اسلام آباد کے ایڈیشنل سیشن جج ہمایوں دلاور کی ڈسٹرکٹ اینڈ سیشن کورٹ میں توشہ خانہ کیس کی سماعت کے دوران بار بار بجلی منقطع ہونے کا سلسلہ جاری رہا۔

عدالت نے خواجہ حارث کے پراسیکیوٹر پر اعتراض کو منظور کر لیا اور حکم میں کہا کہ پراسیکیوٹر کیس میں دلائل نہیں دے سکیں گے۔

توشہ خانہ کیس کی سماعت کے دوران وکلاء اور جج کو موبائل ٹارچ کا استعمال کرنا پڑ گیا۔

توشہ خانہ کیس کی سماعت ایڈیشنل سیشن جج ہمایوں دلاور کی عدالت میں ہوئی۔

دورانِ سماعت الیکشن کمیشن کے وکیل سعد حسن، چیئرمین پی ٹی آئی کے وکلاء شیر افضل مروت اور خواجہ حارث عدالت میں پیش ہوئے۔

الیکشن کمیشن کے وکیل کے دلائل

الیکشن کمیشن کے وکیل سعد حسن نے دلائل دیتے ہوئے کہا کہ نجی بینک میں اکاؤنٹ چیئرمین پی ٹی آئی اور بشریٰ بی بی کے نام سے ہے، چیئرمین پی ٹی آئی کے مطابق انہوں نے بینک میں توشہ خانے کی رقم منتقل کی، کوئی نئی دستاویزات عدالت میں جمع نہیں کروا رہے، جو دستاویزات جمع کروائی ہیں وہ پہلے سے عدالت کے پاس موجود ہیں۔

جج ہمایوں دلاور نے استفسار کیا کہ جب عدالت میں پہلے سے جمع ہیں تو پھر دوبارہ یہ دستاویزات جمع کیوں کروا رہے ہیں؟

الیکشن کمیشن کے وکیل سعد حسن نے جواب دیا کہ گواہوں کے درخواست دینے میں کوئی قانونی پہلو غلط نہیں، گواہوں کی درخواست دینے کا مقصد عدالت کو مزید مطمئن کرنا ہے۔

پراسیکیوٹر نے کہا کہ چیئرمین پی ٹی آئی نے توشہ خانے کی رقم بینک اکاؤنٹ میں منتقلی کرنے کی تصدیق کی، الیکشن کمیشن کے سامنے توشہ خانے کی رقم کی منتقلی کا اعتراف کیا گیا۔

وکیل خواجہ حارث نے اس موقع پر پرائیویٹ شکایت میں پراسیکیوٹر کے دلائل پر اعتراض اٹھا دیا۔

الیکشن کمیشن کے وکیل سعد حسن نے کہا کہ قانون کے مطابق پراسیکیوٹر کسی بھی عدالت میں اپنے دلائل دے سکتا ہے، کہیں نہیں لکھا کہ پراسیکیوٹر اپنے دلائل پرائیویٹ شکایت میں نہیں دے سکتا۔

چیئرمین PTI کے وکیل کے دلائل

چیئرمین پی ٹی آئی کے وکیل خواجہ حارث نے دلائل دیتے ہوئے کہا کہ یہ کوئی پولیس کیس نہیں جس میں پراسیکیوٹر اپنے دلائل دے، شکایت کنندہ نے کس بنیاد پر گواہان کو منتخب کیا ہے؟ معلوم نہیں۔

الیکشن کمیشن کے وکیل نے کہا کہ شکایت الیکشن کمیشن کی جانب سے دائر کی گئی ہے، قانون کے مطابق پراسیکیوٹر کو دلائل دینے کا حق ہے، قانون کے مطابق پرائیویٹ شکایت کنندہ پراسیکیوٹر کی مدد کر سکتا ہے۔

وکیل خواجہ حارث نے سوال کیا کہ پرائیویٹ شکایت کنندہ کیسے کسی پبلک پراسیکیوٹر سے مدد لے سکتا ہے؟ کیا صوبائی حکومت نے پراسیکیوٹر الیکشن کمیشن کے ساتھ تعینات کیا ہے؟ اسلام آباد وفاق کا حصہ ہے، چیف کمشنر اسلام آباد پراسیکیوٹر تعینات کرتے ہیں، کیا توشہ خانہ کیس پرائیویٹ شکایت سے سرکاری شکایت بنا ہے؟ پبلک پراسیکیوٹر الیکشن کمیشن کی جانب سے دلائل دے رہا ہے، جس پر افسوس ہوا، الیکشن کمیشن کے وکلاء ان کیسز کا حوالہ دے رہے ہیں جن میں مدعی پولیس ہے، توشہ خانہ کیس ایک پرائیویٹ شکایت کا معاملہ ہے۔

