Category سیاست

حکومت نے ایک بار پھر فواد چوہدری کو وزارت اطلاعات کی ذمہ داری سونپ دی۔

حکومت نے وفاقی وزیر فواد چوہدری کو وزارت اطلاعات کی ذمہ داری سونپ دی۔ وزیراعظم عمران خان نے وفاقی وزیر برائے سائنس اینڈ ٹیکنالوجی فواد چوہدری کو وزارت اطلاعات کا کام سنبھالنے کی ہدایت کردی۔

واضح رہے فواد چوہدری موجودہ حکومت کے پہلے وزیراطلاعات تھے لیکن پھر انہیں عہدے سے ہٹاکر فردوس عاشق اعوان کو معاون خصوصی برائے اطلاعات بنایا گیا تھا اور بعد ازاں ان سے بھی یہ عہدہ واپس لے کر سینیٹر شبلی فراز کو وفاقی وزیر اطلاعات تعینات کردیا گیا تھا تاہم گزشتہ ماہ شبلی فراز کی سینیٹ نشست کی مدت پوری ہونے کے بعد ان کا وفاقی وزیر کا عہدہ بھی ختم ہوگیا تھا۔

پاکستان پیپلز پارٹی (پی پی پی) نے پاکستان ڈیموکریٹک موومنٹ (پی ڈی ایم) کے تمام عہدوں سے مستعفیٰ ہونے کا اعلان کردیا۔

کراچی میں پریس کانفرنس کے دوران چیئرمین بلاول بھٹو زرداری نے پی ڈی ایم کے شوکاز نوٹس پر بات کرتے ہوئے کہا کہ سیاست عزت اور برابری کے ساتھ کی جاتی ہے۔

انہوں نے مطالبہ کیا کہ پی ڈی ایم شوکاز نوٹس پر پیپلز پارٹی اور اے این پی سے غیر مشروط معافی مانگے۔

واضح رہے کہ بلاول بھٹو نے گزشتہ روز سینٹرل ایگزیکٹو کمیٹی کے اجلاس کے دوران پی ڈی ایم کی جانب سے بھیجے گئے شوکاز نوٹس کو پھاڑ دیا تھا، اجلاس میں شریک ایک رہنما نے بتایا تھا کہ چیئرمین پیپلز پارٹی نے پارٹی رہنماؤں کا مؤقف سننے کے بعد اور اپنا خیال پیش کرنے سے پہلے ہی وہ کاغذ (پی ڈی ایم کا نوٹس) پھاڑ دیا۔

بلاول بھٹو زرداری نے پریس کانفرنس سے خطاب کرتے ہوئے کہا کہ قومی اور صوبائی اسمبلیوں سے استعفے ایٹم بم ہیں، آخری ہتھیار ہونا چاہیے اور ہمارا آج بھی یہی مؤقف ہے، کل بھی یہی مؤقف تھا۔

چیئرمین پیپلز پارٹی نے کہا کہ جس کو استعفیٰ دینا ہے دے دیں لیکن کسی پارٹی کو ڈکٹیٹ نہیں کریں۔

ان کا کہنا تھا کہ ہم اے این پی کو اکیلا نہیں چھوڑیں گے ان کے ساتھ کھڑے ہیں جبکہ شوکاز دینے کی کوئی مثال پاکستان کی تحریکوں میں نہیں ملتی ہے۔

انہوں نے کہا کہ کسی کو شوکاز نوٹس نہیں دیا گیا جب پی ڈی ایم کے ایکشن پلان پر عمل نہیں ہورہا تھا۔

بلاول بھٹو زرداری نے وضاحت کی کہ ہم دوسری جماعتوں کے کہنے پر ضمنی الیکشن کا بائیکاٹ کرتے تو ساری نشستیں پی ٹی آئی جیت جاتی۔

انہوں نے کہا کہ پنجاب میں سینیٹ کی 5 نشستیں پی ٹی آئی کو دی گئیں تو کوئی نوٹس نہیں دیا گیا۔

پارٹی کے چیئرمین نے زور دیا کہ ’ہم پر کوئی اپنے فیصلے مسلط نہ کرے‘۔

انہوں نے واضح کیا کہ پارٹی کی سینٹرل ایگزیکٹو کمیٹی (سی ای سی) نے پی ڈی ایم کے شوکاز نوٹس کو مسترد کردیا ہے۔

