Category سیاست

وزیراعظم کے مشیر برائے قومی سلامتی ڈاکٹر معید یوسف کا کہنا ہے کہ افغانستان کی سر زمین پاکستان کے خلاف استعمال ہو رہی ہے۔

واشنگٹن میں پریس کانفرنس کرتے ہوئے ڈاکٹر معید یوسف کا کہنا تھا کہ ا فغانستان کی سر زمین پاکستان کے خلاف استعمال ہوتی رہی ہے اور اب بھی استعمال ہو رہی ہے،ہمیں اسے روکنا ہوگا۔

معید یوسف کا کہنا تھا کہ افغانستان میں پھر ایسےگروہ جنم لے سکتے ہیں جو دنیا کے لیےخطرہ ہوں، پاکستان اور امریکا کو پہلے سے زیادہ ساتھ مل کرکام کرنےکی ضرورت ہے۔

ان کا کہنا تھا کہ پاکستان مزید افغان مہاجرین کو برداشت نہیں کر سکتا، عالمی برادری کو چاہیے کہ وہ جنگ متاثرین کے لیے افغانستان میں ہی بندوبست کرے۔

پاکستان تحریکِ انصاف کے رکن پنجاب اسمبلی نذیر چوہان نے وزیراعظم عمران خان کے مشیر برائے احتساب شہزاد اکبر کے بارے میں دیئے گئے اپنے بیان پر معذرت کر لی۔

اس سے قبل دل میں تکلیف کی وجہ سے جہانگیر ترین گروپ کے حمایت یافتہ نذیر چوہان کو پنجاب انسٹی ٹیوٹ آف کارڈیالوجی منتقل کیا گیا تھا۔

یاد رہے کہ ایم پی اے نذیر چوہان کو گزشتہ روز 14 روزہ جوڈیشل ریمانڈ پر جیل منتقل کیا گیا تھا۔

وزیراعظم کے مشیر برائے احتساب شہزاد اکبر نے نذیر چوہان کے خلاف ایف آئی اے میں مقدمہ درج کروا رکھا ہے۔

نذیر چوہان کے خلاف وزیر اعظم کے مشیر برائے داخلہ شہزاد اکبر کی مدعیت میں تھانا ریس کورس پولیس نے مقدمہ درج کیا تھا، ان پر الزام ہے کہ انہوں نے ٹی وی چینل پر شہزاد اکبر کے حوالے سے متنازع گفتگو کی۔

مسلم لیگ ن کے سینئر رہنما اور ممبر قومی اسمبلی احسن اقبال ایک بار پھر کورونا وبا کا شکار ہو گئے۔

مائیکروبلاگنگ ویب سائٹ ٹوئٹر پر جاری پیغام میں احسن اقبال کا کہنا تھا کہ مجھے کووڈ کی دوبارہ تشخیص ہوئی ہے، خود کو قرنطینہ کر لیا ہے۔

جنرل سیکرٹری مسلم لیگ ن نے شہریوں سے اپنی جلد صحتیابی کی دعا کی درخواست کرتے ہوئے عوام سے اپیل بھی کی کہ ماسک پہنیں اور کورونا ایس او پیز پر عمل درآمد کریں۔

دوسری جانب اپوزیشن لیڈر شہباز شریف نے دعا کرتے ہوئے کہا ہے کہ اللہ تعالیٰ احسن اقبال کو صحت یاب کرے ا ور اپنے حفظ و امان میں رکھے۔

خیال رہے کہ احسن اقبال گزشتہ برس جون میں بھی عالمی وبا کورونا سے متاثر ہوئے تھے۔

اسلام آباد: وزارت قانون و انصاف نے گلگت بلتستان (جی بی) کو عارضی صوبائی درجہ دینے کے لیے مجوزہ قانون سازی کو حتمی شکل دے دی۔

رپورٹ کے مطابق مجوزہ قانون کے تحت جی بی کی سپریم اپیلٹ کورٹ (ایس اے سی) کو ختم کیا جا سکتا ہے اور یہاں کے الیکشن کمیشن کو الیکشن کمیشن آف پاکستان (ای سی پی) میں ضم کرنے کا امکان ہے۔

وزارت قانون کے ذرائع نے بتایا کہ 26 ویں آئینی ترمیمی بل کے مسودے کو تیار کر کے وزیراعظم عمران خان کو پیش کر دیا گیا ہے۔