الیکشن کمیشن کے وکیل سعد حسن نے جواب میں کہا کہ قانون کے مطابق پراسیکیوٹر کسی فریق کا حصہ نہیں بن سکتا، قانون کے مطابق الیکشن کمیشن خود پراسیکیوٹر کو مدعو کر سکتا ہے، پراسیکیوٹر کا مقصد سچائی کو سامنے لانا ہے، اکتوبر 2022ء میں کابینہ ڈویژن میں تعینات 4 افسران کو گواہوں کی لسٹ میں رکھا گیا، کابینہ ڈویژن کے سیکریٹری ایڈمن ارشد محمود، ڈپٹی سیکریٹری کوآرڈینیشن فیصل تحسین گواہ ہیں، 5 گواہوں کے نام گواہان کی فہرست میں شامل کرنے کی اجازت دی جائے۔

وکیل خواجہ حارث نے کہا کہ مجھے تو معلوم نہیں تھا کہ پراسیکیوٹر کے معاملے پر بحث شروع ہو جائے گی، قانون میں ترمیم کے بعد پراسیکیوٹر صرف تب دلائل دے سکتا ہے جب مدعی پولیس ہو، قانون میں ترمیم ہی ایسی ہوئی کہ پراسیکیوٹر پولیس کی معاونت کرے گا۔

وکیل خواجہ حارث نے پبلک پراسیکیوٹر کے دلائل دینے پر اعتراض اٹھا دیا اور کہا کہ قانون کے مطابق پبلک پراسیکیوٹر پرائیویٹ شکایت کنندہ کا حصہ نہیں۔

جج ہمایوں دلاور نے استفسار کیا کہ آپ کو امجد پرویز کے وکالت نامے پر بھی اعتراض ہے؟

وکیل خواجہ حارث نے کہا کہ مجھے تو معلوم ہی نہیں کہ توشہ خانہ کیس میں ہو کیا رہا ہے، میرے نوٹس میں ایسی باتیں ہونی چاہئیں، کون سا پاور آف اٹارنی آ رہا ہے، کون سا جا رہا ہے، کچھ معلوم نہیں، وکیل کوئی ہے اور دلائل پراسیکیوٹر دے رہا ہے، عدالت میں دلائل صرف ایک وکیل ہی دیتا ہے، کبھی الیکشن کمیشن پر اعتراض نہیں اٹھایا۔

جج ہمایوں دلاور نے کہا کہ آپ کی جانب سے وکیل گوہر علی خان نے دلائل دیے ہیں۔

وکیل خواجہ حارث نے کہا کہ غلط بیانی نہ کریں، ہم غلط بیانی نہیں کرتے، گوہر علی خان دلائل نہیں دیتے۔

جج ہمایوں دلاورنے کہا کہ آپ کا مطلب ہے کہ عدالت غلط بیانی کر رہی ہے؟

خواجہ حارث نے کہا کہ عدالت میں قانونی پہلو ہوتے ہیں، ایک ہی پوائنٹ پر الیکشن کمیشن اور پراسیکیوٹر دلائل دے رہے ہیں۔

جج ہمایوں دلاور نے پوچھا کہ اب چھوڑ دیں، گواہوں والی درخواست قابلِ سماعت ہے یا نہیں؟

خواجہ حارث نے جواب دیا کہ شکایت کنندہ نے ہمیں دائر شکایت کی کاپی دینی ہوتی ہے، شکایت کنندہ، الزام اور گواہوں کے نام شکایت کی کاپی میں ہی دینے ہوتے ہیں، توشہ خانہ کیس میں دائر شکایت میں صرف 2 گواہوں کے نام ہمیں دیے گئے ہیں، ابھی تو کیس ابتدائی مراحل میں ہے، فردِ جرم سے قبل گواہوں کے بیانات ریکارڈ ہوتے ہیں، شکایت کنندہ کے مطابق وہ مزید 5 گواہان کے بیانات ریکارڈ کروانا بھول گئے، ہم نے 2 گواہان کے بیانات پر کیس کی تیاری کی، 5 گواہان کے بیانات پر نہیں۔

