Category پاکستان

وفاقی وزیر تعلیم شفقت محمود کا کہنا ہےکہ 15جون کے بعد بورڈ امتحانات شروع کرنےکا اصولی فیصلہ کرلیا ہے۔

ایک بیان میں شفقت محمودکا کہنا تھا کہ گذشتہ روز ہونے والی بین الصوبائی وزرائے تعلیم کانفرنس میں فیصلہ کیا گیا کہ بورڈ کے امتحانات 15 جون کے بعد شروع ہوں گے۔

شفقت محمود کا کہنا تھا کہ 15 جون کے بعد 12 ویں اور 10ویں جماعت کے امتحانات ترجیحی بنیاد پر ہوں گے جب کہ گیارہویں اورنویں جماعت کے امتحانات بعد میں شروع ہوں گے۔

ان کا کہنا تھاکہ انٹرمیڈیٹ اور میٹرک کے امتحانات کو ترجیح دی جائےگی تاکہ جامعات میں داخلے سے قبل ہی ان کے نتائج آسکیں۔

کوئٹہ: سریاب روڈ پر گزشتہ شب پولیس کی مبینہ فائرنگ سے نوجوان فیضان جتک جاں بحق جبکہ اسکا ساتھی شہزاد زخمی ہوگیا۔

پولیس کا کہنا ہے کہ ایگل اسکواڈ نے فیضان جتک کو رُکنے کا اشارہ کیا تھا اور گاڑی نہ روکنے پر اس پر فائرنگ کر دی۔ دوسری جانب لواحقین نے احتجاجی مظاہرہ کرتے ہوئے کہا ہے کہ یہ تاثر غلط ہے کہ فیضان نے گاڑی نہیں روکی تھی۔

وزیراعلی بلوچستان نے پولیس کی فائرنگ سے نوجوان کی ہلاکت کی تحقیقات کا حکم دیتے ہوئے کہا کہ واقعے میں ملوث اہلکاروں کو ہر صورت قانون کے کٹہرے میں لایا جائے اور انکوائری رپورٹ کی روشنی میں فوری کارروائی کی جائے گی۔

صوبائی وزیرداخلہ میرضیاء اللہ لانگو نے واقعے کا نوٹس لیتے ہوئے آئی جی پولیس سے فوری رپورٹ طلب کرلی۔

میرضیاء للہ لانگو نے کہا کہ نوجوان کی ہلاکت پر افسوس ہوا ہے،لواحقین سے ناانصافی نہیں ہوگی، ایس ایس پی کی سربراہی میں واقعے کی شفاف تحقیقات کے لئے کمیٹی تشکیل دے دی گئی ہے اور فائرنگ کرنے والے اہلکار کو حراست میں لے لیا ہے۔

ترجمان بلوچستان حکومت لیاقت شاہوانی نے کہا کہ آئی جی پولیس نے واقعہ کی انکوائری کے فوری احکامات جاری کردیئے ، ذمہ داران کیخلاف قانونی کارروائی کی جائیگی، نوجوان فیضان جتک کی ہلاکت کے دلخراش واقعہ پر بہت افسوس ہوا۔

کراچی: کلفٹن کے شاپنگ مال میں سنار کی دکان میں چوری کی واردات کا ڈراپ سین ہوگیا۔

پولیس کا کہنا ہے کہ 4 مئی کو واردات کے بعد کیس کی گہرائی سےتفتیش شروع کی گئی، متاثرہ دکان کا ڈی وی آر اور دیگر 15دکانوں کی سی سی ٹی وی فوٹیج حاصل کی گئی اور 23 افراد سے پوچھ گچھ کی گئی جن میں سے 15 مشتبہ افراد کا کال ریکارڈ حاصل کرکے اس کی چھان بین کی گئی۔

پولیس کا کہنا ہے کہ تفتیش کے دوران کیس کے مدعی پر شک ہوا اس نے پوچھ گچھ کے دوران یہ اعتراف کیا کہ اس نے دکان میں چوری کا ڈرامہ رچایا تھا جس میں اس کا دوست وسیم بھی اس کے ساتھ ملوث ہے، دونوں ملزمان کی نشاندہی پر آئی آئی چند ریگر روڈ پر واقع تجارتی مرکز پر چھاپہ مارا گیا جہاں سے 3 کلو سونا ملا ہے۔

پولیس کے مطابق ملزم آصف نے بتایا کہ اس پر 80 لاکھ روپے قرض تھا اور قرضے کی ادائیگی کے لیے اس نے چوری کا ڈرامہ کیا۔

