Category سیاست

پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمٰن نے کہا ہے کہ پی ڈی ایم اپنی پوری طاقت کے ساتھ موجود ہے اور غلط انداز میں پی ڈی ایم چھوڑ کر جانے والے اپنی غلطی تسلیم کریں اور فیصلے پر نظرثانی کریں۔

پی ڈی ایم کے اسٹیئرنگ کمیٹی کے اجلاس کے بعد میڈیا سے گفتگو کرتے ہوئے مولانا فضل الرحمٰن نے کہا کہ اجلاس میں فیصلہ ہوا ہے کہ رمضان المبارک کے بعد پوری قوت کے ساتھ عوامی رابطے کا آغاز کیا جائے اور ایک باقاعدہ سربراہی اجلاس بلایا جائے جس میں اس حوالے سے حکمت عملی مرتب کی جائے۔

ان کا کہنا تھا کہ معیشت تباہ ہو چکی ہے، یہ آج یا کل کی بات نہیں بلکہ آئندہ کئی سالوں تک ہماری معیشت کے جمود کا سلسلہ جاری رہے گا اور ہم آئندہ سربراہی اجلاس میں اس بات پر غور کریں گے کہ معیشت کی بہتری کے لیے ہمارے پاس کیا تجاویز ہیں، کیا فارمولا ہے اور ہم عوام کو ان برے دنوں اور معیشت کی زبوں حالی سے کیسے نجات دے سکتے ہیں اس پر ہمیں اپنے ماہرین کی رائے لینی ہو گی۔

انہوں نے کہا کہ اس وقت افغانستان اور ایران سرحد پر ہونی والی تجارت سے ہی وہاں کے مقامی افراد کا روزگار وابستہ ہے لیکن پاکستانی ادارے وہاں اتنا ظلم کررہے ہیں اور وہاں کے چھوٹے کاروباری لوگوں پر تشدد کررہے ہیں، گولیاں تک چلا رہے ہیں اور لاکھوں لوگ بے روزگاری کا شکار ہو کر بچوں کے لیے فکر مند ہیں۔

انہوں نے کہا کہ یہ بات بھی ہمارے مدنظر ہے کہ کورونا کا رونا رویا جا رہا ہے، لاک ڈاؤن کیے جا رہے ہیں، دنیا کے مختلف ممالک میں ویکسین بننے کے باوجود ہم اب تک باہر سے ایک پیسے کی بھی دوا نہیں لا سکے۔

ان کا کہنا تھا کہ 22 کروڑ آبادی کے لیے 10 لاکھ ویکسین آ رہی ہے، یہ کس کس کو لگائیں گے، اشرافیہ اور حکمران طبقے سے وابستہ لوگ ہی اس سے فائدہ اٹھا سکیں گے تو ہمیشہ کووڈ-19 کی وجہ سے نزلہ عوام پر گرتا ہے۔

ان کا کہنا تھا کہ بازوروں، مساجد اور محلوں میں لاک ڈاؤن ہوتا ہے لیکن کورونا سے تو دور کی بات ہے کہ اس حکومت نے تو کھانسی اور نمونیہ کے امراض کے لیے بھی کسی قسم کی ادویات باہر سے درآمد نہیں کی ہیں۔

انہوں نے کہا کہ اس ساری صورتحال میں ہم اپنے اس مؤقف پر قائم ہیں کہ اس حکومت کا خاتمہ، اس سے قوم کی نجات، ایک آزادانہ انتخابات قوم کو واپس دینا اس کے لیے ہم پرعزم ہیں اور پوری قوت کے ساتھ میدان میں ہوں گے۔

مولانا فضل الرحمٰن نے کہا کہ پی ڈی ایم اپنی پوری قوت کے ساتھ موجود ہے، ہمارے کچھ ساتھیوں نے غلط انداز میں پی ڈی ایم کو چھوڑنے کی بات کی لیکن ہم نے ان کو نظرثانی کی اپیل کی ہے، اس پر ہم اب بھی قائم ہیں۔

انہوں نے کہا کہ ہم چاہتے ہیں وہ اس صورتحال پر نظرثانی کریں اور اگر انہوں نے غلطی کی ہے تو اسے تسلیم کریں اور اکثریت کی رائے تو تسلیم کرنا جمہوریت کا تقاضا ہے جو ہم سمجھتے ہیں کہ پورا ہونا چاہیے۔

مولانا فضل الرحمٰن نے کہا کہ ہمارا اسٹیٹ بینک دیا جا رہا ہے جس کے بعد پاکستان کا کوئی ادارہ اس سے پوچھ نہیں سکے گا، ہماری پوری معیشت گروی رکھی جا رہی ہے تو کیا آپ سمجھتے ہیں کہ اس کے بعد پاکستان بچے گا، یہ پاکستان کا سودا کرنے والی بات ہے۔

جب ایک صحافی نے ان سے سوال پوچھا کہ کیا پیپلز پارٹی میں سے کسی نے آپ سے رابطہ کیا ہے تو انہوں نے جواب دیا کہ میرے خیال میں آپ کو کچھ معلومات ہیں۔

وزیراعظم عمران خان اور جہانگیر ترین کے ہم خیال گروپ کی ملاقات طے پاگئی۔

ذرائع کے مطابق جہانگیر ترین کے ہم خیال ارکان صوبائی اور قومی اسمبلی کل وزیراعظم عمران خان سے ملاقات کریں گے۔ وہ وزیراعظم کو جہانگیر ترین کے خلاف کیسز پر اپنے تحفظات سے آگاہ کریں گے۔

جہانگیر ترین نے کہا ہے کہ میں خود ملاقات میں شریک نہیں ہوں گا، میرا ہم خیال گروپ کل وزیراعظم سے ملاقات کرے گا۔

واضح رہے چینی اسکینڈل میں نامزد جہانگیر ترین کے خلاف کیسز کے بعد ان کے ہم خیال گروپ سامنے آیا جس میں 33 رکن قومی اسمبلی وپنجاب اسمبلی شامل ہیں جو جہانگیرترین کی رہائش گاہ پر ملاقات بھی کرچکے ہیں اور کورٹ میں پیشی کے موقع پر بھی ان کے ہمراہ تھے۔

وزیراعظم عمران خان سے ملاقات میں جہانگیر ترین ہم خیال گروپ کے 33 ارکان اسمبلی جن میں 11 ایم این ایز اور 22 ایم پی ایز شامل ہوں گے۔ ایم این اےراجہ ریاض، وفاقی وزیر صاحبزادہ محبوب سلطان، ایم این اے غلام بی بی بھروانہ، ایم این اے سمیع گیلانی، ریاض مزاری، خواجہ شیراز، مبین انور، جاوید وڑائچ، غلام لالی، ایم این اے فیض الحسن شاہ، صاحبزادہ امیر سلطان بھی وزیراعظم سے ملاقات کرنے والوں میں شامل ہونگے۔

پنجاب کے صوبائی وزراء نعمان لنگڑیال، اجمل چیمہ، صوبائی مشیران عبدالحئی دستی، امیر محمد خان، رفاقت گیلانی، فیصل جبوانہ وزیراعظم سے ملاقات کریں گے۔ ایم پی اے خرم لغاری، اسلم بھروانہ، نذیر چوہان، آصف مجید، بلاول وڑائچ، عمر آفتاب، طاہر رندھاوا، زوار وڑائچ، نذیر بلوچ، عمر تنویر بٹ، امین چوہدری، چوہدری افتخار گوندل، غلام رسول سانگھا، قاسم لنگھا، سعید اکبر نوانی اور سلمان نعیم بھی جہانگیر ترین ہم خیال گروپ کی نمائندگی کریں گے.

