Category سیاست

سیالکوٹ: پی پی 38 سیالکوٹ کی نشست پر ضمنی انتخاب میں تحریک انصاف نے مسلم لیگ (ن) کو شکست دے دی۔

تفصیلات کے مطابق سیالکوٹ کے حلقہ پی پی 38 کی نشست پر ضمنی انتخاب میں پاکستان تحریک انصاف کے امیدوار نے میدان مار لیا اور مسلم لیگ (ن) سے سیٹ چھین لی۔

حلقے کے تمام 165 پولنگ اسٹیشنز سے موصولہ نتائج کے مطابق پی ٹی آئی امیدوار احسن سلیم بریار 60588 ووٹ حاصل کرکے پہلے نمبر پر رہے جب کہ مسلم لیگ (ن) کے امیدوار طارق سبحانی نے 53471 ووٹ حاصل کیے۔

وزیر مملکت اطلاعات و نشریات فرخ حبیب نے اپنے ٹویٹ میں کہا ہے کہ پی ٹی آئی واضح اکثریت سے الیکشن جیت چکی ہے، کشمیر کے بعد سیالکوٹ نے بھی ن لیگ کے بیانیے کو دفن کردیا۔

واضح رہے کہ یہ نشست مسلم لیگ (ن) کے چوہدری خوش اختر سبحانی کے انتقال کے باعث خالی ہوئی تھی۔

وزیر اعظم عمران خان نے امریکا کے افغانستان میں پہلے مداخلت کرنے اور پھر پوزیشن کمزور ہونے پر سیاسی تصفیہ طلب کرنے کے معاملے پر سوالات اٹھاتے ہوئے کہا ہے کہ امریکا نے افغانستان میں صورتحال بہت خراب کردی ہے۔

وزیراعظم کے یہ ریمارکس اس وقت سامنے آئے جب امریکی فوج اور نیٹو افغانستان سے انخلا کے آخری مراحل میں ہیں۔

منگل کی رات کو نشر کیے جانے والے ایک امریکی نیوز پروگرام پی بی ایس نیوز آوور میں انٹرویو دیتے ہوئے وزیر اعظم نے کہا کہ ’مجھے لگتا ہے کہ امریکا نے صورتحال بہت خراب کردی ہے‘۔

وزیر اعظم نے امریکا کو ’افغانستان میں فوجی حل تلاش کرنے کی کوششوں پر تنقید کا نشانہ بنایا اور کہا کہ ایسا کبھی تھا ہی نہیں‘۔

ان کا کہنا تھا کہ ’مجھ جیسے لوگ جو کہتے رہے کہ فوجی حل ممکن نہیں، جو افغانستان کی تاریخ جانتے ہیں، ہمیں امریکا مخالف کہا گیا، مجھے طالبان خان کہا جاتا تھا‘۔

انہوں نے افسوس کا اظہار کیا کہ جب امریکا کو یہ احساس ہوا کہ افغانستان میں کوئی فوجی حل نہیں ہے ’بدقسمتی سے امریکی اور شمالی اٹلانٹک ٹریٹی آرگنائزیشن فورسز نیٹو، سودے بازی کی پوزیشن کھو چکے تھے‘۔

ان کا کہنا تھا کہ امریکا کو بہت پہلے سیاسی تصفیے کا انتخاب کرنا چاہیے تھا جب افغانستان میں ڈیڑھ لاکھ کے قریب نیٹو فوجی موجود تھے۔

انہوں نے پروگرام کی میزبان جوڈی ووڈ رف کو بتایا کہ ‘تاہم ایک مرتبہ جب انہوں نے فوج کو بمشکل 10 ہزار کر دیا تھا اور پھر جب انہوں نے انخلا کی تاریخ بتادی تھی تو طالبان نے سوچا کہ وہ جیت گئے ہیں اور اس وجہ سے اب انہیں سیاسی حل کے لیے مجبور کرنا مشکل ہوگیا ہے‘۔

جب انٹرویو لینے والے نے سوال کیا کہ کیا ان کا خیال ہے کہ طالبان کی بحالی افغانستان کے لیے ایک مثبت پیشرفت ہے تو وزیر اعظم عمران خان نے اس بات کا اعادہ کیا کہ اس کا واحد نتیجہ ایک سیاسی تصفیہ ہوگا جو جامع ہو‘۔

انہوں نے کہا کہ ظاہر ہے کہ طالبان اس حکومت کا حصہ ہوں گے۔

’افغانستان میں خانہ جنگی ہرگز نہیں چاہتے‘
ہمسایہ ملک افغانستان کی صورت حال کو وزیر اعظم نے ’بدترین‘ قرار دیتے ہوئے کہا کہ جہاں افغانستان خانہ جنگی کا شکار ہوسکتا ہے تو وہاں پر یہ مسئلہ بھی درپیش ہے کہ ’پاکستان کے نقطہ نظر سے یہ بدترین صورت حال ہے کیونکہ تب ہمیں دو مسائل کا سامنا ہوسکتا ہے جن میں سے ایک مہاجرین کا مسئلہ ہے‘۔

ان کا کہنا تھا کہ ’پہلے ہی پاکستان 30 لاکھ سے زائد افغان مہاجرین کی میزبانی کررہا ہے اور ہمیں جو خدشہ لاحق ہے وہ یہ ہے کہ ایک طویل خانہ جنگی مزید مہاجرین کو لائے گی اور ہماری معاشی صورتحال ایسی نہیں ہے کہ ہم مزید آمد برداشت کرسکیں’۔

دوسرے مسئلے کی تفصیل بتاتے ہوئے انہوں نے اس خدشے کا اظہار کیا کہ سرحد پار سے ہونے والی ایک ممکنہ خانہ جنگی ’پاکستان میں داخل ہوسکتی ہے‘۔

وزیر اعظم نے وضاحت کی کہ طالبان پشتون ہیں اور اگر یہ افغانستان میں خانہ جنگی کا آغاز ہوا تو ہماری طرف کے پشتون بھی اس کی طرف راغب ہوجائیں گے‘، ان کا کہنا تھا کہ ’ہم ایسا نہیں چاہتے ہیں‘۔