الیکشن کمیشن کی 5 گواہوں کے بیانات ریکارڈ کروانے کی درخواست عدالت نے مسترد کر دی۔

وکیل خواجہ حارث نے پیر تک سماعت ملتوی کرنے کی استدعا کر دی اور کہا کہ اسلام آباد ہائی کورٹ میں معاملہ چل رہا ہے۔

جج ہمایوں دلاور نے کہا کہ اسلام آباد ہائی کورٹ کا فیصلہ آئے گا تو دیکھ لیں گے، مجھے میری عدالت کا کام چلانے دیں۔

وکیل خواجہ حارث نے کہا کہ میں پیر کو آؤں گا، آپ کی عدالت میں بیٹھا رہوں گا، میں گارنٹی دیتا ہوں کہ چیئرمین پی ٹی آئی عدالت آئیں گے۔

عدالت نے خواجہ حارث کے پراسیکیوٹر پر اعتراض کو منظور کر لیا اور حکم میں کہا کہ پراسیکیوٹر کیس میں دلائل نہیں دے سکیں گے۔

عدالت نے چیئرمین پی ٹی آئی کی آج کی حاضری سے استثنیٰ کی درخواست منظور کرتے ہوئے دونوں گواہوں کو کل طلب کر لیا اور توشہ خانہ کیس کی سماعت کل تک ملتوی کر دی۔

نیا مالی سال 24-2023ء شروع ہوتے ہی ترقیاتی فنڈز کا اجراء شروع ہو گیا۔

وزارتِ خزانہ کے مطابق 959 ارب روپے کے ترقیاتی پروگرام سے 142 ارب 50 کروڑ روپے جاری کر دیے گئے ہیں۔

پارلیمنٹیرینز کی ترقیاتی اسکیموں کے لیے 61 ارب 26 کروڑ روپے، مقامی ترقیاتی پروگرام کے لیے 131 ارب روپے جاری کیے گئے ہیں۔

بیرونی ترقیاتی معاونت کی مد میں 11 ارب 50 کروڑ روپے جاری کیے گئے ہیں جبکہ ابتدائی 3 ماہ میں مزید 69 ارب 74 کروڑ روپے دستیاب ہوں گے۔

موجودہ مالی سال پبلک پرائیویٹ پارٹنر شپ کے تحت 200 ارب روپے اضافی خرچ ہوں گے، اس سال مجموعی طور پر 1150 ارب روپے کا وفاقی ترقیاتی پروگرام منظور کیا گیا ہے۔

وزارتِ خزانہ کے مطابق 20 ارب 26 کروڑ روپے پچھلے سال کے رہتے تھے وہ جاری ہوئے ہیں، نئے بجٹ میں سے بھی ارکانِ پارلیمنٹ کے لیے 41 ارب روپے جاری ہوئے ہیں، کُل61 ارب 26 کروڑ روپے جاری کیے گئے ہیں۔

وزارتِ خزانہ کا یہ بھی کہنا ہے کہ ایس ڈی جیز کے لیے اس سال 90 ارب روپے رکھے گئے ہیں۔

الیکشن کمیشن آف پاکستان (ای سی پی) نے ووٹرز کا ڈیٹا جاری کر دیا، ملک میں ووٹرز کی تعداد 12 کروڑ 60 لاکھ 66 ہزار 874 ہوگئی۔

الیکشن کمیشن کے اعداد و شمار کے مطابق مرد ووٹرز 6 کروڑ 80 لاکھ 99 ہزار 615 ہیں جبکہ خواتین ووٹرز کی تعداد 5 کروڑ 79 لاکھ 67 ہزار 259 ہے۔

ملک میں مرد ووٹرز کی شرح 54.02 فیصد اور خواتین ووٹرز کی شرح 45.98 فیصد ہے۔

اسلام آباد میں ووٹرز کی تعداد 10 لاکھ 35 ہزار 387 ہے جبکہ پنجاب میں 7 کروڑ 16 لاکھ 6 ہزار 378 ووٹرز ہیں۔

