Category سیاست

اسلام آباد:پنجاب میں عام انتخابات التوا کیس میں سپریم کورٹ نے الیکشن کمیشن کا فیصلہ کالعدم قرار دیتے ہوئے 14 مئی کو پنجاب میں الیکشن کرانے کا حکم دیدیا ،سپریم کورٹ نے اپنے فیصلے میں قرار دیا کہ آئین الیکشن کمیشن کو 90 دن سے آگے جانے کی اجازت نہیں دیتا، الیکشن کمیشن نے 22 مارچ کو غیر قانونی حکم جاری کیا۔ عدالت نے الیکشن کمیشن کا 30 اپریل کو پنجاب میں انتخابات کا شیڈول ترمیم کے ساتھ بحال کردیا۔سپریم کورٹ نے حکومت کو 10 اپریل تک فنڈز مہیا کرنے کا حکم دیتے ہوئے کہا ہے کہ پنجاب کی نگراں حکومت، چیف سیکرٹری اور آئی جی 10 اپریل تک الیکشن کی سکیورٹی کا مکمل پلان پیش کریں۔ وفاقی حکومت کو 21 ارب جاری کرنے کا حکم دیا ہے۔اگر وفاقی اور نگراں حکومت نے الیکشن کمیشن کی معاونت نہ کی تو کمیشن سپریم کورٹ کو آگاہ کرے۔سپریم کورٹ نے اپنے فیصلے میں الیکشن شیڈول دے دیا، جس کے مطابق کاغذات نامزدگی 10 اپریل تک جمع کیے جائیں گے۔ اپیل کرنے کی آخری تاریخ 17 اپریل ہوگی اور اپیلوں پر نظرثانی 18 اپریل تک ہوگی۔ امیدواروں کی حتمی فہرست 19 اپریل کو جاری کی جائے گی۔ امیدواروں کو الیکشن نشانات 20 اپریل کو جاری کیے جائیں گے۔عدالتی حکم میں کہا گیا ہے کہ 11 اپریل کو الیکشن کمیشن فنڈز وصولی کی رپورٹ عدالت میں جمع کرائے۔ الیکشن کمیشن کی رپورٹ بینچ ممبران کے چیمبر میں دی جائے گی۔ فنڈز جاری نہ ہوئے تو عدالت رپورٹ کی روشنی میں مناسب حکم جاری کرے گی۔ حکومت پنجاب آئینی ذمہ داریاں نبھانے میں مکمل تعاون کرے گی۔پہلے مرحلے میں پنجاب میں الیکشن کے لیے فنڈز فراہم کیے جائیں۔ نگراں حکومت، آئی جی، چیف سیکرٹری پنجاب سکیورٹی فراہمی یقینی بنائیں۔ وفاقی حکومت الیکشن کے انعقاد کے لیے ہرممکن سہولیات فراہم کرے۔ پنجاب میں اضافی سکیورٹی کے لیے اقدامات کیے جائیں۔ انتخابات کا منصفانہ اور شفاف انعقاد یقینی بنایا جائے،عدالت عظمی نے اپنے شارٹ آرڈر میں واضح کیا کہ یکم مارچ کو حکم پر تین دو کے تناسب سے عمل درآمد ہو چکا ہے۔ اور یہی حکم درست ہے اس فیصلہ میں دو ججز کو اختلافی نوٹس اقلیتی ہونے کے سبب اثر انداز نہیں ہو گا۔ شارٹ آرڈر میں جسٹس قاضی فائز عیسیٰ پر مشتمل دو رکنی بنچ کے از خود نوٹسز کیسز کی سماعتوں کو رولز کی تیاری تک روکنے کے جاری فیصلہ کی کوئی قانونی حیثیت نہیں۔ خیبر پختونخوا کی حد تک جنرل الیکشن کیلئے درخواست گزاروں کو متعلقہ فورم سے رجوع کرنے کی ہدائیت جاری کی گئی ہیں۔تفصیلی فیصلہ بعد میں سنایا جائے گا۔قبل ازیں انتخابات التوا کیس کے سلسلے میں وزارت دفاع نے سربمہر رپورٹ سپریم کورٹ میں جمع کرائی۔اٹارنی جنرل اور وزارت دفاع کے حکام کی جانب سے سکیورٹی اہل کاروں کی دستیابی سے متعلق سربمہر رپورٹ چیف جسٹس کو پیش کی گئی۔چیف جسٹس آف پاکستان عمر عطا بندیال، جسٹس منیب اختر اور جسٹس اعجاز الاحسن نے چیمبر میں رپورٹ کا جائزہ لیا۔