پولیس کا کہنا ہے کہ چوری کیا گیا سونا 3 کلو ہی تھا، ملزمان نے جھوٹ بولا تھا کہ سونا 10 کلو غائب ہوا، واقعہ کا مقدمہ ملزم آصف کی ہی مدعیت میں کلفٹن تھانے میں درج ہے۔

نیشنل کمانڈ اینڈ آپریشن سینٹر (این سی او سی) کے کووڈ-19 ایس او پیز سے متعلق جاری 4 مئی کے فیصلوں کے تناظر میں صوبہ پنجاب، خیبرپختونخوا اور آزاد کشمیر کی حکومت نے 8 سے 16 مئی (عید الفطر کی تعطیلات کے دوران) مکمل لاک ڈاؤن یا مختلف قسم کی پابندیوں کے نفاذ کا اعلان کردیا ہے۔

خیال رہے کہ 4 مئی کو این سی او سی کے ہونے والے اجلاس میں یہ فیصلہ کیا گیا تھا کہ 8 سے 16 مئی کے دوران عید کی چھٹیوں میں وفاق، صوبوں اور ضلعی سطح پر کورونا ایس او پیز پر عمل درآمد کو یقینی بنانے کے لیے مانیٹرنگ ٹیمیں تشکیل دی جائیں گی۔

این سی او سی کے اجلاس کے بعد جاری بیان میں کہا گیا تھا کہ وفاقی، صوبائی اور ضلعی سطح پر مانیٹرنگ ٹیمیں تشکیل دینے کا فیصلہ کیا گیا تاکہ 8 مئی سے 16 مئی2021 تک ایس او پیز پر عمل درآمد یقینی بنایا جائے گا۔

نگراں ادارے کا کہنا تھا کہ اس دوران تمام کاروبار اور دوکانیں بدستور بند رہیں گی تاہم غذائی اجناس، سبزیوں کی دکانیں، میڈیکل اسٹور، پیٹرول پمپس اور بیکریاں کھلی رہیں گی۔

اجلاس کے شرکا کو آگاہ کیا گیا تھا کہ مقامی اور بیرونی دونوں سطح پر سیاحت پر مکمل پابندی ہوگی، تمام سیاحتی مقامات، پکنک پوائنٹس، عوامی پارکس، شاپنگ مالز، تمام ہوٹل اور پکنک پوائنٹس کے اطراف میں ریسٹورنٹس بدستور بند رہیں گے۔

این سی او سی کا کہنا تھا کہ شمالی علاقوں کے پہاڑیوں میں سیاحتی اور پکنک پوائنٹس اور جنوب میں ساحلوں اور سی ویو بھی بند رہیں گے لیکن گلگت بلتستان اور آزاد جموں و کشمیر کے مقامی لوگوں کو خصوصی طور پر گھروں کو واپس جانے کی اجازت ہوگی۔

پنجاب کا مکمل لاک ڈاؤن کا اعلان
این س او سی کے 4 مئی کے فیصلوں کے تناظر میں آج پنجاب میں صوبائی وزیر صحت ڈاکٹر یاسمین راشد کی زیر صدارت سول سیکریٹریٹ میں اجلاس منعقد ہوا جس میں چیف سیکریٹری پنجاب، اعلیٰ سول و عسکری حکام نے شرکت کی۔

اجلاس میں فیصلہ کیا گیا کہ صوبے بھر میں 8 سے 16 مئی تک مکمل لاک ڈاؤن نافذ کیا جائے گا، جس میں لوگوں کی نقل وحمل محدود کرنے کیلئے ہر قسم کی پبلک ٹرانسپورٹ، سیاحتی مقامات بند رہیں گے۔

اس کے علاوہ شہروں کے داخلی اور خارجی راستوں پر چیک پوائنٹس قائم کئے جائیں گے اور ان چیک پوائنٹس پر پولیس، رینجرز اور فوج تعینات کی جائے گی۔

دوران اجلاس ڈاکٹر یاسمین راشد نے کہا کہ کورونا وبا پر قابو پانے کیلئے اگلے 15 سے 20 دن نہایت اہم ہیں، اس لیے شہری کورونا پر قابو پانے کے لیے حکومتی کوششوں کا ساتھ دیں۔

انہوں نے کہا کہ عوام عید سادگی سے منائیں اور احتیاطی تدابیر پر عمل کر کے ذمہ دار شہری ہونے کا ثبوت دیں۔

