Category سیاست

لاہور ہائی کورٹ نے مسلم لیگ (ن) کے رہنما جاوید لطیف کیخلاف بغاوت پر اکسانے کا مقدمہ خارج کرنے کی درخواست نمٹادی۔

چیف جسٹس لاہور ہائی کورٹ نے ن لیگی ایم این اے جاوید لطیف کی بغاوت پر اکسانے کا مقدمہ خارج کرنے کی درخواست پر سماعت کی۔ لیگی رہنما جاوید لطیف عدالت میں پیش ہوئے۔

جاوید لطیف نے اپنے خلاف مقدمے کو چیلنج کرتے ہوئے موقف اختیار کیا کہ پنجاب پولیس کی جانب سے بے بنیاد الزامات کے تحت مقدمہ درج کیا گیا ہے، حکومت کی جانب سے سیاسی انتقام کا نشانہ بنایا جا رہا ہے، مقدمے میں ماتحت عدالت سے عبوری ضمانت حاصل کررکھی ہے، درخواست گزار ایک سیاسی کارکن ہے، عوامی نمائندگی کے مینڈیٹ کے تحت قانون کی پاسداری پر یقین رکھتا ہے، میرے خلاف درج مقدمے کو کالعدم قرار دینے کا حکم دیا جائے۔

چیف جسٹس ہائی کورٹ نے کہا کہ کالے کوٹ والے نے پاکستان بنانے میں کردار ادا کیا تھا، جو شخص ملک کے خلاف بات کرے میں اس کو ریلیف نہیں دوں گا، پہلے اس ملک کے خلاف بات کرنا پھر اس ملک کی عدالتوں سے ریلیف لینے آجانا، ایسے نہیں ہوگا۔

چیف جسٹس قاسم خان نے ریمارکس دیے کہ ہماری حب الوطنی ہے یا حب الشخصی ہے، پاکستان کی اسمبلیوں میں حلف لینے والے اپنے گریبان میں جھانکیں، جاوید لطیف چھوڑ دیں پاکستان ،کسی اور ملک کی شہریت لے لیں، پاکستان کھپے کا نعرہ نہ لگانے والوں کو لوگ چیونٹیوں کی طرح مسل دیں گے۔

جاوید لطیف کے وکیل نے درخواست واپس لے لی تو عدالت نے درخواست واپس لینے کی بنیاد پر نمٹادی۔

وفاقی وزیر داخلہ شیخ رشید احمد کا کہنا ہے کہ وزیر اعظم عمران خان کے لیے اپوزیشن کوئی چیلنج نہیں اور ان کے خلاف کوئی سازش کامیاب نہیں ہوگی۔

کراچی میں میڈیا سے گفتگو کرتے ہوئے شیخ رشید احمد نے کہا کہ ‘جہانگیر ترین کا مسئلہ بہت حساس ہے، انہیں پی ٹی آئی کی حکومت میں انصاف ملے گا اور عدالتیں آزاد ہیں، میں عمران خان کے خلاف کوئی سازش کامیاب ہوتی نہیں دیکھ رہا، وہ نہ صرف اپنے 5 سال پورے کریں گے بلکہ اگلے عام انتخابات میں بھی ڈٹ کر مقابلہ کریں گے’۔

پاکستان پیپلز پارٹی (پی پی پی) اور مسلم لیگ (ن) کے درمیان شدید اختلافات سے متعلق انہوں نے کہا کہ ‘پیپلز پارٹی اس وقت مثبت سوچ رکھنے والی پارٹی ہے، مسلم لیگ (ن) خود اپنے لیے بحران پیدا کر رہی ہے، اس نے عظیم افواج کے خلاف جو زبان استعمال کی اسے اس کی قیمت ادا کرنا پڑے گی، پیپلز پارٹی سمجھدار جماعت ہے اور آصف زرداری تاش چھاتی سے لگا کر کھیل رہے ہیں’۔

انہوں نے کہا کہ ‘پی ڈی ایم ختم ہو چکی ہے، مولانا فضل الرحمٰن سے کہا تھا کہ بچوں کے ہاتھوں میں نہ کھیلیں آپ خراب ہوں گے، ان کی سیاست کو بہت نقصان پہنچا ہے’۔

ان کا کہنا تھا کہ ‘عمران خان کے لیے اپوزیشن کوئی چیلنج نہیں ہے صرف مہنگائی چیلنج ہے، اپوزیشن ٹھس ہوچکی ہے، عمران خان کا مشن ہے کہ وہ مہنگائی کنٹرول کریں گے اور وہ اس معاملے کو خود دیکھ رہے ہیں’۔

انہوں نے کہا کہ جس دن نواز شریف پاکستان آنے کی خواہش ظاہر کریں گے انہیں 24 گھنٹے میں سفری دستاویز جاری کریں گے۔

شیخ رشید نے وفاقی تحقیقاتی ادارے (ایف آئی اے) کے حوالے سے کہا کہ ‘رمضان میں ہم پورا پیکج بنا رہے ہیں، وہ لوگ جو ایف آئی اے میں سالہا سال سے بیٹھے ہوئے ہیں انہیں اگلے 15 روز میں تبدیل کریں گے’۔

انہوں نے کہا کہ ‘ایف آئی اے میں تنخواہوں کی وجہ سے بڑی کشش ہے، ہر افسر یہیں آنا چاہتا ہے، ایف آئی اے میں تبادلے کے لیے جتنا دباؤ مجھ پر ہے شاید کسی وزیر پر نہیں رہا ہوگا’۔

ایک سوال پر ان کا کہنا تھا کہ ‘پاکستان کی خارجہ پالیسی بہتر ہے، ہم افغانستان میں امن کے لیے تاریخی کردار ادا کر رہے ہیں جبکہ ہمارے امریکا اور چین سے اچھے تعلقات ہیں’۔

وزیر اعظم عمران خان نے کہا ہے کہ ملک پر قرضوں کا بوجھ ہے اور بدقسمتی سے ایسے قرضے لے لیے ہیں جن سے مزید قرضے چڑھ رہے ہیں۔