اسلام آباد :پاکستان تحریک انصاف کے چیئرمین عمران خان کے خلاف اسلام آباد میں درج مقدمات کی تفصیلات سامنے آگئیں جس میں ایک ہی دن عمران خان پر 15 مقدمات درج کیے جانے کا انکشاف ہوا ہے۔دستاویزات کے مطابق گزشتہ برس 26 مئی کو مختلف تھانوں میں 15 مقدمے درج کیے گئے، 26 مئی کو تھانہ ترنول میں درج مقدمہ عدالت خارج قرار دے چکی ہے جبکہ باقی مقدمات میں عمران خان کے خلاف ٹرائل جاری ہے۔لانگ مارچ والے دن 25 مئی کو بھی تھانہ کراچی کمپنی میں مقدمہ درج کیا گیا۔عمران خان کے خلاف مقدمات کی فہرست میں 2014 کے دو مقدمے بھی شامل ہیں جبکہ سال 2022 اور 2023 میں 26 مقدمے بنائے گئے۔دو مقدمات سال 2014 میں درج کیے گئے تھے اور 14 مارچ 2023 کو تین نئے مقدمات بنائے گئے۔ عمران خان کے خلاف اسلام ا?باد کے مختلف تھانوں میں اس وقت 28 مقدمات ہیں۔

اسلام آباد:الیکشن کمیشن میں تحریک انصاف کا ممنوعہ فنڈنگ کیس میں پی ٹی آئی کے وکیل کی استدعا منظور کرلی اور مزید سماعت 18 اپریل تک ملتوی کر دی ۔ چیف الیکشن کمشنر سکندر سلطان راجہ کی سربراہی میں تین رکنی بینچ نے کیس کی سماعت کی، پی ٹی آئی کے وکیل انور منصور اور معاون وکیل نوید انجم پیش ہوئے،انور منصور نے کہا کہ ہائی کورٹ میں ہم نے درخواست دی ہے ہائی کورٹ نے جمعہ کو سماعت مقرر کی ہے اگر تھوڑی سی شکایت کرسکوں ہمیں فیصلے کی کاپی چاہیے تھی وہ بہت دیر سے ملی، چیف الیکشن کمشنر نے کہا کہ آپ مجھے بتادیتے یہ بتائیں کہ جواب کیلئے آخری موقع تھا اس فیصلے کو بہت ٹائم ہوگیا جس پر وکیل تحریک انصاف کا کہنا تھا کہ میں کسی کے ذریعے سے ثبوت حاصل کرتا ہوں جب بندوں نے ہمیں فنڈز دیے ان لوگوں کے ایڈریسز ہمارے پاس نہیں ہے ان سب ثبوتوں کو ہم نے جمع کرنا ہے آپ ہمیں ٹائم دے دیں کیس کی سماعت 18 اپریل تک ملتوی کردی گئی۔