جولائی کے پہلے ہفتے میں وزیر اعظم نے وفاقی وزیر قانون بیرسٹر فروغ نسیم کو کم سے کم وقت میں قانون کی تیاری کا کام سونپا تھا۔

ذرائع کے مطابق بل کا مسودہ آئین پاکستان، بین الاقوامی قوانین، اقوام متحدہ کی قراردادوں بالخصوص کشمیر پر رائے شماری، تقابلی آئینی قوانین اور مقامی قانون سازی کو بغور پڑھنے کے بعد تیار کیا گیا ہے۔

انہوں نے بتایا کہ مجوزہ آئینی ترمیم پر جی بی اور آزاد جموں و کشمیر کی حکومتوں سمیت اسٹیک ہولڈرز سے مشاورت کی گئی ہے۔

ذرائع نے بتایا کہ مجوزہ قانون تجویز کرتا ہے کہ جی بی کے معاملے میں حساسیت کی وجہ سے اسے آئین کے آرٹیکل ایک میں ترمیم کرکے عارضی صوبائی درجہ دیا جاسکتا ہے جو صوبوں اور علاقوں سے متعلق ہے جس سے جی بی کو پارلیمنٹ میں نمائندگی ملے گی اور یہاں میں صوبائی اسمبلی کے قیام بھی شامل ہے۔

ذرائع نے اُمید ظاہر کی کہ آئینی ترمیم علاقوں کے انضمام کے بین الاقوامی طرز عمل کے مطابق ہے اور یہ کسی بھی طرح کشمیر کاز پر منفی اثر نہیں ڈالے گی۔

ذرائع نے بتایا کہ مسودہ بل نے جی بی کے چیف کورٹ کے لیے ہائی کورٹ کا درجہ تجویز کیا جبکہ اس کا اپیلیٹ فورم یعنی سپریم اپیلٹ کورٹ (ایس اے سی) یا تو ختم ہو سکتا ہے یا آزاد جموں و کشمیر کی سپریم کورٹ کی طرح دوبارہ قائم ہو سکتا ہے۔

انہوں نے مزید کہا کہ اگر ایس اے سی تحلیل ہو جاتا ہے تو سپریم کورٹ آف پاکستان کے دائرہ اختیار کو قانون میں مطلوبہ ترامیم کے تحت جی بی تک بڑھایا جا سکتا ہے۔

جی بی کے الیکشن کمیشن سے متعلق ان کا کہنا تھا کہ یہ تجویز پیش کی گئی تھی کہ اسے ای سی پی میں ضم کر دیا جائے گا تاہم جی بی کے چیف الیکشن کمشنر کو ای سی پی کے رکن کے طور پر علاقے کی نمائندگی کے لیے برقرار رکھا جائے گا۔

اسلام آباد: وفاقی وزیر منصوبہ بندی اسد عمر نے بلاول بھٹو کو مخاطب کرتے ہوئے کہا ہے کہ لاک ڈاؤن، لاک ڈاؤن، لاک ڈاؤن، زرداری صاحب آپ چاہتے کیا ہیں؟ لاک ڈاؤن نے بھارت میں کروڑوں لوگوں کو غربت کی دلدل میں دھکیل دیا اور انڈیا کی معیشت 7 فیصد سکڑ گئی۔

یہ بات وفاقی وزیر نے اپنے ٹویٹ میں بلاول بھٹو زرداری کے بیان پر ردعمل میں کہی۔ اسد عمر نے کہا کہ بلاول آپ کہتے ہیں کہ اگر کراچی میں کورونا وائرس پھیلا تو ذمہ دار عمران خان ہوں گے، لاک ڈاؤن، لاک ڈاؤن، لاک ڈاؤن، زرداری صاحب آپ چاہتے کیا ہیں؟

اسد عمر ںے کہا کہ اس وقت کورونا سے ہندوستان میں ہونے والی اموات پاکستان سے 3 گنا زیادہ ہیں، انڈیا میں کروڑوں لوگوں کو غربت میں دھکیل دیا گیا جو آج تک غربت سے نکالے نہیں جاسکے، انڈیا کی معیشت 7 فیصد سکڑ گئی، ہندوستانی معیشت کے لیے یہ آزادی کے بعد سے بدترین سال تھا۔

اسد عمر نے کہا کہ یہ واضح طور پر ایک ایسا موضوع ہے جسے آپ اچھی طرح نہیں سمجھتے، برائے مہر بانی کورونا ریسپانس کو سیاست کی نذر نہ کیا جائے، زندگی اور معاش دونوں کی حفاظت کے وزیر اعظم عمران خان کے ویژن پر مبنی حکمت عملی نے بہترین نتائج پیدا کیے۔