سپریم کورٹ نے جسٹس قاضی فائز عیسٰی اور ان کی اہلیہ کی نظر ثانی درخواستیں منظور کرلیں جس کے نتیجے میں ان کے خلاف ہونے والی ایف بی آر کی کارروائی، تحقیقات اور رپورٹ کالعدم قرار دے دی گئی۔

جسٹس عمر عطاء بندیال کی سربراہی میں سپریم کورٹ کے 10 رکنی بینچ نے جسٹس قاضی فائز عیسٰی نظر ثانی کیس کی سماعت کی۔ وفاقی حکومت کے وکیل ایڈیشنل اٹارنی جنرل عامر رحمان نے دلائل دیتے ہوئے کہا کہ عدالت کیس ایف بی آر کو نہ بھجواتی تو وفاقی حکومت نظر ثانی اپیل دائر کرتی، حکومت کیس ایف بی آر کو بھجوانے کا دفاع کرنے میں حق بجانب ہے، جسٹس قاضی فائز عیسٰی کیس میں عدالتی فیصلے پر عملدرآمد ہو چکا ہے، عملدرآمد کے بعد فیصلہ واپس نہیں لیا جا سکتا، سپریم جوڈیشل کونسل کومواد کا جائزہ لینے سے نہیں روکا جا سکتا اور آرٹیکل 211 کے تحت سپریم جوڈیشل کونسل کی کاروائی چیلنج نہیں ہو سکتی، سپریم کورٹ صرف غیر معمولی حالات میں جوڈیشل کونسل میں مداخلت کر سکتی ہے، عدالت نے مجھ سے تین سوالات کے جواب مانگے تھے۔

جسٹس بندیال اپنے حلف کی خلاف ورزی کر رہے ہیں
جسٹس قاضی فائز عیسیٰ نے اعتراض اٹھایا کہ عامر رحمان میرے ٹیکس یا فنانشل ایڈوائزر نہیں ہیں، حکومتی وکیل سے ایسا سوال نہیں پوچھنا چاہیے تھا، جان بوجھ کر نیا مواد عدالتی کاروائی کا حصہ بنایا جا رہا ہے، کیا جسٹس عمر عطا بندیال آپ شکایت کنندہ ہیں؟ ایسے سوالات سے آپ کوڈ آف کنڈکٹ اور اپنے حلف کی خلاف ورزی کر رہے ہیں، جسٹس عمر عطابندیال حکومتی وکیل کے منہ میں الفاظ ڈال رہے ہیں، شاید پھر سے کوشش ہو رہی ہے کہ وقت ضائع کیا جائے، ایف بی آر کی رپورٹ نظر ثانی درخواستوں کے بعد آئی ہے۔

عامر رحمان نے کہا کہ جسٹس فائز عیسی ایف بی آر کارروائی کو بدنیتی قرار دیکر نظر ثانی کی بنیاد بنارہے ہیں، جو دستاویزات نظر ثانی کی بنیاد ہے اس پر دلائل دینا میرا حق ہے، عدالتی سوالات کے جوابات دے رہا ہوں اور کہا جارہا ہے کہ وقت ضائع کر رہا ہوں۔

جسٹس فائز کی نظر میں ان کی اہلیہ کی دستاویزات کا جائزہ لینا غلط ہے
جسٹس عمر عطابندیال نے ریمارکس دیے کہ جسٹس قاضی فائز عیسٰی کی نظر میں ان کی اہلیہ کی دستاویزات کا جائزہ لینا غلط ہے، عدالت کو شاید ایک فریق کو سن کر اٹھ جانا چاہیے۔

عامر رحمان نے کہا کہ سپریم کورٹ کے تین سوالات ہی سارے کیس کی بنیاد ہیں، جسٹس فائز عیسی جواب دیں تو تنازع حل ہو سکتا ہے ۔ اس پر جسٹس فائز عیسی نے کہا کہ کیا مجھے ٹیکس کمشنر نے طلب کر رکھا ہے جس پر گفتگو ہورہی ہے، کیا عدالت اِنکم ٹیکس آفیسر ہے؟۔

لگتا ہے پنجابی میں سمجھانا پڑیگا
دوران دلائل جسٹس قاضی فائز عیسی نے ایک بار پھر مداخلت کی تو جسٹس منظور ملک نے ان سے کہا کہ قاضی صاحب آپ کو اردو اور انگلش میں کئی بار سمجھا چکا ہوں، اب لگتا ہے پنجابی میں سمجھانا پڑیگا، قاضی صاحب مہربانی کریں اور بیٹھ جائیں۔

عامر رحمان نے دلائل دیے کہ عدلیہ کی آزادی ججز کے احتساب سے منسلک ہے، ایک جج کے اہلخانہ کی اُف شور جائیدادوں کا کیس سامنے آیا، ریفرنس کالعدم ہو گیا لیکن تنازع اب بھی برقرار ہے، عوامی اعتماد کی بحالی کے لیے ضروری ہے کہ تنازع ختم ہو،سپریم جوڈیشل کونسل اس تنازع کے حل کے لیے متعلقہ فورم ہے۔

دوران سماعت جسٹس فائز عیسٰی نے پھر مداخلت کی جس پر جسٹس منظور ملک نے ٹوکا کہ قاضی صاحب آپ کے بولنے سے عامر رحمان ڈر جاتے ہیں، کیا حکومتی وکیل آپ سے لکھوایا کریں کہ کیا دلائل دینے ہیں کیا نہیں۔

لطیفہ
جسٹس قاضی فائز عیسٰی نے کہا کہ عدالت کو ایک لطیفہ سنانا چاہتا ہوں۔ جسٹس منظور ملک نے انہیں روکا کہ فی الحال بیٹھ جائیں لطیفہ بعد میں سنیں گے،

جسٹس عمر عطا بندیال نے ریمارکس دیے کہ معزز جج اور عدالتی ساکھ کا سوال ہے، ادارے کی ساکھ کا تقاضا ہے کہ اس مسئلے کو حل کیا جائے، جسٹس فائز عیسٰی کہتے ہیں وہ اہلیہ کے اثاثوں کے جوابدہ نہیں۔

جسٹس بندیال اور جسٹس منیب اپنے اور بیگمات کے اثاثے پبلک کریں
اس پر سرینا عیسیٰ نے کہا کہ جسٹس عمر عطا بندیال اور جسٹس منیب اختر احتساب کے لیے بہت کوشاں ہیں، دونوں ججز اپنے اور اپنی بیگمات کے اثاثے پبلک کریں۔

جسٹس عمر عطا بندیال نے کہا کہ جسٹس قاضی فائز عیسٰی نے 3 سوالات کے جواب دینے سے انکار کیا تھا۔ جسٹس قاضی فائز عیسٰی نے ان سے کہا کہ میں نے انکار نہیں کیا سوالات پر اعتراض اٹھایا ہے، میرے منہ میں بات ڈالنے کی کوشش نہ کی جائے۔

تو ونج تے میں آیا
جسٹس قاضی فائز عیسٰی نے کہا کہ مجھے پنجابی میں روکا نہیں گیا اس بات کا گلہ ہے، پنجابی میں کہوں گا تو ونج تے میں آیا۔ جسٹس منظور ملک نے کہا کہ آپ نے پنجابی نہیں سرائیکی بولی ہے۔

جسٹس فائز عیسی نے کہا کہ میرا میڈیا ٹرائل کل سے دوبارہ شروع ہو گیا ہے، ہمارے بیوی اور بچے حاضر ہیں، ریٹائرڈ جرنیل کو چھیڑیں گے تو شمالی علاقہ جات کی سیر کرائی جائے گی۔

جسٹس عمر عطابندیال نے کہا کہ سپریم کورٹ فارن اکاؤنٹس کیس میں اہم آبزرویشن دے چکی ہے، سات ججز نے کہا کہ جسٹس قاضی فائز عیسٰی قابل احتساب ہیں، ہم میں سے کوئی اثاثوں کی وضاحت نہیں کرسکے گا تواس کا بھی احتساب ہوگا۔

وفاق کے وکیل عامر رحمان اور جسٹس فائز عیسی نے جواب الجواب مکمل کرلیا اور سرینا عیسی نے بھی جواب الجواب تحریری طورپر جمع کروا دیا۔

جسٹس قاضی فائز عیسیٰ کیس کی سماعت مکمل ہوگئی اور سپریم کورٹ نے کیس کا مختصر فیصلہ سناتے ہوئے جسٹس فائز عیسی کی نظر ثانی درخواست منظور کرلی۔

عدالت نے جسٹس فائز کیس میں نظر ثانی درخواستیں 6-4 کی اکثریت سے منظور کر لیں جس کے نتیجے میں سپریم کورٹ کے حکم کے تناظر میں ہونے والی ایف بی آر کی کارروائی، تحقیقات اور رپورٹ کالعدم ہوگئی۔