اسلام آباد:پنجاب اور خیبر پختونخواہ میں انتخابات کے التواء کے خلاف پی ٹی آئی کی درخواست کی سماعت کے موقع پر پی ٹی آئی کے علاوہ حکومتی اتحادکے رہنما بھی عدالتی کاروائی سننے کیلئے کمرہ عدالت میں موجودتھے، وفاقی وزیر قانون سینیٹر اعظم نذیر تارڑ، وزیر اعظم کے مشیر عطاء تارڑ،راہنماء پی ٹی آئی بابر اعوان،فواد چوہدری، پیپلز پارٹی کے راہنماء فاروق ایچ نائیک، عوامی مسلم لیگ کے سربراہ شیخ رشید احمد سمیت جے یو آئی کے سینیٹر کامران مرتضی عدالتی کاروائی شروع ہونے سے قبل سب سے پہلے پہنچے۔قبل ازیں منگل کی ہی علی الصبح بیرسٹر منصور عثمان اعوان بھی عدالت عظمی پہنچے اور بطور اٹارنی جنرل آف پاکستان چارج سنبھالا، وزارت قانون کی طرف سے گزشتہ روز ہی ان کی بطور اٹارنی جنرل آف پاکستان تعیناتی کو نوٹیفکیشن جاری کیا گیا تھا۔

اسلام آباد:جوڈیشل کمپلیکس جلاؤ گھیراؤ، توڑ پھوڑ کے دوران پولیس اہلکاروں کے ذاتی نقصان کی تلافی کر دی جائے گی۔وفاقی وزیر داخلہ رانا ثناء اللہ خان کے حکم پر 9 اہلکاروں کو نئے موٹر سائیکل دئیے جائیں گے۔ تفصیلات کے مطابق ان اہلکاروں کے موٹرسائیکل پی ٹی آئی کے مشتعل مظاہرین نے جلا دئیے تھے۔آئی جی اسلام آباد ڈاکٹر اکبر ناصر خاں آج نئے موٹر سائیکل پولیس اہلکاروں کے حوالے کریں گے۔آئی جی اسلام آباد ڈاکٹر اکبر ناصر خاں کا کہنا ہے کہ فورس کی ویلفئیر اور ضروریات کا ہرطرح سے خیال رکھا جائے گا۔پی ٹی آئی کے مشتعل کارکنان نے جوڈیشل کمپلیکس میں جلاو گھیراو کے دوران سرکاری و نجی املاک کو نقصان پہنچایا۔سب پولیس اہلکاروں کے ذاتی نقصان پورا کیا جائے گا۔۔۔۔ عامر چوہدری

لاہور:مسلم لیگ (ن) اسیر رہا ئی کمیٹی برائے اظہار یکجہتی قا ئد کے سیکر ٹری اطلاعا ت، ممبرپی ڈی ایم رابطہ کمیٹی لاہور محمد سلیم ر ضا نے کہا ہے کہ پوری قوم عمران خان سے نفر ت کا اظہار کررہی ہے،پو لیس پر پتھروں کرنیوالے اور اداروں کی گاڑیو ں کو نظر آ تش کرنے والے کسی رعایت کے مستحق نہیں، تحریک انصا ف نے ملک میں نفر ت کی سیا ست کو پروان چڑھاکر نو جوان نسل کو تباہ کردیا ۔ اپنے جاری بیان میں انہو ں نے کہاکہ عمران نیازی نے 2014 میں ڈی چوک دھرنا دیا جہاں انہوں نے طوفان بدتمیزی برپا رکھا پی ٹی وی اسٹیشن ایوان صدر اور وزیراعظم ہائوس پر حملہ کیا پولیس کو مارنے، بجلی کے بل جلائے تھانوں میں جا کر اپنے لوگوں کو زبردستی رہا کرایا۔ پارلیمنٹ کا تقدس پامال کیا وزیراعظم بنے تو اپوزیشن کو ملک اور بیرون ملک چور، ڈاکو اور غدرا کہا مخالف سیاستدانوں کو جیلوں میں بند رکھا عدم اعتماد کے بعد وزیراعظم ہاس چھوڑنے کو تیار نہیں تھا ۔ انہو ں نے کہاکہ عمران نیازی ایک انتشار پسند شخص ہے جس کی سیاست کی بنیاد ہی انتشار ہے جو ملک و قوم کے زوال کا باعث بن رہی ہے جس پر ملک کی سلامتی کے ذمہ دار اداروں کو فوری ایکشن لینا ہو گا ۔

