Category سائنس اور ٹیکنالوجی

واشنگٹن:(نیٹ نیوز/ایمرا نیوز) ماہرین نے کائنات کا گرم ترین سیارہ دریافت کرلیا.
ماہرین فلکیات نےکائنات کا گرم ترین سیارہ دریافت کیا ہے جو زمین سے 650 نوری سال کے فاصلے پر واقع ہے۔
کائنات کے سب سے گرم سیارے سے متعلق تفصیلات بین الاقوامی سائنسی جریدے ’نیچر‘ میں شائع ہوئی ہیں، ماہرین نے اسے کسی ستارے اور سیارے کے درمیانی شے قرار دیا ہے اور اسے ’ای ایل ٹی نائن بی‘ کا نام دیا گیا ہے۔ اس کا اوسط درجہ حرارت 3,770 ڈگری سینٹی گریڈ تک ہے، شدید گرمی کی وجہ سے یہ سیارہ اپنی رنگت تبدیل کرچکا ہے اور اس کی فضا میں بھاری دھاتوں کے ایٹم بکھرے ہوئے ہیں۔

ماہرین کا کہنا ہے کہ ’ای ایل ٹی نائن بی‘ 2016 کے آخر میں دریافت ہوا تھا اور اس پر تحقیق جاری تھی، اس پر فولاد اور ٹائٹانیئم جیسی بھاری دھاتیں موجود ہیں لیکن اتنی گرمی میں وہ بخاراتی شکل میں ایٹموں میں تبدیل ہوچکے ہیں کیونکہ اس قدر بلند درجہ حرارت پر دھاتیں پگھل کر بخارات بن چکی ہے اور اس کے ایٹم آزاد حالت میں گردش کررہے ہیں۔
ماہرین کے مطابق یہ سیارہ خود کئی ستاروں سے زیادہ گرم ہے۔ جدید ترین طریقوں سے اس کا درجہ حرارت اور بھاری دھاتوں کی موجودگی کا پتہ لگایا گیا ہے۔ اس سیارے پر تحقیق سے ہمیں یہ بھی معلوم ہوسکے گا کہ آخر کون سے سیارے گیسی دیو بن کر دہکنے لگتے ہیں اور وہ ستارہ نہیں بن پاتے، اس کے علاوہ کس طرح کچھ سیارے ہماری زمین جیسی ٹھوس شکل اختیار کرلیتے ہیں۔

لاہور(نیٹ نیوز/ایمرا نیوز) وائی فائی سگنلز اب آپ کو سیکیورٹی بھی دے سکتے ہیں.
یوں تو وائی فائی سگنلز صرف انٹرنیٹ سروس مہیا کرنے میں کارآمد تھے لیکن اب ان سے سیکیورٹی کا جائزہ بھی بخوبی لیا جا سکے گا۔
امریکا کی رٹگرز یونیورسٹی- نیو برنس وِک (Rutgers University-New Brunswick) کی جدید تحقیق کے مطابق عام وائی فائی کی مدد سے عوامی مقامات پر اسلحے اور دھماکا خیز مواد کی نشان دہی کی جا سکتی ہے۔
محققین کے مطابق وائرلیس سگنلز خطرناک اور دہشت پھیلانے والی اشیاء کا جائزہ لینے میں مددگار ثابت ہوسکتے ہیں۔
سائنسدانوں نے وائی فائی سگنلز کو سیکیورٹی مقاصد کے لیے استعمال کرنے کی غرض سے کئی مرتبہ آزمائش کی اور اس کے نتائج 95 فیصد درست رہے۔