اسلام آباد کے فراش ٹاؤن میں نیا پاکستان ہاؤسنگ اسکیم کی تقریب سے خطاب کرتے ہوئے وزیر اعظم نے کہا کہ ‘فراش ٹاؤن میں لوگوں کو دو سال میں تیار فلیٹ مل جائیں گے اور 2 ہزار ایسے لوگوں کو فلیٹ ملیں گے جو فلیٹ کا سوچ بھی نہیں سکتے تھے’۔

انہوں نے کہا کہ ایف ڈبلیو او نے کرتارپور ریکارڈ ٹائم میں مکمل کیا تھا، امید ہے فراش ٹاؤن کے فلیٹ بھی وقت پر مکمل ہوں گے’۔

ان کا کہنا تھا کہ ‘بینکوں کو چھوٹے لوگوں کو قرضے دینے کی عادت نہیں تھی تاہم اب قرضوں کے لیے بینک بھی تیار ہیں اور اسکیمیں بھی لانچ ہو رہی ہیں لیکن بینکوں سے چھوٹے قرضے حاصل کرنے میں لوگوں کو اب بھی مشکلات ہیں’۔

عمران خان نے کہا کہ ‘ملک میں مورگیج فناسنگ کا اسٹرکچر نہیں تھا لیکن آسان قرضوں کے لیے ہماری کوششیں کامیاب ہو رہی ہیں، لوگوں کے پاس پیسہ نہیں ہوتا اس لیے کچی آبادی بن جاتی ہے، میرا خواب ہے کہ کچی آبادی والوں کے پاس مالکانہ حقوق آجائیں’۔

انہوں نے کہا کہ ‘ملک پر قرضہ چڑھا ہوا ہے، ہمارے وزیروں کو بھی نہیں پتہ کہ کیوں ڈھائی سال ہم نے تنگی میں گزارے ہیں، ہر سال قرضوں کی اقساط بڑھتی جاتی ہیں، بدقسمتی سے ایسے قرضے لے لیے ہیں جن سے مزید قرضے چڑھ رہے ہیں، ہماری کوشش ہے کہ ملک کی دولت میں اضافہ ہو تاکہ قرضوں کی اقساط واپس کر سکیں’۔

ان کا کہنا تھا کہ ‘گزشتہ ماہ ایف بی آر نے سب سے زیادہ ٹیکس جمع کیا ہے، جیسے جیسے ہماری ہاؤسنگ اور تعمیرات کی سرگرمیاں بڑھتی جائیں گی ہماری دولت اور ٹیکس وصولی میں اضافہ ہوگا اور ہماری سکت ہوجائے گی کہ قرضوں کا بوجھ اتار سکیں’۔

انہوں نے کہا کہ ‘ملک میں تعمیرات کی صنعت ریکارڈ سطح پر پہنچ چکی ہے جس کا ثبوت یہ ہے کہ پچھلے ماہ تاریخ میں سب سے زیادہ سیمنٹ کی فروخت دیکھنے میں آئی، نیا پاکستان ہاؤسنگ منصوبے سے دیگر 30 صنعتیں بھی چلنا شروع ہو جائیں گی’۔

وزیر اعظم نے کہا کہ ‘مسلم لیگ (ن) نے ڈھائی سال میں 20 ہزار ارب روپے کا قرضہ واپس کیا تھا، ہم نے اپنے ڈھائی سال میں 35 ہزار ارب روپے کا قرضہ واپس کیا، یہ 15 ہزار ارب روپے اگر ہم اپنے انفرااسٹرکچر پر لگا دیتے تو ملک تبدیل ہو جاتا’۔

انہوں نے کہا کہ ‘لاہور کے راوی منصوبے اور سینٹرل بزنس ڈسٹرکٹ سے اربوں کھربوں کی دولت آئے گی، حکومت سندھ کے ساتھ بنڈل آئی لینڈ پر بات کر رہے ہیں، بنڈل آئی لینڈ پر باہر سے پیسہ آئے گا، دو ڈیم بنا رہے ہیں جن سے زرعی پیداوار بڑھے گی اور سستی بجلی پیدا ہوگی، ایم ایل ون سے کراچی اور لاہور کے درمیان سفر 8 گھنٹے ہوجائے گا جبکہ وسطی ایشیا تک ٹرین چلنے سے بھی ہماری دولت میں اضافہ ہوگا’۔

ان کا کہنا تھا کہ ‘اس وقت ٹیکسٹائل صنعت اپنی پوری صلاحیت سے چل رہی ہے، کوشش ہے کہ چھوٹی اور درمیانی صنعتوں کو بھی اٹھائیں تاکہ یہاں سے بھی دولت میں اضافہ ہو اور لوگوں کو روزگار ملے’۔

تحریک انصاف کے رہنما جہانگیر ترین نے کہا ہے کہ وزیر اعظم کو نقصان پہنچانے کا تصور بھی نہیں کرسکتا۔

رپورٹ کے مطابق جہانگیر ترین کے جہاز پر یوسف رضا گیلانی کے سفر کے حوالے سے جہانگیر ترین کے ذرائع نے معاملے کی وضاحت کردی ہے، اور کہا ہے کہ جہانگیر ترین اور مخدوم احمد محمود کے الگ الگ جہاز ہیں۔

ذرائع کے مطابق جہانگیر ترین نے کہا ہے کہ پوری ایمانداری اور خلوص سے وزیر اعظم کا ساتھ دیا، مخدوم احمد محمود کا جہاز یوسف رضا گیلانی نے استعمال کیا تو میرا کیا قصور ہے.

حکومت کو میرے جہاز کے بارے میں غلط رپورٹ دی گئی اور اس سارے معاملے کے پیچھے اعظم خان، شہزاد اکبر ہیں، وزیر اعظم کو نقصان پہنچانے کا تصور ہی نہیں کرسکتا، میرا دامن صاف ہے.