ان کا کہنا تھا کہ ہم اپنے جدوجہد میں پیھچے نہیں ہٹ سکتے اور اے این پی کے ساتھ کھڑے ہیں، فیصلے صلاح و مشورے سے کریں گے، ہم اپوزیشن کے خلاف اپوزیشن کی سیاست کی مذمت کرتے ہیں۔

ان کا کہنا تھا کہ مسلم لیگ (ن) نے گلگت بلتستان میں اقلیت میں ہوتے ہوئے قائد حزب اختلاف کا حق چھیننے کی کوشش کی تھی۔

بلاول بھٹو زرداری نے کہا کہ ہمارے دروازے ہر اس پارٹی کے لیے کھلے ہیں جو حکومت کے خلاف ہے۔

انہوں نے کہا کہ ’آخری موقعے پر لانگ مارچ اور استعفے کو نتھی کرنے کا نقصان اپوزیشن کو بہت نقصان پہنچایا گیا ہے لیکن ہم حکومت کے خلاف اپنی کوششیں جاری رکھیں گے‘۔

ان کا کہنا تھا کہ مردم شماری کا معاملہ مشترکہ پارلیمانی اجلاس میں لایا جائےگا۔

علاوہ ازیں انہوں نے سینٹرل ایگزیکٹو کمیٹی کے اجلاس سے متعلق بتایا کہ کمیٹی نے مسلح افواج کی جان بوجھ کر تضحیک کرنے والوں کے خلاف کارروائی کے لیے پاکستان پینل کوڈ اور ضابطہ فوجداری 1898 میں ممکنہ ترمیم کو مسترد کردیا ہے۔

انہوں نے کہا کہ ای سی ای نے سینیٹ میں چیئرمین سینیٹ کے انتخاب سے قبل ایوان بالا میں پولنگ بوتھ میں خفیہ کیمروں کے معاملے پر سخت تحقیقات کا اظہار کیا۔

ان کا کہنا تھا کہ خفیہ کیمرے کی موجودگی سے سینیٹ کے انتخاب میں دھاندلی کے مترادف ہے، اس عمل سے سینیٹ کا استحقاق مجروح ہوا ہے۔

انہوں نے کہا کہ کمیٹی نے ایئر ایجوکیشن کمیشن کے چیئرمین کو آرڈیننس کے ذریعے ہٹانے کے معاملے پر تشویش کا اظہار کیا ہے۔

علاوہ ازیں بلاول بھٹو زرداری نے کورونا ویکسین سے متعلق کہا کہ حکومت شہریوں کو ویکسین فراہم کرنے میں ناکام رہی ہے۔ انہوں نے کہا کہ پارٹی کی سینٹرل ایگزیکٹو کمیٹی نے وفاق پر زور دیا کہ وہ وائرس کے خلاف موثر اقدامات کے تحت ویکسین کی فراہمی کو یقینی بنائے۔

چیئرمین پیپلز پارٹی نے کہا کہ ہماری پارٹی نے پاکستان تحریک انصاف (پی ٹی آئی) اور عالمی مالیاتی ادارے (آئی ایم ایف) کی عوام دشمن ڈیل کی پہلے دن سے مخالفت کی ہے۔ یہ ڈیل پاکستان کے عوام اور مجموعی طور پر معیشت کے لیے نقصان دہ ہے۔

بلاول بھٹو زرداری نے اسٹیٹ بینک سے متعلق آرڈیننس کے حوالے سے کہا کہ اس اقدام سے پاکستان کے غریب عوام پر بوجھ پڑے گا، ہم اس کی سخت مذمت کرتے ہیں اور ہماری پارٹی مطالبہ کرتی ہے کہ پاکستان کو اس اقدام سے نکلنا چاہیے۔

ان کا کہنا تھا کہ پی ٹی آئی-آئی ایم ایف ڈیل سے خود کو الگ رکھنا چاہیے۔

بلاول بھٹو زرداری نے مزید کہا کہ مذکورہ ڈیل پاکستان کے مفاد میں نہیں ہے جو اس کی خود مختاری کو خطرے میں ڈال دے، بجلی اور گیس کی قیمتیں بڑھا کر مہنگائی میں مزید اضافہ کیا جارہا ہے۔

