Category پاکستان

اسلام آباد: داسو ہائیڈرو پاور پروجیکٹ پر کام دوبارہ شروع کرنے کے لیے پاکستان کی جانب سے کوششیں تیز ہوگئی ہیں اور واٹر اینڈ پاور ڈیولپمنٹ اتھارٹی (واپڈا) کے چیئرمین لیفٹیننٹ جنرل (ر) مزمل حسین نے چینی سفیر نونگ رونگ سے ملاقات کی اور ڈیم کے تعمیراتی کام سے متعلق امور پر تبادلہ خیال کیا۔

رپورٹ کے مطابق سرکاری اعلامیہ کے مطابق ’ملاقات میں 14 جولائی کے واقعے کے تناظر میں داسو ہائیڈرو پاور منصوبے کی تعمیر سے متعلق امور پر تفصیلی تبادلہ خیال کیا گیا‘۔

پاکستان نے 9 انجینئرز کی لاشیں چین روانہ کردیں اور وزیر اعظم عمران خان کی ہدایت پر وزیر خارجہ شاہ محمود قریشی چین کا دورہ کر رہے ہیں۔

بیان کے مطابق چینی سفیر اور واپڈا کے چیئرمین نے جلد ہی منصوبے پر تعمیراتی کام دوبارہ شروع کرنے کے عزم کا اظہار کیا۔

واپڈا چیئرمین نے چائنا گیزوبا گروپ کمپنی (سی جی جی سی) کے نائب صدر اور چیف ایگزیکٹو افسر سے بھی ملاقات کی اور منصوبے کی جگہ اور ماحول کو مزید محفوظ بنانے کی یقینی سے متعلق امور پر تبادلہ خیال کیا۔

یہ امر قابل ذکر ہے کہ سانحہ داسو کے تناظر میں سول انتظامیہ، واپڈا اور سی جی جی سی نے باہمی مشاورت سے منصوبے پر تعمیراتی کام کو کچھ دن کے لیے معطل کرنے کا فیصلہ کیا تھا تاکہ اس معاملے کو از سر نو ترتیب دیا جاسکے اور تعمیراتی کام دوبارہ شروع ہو سکے۔

خیال رہے کہ 14 جولائی کو زیر تعمیر 4 ہزار 300 میگاواٹ کے داسو ہائیڈرو پاور منصوبے پر تعمیراتی ٹیم کو لے کر جانے والی ایک کوچ بالائی کوہستان میں دھماکے کے بعد دریا میں جاگری تھی جس کے نتیجے میں 9 چینی، 4 مقامی افراد ہلاک اور 28 زخمی ہوئے تھے۔

دوسری جانب تحقیقات جاری ہونے کی وجہ سے داسو منصوبے پر کام کرنے والی چینی تعمیراتی کمپنی نے کچھ وقت کے لیے ڈیم منصوبے پر کام معطل کردیا تھا۔

علاوہ ازیں کمپنی نے ایک بیان جاری کیا تھا جس میں کہا گیا کہ کمپنی کی جانب سے ورکرز کو نکالنے کا 16 جولائی کا فیصلہ متعلقہ حکام نے منظور نہیں تھا۔

اس نوٹس کے ذریعے اس قیاس آرائی کا خاتمہ ہوا جو منصوبے سے وابستہ 1800 پاکستانی ورکرز کی قسمت کے بارے میں ایک سابقہ نوٹی فکیشن کے اجرا کے بعد سوشل میڈیا پر وائرل ہوئی تھیں۔

تاہم عہدیدار نے بتایا کہ 14 جولائی کے بعد جائے وقوع کا دورہ کرنے والے چینی حکام نے لوگوں کو یقین دلایا تھا کہ منصوبے پر ہر قیمت پر کام مکمل کیا جائے گا۔