سپریم کورٹ کے دس رکنی بینچ میں سے 6 ججز نے سرینا عیسی کی نظر ثانی درخواست قبول کر لی اور 4 نے مسترد کی جبکہ جسٹس فائز کی نظر ثانی درخواست پانچ ججز نے منظور اور 5 نے مسترد کی۔

6 ججز نے سرینا عیسی کی نظر ثانی درخواست منظور کرنے کا فیصلہ سنایا جبکہ 4 ججز جسٹس عمرعطا بندیال،جسٹس سجاد علی شاہ، جسٹس منیب اختر اور جسٹس قاضی امین نے فیصلے سے اختلاف کیا۔ جسٹس یحییٰ خان آفریدی نے جسٹس فائز کی درخواست منظور نہیں کی البتہ سرینا عیسی کی درخواست منظور کرلی۔

وزیراعظم عمران خان نے کہا ہے کہ قومیں بمباری اور جنگوں سے تباہ نہیں ہوتیں بلکہ جب حکمران کرپشن کرتے ہیں تو قوم تباہ ہوجاتی ہے۔

پاکستان تحریک انصاف (پی ٹی آئی) کے یوم تاسیس کے حوالے سے اپنے پیغام میں وزیراعظم نے کہا کہ ایک قوم وسائل کی کمی کی وجہ سے تباہ نہیں ہوتی۔

ان کا کہنا تھا کہ قوم کے اوپر بمباری کریں اور ان کی جنگیں ہوجائیں تو اس سے بھی وہ نکل آتی ہیں لیکن قوم کرپشن کی وجہ سے تباہ ہوجاتی ہے۔

انہوں نے کہا کہ کرپشن دو قسم کی ہوتی ہے، ایک تو نچلا سرکاری نوکر پٹواری اور تھانیدار کرپشن کرتا ہے، جس سے لوگ تنگ ہوتے ہیں۔

عمران خان نے کہا کہ جو کرپشن قوموں کو تباہ کرتی ہے وہ جب ملک کے حکمران، وزیراعظم اور وزیر کرپشن شروع کرتے ہیں تو قوم مقروض ہو کر تباہ ہوجاتی ہے اور یہ ساری کہانی تیسری دنیا کے تمام ممالک کی ہے، وہاں ان کے حکمران وہی کر رہے ہیں جو ہمارے حکمران کر رہے تھے اور جب میں نے یہ پارٹی بنائی تو اس وقت یہ بدعنوانی کر رہے تھے۔

‘کرپٹ نظام کے خلاف سیاست میں آیا’
انہوں نے کہا کہ ملک کا پیسہ چوری اور منی لانڈرنگ کرکے باہر لے جارہے تھے تو تب میں نے اپنے دوستوں کے ساتھ فیصلہ کیا کہ ہم ایک پارٹی بنائیں گے، جس کا نام انصاف رکھا کیونکہ جب انصاف ہوتا ہے تو کرپشن ختم ہوجاتی ہے، انصاف کا مطلب قانون کی بالادستی، قانون کی بالادستی کا مطلب کمزور اور طاقت ور برابر ہیں۔

ان کا کہنا تھا کہ طاقت ور لوگ جو ملک کو تباہ کر رہے ہیں، اس وقت سارے ترقی پذیر ممالک کو تباہ کر رہے ہیں اور ان طاقت ور کرپٹ لوگوں کو قانون کے نیچے لانا اور یہی وجہ تھی آج سے 25 سال پہلے میرے جیسے آدمی کی سیاست میں آنے کی، جس کو اللہ نے سب کچھ دیا تھا جبکہ باقی سیاست دانوں سے سیاست سے پہلے کوئی نہیں جانتا تھا۔

وزیراعظم نے کہا کہ ‘میں تو اس وقت پاکستان میں بڑا نام تھا، کامیاب انسان تھا اور سیاست کی ضرورت نہیں تھی، اللہ نے میری ضروریات کے مطابق سب کچھ دیا تھا اور یہ جدوجہد 15 سال چلی، پہلے الیکشن میں ایک سیٹ بھی نہیں، دوسرے میں ایک سیٹ ملی۔

ان کا کہنا تھا کہ ’15 سال بڑی جدوجہد تھی جس میں میرے ساتھ کئی لوگ آئے اور کئی چلے گئے، کئی ہار مان گئے اور کئی کہنے لگے کہ ہمارا گھر میں مذاق اڑایا جارہا ہے اور 2002 کے انتخابات میں چند لوگ رہ گئے’۔

انہوں نے کہا کہ ‘کامیاب انسان تب ہوتا ہے جو خواب وہ دیکھے اس کے لیے کشتیاں جلا کر اس کی طرف جائے اور پھر کبھی واپس نہ آئے یعنی یا موت یا وہ کام ہوگا، تب وہ صلاحیتیں باہر آتی ہیں جو اللہ نے انسان کو دی ہیں’۔

عمران خان نے کہا کہ ‘میرے سامنے نبی ﷺ کی زندگی تھی، میں گہرا مطالعہ کر چکا تھا، قرآن ہمیں کہتا ہے کہ ان کی زندگی سے سیکھو’۔

انہوں نے کہا کہ ‘اللہ کے حبیب ﷺ جب اللہ کا پیغام لے کر نکلے تو زندگی کے سب سے مشکل 13 سال سے گزرے، جان کا خطرہ تھا، بھوک سے بھی اللہ نے ان کو آزمایا تو میں نے سوچا یہ ہمارے لیے سبق ہے کہ جدوجہد سے کبھی نہیں گھبرانا چاہیے’۔

ان کا کہنا تھا کہ ‘کیونکہ اگلے دس برسوں میں انہوں نے دنیا کی تاریخ بدل دی، دنیا کی تاریخ میں کبھی اتنا بڑا انقلاب نہیں آیا لیکن اس کے لیے پہلے 13 سال تیاری کروائی’۔

انہوں نے کہا کہ ‘پھر 10 سال، جن میں انہوں نے دنیا کی تاریخ بدل دی، اس میں پہلے 4،5 سال مشکل میں گزرے، امہ کئی دفعہ خطرے میں تھی، امہ کے بڑے برے حالات تھے، تو میں بھی جب جدوجہد کر رہا تھا تو یہی سوچتا تھا کہ اللہ نے دکھایا کہ اپنے حبیب ﷺ کو جدوجہد کرواسکتے ہیں تو ہم بھی کریں’۔

‘دنیا میں تین قسم کے سیاست دان ہوتے ہیں’
پی ٹی آئی کے یوم تاسیس کے پیغام میں انہوں نے کہا کہ ‘اس دوران میں نے سیاست دانوں کو بہت قریب سے دیکھا، میری سوچ میں تین قسم کے سیاست دان ہوتے ہیں’۔

اس بات کی وضاحت کرتے ہوئے انہوں نے کہا کہ ‘جو سب سے برے سیاست دان ہوتے ہیں، جو عوام کے نام پر اقتدار میں آکر پیسہ بناتے ہیں، اپنا پیٹ پالتے ہیں اور کرپشن کرتے ہیں، ساری دنیا میں اس قسم کے سیاست دانوں کو برا سمجھا جاتا ہے’۔

انہوں نے کہا کہ ‘اس کے بعد کئی ایسے سیاست دان ہوتے ہیں جو سمجھتے ہیں کہ ہم اقتدار میں آکر اپنا بھی فائدہ کریں اور لوگوں کا بھی فائدہ کریں، زیادہ تر ایسے سیاست دان ہوتے ہیں’۔

ان کا کہنا تھا کہ ‘جوب ہت کم ہوتے ہیں وہ سیاست کو عبادت سمجھتے ہیں، جس کی سب سے بڑی مثال سرکار مدینہ کی ہے کیونکہ انہوں نے ذات کے لیے کچھ کیا ہی نہیں، جدھر آئے اسی مسجد نبوی میں رہے اور بیت المال میں پیسہ آرہا تھا تو انہوں نے اپنی ذات کا نہیں سوچا’۔

عمران خان کا کہنا تھا کہ ‘میں سمجھتا تھا کہ تب دوسرے الیکشن جیتنے کے فیز میں جاؤں گا جب عوام میرے ساتھ آئیں گے، وہ میرے پاس میانوالی کا ماڈل تھا، اس وقت بچے اور تھوڑے سے نوجوان میرے ساتھ تھے، مگر آہستہ آہستہ علاقے کے نوجوان آئے جن کو دیکھ کر سیاست دان میرے ساتھ آنا شروع ہوئے’۔