‘پاکستان پر طالبان کی مدد کا الزام غیر منصفانہ ہے‘
جب پاکستان کی افغانستان کو مبینہ فوجی، انٹیلیجنس اور مالی مدد کے بارے میں سوال کیا گیا تو وزیراعظم نے جواب دیا کہ ’مجھے یہ انتہائی غیر منصفانہ لگتا ہے‘۔

وزیر اعظم نے یاد دلایا کہ افغانستان میں امریکی جنگ کے نتیجے میں 70 ہزار پاکستانیوں نے اپنی جانیں دی ہیں جب کہ 11 ستمبر 2001 کو نیویارک میں ہونے والے واقعے کا پاکستان کا کوئی تعلق نہیں تھا‘، اس وقت القاعدہ افغانستان میں مقیم تھی اور ’پاکستان میں کوئی عسکریت پسند طالبان موجود نہیں تھے‘۔

انہوں نے دوہرایا کہ ’ہمارا اس سے کوئی لینا دینا نہیں تھا، افغانستان کی جنگ کے نتیجے میں پاکستان کی معیشت کو 150 ارب ڈالر کا نقصان ہوا ہے‘۔

’خواتین کے بارے میں میرے بیان کو سیاق و سباق سے ہٹ کر پیش کیا گیا‘
گزشتہ ماہ کے ایک غیر ملکی میڈیا کو انٹرویو کے دوران وزیراعظم عمران خان کے خواتین کے حوالے سے بیان پر سوال کے جواب میں ان کا کہنا تھا کہ اسلام، خواتین کو عزت و تکریم دیتا ہے، خواتین کے حوالے سے میرے بیان کو سیاق وسباق سے ہٹ کر پیش کیا گیا۔

ان کا کہنا تھا کہ ’میں پاکستانی معاشرے میں جنسی جرائم میں اضافے پر بات کررہا تھا‘۔

وزیراعظم کا کہنا تھا کہ ’میرا مطلب معاشرے میں برائی کی ترغیب کو کم کرنا تھا، اسلام میں پردہ صرف خواتین تک ہی محدود نہیں، مردوں کے لیے بھی پردے کا لحاظ کرنا ضروری ہے۔

انہوں نے کہا کہ ’جنسی تشدد کرنے والا ہی اس جرم کا اکیلا ذمہ دار ہوتا ہے اور جنسی تشدد کا نشانہ بننے والا قصوروار کبھی نہیں ہوتا‘۔

انہوں نے کہا کہ پاکستان کے آج بھی حالات دیکھیں، ریپ کیسز پر نظر ڈالیں اور اس کا موازنہ مغربی ممالک سے کریں تو یہ ان کے مقابلے میں کم ہیں، ہاں ہمارے اپنے مسائل ہیں تاہم جہاں تک عورت کے وقار کی بات ہے میں پوری دنیا گھومنے کے بعد کہہ سکتا ہوں ‘یہ معاشرہ خواتین کو زیادہ عزت اور وقار دیتا ہے‘۔

خیال رہے کہ 19 جون کو ایچ بی او کو دیے گئے ایک انٹرویو میں وزیر اعظم نے کہا تھا کہ ’اگر کوئی عورت بہت کم کپڑے پہنے گی تو اس کا اثر مردوں پر پڑتا ہے حتیٰ کہ وہ روبوٹ نہ ہوں، اگر کہیں ایسا معاشرہ ہو جہاں لوگوں نے ایسی چیزیں دیکھی نہ ہوں تو ان پر اس کا اثر نہیں پڑے گا‘۔

پاک فوج کے شعبہ تعلقات عامہ ‘آئی ایس پی آر’ کے مطابق سعودی وزیر خارجہ شہزادہ فیصل بن فرحان آل سعود نے پاکستان کو سعودی عرب کی ’غیر متزلزل حمایت‘ کی یقین دہانی کرائی ہے اور اس کی ’خطے میں امن و استحکام کے فروغ کے لیے کوششوں‘ کی تعریف کی ہے۔

بیان میں کہا گیا کہ سعودی وزیر خارجہ نے راولپنڈی میں چیف آف آرمی اسٹاف جنرل قمر جاوید باجوہ سے ملاقات کی اور ’دوطرفہ دلچسپی، افغانستان امن عمل سمیت خطے کی سلامتی کی صورتحال اور علاقائی امن اور رابطے کے لیے باہمی تعاون کے امور‘ پر تبادلہ خیال کیا۔

آرمی چیف جنرل قمر جاوید باجوہ نے کہا کہ سعودی عرب اور پاکستان کے درمیان تعلقات ’بھائی چارے اور باہمی اعتماد‘ پر مبنی ہیں اور دونوں ممالک امن اور استحکام کے لیے اپنا کردار ادا کرتے رہیں گے۔

بیان میں مزید کہا گیا کہ انہوں نے پاکستان اور اس کی افواج پاکستان کی حمایت پر سعودی قیادت کا شکریہ بھی ادا کیا۔

وزیر خارجہ شہزادہ فیصل بن فرحان آل سعود ایک روزہ دورے پر منگل کے روز پاکستان پہنچے تھے۔

انہوں نے کہا تھا کہ مئی میں وزیر اعظم عمران خان کے دورے کے بعد ان کا فالو اپ دورہ ہے جس میں ہم نے سعودی عرب، پاکستان سپریم کوآرڈینیشن کونسل (ایس پی ایس سی سی) کے قیام کو یقینی بنایا۔

سعودی وزیر کا یہ دورہ ان کے پاکستانی ہم منصب شاہ محمود قریشی کی دعوت پر تھا اور دنوں نے اسلام آباد میں پریس کانفرنس سے خطاب بھی کیا۔

شہزادہ فیصل بن فرحان آل سعود نے پریس کانفرنس کے دوران کہا تھا کہ مملکت ایس پی ایس سی سی کے ذریعے پاکستان کے ساتھ اپنے تعلقات کے طول و عرض کو بڑھانا چاہتی ہے۔