علاوہ ازیں چیف سیکریٹری پنجاب نے کہا کہ عید کے موقع پر زیادہ چھٹیاں دینے کا مقصد لوگوں کی نقل وحمل کو محدود کرنا ہے۔

ان کا کہنا تھا کہ احتیاطی تدابیر کی اہمیت سے متعلق شعور و آگاہی کو بڑھایا جائے، شہری عید کی چھٹیوں کے دوران غیر ضروری سفر سے گریز کریں۔

انہوں نے ہدایت کی کہ این سی او سی کی ہدایت کے مطابق چھٹیوں کے دوران پارکس، سیاحتی مقامات کو مکمل بند رکھا جائے۔

خیبرپختونخوا کا این سی او سی کے فیصلوں پر عمل درآمد کا اعلان
علاوہ ازیں خیبرپختونخوا حکومت کی جانب سے ایک جاری نوٹیفکیشن میں کہا گیا کہ این سی او سی کے 4 مئی کے فیصلوں پر مکمل عمل درآمد کیا جائے گا۔

نوٹیفکیشن کے مطابق این سی او سی کے فیصلوں کے تناظر میں خیبرپختونخوا پینڈیمک کنٹرول اینڈ ایمرجنسی ایکٹ 2020 کے تحت مندرجہ ذیل فیصلے کیے ہیں:

8 سے 16 مئی کے دوران تندور، دودھ اور دہی کی دکانیں، تیار کھانا لے جانے، ای کامرس (ہوم ڈیلوری)، یوٹیلیٹی سروسز (الیکٹرک سٹی، سوئی گیس، انٹرنیٹ، سیلولر نیٹورکس/ ٹیلی کام، کال سینٹرز) 24 گھنٹے کھلے رہیں گے۔
پیٹرولیم مصنوعات دریافت کرنے والی کمپنیوں کے عملے، ٹھیکداروں اور ان کی گاڑیوں کو استثنیٰ حاصل ہوگا۔
عید الفطر کے موقع پر اشیائے ضروریات کی دکانیں، بیکری اور میٹھائی کی دکانوں کو شام 6 بجے تک کھلا رکھنے کی اجازت ہوگی۔
آزاد کشمیر میں بھی لاک ڈاؤن کا اعلان
علاوہ ازیں آزاد جموں اور کشمیر کی حکومت نے بھی این سی او سی کے 4 مئی کے فیصلوں کے تناظر میں ‘نقل و حرکت پر قابو پانے کے اقدامات’ کے تحت کشمیر بھر میں 8 سے 16 مئی تک لاک ڈاؤن نافذ کرنے کا اعلان کیا ہے۔

آزاد کشمیر کے محکمہ داخلہ کے جاری نوٹیفکیشن کے مطابق 8 سے 16 مئی تک کشمیر بھر میں تمام دکانیں بند رہیں گی تاہم این سی او سی کے فیصلے کے تناظر میں ضروری خدمات اور اشیا کی فراہمی سے جڑی سروسز کو استثنیٰ حاصل ہوگا۔

نوٹیفکیشن میں کہا گیا کہ کشمیر سے باہر جانے والی اور شہر کے درمیان چلنے والی پبلک ٹرانسپورٹ مکمل بند رہے گی تاہم اشیا ضروریات کی نقل حمل، نجی گاڑیوں اور ٹیکسی یا رکشہ کو 50 فیصد گنجائش کے ساتھ چلنے کی اجازت ہوگی۔

یہ بھی پڑھیں: این سی او سی کا کووڈ-19 ایس او پیز پر عمل درآمد کیلئے مانیٹرنگ ٹیمیں تشکیل دینے کا فیصلہ

دوسری جانب آزاد کشمیر کے وزیر صحت ڈاکٹر نجیب نقوی کا کہنا تھا کہ آزاد کشمیر کے متعدد علاقوں میں کووڈ-19 کی صورت حال تشویشناک ہے، ان کا کہنا تھا کہ گزشتہ ایک ہفتے کے دوران (29 اپریل سے 5 مئی) وادی میں 4738 مشتبہ کیسز میں سے 652 میں کورونا وائرس کی تشخیص ہوئی ہے جبکہ 24 افراد ہلاک ہوئے۔

وزیر صحت نے بتایا کہ اب تک ایک لاکھ 79 ہزار 843 ٹیسٹ میں سے 17 ہزار 583 افراد کا کورونا ٹیسٹ مثبت آیا ہے۔