الیکشن کمیشن کے مطابق سندھ میں ووٹرز کی تعداد 2 کروڑ 65 لاکھ 29 ہزار 136 ہے، خیبر پختونخوا میں 2 کروڑ 16 لاکھ 21 ہزار 211 ووٹرز ہیں جبکہ بلوچستان میں ووٹرز کی تعداد 52 لاکھ 74 ہزار 761 ہے۔

اسلام آباد میں مرد ووٹرز کی شرح 52.51 فیصد اور خواتین کی 47.49 فیصد ہے، پنجاب میں مرد ووٹرز کی شرح 53.64 اور خواتین کی 46.35 فیصد ہے۔

سندھ میں مرد ووٹرز کی شرح 54.23 اور خواتین کی 45.77 فیصد ہے، خیبرپختونخوا میں مرد ووٹرز کی شرح 54.56 اور خواتین کی 45.44 فیصد ہے۔

بلوچستان میں مرد ووٹرز کی شرح 56.17 اور خواتین کی 43.83 فیصد ہے۔

ووٹرز کی عمروں کا ڈیٹا بھی جاری

الیکشن کمیشن نے ووٹرز کی عمروں کا ڈیٹا بھی جاری کر دیا، 18 سے 25 سال کے ووٹرز کی تعداد 2 کروڑ 35 لاکھ 26 ہزار 34 ہے۔

اعداد و شمار کے مطابق ملک میں 26 سے 35 سال کے ووٹرز کی تعداد 3 کروڑ 26 لاکھ 70 ہزار 445 ہے۔ جبکہ 2 کروڑ 77 لاکھ 66 ہزار 976 ووٹرز ایسے ہیں جن کی عمر 36 سے 45 سال کے درمیان ہے۔

46 سے 55 سال ووٹرز کے 1 کروڑ 81 لاکھ 19 ہزار 968 ووٹرز ہیں جبکہ 56 سے 65 سال کے ووٹرز کی تعداد 1 کروڑ 18 لاکھ 92 ہزار 635 ہے۔

الیکشن کمیشن نے مزید بتایا کہ 66 سال سے زائد عمر کے ووٹرز کی تعداد 1 کروڑ 20 لاکھ 90 ہزار 816 ہے۔

پشاور میں سابق وزیرِ اعلیٰ خیبر پختون خوا و سابق وزیرِ دفاع پرویز خٹک نے پی ٹی آئی کے سابق صوبائی وزیر ہشام انعام اللّٰہ سے ملاقات کی ہے۔

ذرائع کا کہنا ہے کہ پرویز خٹک نے پی ٹی آئی کے سابق صوبائی وزیر ہشام انعام اللّٰہ کو ملاقات کے دوران اپنی پارٹی میں شمولیت کی دعوت دی ہے۔

پرویز خٹک کا ہشام انعام اللّٰہ سے کہنا ہے کہ نئی پارٹی بنا رہا ہوں، اس میں شمولیت اختیار کریں۔

اس موقع پر ہشام انعام اللّٰہ نے پرویز خٹک سے شکوہ کیا کہ آپ مجھے پی ٹی آئی میں لائے، بعد میں آپ نے میری حمایت نہیں کی۔

پرویز خٹک نے انہیں جواب دیا کہ میرے ساتھ بھی برا ہوا ہے، مجھے خود سائیڈ لائن کیا گیا تھا۔

ہشام انعام اللّٰہ نے پرویز خٹک کو جواب دیا کہ سیف اللّٰہ برادران سے مشورہ کر کے آپ کو آگاہ کروں گا۔