انہوں نے اقتصادی تعلقات کو بڑھانے کی اہمیت پر زور دیتے ہوئے کہا تھا کہ پریس کانفرنس سے قبل یہ شاہ محمود قریشی کے ساتھ ان کی گفتگو کا مرکزی مرکز رہا۔

سعودی وزیر خارجہ فرحان آل سعود نے کہا کہ ہم نے تعلقات کے معاشی پہلو اور سرمایہ کاری کے روایتی شعبوں سے نکل کر اسے بڑھانے کے مواقع پر بہت زیادہ توجہ مرکوز کی۔

انہوں نے مزید کہا تھا کہ پاکستان اور سعودی عرب نے ایک دوسرے کے خطوں میں استحکام کو یقینی بنانے کے لیے مل کر کام کرنے پر اتفاق کیا ہے۔

انہوں نے کہا کہ ہم نے علاقائی معاملات مثلاً کشمیر، فلسطین یا یمن پر کام کرنے پر اتفاق کیا ہے، ہم اپنے دونوں خطوں میں استحکام کو یقینی بنانے کے لیے مل کر کام کریں گے۔

وزیر اعظم عمران خان نے سابق وزیر اعلیٰ سندھ ارباب غلام رحیم کو سندھ سے متعلق امور پر معاون خصوصی تعینات کردیا اور کیبنیٹ ڈویژن کی جانب سے نوٹیفیکیشن بھی جاری کردیا گیا-

ارباب غلام رحیم نے رواں ماہ کے شروع میں وزیراعظم عمران خان کے ساتھ ایک ملاقات کے بعد حکمران جماعت پاکستان تحریک انصاف (پی ٹی آئی) میں شمولیت کر لی تھی۔

کابینہ ڈویژن سے جاری نوٹیفیکیشن میں کہا گیا ہے کہ ‘وزیراعظم عمران خان سندھ کے امور پر ڈاکٹر ارباب غلام رحیم کی بطور معاون خصوصی تعیناتی پر خوش ہیں’-

نوٹیفکیشن کے مطابق ڈاکٹر ارباب غلام رحیم کی تعیناتی اعزازی بنیاد پر کی گئی ہے-

حکومتی ذرائع کے مطابق وزیر اعظم کا اگست سے سندھ میں جلسوں کا پلان ہے اور اس سے قبل یہ اہم تعیناتی کی گئی ہے-سابق وزیر اعلیٰ سندھ ڈاکٹر ڈاکٹر ارباب غلام رحیم نے حال ہی تحریک انصاف میں شمولیت اختیار کی-

ڈاکٹر ارباب غلام رحیم کی تعیناتی کے بعد وزیراعظم کی کابینہ کی تعداد بڑھ کر 53 ہوگئی ہے، جس میں معاونین خصوصی کی تعداد بڑھ کر 17 اور وفاقی کابینہ میں غیر منتخب شخصیات کی تعداد بڑھ کر 18 ہوگئی ہے۔

کابینہ ڈویژن کے ذرائع کے مطابق وفاقی وزرا میں ایک غیر منتخب وفاقی وزیر، 13 معاونین خصوصی اور وزیراعظم کے تمام چار مشیر بھی غیر منتخب ہیں جبکہ وفاقی وزرا کی تعداد 28 اور وزرائے مملکت کی تعداد 4 ہے۔

حکومتی ذرائع کے مطابق وزیر اعظم کا اگست سے سندھ میں جلسوں کا منصوبہ ہے اور اس سے قبل یہ اہم تعیناتی کی گئی ہے۔

سندھ میں گرینڈ ڈیموکریٹک الائنص (جی ڈی اے) کے رہنما ارباب غلام رحیم نے گزشتہ ماہ دعویٰ کیا تھا کہ اتحادی میں شامل جماعتیں خود کو وزیراعظم عمران خان اور ان کی جماعت پی ٹی آئی سے خود کو دور محسوس کرتی ہیں۔

ان کا کہنا تھا کہ ‘پی ٹی آئی کی حمایت سے دستبردار ہونے کا سوچ سکتے ہیں جب حکومت سندھ پولیس کے ذریعے ہمیں ظلم کا نشانہ بنا رہی ہوں اور وزیراعظم ہماری پہنچ میں ہی نہ ہوں’۔

بعد ازاں پی ٹی آئی میں شمولیت کے بعد ارباب غلام رحیم نے کہا تھا کہ وزیراعظم عمران خان نے انہیں سندھ میں پی ٹی آئی کو منظم کرنے کا ہدف دیا ہے اور آنے والے دنوں میں صوبے سے مزید اچھی خبریں ملیں گی۔

ارباب غلام رحیم نے 2013 میں سابق وزیراعلیٰ پنجاب شہباز شریف سے ملاقات کے بعد اپنی جماعت پیپلزمسلم لیگ (پی ایم ایل) کو پاکستان مسلم لیگ (ن) میں ضم کردیا تھا جبکہ اسے قبل وہ پاکستان مسلم لیگ (ق) کے پلیٹ فارم سے 2004 سے 2007 تک سندھ کے وزیراعلیٰ رہ چکے ہیں۔

لاہور کی سیشن عدالت میں وزیراعظم عمران خان نے شہباز شریف کے ہتک عزت کے دعوے کا جواب جمع کرادیا۔

جواب میں عمران خان نے شہباز شریف کی جانب سے دائر دعوی خارج کرنے کی استدعا کرتے ہوئے کہا کہ رقم کی آفر نواز شریف یا شہباز شریف کی طرف سے ڈائریکٹ نہیں بلکہ کسی کے ذریعے آئی تھی، عمر فاروق نامی شخص نے بتایا کہ آفر ہے، اگر عمران خان پانامہ لیکس کی پیروی کرنا چھوڑ دیں تو وہ بھاری رقم دینے کو تیار ہے، نواز شریف اور شہباز شریف نے ماضی میں ایک آرمی چیف کو بھی بی ایم ڈبلیو گاڑی دینے کی کوشش کی ہے، شہباز شریف کی ایک جج کے ساتھ آڈیو ٹیپ بھی منظر عام پر آ چکی ہے۔