انہوں نے مزید کہا کہ امید ہے کہ کل کے این سی او سی کے اجلاس میں سندھ حکومت ان تمام معاملات پر مزید تفصیل کے ساتھ مشاورت کرے گی، اور مشاورت سے ایک ایسی حکمت عملی وضع ہو گی جس میں ریاست کے سب ستون مل کر سندھ کے عوام کی صحت اور روزگار دونوں کا دفاع کریں۔

وفاقی وزیر نے کہا کہ سندھ میں جو فیصلے کل کیے گئے، خاص طور پر صنعت اور ٹرانسپورٹ کی بندش کے بارے میں ان پر نظر ثانی کی ضرورت ہے، ہم نے کل بھی اور اج بھی اپنے نکتہ نظر سے آگاہ کیا تھا، جس کی بنیاد پر جزوی تبدیلی کی گئی جو کہ خوش آئند ہے لیکن ابھی بھی مزید ترمیم کی ضرورت ہے۔

انہوں نے کہا کہ ان فیصلوں پر عمل درآمد کے لیے این سی او سی کی ٹیم صوبوں کے ساتھ مل کر تفصیلی حکمت عملی بناتی ہے، اس قومی ہم آہنگی سے مرتب حکمت عملی نے اللہ کے فضل سے کورونا کی تین لہر کو شکست دی، اگر ہر صوبہ اپنی مرضی کے فیصلے کرتا اور صرف اپنے وسائل پر انحصار کرتا تو کبھی بھی یہ کامیابی نہ حاصل ہوتی۔

اسد عمر نے مزید کہا کہ پاکستان کی کورونا کی حکمت عملی، جس سے عوام کی صحت اور روزگار دونوں کا دفاع کیا گیا، اسے دنیا میں پذیرائی حاصل ہوئی، زمینی حقائق کا باریک بینی سے جائزہ لینے کے بعد فیصلے کیے گئے، یہ تمام فیصلے ایسے پلیٹ فارم سے لیے گئے جہاں تمام وفاقی سول، ملٹری ادارے اور صوبے موجود ہوتے ہیں۔

اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ اگر کراچی میں کورونا کے ڈیلٹا ویریئنٹ سے بھارت جیسی حالت ہوئی تو اس کے ذمہ دار عمران خان ہوں گے، وفاق کورونا کے خلاف نہ خود کچھ کرتا ہے اور نہ ہمیں کرنے دیتا ہے۔

ان خیالات کا اظہار انہوں نے اسلام آباد میں میڈیا سے گفت گو میں کیا۔ ان کا کہنا تھا کہ اگر کراچی میں کورونا وائرس کے ڈیلٹا ویریئنٹ سے بھارت جیسی حالت ہوئی تو اس کے ذمہ دار عمران خان ہوں گے، وفاقی حکومت سندھ کےعوام کا خیال رکھنے کی بجائے ہماری بےعزتی کروارہی ہے، سندھ میں اگر کورونا پھیلا تو اس کی ذمہ دار وفاقی حکومت ہوگی، وفاقی حکومت نہ تو کورونا پر خود کچھ کرتی ہے اور نہ ہی ہمیں کوئی کام کرنے دیتی ہے۔

ان کا کہنا تھا کہ اسلام آباد میں سیلاب سے اتنا بڑا نقصان ہوا لیکن کوئی حکومتی وزیر عوام کے پاس نہیں پہنچا، عمران خان نے عوام کو لاوارث چھوڑدیا۔
انہوں نے کہا کہ صاف و شفاف الیکشن نہ کرانا حکومت کی بہت بڑی ناکامی ہے، ناجائز طریقے سے کرسی پر بیٹھنے والا عمران خان اب بچگانہ حرکتیں بند کرے۔

بلاول بھٹو کا کہنا تھا کہ سابق طالبان عہدے دار کو کشمیر کا حکم ران بنایا جارہا ہے، آزاد کشمیر کا وزیر فائرنگ کرتا رہا، پیسے بانٹتا رہا لیکن الیکشن کمیشن نے نوٹس نہیں لیا، ہم ہرکٹھ پتلی کا سامنا کرنے کے لیے تیار ہیں، مل کر کام کریں تو پنجاب میں بزدار اور وفاق سےعمران کو بھگا سکتے ہیں، جمہوری نظام میں رہتے ہوئے اس حکومت سے نجات لےسکتےہیں۔

