Category پاکستان

لاہور (میڈیا پاکستان) سابق صدر آصف علی زرداری نے کہا ہے کہ ان کا نواز شریف سے رابطہ ہے اور نہ ہی وہ رابطہ رکھنا چاہتے ہیں۔
ذرائع کے مطابق سابق صدر کی زیر صدارت بلاول ہاﺅس لاہور میں ایک اہم اجلاس ہوا جس میں پارٹی کی سینئر قیادت نے شرکت کی۔ اجلاس میں ملکی موجودہ سیاسی صورتحال پر تفصیلی تبادلہ خیال کیا گیا، اس موقع پر سابق صدر آصف علی زرداری کا کہنا تھا کہ ان کا نواز شریف سے کوئی رابطہ نہیں ہے اور نہ ہی وہ ان سے رابطہ رکھنا چاہتے ہیں۔ انہوں نے کہا کہ گرینڈ نیشنل ڈائیلاگ کا حصہ نہیں بنیں گے، نواز شریف سے رابطہ ہی نہیں رکھنا چاہتے تو ڈائیلاگ کیسا؟، نواز شریف اقتدار میں ہوں تو ان کی ترجیحات اور ہوتی ہیں اور اقتدار میں آکر ترجیحات بدل جاتی ہیں۔
آصف زرداری کا مزید کہنا تھا کہ نواز شریف کو اقتدار میں 62/63 ، گرینڈ نیشنل ڈائیلاگ اور نیا عمرانی معاہدہ یاد کیوں نہیں تھا؟، اس وقت جمہوریت کو خطرہ نہیں بلکہ نواز شریف کی سیاست کو خطرہ ہے۔ پیپلز پارٹی کا چنیوٹ کا کامیاب جلسہ سب کی آنکھیں کھولنے کیلئے کافی ہے، بلاول میدان میں اتر چکا ہے جس سے پارٹی کی عوام میں مقبولیت میں اضافہ ہوگا۔

اسلام آباد (میڈیا پاکستان)سپریم کورٹ نے پاناما کیس میں سابق وزیراعظم نوازشریف کے خلاف فیصلہ سنایاتو اس کے بعد طرح طرح کے تبصرے جاری ہیں اور اب سینئر صحافی ڈاکٹرشاہد مسعودنے دعویٰ کیا ہے کہ ایک رات قبل نوازشریف نے آرمی چیف کو پیغام بھیجا کہ فیصلہ تبدیل کروائیں تو جنرل باجوہ نے کہاکہ ججز کا فیصلہ ہے، ہماراتواس سے تعلق ہی نہیں۔

نیوزون کے پروگرام ’لائیوود ڈاکٹرشاہدمسعود‘ میں گفتگو کرتے ہوئے ڈاکٹرشاہد مسعود کاکہناتھاکہ ’اب ستر سال بعد میاں صاحب کو یہ پاکستان اچھا نہیں لگ رہاجوپانچ مہینے پہلے بڑا زبردست تھا، آرمی چیف کو ایک رات پہلے انہوں نے دودفعہ میسج بھیجا کہ آپ ججز سے فیصلہ تبدیل کروائیں، جنرل باجوہ نے کہاکہ ججز کا فیصلہ ہے، ہماراتو اس سے تعلق ہی نہیں ، ان کا ذہن تھا کہ فوج اور باجوہ ان کیلئے کچھ کردیں گے ۔ ایک محاذ پر ناکامی کے بعد ججوں کی سائیڈ لائنز کھولنے کی کوشش کی، وہ اپنی جگہ کھڑے رہے ،جے آئی ٹی اراکین پر پیسہ لگانے کی کوشش کی تو وہ بھی اپنی جگہ پر کھڑے رہے ، پھر انہوں نے ڈرایا دھمکایا اور اب میاں صاحب غصے ہوکر بیٹھے ہیں کہ یہ ملک کیسے چلے گا وغیرہ وغیرہ ‘

