Category سیاست

اسلام آباد: وزیراعظم عمران خان نے مونس الہٰی کو وفاقی وزیر بنانے کا فیصلہ کرلیا ہے۔

ذرائع کے مطابق وزیراعظم نے حکومتی اتحادی جماعت مسلم لیگ(ق) کے رکن قومی اسمبلی اور پرویزالہیٰ کے صاحبزادے مونس الہٰی کو وفاقی وزیر برائے آبی وسائل بنانے کا فیصلہ کیا ہے۔

واضح رہے کہ کابینہ میں مسلم لیگ(ق) کے طارق بشیر چیمہ بھی وفاقی وزیر برائے ہاؤسنگ و تعمیرات ہیں۔

قومی اسمبلی کے اسپیکر اسد قیصر نے سیکیورٹی کی صورت حال کے پیش نظر پارلیمنٹ ہاؤس میں مہمانوں، اراکین اسمبلی کے عملے اور مسلح گارڈز کے داخلے پر پابندی عائد کردی۔

قومی اسمبلی کے سیکریٹریٹ کی جانب سے جاری بیان کے مطابق وفاقی دارالحکومت میں سیکیورٹی کے حالیہ معاملات کے پیش نظر پارلیمنٹ ہاؤس کی حساسیت کو دیکھتے ہوئے اراکین اسمبلی کی سیکیورٹی یقینی بنانے کے لیے اہم اقدامات کیے گئے ہیں۔

اعلامیے کے مطابق پارلیمنٹ ہاؤس کے احاطے میں کوئی مہمان یا اراکین کے ذاتی عملے اور کسی گارڈ یا کسی قسم کے اسلحے کی اجازت نہیں ہوگی۔

قومی اسمبلی سیکرٹریٹ نے اراکین اسمبلی سے تعاون کرنے کی اپیل کرتے ہوئے کہا ہے کہ موجودہ اقدامات سیکیورٹی کی صورت حال کے پیش نظر کیے گئے ہیں۔

خیال رہے کہ گزشتہ روز پارلیمنٹ ہاؤس کے باہر سے مسلح شخص کو گرفتار کر لیا گیا تھا جو اسلحہ لہراتے ہوئے خوف کی علامت بن گیا تھا۔

ٹیلی ویژن فوٹیج میں ایک مضطرب شخص کو مرکزی سڑک پر چلتے دیکھا گیا، جس کے ایک ہاتھ میں پستول اور دوسرے ہاتھ میں بظاہر چاقو تھا، جبکہ متعدد سیکیورٹی اہلکار اس کے اطراف موجود تھے۔

پولیس نے مسلح شخص کو گرفتار کر کے اس سے پستول برآمد کر لیا تھا اور سیکریٹریٹ تھانے منتقل کردیا گیا تھا۔

پولیس کے مطابق اسلحہ لہرانے والے شخص کی شناخت ملک سہیل کے نام سے ہوئی جس کی عمر 45 سال اور وہ چکری، اسلام آباد کا رہائشی ہے۔

پولیس نے کہا تھا کہ ملزم کا بظاہر دماغی توازن خراب ہے اور اس کا ریکارڈ چیک کیا جارہا ہے۔

پارلیمنٹ ہاؤس کے باہر اسی طرح کا واقعہ 2020 میں بھی پیش آیا تھا۔

پولیس نے اگست 2020 میں پارلیمنٹ ہاؤس کے باہر فائرنگ کرنے والے شخص کو گرفتار کرکے نامعلوم مقام پر منتقل کیا تھا۔

ملزم نے 8 سے 10 فائر کیے تھے اور پولیس نے اس سے پستول بھی برآمد کیا تھا۔

آزاد کشمیر کے چیف الیکش کمشنر نے انتخابی مہم کے دوران وفاقی وزیر علی امین گنڈاپور کی جانب سے رقم کی تقسیم کےمعاملے پر آر او کی رپورٹ مسترد کردیا۔

ذرائع کے مطابق چیف الیکشن کمشنر آزاد کشمیر نے اس حوالے سے ریٹرننگ افسر کی رپورٹ کو مسترد کرتے ہوئے علی امین گنڈا پور کے خلاف مقدمہ درج کرنے کا حکم دیا ہے۔