ان کا کہنا تھا کہ ان میں سے 15 ہزار 11 صحتیاب ہوچکے ہیں جبکہ 494 افراد اس وبائی مرض کا شکار ہو کر موت کے منہ میں چلے گئے علاوہ ازیں دیگر افراد اب بھی زیر علاج ہیں۔

یاد رہے کہ صوبوں اور وفاقی اکائی کی جانب سے عید کی تعطیلات کے حوالے سے جاری اعلانات میں کسی میں بھی نماز عید کے اجتماعات کے حوالے سے کوئی اعلان سامنے نہیں آیا ہے۔

صوبہ خیبرپختونخوا کے ضلع شمالی وزیرستان میں دہشتگردوں کیخلاف آپریشن میں کیپٹن سمیت 3 جوان شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان کے علاقے دوسلی میں خفیہ اطلاعات پر آپریشن کیا۔

آئی ایس پی آر نے بتایا کہ سیکیورٹی فورسز کے آپریشن میں دو دہشت گرد مارے گئے۔

آئی ایس پی آر کے مطابق دہشت گردوں سے فائرنگ کے تبادلے میں کیپٹن فہیم، سپاہی شفیع اور سپاہی نسیم شہید ہوگئے۔

نیشنل کمانڈ اینڈ آپریشن سینٹر (این سی او سی) عید کی پہلی تین چھٹیوں کے لیے زائد عمر کے افراد کے ویکسی نیشن سینٹرز (اے وی سیز) بند رکھنے پر غور کر رہا ہے جس کے باعث تقریباً ساڑھے 4 لاکھ افراد ویکسین کی پہلی یا دوسری خوراک حاصل نہیں کر سکیں گے۔

تاہم کورونا کے متعلق سائنسی ٹاسک فورسز کے رکن پروفیسر ڈاکٹر جاوید اکرم نے کہا کہ ان تعطیلات سے زیادہ فرق نہیں پڑے گا کیونکہ لوگ اپنی دوسری خوراک چند دن قبل لے سکتے ہیں یا اس میں چند روز کی تاخیر کر سکتے ہیں۔

ملک بھر میں 10 سے 15 مئی تک عید کی تعطیلات کا اعلان کیا گیا ہے۔

این سی او سی کے مطابق چھ روز کی تعطیلات کا اعلان لوگوں کی نقل و حمل کو کم کرنے کے لیے کیا گیا ہے، اس نے ‘گھر پر رہیں، محفوظ رہیں’ گائیڈلائن بھی جاری کی ہے۔

ملک میں اب یومیہ ڈیڑھ لاکھ لوگوں کو ویکسین کی پہلی یا دوسری خوراک لگائی جارہی ہے اس لیے عید کے دنوں میں ویکسی نیشن سینٹرز بند رہنے سے ساڑھے 4 لاکھ افراد متاثر ہوں گے۔

وزارت قومی صحت کے ترجمان ساجد شاہ نے ڈان کو بتایا کہ اس حوالے سے نوٹی فکیشن جاری ہونا باقی ہے لیکن این سی او سی کے مطابق عید کے دنوں میں ویکسی نیشن سینٹرز بند رہیں گے۔

ترجمان نے کہا کہ ‘لوگ عید کے چوتھے دن ویکسی نیشن سینٹرز جاسکتے ہیں، وہاں عملہ موجود ہوگا اور معمول کے مطابق ویکسین لگائی جائے گی۔

ایک سوال کے جواب میں انہوں نے کہا کہ عید کی تعطیلات کے بعد ویکسی نیشن سینٹرز کا ایک ہی وقت ہوجائے گا، سینٹرز صبح کھل کر دوپہر میں بند ہوں گے تاہم صوبے اپنی مرضی سے وقت مقرر کر سکتے ہیں۔

رمضان سے قبل ویکسی نیشن سینٹرز دوپہر تک کھلے رہتے تھے تاہم رمضان کے دوران یہ سینٹرز پہلے صبح اور پھر افطار کے بعد کھلتے ہیں۔

پروفیسر ڈاکٹر جاوید اکرم نے ڈان کو بتایا کہ لوگوں کے ویکسین کچھ دن پہلے یا بعد میں لینے سے کوئی فرق نہیں پڑتا۔

انہوں نے کہا کہ ‘اس وقت پاکستان میں ایک اور دو خوراکوں والی ویکسین لگائی جارہی ہے، کین سینو بائیولوجکس جیسی ایک خوراک والی ویکسین لگوانے والوں کو دوسری خوراک کی ضرورت نہیں ہے، جنہیں سائینوفارم یا سینوویک ویکسین لگائی جارہی ہیں وہ عید سے قبل یا اس کے بعد دوسری خوراک لگوا سکتے ہیں’۔