عوامی نیشنل پارٹی (اے این پی) کے رہنما میاں افتخار نے کہا ہے کہ شوکاز نوٹس دے کر پاکستان ڈیمو کریٹک موومنٹ (پی ڈی ایم) توڑ دی گئی اور پی ڈی ایم اب نہیں رہی تو اس میں واپسی کا سوال ہی پیدا نہیں ہوتا۔

پاکستان پیپلز پارٹی (پی پی پی) کے وفد نے نیر بخاری کی قیادت میں چارسدہ میں اے این پی کے وفد سے ملاقات کی جس میں موجودہ ملکی صورتحال پر تفصیلی تبادلہ خیال کیا گیا۔

ملاقات کے بعد عوامی نیشنل پارٹی کے رہنماؤں کے ہمراہ پریس کانفرنس کرتے ہوئے پیپلز پارٹی کے رہنما نیر بخاری نے کہا کہ آج پیپلز پارٹی کا وفد چیئرمین بلاول بھٹو زرداری کی ہدایت پر اے این پی کے پاس ولی باغ حاضر ہوا اور ہم بالخصوص اسفند یار ولی کی مزاج پرسی کے لیے آئے جن کی طبیعت ناساز ہے۔

انہوں نے کہا کہ آج ملاقات میں اسفند یار کی طبیعت دریافت کی گئی اور ساتھ ساتھ ملکی سیاسی صورتحال بھی زیر بحث آئی، جس میں خصوصی طور پر اے این پی کی جانب سے پی ڈی ایم کے شوکاز نوٹس پر علیحدگی کے اعلان پر بھی گفتگو کی گئی۔

پیپلز پارٹی کے رہنما نے کہا کہ موجودہ صورتحال ہم خیال جماعتوں میں تعاون مزید بڑھنا چاہیے اور موجودہ ملکی صورتحال میں پیپلز پارٹی اور عوامی نیشنل پارٹی سمیت دیگر ترقی پسند جماعتیں مل کر کوئی لائحہ عمل اختیار کریں۔

انہوں نے کہا کہ پاکستان پیپلز پارٹی کی سینٹرل ایگزیکٹو کمیٹی کا اجلاس 11 تاریخ کو کراچی میں منعقد ہو رہا ہے جس میں پیپلزل پارٹی مستقبل کے فیصلے کا اعلان کرے گی اور یہ بحث بھی ہو گی کہ ہمیں مستقبل میں کیا لائحہ عمل اختیار کرنا چاہیے۔

ان کا کہنا تھا کہ پاکستان پیپلز پارٹی اور اے این پی ترقی پسند جماعتیں ہیں جن کا ماضی میں بھی ایک دوسرے سے تعاون رہا ہے بالخصوص 2008 سے 2013 تک دونوں کی اتحادی حکومت تھی جس میں بہت اچھے تعلقات تھے اور ہم ان تعلقات کو مستقبل میں بھی قائم رکھنا چاہتے ہیں۔

پی ڈی ایم سے علیحدگی کے حوالے سے سوال پر نیر بخاری نے کہا کہ ہماری سینٹرل ایگزیکٹو کمیٹی کا اجلاس 11 اپریل کو ہے اور اس میں جو فیصلہ ہو گا پیپلز پارٹی اسی کا اعلان کرے گی کیونکہ ہماری پارٹی کا پالیسی ساز ادارہ سینٹرل ایگزیکٹو کمیٹی ہے تو اسی میں مستقبل کی پالیسیوں کا فیصلہ ہو گا۔

عوامی نیشنل پارٹی کے رہنما میاں افتخار نے پیپلز پارٹی کے وفد کی آمد کا شکریہ ادا کرتے ہوئے کہا کہ ہم یہ نہیں کہتے کہ ہم پاکستان ڈیمو کریٹک موومنٹ سے علیحدہ ہوئے بلکہ پی ڈی ایم انہوں نے توڑ دی تو اس کے علاوہ کوئی اور راستہ نہیں تھا کیونکہ شوکاز نوٹس بھیجنا ہی پی ڈی ایم توڑنے کے مترادف تھا۔

ان کا کہنا تھا کہ پی ڈی ایم نے بڑا ظلم کیا کیونکہ ہمارا جمہوری اتحاد کامیابی کی طرف گامزن تھا لیکن اسے بیچ میں مسئلہ کھڑا کر کے اس طرح کی فضا پیدا کر کے توڑ دیا گیا۔

انہوں نے کہا کہ ہمیں شوکاز نوٹس بھیجا گیا حالانکہ پی ڈی ایم کا نہ کوئی آئین ہے، نہ کوئی ضابطہ تھا، ہم یہ سمجھ رہے تھے کہ وہ سربراہی اجلاس بلا کر اس میں یہ بات کر لیں گے اور اس کا حل نکلنا کوئی مشکل نہیں تھا، نجانے انہیں کس چیز کی جلدی تھی جو یہ افسوسناک قدم اٹھایا گیا۔

عوامی نیشنل پارٹی کے رہنما نے کہا کہ ہم نے جمہوریت کی بحالی اور دھاندلی زدہ حکومت کے خاتمے کے لیے جو کچھ کرنا تھا کر لیا اور ہماری یہ جدوجہد جاری رہے گی کہ جعلی مینڈیٹ سے آئی ہوئی حکومت کا خاتمہ کریں گے۔

ایک سوال کے جواب میں نیر بخاری نے کہا کہ پی ڈی ایم کو توڑنے کی بنیاد مسلم لیگ (ن) کے سینئر نائب صدر نے رکھی کیونکہ انہوں نے دو جماعتوں کو شوکاز نوٹس جاری کیے، ہم اس اتحاد میں برابری کی سطح پر بیٹھے ہوئے ہیں، کوئی کسی کا ماتحت نہیں، شوکاز نوٹسز تو ماتحتوں کو دیے جاتے ہیں۔

انہوں نے کہا کہ پی ڈیم ایم الیکشن کمیشن کے پاس کوئی رجسٹرڈ پارٹی نہیں ہے، یہ موجودہ حکمرانوں کے خلاف دس جماعتوں کا مجموعہ اور سیاسی اتحاد تھا اور ہمارا مقصد ایک تھا کہ اس نااہل حکومت سے نجات کیسے حاصل کی جائے اور اس کے لیے ایک چارٹر اور ایکشن پلان بھی مرتب کیا، پیپلز پارٹی اس پر کاربند تھی، اگر کوئی کاربند نہیں تھا تو شوکاز دینے والے نہیں تھے۔