واضح رہےکہ آزاد کشمیر کی انتخابی مہم میں جلسے کے دوران علی امین گنڈاپور کی ویڈیو سامنے آئی تھی جس میں وہ پیسے تقسیم کررہے تھے۔

وفاقی وزیر امور کشمیر امین گنڈا پور کی رقم تقسیم کرنے کی ویڈیو کے معاملے پر آزاد کشمیر کے چیف الیکشن کمشنر نے وزیراعظم عمران خان کو خط لکھا تھا۔

خط میں کہا گیا تھاکہ وفاقی وزرا کوالیکشن کوڈ آف کنڈکٹ 2021 کی خلاف ورزی سے روکا جائے اور صوبائی وزرا کو بھی الیکشن کوڈ آف کنڈکٹ پر پابندی کی ہدایت کریں۔

اسلام آباد: پی ٹی آئی حکومت نے اپنی یو ٹرن کی روایت کو برقرار رکھتے ہوئے اب اپنے ہی منظور کردہ انتخابی اصلاحات ترمیمی بل 2021 میں نئی ترامیم کا فیصلہ کیا ہے۔

تفصیلات کے مطابق قومی اسمبلی سے منظور کرائے گئے انتخابی اصلاحات ترمیمی بل 2021 پر وزارت قانون سے مشاورت ہی نہیں کی گئی تھی ، اس کے علاوہ انتخابی ترمیمی بل میں وفاقی وزیر قانون فروغ نسیم کو بھی مشاورت کا حصہ نہیں بنایا گیا تھا، جس کے بعد اب حکومت نے اپنے ہی منظور کردہ انتخابی اصلاحات ترمیمی بل 2021 میں نئی ترامیم لانے کا فیصلہ کیا ہے۔

ذرائع کا کہنا ہے کہ وزیراعظم آفس میں انتخابی اصلاحات ترمیمی بل 2021 پر الیکشن کمیشن اور اپوزیشن کے اعتراضات کا تفصیلی جائزہ لیا گیا، وزیراعظم نے وزارت پارلیمانی امور کو وزیر قانون و آئینی ماہرین سے مشاورت کی ہدایات جاری کردیں ہیں، انتخابی اصلاحات کے ترمیمی بل میں قانونی سقم دور کرنے کے لیے وزیر قانون کوخط ارسال کردیا گیا ہے، وزیراعظم کی ہدایات پر وزارت قانون نے کام بھی شروع کردیا ہے، انتخابی اصلاحات کے ترمیمی بل پرعید الاضحیٰ کے بعد بڑی پارلیمانی بیٹھک ہوگی۔

سپریم جوڈیشل کونسل کے اجلاس میں چیئرمین قومی احتساب بیورو(نیب) جسٹس ریٹائرڈ جاوید اقبال کے خلاف شکایت قابل سماعت ہونے سے متعلق اٹارنی جنرل نے جواب داخل کرنےکے لیے مہلت کی استدعا کردی۔

سپریم جوڈیشل کونسل کا اجلاس چیف جسٹس پاکستان کی سربراہی میں سپریم کورٹ بلڈنگ میں ہوا۔

اجلاس میں اٹارنی جنرل نے چیئرمین نیب جاوید اقبال کے خلاف سپریم جوڈیشل کونسل میں شکایت کےقابل سماعت ہونےسے متعلق ابتدائی دلائل دیے۔

اٹارنی جنرل نے وفاقی حکومت سے ہدایات لےکرجواب داخل کرنےکے لیے مہلت کی استدعا کی جس کے بعد سپریم جوڈیشل کونسل کا اجلاس غیر معینہ مدت کے لیے ملتوی کردیا گیا۔

ایوان بالا سینیٹ میں دوران حراست تشدد اور موت کے انسداد اور سزا کا بل 2021 منظور کر لیا گیا۔

بل پاکستان پیپلز پارٹی کی سینیٹر شیری رحمٰن نے پیش کیا اور وزیر انسانی حقوق شیریں مزاری نے اس کی حمایت کرتے ہوئے کہا کہ تشدد میں ملوث کسی بھی سرکاری ملازم کو 10 سال تک قید اور 20 لاکھ روپے تک جرمانے کی سزا کا سامنا کرنا پڑے گا۔

