

پولیس کا کہنا تھا کہ بچی کی لاش ان کے گھر کے قریب کچرا کنڈی سے تقریباً 8 گھنٹے تلاش کے بعد ملی تھی، جس کے بعد پولیس نے مختلف علاقوں میں کارروائی کی اور درجن بھر مشتبہ افراد سے پوچھ گچھ کی۔

ایس پی لانڈھی شاہنواز چاچڑ کا کہنا تھا کہ بچی کورنگی کے علاقے غوث پاک میں اپنے گھر سے رات کو تقریباً 9 بجے لاپتہ ہوگئی تھیں۔

ان کا کہنا تھا کہ والدین نے پولیس رات گئے تقریباً 12 بجے اطلاع دی اور بچی کی لاش کچرا کنڈی سے صبح 5 بجے ملی اور بچی کی گردن ٹوٹی ہوئی تھی۔

بچی کی لاش کو قانونی کارروائی مکمل کرنے کے لیے جناح پوسٹ میڈیکل سینٹر (جناح ہسپتال) منتقل کردیا گیا۔

جناح ہسپتال کی ایڈیشنل پولیس سرجن ڈاکٹر سمعیہ سید نے بتایا کہ ‘بچی کے پوسٹ مارٹم سے ظاہر ہوتا ہے کہ ان کا ریپ کیا گیا اور بدفعلی کے بعد قتل کردیا گیا’۔

انہوں نے کہا کہ ‘بچی کے سر اور پورے جسم کے علاوہ نازک اعضا پر کئی زخم تھے’ ۔

ڈاکٹر سمعیہ سید نے بتایا کہ ‘ڈی این اے پروفائلنگ اور میچنگ کے لیے نمونے حاصل کر لیے گئے ہیں’ اور بچی کے کپڑے بھی سیل کر دیے گئے ہیں۔

ایس شاہنواز چاچڑ کا کہنا تھا کہ پولیس نے مختلف علاقوں میں چھاپے مار کر 10 سے 12 افراد کو تفتیش کی غرض سے حراست میں لیا ہے۔

ان کا کہنا تھا کہ مذکورہ افراد کو اس لیے حراست میں لیا گیا ہے کیونکہ علاقے میں انہیں ‘خراب کردار’ کے باعث جانا جاتا ہے اور پولیس نے گراؤنڈ اور بند اسکولوں جیسے مشکوک مقامات میں بھی ممکنہ ثبوت اکھٹے کرنے کے لیے تلاشی لے رہی ہے۔

پولیس کی فارنزک ٹیموں بھی نے جائے وقوع کا دورہ کیا اور ثبوت جمع کیے اور علاقے کی جیو فینسنگ بھی کی گئی تاکہ ملزمان کے حوالے سے ممکنہ شواہد ملیں۔

سینئر پولیس افسر کا کہنا تھا کہ علاقے کی کوئی سی سی ٹی وی فوٹیج نہیں ہے لیکن تفتیش میں ملزمان کے اشارے ملے ہیں جنہوں نے بچی کی لاش کچرہ کنڈی میں پھینکی اور وہاں تک رکشے میں آئے۔

میڈیا کو بچی کے والد نے بتایا کہ علاقے میں بجلی گئی ہوئی تھی اور ان کی بیٹی گھر کے باہر دیگر بچوں کے ساتھ کھیل رہی تھیں۔

انہوں نے پولیس پر عدم تعاون کا الزام عائد کرتے ہوئے کہا کہ جب وہ رات کو مقدمہ درج کروانے تھانے گئے تو پولیس اہلکاروں نے اس کو سنجیدگی سے نہیں لیا۔

قبل ازیں زمان ٹاؤن تھانے کے اسٹیشن ہاؤس افسر (ایس ایچ او) عامر ملک نے کہا تھا کہ غوث پاک روڈ کی کچرا کنڈی سے ملنے والی بچی کی لاش کو جناح ہسپتال منتقل کردیا گیا۔

انہوں نے کہا تھا کہ موت کی وجہ پوسٹ مارٹم کے بعد سامنے آئے گی جبکہ واقعے کی تحقیقات جاری ہیں۔

واضح رہے کہ ملک میں بچوں بالخصوص بچیوں کے ریپ اور تشدد کے بعد قتل میں اضافہ ہوا ہے۔

گزشتہ برس ستمبر میں بھی کراچی کے علاقے پی آئی بی کالونی میں 5 سالہ بچی لاپتا ہو گئی تھی اور دو دن بعد اس کی لاش محلے کی کچرا کنڈی سے ملی تھی۔