ان کا کہنا تھا کہ آزاد کشمیر کے انتخابات جیسی دھاندلی کبھی نہیں ہوئی، آزاد کشمیر الیکشن میں پیسہ چلایا گیا، تاریخی دھاندلی کے باوجود 11 سیٹیں حکومت کے منہ سے چھینیں، عمران خان عام آدمی کے لیے تکلیف دہ پالیسیاں بناتے ہیں، عام آدمی تبدیلی کا اصل چہرہ پہچان چکا ہے، ملک میں تاریخی غربت اور بے روزگاری ہے۔

کراچی: گورنر سندھ عمران اسماعیل نے کہا ہے کہ حکومت سندھ لاک ڈاؤن کے فیصلے پر نظرثانی کرے، کیونکہ اس سے دیہاڑی دار طبقہ متاثر ہوتا ہے۔

گورنر سندھ عمران اسماعیل نے کراچی میں نیوز کانفرنس کرتے ہوئے کہا کہ صوبہ سندھ میں ایس او پیز پرعمل درآمد کرانے کے بجائے کاروباربند کیا جا رہاہے، وزیراعلیٰ سندھ کو ٹیلی فون کیا کہ جس انڈسٹری کے کارکنوں نے ویکسی نیشن کرائی ہے اسے بند نہ کیا جائے، وزیراعظم عمران خان لاک ڈاؤن کے حق میں نہیں، مراد علی شاہ اپنے فیصلے پر نظر ثانی کریں، بہتر تھا سندھ حکومت لاک ڈاؤن کے بجائے ایس او پیز پر عملدرآمد کراتی۔

انہوں نے کہا کہ صوبے میں کرفیو جیسی صورتحال پیدا کردی گئی ہے، روزگار بند کرنا اور کرفیو جیسے لاک ڈاؤن لگانے کے خلاف ہیں، یہ سپریم کورٹ کے فیصلے کی خلاف ورزی ہے، کوئی صوبہ اکیلا فیصلہ نہیں کرسکتا بلکہ این سی او سی کی گائیڈ لائنز کے تحت اقدام کرے گا۔
گورنر سندھ نے مدد کی پیشکش کرتے ہوئے کہا کہ ایس او پیز پر عملدرآمد کا نہ ہونا وزیراعلیٰ سندھ اور ان کی پوری ٹیم کی ناکامی ہے، وزیراعلیٰ سندھ ایڈمنسٹریٹر ہیں، ایس او پیز پر پابندی میں وہ جیسی مدد چاہیں گے ہم حاضر ہیں، وزیراعلیٰ سندھ سے گزشتہ روز بھی کہا ہے فیکٹریاں بند نہ کریں، اس سلسلے میں وفاقی حکومت، وزیراعظم عمران خان اور صدرمملکت عارف علوی آپ کے ساتھ تعاون کیلئے تیار ہیں۔

وفاقی وزیر داخلہ شیخ رشید نے کہا ہے کہ میری جان کو خطرہ ضرور ہے لیکن ہم گھبرانے والے نہیں ہیں، میڈیا کا شکر گزار ہوں کہ انہوں نے میری درخواست پر لال حویلی پر ہونے والی فائرنگ کی زیادہ کوریج نہیں کی۔

راولپنڈی میں تقریب سے خطاب کرتے ہوئے انہوں نے کہا کہ راولپنڈی اور اسلام آباد حساس شہر ہیں۔

وزیر داخلہ نے کہا کہ لال حولی پر پہلے بھی حملے ہوئے ہیں اور گزشتہ روز ہونے والے حملے سے متعلق پولیس اپنی تحقیقات کر رہی ہے، سیکیورٹی صورتحال کی وجہ سے اب میں وہاں صرف ایک دن موجود ہوتا ہوں۔

علاوہ ازیں ایک سوال کے جواب میں انہوں نے کہا کہ راولپنڈی اور اسلام آباد میں مزید 500 کیمرے لگانے کی ضرورت ہے لیکن 190 لگا رہے ہیں، ایک شہر کے ساتھ فوج کا ہیڈکوارٹرز اور دوسرے کے ساتھ پورا ڈپلومیٹک سیکشن ہے۔