ان کا کہنا تھا کہ ہمارا پہلے دن سے مؤقف تھا کہ استعفوں کو آخری آپشن کے طور پر استعمال کرنا چاہیے اور پیپلز پارٹی اور عوامی نیشنل پارٹی لانگ مارچ سے پیچھے نہیں ہٹیں لیکن لانگ مارچ سے استعفوں کو منسلک کرنا سربراہی اجلاس کا فیصلہ نہیں تھا۔

پی ڈی ایم کے مستقبل کے حوالے سے سوال پر پیپلز پارٹی کے رہنما نے کہا کہ شوکاز نوٹس دے کر انہوں نے پی ڈی ایم توڑ دی، یہ 10 جماعتوں کا مجموعہ ہے، آپ ایک جماعت کو نکال دیں تو کیا اس کا وجود رہتا ہے۔

انہوں نے کہا کہ 2003 میں مولانا فضل الرحمٰن کو اپوزیشن لیڈر بنایا گیا حالانکہ ان کے پاس اکثریت نہیں تھی اور اکثریت پیپلز پارٹی کے پاس تھی لیکن اس وقت یہ اختیار اسپیکر کے پاس تھا لہٰذا 2012 میں پیپلز پارٹی نے ترمیم کی کہ اپوزیشن لیڈر اس پارٹی کا بنے گا جس کے پاس اکثریت ہو گی۔

ان کا کہنا تھا کہ سینیٹ میں یوسف رضا گیلانی اس لیے اپوزیشن لیڈر بنے کیونکہ ہمارے سینیٹ میں 21 ووٹ ہیں اور اپوزیشن بینچز پر ہم سب سے بڑی جماعت ہیں، اس لیے ہم اس سیاسی جدوجہد میں شریک ہوں گے جو موجودہ حکمرانوں کے خلاف ہے۔

انہوں نے کہا کہ ہم آئین اور قانون کی پاسداری اور حکمرانی چاہتے ہیں اور اس کے لیے ہماری جدوجہد جاری رہے گی۔

پی ڈی ایم میں واپسی کے حوالے سے سوال پر میاں افتخار نے کہا کہ پی ڈی ایم رہی ہی نہیں تو اس میں واپسی کا سوال ہی پیدا نہیں ہوتا، ہم سمجھتے ہیں کہ ہم نے انہیں راستہ بھی بتایا تھا اور کہا تھا کہ شوکاز کے بجائے رابطہ رکھیں۔

انہوں نے کہا کہ ہمیں ایک ووٹ دینا تھا اور ہم نے یہ واضح کردیا تھا کہ ہم یہ ووٹ پیپلز پارٹی کو دیں گے کیونکہ پیپلز پارٹی نے ماضی میں ہمارے مطالبات پورے کیے جس میں صوبائی خودمختاری، 18ویں، این ایف سی ایوارڈ اور ہمارے صوبے کا نام شامل ہے، ہمارا انتخاب جمہوری اور برحق تھا۔

وفاقی وزیر برائے سائنس و ٹیکنالوجی فواد چوہدری نے قومی اسمبلی کی قائمہ کمیٹی برائے داخلہ کی جانب سے دانستہ طور پر مسلح افواج کی تضحیک کرنے والوں کے خلاف 2 برس قید یا جرمانے کی سزا کے بل کی منظوری کے ایک روز بعد کہا ہے کہ تنقید کو جرم قرار دینا ‘ بالکل مضحکہ خیز خیال’ ہے۔

اگرچہ فواد چوہدری نے اپنی ٹوئٹ میں مذکورہ بل کا براہ راست حوالہ نہیں دیا لیکن انہوں یہ بیان سینئر صحافی مظہر عباس کی ایک ٹوئٹ کے ردعمل میں دیا جنہوں نے قومی اسمبلی کی قائمہ کمیٹی کی جانب سے اس بل کی منظوری پر بظاہر تبصرہ کرتے ہوئے لکھا تھا کہ شہری پارلیمنٹ، سیاستدانوں اور میڈیا پر تنقید کے لیے آزاد ہیں لیکن ‘باقی قومی مفاد’ ہے۔

مظہر عباس کی اس ٹوئٹ پر ردعمل میں وفاقی وزیر فواد چوہدری نے لکھا کہ ‘تنقید کو جرم قرار دینا بالکل مضحکہ خیال ہے، عزت کمائی جاتی ہے، لوگوں پر مسلط نہیں کی جاسکتی’۔

فواد چوہدری نے مزید لکھا کہ انہیں اشد ضرورت محسوس ہوئی کہ تنقید کو روکنے کے لیے نئے قوانین متعارف کروانے کے بجائے توہینِ عدالت سے متعلق قوانین کو ‘منسوخ کیا جانا چاہیے’۔

خیال رہے کہ گزشتہ روز قومی اسمبلی کی قائمہ کمیٹی برائے داخلہ نے دانستہ طور پر مسلح افواج کی تضحیک کرنے والوں کے خلاف کارروائی کے لیے پاکستان پینل کوڈ اور ضابطہ فوجداری 1898 میں ترمیم کرنے کے بل کی منظوری دی تھی۔

بل میں کہا گیا ہے کہ جو شخص اس جرم کا مرتکب ہو گا اسے 2 برس قید یا جرمانے کی سزا ہوگی، جس کی حد 5 لاکھ تک ہو سکتی ہے یا دونوں سزائیں ایک ساتھ بھی ہو سکتی ہیں۔

تحریک انصاف کے رکن قومی اسمبلی امجد علی خان کی جانب سے فوجداری قانون میں ترمیمی بل 2020 قومی اسمبلی کی قائمہ کمیٹی برائے داخلہ میں پیش کیا گیا تھا جسے ایم این اے راجا خرم نواز کی سربراہی میں منعقدہ اجلاس میں منظور کیا گیا۔