بچی کے اغوا، زیادتی اور قتل سے اہل علاقہ مشتعل ہوگئے اور انہوں نے اگلی صبح اس کی تدفین کے بعد یونیورسٹی روڈ پر احتجاج کیا تھا۔

جولائی 2020 میں سیالکوٹ کی تحصیل پسرور کے گاؤں بٹر ڈوگراں چننڈا میں دو افراد کے ہاتھوں گینگ ریپ کا نشانہ بننے والی 8 سالہ بچی دوران علاج ہسپتال میں دم توڑ گئی تھی۔

قبل ازیں جنوری 2018 میں قصور میں 6 سالہ زینب کو اغوا کرنے کے بعد قتل کردیا گیا تھا جس پر ملک بھر میں شدید احتجاج کیا گیا تھا اور بعدازاں ملزم کو پکڑ کر تختہ دار پر لٹکا دیا گیا تھا۔

افغانستان کی درخواست کے بعد 5 افغان فوجیوں کو افغان حکام کے حوالے کر دیا گیا۔

پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق افغان آرمی کے 5 جوان افغان حکام کے حوالے کر دیئے گئے۔ یہ فوجی افغان حکام کی درخواست پر حوالے کیے گئے۔ ان 5 افغان فوجیوں نے 26 جولائی کو پاکستان سے پناہ کی درخواست کی تھی۔

آئی ایس پی آر کی طرف سے جاری کردہ بیان کے مطابق ضابطہ کی کارروائی کے بعد افغان فوجیوں کو باجوڑ کے علاقہ نوا پاس میں حوالے کیا گیا۔

آئی ایس پی آر کے مطابق افغان فوجیوں کو انکی درخواست پر اروندو۔ چترال سیکٹر میں پاک فوج کی جانب سے محفوظ راستہ دیا گیا۔

یاد رہے کہ دو روز قبل پاک فوج کی جانب سے افغان نیشنل آرمی (اے این اے) اور بارڈر پولیس کے 46 فوجیوں کو پناہ اور محفوظ راستہ دیا گیا ہے۔

آئی ایس پی آر کے مطابق ارندو، چترال کے پار اے این اے کے مقامی کمانڈر نے 46 فوجیوں کے لیے مدد کی درخواست کی تھی جن میں 5 افسران بھی شامل تھے کیونکہ وہ افغانستان کی بدلتی ہوئی سلامتی کی صورتحال کی وجہ سے پاک افغان سرحد کے ساتھ (اپنی) چیک پوسٹ کو سنبھال نہیں سکتے تھے۔

آئی ایس پی آر کے مطابق پاک فوج نے متعلقہ معلومات اور ضروری کارروائیوں کے لیے افغان حکام سے رابطہ کیا ہے۔ افغان فوجی رات دیر گئے چترال کے ارندو سیکٹر پہنچے، افغان حکام سے رابطے اور ضروری فوجی طریقہ کار کے بعد 5 افسران سمیت 46 فوجیوں کو پاکستان میں پناہ، محفوظ راستہ دیا گیا ہے۔

واضح رہے کہ 17 جولائی کو ڈی جی آئی ایس پی آر میجر جنرل بابر افتخار نے نجی ٹی وی کو ایک انٹرویو کے دوران کہا تھا کہ افغان نیشنل آرمی اور افغان طالبان کی حالیہ لڑائی کے دوران افغان نیشنل آرمی کے 40 سپاہیوں نے باجوڑ کے مقام پر ہماری طرف سرحد پار کی تھی، ہم نے بطور فوجی ان کو پروٹوکول دیا اور ان کو خوراک فراہم کرنے کے ساتھ ساتھ تحائف دے کر افغان افواج کے حوالہ کر دیا۔

خیال رہے کہ پاک افغان سرحد پر تمام غیر قانونی کراسنگ پوائنٹس سیل کردیے گئے ہیں جبکہ سرحد پر باقاعدہ طور پر فوجی دستے تعینات کر دیئے گئے ہیں۔