قبل ازیں چینی حکومت کی جانب سے اعلیٰ سطح کے سیکیورٹی وفد نے داسو ہائیڈرو پاور پروجیکٹ پر اسٹینڈرڈ آپریٹنگ پروسیجرز اور نئے سیکیورٹی منصوبے پر نظرِ ثانی کے لیے جائے وقوع کا دورہ کیا تھا۔

چینی تفتیش کاروں کے بارے میں ایک سینئر عہدیدار نے ڈان کو بتایا تھا کہ چینی وزارت خارجہ کے شعبے بیرونی سیکیورٹی امور کے ڈائریکٹر جنرل وو ویی، دیگر چینی عہدیداروں کے ہمراہ بالائی کوہستان کے ضلعی ہیڈ کوارٹر پہنچے اور وہاں سے بارسین گئے۔

ذرائع نے کہا تھا کہ چینی تفتیش کاروں نے بارسین کیمپ کے دورے کے موقع پر پاکستانی اور اپنے شہریوں سے پوچھ گچھ کی جبکہ مقامی پولیس، چینی تحقیقاتی ٹیم کے نتائج سے لاعلم نظر آئی۔

ایک پولیس افسر نے شناخت پوشیدہ رکھنے کی شرط پر بتایا تھا کہ فوج، پولیس، بم ڈسپوزل اسکواڈ وار محکمہ انسداد دہشت گردی کی جانب سے مشترکہ تحقیقات جاری ہیں لیکن ہمیں چینی تفتیش کے بارے میں کوئی معلومات نہیں ہیں۔

تفتیش سے متعلق ذرائع نے بتایا تھا کہ بس دھماکے میں استعمال ہونے والا مواد ایک ‘گھریلو ساختہ ڈیوائس’ تھی جس میں بال بیرنگز یا تیز دھار اشیا موجود نہیں تھیں جس کی وجہ سے اس سے صرف دھماکا ہوا اور بس کی سمت تبدیل ہوئی اور وہ دریا میں جاگری۔

انسپکٹر جنرل پولیس (آئی جی پی) اسلام آباد قاضی جمیل الرحمٰن نے نور مقدم کے بہیمانہ قتل کی تحقیقات کرنے والی ٹیم کو ہدایت کی ہے کہ وہ مشتبہ ظاہر ذاکر جعفر کا نام ایگزٹ کنٹرول لسٹ (ای سی ایل) میں ڈالنے کے لیے ضروری اقدامات اٹھائے۔

آئی جی پی نے انویسٹی گیشن ٹیم کے ساتھ ایک اجلاس میں ان سے کہا کہ وہ متعلقہ اتھارٹی کو سفارش کریں کہ ملزم کا نام ای سی ایل میں ڈال دیا جائے۔

انہوں نے ٹیم کو امریکا اور برطانیہ سے ظاہر جعفر کے مجرمانہ ریکارڈ حاصل کرنے کی بھی ہدایت کی اور ان سے کہا کہ ایسا کرنے کے لیے متعلقہ حکام سے رجوع کریں۔

پولیس چیف نے مزید ہدایت کی کہ وقوعہ سے جمع کیے گئے شواہد کو فرانزک تجزیہ کے لیے بھیجا جائے۔

آئی جی پی کے حوالے سے بیان میں کہا گیا کہ مقدمے کی سماعت جلد ہی ٹھوس شواہد کی روشنی میں ہونی چاہے اور انصاف کے تمام تقاضے پورے کیے جائیں تاکہ مجرم کو سخت سے سخت سزا دی جاسکے۔

‘خواتین، بچوں پر تشدد کے مقدمات انسداد دہشت گردی عدالتوں میں چلائے جائیں’
علاوہ ازیں پاکستان علما کونسل (پی یو سی) نے مطالبہ کیا ہے کہ خواتین اور بچوں پر تشدد اور زیادتی کے مقدمات کی سماعت انسداد دہشت گردی عدالتوں میں کی جائے اور ایسے کیسز میں فیصلوں کے لیے مدت مقرر کی جائے۔