اسلام آباد : سابق دور حکومت میں لگنے والے مہنگی ایل این جی اور کوئلے کے منصوبوں کے ساتھ ساتھ کیپیسٹی جارجز عوام کے لیے درد سر بن گئے، ایل این جی سے پیدا ہونیوالی مہنگی بجلی نے فرنس آئل کو بھی پیچھے چھوڑ دیا، 6روپے73 پیسے فی یونٹ اوسط پیداواری قیمت کیپسٹی چارجز سمیت دیگر اخراجات کے باعث 51روپے 42 پیسے فی یونٹ مقرر کردی گئی۔تفصیل کے مطابق سابق حکومت نے فرنس آئل سے مستقل جان چھڑانے کے لیے سستی بجلی کے حصول کے لیے درآمد شدہ مائع قدرتی گیس (ایل این جی)کا سہارا لیا مگر وقت کے ساتھ ساتھ ایل این جی گیس بھی ملک میں بجلی کی پیداوار کے لیے سب سے مہنگا ایندھن بن گیا ہے،رواں مالی سال کے ہر مہینے کے لیے توانائی کی خریداری کے حوالہ جاتی نرخ مقرر کرنے کے فیصلے میں نیپرا نے بتایا بجلی کی اصل اوسط پیداواری قیمت 6روپے 73 پیسے فی یونٹ ہے جبکہ کیپسٹی چارجز شامل کرکے بجلی مہنگی کی جاتی ہے۔ نیپرا نے بجلی کی پیداواری قیمت میں 16 روپے 22 پیسے فی یونٹ کیپسٹی جارچز شامل کر دیئے ہیں جس کے باعث بجلی کی قیمت 6 روپے سے 22روپے 95 پیسے فی یونٹ ہو گئی،دستاویزات کے مطابق نیپرا نے رواں مالی سال کے لیے بجلی کا پیداوری اوسط یونٹ ٹیرف مقرر کر دیا۔ رواں مالی سال میں 124 ارب 86 کروڑ یونٹ بجلی پیدا ہونے کا امکان ہے اوربجلی کی خالص پیداواری لاگت 801 ارب 25 کروڑ روپے آنے کا امکان ہے۔ تاہم بجلی کی پیداواری لاگت میں 2ہزار 25 ارب روپے کیپسٹی چارجز شامل ہیں،نیپرا فیصلے کے مطابق درآمدی کوئلے سے بجلی کی اصل پیداواری لاگت 16 روپے 71 فی یونٹ ہے جس میں 23 روپے کیپسٹی چارجز کے شامل کرکے درآمدی کوئلے سے بجلی کی پیداوری لاگت 40 روپے34 پیسے فی یونٹ مقررہے جبکہ کیپسٹی چارجز کے ساتھ فرنس آئل سے بجلی کی پیداواری لاگت 48 روپے 56 پیسے فی یونٹ مقررہے اور ایل این جی سے بجلی کی پیداواری قیمت 51 روپے 42 پیسے فی یونٹ مقررکردی گئی۔

اسلام آباد:بجلی کا شارٹ فال 5 ہزار 506میگاواٹ ریکارڈ کیا گیا ہے، پاور ڈویژن کے مطابق بجلی کی مجموعی پیداوار 21ہزار 994 میگاواٹ ہے جبکہ ملک بھر میں بجلی کی طلب 27ہزار5 سو میگاواٹ ہے،ملک بھر میں 12 گھنٹے تک لوڈ شیڈنگ کی جا رہی ہے،پن بجلی کی پیداوار 8 ہزار 225 میگاواٹ ہے،سرکاری تھرمل پاور پلانٹس 770 میگاواٹ بجلی پیدا کر رہے ہیں، نجی شعبے کے بجلی گھروں کی پیداوار 9550 میگاواٹ ہے،ونڈ پاور پلانٹس سے بجلی کی پیداوار 575 میگاواٹ ہے،سولر بجلی گھروں کی پیداوار 103 ہے، بگاس سے 93 میگاواٹ بجلی پیدا کی جا رہی ہے، نیوکلیئر پاور پلانٹس کی پیداوار 2 ہزار678 میگاواٹ ہے۔

قدرتی آفات سے نمٹنے کے چیلنج کے سلسلے میں پاکستان نے انٹرنیشنل مانیٹری فنڈ (آئی ایم ایف) کو پلان بتادیا۔

اس حوالے سے آئی ایم ایف کا کہنا ہے کہ پاکستان موسمیاتی تبدیلی، زراعت، فوڈ سیکیورٹی پر 30 ارب روپے خرچ کرے گا۔

عالمی ادارے کے مطابق پاکستان کو کئی قدرتی آفات کے خطرات کا سامنا ہے۔

آئی ایم ایف کا کہنا ہے کہ حکومت پاکستان ایک ایکشن پلان پر کام کر رہی ہے، پلان کے تحت اقوام متحدہ کے ماحولیاتی پروگرام سے پاکستان مدد لے گا۔

اس کا یہ بھی کہنا ہے کہ پلان کے تحت پاکستان قدرتی آفات کے ممکنہ شکار کمزور شعبوں کا تحفظ فراہم کرے گا۔