نجی ٹی وی کے ساتھ گفتگو کے دوران ترجمان پاک فوج میجر جنرل بابر افتخار نے کہا کہ پاک فوج کے ریگولر دستے پاک افغان سرحد پر پٹرولنگ کر رہے ہیں اور بارڈر پر غیر قانونی کراسنگ پوائنٹس کو سیل کر دیا گیا ہے۔ دہشت گردی کے حالیہ واقعات کی کڑیاں افغانستان سے ملتی ہیں کیونکہ افغانستان کی حالیہ صورتحال کے باعث وہاں پر دہشت گرد شدید دبائو میں ہیں۔ یکم مئی 2021ء کے بعد 167 دہشت گردی کے حملوں کی اطلاعات پر پاک فوج نے معلومات (آئی بی او) کی بنیاد پر 7 ہزار سے زیادہ آپریشنز کئے ہیں جن میں مختلف علاقوں کی تلاشی سمیت دیگر کارروائیاں شامل ہیں۔

ڈی جی آئی ایس پی آر نے واضح کیا کہ ہم افغانستان میں امن عمل کے ضامن نہیں ہیں کیونکہ افغانستان کے شراکت دار ہی اپنے مستقبل کا فیصلہ کر سکتے ہیں۔ پاکستان میں امن و امان افغانستان کے امن سے منسلک ہے۔ ہم باریک بینی سے علاقائی صورتحال کا جائزہ لے رہے ہیں اور افغان امن عمل میں مخلصانہ کردار ادا کر رہے ہیں۔ ہم افغانستان میں امن و امان کی بحالی کیلئے تمام شراکت داروں کے مابین مذاکرات کے عمل کیلئے ہم نے ہر طرح کے ممکنہ اقدامات کئے ہیں۔

پاک فوج کے ترجمان نے زور دیتے ہوئے کہا کہ مسلح افواج نے افغانستان سے امریکی اور اس کی اتحادی فوجوں کے انخلاء کے بعد کی صورتحال کے تناظر میں مکمل تیاری کی ہے اور کسی قسم کے ممکنہ خطرہ کے پیش نظر ہر طرح کے سکیورٹی اقدامات کو یقینی بنایا گیا ہے۔

انہوں نے سکیورٹی رسکس کی وضاحت کرتے ہوئے کہا کہ اس میں دہشت گردوں کے سلیپر سیلز، بلوچستان میں دہشت گرد گروپوں کی بحالی اور غیر ملکی ایجنسیوں کے ساتھ رابطے وغیرہ شامل ہو سکتے ہیں۔ ہمارے پاس بڑے واضح ثبوت ہیں اور ہم نے ان ایجنسیوں کی شناخت کی ہے۔ حالیہ واقعات بھی اس رسک سے منسلک ہیں۔ افغانستان میں امن عمل کی صورتحال کے حوالہ سے ہم سمجھتے ہیں کہ اس سے ہم پر بھی اثرات مرتب ہوں گے۔ پاکستان نے دہشت گردی کے خلاف ایک طویل جنگ لڑی ہے اور اس میں کامیابیاں حاصل کی ہیں۔

میجر جنرل بابر افتخار نے کہا کہ پاک افغان سرحد پر باڑ لگانے کا 90 فیصد کام مکمل ہو چکا ہے اور اس کو ایران کی سرحد تک توسیع دی جا رہی ہے۔ سرحد پر کئی سکیورٹی چیک پوسٹس اور قلعے بھی تعمیر کئے گئے ہیں تاکہ سرحد کی نگرانی کے موثر نظام کو تشکیل دیا جا سکے۔ پاک افغان سرحد پر باڑ لگانے کا عمل افغانستان کیلئے بھی مفید ہے۔

اسلام آباد کی ایک مقامی عدالت نے نور مقدم قتل کیس کے مرکزی ملزم ظاہر ذاکر جعفر کے جسمانی ریمانڈ میں مزید 3 روز کی توسیع کردی۔

مشتبہ شخص کو ابتدائی طور پر تین روز کے ریمانڈ پر بھیجا گیا تھا جسے بعد میں 24 جولائی کو مزید دو روز کے لیے اور پھر 26 جولائی کو مزید 2 روز کے لیے بڑھایا دیا گیا تھا۔

ملزم ظاہر جعفر کو جوڈیشل مجسٹریٹ شعیب اختر کے سامنے پیش کیا گیا جنہوں نے اس کے ریمانڈ میں مزید 3 روز کی توسیع کردی۔

سماعت کے دوران کیس کے پراسیکیوٹر ساجد چیمہ نے عدالت کو بتایا کہ اس واقعے کی سی سی ٹی وی فوٹیج حاصل کی جاچکی ہے لیکن ابھی انہیں فرانزک تجزیے کے لیے بھیجنا ہے۔

