Category پاکستان

کوئٹہ: (ایمر ا نیوز) سابق چیف جسٹس بلوچستان ہائی کورٹ محمد نور مسکانزئی مسجد میں دوران نماز قاتلانہ حملے میں جاں بحق ہوگئے۔
لیویز ذرائع کے مطابق بلوچستان کے ضلع خاران میں سابق چیف جسٹس محمد نور مسکانزئی پر دوران نماز عشاء مسجد میں فائرنگ کی گئی، شدید زخمی حالت میں ان کو سول ہسپتال خاران منتقل کیا گیا۔
ڈی آئی جی رخشاں ڈویژن کے مطابق سابق چیف جسٹس محمد نور مسکانزئی زخموں کی تاب نہ لاتے ہوئے چل بسے۔
وزیراعلیٰ بلوچستان میر عبدالقدوس بزنجو نے سابق چیف جسٹس بلوچستان ہائی کورٹ محمد نور مسکانزئی کی شہادت پر گہرے رنج وغم کا اظہار کرتے ہوئے کہا ہے کہ سابق چیف جسٹس کو دہشت گردی کا نشانہ بنایا گیا، جسٹس (ر) محمد نور مسکانزئی کی خدمات ناقابل فراموش ہیں ۔امن دشمنوں کے بزدلانہ حملے قوم کو مرعوب نہیں کر سکتے، شہید جسٹس (ر) محمد نور مسکانزئی ایک بہادر نڈر جج تھے۔

واشنگٹن (ایمرا نیوز)امریکی صدر جو بائیڈن نے اپنی تقریر میں پاکستان کا حوالہ دیاہے۔
ایک رپورٹ کے مطابق امریکی صدر نے ڈیموکریٹک کانگریشنل کیمپین کمیٹی میں خطاب کیا اور روس، چین کا حوالہ دیتے پاکستان کوبھی لپیٹ میں لے لیا۔
امریکی صدر نے الزام عائد کیا کہ میراخیال ہے پاکستان خطرناک ترین ممالک میں سے ایک ہے اور پاکستان کا ایٹمی پروگرام بے قاعدہ ہے، اس بات کا خدشہ ہےکہ اسے کوئی بھی استعمال کرسکتا ہے۔

اسلام آباد (ایمرا نیوز) سپریم کورٹ آف پاکستان نے آرٹیکل 63 اے کی تشریح سے متعلق تحریری فیصلے میں کہا ہے کہ رکن اسمبلی کا پارٹی ہدایات کے خلاف ووٹ ڈالنا پارلیمانی جمہوری نظام کے لیے تباہ کن ہے۔ارکان اسمبلی ووٹ کے معاملے پر پارٹی کے اندر بحث، اتفاق یا عدم اتفاق کر سکتے ہیں، پارٹی پالیسی کے خلاف ڈالے گئے ووٹ کو شمار کرنا جمہوری نظام کے لیے خطرہ ہے۔ ارکان کا منحرف ہونا نہ روکا گیا تو سیاسی جماعتوں میں منصفانہ مقابلہ نہیں ہوسکے گا۔
سپریم کورٹ نے آرٹیکل 63 اے کی تشریح سے متعلق تفصیلی تحریری فیصلہ جاری کر دیا، مذکورہ فیصلہ جسٹس منیب اختر نے تحریر کیا۔ یہ فیصلہ 95 صفحات پر مشتمل ہے۔
یاد رہے کہ جسٹس مظہر عالم میاں خیل اور جسٹس جمال خان مندوخیل نے اکثریتی فیصلہ سے اختلاف کیا تھا، سماعت کے دوران چیف جسٹس جسٹس عمر عطاء بندیال ، جسٹس اعجاز الاحسن اور جسٹس منیب نے منحرف رکن کا ووٹ شمار نہ کرنے کا فیصلہ کیا تھا۔
سپریم کورٹ کی طرف سے جاری کردہ تحریری فیصلے میں فیصلے کا آغاز چیف جسٹس مارشل کے قول سے کیا گیا، جس میں انہوں نے کہا تھا کہ ہمیں یہ نہیں بھولنا چاہیے کہ ہمارا کام صرف آئین کی تشریح کرنا ہے۔
فیصلے میں کہا گیا کہ منحرف رکن کا پارٹی ہدایات کے خلاف ڈالا گیا ووٹ گنتی میں شمار نہیں ہوگا، منحرف رکن کی نااہلی کی مدت کا تعین پارلیمنٹ کرے، آئین میں پارٹی ہدایات کے لیے پارلیمانی پارٹی کا ذکر ہے پارٹی ہیڈ کا نہیں، اراکینِ پارلیمنٹ کو اظہارِ رائے کی مکمل آزادی حاصل ہے، اظہارِ رائے کی اس آزادی کا استعمال آرٹیکل 63 اے کی روشنی میں ووٹ ڈالتے ہوئے نہیں ہو سکتا۔
اکثریتی فیصلے کے مطابق صدارتی ریفرنس کے قابلِ سماعت ہونے پر اٹھائے گئے اعتراضات مسترد کرتے ہیں، صدارتی ریفرنس پر اٹھائے گئے اعتراضات کے جوابات وکلاء محاذ کیس میں سپریم کورٹ پہلے بھی دے چکی ہے، وزیراعظم یا وزیراعلیٰ پارلیمانی پارٹی میں اعتماد کھو بیٹھے تو اسے عدم اعتماد یا اعتماد کے ووٹ کا سامنا کرنا پڑتا ہے، رکن اسمبلی کا پارٹی ہدایات کے خلاف ووٹ ڈالنا پارلیمانی جمہوری نظام کے لیے تباہ کن ہے۔