عمران خان نے کہا کہ شہباز شریف کے الزامات ہتک عزت کے دعوے میں نہیں آتے، انہوں نے قانون کے مطابق 60 دن میں کوئی مخصوص نوٹس نہیں بھیجا، بلکہ 8 مئی 2017 کو قانونی تقاضے پورے کیے بغیر صرف لیگل نوٹس بھیجا، لہذا شہباز شریف کے دعوے کو نہ صرف جرمانے کے ساتھ خارج کیا جائے، بلکہ ان سے کونسل کی فیس بھی وصول کی جائے۔

وزیر اعظم عمران خان کی جانب سے بیرسٹر علی ظفر نے جواب جمع کراتے ہوئے کہا کہ شہباز شریف دو دہائیوں سے سیاسی مخالف ہے، ان کی جانب سے دائر کیا گیا دعوی اس عدالت کے دائرہ اختیار میں نہیں آتا، ان کا دعوی جھوٹا ،بے بنیاد اور حقائق کو مسخ کر کے دائر کیا گیا ہے، شہباز شریف کی شہرت میرے بیان کے باعث نہیں کسی اور وجہ سے متاثر ہوئی ہو گی، رشوت کی آفر کے بارے میں جیسے بتایا گیا اسی طرح ہی بیان دیا گیا، شہباز شریف بدنام کرنے کے لیے خود کئی بیانات دے چکے ہیں۔

ن لیگ ردعمل

دوسری جانب پاکستان مسلم لیگ (ن) کی ترجمان مریم اورنگزیب نے عدالت سے شہباز شریف کا ہتکِ عزت کا دعویٰ خارج کرنے کی استدعاکرنے پر وزیراعظم عمران خان سے معافی مانگنے کا مطالبہ کرتے ہوئے کہا کہ نیب نیازی گٹھ جوڑکے عدالتوں میں فیل ہونے کے بعد عمران صاحب اپنے الزامات خود واپس لے رہے ہیں، یہ ان کی سیاست کی حقیقت ہے ، پاناما میں پیسے دینے کا جھوٹ بولنے کی درخواست واپس لینے سے کام نہیں چلے گا،عدالت عمران صاحب کو ان کے جھوٹ پر سزا دے۔

مریم اورنگزیب کا کہنا تھا کہ عمران صاحب شہبازشریف اور قوم سے جھوٹ بولنے پر معافی مانگیں، درخواست واپس لینے سے آپ کوبھاگنے نہیں دیں گے، سیاسی انتقام میں آپ کے جھوٹ بولنے سے سیاسی مخالفین کی ہتک عزت ہوئی، عمران صاحب اس کا جواب دیں، عدالت اس درخواست کو منظور نہ کرے بلکہ عمران صاحب کے خلاف قانونی کارروائی کرے، ابھی تو ایک درخواست واپس لی ہے،عمران صاحب کو اپنا ہر الزام، بہتان اور جھوٹ واپس لینا پڑے گا، چار سال بعد ہتک عزت کے مقدمے میں عدالت سے درخواست واپس لینے سے آپ کو فرار نہیں ہونے دیں گے۔

مریم اورنگزیب نے کہا کہ عمران صاحب نے آخر اعتراف کرلیا کہ پاناما پر شہبازشریف نے پیسے دینے کی کوئی پیشکش نہیں کی تھی، اللہ تعالی کا شکر ہے کہ شہبازشریف کو سرخرو اور سچا ثابت کیا اور جھوٹ کا منہ ایک اور مرتبہ کالا ہوگیا، تین سال سے عمران صاحب التوا کے پیچھے چھپے رہے ، اب شہبازشریف کا دعوی خارج کرنے کی درخواست ان کا نیا پینترا ہے، دو سال سے زائد عرصے سے عمران صاحب اپنی ہی دائر کردہ درخواست کے حق میں کوئی دلائل پیش نہیں کرسکے۔

مریم اورنگزیب نے مزید کہا کہ درخواست واپس لینا واضح ثبوت ہے کہ عمران صاحب نے جھوٹ بولا تھا، عمران صاحب نے اعتراف کرلیا ہے کہ شہبازشریف نے انہیں براہ راست پیسہ دینے کی کوئی پیشکش نہیں کی تھی، اس اعتراف سے عمران صاحب کا سچائی اور ایمان داری کا لبادہ تار تار ہوچکا ہے، عمران صاحب کا سیاسی انتقام پر مبنی احتساب کا جھوٹا بیانیہ دفن ہوگیا، اب پیسے دینے کے جھوٹ سے بھی بھاگ گئے، عمران صاحب آپ ان شاءاللہ اپنا ہر جھوٹ ، بہتان اور الزام واپس لیں گے۔

وفاقی وزیر اطلاعات ونشریات فواد چودھری نے کہا ہے کہ پاکستان اور افغانستان کو اپنے مفاد کا فیصلہ خود کرنا ہوگا۔ سپر پاورز اپنی گیم کھیل کر چلی جاتی ہیں لیکن نتائج ہمیں بھگتنا پڑتے ہیں۔ ہم معاشی بہتری کے لئے خطے میں امن اور استحکام چاہتے ہیں

انہوں نے یہ بات پاک افغان یوتھ فورم کے زیر اہتمام پاک افغان میڈیا کانکلیو کے افتتاحی سیشن سے خطاب کرتے ہوئے کہی۔ ان کا کہنا تھا کہ مستحکم افغانستان کے ذریعے پورے خطے کو وسطی ایشیا اور یورپ سے ملانا وزیراعظم عمران خان کا وژن ہے، معاشی بہتری کے لئے خطے میں امن اور استحکام کے خواہاں ہیں۔

وزیر اطلاعات نے کہا کہ پاکستان اور افغانستان کے لوگ ایک دوسرے سے تاریخی رشتوں میں بندھے ہوئے ہیں۔ ہمارے تعلقات اونچ نیچ کے باوجود مستحکم ہیں۔ افغانستان اور پاکستان کے لوگ مذہبی، ثقافتی اور جغرافیائی طور پر ایک دوسرے سے تاریخی رشتوں میں بندھے ہوئے ہیں۔