انہوں نے عدالت سے ملزم کے مزید 3 روزہ جسمانی ریمانڈ کی استدعا کی تھی کیونکہ ملزم کو سی سی ٹی وی فوٹیج کے ساتھ لاہور لے کر جانا ہے تاکہ ویڈیو کا فرانزک کیا جاسکے۔

تاہم ملزم کے وکیل نے تجویز دی کہ متعلقہ حکام فرانزک کے لیے ظاہر جعفر کی تصویر کا استعمال کریں اور اس مقصد کے لیے مزید ریمانڈ کی ضرورت نہیں ہے۔

انہوں نے مزید کہا کہ پولیس نے ملزم کا موبائل فون بھی برآمد کرلیا ہے اور اب اس کے ریمانڈ میں توسیع کی کوئی بنیاد نہیں ہے۔

پراسیکیوٹر نے دلیل دی کہ فرانزک تجزیہ کے لیے ایک تصویر کافی ہوتی تو ریمانڈ میں مزید توسیع کی درخواست نہیں کی جاتی۔

انہوں نے کہا کہ عثمان مرزا کیس کے ملزم کو بھی لاہور لے جانا پڑا تھا کیونکہ فوٹیج میں ترمیم نہ ہونے کی یقین دہانی کرنا ضروری تھا۔

اس پر ملزم کے وکیل نے نشاندہی کی کہ ان کے مؤکل کے ریمانڈ کی مدت پہلے ہی 7 روز تک بڑھا دی گئی ہے۔

انہوں نے سوال کیا کہ ’اس دوران فرانزک تجزیہ کیوں نہیں کیا گیا؟‘

ان کا مزید کہنا تھا کہ ان کے علم میں یہ پہلا واقعہ ہے جہاں سی سی ٹی وی فوٹیج کا فرانزک کرنے کے لیے ریمانڈ میں توسیع کی درخواست کی گئی ہے۔

تاہم پراسیکیوٹر نے ریمانڈ میں تین روز کی توسیع پر اصرار کیا۔

انہوں نے کہا کہ ’صرف 3 روز کے لیے ریمانڈ دیں اور ہم اس کے بعد ملزم کو جیل بھیجیں گے‘۔

اس پر ظاہر جعفر کے وکیل نے دلیل دی کہ ملزم کو جیل سے بھی لاہور لے جایا جاسکتا ہے اور اس کے جسمانی ریمانڈ میں توسیع کی ضرورت نہیں ہے۔

عدالت نے دلائل سننے کے بعد ملزم ظاہر ذاکر جعفر کا مزید تین روزہ جسمانی ریمانڈ منظور کرلیا۔

ہمیشہ ظاہر جعفر کے اقدام کی مذمت کریں گے، اہل خانہ
ملزم ظاہر جعفر کے اہلخانہ نے مقتولہ نور مقدم کے اہلخانہ اور چاہنے والوں کو تعزیتی پیغام دیا اور اس کی مغفرت کے لیے دعا کرتے ہوئے کہا کہ ’ہم جانتے ہیں کہ کوئی چیز اس وقت آپ کی خوشیاں واپس نہیں لاسکتی اور نہ ہی آپ کے درد میں کمی کرسکتی ہے‘۔

ان کا کہنا تھا کہ ’اس خوفناک قدم پر غم اور صدمے کی وجہ سے ہم خاموش تھے جس پر ہمیں بہت افسوس ہے تاہم ہم اس ظلم کی واضح طور پر مذمت کرتے ہیں اور ظاہر جعفر اور اس کے اقدامات کی ہمیشہ کے لیے مذمت کرتے رہیں گے‘۔

ملزم ظاہر جعفر کی گرفتاری
یاد رہے کہ 20 جولائی کو اسلام آباد کے پوش سیکٹر ایف۔7/4 کے رہائشی سابق پاکستانی سفیر شوکت مقدم کی بیٹی 27 سالہ نور کو قتل کر دیا گیا تھا۔

ظاہر ذاکر جعفر کے خلاف منگل کو رات گئے ایف آئی آر درج کرائی گئی تھی گئی تھی اور مقتولہ کے والد کی مدعیت میں تعذیرات پاکستان کی دفعہ 302 کے تحت قتل کے الزام میں درج اس مقدمے کے تحت ملزم کو گرفتار کیا گیا تھا۔

گزشتہ روز اسلام آباد کی مقامی عدالت نے سابق پاکستانی سفیر کی بیٹی نور مقدم کے قتل مشتبہ ملزم ظاہر ذاکر جعفر کے جسمانی ریمانڈ میں دو دن کی توسیع کردی تھی۔