اگر کوئی سرکاری ملازم جس کا فرض تشدد کو روکنا ہے، اگر وہ جان بوجھ کر یا غفلت برتتے ہوئے اس کی روک تھام میں ناکام رہتا ہے تو اسے 5سال قید اور ایک لاکھ روپے تک جرمانے کا سامنا کرنا پڑے گا۔

اس حوالے سے مزید کہا گیا کہ جو بھی شخص دوران حراست موت یا جنسی تشدد کے جرم کا ارتکاب یا اس کی سازش کرے گا تو اسے عمر قید اور 30لاکھ روپے تک جرمانے کی سزا ہوسکتی ہے۔

مزید براں اگر کوئی سرکاری ملازم جس کا دوران حراست اموات یا جنسی تشدد کی روک تھام ہے، اگر وہ جان بوجھ کر یا غفلت کے نتیجے میں ایسا کرنے میں ناکام رہتے ہیں تو انہیں کم از کم 7سال قید اور 10لاکھ روپے تک جرمانے کی سزا کا سامنا کرنا پڑ سکتا ہے۔

بل کے مطابق جرمانہ مقتول یا ان کے قانونی ورثا کو ادا کیا جائے گا، اگر جرمانہ ادا نہیں کیا گیا تو جرم کا ارتکاب کرنے والے سرکاری ملازم کو بالترتیب تین اور پانچ سال تک اضافی قید کا سامنا کرنا پڑے گا۔

حراست کے بارے میں بل میں کہا گیا ہے کہ کسی کو بھی کسی بھی جرم میں “کسی ملزم کے ٹھکانے یا ثبوت کے بارے میں معلومات حاصل کرنے کے لیے کسی کو تحویل میں نہیں لیا جاسکتا جبکہ خواتین کو صرف ایک خاتون اہلکار کے ذریعے تحویل میں لیا جاسکتا ہے۔

بیان میں کہا گیا ہے کہ تشدد کے ذریعے اقبال جرم عدالت میں ناقابل قبول ہو گا۔

دوران حراست تشدد اور موت(روک تھام اور سزا) کے بل 2021 میں کہا گیا کہ اس ایکٹ کے تحت دی گئی سزا ناقابل معافی اور ناقابل ضمانت تصور کی جائے گی۔

اس بل میں دوران حراست تشدد کی صورت میں شکایت کے اندراج کا طریقہ کار بھی بتایا گیا ہے، عدالت موصولہ شکایت کے نتیجے میں درخواست گزار کا بیان ریکارڈ کرے گی اور ہدایت دے گی کہ طبی اور نفسیاتی معائنہ کیا جائے اور اس معائنے کے نتائج 24 گھنٹوں میں عدالت میں پیش کرنا ہوں گے۔

اگر شواہد مل گئے کہ ہوسکتا ہے کہ تشدد ہوا ہے تو متعلقہ عدالت اس معاملے کو مزید کارروائی کے لیے سیشن کورٹ کے پاس بھیجے گی، سیشن کورٹ تحقیقات کی ہدایت کرتے ہوئے 15 دن میں رپورٹ طلب کرے گی، بل میں کہا گیا کہ سیشن کورٹ روزانہ کی بنیاد پر شکایت کی سماعت کرے گی اور 60 دن میں فیصلہ سنائے گی۔

بل کی منظوری پر اظہار خیال کرتے ہوئے سینیٹر شیری رحمٰن نے کہا کہ پاکستان آخر کار تشدد کو جرم قرار دینے کے راستے پر گامزن ہے۔

انہوں نے کہا کہ وہ بل کی منظوری پر بہت خوش ہیں اور اس بل کے لیے تعاون کرنے پر تمام سینیٹرز، وفاقی وزیر انسانی حقوق اور سینیٹ کمیٹی برائے انسانی حقوق کے سابق چیئرمین مصطفیٰ نواز کھوکھر کا بھی شکریہ ادا کیا۔

سی پیک اتھارٹی
اس سے قبل پاکستان پیپلز پارٹی کے کے سینیٹر میاں رضا ربانی نے پاک چین اقتصادی راہداری(سی پیک) بل 2021 پیش کیا جسے سینیٹ کے چیئرمین صادق سنجرانی نے پارلیمنٹ کے ایوان بالا کی ذیلی کمیٹی کے پاس بھیج دیا۔