ان کا کہنا تھا کہ افغانستان کے لوگ ہمارے اپنے اور ایک ہی قبائل کے لوگ ہیں، ان کے ساتھ ہماری قربت ہے، ہماری زبان اور ثقافت ایک جیسی ہے۔ افغانستان کے ساتھ ہمارے تعلقات میں تنائو بھی رہا اور محبت بھی، ہمارے تعلقات اونچ نیچ کے باوجود آج بھی مستحکم ہیں، یہی ہماری تاریخ کا حصہ ہے۔ وفاقی وزیر اطلاعات نے کہا کہ تاریخ اٹھا کر دیکھیں تو پاکستان اور افغانستان کے درمیان تنائو کی کیفیت تاریخ کا جبر تھا۔

سرکاری خبر رساں اداے اے پی پی کے مطابق انہوں نے کہا کہ روس اور امریکا نے کابل پر قبضہ کیا اور نتائج ہمیں بھگتنا پڑے۔ القاعدہ نے نیویارک میں کارروائی کی جس کے نتیجہ میں افغانستان کے اندر صورتحال خراب ہوئی، افغانستان میں امریکا کی پالیسی ناکام ہوئی تو اس کے نتائج افغانستان اور پاکستان دونوں بھگت رہے ہیں۔

وفاقی وزیر نے کہا کہ 1988ء میں جب افغانستان میں بحران ختم ہوا تو یو ایس ایس آر اور امریکا تو وہاں سے چلے گئے لیکن سارا بوجھ پاکستان اور افغانستان کے لوگوں کو برداشت کرنا پڑا۔

فواد چودھری ن نے کہا کہ ہم افغانستان کے لوگوں کے ساتھ کندھے سے کندھا ملا کر آگے بڑھے، پاکستان نے لاکھوں افغان مہاجرین کی میزبانی کی۔ پاکستان کی یونیورسٹیوں میں چھ ہزار کے قریب افغان طلبہ زیر تعلیم ہیں، آج یہ بچے خود بتا رہے ہیں کہ پاکستان نے انہیں مواقع فراہم کئے۔ اس وقت 30 لاکھ سے زیادہ افغان مہاجرین پاکستان میں موجود ہیں، ماضی میں ہم نے تقریباً 50 لاکھ سے زیادہ افغان مہاجرین کی میزبانی کی جو افغانستان کی آبادی کا ایک بڑا حصہ ہے۔

انہوں نے کہا کہ نے کہا کہ پاکستان کا فرض تھا کہ وہ اس جنگ میں افغان عوام کا ساتھ دے اور ہم نے وہی کیا۔ وفاقی وزیر اطلاعات نے کہا کہ اگر افغانستان کے حالات خراب ہوتے ہیں تو اس سے پناہ گزینوں کا ایک اور بحران پیدا ہوگا۔

ان کا کہنا تھا کہ میڈیا کے ذریعے افغانستان اور پاکستان کے لوگ اپنا نکتہ نظر پیش کر سکتے ہیں اور اس کے ذریعے قیام امن کے مقصد کو آگے بڑھایا جا سکتا ہے۔

وفاقی وزیر نے کہا کہ ہم افغانستان میں امن چاہتے ہیں، اس بارے میں ہمارا نکتہ نظر واضح ہے۔ وفاقی وزیر نے کہا کہ مستحکم افغانستان کے ذریعے پورے خطے کو وسطی ایشیا اور یورپ سے ملانا وزیراعظم عمران خان کا وژن ہے۔ ہم چاہتے ہیں کہ افغانستان میں استحکام آئے اور اس کے نتیجے میں ہم گوادر سے لے کر ازبکستان تک ریلوے ٹریک بچھا سکیں۔ اس سے وسطی ایشیا کو گوادر اور کراچی کی بندرگاہوں اور ہمیں وسطی ایشیا کی مارکیٹس تک رسائی حاصل ہوگی، یورپی یونین اور سی پیک کو آپس میں منسلک کیا جا سکے گا۔ اس کے نتیجے میں پاکستان اس خطے کا اقتصادی مرکز بن جائے گا۔ انہوں نے کہا کہ ہم بھارت کے ساتھ اچھے تعلقات چاہتے ہیں، ہمارے تعلقات بھارت سے بہتر ہوتے ہیں تو ہم دنیا کی دو بڑی معیشتوں کے درمیان ہوں گے۔

وفاقی وزیر اطلاعات نے کہا کہ افغانستان میں امن و استحکام سے تجارت کے لئے مواقع پیدا ہوں گے، یہ ایک بہت بڑا وژن ہے جس پر وزیراعظم عمران خان کام کررہے ہیں۔ وفاقی وزیر نے کہا کہ پاکستان کبھی بھی نہیں چاہے کہ افغانستان میں لڑائی ہو اور بے گناہ لوگوں کی جانیں ضائع ہوں۔

انہوں نے کہا کہ وزیراعظم عمران خان کا موقف ہے کہ ملک میں سیاسی استحکام اور امن ہوگا تو غربت کا بھی خاتمہ ہوگا، افغانستان میں کسی گروپ کے پاس یہ صلاحیت موجود نہیں کہ وہ پورے ملک پر حکمرانی کرسکے، اس لئے افغانستان میں وسیع البنیاد اور جامع حکومت کے خواہاں ہیں تاہم اس کے لئے افغان تنازعہ کے تمام فریقوں کو خلوص نیت سے کام کرنا ہو گا کیونکہ شرائط پر مذاکرات آگے نہیں بڑھ سکتے۔

انہوں نے کہا کہ امریکا اور افغان حکومت کے ساتھ طالبان کے مذاکرات میں پاکستان نے اپنا کردار ادا کیا تاہم ہمارا کردار محدود ہے، افغانستان کے مسائل افغانستان کے عوام کو خود حل کرنا ہوں گے۔