وفاقی وزیرِ خارجہ بلاول بھٹو زرداری نے دھابیجی اکنامک زون کا سنگ بنیاد رکھ دیا۔

دھابیجی اسپیشل اکنامک زون کے سنگ بنیاد رکھنے کی تقریب سے خطاب کرتے ہوئے بلاول بھٹو زرداری نے کہا ہے کہ ہم نے تبدیلی کے نام پر تباہی دیکھی ہے، آپ نے دیکھ لیا کہ باقی باتیں کرتے ہیں اور پیپلز پارٹی کام کر کے دکھاتی ہے۔

 بلاول بھٹو زرداری کا کہنا ہے کہ ہم نے تبدیلی کے نام پر تباہی بھی دیکھی ہے اور پیپلز پارٹی کی خدمت بھی دیکھی، آصف زرداری نے جب سی پیک کی بنیاد رکھی تو اس وقت بھی ہم تنقید کے نشانے پر تھے، سابق صدر کی سوچ کی وجہ سے ملک کو معاشی استحکام ملا۔

’شہید بی بی نے پبلک پرائیویٹ پارٹنرشپ کا تصور متعارف کرایا‘

انہوں نے کہا کہ شہید بی بی نے پبلک پرائیویٹ پارٹنرشپ کا تصور متعارف کرایا اور ہم نے اس کے تحت کئی منصوبے بنائے، تھر کول کے ذریعے سندھ نے اپنا حصہ ڈالا۔

وزیرِ خارجہ کا کہنا ہے کہ پبلک پرائیوٹ پارٹنرشپ کا تصور پی پی نے متعارف کرایا، پیپلز پارٹی کی حکومت پبلک پرائیویٹ پارٹنرشپ کے تحت کام کر رہی ہے۔

پیپلز پارٹی کے چیئرمین نے کہا کہ عوام اور دنیا پیپلز پارٹی کی کارکردگی کو تسلیم کر رہی ہے، عوام تسلیم کر رہے ہیں کہ ہماری جماعت کے خلاف ماضی میں کردار کشی ہوتی تھی۔

’مقامی لوگوں کو سب سے پہلے روزگار دینا ہے‘

ان کا کہنا ہے کہ عوام تسلیم کر چکے کہ پیپلز پارٹی کا خدمت کا طریقہ دیگر جماعتوں سے بہتر ہے، مقامی لوگوں کو سب سے پہلے روزگار دینا ہے، ووکیشنل ٹریننگ پر بھی کام کر رہے ہیں، ہم ووکیشنل ٹریننگ میں بھی انویسٹ کریں گے۔

بلاول بھٹو زرداری نے مزید کہا کہ دھابیجی اکنامک زون سے 1 لاکھ 50 ہزار روز گار کے مواقع یہاں کے نوجوانوں کو میسر ہوں گے، ہماری پہلی ترجیح ملک کو بحران سے نکالنا ہے، میں سب کو دعوت دیتا ہوں آئیں پیپلز پارٹی کا ساتھ دیں۔

’اسپیشل اکنامک زون میں دنیا کیساتھ مل کر چلیں گے‘

وزیرِ خارجہ کا یہ بھی کہنا ہے کہ اسپیشل اکنامک زون میں دنیا کے ساتھ مل کر چلیں گے، اس معاشی انقلاب کو ٹھٹھہ، کراچی سے شروع کر کے پورے پاکستان میں پھیلائیں گے، ہماری ترجیح ہے کہ اس ملک کے نوجوان کو بےروزگاری سے نکالنا ہے۔

اس موقع پر گفتگو کرتے ہوئے وزیرِ اعلیٰ سندھ مراد علی شاہ نے کہا ہے کہ تمام ملازمین کی تنخواہ اور پینشن کے مسائل حل کریں گے، کوشش ہے کہ لوکل باڈیز کو آکٹرائے ٹیکس، ضلع ٹيکس اور دیگر فنڈز بڑھا کر دیں۔

انہوں نے کہا کہ سی پیک کا مقصد یہی تھا کہ چین کی مدد سے ایسے انڈسٹریل زونز دیں جہاں لوگوں کو روزگار میسر ہو، پاکستان کی اپنی ایکسپورٹس بڑھیں اور خوشحالی آئے۔