اس بل میں متعدد ترامیم کی تجویز پیش کی گئی ہے جس میں سی پیک اتھارٹی کی انتظامیہ کو بورڈ آف ڈائریکٹرز کے کنٹرول میں دینا بھی شامل ہے، ترمیمی بل کے مطابق وفاقی حکومت اتھارٹی کو پالیسی ہدایت جاری کرے گی جس پر عمل کرنا ہوگا۔

رضا ربانی نے بل کی تفصیلات بتاتے ہوئے کہا کہ اس سے قبل سی پیک اتھارٹی پر تمام کنٹرول چیف ایگزیکٹو آفیسر کا ہوتا تھا لیکن اگر اس بل کو منظوری مل جاتی ہے تو کنٹرول چیف ایگزیکٹو آفیسر کے بجائے بورڈ آف ڈائریکٹرز کے پاس ہو گا جس میں صوبوں کے نمائندے بھی شامل ہوں گے۔

تاہم اس بل کی حکومت کی جانب سے مخالفت کی گئی وزیر مملکت برائے پارلیمانی امور علی محمد خان نے کہا کہ رضا ربانی جتنی ترامیم لیکر آ رہے ہیں، ایسا نہ ہو کہ سی پیک کو پیک کر دیا جائے۔

آرڈیننس
سینیٹر ربانی نے آرڈیننس کے اجرا سے متعلق آئینی (ترمیمی) بل 2021 بھی پیش کیا۔

اس بل کی مخالفت کرتے ہوئے علی محمد خان نے کہا کہ ملک کے صدر کے پاس آرڈیننس جاری کرنے کا اختیار ہے، ہمیں صدر پر اعتماد کرنا چاہیے، اگر صدر کو لگتا ہے کہ اس کی ضرورت ہے تو وہ ایک آرڈیننس جاری کر سکتے ہیں۔

انہوں نے نوٹ کیا کہ آرڈیننس کو پارلیمان منظور نہ کرے تو وہ ختم ہوجاتا ہے، اس طرح آئین پر قدغن کو سپورٹ نہیں کر سکتے۔

رضا ربانی نے کہا کہ صدر سے متعلق اگر پنڈورا باکس نہ کھولتے تو بہتر ہوتا، صدر مملکت پارلیمان سے بالادست نہیں، وجہ بتائیں کہ صدر مملکت قانون سازی کے لیے پارلیمان کے اختیار کیوں استعمال کر رہے ہیں۔

انہوں نے اپنی گفتگو جاری رکھتے ہوئے کہا کہ یہ وہی صدر ہیں جنہوں نے قاضی فائز عیسیٰ کے خلاف ریفرنس بھیجا، یہ وہی صدر ہیں جنہوں نے سینیٹ انتخابات خفیہ یا اوپن بیلٹ پیپر سے متعلق ریفرنس بھیجا، شکر کریں کہ صدر مملکت کے خلاف مواخذے کی قرارداد نہیں لائے صرف وجہ پوچھی جا رہی ہے۔

رضا ربانی کی جانب سے بل پیش کرنے کی اجازت طلب کرنے پر ایوان میں ووٹنگ ہوئی جس میں بل پیش کرنے کے حق میں 37 جبکہ مخالفت میں 33 ووٹ آئے۔

رضا ربانی نے آرڈیننس سے متعلق بل ایوان میں پیش کردیا جسے چیئرمین سینیٹ نے متعلقہ کمیٹی کے سپرد کردیا۔

سلیم مانڈوی والا نے سول ایوی ایشن (ترمیمی) بل 2021 کو پیش کیا جس کے تحت پائلٹوں کو پروازوں کے دوران روزہ نہ رکھنے کی ہدایت کی جائے گی، چیئرمین نے مانڈوی والا کو ہدایت کی کہ وہ بل میں ترمیم کے بعد اسے دوبارہ پارلیمنٹ میں پیش کریں۔

مسلم لیگ (ن) کی نائب صدر مریم نواز نے کہا ہے کہ ملک کے اداروں کو بھی نواز شریف کے بیانیے پر چلنا ہوگا اور وہ وقت دور نہیں جب سب وہی کہیں گے جو نواز شریف کہہ رہے ہیں۔

آزاد کشمیر کی وادی لیپا میں انتخابی جلسے سے خطاب کرتے ہوئے مریم نواز نے کہا کہ آپ کا جذبہ بتا رہا ہے کہ کشمیر میں پھر شیر آ رہا ہے، عمران خان کشمیر آکر اپنا وقت ضائع نہ کریں کیونکہ کشمیر نے اپنا فیصلہ سنا دیا ہے۔