وفاقی وزیر اطلاعات نے فورم کے شرکا کو مخاطب کرتے ہوئے کہا کہ افغانستان میں مستحکم حکومت کے قیام اور دونوں ممالک کے درمیان تعلقات کی بہتری کے لئے اپنی تجاویز اور آراءدیں۔

انہوں نے کہا کہ پاکستان سمیت دنیا کے کسی حصے میں بھی سو فیصد اتفاق رائے نہیں ہوتا، ہمارا اپوزیشن کے ساتھ اختلاف ہے لیکن ہم آئین پر متفق ہیں، پوری سیاسی قیادت کو پتہ ہے کہ اس نے آئین کے تحت ہی چلنا ہے۔ یہ ایک ایسا ماڈل ہے جس کی پیروی افغانستان کر سکتا ہے لیکن اتفاق رائے افغان عوام نے کرنا ہے۔ چوہدری فواد حسین نے کہا کہ افغانستان میں استحکام بے شمار مواقع کا باعث بن سکتا ہے اور ہم اسی سمت میں کام کررہے ہیں۔ اقتصادی استحکام امن کے بغیر ممکن نہیں ہے، اس کے لئے جب امن ہو گا تو اس سے خطے میں غربت کے خاتمہ میں مدد ملے گی۔

وفاقی وزیر نے کہا کہ دو روزہ میڈیا انکلیو میں ہمیں ڈرامہ، فلم اور موسیقی کے شعبوں میں تعاون پر بات کرنی چاہئے، خوشحال خان خٹک پاکستان کے شاعر ہیں لیکن وہ افغانستان کے قومی شاعر ہیں، اسی طرح علامہ اقبال کو افغانستان کے عوام میں بہت مقبولیت حاصل ہے۔

کراچی: چیئرمین پیپلز پارٹی بلاول بھٹو کا کہنا ہے کہ یہ کیسی مدینے کی ریاست ہے کہ عمران خان کے خلاف تقریر کرلو تو نیب نوٹس بھیج دیتا ہے، سیٹ جیت لو تو قتل کا مجرم بنادیا جاتا ہے۔

چیئرمین پی پی پی بلاول بھٹو زرداری نے آزاد کشمیر میں چوہدری یاسین اور ان کے خاندان کو سیاسی انتقام کا نشانہ بنائے جانے پرمذمت کرتے ہوئے کہا کہ قاتلانہ حملہ چوہدری یاسین پر ہوا اور پولیس نے الٹا چوہدری یاسین کے خلاف ایف آئی آر درج کرلی۔ اگر میرے کارکنوں کے خلاف سیاسی انتقام کا سلسلہ بند نہ ہوا تو میں آزاد کشمیر میں خود احتجاج کی سربراہی کروں گا، عمران خان سے کشمیر میں پی پی پی کی جیت ہضم نہیں ہوئی اورانہوں نے غیرآئینی مداخلت کرکے جیالے امیدوار سے سیاسی انتقام لینا شروع کردیا۔

بلاول نے کہا کہ عمران خان نے تحصیل چڑھوئی میں دوافراد کے قتل کے افسوس ناک واقعے میں براہ راست جج بن کر پی پی پی امیدوار کو مجرم ٹہرادیا، یہ کیسی مدینے کی ریاست ہے کہ عمران خان کے خلاف تقریر کرلو تو نیب نوٹس بھیج دیتا ہے، سیٹ جیت لو توقتل کا مجرم بنادیا جاتا ہے، انصاف کا تقاضہ تھا کہ دوافراد کے قتل پرجوڈیشل انکوائری کے نتائج کا انتظار کیا جاتا۔

بلاول بھٹو زرداری نے کہا کہ برطانیہ میں مقیم پاکستانی کمیونٹی میں چوہدری یاسین کے خلاف سیاسی انتقام سے بے چینی کے اثرات دوررس ہوں گے، دو نشستوں سے کامیاب ہونے والے چوہدری یاسین سے عمران خان کا سیاسی انتقام چھوڑی جانے والی ایک نشست کو ہتھیانے کے لئے ہے، چوہدری یاسین کے گھرکے محاصرے سے لے کرچادراورچاردیواری تک کا تقدس پامال کیا گیا۔

پاکستان مسلم لیگ (ن) کی نائب صدر مریم نواز بھی کورونا وائرس کا شکار ہوگئی ہیں۔

سماجی رابطے کی ویب سائٹ ٹوئٹر پر ترجمان مسلم لیگ (ن) مریم اورنگ زیب نے کہا کہ ‘پاکستان مسلم لیگ (ن) کی نائب صدر مریم نواز شریف کا کورونا ٹیسٹ مثبت آیا ہے جس کے بعد انہوں نے خود کو قرنطینہ کر لیا ہے’۔

انہوں نے دعا کی اپیل کرتے ہوئے کہا کہ ‘مریم نواز شریف سمیت تمام مریضوں کی جلد صحت یابی کی دعا کی اپیل ہے’۔

مریم نواز نے ایک ٹوئٹ کے جواب میں کہا کہ ‘مجھے بخار، کھانسی اور نزلے کی علامات ہیں لیکن گھر میں ہی علاج ہورہا ہے’۔

انہوں نے شکریہ ادا کرتے ہوئے کہا کہ ‘دعاؤں اور نیک خواہشات بھیجوانے پر مشکور ہوں’۔

قبل ازیں مریم نواز 25 جولائی کو آزاد جموں و کشمیر میں منعقدہ عام انتخابات کی مہم میں شریک تھیں اور اپنی جماعت کے انتخابی جلسوں میں بھرپور شرکت کر رہی تھیں۔

آزاد کشمیر میں انتخابی مہم کے اختتام کے بعد انہوں نے سیالکوٹ میں پنجاب اسمبلی کے ضمنی انتخاب کے سلسلے میں بھی ایک بڑے جلسے سے خطاب کیا تھا۔

مریم نواز کا کورونا ٹیسٹ مثبت آنے کی خبر آتے ہی ٹوئٹر پر ‘گیٹ ویل سون مریم نواز’ کا ہیش ٹیگ بھی ٹاپ ٹرینڈ رہا۔