بل میں پی پی سی کی شق نمبر 500 میں ترمیم کی تجویز دی گئی ہے جس کے مطابق ‘جو شخص کسی دوسرے کو بدنام کرتا ہے اسے قید کی سزا جس کی مدت دو سال تک یا جرمانہ یا دونوں ایک ساتھ ہوسکتی ہیں’۔

گزشتہ روز منظور ہونے والی ترمیم، جو سیکشن 500-اے کہلائی گی، میں کہا گیا ہے کہ ‘دانستہ طور پر مسلض افواج کی تضحیک کی سزا، جو بھی دانستہ طور پر پاکستان کی مسلح افواج یا اس کے کسی رکن کی تضحیک کرتا ہے، بدنام کرتا ہے تو اسے قابل سزا جرم کا مرتکب قرار دیا جائے گا اور 2 برس قید کی سزا، 5 لاکھ روپے تک جرمانہ یا دونوں سزائیں ہوسکتی ہیں’۔

بل کی منظوری سے قبل پاکستان پیپلز پارٹی (پی پی پی) کے قانون ساز آغا رفیع اللہ اور پاکستان مسلم لیگ (ن) کی قانون ساز مریم اورنگزیب نے سخت مخالفت کی تھی لیکن قائمہ کمیٹی کے چیئرمین نے 4 کے مقابلے میں 5 ووٹوں سے بل کو منظور کرلیا۔

اپوزیشن کے دونوں اراکین کا خیال تھا کہ اس بل کو متعارف کرانے کی ضرورت نہیں ہے۔

مریم اورنگزیب نے بل کی منظوری سے قبل قائمہ کمیٹی کے چیئرمین سے آئین کا آرٹیکل 19 کو پڑھنے کو کہا تھا۔

علاوہ ازیں پاکستان تحریک انصاف سے وابستہ کمیٹی رکن شیر اکبر خان نے ل پیش کرنے والے رکن قومی اسمبلی امجد علی خان سے اسے واپس لینے کی درخواست کی تھی لیکن بعدازاں ووٹنگکے دوران انہوں نے بل کے حق میں ووٹ دیا تھا۔

ترمیمی بل سے متعلق کمیٹی کے سامنے وزارت داخلہ کا ایک ورکنگ پیپر پیش کیا گیا تھا جس میں یہ کہا گیا تھا کہ یہ بل 21 ستمبر 2020 کو وزارت داخلہ کے کونسل سیکشن سے موصول ہوا تھا اور اسی دن جنرل ہیڈ کوارٹر، اسلام آباد کیپٹل، علاقائی انتظامیہ، پنجاب، سندھ، بلوچستان اور خیبر پختونخوا کو اپنے اپنے خیالات کے اظہار کے لیے ارسال کردیا گیا تھا۔

ورکنگ پیپر کے مطابق متعلقہ اسٹیک ہولڈرز سے ابھی تک اس موضوع پر ردعمل موصول نہیں ہوا تھا۔

اس میں کہا گیا تھا کہ خیبرپختونخوا کے محکمہ داخلہ نے یہ کہتے ہوئے اس بل کی توثیق نہیں کی کہ اس کے نفاذ سے موجودہ آئینی اور قانونی دفعات میں تنازع پیدا ہوگا اور اس کے غلط استعمال پر قابو نہیں پایا جاسکے گا۔

مزید یہ کہ خیبرپختونخوا حکومت کو بھی یقین تھا کہ اس بل کی منظوری سے قانون نافذ کرنے والے دیگر اداروں اور عوامی دفاتر کے ساتھ امتیازی سلوک پیدا ہوگا، جو آئین کی شق کے منافی ہے۔

ورکنگ پیپر میں کہا گیا کہ آئی سی ٹی انتظامیہ نے مجوزہ قانون سازی کے مواد کی توثیق کی تھی۔

وزارت داخلہ کے نقطہ نظر کی وضاحت کرتے ہوئے دستاویز میں کہا گیا کہ ملک میں مسلح افواج کو بدنام کرنے کے واقعات میں اضافہ ہوا ہے اور کچھ عناصر اپنے سیاسی مقاصد کو ہوا دینے کے لیے اس ناپسندیدہ عمل میں مشغول ہیں جو افواج پاکستان کے لیے انتہائی بدنامی اور مایوسی کا باعث ہے۔

اس میں مزید کہا گیا کہ وزیر داخلہ، ملک کی موجودہ صورتحال کے تناظر میں مجوزہ قانون سازی کی توثیق کرتی ہے۔

وزیر اعلیٰ سندھ مراد علی شاہ نے پاکستان تحریک انصاف کے رہنما جہانگیر کے مستقبل کے حوالے سے پیش گوئی کرتے ہوئے کہا ہے کہ جہانگیر ترین کو ابھی بھی کچھ امیدیں ہیں لیکن وہ زیادہ عرصہ نہیں رہیں گی۔

لانڈھی سائٹ ایسوسی ایشن سے ملاقات کے بعد میڈیا سے گفتگو کرتے ہوئے وزیر اعلیٰ سندھ نے کہا کہ تین سال قبل تمام سائٹ ایسوسی ایشن سے ملا تھا اور سائٹ کے انفرا اسٹرکچر کے بارے میں بات ہوئی۔

انہوں نے کہا کہ ڈھائی ارب روپے سے زائد ان سائٹ ایسوسی ایشنز کو دیے اور لانڈھی سائٹ ایسوسی ایشن کو 53 کروڑ دیے گئے تھے تاکہ وہ کمشنر کراچی کے ساتھ مل کر خود اپنی نگرانی میں کام کرائیں اور سندھ حکومت یہ پیسے فراہم کرے گی۔

انہوں نے کہا کہ آج لانڈھی آنا ہوا ہے جہاں تین سڑکیں مکمل کی گئی ہیں جن پر کُل 53 کروڑ روپے کی لاگت آئی، اس علاقے آج سے کچھ سال پہلے تک پہنچنا ہی محال ہوتا تھا لیکن اب جام صادق علی پُل سے لے کر لانڈھی تک یہ پوری سڑک مکمل ہے۔