کیس کے پراسیکیوٹر ساجد چیمہ نے عدالت کو بتایا تھا کہ ملزم سے قتل میں استعمال کیا گیا اسلحہ برآمد ہوا ہے جس میں ایک چاقو، ایک پستول اور ایک آہنی ہتھیار شامل ہے۔

انہوں نے مزید بتایا کہ ذاکر جعفر کی تحویل سے ان کا اپنا اور نور دونوں کا فون برآمد ہونا باقی ہے اور اسی مقصد کے تحت ملزم کے جسمانی ریمانڈ میں 11 دن کی توسیع کی درخواست کی۔

اسلام آباد کے انسپکٹر جنرل پولیس قاضی جمیل الرحمٰن نے جمعہ کے روز اس وحشیانہ قتل کی تحقیقاتی ٹیم کو ہدایت کی کہ وہ ملزم کا نام ایگزٹ کنٹرول لسٹ (ای سی ایل) میں شامل کرنے کی درخواست دیں۔

تحیقیقاتی ٹیم یہ بھی دیکھ رہی ہے کہ ملزم کا پاکستان، امریکا یا برطانیہ کا کوئی مجرمانہ ریکارڈ ہے یا نہیں۔

پاکستان میں عالمی وبا کورونا سے مزید 44 افراد انتقال کر گئے اور دو ماہ بعد کورونا کے 4 ہزار سے زائد کیسز رپورٹ ہوئے ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 52 ہزار 291 ٹیسٹ کیے گئے جن میں سے 4119 افراد میں وائرس کی تصدیق ہوئی جب کہ وائرس سے 44 افراد انتقال کر گئے۔

پاکستان میں آخری بار 21 مئی کو کورونا کے 4 ہزار سے زائد کیسز رپورٹ ہوئے تھے اور اس روز ملک میں کورونا سے 88 اموات بھی ہوئی تھیں۔

پاکستان میں 2 ماہ بعد کورونا کے 4 ہزار سے زائد کیسز
سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 7.8فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 23 ہزار 131 ہو گئی اور مجموعی کیسز 10 لاکھ 15 ہزار 827 تک جاپہنچے ہیں۔

اس کے علاوہ 24 گھنٹوں کے دوران ملک بھر میں 7020 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 9 لاکھ 35 ہزار 742 ہو گئی ہے جب کہ فعال کیسز کی تعداد 56952 ہے۔

لاہور: داسو میں چینی انجینئرز پر حملہ اور جوہر ٹاؤن دھماکے کی کڑیاں ملنے لگیں۔

ذرائع کے مطابق دونوں حملوں کی ٹیم کا تعلق بھارتی حفیہ ایجنسی را سے ثابت ہو رہا ہے۔ داسو حملے میں ملوث ہونے کے شبے میں لاہور سے دو مشتبہ افراد کو حراست میں لے لیا گیا۔

گرفتار دو سگے بھائیوں کا تعلق کوئٹہ سے ہے ، دونوں پندرہ سال سے ڈیفینس پی بلاک میں رہائش رکھے ہوئے تھے۔ داسو حملے میں استعمال ہونے والی گاڑی لاہور میں مقیم شخص کی ملکیت تھی۔

14 جولائی کو خیبر پختونخواہ کے اپر کوہستان کے علاقے داسو میں بس کے ساتھ پیش آنے والے واقعے میں 9 چینی انجینئرز، دو ایف سی اہلکار اور لیبر سمیت 13 افراد جاں بحق اور متعدد زخمی ہوئے تھے۔ منصوبے پر کام کرنے والے چینی ماہرین، مقامی مزدور اور ایف سی اہلکار داسو ڈیم کی سائٹ جارہے تھے کہ ان کی بس خوفناک دھماکے سے دریا میں جاگری۔ وفاقی وزیر اطلاعات فواد چودھری نے اس واقعے میں بارودی مواد کے شواہد منظر عام پر آنے اور دہشت گردی یا تخریب کے عنصر کے حوالے سے ٹویٹ کیا تھا۔

وفاقی دارالحکومت اسلام آباد اور اس سے منسلک راولپنڈی میں موسلا دھار بارشوں کے باعث سیلابی صورتحال پیدا ہوگئی جس سے سڑکیں اور نشیبی علاقے زیر آب آگئے جبکہ ندی نالوں میں طغیانی کا خدشہ پیدا ہوگیا اور گھر میں پانی داخل ہونے سے 2 افراد جاں بحق ہوگئے۔