انہوں نے کہا کہ ‘یہی ماڈل سامنے آیا جب 30 اکتوبر 2011 کو مینار پاکستان میں لاہور کے لوگ میرے لیے نکلے، اس پہلے میں بڑی کوشش کرتا تھا لاہور کے لوگ میرے لیے نہیں نکلتے تھے’۔

ان کا کہنا تھا کہ ’30 اکتوبر کو مینار پاکستان میں لوگ نکلے اور اس کے بعد سارا سیاسی حلقہ جو الیکٹیبلز تھے، جب انہوں نے دیکھا کہ ووٹ بینک آگیا ہے تو وہ آنا شروع ہوئے، پھر پارٹی بننی شروع ہوئی اور پھر 2013 میں خیبر پختونخوا میں ہماری حکومت بنی لیکن بڑی دھاندلی کی گئی، جس پر میں نے کہا کہ 4 حلقے کھولو، اس کے لیے ہم نے 126 دن کا دھرنا کیا، جو پرامن تھا’۔

‘الیکشن میں الیکٹرونک نظام لا رہے ہیں’
وزیراعظم نے کہا کہ اب ہم الیکشن میں نئی چیزیں الیکٹرانک ووٹنگ مشین کو لے کر آرہے ہیں، جن کو ہم نے آزمایا ہے جو دنیا میں ٹیسٹ کی ہوئی ہیں اور اس کے ساتھ پاکستان میں جو بھی الیکشن جیتے گا اس کو سب کہیں گے جیتا اور جو ہارا ہے وہ مان جائے گا۔

انہوں نے کہا کہ الیکشن میں ٹیکنالوجی لے کر آ رہے ہیں۔

عمران خان نے مزید کہا کہ میری پارٹی 2018 میں جیت جاتی ہے اور میری جدوجہد کا سب سے مشکل فیز شروع ہوتا ہے، یہ میری زندگی کا آخری اور سب سے مشکل فیز ہے، جو کچھ میں نے زندگی میں سیکھا اور اس جدوجہد سے نہ گزرا ہوتا میں یہ ڈھائی سال نہ گزار سکتا۔

انہوں نے کہا کہ کسی کو کبھی ایسی حکومت نہیں ملی، ملک دیوالیہ، اندرونی اور بیرونی سب سے بڑے خسارے، یعنی ریکارڈ خسارے وہ آپ اعداد وشمار دیکھیں تو آپ کے سامنے آجائے گا کہ پاکستان کبھی اتنا مقروض نہیں تھا، 10 سال میں دو جماعتوں کی وجہ سے ملک کے قرضے 4 گنا بڑھے۔

‘مجھے ڈھائی سالہ کارکردگی پر فخر ہے’
ان کا کہنا تھا کہ مجھے ڈھائی سال کی کارکردگی پر فخر ہے کیونکہ ہم نے ریکارڈ خسارے کم کیے ہیں اور سعودی عرب، عرب امارات اور چین نے مالی مدد کی اور دیوالیہ ہونے سے بچ گئے، کل کسان کارڈ کا افتتاح کرنے جا رہا ہوں تاکہ وہ اوپر اٹھیں، سیاحت اور بلین سونامی کے تحت ماحولیات پر زور لگا رہے ہیں۔

وزیراعظم نے کہا کہ آج ہم نے فلاحی ریاست کے لیے وہ کام کیے ہیں جو آج تک کسی حکومت نے نہیں کیے، اس وقت ملک کے مستقبل کی جنگ لڑی جارہی ہے وہ قانون کی بالادستی کی جنگ ہے، بڑے بڑے سیاسی مافیا، جو لوگ کارٹیلز بیٹھے ہیں مل کر پیسے بناتے ہیں اور چیزیں مہنگی کرتے ہیں، یہ سب اکٹھے ہیں۔

انہوں نے کہا کہ ہر وہ جو کرپٹ نظام سے فائدہ اٹھا رہا تھا وہ اس وقت ہمارے خلاف کھڑا ہوا ہے، یہ جنگ اب ہم لڑ رہے ہیں، جس وقت ہم یہ جنگ جیتیں گے اور انشااللہ جیتیں گے، اس ملک کو اللہ نے نعمتیں دی ہیں اور اس وقت فائدہ اٹھائیں گے جب انصاف ہوگا، خوش حالی تب آتی ہے جس ملک میں انصاف ہوتا ہے۔

ان کا کہنا تھا کہ مدینہ کی ریاست میں سب سےپہلے قانون کی بالادستی آئی تھی پھر خوش حالی آئی تھی اور انشااللہ وہی پاکستان میں ہوگا۔

وفاقی وزارت داخلہ نے کورونا وائرس کا پھیلاؤ روکنے کے لیے ایس او پیز پر عملدرآمد کروانے کے لیے صوبوں اور وفاقی اکائیوں میں پاک فوج کی تعیناتی کا نوٹیفکیشن جاری کردیا گیا۔

مائیکرو بلاگنگ ویب سائٹ ٹوئٹر پر جاری کردہ ایک ویڈیو پیغام میں وزیر داخلہ شیخ رشید نے بتایا کہ نوٹیفکیشن کے مطابق پنجاب، خیبرپختونخوا، بلوچستان، اسلام آباد، گلگت بلتستان اور آزاد کشمیر ایس او پیز نافذ کرنے کے لیے فوج کی خدمات لیں گے۔

ساتھ ہی انہوں نے بتایا کہ اس نوٹیفکیشن میں ابھی صوبہ سندھ شامل نہیں ہے۔

وفاقی وزیر داخلہ کا کہنا تھا کہ فوج ہمیشہ ملک میں سیلاب زلزلے سمیت تمام قدرتی آفات میں اپنی قوم کے ساتھ کھڑی ہوئی ہے۔

چنانچہ 23 اپریل کو وزیراعظم عمران کی سربراہی میں قومی رابطہ کمیٹی کا اجلاس ہوا تھا جس میں یہ طے ہوا تھا کہ کووِڈ 19 ایس او پیز پر عملدرآمد کے لیے فوج کی خدمات لی جائیں گی اور انہیں تمام صوبوں میں یہ ذمہ داری دی جائے، اس لیے آج وزارت داخلہ نے نوٹیفکیشن جاری کردیا۔

وزیر داخلہ نے مزید کہا کہ یہ ایک بڑا فیصلہ ہے کیوں کہ ہمارے پڑوسی ملک بھارت میں یومیہ ساڑھے 3 سے 4 لاکھ کیسز سامنے آرہے ہیں ایسی صورتحال میں پاک فوج کو یہ ذمہ داری دی گئی ہے تا کہ صحیح طور پر کووِڈ 19 کے ایس او پیز پر عملدرآمد کروایا جاسکے۔

خیال رہے کہ ملک کو کورونا وائرس کی تیسری لہر نے اپنی لپیٹ میں لے رکھا ہے اور وبا کے پھیلاؤ میں شدت آتی جارہی ہے، اس دوران صرف اپریل کے مہینے میں 16دن یومیہ رپورٹ ہونے والے کیسز کی تعداد 5 ہزار سے زائد رہی۔

دو روز قبل قومی رابطہ کمیٹی کے اجلاس کے بعد خطاب کرتے ہوئے وزیراعظم نے کہا تھا کہ ہم عوام کو ایس او پیز پر عمل کرنے کی ہدایت کررہے ہیں لیکن ہم دیکھ رہے ہیں کہ عوام میں نہ خوف ہے اور نہ احتیاط کررہے ہیں اس لیے وبا کا پھیلاؤ تیزی سے بڑھ رہا ہے۔

وزیراعظم نے کہا کہ ملک میں جس طرح کورونا وائرس کے کسیز میں جس طرح تیزی سے اضافہ ہورہا ہے اس کو دیکھتے ہوئے میری اپیل ہے کہ ایس او پیز پر عمل کریں، ہم بار بار ایس او پیز کا کہتے ہیں پر لوگ اس پر توجہ نہیں دیتے لیکن صرف ماسک لگانے سے ہمارا 50 فیصد مسئلہ حل ہوجاتا ہے۔