لاہور (ایمرا نیوز) وزیراعلیٰ پنجاب چودھری پرویزالٰہی نے صوبے میں انتظامی لحاظ سے 5 نئے اضلاع بنانے کا اعلان کر دیا، تونسہ شریف، مری، وزیرآباد، تلہ گنگ اور کوٹ ادو کو نئے اضلاع بنانے کی منظوری دی گئی ہے۔
وزیراعلیٰ چودھری پرویز الٰہی کی زیر صدارت اعلی سطح اجلاس ایوان وزیر اعلی میں ہوا جس میں سابق وفاقی وزیر مونس الٰہی اورسابق وزیراعلیٰ سردار عثمان بزدار نے خصوصی شرکت کی، سینئر ممبر بورڈ آف ریونیو نے پنجاب میں نئے اضلاع پر بریفنگ دی۔
اجلاس سے خطاب کرتے ہوئے چودھری پرویز الٰہی کا کہنا تھا کہ نئے اضلاع بننے سے انتظامی امور میں بہتری آئے گی، نئے انتظامی اضلاع بننے سے تعلیم، صحت اور دیگر سہولتوں میں اضافہ ہو گا، نئے اضلاع بنانے کا فیصلہ ارکان اسمبلی اور عوام کی سہولت کو مد نظر رکھ کر کیا ہے۔
چودھری پرویز الٰہی کا کہنا تھاکہ نئے اضلاع بننے سے ترقی کے ثمرات عوام کی دہلیز تک پہنچیں گے، نئے اضلاع کو مالی خود مختاری کی راہ پر گامز ن کیا جائے گا۔
اجلاس میں محسن لغاری کے مطالبے پر جام پور کو ضلع بنانے پر بھی کام شروع کرنے کا فیصلہ کیا گیا، اگلے چند دنوں میں اس ضمن میں میٹنگ میں حتمی فیصلہ کیا جائے گا، تونسہ شریف، مری، وزیرآباد،تلہ گنگ اور کوٹ ادو کے اراکین اسمبلی نے اضلاع کی منظوری پر وزیراعلیٰ پنجاب چودھری پرویز الٰہی کا شکریہ ادا کیا۔
ارکان اسمبلی کا کہنا تھا کہ وزیر اعلی چوہدری پرویز الہی کا یہ فیصلہ عوام ہمیشہ یاد رکھیں گے، آپ نے عوام کے دیرینہ مطالبے کو مختصر مدت میں پورا کر کے ہمارے دل جیت لئے ہیں۔
سردار عثمان بزدار نے اس موقع پر کہا کہ تونسہ شریف کو ضلع بنانے پر عمران خان اور وزیراعلیٰ پرویز الٰہی کا شکریہ ادا کرتے ہیں، تونسہ شریف کے ضلع بننے سے علاقے کے عوام کی محرومیاں دور ہوں گی۔
پرویز الٰہی نے کہا کہ میں نے 2005میں تونسہ کو ضلع بنانے کا اعلان کیا تھا، 2005 میں تونسہ کو ضلع بنانے کا اعلان ایم این اے خواجہ شیراز کے بہت بڑے جلسے میں کیا تھا، 2018میں حافظ عمار یاسر کے بڑے جلسے میں تلہ گنگ کو ضلع بنانے کا اعلان کیا، اللہ تعالیٰ کا شکر ہے کہ اب تونسہ اور تلہ گنگ کو ضلع بنا نے کی منظوری بھی میں نے دی، تونسہ اور تلہ گنگ کے عوام سے کئے گئے وعدے پورے کئے جانے پر اللہ تعالیٰ کا شکر بجا لاتا ہوں، مری، وزیرآباد اور کوٹ ادو کو بھی ضلع بنانے کی منظوری دی ہے۔