سابق سفارت کار کی بیٹی نور مقدم کے قتل سے متعلق سے ایک سوال کے جواب میں انہوں نے کہا کہ مقتولہ کے ملزم کو کسی صورت نہیں چھوڑیں گے اور اگر میرا بس چلے تو میں اس کو گولی مار دوں۔

شیخ رشید نے میڈیا کو مخاطب کرکے کہا کہ ’جو پاگل لوگ ایسے جرائم کرتے ہیں انہیں زیادہ کوریج نہ دیں کیونکہ ایسے بیمار ذہن کے لوگ زیادہ شہرت چاہتے ہیں‘۔

علاوہ ازیں افغان سفیر کی بیٹی کے مبینہ اغوا کے واقعے میں ٹیکسی ڈرائیوروں سے متعلق سوال کے جواب میں انہوں نے کہا کہ ’یہ حقیقت ہے کہ میں نے افغان سفیر کی بیٹی کے مبینہ اغوا کے معاملے میں گرفتار ٹیکسی ڈرائیور کی رہائی کےلیے آئی جی اسلام آباد کو کہا ہے کیونکہ وہ بے قصور ہیں۔

انہوں نے مزید بتایا کہ ان کے گھر میں روٹی نہیں ہے، صبح نکلتے ہیں اور شام کو کما کر گھر پہنچتے ہیں۔

شیخ رشید نے واضح کیا کہ جس دن افغان سفیر اسلام آباد آئیں گے انہیں تمام دستاویزات پیش کریں گے، سفیر کی بیٹی نے 6 ٹیکسی ڈرائیوروں کو ادائیگی کے ساتھ ٹپس بھی دیں۔

ان کا کہنا تھا کہ افغان وزارت خارجہ کو تمام ریکارڈنگ اور دستاویزات دے دیے ہیں، میں ذاتی طور پر انہیں کچھ نہیں دے سکتا، یہ وزارت خارجہ کا کام ہے۔

شیخ رشید نے کہا کہ افغانستان سے متعلق بیان وزارت خارجہ دے گا جبکہ سیلابی صورتحال سے نمنٹے کے لیے فوج سمیت سول ادارے بھی الرٹ ہیں۔

سندھ میں کیسز کے غیرمعمولی اضافے کے پیش نظر سخت لاک ڈاؤن سے متعلق سوال کے جواب میں انہوں نے کہا کہ سندھ میں مکمل لاک ڈاؤن کریں گے تو اپنا نقصان خود کریں گے، ساری دنیا نے وزیر اعظم عمران خان کے اسمارٹ لاک ڈاؤن کی تعریف کی، حکومت سندھ کو اسمارٹ لاک ڈاؤن کے طریقہ اپنانے میں کوئی حرج نہیں ہے۔

شیخ رشید نے تقریب میں موجود افراد کو ماسک پہننے کی تلقین کرتے ہوئے کہا کہ کورونا وائرس کی نئی قسم ڈیلٹا سے احتیاط برتیں اور اپنے آپ کو محفوظ رکھیں۔

شیخ رشید نے کہا کہ جب ہم بھی اپوزیشن میں تھے تو چیئرمین پاکستان پیپلز پارٹی (پی پی پی) بلاول بھٹو زرداری کی طرح کی باتیں کرتے تھے کہ آئندہ چند ماہ میں انتخابات ہونے جارہے ہیں، لیکن حقیقت یہ ہے کہ الیکشن اپنے وقت پر ہوں گے۔

انہوں نے مزید کہا کہ اپوزیشن کو سمجھ لینا چاہیے کہ تحریک انصاف مزید بہتر پوزیشن میں آرہی ہے اور آئندہ دو برس میں مزید بہتر ہوگی۔

وزیر داخلہ نے طالبان اور چین کے مابین مذاکرات سے متعلق سوال کے جواب میں کہا کہ چین اور پاکستان کے تعلقات ہمالیہ کے پہاڑوں سے بلند ہیں اور انہیں کوئی طاقت بھی خراب نہیں کر سکتی۔

انہوں نے کہا کہ پوری قوم چین پر اعتماد کرتی ہے اور بعض ممالک پاک ۔ چین تعلقات کو نقصان پہنچانے کے لیے سازش کر رہے ہیں، لیکن ہمارے تعلقات کبھی خراب نہیں ہوں گے۔

ان کا کہنا تھا کہ راولپنڈی کے تمام مسائل حل ہوگئے ہیں جبکہ لئی ایکسپریس میری زندگی اور سیاست کا مسئلہ ہے، جب وہ بن جائے گی تو سیاست سے ریٹائرمنٹ لے لوں گا۔