کونسل نے وزیر اعظم عمران خان اور چیف جسٹس پاکستان گلزار احمد کو نوٹس لینے کی اپیل کی اور خواتین اور بچوں کے خلاف تشدد اور زیادتی کے واقعات میں حالیہ اضافے پر اپنی تشویش کا اظہار کیا۔

بیان میں کہا گیا کہ ‘نور مقدم اور عثمان مرزا جیسے کیسز ملک و قوم کو بدنام کرتے ہیں’۔

یاد رہے کہ 20 جولائی کو اسلام آباد کے سیکٹر ایف سیون فور میں ایک گھر میں سابق پاکستانی سفارت کار کی بیٹی کو قتل کردیا گیا تھا۔

مقتولہ کی شناخت نور مقدم کے نام سے ہوئی تھی جو سابق سفارت کار شوکت مقدم کی بیٹی تھیں اور ان کی عمر 27 برس تھی۔

پولیس نے ابتدائی طور پر بتایا تھا کہ لڑکی پر فائرنگ کے بعد تیز دھار آلے سے بھی وار کیا گیا جبکہ واقعے میں ایک اور شخص زخمی ہوا اور واقعے میں مبینہ طور پر ملوث ہونے پر لڑکی کے ایک دوست ظاہر ذاکر کو گرفتار کر لیا گیا ہے جو ملک کے معروف تاجر کا بیٹا ہے۔

بعدازاں پولیس نے ان کےخلاف مقتولہ کے والد کی شکایت پر تعزیرات پاکستان کی دفعہ 302 کے تحت ایف آئی آر درج کی۔

خاتون کے بہیمانہ قتل نے وفاقی دارالحکومت میں خواتین کی حفاظت کے حوالے سے نئی بحث کو جنم دیا ہے اور سماجی رابطوں کی ویب سائٹ ٹوئٹر پر ‘جسٹس فار نور’ کے ہیش ٹیگ سے ہزاروں ٹوئٹس کی گئیں۔

اطلاعات کے مطابق یہ گزشتہ چند دنوں کے دوران ملک میں کسی خاتون پر تیسرا اس طرح کا حملہ ہے۔

ترجمان دفتر خارجہ زاہد حفیظ چودھری نے کہا ہے کہ پاک چین اقتصادی راہداری (سی پیک) سے خطے میں سماجی اور معاشی ترقی ہوگی، علاقائی روابط بڑھیں گے۔ بھارتی پروپگنڈے سے اس کی اہمیت کم نہیں ہوگی، بھارت کو سی پیک سے متعلق بیان دینے کا کوئی حق نہیں ہے۔

بھارتی وزیر مملکت برائے خارجہ امور کے بیان پر شدید ردعمل دیتے ہوئے ان کا کہنا تھا کہ بھارتی وزیر نے جموں کشمیر تنازعے، افغان صورتحال اور سی پیک سے متعلق بے بنیاد اور غیر ذمہ دارانہ بیان دیا۔

زاہد حفیظ چودھری نے کہا کہ بھارت کا افغانستان میں سپائلر یا امن عمل کو نقصان پہنچانے والے ملک کا کردار عیاں ہے۔ بھارت افغانستان سے متعلق تشویش ظاہرکرنا بند کرے۔

ان کا کہنا تھا کہ بھارت کی طرف سے جھوٹے دعوے حقائق کو تبدیل نہیں کر سکتے۔ جھوٹے دعوے مقبوضہ کشمیر میں بھارتی انسانی حقوق کی خلاف ورزیوں سے توجہ نہیں ہٹا سکتے۔

انہوں نے کہا کہ مقبوضہ جموں وکشمیر عالمی سطح پر تسلیم شدہ تنازعہ ہے جو سلامتی کونسل کی قراردادوں کے مطابق حل ہوگا۔

مشیر قومی سلامتی ڈاکٹر معید یوسف نے بھارت پر واضح کر دیا ہے کہ ہر پاکستانی کشمیریوں کے ساتھ ہے۔ مسئلہ کشمیر حل کرنے پر آمادگی تک بھارت سے بات نہیں ہو سکتی۔