بلوچستان کے ضلع ژوب میں افغانستان سے دہشت گردوں کے حملے میں فرنٹیئر کور (ایف سی) کے 4 اہلکار شہید اور 6 زخمی ہوگئے۔

پاک فوج کے شعبہ تعلقات عامہ ‘آئی ایس پی آر’ سے جاری بیان کے مطابق بلوچستان کے ضلع ژوب میں پاک ۔ افغان سرحد کے ساتھ سیکٹر منکزئی میں باڑ لگانے کا کام جاری تھا، جس دوران افغانستان سے دہشت گردوں نے ایف سی کے اہلکاروں پر حملہ کیا۔

دہشت گردوں کے حملے میں 4 ایف سی اہلکار شہید اور 6 زخمی ہوگئے۔

ایف سی اہلکاروں نے دہشت گردوں کے حملے کا فوری اور مؤثر جواب دیا۔

بیان میں کہا گیا کہ زخمی اہلکاروں کو کمبائنڈ ملٹری ہسپتال (سی ایم ایچ) منتقل کردیا گیا۔

سرحد پار سے دہشت گردی کے حملوں میں شہید ہونے والوں میں حوالدار نور زمان، سپاہی شکیل عباس، سپاہی احسان اللہ اور نائیک سلطان شامل ہیں۔

واضح رہے کہ یہ پاک افغان بارڈر پر سرحد پار فائرنگ کا پہلا واقعہ نہیں ہے بلکہ اس سے قبل بھی متعدد ایسے واقعات رونما ہوچکے ہیں جس میں پاکستانی شہریوں اور پاک فوج کے جوانوں کو نشانہ بنایا گیا۔

رواں سال 12 فروری کو خیبر پختونخوا کے قبائلی علاقے باجوڑ میں افغانستان کے اندر سے دہشت گردوں کی جانب سے داغے گئے راکٹوں کے باعث 5 سالہ بچی جاں بحق اور 7 بچے زخمی ہوگئے تھے۔

14 اکتوبر 2020 کو قبائلی علاقے باجوڑ میں پاک ۔ افغان سرحد پر سیکیورٹی فورسز کی چیک پوسٹ پر سرحد پار سے دہشت گردوں کی فائرنگ کے نتیجے میں پاک فوج کا ایک جوان شہید جبکہ دوسرا زخمی ہوگیا تھا۔

قبل ازیں 22 ستمبر کو پاک ۔ افغان سرحد پر سیکیورٹی فورسز کی چیک پوسٹ پر سرحد پار سے کی گئی فائرنگ کے نتیجے میں پاک فوج کا جوان شہید ہوگیا تھا۔

پاکستان میں کورونا وائرس سے بچاؤ کے ایس او پیز پر سختی سے عملدرآمد کروانے کے نتیجے میں وبا کے پھیلاؤ کو روکنے میں بہتری آئی ہے جبکہ ملک میں 40 سال سے زائد عمر کے افراد کی ویکسینیشن کا سلسلہ بھی جاری ہے۔

کورونا وائرس کے اعداد و شمار مرتب کرنے والی سرکاری ویب سائٹ کے مطابق گزشتہ 24 گھنٹوں میں ملک میں مزید 4 ہزار 113 افراد وائرس سے متاثر ہوئے جبکہ مزید 119 افراد انتقال کر گئے۔

ملک میں 4 مئی کو مجموعی طور پر کووڈ-19 کے 44 ہزار 838 ٹیسٹ کیے گئے جس کے نتیجے میں کورونا کیسز کے مثبت آنے کی شرح 9.17 فیصد رہی اور فعال کیسز کی تعداد 84 ہزار 480 ہوگئی۔

پاکستان میں اب تک 8 لاکھ 41 ہزار 636 افراد کے وائرس سے متاثر ہونے کی تصدیق ہوچکی ہے جن میں سے 18 ہزار 429 مریض انتقال کرچکے ہیں۔

علاوہ ازیں گزشتہ 24 گھنٹوں میں وائرس کا شکار مزید 5 ہزار 665 مریض صحتیاب ہوئے جس کے بعد کورونا سے صحتیاب ہونے والے افراد کی مجموعی تعداد 7 لاکھ 38 ہزار 727 تک جاپہنچی ہے۔