لاہور(ایمرا نیوز)لاہور ہائیکورٹ نے وزیر داخلہ رانا ثنااللہ کے وارنٹ گرفتاری معطل کردیے۔مسلم لیگ (ن) کے رہنما اور وفاقی وزیر داخلہ رانا ثنااللہ کے وارنٹ گرفتاری اسپیشل جوڈیشل مجسٹریٹ اینٹی کرپشن کی جانب سے جاری کیے گئے تھے۔
اینٹی کرپشن کی ٹیم وارنٹ کی تعمیل کے لیے اسلام آباد پولیس کے پاس بھی گئی تھی تاہم وفاقی پولیس نے دونوں مرتبہ ٹیم کو واپس بھجوادیا۔
رانا ثنااللہ نے وارنٹ گرفتاری کو عدالت میں چیلنج کیا تھا جس کے بعد لاہور ہائیکورٹ کے راولپنڈی بینچ نے وزیر داخلہ کے وارنٹ گرفتاری کو معطل کردیا ہے۔
گزشتہ روز پنجاب کے مشیر داخلہ عمر سرفراز چیمہ نے کہا تھا کہ پنجاب میں داخلے پر وفاقی وزیر داخلہ رانا ثنا اللہ کو گرفتار کیا جائےگا۔

اسلام آباد(ایمرا نیوز)پاکستان تحریک انصاف کے سینیٹر اعظم سواتی کی گرفتاری کے معاملے پر پارلیمان کے ایوان بالا میں پی ٹی آئی اراکین نے سینیٹ میں شدید احتجاج کیا اور ان کے پروڈکشن آرڈر کی درخواست جمع کرادی۔
سینیٹ کا اجلاس ڈپٹی چیئرمین سینیٹ مرزا محمد آفریدی کی صدارت میں شروع ہوا۔ایوان میں پاکستان تحریک انصاف کے اراکین سیاہ پٹیاں باندھ کر شریک ہوئے اور اجلاس کا آغاز ہوتے ہی شدید احتجاج شروع کردیا اور ایجنڈے کی کاپیاں پھاڑدیں۔
پی ٹی آئی اراکین نے ساتھی سینیٹر کی گرفتاری پر شدید احتجاج کرتے ہوئے ایوان میں نعرے بازی کی اور چیئرمین کے ڈائس کا گھیراؤ کیا۔
پاکستان مسلم لیگ ن کے سینیٹر افنان اللہ نے اپوزیشن کے شور شرابے اور احتجاج کے دوران کورم کی نشاندہی کی تو ایوان میں کورم نا مکمل نکلا جس پر سینٹ اجلاس بغیر کسی کارروائی کے پیر کی سہ پہر چار بجے تک ملتوی کر دیا گیا۔
سینیٹ اجلاس سے قبل پاکستان تحریک انصاف کی پارلیمانی پارٹی کا اجلاس سینیٹ کے اپوزیشن لیڈر ڈاکٹر شہزاد وسیم کی صدارت میں ہوا جس میں سینٹ اجلاس میں اعظم سواتی کی گرفتاری کے خلاف احتجاج اور سیاہ پٹیاں باندھ کر شریک ہونے کا فیصلہ کیا گیا تھا۔
دریں اثنا پی ٹی آئی اراکین کی جانب سے سینیٹر اعظم سواتی کے پروڈکشن آرڈز جاری کرنے کے لیے درخواست سینیٹ سیکرٹریٹ میں جمع کرادی گئ۔پروڈکشن آرڈرز کی دارخوست ایوانِ بالا کے قائد حزب اختلاف ڈاکٹر شہزاد وسیم نے جمع کرائی۔
پروڈکشن آرڈرز کے لیے جمع کرائی گئی درخواست میں کہا گیا کہ سینیٹ کا 321واں اجلاس پیر 17 اکتوبر کو ہوگا۔درخواست میں بتایا گیا کہ اس معزز ایوان کے ایک رکن سینیٹر اعظم سواتی کو وفاقی تحقیقاتی ادارے (ایف آئی اے) نے 13 اکتوبر 2022 کو ان کی رہائش گاہ سے گرفتار کیا۔