بلاول بھٹو نے کہا کہ میں اس آرڈیننس کو پاکستان کی عدالت میں چیلنج کروں گا یہ کیسا آرڈیننس ہے کہ اسٹیٹ بینک، پاکستان کی پارلیمنٹ اورعدالت کو جوابدہ نہیں ہوگا۔

انہوں نے مزید کہا کہ پاکستان پیپلزپارٹی کی سینٹرل ایگزیکٹو کمیٹی اس آرڈیننس کو مسترد کرتی ہے اور ہم اعلان کرتے ہیں کہ ہم رمضان میں ہی پی ٹی آئی-آئی ایم ایف کی اس ڈیل کے خلاف مہم چلائیں گے۔

بلاول بھٹو نے کہا کہ کشمیر کے معاملے پر حکومتِ وقت کی جو متضاد اور کنفیوزنگ پوزیشن ہے، ہم پہلے دن سے اس کی مخالفت کررہے ہیں۔

چیئرمین پیپلزپارٹی نے کہا کہ پاکستان پیپلزپارٹی اور کشمیر کے عوام کا رشتہ، 3 نسلوں کا رشتہ ہے اور شہید ذوالفقار بھٹو سے لے کر آج تک ہم نے کشمیر کے عوام کے کاز پر کبھی سمجھوتہ نہیں کیا اور نہ ہی کریں گے۔

انہوں نے کہا کہ ہم ہمشیہ کشمیر کے عوام کی آواز بنے ہیں، ان کے ساتھ جو ظلم ہورہا ہے اور نریندر مودی کے وزیراعظم بننے کےٓ بعد اور اس سے پہلے جو حملے ہوتے آرہے ہیں ہم ہمیشہ ان کی آواز بنتے ہیں۔

بلاول بھٹو کا کہنا تھا کہ ہمارے کشمیری بھائیوں کے ساتھ جو سلوک کیا جارہا ہے، جو ظلم کیا جارہا ہے اس کی جتنی بھی مذمت کی جائے کم ہے۔

اپنی بات کو جاری رکھتے ہوئے انہوں نے کہا کہ جہاں تک ریاستِ پاکستان کی بات ہے تو موجودہ حکومت کا جو رویہ، خارجہ پالیسی اور کشمیر پر متضاد اور الجھن کا شکار پوزیشن رہی ہے ہم نہ صرف اس کی مذمت کرتے ہیں بلکہ سمجھتے ہیں کہ اس ماحول میں حکومت کی پالیسی متضاد نہیں ہونی چاہیے۔

ان کا مزید کہنا تھا کہ کشمیر، پاکستان میں سب سے اہم مسئلہ ہے، جب ہماری کشمیری بہن، بھائی ایک تاریخی ظلم اور حملے برداشت کررہے ہیں تو پاکستان، پاکستان کی قیادت اور حکومت پر فرض تھا کہ وہ کشمیری جو نہیں کرسکتے تھے وہ ہم نے کرنا تھا لیکن افسوس کے ساتھ حکومتِ وقت کبھی بھی اس نکتے پر پوری نہیں اتری۔

بلاول بھٹو نے کہا کہ پہلے دن سے جب پورے ملک کو، پوری دنیا کو پتا تھا کہ بھارتیہ جنتا پارٹی (بی جے پی) کے منشور میں کشمیر کی آئینی حیثیت تبدیل کرنے کا نکتہ شامل تھا تو الیکشن مہم کے دوران وزیراعظم پاکستان نے کہا تھا کہ مودی اگر الیکشن جیتے گا تو کشمیر کا مسئلہ حل کرسکتے ہیں۔

انہوں نے کہا کہ ‘تاریخ میں یاد رکھا جائے گا کہ ایسا وزیراعظم بھی تھا جو کشمیر کاز کے حوالے سے ناکام تھا’۔

بلاول بھٹو نے کہا کہ بھارت میں انتخابات کے بعد جب 5 اگست کو مقبوضہ کشمیر پر تاریخی حملہ ہوا، آئینی حیثیت تبدیل کی گئی، تو قومی اسمبلی کے فلور پر وزیراعظم کا ردعمل تھا ‘ میں کیا کروں؟’۔

انہوں نے کہا کہ اچانک سے وزیراعظم کو خیال آیا کہ مودی تو فاشسٹ ہیں اور یہ کہا تھا کہ جب تک 5 اگست کا فیصلہ واپس نہیں لیا جاتا ہم بھارت سے بات نہیں کریں گے، اب اچانک وزیراعظم بھارت سے بات کرنے کا کہہ رہے ہیں۔