واضح رہے کہ پاکستان میں کورونا وائرس کے پہلے کیس کی تصدیق 26 فروری 2020 کو ہوئی تھی، جس کے بعد سے وبا کے پھیلاؤ میں اتار چڑھاؤ جاری ہے اور اب تک وائرس کی 3 لہریں دیکھی جاچکی ہیں۔

موجودہ لہر کے دوران کورونا وائرس کے کیسز اور اموات میں اضافے کے پیشِ نظر پابندیوں میں سختی کردی گئی تھی جبکہ عیدالفطر کی تعطیلات کے دوران پبلک پارکس، ریسٹورنٹس اور ہوٹلز بھی بند رکھنے کا اعلان کیا گیا ہے اور ایس او پیز پر عملدرآمد کے لیے فوج کو تعینات کیا گیا ہے۔

ملک میں 5 مئی 2021 کو کورونا وائرس کیسز اور اموات کی صورتحال کچھ یوں ہے:

پنجاب
صوبہ پنجاب ان دنوں کورونا وائرس کی تیسری لہر سے سب سے زیادہ متاثر ہے جہاں گزشتہ 24 گھنٹوں میں وبا کے مزید 2 ہزار 87 کیسز کی تصدیق ہوئی جبکہ 58 اموات رپورٹ ہوئیں۔

پنجاب میں مجموعی طو پر کورونا وائرس سے 3 لاکھ 10 ہزار 616 افراد متاثر جبکہ 8 ہزار 741 انتقال کرچکے ہیں۔

سندھ
صوبہ سندھ میں بھی وبا کا پھیلاؤ بڑھ رہا ہے اور سندھ میں گزشتہ 24 گھنٹوں میں کورونا وائرس کے ایک ہزار 112 کیسز کی تصدیق ہوئی جبکہ مزید 9 افراد جان کی بازی ہار گئے۔

مذکورہ اضافے کے بعد سندھ میں کورونا سے متاثرہ افراد کی مجموعی تعداد 2 لاکھ 87 ہزار 643 جبکہ اموات کی مجموعی تعداد 4 ہزار 687 تک جاپہنچی ہے۔

خیبرپختونخوا
کورونا وائرس کی تیسری لہر نے پنجاب کے بعد خیبرپختونخوا کو زیادہ متاثر کیا جہاں گزشتہ 24 گھنٹوں میں کووڈ-19 کے مزید 509 کیسز اور 43 اموات رپورٹ ہوئیں۔

اب تک خیبر پختونخوا میں مجموعی طور پر ایک لاکھ 21 ہزار 99 افراد وبا سے متاثر جبکہ 3 ہزار 466 مریض لقمہ اجل بن چکے ہیں۔

بلوچستان
گزشتہ 24 گھنٹوں کے دوران ملک کے سب سے وسیع صوبے میں مزید 112 افراد وائرس سے متاثر پائے گئے۔

نئے کیسز کے اضافے کے بعد بلوچستان میں عالمی وبا سے متاثرہ افراد کی مجموعی تعداد 22 ہزار 776 ہوگئی جبکہ اموات کی تعداد 239 پر برقرار ہے۔

اسلام آباد
کورونا کی تیسری لہر نے وفاقی دارالحکومت اسلام آباد کو بھی متاثر کیا ہے جہاں گزشتہ 24 گھنٹوں میں کورونا وائرس کے مزید 204 کیسز سامنے آئے جبکہ 5 مریض انتقال کر گئے۔

اسلام آباد میں کورونا متاثرین کی مجموعی تعداد 76 ہزار 696 ہے جبکہ 698 افراد وبا سے انتقال کرچکے ہیں۔

آزاد کشمیر
آزاد کشمیر میں گزشتہ 24 گھنٹوں کے دوران کورونا وائرس کے مزید 68 کیسز کی تصدیق ہوئی جبکہ 4 مریض انتقال کرگئے۔

مذکورہ اضافے کے بعد آزاد کشمیر میں کورونا وائرس مجموعی طور پر 17 ہزار 465 افراد کو متاثر کرچکا ہے جبکہ 491 افراد کی موت کا سبب بھی بنا ہے۔

گلگت بلتستان
کورونا وائرس سے سب سے کم گلگت بلتستان متاثر ہوا ہے اور وہاں گزشتہ 24 گھنٹوں میں 11 کیسز سامنے آئے اور کوئی اموات رپورٹ نہیں ہوئی۔

گلگت بلتستان میں کورونا وائرس سے متاثرہ افراد کی مجموعی تعداد 5 ہزار 341 جبکہ اموات کی مجموعی تعداد 107 ہوگئی ہے۔