موسلادھار بارش سے سب سے زیادہ اسلام آباد کا علاقہ سیکٹر ای-11 متاثر ہوا جہاں پانی گھروں میں داخل ہوگیا جبکہ پانی کے ریلے میں بہہ کر درجنوں گاڑیوں کو بھی نقصان پہنچا۔

پولیس حکام کے مطابق سیکٹر ای-11 ہاؤسنگ سوسائٹیز پر مشتمل سیکٹر ہے اور یہاں پولیس فاؤنڈیشن کے پیٹرن انچیف سیکریٹری داخلہ خود ہیں، جہاں سوسائٹی انتظامیہ کی ناقص کارکردگی کے باعث سیلابی صورتحال پیدا ہوئی۔

حکام کا کہنا تھا کہ سیلابی صورتحال سے نمٹنے کے لیے سوسائٹی انتظامیہ کی کوئی بھی مشینری موجود نہیں تھی بعدازاں کیپیٹل ڈیولپمنٹ اتھارٹی (سی ڈی اے) انتظامیہ نے سیکٹر ای-11 میں ہنگامی بنیادوں پر سیلابی پانی کو نکالنے کے لیے کام کیا۔

حکام کا کہنا تھا کہ سیکٹر ای-11 کے ایک گھر کی بیسمنٹ میں رہائش پذیر خاندان سے تعلق رکھنے والے ماں اور بیٹا پانی بھر جانے کے باعث جاں بحق ہوگئے۔

خیال رہے کہ صبح سویرے ڈپٹی کمشنر اسلام آباد نے ایک ٹوئٹ میں بتایا کہ اسلام آباد میں کلاؤڈ برسٹ کے باعث مختلف علاقوں میں سیلاب آگیا ہے، ٹیمیں نالوں / سڑکوں کو صاف کررہی ہیں، اُمید ہے کہ ہم ایک گھنٹے میں سب کچھ کلیئر کردیں گے۔

تاہم ایک بیان میں محکمہ موسمیات نے ڈپٹی کمشنر اسلام آباد کے دعوے کی تردید کرتے ہوئے کہا کہ 26 جولائی کو موسم کی صورتحال کے حوالے سے پیش گوئی جاری کی جاچکی تھی یہ معمول سے زیادہ بارش تھی جسے کلاؤڈ برسٹ نہیں کہا جاسکتا۔

دوسری جانب بارش کے بعد پیدا ہونے والی صورتحال کے پیشِ نظر سی ڈی اے کی جانب سے متعدد ٹوئٹس میں امدادی کارروائیوں اور راستے کلیئر کرنے کے عمل سے آگاہ کیا جاتا رہا۔

ایک ٹوئٹر پیغام میں سی ڈی اے نے بتایا کہ پشاور موڑ انٹرچینج اور سری نگر ہائی وے پر متعدد مقامات کو کلیئر کردیا گیا ہے۔

وزیراعظم کی اداروں کو الرٹ رہنے کی ہدایت
بارشوں کے پیشِ نظر وزیر اعظم عمران خان نے نیشنل ڈیزاسٹر منیجمنٹ اتھارٹی سمیت تمام متعلقہ اداروں کو فوری اور ہنگامی ردِ عمل کے ساتھ ہائی الرٹ رہنے کی ہدایت کی ہے۔

ایک ٹوئٹر پیغام میں انہوں نے شدید مون سون بارشوں کے باعث میں شہریوں کو بھی الرٹ رہنے اور خصوصی حفاظتی اقدامات کرنے کی ہدایت کی۔

راول ڈیم کی صورتحال
اسلام آباد میں تیز بارش کے بعد راول ڈیم میں پانی کی سطح تیزی سے بلند ہورہی ہے جبکہ پانی ذخیرہ کرنے کی گنجائش انتہائی کم رہ گئی۔

راول ڈیم انتظامیہ نے الرٹ جاری کرتے ہوئے بتایا کہ پانی کی سطح مزید بلند ہونے پر اسپل ویز کھول دیے جائیں گے۔

انتظامیہ کے مطابق ڈیم میں پانی جمع کرنے کی گنجائش 1752 فٹ ہے جبکہ اس وقت پانی کی سطح 1749 فٹ ہے لہٰذا 1750 فٹ تک پانی پہنچنے پر سپل ویز اوپن کردیے جائیں گے۔