مسلم لیگ (ن) کی نائب صدر مریم نواز نے کہا ہےکہ شوکاز نوٹس دینے کا فیصلہ پی ڈی ایم کا تھا کسی ایک جماعت کا نہیں جب کہ نوٹس کے ردعمل پرکیا طے کرنا ہے یہ مولانا فضل الرحمان کی دانشمندی اور قیادت پر چھوڑتے ہیں۔

لاہور میں میڈیا سے گفتگو کرتے ہوئے مریم نواز نے کہا کہ مسلم لیگ (ن) نے ریاستی مشینری کے ساتھ مقابلہ کیا ہے اور ڈسکہ کی فتح بہت بڑی تبدیلی کا پیش خیمہ ہے، فروری میں یہ دھاندلی کرکے بھی نہیں جیت سکے، مسلم لیگ (ن) کو دبانے اور ختم کرنے کی کوشش کی گئی۔

انہوں نے کہا کہ جسے کہتے تھے سیاست ختم ہوگئی اس نے لندن میں بیٹھ کر ہرادیا، یہ سپریم کورٹ گئے کہ ہمیں عوام کی شکست سے بچاؤ اور یہ میدان میں آئے تو عوام کے ووٹوں نے الٹے پاؤں بھاگنے پر مجبور کردیا اب جس دن ان کی حکومت نہیں رہی یہ کمپین کرنے کے بھی قابل نہیں رہیں گے۔

مریم نواز کا کہنا تھا کہ مسلم لیگ (ن) کو توڑنے کے لیے 5 سال لگا کر سرتوڑ کوشش کی گئی لیکن (ن) لیگ عوامی قوت کے ساتھ ان کے سامنے کھڑی ہے جب کہ حکومتی اراکین ٹی وی پر حکومت کے خلاف بات کررہے ہیں اور دوسرے ٹھکانے ڈھونڈ رہے ہیں۔

انہوں نے کہا کہ جہانگیرترین کے آپس کے معاملات پر کچھ نہیں کہنا چاہتی لیکن جہانگیر ترین سے سبق سیکھیں، یہ جہانگیرترین کانمک کھارہے تھے اور جہاز استعمال کررہے تھےاس وقت تک وہ شوگر مافیا نہیں تھے؟

مریم نواز کا کہنا تھا کہ پی ڈی ایم میں شامل جماعتیں اپنے کاز پر کاربند ہیں اور پی ڈی ایم کی جدوجہد پاکستان کی سمت درست کرنے کا کاز ہے جب کہ پی ڈی ایم میں شامل جماعتیں متحد ہیں، شوکاز نوٹس دینے کا فیصلہ پی ڈی ایم کا تھا کسی ایک جماعت کا نہیں، نوٹس کے ردعمل پرکیا طے کرنا ہے یہ مولانا فضل الرحمان کی دانشمندی اور قیادت پر چھوڑتے ہیں، پی ڈی ایم میں بیٹھ کرفیصلہ کریں گے کہ کیا کرنا ہے۔

عوامی نیشنل پارٹی نے پی ڈی ایم سے علیحدگی کے بعد نئی حکمت عملی طے کرلی۔ اے این پی نے آئندہ الیکشن میں کسی سے اتحاد نہ کرنے کا فیصلہ کرلیا، پارٹی کا صوبائی صدر کوئی بھی حکومتی عہدہ نہیں لےگا۔

ذرائع کے مطابق اے این پی آئندہ الیکشن میں سولو فلائٹ کرے گی۔ عید الفطر کے بعد امیدواروں کا اعلان متوقع ہے۔ آئندہ الیکشن میں اے این پی نئے چہرے متعارف کروائے گی۔ حکومت سازی میں اے این پی کسی کی اتحادی نہیں بنے گی۔

ذرائع کے مطابق ترقیاتی فنڈز ایم پی ایز کی بجائے بلدیاتی نمائندوں کو دیں گے جبکہ اراکین اسمبلی صرف قانون سازی پر توجہ دینگے۔ اے این پی ذرائع کا کہنا ہے کہ پارٹی کا صوبائی صدر کوئی بھی حکومتی عہدہ نہیں لےگا۔