ان کا کہنا تھا کہ آج سے عید تک عوام ایس او پیز پر عمل کرلیں تو شاید ہمیں وہ اقدامات نہیں اٹھانے پڑیں گے جو بھارت کو کرنا پڑا یعنی شہروں کا لاک ڈاؤن کرنا۔

ساتھ ہی انہوں نے یہ بھی اعلان کیا تھا کہ عوام میں ایس او پیز پر عملدرآمد کروانے کے لیے میں نے پاک فوج کو ہدایت کی ہے کہ وہ قانون نافذ کرنے والے اداروں کے ساتھ سڑکوں پر نکلیں۔

وزیراعظم کے اعلان کے بعد تمام صوبوں اور وفاقی اکائیوں کی جانب سے پاک فوج کی تعیناتی کے لیے وزارت داخلہ سے درخواست کی گئی تھی جس پر آج نوٹیفکیشن جاری کردیا گیا تاہم ان میں صوبہ سندھ شامل نہیں۔

عالمی وبا کورونا وائرس کا پھیلاؤ روکنے کے اقدامات کرتے ہوئے حکومت سندھ نے پاک فوج کی خدمات کے لیے وزارت داخلہ کو خط لکھ دیا ہے۔

سندھ میں کورونا وائرس کے پھیلاؤ میں اضافے کے بعد صوبائی حکومت متحرک ہو گئی ہے اور آئین کے آرٹیکل 245 کے تحت پاک فوج کی خدمات کے لیے حکومت سندھ نے وزارت داخلہ کو خط کے ذریعے درخواست دے دی ہے۔

خط میں کہا گیا ہے کورونا ایس او پیز پر عملدرآمد کے لیے پاک فوج کی خدمات سول انتظامیہ کی مدد کے لیے درکار ہیں۔

حکومت سندھ کا خط میں کہنا ہے فوجیوں کی تعیناتی اور سازو سامان سے متعلق مشاورت کے بعد آگاہ کیا جائے گا۔

دوسری جانب وزیر اطلاعات سندھ ناصر حسین شاہ نے جیو نیوز کے پروگرام نیا پاکستان میں گفتگو کرتے ہوئے کہا کہ صوبائی حکومت تیار ہے، کورونا کی صورتحال بدتر ہوئی تو لاک ڈاؤن کر دیں گے۔

پاکستان پیپلزپارٹی (پی پی پی) کے چیئرمین بلاول بھٹو زرداری نے وزیراعظم عمران خان کو ملک میں ہوشربا مہنگائی کا ذمہ دار قرار دیتے ہوئے مستعفی ہونے کا مطالبہ کردیا۔

بلاول بھٹو نے اپنے بیان میں کہا کہ عمران خان مہنگائی پر قابو نہ پانے کی ذمہ داری لیں اور استعفی دے کر گھر چلے جائیں۔

وزیراعظم کو مخاطب کرکے انہوں نے کہا کہ وزیراعظم صاحب، ملک میں مہنگائی بلند ترین سطح کو چھورہی ہے، کیا اب ہم تھوڑا سا گھبرالیں۔

انہوں نے کہا کہ ادویات کی قیمتوں میں 100فیصد سے زائد اضافہ عام آدمی سے زندگی کا حق چھیننے کے مترادف ہے۔

ان کا کہنا تھا کہ میڈیکل اسٹورز سے پیسے کم ہونے کی وجہ سے دوا خریدے بغیر واپس جانے والے غریب کی آواز بننا سیاسی پوائنٹ اسکورنگ نہیں ہے۔

چیئرمین پی پی پی نے کہا کہ وزیراعظم ہاؤس کے ٹھنڈے کمرے میں بیٹھ کر عمران خان کو ان والدین کی تکلیف کا کوئی احساس نہیں جو بچوں کے اسکول کی فیس تک ادا نہیں کرپا رہے۔

ان کا کہنا تھا کہ مہنگائی کے خاتمے کے دعوے کرنے والے عمران خان کرائے کے گھر میں رہنے والے ایک عام آدمی کا مہینے کا بجٹ بنا کر دکھا دیں۔

وزیراعظم کو تنقید کا نشانہ بناتے ہوئے انہوں نے کہا کہ عمران خان کے وزیراعظم ہوتے ہوئے کوئی ایک عید ایسی نہیں گزرے گی جس میں مہنگائی کی وجہ سے نئے کپڑے بنانا بھی ایک گھرانے کے لیے آسان ہو۔

انہوں نے کہا کہ عمران خان نے کرپشن کے خلاف مہم کا جھانسہ دے کر عوام کو چینی کے حصول کے لیے لمبی قطار میں کھڑا کردیا ہے۔

ان کا کہنا تھا کہ دنیا بھر کے حکمران اپنے عوام کا فائدہ سوچتے ہیں جبکہ عمران خان چندہ لینے کی نئی ترکیبوں پر غور کرتے ہیں۔

بلاول بھٹو زرداری نے سوال کیا کہ اگر تین سال تبدیلی کے لیےکم ہیں تو 8 برسوں میں خیبرپختونخوا میں سرکاری ہسپتالوں کے مہنگے علاج کے علاوہ اور کیا تبدیلی آئی ہے۔

انہوں نے کہا کہ وزیراعظم صاحب، لنگر خانے کھولنے سے غربت ختم نہیں ہوگی، آپ کو کچھ کرکے دکھانا ہوگا۔

مہنگائی کا ذکرکرتے ہوئے انہوں نے اپنے بیان میں کہا کہ عمران خان نے آٹے کے 20 کلو کے تھیلے پر 68 روپے زیادہ دینے والے عام آدمی کو روٹی کے نوالے تک سے محروم کرنے کی کوشش کی۔

ان کا کہنا تھا کہ آئی ایم ایف کے حکم پر ٹیکسوں کا بوجھ لادنے والے سلیکٹڈ وزیراعظم کے جرائم کو عوام کبھی معاف نہیں کریں گے۔

پی پی پی کے چیئرمین نے کہا کہ جب حکمران خود چور ہوتا ہے تو ملک میں مافیا بے لگام ہوکر زیادہ منافعے کے حصول کے لیے ہر چیز مہنگی کردیتا ہے۔

بلاول بھٹو زرداری نے کہا کہ عمران خان کی تبدیلی یہ ہے کہ اپنے سرمایہ دار دوستوں کو ٹیکسوں میں چھوٹ دے کر عام آدمی کو مہنگائی کے شکنجے میں کس دیا جائے۔

وفاقی وزیر اطلاعات و نشریات فواد چوہدری نے کہا ہے کہ پی ٹی آئی پاکستان کےعوام کی سیاست پر امید کا استعارہ ہے۔

تحریک انصاف کے 25ویں یوم تاسیسی کے موقع پر فواد چوہدری نے کہا کہ پاکستان تحریک انصاف پاکستان کےعوام کی سیاست اور سیاستدانوں پر امید کا استعارہ ہے، عمران خان کی جدوجہد ایک ایسے سماج کے لئے ہے جہاں طاقتور اور کمزور پر قانون کا نفاذ یکساں ہو، یہ تحریک ابھی جاری ہے اور انشاللہ عمران خان کی قیادت میں نیا پاکستان بن کر رہے گا۔

دوسری جانب پنجاب کے سینیئر صوبائی وزیر عبدالعلیم خان نے بھی پی ٹی آئی کے 25 ویں یوم تاسیس پر مبارک باد دیتے ہوئے کہا ہے کہ آج کا دن تحریک انصاف کے ہر کارکن، ورکر اور سپورٹر کے لیے قابل فخر ہے، گزشتہ 25برس عمران خان کی قیادت میں مسلسل جدوجہد اور لگن کا استعارہ ہیں، عام پاکستانی کی کاوشوں کے باعث آج تحریک انصاف اقتدار میں ہے، پی ٹی آئی کی سیاست تبدیلی لانے اور دو نہیں ایک پاکستان کے لیے ہے۔

واضح رہے کہ عمران خان نے اپنے دیگر ساتھیوں کے ہمراہ 25 اپریل 1996 کو رکھی تھی۔ اس پارٹی کے پہلے چیئرمین عمران خان خود بنے اور آج تک وہی اس پارٹی کی سربراہی کر رہے ہیں۔