انتظامیہ کا کہنا تھا کہ بارشوں کے باعث گزشتہ چوبیس گھنٹوں کے دوران پانی کی سطح ایک فٹ دو انچ تک بلند ہوئی ہے۔

دوسری جانب ڈپٹی کمشنر اسلام آباد نے دریائے کورنگ اور دریائے سواں کے اطراف رہنے والے لوگوں کو دریا کے کنارے سے دور رہنے کی ہدایت کی۔

انہوں نے بتایا کہ راول ڈیم کے سپل ویز (دروازے) کھولے جارہے ہیں, مساجد سے اعلانات بھی کروائے گئے ہیں، دریا میں نہانے پر دفعہ 144 نافذ ہے تاہم بروقت ردِ عمل کے لیے ریسکیو اور انتظامیہ کی ٹیمز موجود ہیں۔

راولپنڈی کی صورتحال
راولپنڈی اور اسلام آباد میں موسلادھار بارش سے نالہ لئی میں طغیانی آگئی اور پانی کی سطح 19 فٹ تک بلند ہوگئی۔

بارشوں کے باعث اسلام آباد سے بڑا پانی کا ریلا راولپنڈی میں داخل ہوا جس کے باعث گوال منڈی اور دیگر نشیبی علاقوں میں خطرے کے سائرن بجا دیے گئے اور امدادی ٹیموں کو بھی طلب کر لیا گیا۔

فلڈ کنٹرول روم کے مطابق نالہ لئی میں پانی کی سطح میں مسلسل اضافہ ہورہا ہے، جس سے نشیبی علاقوں کے زیر آب آنے کا خطرہ ہے، صورتحال کے پیشِ نظر پاک فوج اور اداروں کے اہلکاروں کو طلب کرلیا گیا۔

دوسری جانب وفاقی وزیر داخلہ شیخ رشید جن کا تعلق راولپنڈی سے ہے، وہ نالہ لئی میں آنے والی طغیانی کا جائزہ لینے کے لیے گوال منڈی پل پہنچے جہاں ایم ڈی واسا راجا شوکت، ڈپٹی کمشنر راولپنڈی نے شیخ رشید کو بریفنگ دی۔

اس موقع پر میڈیا سے گفتگو کرتے ہوئے ان کا کہنا تھا کہ نالہ لئی ہر بیس سال بعد 2 سو آدمیوں کی جان لیتا ہے، بیس سال پہلے کام شروع کرنے کا فیصلہ کیا تھا جو ابھی تک شروع نہیں ہوسکا۔

انہوں نے بتایا کہ عمران خان اور وزیر اعلیٰ پنجاب نے نیسپاک کو کم لاگت پر تعمیر کرنے کا حکم دیا ہے جس سے غریب بستیاں بہتر ہوجائیں گی اور 90 دنوں میں اس پر کام شروع ہوجائے گا۔

شیخ رشید نے کہا کہ نالہ لئی راولپنڈی کا واحد مسئلہ ہے جسے شروع کیا تھا تو 26 ارب روپے کا منصوبہ تھا لیکن اب اس کی لاگت 90 ارب روپے تک پہنچ چکی ہے۔

انہوں نے کہا کہ اسلام آباد کے 7 پرانے نالے بند ہیں جن پر لوگوں نے قبضہ کر کے تعمیرات کرلی ہیں لیکن نالہ لئی کو ٹھیک کرنا میری زندگی کا مشن ہے۔

شیخ رشید نے کہا کہ اسلام آباد اور راولپنڈی میں جہاں جہاں پانی ہے وہاں پاک فوج، واسا سمیت تمام انتظامی مشینری الرٹ ہے۔

کراچی: سندھ حکومت نے کورونا کے پھیلاؤ کو روکنے کے لئے سخت ترین اقدامات کا فیصلہ کرلیا ہے۔

تففصیلات کے مطابق سندھ میں بالعموم اور کراچی میں بالخصوص کورونا کی لہر خطرناک حد تک بڑھ گئی ہے، کراچی میں کورونا کے مثبت کیسز کی شرح 30 فیصد سے تجاوز کرگئی ہے، جس کے ساتھ ہی سندھ حکومت نے کورونا کے پھیلاؤ کو روکنے کے لئے سخت ترین اقدامات کا فیصلہ کیا ہے۔ اس سلسلے میں سندھ حکومت نے کراچی میں مزید پابندیوں کے ساتھ لاک ڈاؤن پر غور شروع کردیا ہے۔