لاہور میں تحریک لبیک پاکستان (ٹی ایل پی) کے امیر سعد حسین رضوی کی گرفتاری کے بعد سے ملک کے مختلف شہروں میں ٹی ایل پی رہنماؤں اور کارکنوں کی جانب سے احتجاج اور مظاہرے جاری ہیں۔

لاہور پولیس کے سربراہ غلام محمد ڈوگر نے خبر رساں ایجنسی اے پی سے گفتگو کرتے ہوئے کہا کہ سعد رضوی کو امن و امان کی صورتحال برقرار رکھنے کے لیے لاہور سے گرفتار کیا گیا۔

انہوں نے اس حوالے سے مزید معلومات فراہم نہیں کیں لیکن تحریک لبیک کے کارکنان اور حامیوں کی جانب سے مظاہروں اور دھرنوں کی مذمت کرتے ہوئے عوام سے املاک کو نقصان نہ پہنچانے اور قانون ہاتھ میں نہ لینے کی اپیل کی۔

سعد حسین رضوی کی گرفتاری کے بعد شہر قائد سمیت ملک کے دیگر بڑے شہروں میں متعدد مقامات بعد تحریک لبیک کے کارکنوں کی جانب سے مظاہرے کیے جارہے ہیں۔

ملک بھر میں احتجاج کی کال
ایک ویڈیو پیغام میں ٹی ایل پی کے نائب امیر سید ظہیرالحسن شاہ نے کہا کہ ‘قوم دیکھ لے حکومت نے تحریک لبیک کے ساتھ کیےگئے معاہدہ ناموس رسالتﷺ کی مکمل خلاف ورزی کی ہے’.

سید ظہیر الحسن شاہ نے سعد حسین رضوی کو حراست میں لینے کی تصدیق کرتے ہوئے کہا کہ ‘حکومت غنڈہ گردی پر اتر آئی اور اپنے پرانے طریقے استعمال کررہی ہے’۔

سعد حسین رضوی کی گرفتاری کے بعد مختلف شہروں میں احتجاج شروع ہوا— فائل فوٹو: فیس بک
ظہیرالحسن شاہ نے پورے پاکستان میں موجود ٹی ایل پی رہنماؤں اور کارکنوں سے اپنے اپنے علاقوں میں سڑکوں پر نکلنے اور حکومتی اقدام کے خلاف مظاہرہ کرنے کا کہا۔

انہوں نے اپنے ویڈیو پیغام میں کہا کہ’ آپ جہاں بھی ہیں سڑکوں پر مظاہرے کریں اور پورے ملک کو جام کردیں’۔

یاد رہے کہ تحریک لبیک نے حکومت کو فرانسیسی سفیر کو ملک بدر کرنے کے لیے 20 اپریل تک کا وقت دیا تھا اور ایسا نہ کرنے کی صورت میں ملک گیر مظاہروں اور احتجاج کرنے کا اعلان کیا تھا۔

مذہبی جماعت کے دھرنے اور احتجاج کے سبب کراچی، لاہور، اسلام آباد اور راولپنڈی سمیت مختلف شہروں میں بدترین ٹریفک جام کی وجہ سے شہریوں کو شدید مشکلات کا سامنا ہے۔

کراچی
سعد حسین رضوی کی حراست کے بعد مظاہرین نے شہر قائد کے کئی علاقوں میں احتجاج کرنا شروع کردیا جن میں بلدیہ نمبر4، حب ریور روڈ، ناردرن بائی پاس، اورنگی ٹاؤن نمبر 5، جناح برج اور اسٹار گیٹ شامل ہیں۔

علاوہ ازیں اورنگی ٹاؤن نمبر 5 میں ٹی ایل پی کارکنان نے کچھ کارکنان کی گرفتاری پر پولیس پر پتھراؤ کیا جس کے نتیجے میں پولیس کانسٹیبل زخمی ہوگیا۔

پولیس کی جانب مظاہرین کے پتھراؤ اور اہلکار کے زخمی ہونے کے واقعے کی تحقیقات کی جارہی ہیں۔

بلدیہ نمبر 4 میں ٹریفک کی روانی معطل ہوگئی ، ڈبا موڑ سے آنے والی ٹریفک کو 24 مارکیٹ، اور شیرشاہ سے لیبر اسکوائر کی جانب موڑ دیا گیا۔