انہوں نے یہ بات بھارتی صحافی کرن تھاپر کو دیئے گئے ایک اہم انٹرویو میں کہی۔ مشیر قومی سلامتی کا کہنا تھا کہ مسئلہ کشمیر اقوام متحدہ کی قراردادوں کے مطابق حل کرنے پر آمادگی تک بھارت سے بات نہیں ہو سکتی۔

ڈاکٹر معید یوسف کا کہنا تھا کہ بھارت کو واضح کردیا کہ ہر پاکستانی آخری وقت تک کشمیریوں کے ساتھ کھڑا ہے۔ جب تک بھارت مقبوضہ کشمیر میں یکطرفہ اور جارحانہ اقدام واپس نہیں کرتا، بات ناممکن ہے۔

مشیر قومی سلامتی کا دوران انٹرویو کہنا تھا کہ بھارت کے خطے میں امن کو خراب کرنے کے لئے تخریب کاری کے ثبوت موجود ہیں۔ لاہور دھماکے کے تانے بانے بھارت سے جڑتے ہیں، ہم نے اس میں بھارت کے ملوث ہونے کے ثبوت سامنے رکھ دیے ہیں۔

ان کا کہنا تھا کہ بھارت کی حکومت آر ایس ایس اور فاشسٹ ایجنڈے پر عمل پیرا ہے۔ اسے پاکستان میں دہشت گردی روکنی ہوگی۔ پاکستان ہمیشہ امن کے لئے کوشاں رہا ہے مگر بھارت کی ہندوتوا سوچ آڑے آ رہی ہے۔

انہوں نے کہا کہ بھارتی وزیر خارجہ نے قبول کیا کہ بھارت نے فنانشل ایکشن ٹاسک فورس (ایف اے ٹی ایف) کو سیاسی عزائم کیلئے استعمال کیا.

اسلام آباد: ملک بھر میں کورونا کے وار جاری ہیں 24 گھنٹوں کے دوران کورونا کے 1425 مثبت کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 25ہزار 215ٹیسٹ کیے گئے جن میں سے 1425 افراد میں کورونا وائرس کی تصدیق ہوئی۔

ملک میں اب تک کورونا کے مصدقہ مثبت کیسز کی تعداد 1,000,034 ہوگئی ہے جن میں سے 923,472 مریض شفایاب ہو چکے ہیں۔ گزشتہ روز اس وبا نے مزید 11افراد کی زندگیوں کو نگل لیا۔ اس طرح ملک میں اب تک اس وبا سے جاں بحق افراد کی مجموعی تعداد 22 ہزار 939 ہوگئی ہے۔ جب کہ مثبت کیسز کی شرح 5.65 فیصد ریکارڈ ہوئی ہے۔
کورونا وائرس اوراحتیاطی تدابیر:

کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلا کربیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

کراچی: سندھ حکومت نے کورونا کے بڑھتے کیسز کے پیش نظر ایک بار پھر پابندیاں نافذ کردیں۔

وزیراعلیٰ سندھ مراد علی شاہ کی زیر صدارت کورونا ٹاسک فورس کا اجلاس ہوا جس میں کورونا کے بڑھتے کیسز کے پیش نظر اہم فیصلے کیے گئے۔

ترجمان وزیراعلیٰ سندھ کے مطابق کورونا ٹاسک فورس کے اجلاس میں پیر سے شادی ہالز اور دیگر تقریبات پر پابندی لگانے کا فیصلہ کیا گیا ہے جب کہ ہفتے میں دو دن مارکیٹیں بھی بند رکھی جائیں گی جس کے لیے جمعہ اور اتوار کو محفوظ دن قرار دیا گیا ہے۔