انہوں نے کہا کہ کشمیر کے باسیوں کا رزق وفاق کے ہاتھ میں نہیں بلکہ اللہ کے ہاتھ میں ہے، اگر آپ کو بجٹ ملتا ہے تو وہ کوئی بھیک نہیں ہے بلکہ کشمیریوں کا حق ہے، کشمیریوں سے کوئی ان کا حق چھین لے اور نواز شریف اور مریم نواز بیٹھ کر دیکھتے رہیں یہ نہیں ہو سکتا۔

ان کا کہنا تھا کہ میں یہاں ووٹ لینے نہیں آئی بلکہ کشمیر کا ایک ایک حصہ دیکھنے کو ملا، مجھے کئی مقامات پر فوجی جوان نظر آئے اور انہوں نے مجھے سیلوٹ کیا تو مجھے ایک تعلق کا احساس ہوا۔

مریم نواز نے کہا کہ کئی لوگ اپنے ذاتی مفاد کے لیے نواز شریف کے خلاف منفی پروپیگنڈا کرتے ہیں کہ شاید نواز شریف فوج کے خلاف ہیں، تو انہیں شرم آنی چاہیے، فوج کا بجٹ اور فوجی جوانوں کی تنخواہ آخری مرتبہ مسلم لیگ (ن) کے دور میں بڑھی۔

انہوں نے کہا کہ نواز شریف اس دھرتی کا بیٹا ہے اور سابق وزیر اعظم نے جن پر تنقید کی اس کو کسی ادارے پر تنقید کا نام نہ دیا جائے، اس لیے ان لوگوں نے جو کام کیا اس کا نقصان نہ صرف پاکستان اور کشمیر کو ہوا بلکہ ادارے بھی متاثر ہوئے۔

مریم نواز نے کہا کہ ’اداروں کو بھی نواز شریف کے بیانیے پر چلنا ہوگا اور وہ وقت دور نہیں جب سب وہی کہیں گے جو نواز شریف کہہ رہے ہیں‘۔

نائب صدر مسلم لیگ (ن) نے کہا کہ ایک ایسی سیاسی جماعت ہے جو آر ٹی ایس کے ذریعے دھاندلی کرتی ہے بلکہ الیکشن کمیشن کا عملہ ہی اٹھا کر لے جاتی ہیں۔

انہوں نے کہا کہ عمران خان نے 3 برس میں پاکستان کی ترقی کو ریورس گیئر لگا دیا ہے اور اب کشمیر میں ترقی کو ریوس گیئر لگانے کے لیے یہاں آرہا ہے، عمران خان سے پوچھنا کہ کیا تم فاروق حیدر کی ترقی کو بھی پیچھے دھکیلنے آئے ہو، کیا تم چینی، آٹا چھیننے آرہے ہو، کیا کشمیریوں کو بھی قطاروں میں کھڑا کرنے آرہے ہو۔

مریم نواز نے عدالتوں کا فیصلے کا تذکرہ کرتے ہوئے کہا کہ ’نواز شریف، شہباز شریف، شاہد خاقان عباسی، حمزہ شہباز، خواجہ سعد رفیق، مفتاح اسمٰعیل پر کرپشن کا کوئی الزام نہیں ہے، ان کا کرپشن کا بیانیہ زمین پر منہ کے بل پڑا ہے‘۔

اسلام آباد: وزیر داخلہ شیخ رشید کا کہنا ہے کہ مریم نواز کے اندر دھرنا دینے کے لیے خواہش تڑپ رہی ہے۔

اسلام آباد میں پریس کانفرنس کے دوران وزیر داخلہ شیخ رشید کا کہنا تھا کہ مریم نواز اور بلاول بھٹو نے ابھی سے شور مچانا شروع کردیا، یہ دونوں سمجھتے ہیں کہ آزاد کشمیر میں یہ مقبول ہیں، آزاد کشمیر میں آج بھی عمران خان ہی مقبول ہیں اور ان کی حکومت ہوگی، اپوزیشن آزاد کشمیر میں ہارنے جارہی ہے جب کہ مریم نواز کے اندر دھرنا دینے کے لیے خواہش تڑپ رہی ہے لہذا مریم نواز اور اپوزیشن دھرنے کی تیاری جاری رکھیں۔