اسلام آباد:سپریم کورٹ کے واضح حکم کے باوجود گورنر خیبرپختونخوا کی جانب سے صوبے میں انتخابات کی تاریخ کا اعلان نہ کئے جانے پر پاکستان تحریک انصاف کی طرف سے گورنر کے پی کے کے خلاف توہین عدالت کی درخواست دائر کر دی گئی ہے۔ سابق سپیکر قومی اسمبلی اسد قیصر اور سابق سپیکر کے پی اسمبلی مشتاق غنی کی طرف سے دائر درخواست میں موقف اپنایا گیا ہے کہ عدالت عظمی کی طرف سے گورنر خیبر پختونخواہ کو صوبے میں جنرل الیکشن کی تاریخ دینے جبکہ وفاقی حکومت کو سہولیات کی فراہمی کا حکم دیا گیا تھا۔ وضح عدالتی احکامات کے باوجود گورنر کے پی کے تا حال صوبے میں الیکشن کی تاریخ نہیں دے رہے۔ درخواست میں گورنر کے پی کے کے خلاف توہین عدالت کی کاروائی شروع کرنے کی استدعا کی گئی ہے۔گورنر کے پی کے خلاف توہین عدالت کی درخواست آئین کے آرٹیکل 204 کے تحت دائر کی گئی ہے۔(توصیف)

اسلام آباد :توشہ خانہ کیس میں چیئرمین پی ٹی آئی عمران خان کے وارنٹ گرفتاری منسوخی کا تحریری حکم نامہ جاری ہوگیا، ایڈیشنل سیشن جج ظفر اقبال نے تین صفحات کا حکم نامہ جاری کیا ہے،  عدالتی آرڈر شیٹ گم ہونے کے بعد نئی آرڈر شیٹ تیارکرلی گئی۔تحریری فیصلے کے مطابق عدالت نے عمران خان کو 30 مارچ کو ذاتی حیثیت میں طلب کیا ہے۔ فیصلے میں عدالت نے کہا ہے کہ آئندہ سماعت پر فوجداری کارروائی کے قابل سماعت ہونے پر دلائل ہوں گے، 18 مارچ کی تین دفعہ کی سماعتوں کا الگ الگ حکم نامہ جاری کیا گیا ہے، ایس پی سمیع ملک، عمران خان کے وکلا بیرسٹر گوہر  اور  خواجہ حارث کے بیانات حکم نامیکا حصہ ہیں۔فیصلے میں لکھا ہے کہ عدالت کو بتایا گیا  کہ گم شدہ آرڈر شیٹ کمپیوٹر میں محفوظ ہے، فائل گم ہونے کے تنازع کے حل کے لیے فائل دوبارہ بنائی گئی ہے،  دن ساڑھے 3 بجے عدالت کو بتایا گیا عمران خان عدالت پہنچنے والے ہیں، عدالت نے ہدایت کی کہ عمران خان چار بجے پیش ہوں،وکلاء، میڈیا اور  باقی لوگوں نے بتایا عمران خان 4 بجے سے گیٹ کے باہر موجود ہیں، عدالت کوبتایا گیا امن و امان کی صورتحال اور پتھراؤ کی وجہ سے عمران خان کا عدالت پہنچنا مشکل ہے، عدالت کو بتایا گیا مناسب ہوگا گاڑی سے ہی عمران خان کے دستخط کروا لیے جائیں۔حکم نامیکے مطابق ناخوشگوار  واقعے سے بچنے کے لییگاڑی سے حاضری لگوانیکی ہدایت کی گئی،  شبلی فراز ، بیرسٹر گوہر اور ایس پی سمیع ملک کو دستخط کرانے کے لیے بھیجا گیا، عدالت کو بعد میں بتایا گیا آرڈر شیٹ گم ہوگئی ہے، آرڈرشیٹ پر بیرسٹر گوہر، خواجہ حارث اور  ایس پی نے بیان ریکارڈ کروایا۔عدالت نے تو شہ خانہ کیس میں عمران خان پر فردجرم کی کارروائی مؤخر کرتے ہوئے چیئرمین پی ٹی آئی کے وارنٹ گرفتاری منسوخ کرتے ہوئے کیس کی سماعت 30 مارچ تک ملتوی کر دی۔جج ظفر اقبال کا کہنا تھا 30 مارچ کو کیس کے قابل سماعت ہونے پر دلائل ہوں گے، 30 مارچ کو عمران خان کی حاضری بھی ہوگی۔