درخواست میں چیئرمین سینیٹ کو مخاطب کرتے ہوئے کہا گیا کہ ’آپ سے درخواست کی جاتی ہے کہ سینیٹ کے قواعد و ضوابط کی دفعہ 84(1) کے تحت اعظم سواتی کے پروڈکش آرڈرز جاری کیے جائیں تا کہ وہ حالیہ سیشن میں حصہ لے سکیں‘۔

کراچی(ایمرا نیوز) روپے کی پسپائی نہ رکی، ڈالر پھر تگڑا ہونے لگا، امریکی کرنسی کی قدرمیں مزید اضافہ ہو گیا۔
کاروباری ہفتے کے آخری روز کاروبار کے آغاز پرامریکی کرنسی کی قدر میں 62 پیسے اضافہ ہوا ہے جس کے بعد ڈالر 219 روپے پر آ گیا جبکہ اوپن مارکیٹ میں بھی ڈالر 2 روپے مہنگا ہونے کے بعد 224 روپے پر فروخت ہو رہا ہے۔
واضح رہے کہ گزشتہ ہفتے کاروباری ہفتے کے اختتام پر ڈالر کی قدرمیں کمی ہوئی تھی اور ڈالر ایک روپے 22 پیسے کم ہوکر 222 روپے پر بند ہوا تھا۔

لندن (ایمرا نیوز)برطانیہ نے پاکستان میں سیلاب سے نمٹنے کی کوششوں کے لیے ایک کروڑ پاؤنڈز کی جان بچانے والی انسانی امداد فراہم کرنے کا اعلان کیا ہے، جس سے حکومت برطانیہ کی فراہم کردہ مجموعی امداد 2 کروڑ 65 لاکھ پاؤنڈز تک پہنچ گئی ہے۔
ایک بیان میں بتایا گیا کہ برطانیہ سے ملنے والی کُل 2 کروڑ 65 لاکھ پاؤنڈ امداد میں سے 2 کروڑ 15 لاکھ پاؤنڈ سیلاب سے سب سے زیادہ متاثر ہونے والے علاقوں میں امدادی سرگرمیوں کے لیے مختص کیے گئے، بقیہ 50 لاکھ پاؤنڈز براہ راست ڈیزاسٹرز ایمرجنسی کمیٹی پاکستان فلڈز اپیل کو جائیں گے۔
نیشنل ڈیزاسٹر مینجمنٹ اتھارٹی (این ڈی ایم اے) کے مطابق اس سال پاکستان میں سیلاب نے 3 کروڑ سے زائد افراد کو بے گھر کردیا ہے اور تقریباً 1700 افراد ہلاک ہوئے ہیں۔
دوسری جانب برطانوی وزیر مملکت برائے جنوبی ایشیا لارڈ طارق احمد آف ویمبلڈن سیلاب سے متاثرہ علاقوں کے دورے کے لیے جمعہ کو پاکستان پہنچے۔
برطانوی سفارت خانے کی پریس ریلیز کے مطابق وہ اہم حکومتی ہم منصبوں، کمیونٹی رہنماؤں، اور امدادی ایجنسیوں سے ملاقات کریں گے تاکہ انسانی بحران کے ردعمل اور ملک کے لیے طویل مدتی بحالی پر تبادلہ خیال کیا جاسکے۔
بیان میں کہا گیا کہ ایک کروڑ پاؤنڈز کی اضافی امداد پانی سے پیدا ہونے والی بیماریوں سے بچاؤ، پناہ گاہ، پانی، اور صفائی ستھرائی کی فراہمی جیسی فوری زندگی بچانے کی ضروریات پر خرچ کی جائے گی۔