محققین کا کہنا ہے کہ وائی فائی سسٹم روایتی سیکیورٹی سسٹم سے زیادہ معاون ہے کیونکہ اس کی وجہ سے اسکریننگ سسٹم پر آنے والی لاگت ختم ہوجائے گی اور نہ ہی لوگوں کے ذاتی بیگز وغیرہ کو کھول کر چیک کرنا پڑے گا جب کہ اس وقت جو سیکیورٹی اسکریننگ سسٹم استعمال کیا جارہا ہے، اس میں زیادہ اہلکاروں اور آلات کی ضرورت پیش آتی ہے جس سے وقت کا بھی ضیاع ہوتا ہے۔
اس تحقیق میں شریک ایک محقق کا کہنا ہے کہ لوگوں کے بیگز اور اشیاء چیک کرنے کے لیے ہمیشہ اہلکاروں کی ضرورت ہوتی ہے، لہذا ہماری کوشش ہے کہ وائی فائی کے ذریعے اس کام کو آسان کردیا جائے۔
ان کا کہنا تھا کہ کسی بڑی عوامی جگہ پر انفراسٹرکچر کی سیکیورٹی پر مہنگی اسکریننگ کرنی پڑتی ہے کہ کہیں کسی کے پاس ایسا مواد یا ہتھیار تو نہیں جو کہ خطرے کا باعث ہو اور یہ ایک مشکل کام ہے تاہم وائی فائی سیکیورٹی سستم کے تحت یہ اسکین کرنے میں آسانی ہوگی کہ کس فرد کے بیگ میں یا جیب میں کیا ہے۔
سیکیورٹی وائی فائی ڈیوائس 2 یا تین اینٹینوں پر مشتمل ہوگی جس کا ایک سگنل اشیاء اور ہتھیار کا جائزہ لے گا جب کہ دوسرا اس حوالے سے نشاندہی کرے گا۔
اس سسٹم کے تحت ہتھیار، ایلومینیم، کینز لیپ ٹاپ، بیٹریز اور دیگر اسٹیل اور دھات کی چیزوں کی شناخت کی جاسکتی ہے، ساتھ ہی یہ اس حوالے سے بھی آگاہ کردے گا کہ کسی کے پاس الکوحل، تیزاب یا کوئی بھی کیمیکل والی چیز تو نہیں۔

اوہایو:(نیٹ نیوز/ایمرا نیوز) اسمارٹ فونز اور ٹیبلٹز استعمال کرنے والوں کو سائنس دانوں نے خطرناک خبر سنا دی ہے.
رپورٹ کے مطابق اسمارٹ فون اور ٹیبلٹ سے خارج ہونے والی نیلی روشنی (بلیولائٹ) مسلسل آنکھوں پر پڑتی رہے تو اس سے آنکھوں کو شدید نقصان پہنچ سکتا ہے۔
یہ روشنی دن میں تو نقصان دہ ہے ہی، لیکن رات میں اس کا اثر چکھ زیادہ ہوتا ہے۔ وجہ یہ ہے کہ نیلی روشنی یا تو سورج کی روشنی میں ہوتی ہے یا پھر ٹیبلٹ یا اسمارٹ فونز سے خارج ہوتی ہے۔
بلند توانائی والی یہ روشنی ایک جانب تو جسم کی اندرونی گھڑی کو متاثر کرتی ہے، تو دوسری جانب آنکھوں میں تناوؤ اور سبزموتیا کی وجہ بھی بن سکتی ہے۔

یونیورسٹی آف ٹولیڈو نے مفصل تحقیق کرنے کے بعد کہا ہے کہ اسمارٹ آلات سے خارج ہونے والی بلیو لائٹ 445 نینومیٹر شارٹ ویو موج ہوتی ہے اور یہ روشنی آنکھوں کے خلیات کو خوفناک انداز میں متاثر کرتی ہے۔
اس روشنی پر تحقیق کرنے والے پروفیسر اجیت کنورارتنے کہتے ہیں کہ آنکھ کے پردے یا ریٹینا پر نیلی روشنی کی شعاعیں پڑتے ہی وہاں ایک کیمیائی تعامل شروع ہوجاتا ہے، اس سے روشنی وصول کرنے والے خلیات (فوٹوریسپٹرز) شدید متاثر بلکہ ختم ہونے لگتے ہیں، سب سے تشویش ناک بات یہ ہے کہ تباہ ہونے والے یہ خلیات دوبارہ نہیں بنتے۔
پروفیسر نے بتایا کہ اس خطرے سےبچنے کے لیے رات کے وقت موبائل فون پر نظریں جمانے کی عادت کو لازماً ترک کردیا جائے، اگر اسمارٹ فون پر کچھ دیکھ یا پڑھ رہے ہوں تو فون کا نائٹ ورژن استعمال کرنا بہت ضروری ہے۔