طبی ماہرین اور محکمہ صحت سندھ نے صوبائی ٹاسک فورس کو 15 دن کے فوری لاک ڈاؤن کی سفارش کی ہے تاہم تاجروں اور دیگر اسٹیک ہولڈرز سے مشاورت کے بعد کراچی میں لاک ڈاؤن کا فیصلہ کیا جائے گا، وزیراعلی سندھ نے صوبائی کورونا ٹاسک فورس کا اجلاس جمعے کو طلب کیا ہے، جس میں لاک ڈاون کے حوالے سے حتمی فیصلہ ہوگا۔

سندھ حکومت کے ذرائع کا کہنا ہے کہ جن شہروں میں کورونا کی شرح 20 فیصد سے زائد ہے وہاں لاک ڈاؤن لگانے کی تجویز ہے، سندھ حکومت نے لاک ڈاون کے نفاذ اور ایس اوپیز پر عمل درآمد کے لئے قانون نافذ کرنے والے اداروں کی مدد لینے پر بھی غور شروع کردیا ہے، ایس اوپیز پر عمل درآمد کے لئے اہم مقامات پرقانون نافذ کرنے والے اداروں کی مدد لی جاسکتی ہے، اس کے علاوہ کراچی کے اسپتالوں میں مریضوں کی گنجائش بڑھانے کے لئے بھی ہنگامی بنیادوں پر اقدامات شروع کردیے گئے ہیں۔

اسلام آباد: پانچ افسران سمیت 46 افغان فوجیوں کو باجوڑ میں نوا پاس کے مقام پر ‘خوش اسلوبی’ کے ساتھ افغان حکام کے حوالے کردیا گیا۔

پاک فوج کے شعبہ تعلقات عامہ آئی ایس پی آر کے جاری کردہ بیان کے مطابق افغان اہلکاروں کو پاکستانی وقت کے مطابق رات 12 بج کر 35 منٹ پر واپس بھیجا گیا۔

بیان میں بتایا گیا کہ 25 جولائی کو پاک فوج نے پاک افغان سرحد کے اروندو سیکٹر میں افغان نیشنل آرمی (اے این اے) کے فوجیوں اور بارڈر پولیس کے اہلکاروں کو ان کی درخواست پر محفوظ راستہ فراہم کیا تھا۔

آئی ایس پی آر کے مطابق ’ضروری کلیئرنس کے بعد افغان فوجی اپنے اسلحے، گولہ بارود اور مواصلاتی آلات کے ساتھ پاکستان میں داخل ہوئے تھے‘۔

بیان میں مزید کہا گیا کہ ’فوجیوں کو ان کے اسلحے اور آلات کے ساتھ ان ہی کی درخواست پر خوش اسلوبی سے افغان حکام کے حوالے کردیا گیا‘۔

ساتھ ہی آئی ایس پی آر کا یہ بھی کہنا تھا کہ ’پاکستان ضرورت کے وقت اپنے افغان بھائیوں کی ہر طرح سے مدد کرے گا۔

خیال رہے کہ ایک روز قبل آئی ایس پی آر کے بیان میں بتایا گیا تھا کہ پاک فوج کی جانب سے افغان نیشنل آرمی (اے این اے) اور بارڈر پولیس کے 46 فوجیوں کو ’پناہ اور محفوظ راستہ‘ دے دیا گیا۔

بیان میں بتایا گیا تھا کہ ارندو، چترال کے پار اے این اے کے ایک مقامی کمانڈر نے 46 فوجیوں کے لیے مدد کی درخواست کی تھی جن میں 5 افسران بھی شامل تھے کیونکہ ’وہ افغانستان کی بدلتی ہوئی سلامتی کی صورتحال کی وجہ سے پاک افغان سرحد کے ساتھ (اپنی) چیک پوسٹ کو سنبھال نہیں سکتے تھے‘۔

آئی ایس پی آر کے بیان میں کہا گیا تھا کہ ’افغان فوجی جوانوں کو فوجی اصولوں کے مطابق کھانا، رہائش اور ضروری طبی امداد فراہم کی گئی ہے‘۔

آئی ایس پی آر کے بیان میں کہا گیا تھا کہ ’یکم جولائی کو پناہ مانگنے والے 35 افغان فوجیوں کو بھی پاکستان میں محفوظ راستہ دے دیا گیا تھا اور مناسب طریقہ کار کے بعد افغان حکومت کے حوالے کردیا گیا تھا‘۔