ترجمان نے بتایا کہ پیر سے شاپنگ مالز اور مارکیٹیں صبح 6 سے شام 6 بجے تک کھلیں گے، کریانہ، بیکری اور فارمیسی کھلی رہیں گی جب کہ صوبے بھر میں درگاہیں بھی بند کرنے کا فیصلہ کیا گیا ہے۔

ترجمان کے مطابق ریسٹورینٹس پیر سے انڈور اور آؤٹ ڈور دونوں بند ہوں گے اور صرف ٹیک اوے کی اجازت ہوگی۔

ترجمان کا کہنا تھا کہ صوبے بھر میں پیر سے تعلیمی ادارے بھی بند کرنے کا فیصلہ کیا گیا ہے تاہم سندھ میں امتحانات اپنے شیڈول کے مطابق ہوں گے جب کہ سرکاری اور نجی سیکٹر میں 50 فیصد اسٹاف حاضر ہوگا۔

ترجمان کے مطابق ان تمام فیصلوں پر پیر سے عملدرآمد کرایا جائے گا۔

کراچی: سندھ حکومت نے ویکسی نیشن نہ کرانے والے افراد کی موبائل سمز بند کرنے کے لیے وفاق کے ذریعے پی ٹی اے کو خط لکھنے کا فیصلہ کرلیا۔

سندھ کورونا ٹاسک فورس نے صوبے میں کورونا کیسز کی شرح 10 فیصد اور کراچی میں کیسز کی شرح 25 فیصد سے تجاوز کرنے پر ایک بار پھر پابندیاں لگانے کافیصلہ کیا ہے۔

کورونا ٹاسک فورس کے اجلاس میں فیصلہ کیا گیا ہے کہ جن سرکاری ملازمین نے کورونا ویکسین نہیں لگوائی ان کی تنخواہیں آئندہ ماہ سے بند کرنے کے لیے اقدامات کئے جائیں گے۔

وزیراعلیٰ سندھ کا بیان
اس سلسلے میں وزیراعلیٰ سندھ کا کہنا تھا کہ جو لوگ ایک ہفتے میں ویکسین نہ کروائیں ان کی موبائل سم بلاک کیاجائے جب کہ اگلے مہینے سے ویکسین نا لگانے والے سرکاری ملازمین کی تنخواہیں روکی جائیں۔

وزیراعلیٰ سندھ نے اس ضمن میں سیکرٹری فنانس کو اے جی سندھ سے رابطہ کرنے کی ہدایت کی ہے۔

دوسری جانب سندھ حکومت کے ترجمان مرتضیٰ وہاب نے بھی اپنی ٹوئٹ میں کہا کہ ویکسی نہ لگوانے والے افراد کی موبائل سم بند کرنے کے لیے این سی او سی اور پی ٹی اے کو خط لکھا جائے گا۔

وفاقی دارالحکومت اسلام آباد میں گزشتہ دنوں قتل ہونے والی سابق سفارتکار کی بیٹی نور مقدم کی پوسٹ مارٹم رپورٹ پولیس کو موصول ہوگئی۔

ذرائع کے مطابق پوسٹ مارٹم رپورٹ میں بتایا گیا ہے کہ مقتولہ کا سر دھڑ سے الگ کیا گیا اور مقتولہ کے جسم پر تشدد کے متعدد نشانات پائے گئے۔

رپورٹ میں کہا گیا ہے کہ مقتولہ کے گھٹنے کے نیچے کے حصے پر زخموں کے متعدد نشان ہیں جبکہ مقتولہ کے جسم پر متعدد مقامات پر چاقو کے گہرے زخم ہیں۔

ذرائع نے کہا کہ رپورٹ کے مطابق نور مقدم کی موت کی وجہ دماغ کو آکسیجن سپلائی کی بندش ہے۔

ذرائع نے بتایا کہ مقتولہ کے معدے سے لیا گیا مواد فارنزک کیلئے لیبارٹری بھجوایا گیا ہے تاہم معدے کی فارنزک رپورٹ پولیس کو تاحال موصول نہیں ہوئی۔