فلوریڈا :(نیٹ نیوز/ایمرا نیوز) ناسا نے سورج کی جانب پہلا خلائی جہاز بھیج دیا ہے.
امریکی خلائی تحقیقاتی ادارے ناسا نے سورج کی جانب پہلا خلائی جہاز تحقیقاتی مشن پر بھیج دیا، ایک گاڑی جتنی جسامت کے خلائی جہاز کو ’’ پارکر سولر پروب‘‘ کا نام دیا گیا ہے۔
تفصیلات کے مطابق امریکی خلائی ایجنسی ناسا نے تاریخ میں پہلی بار سورج کا قریب سے مشاہدہ کرنے کے لیے سیٹلائٹ روانہ کیا ہے۔ فلوریڈا سے بھیجے گئے پارکر نامی خلائی تحقیقاتی سیٹلائٹ انسانی تاریخ میں سب سے تیز رفتار مصنوعی سیارہ ہے جو کہ چھ لاکھ نوے ہزار کلومیٹر فی گھنٹہ کی رفتار سے سفر کرے گا۔
جس کا مطلب ہے کہ نیویارک اور ٹوکیو کےدرمیان فاصلہ ایک منٹ سے بھی کم میں طے ہوگا۔ مذکورہ پارکر سٹیلائٹ سورج کے گرد چکر لگاتے ہوئے معلومات ارسال کرے گا۔

اس خلائی جہاز کو انتہائی طاقتور راکٹ کے ذریعے بھیجا گیا ہے جسے مشن کے دوران انتہائی گرمی اور تابکاری کا بھی سامنا کرنا پڑے گا۔ اس کے حساس آلات کو گرمی سے بچانے کے لیے خصوصی اقدامات کئے گئے ہیں۔
ناسا کے مطابق ایک عام سی گاڑی کے سائز کا سیارہ سورج سے اکسٹھ لاکھ کلومیٹر کے فاصلے تک پہنچے گا، یہ اس سے پہلے بھیجے گئے مصنوعی سیاروں کی نسبت سات گنا زیادہ قریب پہنچے گا۔
سات برس جاری رہنے والے مشن کے دوران وہ سورج کی سطح پر ہونے والی تبدیلیوں اور طوفان، جسے سولر ونڈ کہتے ہیں، کا جائزہ لے گا۔
آج تک سورج کی جانب بھیجے گئے تمام سابقہ مشنز کے مقابلے میں یہ جہاز اس ستارے کے سب سے زیادہ قریب تک پہنچے گا۔ اس خلائی مشن کا کام یہ ہو گا کہ یہ سورج کے کرونا کہلانے والے بیرونی ایٹموسفیئر کے قریب پہنچے گا۔