لاہور(میڈیا پاکستان)پنجاب فوڈاتھارٹی نے مختلف علاقوں میں کارروائی کے دوران مشروب ساز فیکٹری اور کیفے کو سیل کر دیا۔ڈی جی فوڈاتھارٹی نور الامین کامیڈیا سے گفتگو کرتے ہوئے کہنا تھاکہ قائد اعظم انڈسٹریل اسٹیٹ کوٹ لکھپت میں چائنزاشیابنانی والی فیکٹری میں بوتلوں کی تیاری میں مضرصحت کیمیکل کا استعمال کیا جاتا تھا اور خالی بوتلوں میں ٹوٹے ہوئے شیشے کے ذرات بھی پائے گئے،اس کے علاوہ ڈیفنس میں زائد المیعادکوکنگ آئل کے استعمال پرکیفے کو سیل کر دیا،ڈی جی فوڈ اتھارٹی کے مطابق کیفے میں ناقص چکن ودیگراشیااستعمال کی جارہی تھیں،ناقص صفائی،مطلوبہ ریکارڈ کی عدم موجودگی پر1،1لاکھ روپے جرمانہ کیا گیا ۔

لاہور(میڈیا پاکستان)پاکستان مسلم لیگ(ن) کے رہنماءحنیف عباسی نے کہا ہے کہ عوامی مسلم لیگ کے سربراہ 20روپے ماہانہ لے کر مخبری کیا کرتے تھے اور ان کی شروع کی عادتیں ا بھی تک تبدیل نہیں ہوئی ہیں وہ آج بھی کسی کے آلہ کار کے طور پر کام کرتے ہیں اور وہاں سے ہدایات لے کر ہر وقت شگوفے چھوڑتے رہتے ہیں۔
نجی ٹی وی چینل جیو نیوز سے گفتگو کرتے ہوئے عوامی مسلم لیگ کے سربراہ شیخ رشید کے بیانات کا ردعمل دیتے ہوئے حنیف عباسی کا کہنا تھا کہ شیخ رشید بوکھلاہٹ کا شکار ہو چکے ہیں ، پاکستان کے عوام عمران خا ن اور شیخ رشید کو آج بددعائیں دے رہے ہیں ، عوامی مسلم لیگ کے سربراہ نواز شریف کی ریلی کو نظام لپیٹنے کی سازش قرار دے رہے ہیں حالانکہ شیخ رشیدخود سازشوں سے الیکشن جیتنا چاہتے ہیں۔شیخ رشید جانتے ہیں ان کی ضمانت راولپنڈی میں چارمرتبہ ضبط ہوچکی ہے اور اب وہ آئندہ الیکشن میں بھی سازشوں سے باز نہیں آرہے۔ سربراہ عوامی مسلم لیگ نے اپنی سازشوں سے ملک میں انارکی پھیلانے کی کوشش کی تھی اور اب بھی کسی کے اشارے پر سازشیں کر رہے ہیں۔

لاہور (میڈیا پاکستان آن لائن) سابق وزیر اعظم نواز شریف اپنے مشن جی ٹی روڈ کی اختتامی منزل کی جانب رواں دواں ہیں ان کا قافلہ فیروز والا میں پہنچ گیا ہے جس کے بعد وہ شاہدرہ میں مختصر خطاب کرنے کے بعد داتا دربار جائیں گے تاہم مسلم لیگی رہنماﺅں کی جانب سے اعلان کیا گیا ہے کہ وزیر اعلیٰ پنجاب شہباز شریف سابق وزیر اعظم کا استقبال شاہدرہ میں کریں گے اور اس کے بعد دونوں بھائی داتا دربار حاضری دیں گے۔

تفصیلات کے مطابق سابق وزیر اعظم کا مشن جی ٹی روڈ جو چار روز قبل پنجاب ہاﺅس اسلام آباد سے شروع ہوا تھا اپنی اختتامی منزل لاہور کے قریب فیروز والا میں پہنچ گیا ہے ، انہیں رخصت تو وزیر اعظم شاہد خاقان عباسی نے گلے لگا کر کیا تھا مگر ان کے استقبال کے لئے ان کے بھائی وزیر اعلیٰ پنجاب شہبازشریف کریں گے، شہباز شریف سابق وزیر اعظم کا استقبال شاہدرہ میں کریں گے جبکہ اس کے بعد دونوں بھائی داتا دربار جائیں گے ، جہاں وہ دربار پر حاضری دیں گے تاہم تاحال یہ واضح نہیں کہ آیا شہباز شریف سابق وزیر اعظم کے ساتھ اختتامی سیشن میں سٹیج پر بیٹھیں گے اور خطاب کریں گے یا صرف استقبال کے بعد داتا دربار ہی تک ساتھ ہوں گے۔