وزیر داخلہ نے کہا کہ آزاد کشمیر میں رینجرز اور ایف سی کے 7 ہزار 200 جوان تعینات کیے جائیں گے، اس کے علاوہ پاک فوج بھی ضرورت پڑنے پر تیار ہوگی تاہم پولنگ دفتر میں فوج تعینات نہیں کی جارہی۔ ان کا کہنا تھا سول اداروں کے ساتھ آرمی بھی فری اور فیئر الیکشن کرانے میں کردار ادا کرے گی جب کہ ہم سب کہتے ہیں الیکشن میں فوج نہ ہو لیکن اگر فوج پولنگ اسٹیشن کے باہر کھڑی نہ ہو تو ہارنے والے ایجنٹ ڈبے اٹھا کرلے جائیں گے۔

شیخ رشید نے کہا کہ پاکستان خطے میں امن کا خواہشمند ہے تاہم بھارت نے ہمیشہ پاکستان کو نقصان پہنچانے کی کوشش کی ہے، فیٹف میں بھی بھارت نے پاکستان کے لیے مسائل پیدا کیے، بھارت کے لوگ پکڑے گئے ہیں جو ملک میں انتشار پھیلانا چاہتے تھے تاہم پاک فوج اور اداروں نے بھارت کی سازشوں کو ناکام بنایا۔

وزیر داخلہ کا کہنا تھا کہ جعلی شناختی کارڈ بنانے والوں کے خلاف کارروائی ہوگی تاہم کراچی میں 40 لاکھ لوگوں کے غلط شناختی کارڈ بننے کی بات غلط ہے، اس کے علاوہ ایف آئی اے کراچی سے انتالیس لوگوں کو معطل کیا گیا ہے جب کہ ایف آئی اے میں 15،15 سال سے تعینات ملازمین کو ٹرانسفر کررہے ہیں۔

وفاقی وزیر داخلہ نے کہا کہ کسی کی ای سی ایل سے نام نکالنے کی درخواست نہیں آئی، مریم نواز اور شہبازشریف کی جانب سے بھی ای سی ایل سے نام نکالنے کی درخواست نہیں آئی جب کہ ٹی ایل پی کے مستقبل کا فیصلہ وفاقی کابینہ کرے گی۔

شیخ رشید کا کہنا تھا کہ افغانستان سے متعلق پالیسی وزارت داخلہ بتا سکتاہے تاہم 70 افغانیوں کو علاج کے لیے پاکستان آنے کی اجازت دی ہے، یہ وہ افغانی ہیں جن کا وہاں پر علاج ممکن نہیں۔

وفاقی وزیر داخلہ نے عید الاضحیٰ کی چھٹیوں سے متعلق کہا کہ 20 جولائی سے عید کی چھٹیاں کرنے کی سمری وزیراعظم کو بھیجی ہے۔

شیخ رشید کا کہنا تھا کہ راولپنڈی اور اسلام آباد میں کورونا بڑھ رہاہے، اسی لیے بعض علاقوں میں لاک ڈاؤن نافذ کرنے جارہے ہیں جب کہ طورخم بارڈر پر منفی رپورٹ والوں کو داخلے کی اجازت دے دی گئی ہے۔

وفاقی وزیر اطلاعات و نشریات فواد چوہدری نے اپوزیشن جماعتوں کی آزاد کشمیر میں جاری انتخابی مہم پر تنقید کرتے ہوئے کہا کہ بلاول بھٹو زرداری میدان سے بھاگ گئے ہیں اور بہت جلد مریم نواز بھی راہ فرار اختیار کریں گی۔

اسلام آباد میں وفاقی وزرا فواد چوہدری، حماد اظہر اور معاون خصوصی شہزاد اکبر میں پریس کانفرنس میں افغان امور، ملک میں توانائی کے مسائل سمیت دیگر معاملات سے آگاہ کیا۔

فواد چوہدری نے کہا کہ ہم افغانستان کے معاملات کو قریب سے دیکھ رہے ہیں اور وزیرخارجہ وسطی ایشیائی ممالک کے دورے پر ہیں وہاں بھی اس حوالے سے بات ہوگی۔