انہوں نے کہا کہ اس سے آگے مہران ہائی وے کی منظوری دے دی ہے جو ایک بڑا منصوبہ ہے تو مجموعی طور پر اس علاقے کے انفرا اسٹرکچر کو صنعتکاروں کے ساتھ مل کر ٹھیک کرنے کے لیے کوشاں ہے۔

ان کا کہنا تھا کہ ٹرانسپورٹ کے لیے ہمارے منصوبے تو بنے ہوئے ہیں لیکن یہ بتائیں کہ گزشتہ تین سال میں وفاقی حکومت نے صوبوں کو دیا کیا ہے، صوبوں سے چھیننے کے پیچھے پڑے ہوئے، تین سال میں ریونیو میں کوئی اضافہ نہیں ہوا۔

مراد علی شاہ نے کہا کہ یلو لائن ہم چین کے ساتھ مل کر کر رہے تھے لیکن وہ کسی وجہ سے مکمل نہیں ہو سکی لیکن اب ہم ورلڈ بینک کے ساتھ مل کر کررہے ہیں، ریڈ لائن کا منصوبی ایشیائی ترقیاتی بینک کے ساتھ اگلے مرحلے میں ہے، میں مانتا ہوں کہ ان منصوبوں میں تاخیر ہوئیں لیکن پچھلے تین سال میں کوئی نمو نہ ہونے سے ہمارے سارے منصوبے التوا کا شکار ہیں۔

جہانگیر ترین کی پیپلز پارٹی میں شمولیت کے حوالے سے سوال پر انہوں نے کہا کہ ابھی یہ کہنا قبل از وقت ہے، جہانگیر ترین کو ابھی بھی کچھ امیدیں ہیں لیکن وہ زیادہ عرصہ نہیں رہیں گی نہیں لہٰذا اس کے بعد ہی دیکھیں گے۔

واضح رہے کہ گزشتہ دنوں پاکستان پیپلز پارٹی (پی پی پی) کی رہنما اور سندھ کی صوبائی وزیر شہلا رضا نے کہا تھا کہ پی ٹی آئی کے ناراض رہنما جہانگیر ترین اگلے ہفتے آصف علی زرداری سے ملاقات کریں گے اور وہ متوقع طور پر پی پی پی میں شمولیت کا اعلان کرسکتے ہیں۔

غیرفعال بلدیاتی اداروں اور بلدیاتی انتخابات کے حوالے سے وزیر اعلیٰ نے کہا کہ قانون کے مطابق بلدیاتی اداروں کے انتخابات نئی مردم شماری کے تحت ہونے ہیں لیکن اس وقت منظور شدہ مردم شماری 1998 کی ہے، 2017 کی مردم شماری پر چاروں صوبوں کو شدید تحفظات تھے اور ان کی وجہ سے پارلیمنٹ نے کہا تھا کہ 5فیصد کی دوبارہ تصدیق کرنی ہے لیکن اب تک کچھ نہیں ہو سکا۔

انہوں نے کہا کہ میں نے فی الفور نئی مردم شماری کا مطالبہ کرتے ہوئے کہا کہ چاروں صوبوں کو اس مردم شماری پر تحفظات ہیں تو ایک غلط چیز کو کیسے منظور کر سکتے ہیں، اس سلسلے میں مشترکہ مفادات کونسل کے اجلاس میں فیصلہ ہو گا۔

ان کا کہنا تھا کہ پاکستان میں کچھ مقامات پر کووڈ بہت زیادہ پھیلا ہوا ہے جس کی وجہ سے میں نے بین الصوبائی ٹرانسپورٹ پر پابندی کا مطالبہ کیا تھا لیکن وفاقی حکومت نے اس تجویز کو مسترد کردیا اور اس کی جگہ دو دن کاروبار اور ٹرانسپورٹ کی بندش کا فیصلہ دیا ہے۔

وزیراعظم عمران خان سے روسی وزیرخارجہ سرگئی لاروف نے ملاقات کی۔

وزیراعظم ہاؤس میں ہونے والی ملاقات میں پاک روس دوطرفہ تعلقات،علاقائی اورعالمی اہمیت کےامورپرتبادلہ خیال کیا گیا۔

وزیراعظم نے کہا کہ روس سے تعلقات پاکستانی خارجہ پالیسی کا اہم جزو ہے، روس کےساتھ تجارت، توانائی، سیکیورٹی اوردفاع میں تعاون بڑھانا چاہتے ہیں۔

وزیراعظم نے شمالی جنوبی گیس پائپ لائن منصوبے کے حل کے عزم کا اظہارکیا اورکہا کہ چاہتے ہیں یہ مسئلہ جلد حل ہو اور اس پر کام شروع ہو۔

وزیراعظم عمران خان نے کورونا کی اسپوٹنک ویکسین بنانے پر روس کو مبارکباد بھی دی۔

افغان امن عمل کے حوالے سے وزیراعظم کا کہنا تھا کہ پاکستان افغان امن عمل میں روس کی کاوشوں کو سراہتا ہے۔

وزیراعظم نے روسی وزیرخارجہ کو مقبوضہ کشمیر کی صورتحال سے آگاہ کیا اورکہا کہ پاکستان جنوبی ایشیا میں امن چاہتا ہے، خطے میں امن کیلئے کشمیر تنازع کا پُرامن حل ضروری ہے۔

وزیراعظم عمران خان نے روسی صدر ولادیمیرپیوٹن کو دورہ پاکستان کی دعوت بھی دی۔

اسلام آباد: سینیٹ میں اپوزیشن لیڈر یوسف رضا گیلانی کا کہنا ہےکہ (ن) لیگ خود استعفے دینا نہیں چاہتی اور ملبہ صرف پیپلزپارٹی پر گرانا چاہتی ہے۔