خیال رہے کہ ملک بھر میں کورونا کی چوتھی لہر کے خدشات ہیں کیونکہ گزشتہ 24 گھنٹوں کے دوران 4 ہزار 119 کیسز رپورٹ ہوئے ہیں جو 21 مئی کے بعد ایک دن میں سب سے زیادہ تعداد ہے جبکہ 21 مئی کو 4 ہزار کیسز رپورٹ ہوئے تھے۔

پاکستان میں چوتھی لہر ڈیلٹا ویریئنٹ کے باعث پھیلنے کا خیال ظاہر کیا جارہا ہے، جس کے کیسز ملک کے مختلف علاقوں میں رپورٹ ہو رہے ہیں۔

سائنس دانوں کا کہنا ہے کہ کورونا وائرس کی یہ قسم انسان کے جسم کے اندر مدافعتی نظام کو کمزور کرتا ہے اور یہ دوسروں میں تیزی سے پھیلتا ہے۔

رواں ماہ کے اوائل میں وزیراعظم عمران خان نے عوام کو خبردار کیا تھا کہ ڈیلٹا ویریئنٹ ایک بڑا خطرہ ہے اور اسی طرح کے خدشات وزیر منصوبہ بندی اسد عمر نے بھی ظاہر کیے تھے۔

اسد عمر نے کہا تھا کہ پاکستان میں کووڈ-19 کی چوتھی لہر شروع ہونے کے واضح اشارے ہیں۔

اعلیٰ سطح پر خبردار کیے جانے کے باوجود کیسز میں گزشتہ ایک ماہ میں بتدریج اضافہ ہورہا ہے۔

وزیراعظم کے معاون خصوصی برائے صحت ڈاکٹر فیصل سلطان نے 15 جولائی کو کہا تھا کہ پاکستان میں ڈیلٹا ویریئنٹ مقامی سطح پر بھی منتقل ہونا شروع ہوچکا ہے۔

پاکستان میں کورونا وائرس کا پہلا کیس فروری 2020 میں رپورٹ ہوا تھا جس کے بعد صدر مملکت اور وزیراعظم سمیت ممتاز سیاسی اور غیر سیاسی شخصیات بھی اس کا شکار ہوچکے ہیں۔

گزشتہ ہفتے سپریم کورٹ کے جسٹس قاضی فائز عیسیٰ اور ان کی اہلیہ سرینا عیسیٰ کا کورونا ٹیسٹ مثبت آگیا تھا۔

پاکستان پیپلز پارٹی (پی پی پی) کے رہنما اور سندھ کے وزیر تعلیم سعید غنی نے وزیراعظم عمران خان پر تنقید کرتے ہوئے کہا ہے کہ اسلام آباد میں بارش نے سمجھا دیا ہوگا کہ جب زیادہ بارش ہوتی ہے تو زیادہ پانی آتا ہے۔

سماجی رابطے کی ویب سائٹ ٹوئٹر پر بیان میں سعید غنی نے کہا کہ ‘اسلام آباد میں ہونے والی بارش نے یقیناً وزیراعظم عمران نیازی کو سمجھا دیا ہوگا کہ جب زیادہ بارش ہوتی ہے تو زیادہ پانی آتا ہے’۔

انہوں نے کہا کہ ‘اللہ بارش کو ہمارے لیے رحمت بنائے اور ہمارے ملک کو اس کے نقصانات سے محفوظ رکھے’۔

خیال رہے کہ وفاقی دارالحکومت اسلام آباد اور جڑواں شہر راولپنڈی میں موسلا دھار بارشوں کے باعث سڑکیں اور نشیبی علاقے زیر آب آگئے جبکہ گھروں میں پانی داخل ہونے سے 2 افراد جاں بحق ہوگئے۔

موسلادھار بارش سے سب سے زیادہ اسلام آباد کا علاقہ سیکٹر ای-11 متاثر ہوا جہاں پانی گھروں میں داخل ہوگیا جبکہ پانی کے ریلے میں بہہ کر درجنوں گاڑیوں کو بھی نقصان پہنچا۔

پولیس حکام کے مطابق سیکٹر ای-11 ہاؤسنگ سوسائٹیز پر مشتمل سیکٹر ہے اور یہاں پولیس فاؤنڈیشن کے پیٹرن انچیف سیکریٹری داخلہ خود ہیں، جہاں سوسائٹی انتظامیہ کی ناقص کارکردگی کے باعث سیلابی صورتحال پیدا ہوئی۔

حکام کا کہنا تھا کہ سیکٹر ای-11 کے ایک گھر کی بیسمنٹ میں رہائش پذیر خاندان سے تعلق رکھنے والے ماں اور بیٹا پانی بھر جانے کے باعث جاں بحق ہوگئے۔

یاد رہے کہ وزیراعظم عمران خان نے 2019 میں کراچی سمیت پورے سندھ میں بارشوں کے باعث ہونے والے نقصانات کے بعد پی پی پی کے چیئرمین بلاول بھٹو کے اس بیان کا مذاق اڑایا تھا کہ ‘زیادہ بارش ہوتی ہے تو زیادہ پانی آتا ہے’۔

وزیر اعظم کا کہنا تھا کہ ‘بلاول زرداری نے جو تھیوری دی ہے اس پر آئن اسٹائن کی روح بھی تڑپ رہی ہے کہ جب بارش ہوتی ہے تو پانی آتا ہے اور زیادہ بارش ہوتی ہے تو زیادہ پانی آتا ہے’۔

وزیراعظم عمران خان سے سعودی عرب کے وزیرخارجہ فیصل بن فرحان نے ملاقات کی جہاں دوطرفہ تعلقات مزید بہتر بنانے کے لیے نئے مواقع تلاش کرنے پر زور دیا گیا۔

وزیراعظم آفس سے جاری بیان کے مطابق سعودی عرب کے وزیر خارجہ پرنس فیصل بن فرحان السعود نے وزیراعظم عمران خان سے ملاقات کی اور وزیراعظم نے ان کا پرتپاک استقبال کیا۔