سرکاری حلقوں نے تصدیق کی ہے کہ بھارت نے تناؤ کو کم کرنے کے لیے دسمبر 2020 میں جموں و کشمیر سمیت تمام دیگر امور پر بیک چینل مذاکرات کی پیش کش کی اور پاکستان نے اس کی بھرپور حمایت کی تھی۔

رپورٹ کے مطابق پاکستان کے اعلیٰ سطح کے سرکاری ذرائع نے بتایا کہ بھارتی پیش کش پر پاکستانی قیادت کے درمیان تبادلہ خیال ہوا اور تنازعات کے پرامن حل کے لیے تمام آپشنز کو بروئے کار لانے کا فیصلہ کیا گیا۔

ذرائع نے بتایا کہ بھارت نے تجویز پیش کی تھی کہ جامع بات چیت میں تمام مسائل ایک جگہ زیر بحث لانے کے بجائے دونوں ممالک تمام متنازع معاملات پر شانہ بشانہ بات چیت شروع کریں۔

انہوں نے بتایا کہ پاکستانی قیادت نے ان تمام آپشنز پر اتفاق کیا تھا جو تناؤ کو کم کرنے کا باعث بن سکتے ہیں۔

ایک عہدیدار کا کہنا تھا کہ ہمارے لیے ایک مناسب موقع ہے کہ اسٹریٹجک توقف کریں، ہمیں تشدد سے دور ہو کر داخلی معاملات پر توجہ دینے کی ضرورت ہے۔

ذرائع نے تصدیق کرتے ہوئے کہا کہ بیک چینل مذاکرات دونوں ممالک کی انٹیلی جنس رہنماؤں کے مابین ہو رہے ہیں۔

ذرائع نے بتایا کہ نئی دہلی نے ترجیح دی تھی کہ کسی سیاسی پلیٹ فارم کے ذریعے کرنے کے بجائے خفیہ مذاکرات ہونے چاہیے اور اسلام آباد نے اس پر اتفاق کیا تھا۔

عہدیدار نے بتایا کہ ابتدائی مرحلے میں پاکستان کی بنیادی دلچسپی یہ ہے کہ مقبوضہ کشمیر کی اپنی ریاستی حیثیت پر واپس آجائے اور بھارت متنازع علاقے میں آبادیاتی تبدیلیوں کو نہ لانے پر متفق ہے دونوں حکومتوں نے ابھی اس اقدام میں کسی تیسری پارٹی کو شامل نہ کرنے پر اتفاق کیا ہے۔

عہدے داروں کا مؤقف ہے کہ مسئلہ کشمیر کے حل کے لیے پاکستان اور بھارت دونوں براہ راست اور بالواسطہ پالیسیاں اپنائی اور ناکام ہوئے ہیں۔

ایک سوال کے جواب میں عہدیدار نے بتایا کہ ‘بات چیت کا راستہ قدرے پیچیدہ ہوگا لیکن اگر ہم اس پر قائم رہے تو ہم اپنے مقاصد تک پہنچ سکتے ہیں’۔

بیک دوڑ بات چیت کو اس وقت دھچکا لگا جب وفاقی کابینہ کی اقتصادی رابطہ کمیٹی (ای سی سی) نے بھارت سے چینی اور گندم کی درآمد کا اعلان کیا لیکن کابینہ نے فیصلے کی منظوری نہیں دی۔

وزیر خارجہ شاہ محمود قریشی سمیت چند وزرا نے اس اقدام کی مخالفت کی تھی۔

ذرائع کا خیال ہے کہ اس الجھن کا خفیہ مذاکرات پر منفی اثر پڑا تھا اور حکومت پر سخت مؤقف اپنانے پر دباؤ ڈالا گیا تھا۔

تاہم ذرائع نے بتایا کہ ’دھچکا‘ عارضی تھا۔

نئی معلومات سے پتا چلتا ہے کہ پاکستان اور بھارت کے مابین ابتدائی بیک چینل رابطے 2017 میں ہوئے تھے۔

ذرائع کے مطابق متعلقہ سینئر بھارتی عہدیداروں نے بات چیت شروع کرنے کے لیے پاکستانی انٹیلی جنس اور فوجی قیادت کو ایک خفیہ پیغام پہنچایا تھا۔

اس وقت کے وزیر اعظم شاہد خاقان عباسی نے اس بیک دوڑ مذاکرات کو آگے بڑھایا جو پھر بتدریج جاری رہا تاہم پچھلے سال دسمبر میں بات چیت میں غیرمعمولی اضافہ ہوا۔

اس کے بعد سے اعتماد سازی کے متعدد اقدامات ہوچکے ہیں جس میں لائن آف کنٹرول (ایل او سی) پر جنگ بندی معاہدہ بھی شامل ہے۔

رپورٹ کے مطابق کہا جاتا ہے کہ پاکستانی سول اور فوجی قیادت بھارت کے ساتھ مذاکرات کے معاملے میں ایک ہی پیج پر ہیں۔

ماضی میں فوج کی بھارت کے ساتھ پالیسیوں پر منتخب قیادت سے اختلاف رائے تھا حکام اب کہتے ہیں کہ فوجی ہائی کمان جنوبی ایشیا میں قیام امن چاہتی ہے۔

ایک عہدیدار کا کہنا تھا کہ ‘جنگ سے کبھی بھی مسائل کا حل نہیں نکالا اور دو ایٹمی طاقتیں تنازعات کے متحمل نہیں ہوسکتیں’۔

ان کا مؤقف ہے کہ فوجی قیادت امن کی راہ میں رکاوٹ نہیں ہوگی کیونکہ اب جنگ آپشن نہیں ہے۔

حکام کا مؤقف ہے کہ پاکستان کو آج سرحدوں پر تصادم کی صورتحال میں پھنس جانے کے بجائے صحت، تعلیم، بنیادی ڈھانچے اور آبادی پر قابو پانے جیسے معاملات پر توجہ دینے کی ضرورت ہے۔

ایک اہلکار کا کہنا تھا کہ ‘ہم ہمیشہ کے لیے تنازعات کا شکار نہیں رہ سکتے’۔

ایک ذرائع نے کہا کہ اگر ہم تاریخ کو دیکھتے رہے تو پرانے زخموں کو دوبارہ کھولتے رہیں گے، بہت سے لوگ آج بحث کرتے ہیں کہ اگر ہم ماضی کی غلطیوں کے یرغمال بنے رہیں تو آگے بڑھنا ناممکن ہوگا۔

یہی وجہ ہے کہ پاکستان کو مقبوضہ کشمیر کے عوام، جنہیں مسائل اور تکالیف کا سامنا کرنا پڑتا ہے، انہیں راحت فراہم کرنے کو یقینی بنانے پر توجہ دینی چاہیے۔

ایک عہدے دار نے بتایا کہ ‘بعض اوقات ایک قدم پیچھے ہٹنے سے دو قدم آگے بڑھ سکتے ہیں’۔

ایک سرکاری ذرائع نے اعتراف کیا کہ ہم ‘جہادی’ ثقافت سے دور ہورہے ہیں۔

انہوں نے کہا کہ ‘کوئی بھی جس پر ریاست قابو نہیں رکھ سکتی وہ اثاثہ نہیں ہے وہ ایک ذمہ داری ہے’۔

عہدیداروں نے زور دے کر کہا کہ ریاست معاشرے سے عسکریت پسندی کا خاتمہ اور پاکستان کو ایک ’عام‘ ریاست بنانا چاہتی ہے۔

ذرائع کا کہنا تھا کہ پاکستانی قیادت اب تنازعات کے حل اور خطے میں معمول کے حصول کے لیے پرعزم ہے۔

انہوں نے کہا کہ قیادت کسی بھی قیمت پر پیچھے نہیں ہٹے گی۔

وزیر خارجہ شاہ محمود قریشی نے کہا ہے کہ پاکستان اور بھارت کسی بھی طرح کے ‘امن مذاکرات’ میں مصروف نہیں اور متحدہ عرب امارات کسی بھی طرح سے سہولت کار کا کردار ادا نہیں کررہا۔

ترک نشریاتی ادارے ٹی آر ٹی ورلڈ کو انٹرویو دیتے ہوئے شاہ محمود قریشی نے کہا کہ میں میزبان آندریا سانکے کے سوال کو درست کرنا چاہتا ہوں کہ کیا متحدہ عرب امارات افغانستان میں امن مذاکرات میں زیادہ دلچسپی لینے کے بجائے پاکستان اور بھارت کے مابین امن مذاکرات کے خفیہ دور میں سہولت کار کا کردار ادا کررہا ہے۔