اسلام آباد:اسلام آباد ہائی کورٹ چیف جسٹس عامر فاروق کی عدالت نے سیاسی جماعتوں کی ممنوعہ فنڈنگ کیس میں سکروٹنی کمیٹی کو پی ٹی آئی کے علاوہ دیگر جماعتوں کی سکروٹنی جلد مکمل کرنے کی فرخ حبیب کی درخواست پر سماعت کی، الیکشن کمیشن کی جانب سے عدالت میں تحریری جواب جمع کروایا گیا ۔عدالت نے استفسار کیا کہ کیا ہم الیکشن کمیشن کو ڈائریکشن دے سکتے ہیں یا نہیں جس پر وکیل صفائی بیرسٹر علی گوہر نے عدالت کو بتایا کہ سکروٹنی کمیٹی الیکشن کمیشن کی تشکیل کردی کمیٹی ہے ،ہائی کورٹ کے پاس الیکشن کمیشن کے سکروٹنی کمیٹی کو ہدایات دے سکتی ہیں، اس موقع پر وکیل پی ٹی آئی عمائمہ انور خان نے سپریم کورٹ کے مختلف فیصلوں کا حوالہ جات دے، عدالت نے آئندہ سماعت پر الیکشن کمیشن کو ہدایات دینے متعلق عدالت کو مطمئن کرنے کی ہدایت کرتے ہوئے کیس کی سماعت 29 مارچ تک کے لئے ملتوی کردی

اسلام آباد: اسلام آباد ہائی کورٹ نے اسلام آباد کی حد تک عمران خان کے خلاف درج تمام مقدمات کا ریکارڈ طلب کر لیا۔اسلام آباد ہائی کورٹ کے چیف جسٹس عامر فاروق نے سابق وزیراعظم عمران کی اپنے خلاف درج مقدمات کی تفصیلات فراہمی کی درخواست پر نوٹسز جاری کرتے ہوئے فریقین سے 27 مارچ تک جواب طلب کرلیا۔ عمران خان کے وکیل فیصل چوہدری نے کہا کہ عمران خان کے خلاف 47 مقدمات اسلام آباد میں درج ہوگئے ہیں اسلام آباد پولیس نے کچھ ایف آئی آرز چھپائی ہیں ہیں جس پر عدالت نے کہا کہ آپ کو معلوم ہونا چاہیے کہ ایف آئی آر سیلڈ نہیں ہوتی ایف آئی آر پبلک دستاویزات ہے وہ سیل نہیں ہوسکتی، پولیس تحقیقات کے لیے بلا لیتی ہے عمران خان کے وکیل نے عدالت سے استدعا کی کہ اسلام آباد کی حد تک درج تمام مقدمات کی تفصیلات کی فراہمی کی جائیں جس پر چیف جسٹس نے کہا کہ اسلام آباد ہائی کورٹ کی دائر اختیار تک فریقین کو نوٹسز کرتا ہوں ،عدالت نے عمران خان کے وکیل سے استفسار کیاکہ کیا آپ نے اعظم سواتی کیس کا فیصلہ پڑھا ہے؟ کس کے خلاف کتنے مقدمات درج انکی ریکارڈ فراہمی سے متعلق کوئی قانون نہیں ہے،اعظم سواتی کیخلاف بھی پورے پاکستان میں مقدمات درج تھے جس پر عمران خان کے وکیل نے کہا کہ اگر ہمیں بتا دیا جائے تو پھر ہم قانونی راستہ اختیار کر لیں، عدالت نے فریقین کو نوٹسز جاری کرکے کیس کی سماعت 27 مارچ تک ملتوی کردی کر دی۔(راجہ بشارت)