ملک میں کورونا کے بڑھتے ہوئے کیسز اور کچھ صوبوں کے طریقہ امتحانات سے متعلق مکمل تیاری نہ ہونے کے باعث صرف 10 ویں اور 12 جماعت کے امتحانات لینے اور 9 ویں اور 11ویں طلبہ کو اگلی کلاسوں میں پروموٹ کرنے پر غور شروع کردیا گیا ہے۔

منگل کو آئی بی سی سی کی اسٹیئرنگ کمیٹی کے تحت ہونے والے آن لائن اجلاس کی صدارت چیئرمین اسٹیئرنگ کمیٹی ڈاکٹر ناظم جیوا نے کی جب کہ اجلاس میں سیکرٹری آئی بی سی سی ڈاکٹر غلام علی ملاح، چیئرمین انٹرمیڈیٹ بورڈ کراچی ڈاکٹر سعید الدین، سرگودھا تعلیمی بورڈ کی چیئرپرسن ڈاکٹر کوثر رئیس، کوہاٹ تعلیمی بورڈ کے چیئرمین ڈاکٹر شوکت حیات، فیڈرل بورڈ کے چیئرمین ڈاکٹر قیصر عالم نے شرکت کی۔

میٹرک اور انٹر کےامتحانات مئی کے تیسرے یا چوتھے ہفتے میں ہوں گے، شفقت محمود
آئی بی سی سی کی اسٹیئرنگ کمیٹی کے اجلاس میں یہ بھی تجویز زیر غور آئی کہ امتحانات کو مختصر کرنے کے لیے لازمی مضامین کے بجائے اختیاری مضامین کے امتحان لیے جائیں تاہم اس موقع پر کہا گیا کہ سائنس کے زمرہ میں تو یہ ممکن ہے تاہم آرٹس میں اختیاری مضامین ہونے کے باعث مشکل ہوگی لہٰذا بہتر ہے کہ دسویں اور بارہویں کے امتحان لیے جائیں جب کہ نویں اور گیارہویں کے طلبہ کو بغیر امتحان اگلی کلاسوں میں بھیج دیا جائے۔

اجلاس میں کہا گیا کہ اگر آئی بی سی سی اس تجویز پر متفق ہوگیا کہ دسویں اور بارہویں کے امتحان لیے جائیں تو پھر یہ معاملہ حتمی منظوری کے لیے بین الصوبائی وزرائے تعلیم کانفرنس میں بھیجا جائے گا اور وہاں سے منظوری کے بعد اس کا اطلاق پورے ملک میں کردیا جائے گا۔

اجلاس میں بتایا گیا کہ سندھ نے صوبائی اسٹیئرنگ کمیٹی کے فیصلے کے تناظر میں امتحانات سے متعلق اپنی تیاری مکمل کرلی ہے جس کے تحت 50 فیصد سوالات 30 فیصد مختصر اور 20 فیصد تفصیلی جوابات پر مشتمل ہوں گے۔

سپریم کورٹ نے کورونا وائرس کے خلاف اقدامات سے متعلق این ڈی ایم اے اور حکومت سندھ کی رپورٹ کو غیر تسلی بخش قرار جبکہ حکومت کو دو روز میں آکسیجن سلنڈر کی قیمت کا تعین کرنے کا حکم دے دیا۔

سپریم کورٹ میں کورونا ازخود نوٹس کیس کی سماعت چیف جسٹس گلزار احمد کی سربراہی میں تین رکنی بینچ نے کی۔

چیف جسٹس نے ریمارکس دیتے ہوئے کہا کہ پاکستان اسٹیل ملز سے آکسیجن کی بڑی مقدار مل سکتی ہے اسے فعال کیا جائے۔

ایڈیشنل اٹارنی جنرل نے کہا کہ پاکستان اسٹیل ملز کا آکسیجن پلانٹ 40 سال پرانا ہے، فعال کرنے پرایک ارب لاگت آئے گی۔

عدالت نے ایڈیشنل اٹارنی جنرل سے آکسیجن سے متعلق تفصیلی رپورٹ طلب کر لی۔

دوران سماعت ڈریپ حکام نے کہا کہ وینٹی لیٹر سمیت کئی آلات ملک میں تیار ہو رہے ہیں۔