وزیر خارجہ نے کہا کہ ہم اس وقت کوئی امن مذاکرات نہیں کر رہے ہیں اور متحدہ عرب امارات کسی بھی طرح کے سہولت کار کا کردار ادا نہیں کررہا۔

دفتر خارجہ کے بیان کے مطابق شاہ محمود قریشی پاکستان، ترکی اور افغانستان کے وزرائے خارجہ کے سہ فریقی اجلاس میں شرکت کے لیےدو روزہ سرکاری دورے پر جمعہ کو استنبول پہنچے تھے۔

شاہ محمود قریشی نے کہا کہ انہوں نے “ثالثی کے کردار” کے بارے میں کہانیاں دیکھی ہیں لیکن ایسا ہو نہیں رہا۔

وزیر خارجہ نے کہا کہ متحدہ عرب امارات ایک دوست ملک ہے اور اس کے پاکستان اور ہندوستان کے ساتھ اچھے تعلقات ہیں، تمام دوست ممالک مستقل یہ کہتے رہے ہیں کہ ایٹمی طاقت کے حامل دونوں ملکوں کو جنگ کی راہ نہیں اپنانی چاہیے اور مسائل کے حل کے لیے آگے بڑھنے کا بہترین طریقہ مذاکرات ہیں۔

انہوں نے کہا کہ پاکستان کبھی بھی مذاکرات سے پیچھے نہیں ہٹا لیکن بھارت پیچھے ہٹا ہے اور اس نے اس طرح کے کئی اقدامات اٹھائے جس سے ماحول خراب ہوا۔

ان کا کہنا تھا کہ آپ پاکستان کے بیانات کو دیکھیں، وزیر اعظم عمران خان کے انتخابات میں کامیابی کے بعد دیے گئے بیان کو دیکھیں: ‘آپ امن کی طرف ایک قدم اٹھائیں گے، تو ہم دو اٹھائیں گے’۔

شاہ محمود قریشی نے کہا کہ یہ مفاہمت کی پیشکش کی تھی کیونکہ ہم ایک حکومت کی حیثیت سے عوام پر مبنی ایجنڈا رکھتے ہیں، ہم معاشی تحفظ چاہتے ہیں، ہم اپنے معاشی استحکام پر توجہ مرکوز رکھنا چاہتے ہیں اور اس کے لیے ہمیں امن کی ضرورت ہے، ہمیں اپنے مشرقی پڑوسی کے ساتھ ساتھ مغربی محاذ پر بھی قیام امن کی ضرورت ہے لہٰذا بات چیت ہی اصل حل ہے۔

انہوں نے کہا کہ اگر بھارت پاکستان کو یہ سمجھانا چاہتا ہے کہ وہ بات کرنے پر راضی ہے تو پھر اسے ‘سازگار ماحول’ بنانا ہو گا جسے اس نے 5 اگست 2019 کو اٹھائے گئے اقدامات سے سبوتاژ کردیا۔

ان کا کہنا تھا کہ کشمیریوں سے ان کی ریاست کا حق چھین لیا گیا، انہیں اجنبی قرار دے کر حقوق سے محروم کردیا گیا اور وہ اب بھی ‘ڈبل لاک ڈاؤن میں ہیں، ہم صرف کووڈ لاک ڈاؤن کا سامنا کر رہے ہیں جبکہ کشمیریوں کو کووڈ لاک ڈاؤن کے ساتھ ساتھ فوجی محاصرے کا بھی سامنا ہے۔

وزیر خارجہ نے کہا کہ تو ہم اس ماحول میں لوگوں سے کیسے بات کریں گے، آپ کشمیریوں کو راحت دیں اور انہیں ریاست کا درجہ دیں۔

ان کا کہنا تھا کہ یہاں تک کہ ہندوستان کے اندر سیکولر آوازوں نے بھی کہا ہے کہ ہندوستانی حکومت کی کشمیر پالیسی ناکام ہوچکی ہے، وہ ان مقاصد کو حاصل کرنے میں ناکام رہی جس کے لیے یہ پالیسیاں مرتب کی گئی تھیں لہٰذا ان پالیسیوں پر غور کرنے کی ضرورت ہے۔

انہوں نے کہا کہ “اگر آپ مذاکرات کرنا چاہتے ہیں تو پاکستان کبھی بھی پیچھے نہیں ہٹے گا۔

واشنگٹن میں متحدہ عرب امارات کے مندوب نے اس سے قبل اس بات کی تصدیق کی تھی کہ ایٹمی طاقت کے حامل حریفوں کے درمیان خوشگوار و صحت مند تعلقات کے قیام میں مدد کے لیے خلیجی ریاست بھارت اور پاکستان کے درمیان ثالثی کا کردار ادا کر رہی ہے۔

سفیر یوسف ال اوطیبہ نے اسٹینفورڈ یونیورسٹی کے ہوور انسٹی ٹیوشن کے ساتھ ایک ورچوئل گفتگو میں کہا تھا کہ متحدہ عرب امارات نے کشمیری میں اشتعال انگیزی کی شدت میں کمی اور جنگ بندی کے لیے اپنا کردار ادا کیا ہے، امید ہے کہ یہ کاوش آخر کار سفارتی سطح پر معاملات کی بحالی اور تعلقات کو صحت بخش سطح پر لے جانے کا باعث بنے گی۔

انہوں نے کہا تھا کہ وہ شاید بہترین دوست نہ بنیں لیکن کم سے کم ہم اسے ایک ایسی سطح تک پہنچانا چاہتے ہیں جہاں یہ ایک دوسرے سے بات کرسکیں۔

خبر رساں ایجنسی رائٹرز کے مطابق مسئلہ کشمیر پر دونوں ممالک کے درمیان جاری کشیدگی کو کم کرنے کے لیے ہندوستان اور پاکستان کے اعلیٰ انٹیلی جنس افسران نے جنوری میں دبئی میں ملاقات کی تھی تراکہ بات چیت سے معاملے کا حل نکالا جا سکے۔

سنہ 2019 میں مقبوضہ کشمیر میں ہندوستانی فوجی قافلے کے پر خودکش حملے کے بعد سے پاک-بھارت تعلقات مستقل خرابی کی جانب گامزن ہیں جہاں بھارت نے مذکورہ خود کش دھماکے کا الزام پاکستان پر عائد کیا تھا۔

اُسی سال صورتحال اس وقت مزید ابتر ہو گئی جب ہندوستانی وزیر اعظم نے مقبوضہ کشمیر کی خودمختاری ختم کرتے ہوئے خصوصی حیثٰت کا خاتمہ کردیا تھا جس کے نتیجے میں دونوں ملکوں میں ناصرف سفارتی تعلقات بدترین سطح پر آ گئے تھے بلکہ تجارتی تعلقات بھی ختم ہو گئے تھے۔

‘سب ایک ہی صفحے پر ہیں’
جب وزیر سے میزبان نے سوال کیا کہ پاکستانی حکومت اور فوج افغان امن عمل میں کیا کردار ادا کر سکتی ہے تو انہوں نے جواب میں کہا کہ حکومت، فوج اور آئی ایس آئی (انٹر سروسز انٹیلی جنس) سمیت تمام ادارے ایک صفحے پر ہیں اور سب کو یقین ہے کہ ایک پرامن، مستحکم، جمہوری اور خوشحال افغانستان پاکستان کے مفاد میں ہے۔

انہوں نے دوحہ امن مذاکرات، امریکی افواج کے انخلا کے حوالے سے معاہدے، 12 ستمبر سے بین الافغان امن مذاکرات کے آغاز اور اس حوالے سے طے پانے والے کا حوالہ دیتے ہوئے کہا ہم سب امن عمل میں پیشرفت کی پوری کوشش کر رہے ہیں اور پاکستان کے کردار کے بغیر اس مقام تک نہیں پہنچا جا سکتا تھا۔

انہوں نے کہا کہ یہ پاکستان کے کردار کے بغیر ممکن نہیں تھا، اب وہ آزاد لوگ ہیں، ہم انہیں صرف یہاں تک لا سلتے تھے، بالآخر فیصلے افغان عوام کو ہی کرنے پڑیں گے۔