اسلام آباد میں میڈیا سے گفتگو کرتے ہوئے یوسف رضا گیلانی نے کہا کہ مسلم لیگ (ن) خود بھی استعفے نہیں دینا چاہتی اور (ن) لیگ صرف استعفوں کا ملبہ پیپلزپارٹی پر گرانا چاہتی ہے، (ن) لیگ صرف پیپلزپارٹی کو قصور وار ٹھہرانا چاہتی ہے۔

انہوں نے کہا کہ تمام معاملات کا جائزہ سی ای سی میں لیں گے اور سی ای سی کے بعد استعفے دے بھی دیں تو (ن) لیگ نہیں دے گی۔

صحافی نے آصف زرداری کے خلاف سوئس کیس دوبارہ کھولنے سے متعلق سوال کیا جس پر گیلانی کا کہنا تھا کہ سوئس کیس اوپن اینڈ شٹ کیس ہے، اس وقت میں خط لکھتا تو میرے اوپر آرٹیکل 6 لگ جاتا۔

پاکستان تحریک انصاف (پی ٹی آئی) کے ’ناراض‘ رہنما جہانگیر ترین نے کہا ہے کہ شوگر کمیشن انکوائی کے بعد سے خاموش بیٹھا ہوں، ایک سال گزر چکا ہے لیکن ایک لفظ ادا نہیں کیا، میری وفاداری کا ثبوت اور کس کو چاہیے؟

لاہور میں بینکنگ جرائم کورٹ میں پیشی کے بعد عدالت کے باہر پی ٹی آئی کے قومی اور صوبائی اسمبلی کے اراکین کے ہمراہ میڈیا سے بات کرتے ہوئے انہوں نے کہا کہ میری وفاداری کا امتحان لیا جارہا ہے اگر ایسا نہیں ہے تو پھر کیا ہے، میں چاہتا ہوں کہ میری بات کا جواب دیا جائے۔

جہانگیر ترین نے زور دے کر کہا کہ ظلم بڑھتا جارہا ہے، میرے اور میرے بیٹے کے بینک اکاؤنٹ منجمد کردیے گئے ہیں۔

انہوں نے سوال اٹھایا کہ ابھی مقدمے پر کوئی پیش رفت نہیں ہوئی تو بینک اکاؤنٹ کیوں منجمد کیے گئے؟

جہانگیر ترین نے کہا کہ ملک کی 80 شوگر ملز میں سے انہیں صرف جہانگیر ترین نظر آیا اور بینک اکاؤنٹ منجمد کرنے سے کیا فائدہ ہوگا اور یہ کون کر رہا ہے۔

انہوں نے کہا کہ یہ میرے سوالات ہیں جس کا جواب چاہیے، ہم تحریک انصاف سے انصاف کا تقاضہ کرتے ہیں۔

ان کا کہنا تھا کہ میں تو دوست تھا مجھے دشمنی کی طرف کیوں دھکیلا جارہا ہے، اس لیے مجھے دوست ہی رکھو۔

ایک سوال کے جواب میں جہانگیر ترین نے کہا کہ وقت آگیا ہے کہ سازشی عناصر کو وزیر اعظم عمران خان، مخلص ووٹر اور دیگر رہنما خود بے نقاب کریں۔

انہوں نے کہا کہ مجھے الگ کرنے سے تحریک انصاف کو زیادہ فائدہ نہیں پہنچے گا۔

جہانگیر ترین نے واضح کیا کہ میری تحریک انصاف کے ساتھ راہیں الگ نہیں ہوئی اور ایسا میں سوچ بھی نہیں سکتا۔

ان کا کہنا تھا کہ میں پارٹی میں شامل ہوں اور رہوں گا۔

اس موقع پر پی ٹی آئی کے فیصل آباد سے رہنما راجا ریاض نے بتایا کہ عمران خان کے ارد گرد کے لوگ جہانگیر ترین کے خلاف سازش کر رہے ہیں جس کا وزیر اعظم کو ایکشن لینا چاہیے؟ انہوں نے کہا کہ عمران خان کے اعتماد کے ووٹ لینے میں سب سے زیادہ کردار جہانگیر ترین کا تھا۔

راجا ریاض نے کہا کہ صوبائی اور وفاقی سطح پر وزیر اعظم عمران خان کے اعتماد کے ووٹ لینے میں جہانگیر ترین پیش پیش تھے۔

انہوں نے مطالبہ کیا کہ جہانگیر ترین جیسے وفادار پارٹی رہنما کے ساتھ جو ظلم ہو رہا ہے اسے فوراً بند کیا جائے۔

راجا ریاض نے واضح کیا کہ جہانگیر ترین کے ساتھ روا رکھا جانے والے رویے دراصل پارٹی کے مجموعی ساکھ کو نقصان پہنچے گا۔

انہوں نے کہا کہ دراصل حقیقت میں جو سیاسی نقصان ہورہا ہے وہ تحریک انصاف کو ہو رہا ہے۔

عبوری ضمانتوں میں 10 اپریل تک توسیع
اس سے قبل بینکنگ جرائم کورٹ نے ایف آئی اے کو شوگر اسکینڈل میں نامزد جہانگیر ترین اور علی ترین کو گرفتار کرنے سے روک دیا۔

بینکنگ جرائم کورٹ میں درخواست ضمانتوں پر سماعت ہوئی تھی۔

عدالت نے جہانگیر ترین اور ان کے بیٹے علی ترین کی عبوری ضمانتوں میں 10 اپریل تک کی توسیع کر دی۔

پس منظر
خیال رہے کہ گزشتہ ماہ کے آخر میں وفاقی تحقیقاتی ادارے (ایف آئی اے) نے جہانگیر ترین اور ان کے بیٹے علی ترین کے خلاف مالیاتی فراڈ اور منی لانڈرنگ کا مقدمہ درج کرلیا تھا۔

ڈان کو دستیاب ایف آئی آر کی نقول کے مطابق پاکستان پینل کوڈ کی دفعہ 406، 420 اور 109 جبکہ انسداد منی لانڈرنگ ایکٹ کی دفعہ 3/4 کے تحت 2 علیحدہ مقدمات درج کیے گئے۔