علاوہ ازیں اورنگی ٹاؤن نمبر 5 میں بھی احتجاج کا سلسلہ جاری رہا اور ٹریفک کو اورنگی نمبر 1/5 اور زیڈ ایم سی موڑ دیا گیا۔

کراچی میں جناح برج پر بھی آئی سی آئی بلڈنگ سے ٹریفک کی روانی معطل ہوگئی اور ٹاور تک گاڑیوں کی لمبی قطاریں لگ گئیں جہاں ٹریفک کی بحالی کے لیے ایس ایچ اوز اور مظاہرین کے درمیان مذاکرات ہوئے۔

اسٹار گیٹ پر بھی مظاہرے کی وجہ سے ٹریفک جام رہا اور گاڑیوں کو ملیر ہالٹ سے ماڈل روڈ کی جانب موڑ دیا گیا۔

حب میں مذہبی جماعت کے کارکنوں نے باب بلوچستان کے مقام پر ٹائر جلا کر قومی شاہراہ کو ٹریفک کے لیے بلاک کردیا۔

علاوہ ازیں کراچی کوئٹہ قومی شاہراہ پر دونوں اطراف سے ٹریفک کی روانی بھی ہوگئی جس کے باعث گاڑیوں کی لمبی قطاریں لگنے سے مسافروں کو مشکلات پیش آئیں۔

دوسری جانب مذہبی جماعت کے مظاہروں کے بعد حیدرآباد میں حیدر چوک کو بھی بلاک کردیا گیا۔

لاہور
لاہور میں تحریک لبیک پاکستان کے مظاہروں کی وجہ سے کئی سڑکوں سمیت شہر کے داخلی اور خارجی مقامات پر بدترین ٹریفک جام رہا۔

تحریک لبیک پاکستان کے کارکنوں کی جانب سے لاہور شہر کے 24 مقامات کو سیل کردیا گیا۔

مظاہرین نے فیصل چوک کی جانب فیلیٹی چوک، ریگل چوک جانے والا ہائی کورٹ چوک، آواری چوک، کارپوریشن چوک، یتیم خانہ چوک، خیابان چوک، محافظ ٹاؤن، داروغہ والا چوک کے دونوں اطراف، شاہدرہ چوک، شادباغ، برکی روڈ، بھٹ چوک بیدیاں روڈ، کنال روڈ، مصری شاہ، ہربنس پورہ انٹرچینج، شالیمار چوک، رنگ روڈ پر قائداعظم انٹرچینج اور نیازی انٹرچینج کو بلاک کردیا۔

راولپنڈی
راولپنڈی میں مظاہرین کمیٹی چوک کے پاس جمع ہوئے اور ان کی جانب سے پتھراؤ بھی کیا گیا جبکہ مری روڈ پر بھی مظاہرے کی وجہ سے ٹریفک جام ہوا۔

مذہبی جماعت کے کارکنان لیاقت باغ میٹرو بس اسٹیشن پر چڑھ گئے اور شہر بھر میں ٹریفک بلاک کردیا ہے۔

اس کے ساتھ ہی مظاہرین نے زبردستی گاڑیاں بھی روکنا شروع کیں اور شہریوں سے تلخ کلامی بھی کی۔

اسلام آباد
اسلام آباد میں بہارہ کہو میں بھی احتجاج کیا گیا جس کے باعث اٹھال چوک کو بند کردیا گیا، اٹھال چوک بند ہونے سے مری سے آنے والی ٹریفک مکمل طور پر جام ہوگئی۔

ملتان
ملتان میں بھی ٹی ایل پی کارکنوں کی جانب سے بہاولپور بائی پاس پر احتجاج کیا گیا جس کے باعث گاڑیوں کی لمبی قطاریں لگ گئیں۔

مذہبی جماعت کے احتجاج کے باعث ملتان شہر کا جنوبی پنجاب کے مختلف شہروں سے زمینی راستہ منقطع ہوگیا۔

علاوہ ازیں بستی ملوک، اڈا لاڑ، خانیوال سمیت دیگر علاقوں میں مذہبی جماعت کے کارکنوں کی جانب سے بھی احتجاج کیا گیا۔

ملتان میں مظاہرین کی جانب سے شدید نعرے بازی کی گئی جبکہ احتجاج کے باعث شہر بھر میں سیکورٹی بڑھا دی گئی۔