جب میزبان نے وزیر خارجہ سے سوال کیا کہ کیا طالبان سے بات چیت کو امن مذاکرات کہا جا سکتا ہے کیونکہ کچھ حلقے اس کو بلیک میلنگ سے تعبیر کرتے ہیں تو انہوں نے جواب دیا کہ میں مذاکرات میں ان کے ساتھ شریک تھا اور میرے خیال میں انہیں بھی اس بات کا احساس ہو چکا ہے کہ اگر وہ چاہتے کہ دنیا انہیں تسلیم کرے تو انہیں دنیا سے بات کرنے کی ضرورت ہے کیونکہ تشدد کوئی حل نہیں۔

انہوں نے کہا کہ تشدد اور امن ایک ساتھ کیسے ہو سکتا ہے؟ ہم نے انہیں یہی بات سمجھانے کی کوشش کی کہ جنگ بندی کے لیے تشدد میں کمی انتہائی ضروری ہے۔

شاہ محمود قریشی نے کہا کہ لوگوں کی جانب سے تاثر غلط ہے کہ افغانستان میں تشدد کا تعلق طالبان سے ہے، افغانستان کی تمام خرابیوں کا ذمے دار صرف طالبان کو نہیں ٹھہرایا جا سکتا کیونکہ وہاں کالعدم داعش جیسی دہگر دہشت گرد تظیمیں بھی فعال ہیں۔

ان کا کہنا تھا کہ افغانستان میں ایک ایسا عنصر ہے جو جنگ کے ماحول سے فائدہ اٹھانے کی کوشش کررہا ہے اور جو امن کا دشمن ہے، طالبان پر پاکستان کے اثرورسوخ کو بڑھا چڑھا کر پیش کیا گیا، ہم ان سے اس لیے بات کرتے ہیں کیونکہ ہم جانتے ہیں کہ افغانستان میں ان کی بات مانی جاتی ہے اور دو دہائیوں کی لڑائی کے بعد دنیا کو بھی یہ بات سمجھ آ گئی ہے کہ آپ ان کو مرکزی دھارے کا حصہ بنائے بغیر امن قائم نہیں کر سکتے۔

میزبان سانکے نے وزیر خارجہ سے پوچھا کہ کیا وہ کوئی ایسی ممکنہ صورتحال دیکھی رہے ہیں جس میں داعش اور القاعدہ جیسی دہشت گرد تنظیمیں طالبان مل کر کام شروع کردیں اور صورتحال بد سے بدتر ہو جائے؟ تاہم اس کے جواب میں شاہ محمود قریشی نے کہا کہ ہم داعش کے حامی ہیں اور نہ ہی القاعدہ کی حمایت کرتے ہیں، در حقیقت ہم نہیں چاہتے ہیں کہ کوئی بھی دہشت گرد تنظیم خطے میں قدم جمائے اور پڑوسیوں اور خطے کو نقصان پہنچائے، پاکستان نے اپنے علاقوں کو دہشت گردی سے پاک کرلیا ہے اور مزید بہتر سرحدی انتظام کے لیے سرحد پر باڑ لگانا شروع کردی ہے۔

امن کے قیام کے دعوے پر میزبان نے کوئٹہ کے پرتعیش ہوٹل میں تحریک طالبان پاکستان حملے کا حوالہ دیا تو انہوں نے جواب دیا کہ بات یہ ہے کہ وہ کہاں موجود ہیں؟ آج ٹی ٹی پی اس وقت کہاں ہے؟

‘دہشت گردی کے واقعات میں تیزی سے کمی واقع ہوئی ہے’
جب ان سے پوچھا گیا کہ کیا طالبان کے دوبارہ اقتدار میں آنے سے پاکستان میں موجود شدت پسند گروہوں کی حوصلہ افزائی ہو گی تو وزیر خارجہ نے کہا کہ دہشت گرد دہشت گرد ہیں اور اس کا اطلاق ہر جگہ ہوتا ہے، وہ اس صورتحال کا فائدہ اٹھائیں گے لیکن مجھے لگتا ہے کہ اگر آپ دہشت گردی کے واقعات کو دیکھیں تو ان میں تیزی سے کمی واقع ہوئی ہے۔

میزبان نے کہا کہ پاکستان میں تو دہشت گردی کے واقعات میں کمی ہوئی ہے لیکن افغانستان میں نہیں جس پر شاہ محمود قریشی نے جواب دیا کہ افغانستان میں یہ اس حد تک کم نہیں ہوئے، جس حد تک ہونا چاہیے تھا اور یہی وجہ ہے کہ پاکستان مستقل بئٹھ کر بات چیت کرے پر زور دے رہا ہے۔

ان سے پروگرام میں میں مزید سوال پوچھا گیا کہ طالبان کو سیاسی جماعت کے طورپر تسلیم کر کے ہم کس طرح کی مثال قائم کریں گے اور کیا یہ انتہا پسندی کو فائدہ پہنچانے کے مترادف ہے تو وزیر خارجہ نے جواب دیا ہم کسی بھی طرح کے دہشت گرد عناصر کو کس طرح انعام دے سکتے ہیں، پاکستان نے دہشت گردی میں 83،000 جانیں گنوا دی ہیں اور اس کی بہت بھاری معاشی قیمت ادا کی ہے۔

افغانستان میں انتہا پسند کا نظریے کے فروغ کے خدشات کے حوالے سے سوال پر انہوں نے کہا کہ افغانستان آج جمہوری ملک ہے، افغانستان میں خواتین کا اپنا ایک کردار ہے اور آپ انہیں بند کر کے پنجرے میں نہیں رکھ سکتے، لڑکیاں اسکول جانا چاہتی ہیں اور اس بات کا احترام کیا جانا چاہیے، طالبان کو نئی حقیقت کو قبول کرنا پڑے گا اور گولی کے بجائے ووٹ کے حق کی جانب قدم بڑھانا پڑے گا۔

جب ان سے سوال کیا گیا کہ جب جمہوری افغانستان انتخابات ہوں گے اور رائے دہندگان طالبان کو کسی بھی حکومت میں تسلیم نہیں کریں گے تو کیا آپ کو لگتا ہے کہ وہ اس رائے کا احترام کریں گے؟، اس پر شاہ محمود قریشی نے کہا کہ طالبان کا دعویٰ ہے کہ وہ لوگوں میں مقبول ہیں، وہ بیلٹ باکس پر اپنی مقبولیت کی جانچ کیوں نہیں کرتے اور اگر افغانستان کے عوام انہیں ووٹ نہیں دیتے ہیں تو ہم اس کا احترام کریں گے لیکن ساتھ ساتھ یہ بھی کہا کہ طالبان کو بدلنے کا ایک موقع ضرور دینا چاہیے۔

انہوں نے کہا ہے کہ ہم اپنا کردار ادا کر چکے، اب وقت آگیا ہے کہ افغانی خود کردار ادا کریں، بقیہ فیصلہ افغانستان کے عوام کو کرنا ہے کہ وہ کس طرح کی حکومت چاہتے ہیں، کس قسم کی سیاسی تقسیم چاہتے ہیں، ہم ان کو بتانے والے کون ہوتے ہیں۔

انہوں نے کہا کہ افغانستان میں دوبارہ خانہ جنگی کے حوالے سے مجھے فکر ہے اور مجھے پاکستان کی فکر کرنی چاہیے کیونکہ ہم ایک مستحکم، پرامن افغانستان چاہتے ہیں۔

افغان امن عمل میں ترکی کے کردار کے حوالے سے سوال پر وزیر خارجہ نے کہا کہ ترکی کا کردار بہت اہم ہے اور افغانستان میں ترکی کا کافی اثر و رسوخ ہے اور اس سلسلے میں کردار ادا کرنے پر ہم ترکی کے شکر گزار ہیں۔

انہوں نے کہا کہ اب وقت آگیا ہے کہ افغانوں کو یہ فیصلہ کرنا چاہیے کہ کیا وہ ایک دوسرے کو مارتے رہنا چاہتے ہیں، کیا وہ باقی دنیا سے کٹ کر رہنا چاہتے ہیں یا دنیا میں عزت و مقام چاہتے ہیں کیونکہ دنیا نے انہیں اس مقام تک پہنچانے کے لیے بہت زیادہ کوششیں کی ہیں۔