فیصل آباد(ثاقب امین سے) ینگ ڈاکٹرز کی ہڑتال دسویں روز بھی جاری، مسیحاﺅں کی ہٹ دھرمی کے باعث دور دراز سے آئے مریضوں رل کر رہ گئے، تفصیلات کے مطابق فیصل آباد،میں ینگ ڈاکٹرز کی ہڑتال کے باعث او پی ڈیز اور ان ڈور میں کام مکمل طور پر بند ہے جبکہ ایمرجنسی میں مریضوں کو طبی امداد کی جا رہی ہے،ینگ ڈاکٹرز کی ہڑتال کے باعث مریضوں اور ان کے لواحقین کو شدید پریشانی کا سامنا ہے ادھر محکمہ صحت اور ینگ ڈاکٹرز کے نمائندوں کے درمیان مذاکرات آج ہونگے۔

لاہور/ راولپنڈی / گوجرانوالہ (میڈیا پاکستان)گزشتہ چوبیس گھنٹوں کے دوران ملک کے زیادہ تر علاقوں میں گرمی اور حبس کا زور برقرار(weather) ، پنجاب سمیت بلوچستان ، گلگت بلتستان اور کشمیر میں تیز ہواؤں ، بارش سے موسم خوشگوار ہوگیا۔
پنجاب کے علاقوں راولپنڈی، کھاریاں، گوجرانوالہ سمیت ہزارہ، کوئٹہ، ژوب، قلات ، گلگت بلتستان اور کشمیر میں بعض مقامات پر تیز بارش سے موسم خوشگوار ہوگیا .
ملک کے بیشتر علاقے گرمی اور حبس کی لپیٹ میں رہے جہاں شہری بارش کی دعائیں مانگتے رہے۔
محکمہ موسمیات نے بالائی پنجاب کے علاقوں اسلام آباد ، راولپنڈی ، گوجرانوالہ ، لاہور اور سرگودھا ڈویژن میں بارش کی نوید سنائی ہے۔
اس کے علاوہ بالائی خیبر پختونخوا کے علاقوں مالاکنڈ، ہزارہ، پشاور، مردان، کوہاٹ سمیت فاٹا میں بھی بارش کا امکان ہے۔
گلگت بلتستان اور کشمیر میں بھی محکمہ موسمیات نے آندھی اور گرج چمک کے ساتھ بارش کی پیش گوئی کی ہے۔
سندھ کے ساحلی علاقوں میں بھی ہلکی بارش اور بوندا باندی کی پیش گوئی کی گئی ہے ، ملک کے دیگر علاقوں میں موسم گرم رہے گا۔

لاہور (میڈیا پاکستان) تحریک انصاف نے نواز شریف کے استقبال میں سرکاری وسائل استعمال کرنے کے خلاف پنجاب اسمبلی میں تحریک التوائے کار جمع کرا دی، اپوزیشن لیڈر میاں محمودالرشید کی جانب سے جمع کرائی گئی تحریک التوائے کار میں کہا گیا ہے کہ نواز شریف کے مشن جی ٹی روڈ کو کامیاب بنانے کے لیے سرکاری وسائل کا استعمال کیا جبکہ زراء دفاتر اور پارلیمان سے غائب ہیں جسکی وجہ سے عوام مسائل کے حل کے لیے خوار ہو رہے ہیں۔
تفصیلات کے مطابق اپوزیشن لیڈر پنجاب اسمبلی میاں محمود الرشید کی طرف سے جمع کرائی جانے والی تحریک التوائے کار کے متن کے مطابق وزراء اپنے حلقوں میں کارکنوں سے ملاقاتوں میں مصروف ہیں جس سے سرکاری دفاتر میں سرکاری امور ٹھپ ہو کر رہ گئے ہیں، واپڈا، سوئی گیس، ایجوکیشن و دیگر محکموں کو مارچ کامیاب بنانے اور ملازمین کی شرکت یقینی بنانے کی بھی ہدایت کی گئی ہے ۔دوسری طرف مارچ میں شرکت کرنے والے سرکاری سٹاف کی حاضری تک لگائی جا رہی اور عدم شرکت کرنے والوں کے خلاف کارروائی کی دھمکیاں بھی دی جا رہی ہیں۔ تحریک التوائے کار میں مطالبہ کیا ہے کہ اس قرارداد پر ایوان میں بحث کرائی جائے۔