وفاقی تحقیقاتی ایجنسی (ایف آئی اے) نے جہانگیر ترین اور ان کے بیٹے علی ترین کو کل بروز منگل طلبی کا نوٹس جاری کر دیا ہے۔

ایف آئی اے لاہور کی جانب سے بھیجے گئے نوٹس میں جہانگیر ترین اور علی ترین سے 8 سوالوں کے فوری جواب مانگے گئے ہیں۔

جہانگیر ترین کو 13 اپریل کو جواب لے کر حاضر ہونے کی ہدایت کی گئی ہے تاہم یہ بھی کہا گیا ہے کہ جہانگیر خان ترین کمپنی سیکٹری کے ذریعے بھی جواب جمع کروا سکتے ہیں۔

ایف آئی اے کے نوٹس میں کہا گیا ہے کہ اگست 2020 سے ان سوالات کے جواب مانگ رہے ہیں، جہانگیر خان ترین نے جمعہ کے دن سوالات کے جوابات دینے کا وعدہ کیا۔

ایف آئی اے کے سوالات
سوالات میں کہا گیا ہے کہ جے کے فارمز کی تمام مشینری کی اصل رسیدیں جمع کروائیں۔

جے کے فارمز کے 35 ہزار ایکڑ کے رقبے کے ثبوت جمع کروائیں۔

مسلم کمرشل بینک کی رپورٹ جمع کروائیں۔

مشینری اور 35 ہزار ایکڑ رقبے کی تخمینہ رپورٹ جمع کروائیں۔

برطانیہ میں خریدی گئی جائیدادوں کی منی ٹریل دیں۔

پاکستان پیپلزپارٹی نے پی ڈی ایم کے تمام عہدوں سے احتجاجا مستعفی ہونے کا اعلان کر دیا۔ انہوں نے کہا کہ سیاسی اتحاد میں کسی قسم کے شوکاز نوٹس کی مثال نہیں ملتی، شوکاز نوٹس پر پیپلزپارٹی اور اے این پی سے معافی مانگی جائے، اے این پی کو اکیلا نہیں چھوڑیں گے ان کے ساتھ کھڑے ہیں۔
چیئرمین پیپلزپارٹی بلاول بھٹو نے نیوز کانفرنس کرتے ہوئے کہا کہ استعفے ایٹم بم ہیں، آخری ہتھیار ہونا چاہیے، پیپلزپارٹی کا استعفوں کا مؤقف آخری آپشن ہوگا، ہمارا آج بھی یہی مؤقف ہے کل بھی یہی تھا، قومی و صوبائی اسمبلیوں سے استعفے آخری ہتھیار ہونے چاہئیں، سینیٹ الیکشن میں حصہ لے کر حکومت کا مقابلہ کیا، ضمنی الیکشن میں حصہ لے کر حکومت کو ایکسپوز کر دیا، ضمنی الیکشن میں عوام نے بتا دیا کہ وہ اپوزیشن کے ساتھ ہیں۔

بلاول بھٹو نے کہا کہ سیاست عزت اور برابری کی بنیاد پر کی جاتی ہے، ہم پر کوئی فیصلے مسلط نہ کرے، جس کو استعفیٰ دینا ہے دے دیں لیکن کسی پارٹی کو ڈکٹیٹ نہ کریں، پنجاب میں سینیٹ کی 5 نشستیں پی ٹی آئی کو دی گئیں تو کوئی نوٹس نہیں دیا گیا۔

حکومت کی معاشی پالیسیوں پر تنقید کرتے ہوئے بلاول بھٹو نے کہا کہ پہلے دن سے پیپلزپارٹی معاشی پالیسی پر تنقید کرتی رہی، آئی ایم ایف سے ڈیل پاکستان کے مفاد میں نہیں، تحریک انصاف کی آئی ایم ایف ڈیل عوام دشمن ڈیل ہے، یہ ڈیل پاکستان کے مفاد میں نہیں ہے، اس ڈیل کے ذریعے غریب عوام کو ٹارگٹ کیا جا رہا ہے، ڈیل سے معاشی ترقی کی راہ میں رکاوٹیں پیدا ہوں گی، عوام کے کندھوں پر اتنا بوجھ ڈالیں جتنا وہ برداشت کرسکیں۔