وزیر خارجہ شاہ محمود قریشی نے کہا ہے کہ سندھ کے عوام تبدیلی چاہتے ہیں اور انہیں یہ باور کرانے کی ضرورت ہے کہ ایک متبادل جماعت ہے جو ان کی داد رسی کر سکتی ہے، جس دن وہاں کے عوام قائل ہو گئے تو سندھ میں بھی خوشگوار تبدیلی نظر آئے گی۔

ملتان میں پریس کانفرنس کرتے ہوئے شاہ محمود قریشی نے کہا کہ پی پی-38 سیالکوٹ عرصہ دراز سے مسلم لیگ(ن) کے کنٹرول میں تھا اور وہاں سے وہ کامیابیاں حاصل کرتے رہے لیکن عوام نے وہاں کایا پلٹی اور تحریک انصاف کے نامزد کردہ امیدوار کو منتخب کیا، یہ ایک ابھرتا ہوا ٹرینڈ ہے اور ہمیں اسی ٹرینڈ کو آگے لے کر چلنا ہے۔

انہوں نے کہا کہ ہم نے صوبہ سندھ میں کام شروع کردیا ہے اور وزیر اعظم کی سربراہی میں سندھ کے سیاسی رابطوں کے بارے میں حکمت عملی طے پائی ہے۔

ان کا کہنا تھا کہ میں خود بھی کراچی گیا تھا جہاں کچھ دوستوں سے بھی ملاقات ہوئی ہے جبکہ آئندہ آنے والے دنوں میں مزید دوستوں سے ملاقات ہو گی تاکہ ہم سندھ کے عوام سے رجوع کریں، وہاں متعلقہ مسائل کو سمجھ کر ان کا حل تلاش کریں اور وہاں کے عوام کو متبادل بھی فراہم کریں۔

وزیر خارجہ نے کہا کہ ہمارا تجزیہ یہ ہے کہ سندھ کے لوگ تبدیلی چاہتے ہیں، انہیں قائل کرنے کی ضرورت ہے کہ اب ایک متبادل جماعت ہے جو ان کی داد رسی کر سکتی ہے اور جو ان کے مسائل کو حل کرنے میں دلچسپی رکھتی ہے، مجھے یقین ہے کہ جس دن وہ قائل ہو گئے تو آپ سندھ میں بھی حیرت انگیز اور خوشگوار تبدیلی دیکھیں گے۔

انہوں نے ملتان کی سالڈ ویسٹ مینجمنٹ کمپنی کی انتظامیہ کو مبارکباد پیش کرتے ہوئے کہا کہ عید کے دنوں میں سالڈ ویسٹ ٹھکانے لگانا بہت بڑا چیلنج ہوتا ہے لیکن انہوں نے اس سال ماضی سے بہتر کام کیا اور ہمیں اس حوالے سے بہت اچھی رپورٹ موصول ہوئی ہے۔

شاہ محمود قریشی نے کہا کہ جنوبی پنجاب سیکریٹریٹ کے قیام کے حوالے سے معاملات طے پا گئے ہیں اور پیر سے ٹھییدار اس پر کام شروع کردے گا جبکہ جنوبی پنجاب سکریٹریٹ کے سیکریٹریز خود مختار اور بااختیار ہوں گے تاکہ وہ وہاں کے معاملات کو وہیں حل کردیں۔

سپریم کورٹ کے جسٹس قاضی فائزعیسیٰ کی کورونا کے باعث طبیعت ناساز ہوگئی۔

ذرائع نے بتایاکہ جسٹس فائزعیسیٰ کو علاج کیلئے نجی اسپتال منتقل کر دیا گیا ہے۔

ذرائع کے مطابق ڈاکٹروں نے چیک اپ کے بعد جسٹس فائز عیسیٰ کی اسپتال منتقلی کا فیصلہ کیا۔

ذرائع کا کہنا ہے کہ جسٹس قاضی فائز عیسیٰ کو مسلسل کھانسی اور بخار کی شکایت ہے۔

خیال رہے کہ گزشتہ دنوں جسٹس قاضی فائزعیسیٰ اور ان کی اہلیہ سرینا عیسیٰ میں کورونا کی تشخیص ہوئی تھی جس کے بعد سے وہ اور ان کی اہلیہ گھر میں قرنطینہ میں موجود تھے۔