بیان میں کہا گیا کہ وزیراعظم نے پاکستان اور سعودی عرب کے درمیان گہری بنیاد پر قائم اور تاریخی تعلقات کا اعادہ کیا۔

وزیراعظم عمران خان نے اس موقع پر خادمین حرمین الشریفین شاہ سلمان اور ولی عہد محمد بن سلمان کے لیے نیک خواہشات کا اظہار کیا۔

بیان کے مطابق اس موقع پر وزیراعظم عمران خان نے مئی 2021 میں سعودی عرب کے اپنے دورے کا ذکر کیا اور اس وقت کیے گئے فیصلوں کی روشنی میں انہوں نے مختلف شعبوں میں تعلقات کو مزید بہتر بنانے کے لیے نئی راہیں تلاش کرنے کی ضرورت پر پر زور دیا۔

بیان کے مطابق وزیراعظم نے تعلقات کے معاشی پہلو کو مضبوط بنانے اور تجارت، سرمایہ کاری اور توانائی کے شعبوں میں پائے جانے والے وسیع مواقع کے لیے اقدامات کی ضرورت کو اجاگر کیا۔

فیصل بن فرحان سے ملاقات میں انہوں نے سعودی-پاکستان سپریم کوآرڈینیشن کونسل (ایس پی ایس سی سی) کی فعالیت سے متعلق کام کو سراہا، جو پاک-سعودی تعلقات اسٹریٹجک سمت میں ڈھالنے کے لیے سب سے بڑا پلیٹ فارم ہے۔

اس موقع پر وزیراعظم نے دونوں ممالک میں ترقی اور بہتری کے لیے سعودی عرب میں پاکستانی برادری کے اہم کردار کی تعریف کی اور عوامی سطح پر رابطوں سے دوطرفہ تعاون کے لیے ٹھوس بنیادیں فراہم ہوتی ہیں۔

پاکستانیوں کوکووڈ کے باعث پیش آنے والی مشکلات کی نشاندہی کرتے ہوئے انہوں نے ان کی وقت پر سعودی عرب واپسی کے لیے بروقت اقدامات کی اہمیت پر بھی زور دیا۔

انہوں نے سعودی عرب میں رہنے والے پاکستانیوں کو کووڈ ویکسین کی فراہمی پر شکریہ ادا کیا، دونوں ممالک اور جنوبی ایشیا میں کووڈ کی صورت حال بھی زیر بحث آئی۔

وزیراعظم نے افغانستان کی صورت حال پر افغان فریقین کو سیاسی حل کے لیے تعمیری اور بامقصد مذاکرات کی ضرورت کو اجاگر کیا جو خطے میں امن و استحکام کے لیے انتہائی اہم ہے۔

فیصل بن فرحان نے وزیراعظم کی جانب سے سعودی وفد کے پرتپاک استقبال پر شکریہ ادا کرتے ہوئے پاکستان کے ساتھ سعودی عرب کے بھائی چارے کی بنیاد پر قائم مضبوط تعلقات کو بھی نمایاں کیا۔

انہوں نے وزیراعظم عمران خان اور سعودی ولی عہد کی جانب سے اسٹریٹجک پہلو پر تشکیل دیے گئے دو طرفہ تعلقات کو مزید مضبوط بنانے کے لیے تمام ممکنہ اقدامات کرنے کا اعادہ کیا۔

وزیراعظم کے دفتر سے جاری بیان میں کہا گیا کہ پاکستان اور سعودی عرب قریبی برادرانہ تعلقات رکھتے ہیں، سعودی عرب اسلامی تعاون تنظیم (او آئی سی) کے مقبوضہ جموں و کشمیر پر رابطہ گروپ کا رکن ہے اور مسئلہ کشمیر پر تعاون کرتا ہے۔

خیال رہے کہ سعودی وزیر خارجہ شہزادہ فیصل بن فرحان السعود ایک روزہ دورے پر پاکستان پہنچے تھے اور نور خان ایئر بیس پر وزارت خارجہ کے اعلیٰ حکام نے ان کا استقبال کیا تھا جس کے بعد دفتر خارجہ میں وزیر خارجہ شاہ محمود قریشی سےملاقات کی اور دوطرفہ تعلقات کے تمام پہلوؤں، علاقائی اور بین الاقوامی امور پر تبادلہ خیال کیا گیا۔

ملاقات کے بعد دونوں وزرائے خارجہ نے مشترکہ نیوز کانفرنس کی اور سعودی وزیر خارجہ نے کہا کہ انہیں اُمید ہے کہ کونسل، پاکستان اور سعودی عرب کے تعلقات کو نئی سطح پر لے جانے، انہیں ادارہ جاتی بنانے اور تمام مواقع کی تلاش میں سنگِ میل ثابت ہوگی۔

انہوں نے کہا کہ پاکستان اور سعودی عرب نے ماضی میں بھی متعدد شعبوں میں مل کر کام کیا ہے لیکن انہیں یقین ہے کہ کونسل دونوں ممالک کے درمیان باہمی اشتراک کے فروغ کے لیے زیادہ مؤثر ثابت ہوگی۔

وزیر خارجہ شاہ محمود قریشی نے ملاقات سے آگاہ کرتے ہوئے کہا کہ ہم نے اپنے باہمی تعلقات کا جامع جائزہ لیا اور جس طرح معاملات چل رہے ہیں ہم اس کے ساتھ مطمئن ہیں۔

انہوں نے کہا کہ ہم نے اس بات پر توجہ دی کہ ہم کس طرح اپنے معاشی روابط کو فروغ دیں، 20 لاکھ سے زائد پاکستانی سعودی عرب کی سماجی ترقی میں اپنا کردار ادا کررہے ہیں لیکن ہم باہمی تجارت اور سرمایہ کاری کے فروغ سے مزید معاشی رابطے کس طرح بناسکتے ہیں۔

ان کا کہنا تھا کہ اس کے لیے قیادت نے بڑے فیصلے کیے ہیں اور ہمیں اس پر عملدرآمد کی ذمہ داری دی، جو سعودی-پاکستان اعلیٰ مشاورتی کونسل کا قیام اور اس کی فعالیت ہے۔