چیف جسٹس نے استفسار کیا کہ غیر رجسٹرڈ آلات اور ادویات کی درآمد کی اجازت کیوں دی؟ حکومت کو کیسے معلوم ہوگا کہ کونسی چیز منگوائی جارہی ہے؟ طبی آلات کی دستیابی کی کیا صورتحال ہے؟

ایڈیشنل اٹارنی جنرل نے بتایا کہ ڈریپ اور نیشنل ڈیزاسٹر منیجنٹ اتھارٹی (این ڈی ایم اے) کی رپورٹس جمع کرا دی ہیں، 30 اپریل کو حکومت نے غیر رجسٹرڈ ادویات کی درآمد کا این او سی جاری کیا۔

چیف جسٹس گلزار احمد نے استفسار کیا کہ کیا کوئی تحقیقات کیں کہ ادویات کیوں منگوائی جارہی ہیں؟

ڈریپ حکام نے کہا کہ کورونا سے متعلق کسی بھی دوا کی قلت نہیں، ایکٹمرا انجیکشن کے علاوہ کئی ادویات کا اسٹاک موجود ہے۔

آکسیجن سلنڈر کی قیمت کا تعین کرنے کا حکم
عدالت عظمیٰ نے خیبر پختونخوا حکومت کی استدعا پر حکومت کو دو روز میں آکسیجن سلنڈر کی قیمت کا تعین اور طریقہ کار وضع کرنے کا حکم دے دیا۔

ایڈیشنل اٹارنی جنرل نے کہا کہ عدالت کو آکسیجن سے متعلق تفصیلی رپورٹ فراہم کریں گے۔

دوران سماعت چیف جسٹس گلزار احمد نے این ڈی ایم اے کی رپورٹ کو غیر تسلی بخش قرار دیتے ہوئے آئندہ سماعت میں اتھارٹی کے چیئرمین کو طلب کر لیا۔

انہوں نے ریمارکس دیے این ڈی ایم اے کے سارے معاملات ہی گڑبڑ ہیں، چارٹرڈ جہاز کے ذریعے مشینری منگوائی اور اس کی ادائیگی بھی نقد ہوئی، کیش کس کو دیا گیا اور کس نے وصول کیا معلوم ہی نہیں، چار پانچ مرتبہ حکم دیا تو کچھ دستاویزات دی گئیں، اب ان دستاویزات کا بھی معلوم نہیں یہ کیا ہیں۔

انہوں نے چیئرمین این ڈی ایم اے کو قرنطینہ سینٹرز کا فوری دورہ کرنے کا حکم دیتے ہوئے کہا قرنطینہ سینٹروں پر کروڑوں روپے خرچ کر دیے گئے مگر سب کو معلوم ہے کہ حاجی کیمپ قرنطینہ سینٹر کا کیا بنا، کروڑوں روپے لگائے گئے لیکن وہاں نہ پانی ہے نہ ہی رنگ کیا گیا۔

عدالت نے کورونا وائرس کے حوالے سے حکومتی اقدامات پر سیکریٹری صحت سے تازہ رپورٹ طلب کر لی۔

ایڈووکیٹ جنرل سندھ کی عدم پیشی پر اظہار برہمی
چیف جسٹس نے ایڈووکیٹ جنرل سندھ کی عدم پیشی پر برہمی کا اظہار کرتے ہوئے کہا حکومت سندھ کہتی ہے کہ اتنے روپے کراچی اور اتنے مریضوں پر خرچ کر دیے ہیں، اعداد و شمار کے مطابق تو سندھ پیرس بن جانا چاہیے تھا۔

انہوں نے کہا کہ تعلیم اربوں ڈالرز خرچ کرنے کا کہا گیا، اس خرچ پر تو سندھ کے تمام اسکول ہارورڈ اور شرح خواندگی 100 فیصد ہونی چاہیے تھی۔

عدالت نے ایڈووکیٹ جنرل سندھ کے پیش نہ ہونے پر وضاحت اور عدم پیشی پر تحریری جواب جمع 15 دن میں طلب کر لیا۔

عدالت نے کیس پر سماعت ایک ماہ کے لیے ملتوی کر دی۔

خیال رہے کہ چیف جسٹس گلزار احمد نے گزشتہ سال 10 اپریل کو ملک میں کورونا وائرس سے نمٹنے کے لیے حکومتی اقدامات پر ازخود نوٹس لیا تھا۔

چیف جسٹس گلزار احمد کی سربراہی میں سپریم کورٹ کے 5 رکنی بینچ نے کورونا وائرس سے متعلق ازخود نوٹس پر 13 اپریل کو پہلی سماعت کی تھی۔