ان کا کہنا تھا کہ اس وقت دنیا پوری دنیا افغانستان کے اندر امن کے لیے پاکستان کی کوششوں کو سراہتی ہے، امریکا کے اسٹیٹ ڈپارٹمنٹ نے اپنے بیان میں پاکستان کی کوششوں کی تعریف کی۔

انہوں نے کہا کہ اس وقت چاہے امریکا ہو، چاہے روس ہو یا پھر چین ہو تمام ممالک پاکستان کی امن کوششوں کی تعریف کر رہے ہیں۔

فواد چوہدری نے کہا کہ وزیراعظم عمران خان نے پالیسی بیان دیا تھا کہ امن کے حصے دار ہوں گے لیکن تنازع میں شراکت دار نہیں ہوں گے، اسی اصول کو ہماری پارلیمانی پارٹی نے قومی سلامتی کمیٹی کے اجلاس میں پیش کیا، جس کو تمام سیاسی جماعتوں نے اسی موقف کی حمایت کی۔

انہوں نے کہا کہ ہماری افغان پالیسی بڑی واضح ہے اور ہم اسی طرف بڑھ رہے ہیں۔

ان کا کہنا تھا کہ آزاد کشمیر میں انتخابی مہم چل رہی ہے اور پاکستان تحریک انصاف (پی ٹی آئی) کی حکومت کی پوزیشن مستحکم ہے، پی ٹی آئی وہ واحد جماعت ہے جو آزاد کشمیر کے پورے حلقوں میں امیدوار کھڑی کر سکی ہے، کوئی اور جماعت تمام حلقوں میں امیدوار کھڑی نہیں کر سکی ہے۔

وفاقی وزیر اطلاعات و نشریات کا کہنا تھا کہ پاکستان پیپلزپارٹی (پی پی پی) کے چیئرمین بلاول بھٹو زرداری اسی لیے وہاں سے میدان چھوڑ کر بھاگ گئے کہ ان کو پتہ چلا کہ وہاں پر ان کے امیدوار ہی نہیں ہیں اور مجموعی طور پر 8 امیدوار ہیں۔

انہوں نے کہا کہ اسی وجہ سے بلاول بھٹو زرداری کو ناکامی کا سامنا کرنا پڑا اور وہ اپنی مہم ادھوری چھوڑ کر بھاگ گیا۔

پاکستان مسلم لیگ (ن) کی نائب صدر مریم نواز پر تنقید کرتے ہوئے انہوں نے کہا کہ دوسری طرف مریم نواز مہم چلا رہی ہیں، ان کے پاس بھی کوئی پالیسی نہیں ہے اور انہیں کشمیر کی تاریخ کا علم نہیں ہے۔

انہوں نے کہا کہ مریم نواز کو علم نہیں ہے کہ کشمیر پر پاکستان اور بھارت کے تعلقات کتنی دفعہ کروٹیں بدل چکے ہیں، ان کو یہ بھی علم نہیں ہے کہ کشمیریوں کے لیے پاکستان نے کتنی قربانیاں دی ہیں۔

ان کا کہنا تھا کہ مریم نواز وہاں جو پرچار کر رہی ہیں، اس کا نہ کوئی سر ہے اور نہ پیر ہے، اسی لیے پاکستان مسلم لیگ (ن) نے ابھی سے انتخابات میں دھاندلی کا واویلا مچانا شروع کردیا ہےکیونکہ کشمیر میں ان کی سیاسی پوزیشن تقریباً نہ ہونے کے برابر ہے۔

فواد چوہدری نے دعویٰ نے کیا کہ بڑی جلدی آپ دیکھیں گے کہ مریم نواز بھی مہم سے راہ فرار اختیار کریں گی۔

ان کا کہنا تھا کہ قائد حزب اختلاف شہباز شریف نے آج پریس کانفرنس میں اپنے مقدمات کے بارے میں بتانے کے بجائے توانائی پر بات کی اور کہا ملک میں بجلی کی لوڈ شیڈنگ واپس آگئی ہے۔

انہوں نے کہا کہ شہباز شریف پہلے اپنے مقدمات کے حوالے سے میڈیا کو بتائیں اور کچھا چٹھا کھول دیں اور پھر عدالتوں کو بھی بتائیں اور ثبوت پیش کریں۔