کراچی(ایمرا نیوز)سندھ ہائیکورٹ نے صوبائی وزیر شرجیل میمن کا نام مستقل ای سی ایل سے خارج کرنے کا حکم دے دیا۔
سندھ ہائیکورٹ کے جسٹس کےکےآغا کی سربراہی میں 2 رکنی بینچ نے شرجیل میمن کی درخواست پر سماعت کی جس میں وکیل درخواست گزار نے کہا کہ سرکاری کام کے سلسلے میں صوبائی وزیر شرجیل میمن کو بیرون ملک جانا پڑتا ہے لہٰذا ان کا نام مستقل طور پر ای سی ایل سے خارج کرنے کا حکم دیا جائے۔
عدالت نے درخواست گزار کے وکیل دلائل پر درخواست منظور کرتے ہوئے شرجیل میمن کا نام مستقل طور پر ای سی ایل سے نکالنے کا حکم دے دیا۔

ملتان (ایمرا نیوز)ملتان کے نشتر اسپتال کی چھت سے کئی لاشیں ملنے کا انکشاف ہوا ہے۔ذرائع کا بتانا ہے کہ نشتر اسپتال کی چھت پر بنے کمرے میں درجنوں لاشیں گل سڑ رہی ہیں۔
دوسری جانب سوشل میڈیا پر زیر گردش خبروں کے مطابق نشتر اسپتال کی چھت سے سیکڑوں کی تعداد میں انسانی لاشوں کے اعضا برآمد ہوئے ہیں تاہم تعداد کے حوالے سے حکومتی سطح پر کسی قسم کی تصدیق یا تردید تاحال سامنے نہیں آسکی ہے۔
وزیراعلیٰ پنجاب چوہدری پرویز الٰہی نے نشتر اسپتال کی چھت پر لاوارث لاشیں رکھنے کا نوٹس لیتے ہوئے صوبائی سیکرٹری اسپیشلائزڈ ہیلتھ کیئر اینڈ میڈیکل ایجوکیشن سے رپورٹ طلب کر لی ہے۔
چوہدری پرویز الٰہی کا کہنا ہے کہ لاشیں چھت پر پھینک کر غیر انسانی فعل کا ارتکاب کیا گیا ہے، ذمہ دار عملے کے خلاف سخت تادیبی کارروائی کی جائے۔
سیکرٹری ہیلتھ ساؤتھ پنجاب نے معاملے کی انکوائری کے لیے 6 رکنی کمیٹی تشکیل دے دی ہے، کمیٹی 3 روز میں اپنی رپورٹ سیکرٹری ہیلتھ ساؤتھ کو پیش کرے گی۔
وائس چانسلر نشتر میڈیکل یونیورسٹی نے بھی 3 رکنی کمیٹی تشکیل دی ہے، کمیٹی تمام معلومات کے ساتھ اپنی رپورٹ وائس چانسلر کو پیش کرے گی۔