وزیرِ اعلیٰ سندھ کا کہنا ہے کہ وفاقی حکومت کی طرف سے دھابیجی اکنامک زون کی منظوری پچھلے ماہ ملی، دھابیجی اکنامک زون کے کام کو تیزی سے آگے بڑھایا جائے گا، بطور وزیرِ اعظم دھابیجی اکنامک زون کے افتتاح کے لیے بھی بلاول کو مدعو کریں گے۔

انہوں نے کہا کہ اگر دھابیجی اکنامک زون کو چار ماہ میں مکمل کر دیا جائے تو افتتاح کے لیے بلاول کو بلا لیں گے، اکنامک انٹیلی جنس یونٹ کی خبر کو بہت پھیلایا گیا، اس کی خبر کو غور سے پڑھ لیں، کرائم انڈیکس دکھنے والی انٹرنیشنل ایجنسیز کہتی ہیں کراچی چھٹا خطرناک ترین شہر تھا، اب 125 یا 130 پر ہے۔

’اکنامک انٹیلی جنس یونٹ کے تجزیے کی مکمل مخالفت کرتے ہیں‘

مراد علی شاہ کا کہنا ہے کہ اکنامک انٹیلی جنس یونٹ کے تجزیے کی مکمل مخالفت کرتے ہیں، میں اکنامک انٹیلی جنس یونٹ کو لکھوں گا، مرتضیٰ وہاب سے بھی جواب دینے کا کہا ہے، آپ اس طریقے کے آرٹیکلز چھپوا رہے ہیں، اکنامک انٹیلی جنس یونٹ نے ایشیاء میں پبلک پرائیویٹ پراٹنرشپ کی ریٹنگ میں سندھ کو چھٹا نمبر دیا تھا۔

وزیرِ اعلیٰ سندھ نے کہا کہ مذہبی ہم آہنگی کے لحاظ سے میرانہیں خیال پاکستان سے بہتر کوئی ملک ہے، میرا خیال ہے صحت اور تعلیم کے شعبے میں ہم 20 ، 25ویں نمبر پر آئیں گے، صرف کراچی شہر کو اس لائق سمجھا گیا کہ اکنامک انٹیلی جنس یونٹ نے اس کے بارے میں لکھا، پاکستان کے باقی کسی شہر کو شاید اس لائق نہیں سمجھتے۔

ان کا کہنا ہے کہ جو ان چھوٹے موٹے آرٹیکلز سے کراچی کے شہریوں کو نااُمید کرنا چاہتے ہیں وہ کامیاب نہیں ہوں گے، بلاول کے وزیرِ اعظم بنتے ہی اکنامک انٹیلی جنس یونٹ بتائے گا کہ انڈسٹری، ٹورازم اور رہنے کے لیے کراچی سے زیادہ کوئی وائبرنٹ شہر نہیں۔

’جب تک اکنامک زونز نہیں بنیں گے، سی پیک آگے نہیں بڑھے گا‘

خطاب کے دوران مراد علی شاہ نے کہا کہ چین کی حکومت نے کہا تھا کہ سی پیک کا آئیڈیا آصف علی زرداری نے دیا تھا، آج کل لوگ بہت باتیں کرتے ہیں کہ سی پیک کس نے شروع کیا، سی پیک کا ہرگز یہ مطلب نہیں تھا کہ کچھ سڑکیں بنا دو، جب تک اکنامک زونز نہیں بنیں گے، سی پیک آگے نہیں بڑھے گا، اس پروجیکٹ کی لوکیشن اس سے بہتر ہو نہیں سکتی۔

انہوں نے یہ بھی کہا کہ یہ چھوٹا سا پائلٹ ہے اسے ہم اور بڑھائیں گے، پیپلز پارٹی اس ملک اور صوبے کی خدمت کے لیے آگے بڑھتی رہے گی، دھابیجی سے ایئر پورٹ اور پورٹ قاسم بہت نزدیک ہے، ملیر ایکسپریس وے روڈ بن جائے گا، اس کے بعد اور آسانی ہو جائے گی، جگہ کم پڑے گی، ہم اس پروجیکٹ کے لیے اور زمین دیں گے، ٹھٹھہ ضلع پاکستان کا نمبر ون انڈسٹریل ڈسٹرکٹ ہو جائے گا۔