بلاول ہاؤس کراچی میں پیپلزپارٹی کی سینٹرل ایگزیکٹو کمیٹی (سی ای سی) کے اجلاس میں دیگر امور سمیت پاکستان ڈیموکریٹک موومنٹ(پی ڈی ایم)کے شوکاز نوٹس کا معاملہ بھی زیربحث آیا۔

ذرائع کے مطابق چیئرمین پیپلز پارٹی بلاول بھٹو نے شرکاء کو پی ڈی ایم کے سیکرٹری جنرل شاہد خاقان عباسی کا بھیجا گیا شوکاز نوٹس پڑھ کر سنایا اور اس کے بعد انہوں نے شوکاز نوٹس کوپھاڑ کر پھینک دیا۔

ذرائع کا کہنا ہے کہ بلاول بھٹو کی جانب سے شوکاز نوٹس پھاڑے جانے پر سی ای سی کے شرکاء کی جانب سے تالیاں بھی بجائی گئیں۔

اس موقع پر بلاول کا کہنا تھا کہ ہم سیاست عزت کے لیےکرتے ہیں، عزت سے بڑھ کرکچھ نہیں۔

یاد رہےکہ اپوزیشن اتحاد پاکستان ڈیموکریٹک موومنٹ(پی ڈی ایم) نے سینیٹ میں اپوزیشن لیڈر کے لیے بلوچستان عوامی پارٹی (باپ) سے ووٹ مانگنے پر پیپلزپارٹی اور اے این پی کو شوکاز نوٹس جاری کیے ہیں جس پر پی پی پی نے سخت ردعمل اور اے این پی نے اتحاد سے نکلنے کا اعلان کیا تھا۔

: وزیر داخلہ شیخ رشید کا کہنا ہے کہ سوئس اکاؤنٹس کیسز دوبارہ کھولےجائیں گے۔

کراچی میں پریس کانفرنس کے دوران وزیر داخلہ شیخ رشید کا کہنا تھا کہ ڈسکہ الیکشن میں جمہوریت کی جیت ہوئی، حکومت ڈسکہ الیکشن ہار کر بھی جیتی ہے جب کہ پنجاب میں آئندہ الیکشن پی ٹی آئی اور (ن) لیگ کے درمیان ہوگا، پی ٹی آئی کی خوش نصیبی ہے کہ اسے نالائق اپوزیشن ملی، اپوزیشن جماعتیں آپس میں لڑائی جھگڑاکررہی ہیں جب کہ سوئس اکاؤنٹس کیسز دوبارہ کھولےجائیں گے۔

وزیرداخلہ شیخ رشید نے کہا کہ شہزاد اکبر احتساب کے وزیر ہیں وہ چینی اسکینڈل اور منی لانڈرنگ سے متعلق معاملات کو دیکھ رہے ہیں، ایف آئی اے میرے ماتحت ہے مگر شہزاد اکبر جو کررہےہیں انہیں کرنے دیں، ان کے خلاف منظم مہم چلائی جارہی ہے جب کہ جہانگیرترین کہیں نہیں جارہے۔

وزیر داخلہ نے کہا کہ وزیراعظم عمران خان نے تمام مافیا کو للکارا ہے اور ان کی کوشش ہے کہ لوٹ مار کرنے والوں پر نکیل لگائی جائے، عمران خان مہنگائی سے متعلق معاملات کو خود دیکھ رہےہیں جب کہ ماہ رمضان میں کوشش ہوگی کہ لوٹ مار کو کنٹرول کیاجائے۔

وزیراعظم عمران خان نے وفاقی وزیر برائے سائنس و ٹیکنالوجی فواد چوہدری کو وفاقی وزارت اطلاعات کا قلمدان دینےکا فیصلہ کرلیا۔

ذرائع کے مطابق فواد چوہدری کو وزیر اطلاعات مقرر کرنے کے فیصلے کا اعلان جلد متوقع ہے۔

خیال رہے کہ فواد چوہدری وفاقی وزیر برائے سائنس و ٹیکنالوجی ہیں جبکہ اس سے قبل بھی وہ وزیر اطلاعات رہ چکے ہیں۔

واضح رہے کہ شبلی فراز کے سینیٹ سے ریٹائر ہوجانے کے بعد سے کوئی بھی وزیر اطلاعات نہیں ہے۔