ایف آئی آر کے متن کے مطابق انکوائری کے دوران جہانگیر ترین کی جانب سے سرکاری شیئر ہولڈرز کے پیسے کے غبن کی سوچی سمجھی اور دھوکہ دہی پر مبنی اسکیم سامنے آئی جس میں جہانگیر ترین کی کمپنی جے ڈی ڈبلیو نے دھوکے سے 3 ارب 14 کروڑ روپے فاروقی پلپ ملز لمیٹڈ (ایف پی ایم ایل) کو منتقل کیے جو ان کے بیٹے اور قریبی عزیزوں کی ملکیت ہے-

بعد ازاں جہانگیر ترین نے ٹوئٹر پر ایک پیغام میں جواب دیتے ہوئے کہا تھا کہ میں ایف آئی اے کے نوٹس کے جواب میں ٹھوس شواہد کے ساتھ تفصیلی رپورٹ جمع کرواچکا ہوں اور انہیں میرے اور میرے اہلِ خانہ کے خلاف قانونی طور پر کچھ ثابت کیے بغیر مہم چلاتے دیکھنا بدقسمتی ہے’۔

جس کے بعد جہانگیر ترین اور ان کے بیٹے علی ترین نے لاہور کی سیشن کورٹ سے عبوری ضمانت حاصل کرلی تھی۔

جہانگیر ترین اور علی ترین نے مؤقف اختیار کیا تھا کہ ایف آئی اے نے جھوٹا اور بے بنیاد مقدمہ درج کیا جبکہ کوئی غیر قانونی کام نہیں کیا لیکن ایف آئی اے نے بے بنیاد مقدمے میں نامزد کر دیا۔

درخواست میں استدعا کی گئی تھی کہ عدالت عبوری ضمانت منظور کرتے ہوئے ایف آئی اے کو گرفتاری سے روکے۔

عدالت نے درخواست قبول کرتے ہوئے دونوں کی عبوری ضمانت منظور کرلی تھی اور ایف آئی اے سے 10 اپریل تک مقدمے کا مکمل ریکارڈ طلب کر لیا۔

جہانگیر ترین اور علی ترین نے سیشن کورٹ اور بینکنگ جرائم کورٹ سے مختلف مقدمات میں عبوری ضمانت حاصل کرلی ہے، بینکنگ جرائم کورٹ نے 7 اپریل تک ضمانت منظور کر کے مقدمے کا ریکارڈ ایف آئی اے سے طلب کیا تھا۔

گزشتہ روز پاکستان پیپلز پارٹی (پی پی پی) کی رہنما اور سندھ کی صوبائی وزیر شہلا رضا نے کہا تھا کہ پی ٹی آئی کے ناراض رہنما اگلے ہفتے آصف علی زرداری سے ملاقات کریں گے اور وہ متوقع طور پر پی پی پی میں شمولیت کا اعلان کرسکتے ہیں۔

دوسری جانب میڈیا رپورٹس کے مطابق جہانگیر ترین نے کہا تھا کہ میرے خلاف مسلسل پروپیگنڈا کیا جارہا ہے اور پیپلزپارٹی کی قیادت سے ملاقات کی خبروں میں کوئی صداقت نہیں۔

واضح رہے کہ وفاقی حکومت نے 21 فروری 2020 کو ملک بھر میں چینی کی قیمت میں یکدم اضافے اور اس کے بحران کی تحقیقات کے لیے انکوائری کمیٹی تشکیل دی تھی۔

کمیٹی نے 4 اپریل کو اپنی رپورٹ عوام کے سامنے پیش کی تھی جس میں کہا گیا تھا کہ چینی کی برآمد اور قیمت بڑھنے سے سب سے زیادہ فائدہ جہانگیر ترین کے گروپ کو ہوا جبکہ برآمد اور اس پر سبسڈی دینے سے ملک میں چینی کا بحران پیدا ہوا تھا۔

انکوائری کمیٹی کی تحقیقات کے مطابق جنوری 2019 میں چینی کی برآمد اور سال 19-2018 میں فصلوں کی کٹائی کے دوران گنے کی پیدوار کم ہونے کی توقع تھی اس لیے چینی کی برآمد کا جواز نہیں تھا جس کی وجہ سے مقامی مارکیٹ میں چینی کی قیمت میں تیزی سے اضافہ ہوا۔

جس کے بعد 21 مئی کو حکومت چینی بحران پر وفاقی تحقیقاتی ایجنسی (ایف آئی اے) کی تحقیقاتی رپورٹ کا فرانزک آڈٹ کرنے والے کمیشن کی حتمی رپورٹ منظرعام پر لائی تھی جس کے مطابق چینی کی پیداوار میں 51 فیصد حصہ رکھنے والے 6 گروہ کا آڈٹ کیا گیا جن میں سے الائنس ملز، جے ڈی ڈبلیو گروپ اور العربیہ مل اوور انوائسنگ، 2 کھاتے رکھنے اور بے نامی فروخت میں ملوث پائے گئے۔

وزیر اعظم عمران خان نے 7 جون کو شوگر کمیشن کی سفارشات کی روشنی میں چینی اسکینڈل میں ملوث افراد کے خلاف سفارشات اور سزا کو منظور کرتے ہوئے کارروائی کی ہدایت کی تھی۔

جہانگیر ترین جون میں ہی خاموشی کے ساتھ انگلینڈ روانہ ہو گئے تھے، وہ انکوائری کمیشن کی جانب سے چینی بحران کی فرانزک آڈٹ رپورٹ جاری کرنے سے قبل ہی ملک سے باہر چلے گئے تھے۔

بعد ازاں کئی ماہ انگلینڈ میں قیام کے بعد نومبر میں وطن واپس آئے تھے اور واپسی پر لاہور میں علامہ اقبال انٹرنیشنل ایئرپورٹ پر گفتگو کرتے ہوئے جہانگیر ترین نے بتایا تھا کہ وہ علاج کے لیے بیرون ملک گئے تھے اور میں اس مقصد سے گزشتہ 7 سال سے بیرون ملک جا رہا ہوں، علاج مکمل ہونے کے بعد اب وطن واپس آ گیا ہوں۔