لاہور (میڈیا پاکستان)وزیر اعلیٰ پنجاب شہباز شریف کی اہلیہ تہمینہ درانی نے کہا ہے کہ نواز شریف اپنے بھائی کو مشکل میں نہ ڈالتے ریلی کے بجائے عوام سے خطاب کر لیتے ۔تفصیل کے مطابق مائیکرو بلاگنگ ویب سائٹ ٹوئٹر پر تہمینہ درانی نے پیغام دیا کہ اپنی پارٹی کی ریلی میں وزیر اعلیٰ پنجاب کو دہری ذمہ داری ادا کرنا پڑ رہی ہے ،انہیں ریلی کی معاونت اور حفاظت دونوں کام کرنے پڑ رہے ہیں ،ہماری سنگدلی نے شہباز شریف کو اس حال میں ڈال دیا ہے ۔انہوں نے کہاکہ اگر میں میاں نواز شریف صاحب کو مشورہ دیتی تو یہ ہی درخواست کرتی کہ اپنے وفادار بھائی کو ان حالات میں ڈالنے کے بجائے عوام سے خطاب کر لیتے کیونکہ ابھی وزیر اعلیٰ پنجاب بہت متنازعہ صورتحال ہیں۔شہباز شریف کی اہلیہ نے مزید کہا کہ شریف خاندان میں کوئی دراڑ نہیں ہے ،میرا ماضی اس بات کو ثابت کرتا ہے کہ میں آزادانہ رائے دیتی ہوں ۔تہمینہ درانی نے مزید کہا کہ وزیر اعلیٰ پنجاب آج کے دن کی حفاظت کے ذمہ دار ہیں ،یہ ایک بے رحمانہ اور لاپرواہ مطالبہ ہے ۔

اسلام آباد (میڈیا پاکستان) سینئر صحافی صالح ظافر کے مطابق سابق خاتون اوّل بیگم کلثوم نواز نے کہا ہے کہ وہ لاہور کے حلقہ این اے۔120 سے قومی اسمبلی میں ضمنی انتخاب لڑنے کے لئے تیار ہیں اور اس مقصد کے لئے اپنی توانائیاں یکجا کر چکی ہیں بشرطیکہ انہیں اس حلقے سے امیدوار نامزد کیا گیا۔ اس کا اختیار صرف نوازشریف کو حاصل ہے۔

روزنامہ جنگ میں دی گئی اپنی خبر میں صالح ظافر نے بتایا کہ کلثوم نواز نے کہا ہے کہ اس حلقے کے رائے دہندگان سے میرا عرصہ دراز سے رابطہ ہے۔ یہ حلقہ میرا میکہ ہے کوئی خاتون میکے سے اپنے تعلق پر ہمیشہ خوش ہوتی ہے۔ بیگم کلثوم نواز نے کہا کہ اس حلقے کے عوام کی محبت اور لگاﺅ پر ہمارے پورے خانوادے کو بے پناہ اعتماد رہا ہے ان سے دریافت کیا گیا کہ وہ مقابلے کے لئے تیار رہیں تو انہوں نے بڑے عجز سے جواب دیا کہ مجھے اپنے رب تعالیٰ کی رحمت پر پورا بھروسہ ہے۔
ان سے دریافت کیا گیا کہ حلقہ این اے120 سے پاکستان مسلم لیگ ن کے امیدوار کا کب تک فیصلہ ہو جائے گا تو محترمہ کلثوم نواز نے قدرے فاصلے پر لیگی کارکنوں اور رہنماﺅں میں گھرے اپنے شریک حیات نوازشریف کی طرف اشارہ کر کے کہا کہ اس سوال کا جواب آپ ان سے لیں۔ اخبار کے مطابق منگل کی شام لاہور میں محترمہ کلثوم نواز اور محترمہ مریم نوازشریف دونوں کے لئے کاغذات نامزدگی تیار کرلئے گئے ہیں۔ پارٹی کی قیادت ان دونوں میں سے جسے بھی امیدوار نامزد کرے گی اس کے کاغذات دائر کر دیئے جائیں گے۔