خیال رہے کہ 20 مئی کو تھانہ کوہسار کی حدود ایف سیون فور میں 28 سالہ لڑکی نور مقدم کو تیز دھار آلے سے قتل کیا گیا تھا۔

پولیس نے لڑکی کے والد، جو کہ مختلف ممالک میں پاکستان کے سفیر رہ چکے ہیں، کی مدعیت میں ظاہرجعفر نامی ملزم کے خلاف ایف آئی آر درج کی ہے جو مقامی بزنس مین کا بیٹا ہے۔

حیدرآباد کے علاقے لطیف آباد یونٹ نمبر 8 میں ٹرانسفارمر پھٹنے سے 5 افراد جاں بحق اور متعدد زخمی ہوگئے۔

ٹرانسفارمر پھٹنے سے شدید جھلسنے والے افراد کو سول ہسپتال حیدرآباد منتقل کیا گیا جہاں ڈاکٹرز اور عملے کی عدم دستیابی کے سبب متاثرین کو علاج کی سہولیات فراہم نہ ہوسکیں۔

اس پر انہیں حیدرآباد سے 163 کلومیٹر دور کراچی منتقل کیا گیا جہاں انہیں طبی امداد فراہم کی گئی۔ زخموں کی تاب نہ لاتے ہوئے 5 افراد انتقال کرگئے۔ پولیس کے مطابق انتقال کرجانے والوں میں سجاد قریشی،وقاص، نعمان، تابش اور شجاعت شامل ہیں۔ 12 افراد اب بھی کراچی کے دو مختلف اسپتالوں میں زیرعلاج ہیں۔

اے سیکشن پولیس نے واقعے کا مقدمہ سرکاری مدعیت میں قتل باالسبب اور نقصان رسانی کی دفعات کے تحت حیسکو کے پانچ ملازمین کے خلاف درج کرلیا جس میں حیسکو ملازمین سہیل، فیصل، اسماعیل، سلیم اور ابراہیم کو نامزد کیا گیا ہے۔ نامزد 5 حیسکو ملازمین میں سے تین ملازمین خود بھی ٹرانسفارمر پھٹنے کے واقعے میں زخمی ہوئے ہیں۔

وزیر توانائی سندھ امتیاز شیخ نے معاملے پر نوٹس لیتے ہوئے حیسکو چیف اور ایس ایس حیدرآباد سے رابطہ کیا۔ انہوں نے متعدد افراد کی ہلاکت پر افسوس کا اظہار کیا۔

واضح رہے کہ حیدرآباد میں ٹرانسفارمر پھٹنے کا یہ دوسرا واقعہ ہے۔ گزشتہ ماہ 18 جون کو بھی اسلام چوک پر ٹرانسفامر پھٹنے سے گرم تیل نکلا جس سے 7 افراد بری طرح جھلس گئے تھے جن میں تین افراد جاں بحق ہوگئے تھے۔ اس طرح دو ماہ میں ایک ہی نوعیت کے واقعات میں متعدد افراد کی جانیں گئیں۔

ملک بھر میں عید الاضحیٰ کے موقع پر عوام کی جانب سے کورونا ایس او پیز کی خلاف ورزی جاری ہیں جس سے کیسز میں بھی اضافہ دیکھنے میں آیا ہے اور گزشتہ 24 گھنٹوں میں مثبت کیسز کی شرح 6.30 فیصد ریکارڈ کی گئی۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 34 ہزار 216 ٹیسٹ کیے گئے جن میں سے 2158 افراد میں وائرس کی تصدیق ہوئی جب کہ وائرس سے 40 افراد انتقال کر گئے۔

سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 6.30 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 22928 ہو گئی اور مجموعی کیسز 9 لاکھ 98 ہزار 609 تک جاپہنچے ہیں۔

اس کے علاوہ 24 گھنٹوں کے دوران ملک بھر میں 895 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 9 لاکھ 22 ہزار 929 ہوگئی ہے۔