2018 کے الیکشن میں شہباز شریف کو ہرانے والے محمد خان لغاری نے پاکستان تحریک انصاف (پی ٹی آئی) چھوڑنے کا اعلان کردیا۔

سردار محمد خان لغاری 2018 کے الیکشن میں قومی اسمبلی کے حلقے این اے 192 ڈیرہ غازی خان  سے منتخب ہوئے تھے، انہوں نے انتخابات میں 80522 ووٹ حاصل کیے تھے، جبکہ ان کے مقابلے میں مسلم لیگ (ن) کی طرف سے شہباز شریف نے 67608 ووٹ حاصل کیے۔

محمد خان لغاری کا کہنا ہے کہ 9 مئی کے پرتشدد واقعات کی وجہ سے پی ٹی آئی چھوڑنے کا فیصلہ کیا ہے۔

انہوں نے کہا کہ چیئرمین پی ٹی آئی کے ریاست مخالف بیانیے کے ساتھ مزید نہیں چل سکتا۔

اسلام آباد :پاکستان تحریک انصاف نے امپورٹڈحکومت پر کڑی تنقید کرتے ہوئے کہا کہ ملک بھر میں آٹے اور چینی سمیت اشیائے خورونوش کی قیمتوں میں تکلیف دہ اضافہ ہوگیا ہے،اپنے آئینی حقوق اور انتخاب کا حق مانگنے والے عوام کو مہنگائی کے ذریعے سزا دینے کا سلسلہ نہایت شرمناک اور قابلِ مذمت ہے، تحریک انصاف کے میڈیا سیل کی جانب سے جاری بیان میں کہاگیا ہے کہ شہباز حکومت بیرحمی، نالائقی اور مجرمانہ طرزِ حکومت کی جیتی جاگتی تصویر ہے، اس ظالم سرکار نے پہلے بجلی کے نرخوں میں اضافہ کرکے عوام کو مہنگائی کے بوجھ تلے کچلنے کی کوشش کی، اب آٹے، چینی اور دیگر اشیائے خورونوش کے دام بڑھا کر عوام خصوصاً کروڑوں غریبوں کے منہ سے روٹی کا نوالہ چھیننے میں لگی ہوئی ہے، اس بے رحم حکومت کے ہاتھوں ملک میں بیروزگاری کا سیلاب ہے،تنخواہ دار طبقے کیلئے اپنے بچوں کیلئے دو وقت کی روٹی میسر کرنا مشکل ترین بنا دیا گیا ہے، ترجمان نے کہا کہ چھ فیصد کی سالانہ شرح سے ترقی کرتی معیشت کو 0.3 فیصد کی شرمناک سطح تک گرادیا گیا ہے، میڈیا کے زبان پر تالے ڈال کر عوام کے معاشی قتلِ عام کا ظالمانہ سلسلہ جاری ہے، ان پندرہ ماہ میں روپے کو ردّی، زرِمبادلہ کے ذخائر کو نچوڑ دیا گیا،لارج سکیل مینوفیکچرنگ، زراعت، صنعت اور تجارت کو بیک گیئر میں ڈال کر تباہی کی ڈھلوان پر لڑھکا دیا گیا، ملک کو قرض کے ڈھیر تلے دفن کرکے مزید قرض لے رہے اور اس پر شادیانے بجا رہے ہیں، ان کی بدانتظامی اور نااہلی سے تجربے اور مہارت کی حامل ورک فورس تیزی سے ملک چھوڑ کر جارہی ہے، تازہ ترین اعداد و شمار کے مطابق 12 لاکھ افراد مایوس ہو کر پاکستان چھوڑ کر باہر جاچکے ہیں،ملک میں باقی رہ جانے والوں کو مہنگائی اور فسطائیت کے دْہرے عذاب میں مبتلا کیا جارہا ہے، انہوں نے کہا کہ قوم جھولیاں اٹھا اٹھا کر اس بے چہرہ بندوبست سے نجات کی دعائیں مانگ رہے ہیں، ریاستی فیصلہ ساز عوام کی حالتِ زار پر رحم کریں اور مجرموں کی سیاست کے مردہ لاشے میں ’’سیاسی انجینئرنگ‘‘ سے روح پھونکنے سے باز رہیں، عوام کو اپنی زندگیاں عذاب بنانے والوں کے محاسبے کا آئینی و جمہوری حق بغیر کسی مداخلت کے دیا جائے۔