بجلی کی پیدوار نہیں ترسیل کا مسئلہ ہے، حماد اظہر
وفاقی وزیر توانائی حماد اظہر نے کہا کہ قائد حزب اختلاف نے دعویٰ کیا کہ ملک میں لوڈ شیڈنگ واپس آگئی ہے لیکن میں چند اعداد شمار پیش کرنا چاہوں گا جب میں دو ماہ قبل وزیر بنا تو میرے سامنے چونکا دینے والے حقائق تھے اور وہ میرے لیے بھی پریشانی کا باعث بن گئیں کہ پچھلی حکومت کیا کر کے گئی ہے۔

انہوں نے کہا کہ اگر کہیں لوڈ شیڈنگ ہو رہی ہے تو بجلی کی کمی کی وجہ سے نہیں بلکہ بجلی کی ترسیل کی وجہ سے ہو رہی ہے، تاہم پچھلے ہفتے ساڑھے 24 ہزار میگاواٹ کئی دن کامیابی کے ساتھ ترسیل کی اور طلب بھی اتنی ہی تھی، جس کی وجہ سے چند روز قبل غیر اعلانیہ لوڈ شیڈنگ ختم کر دی گئی تھی۔

ان کا کہنا تھا کہ جہاں بجلی چوری ہو رہی ہے یا ترسیل کے مسائل ہیں وہاں لوڈ شیڈنگ کے مسائل ہو سکتے ہیں لیکن ہم نے ساڑھے 24 ہزار میگاواٹ بجلی کی ترسیل کی ہے جو ریکارڈ ہے۔

حماد اظہر نے کہا کہ مسلم لیگ (ن) کی حکومت کی جانب سے بجلی کے کیے گئے سودوں کی بدولت 2023 میں کرایے کی مد میں ادائیگیاں 1300 ارب سالانہ ہوں گے اور 2028 میں یہ 5 سے 6 ہزار ارب سےبھی زیادہ ہوں گے۔

قومی اسمبلی میں قائد حزب اختلاف اور صدر مسلم لیگ ن شہباز شریف نےکہا ہےکہ ملک میں لوڈشیڈنگ کی وجہ صرف نااہلی اور غفلت نہیں، تین سال میں بدترین کرپشن ہوئی ہے۔

لاہور میں پریس کانفرنس کرتے ہوئے شہباز شریف کا کہنا تھا کہ حکومت نے اپنی نااہلی سے عوام کو پھر لوڈ شیڈنگ کے جہنم میں دھکیل دیا ہے، ہم نے 2013 میں لوڈ شیڈنگ کا خاتمہ کیا یہ حکومت اسے واپس لے آئی ہے، ہم نےساہیوال کول پراجیکٹ سمیت متعدد پاور منصوبے لگائے اور ملک کو کھربوں روپے کا فائدہ دیا۔

شہباز شریف کا کہنا تھا کہ ن لیگ پر کرپشن کا الزام لگا کر عوام کو سزا دی گئی،ناقص منصوبوں کے باعث معیشت تباہ ہو چکی ہے، 5 کروڑ لوگ خط غربت سے نیچے زندگی گزارنے پر مجبور ہیں،یہ ہے وہ نیا پاکستان جس کےلیے ہمیں بدنام کیا گیا، تین سال میں نیب نیازی گٹھ جوڑ ایک دھیلےکی کرپشن سامنے نہیں لاسکا۔

صدر مسلم لیگ ن کا کہنا تھا کہ ہمیں بجلی کے زائد منصوبے لگانےکا طعنہ دیا گیا ،اگر ایسا ہےتو پی ٹی آئی کیوں سولر انرجی،ونڈ پاور اور گیس پاور پلانٹ لگانےکا کہہ رہی ہے؟ حکومت ایل این جی اوربجلی منصوبوں میں شارٹ اور لانگ ٹرم پالیسی بنانےمیں ناکام رہی ہے۔

ان کا کہنا تھا کہ پاور منصوبوں میں ایک دھیلے کی کرپشن سامنے نہیں آئی، تین سالوں میں بدترین کرپشن کرکے ملک کو لوٹا گیا اور اپنی اے ٹی ایمز کی جیبیں بھری گئیں، روزانہ 8 سے دس دس گھنٹے لوڈ شیڈنگ ہورہی ہے ، عوام خود فیصلہ کر لیں کون سچا تھا اور کون جھوٹا ہے۔