لاھور(نیٹ نیوز)پہلی مرتبہ انجکشن کے ذریعے انسولین لگانے کی گائیڈلائن جاری پاکستان میں ذیابطیس کے مریضوں کی تعداد 3کروڑ 50لاکھ سے زائد ہے جن میں سے صرف 4سے 5لاکھ مریض اپنی شوگر کنٹرول کرنے کے لئے انسولین کا استعمال کرتے ہیں جس کی وجہ سے ہزاروں ذیابطیس کے مریض شوگر بڑھ جانے کے نتیجے میں اپنی ٹانگوں سے محروم ہوجاتے ہیں اور کچھ عرصے میں زندگی کی بازی ہار جاتے ہیں۔
دوسری طرف غلط انسولین ا ستعمال کرنے والے مریضوں کو آگہی نہ ہونے کی وجہ سے اکثر اوقات اپنے ہاتھوں اور پیروں سے محروم ہونا پڑتا ہے ، ان خیالات کا اظہار عالمی اور پاکستانی ماہرین نے گائیڈ لائن نیشنل ایسوسی ایشن آف ڈائیبیٹیز ایجوکیٹرز آف پاکستان کے زیر اہتمام منعقدہ ڈائیبیٹیزکانفرنس کے دوران کیا۔کانفرنس سے بیلجیم سے تعلق رکھنے والی ڈاکٹر کرسٹین وین ایکر،تھائی لینڈ کے ڈاکٹر گلاپار سیری واسدی، انٹرنیشنل ڈائیبیٹیز فیڈریشن مینا ریجن کے سربراہ پروفیسر عبد الباسط، تنزانیہ سے تعلق رکھنے والے ماہر امراض زیابطیس ڈاکٹر ذوالفقار جی عباس، کانفرنس کے چیئرمین پروفیسر زاہد میاں،متحدہ عرب امارات سے تعلق رکھنے والے پروفیسر حمید فاروقی ،پروفیسر بلال بن یونس ، مشرق وسطیٰ سے تعلق رکھنے والے ڈاکٹر طارق فیاض، پروفیسر جمال ظفر ،ڈاکٹر عصمت نواز، ڈاکٹر سیف الحق، ڈاکٹر مسرت ریاض ، ڈاکٹر ظفر عباسی،ڈاکٹر ارم غفورنے بھی خطاب کیا۔کانفرنس سے خطاب کرتے ہوئے تنزانیہ کے ماہر امراض ذیابطیس پروفیسر ذوالفقار جی عباس کا کہنا تھا کہ دنیا کی ایک بہت بڑی آبادی ذیابطیس کا شکار ہوکر پاؤں کٹنے کے خدشات سے دور چار ہے،انسولین کا استعمال ذیابطیس پر کنٹرول کرنے میں مدد دیتا ہے۔جن لوگوں کے پاؤں میں شوگر کی وجہ سے زخم ہوجائیں انہیں انسولین کا استعمال کرنا چاہیے تاکہ ان کی ٹانگوں کو کٹنے سے بچایا جا سکے۔کانفرنس کے چیئرمین پروفیسر زاہد میاں نے اعداد و شمار کی مدد سے بتایا کہ پاکستان میں سالانہ دو لاکھ 70ہزار مریض پاؤں اور ٹانگیں کٹنے کی پیچیدگیوں کا شکار ہوجاتے ہیں ، خوش قسمتی سے ان میں سے 80فیصد افرادکے اعضاء کو علاج اور آگہی کے ذریعے ضائع ہونے سے بچایا جا سکتا ہے ۔ان کا کہنا تھا کہ ان کا ادارہ ایسے جوتے تیار کر رہا ہے جس کے نتیجے میں پاؤں کی بہتر حفاظت ہو سکتی ہے اور یہ جوتے یورپین مشینوں کے ذریعے تیار کیے جانے کے باوجود نہایت ارزاں قیمت پر مریضوں کو مہیا کیے جاتے ہیں۔انٹرنیشنل ڈائیبیٹیز فیڈریش مینا ریجن کے سربراہ پروفیسر عبد الباسط کا کہنا تھا کہ انہوں نے پاکستان کے طول و ارض میں ایک سو پندرہ فٹ کلینک قائم کیے ہیں ،جہاں پر ذیابطیس میں مبتلا مریضوں کو علاج کی سہولتیں فراہم کرکے ان کے اعضاء کو کٹنے سے بچایا جا تا ہے۔پہلی مرتبہ انجکشن کے ذریعے انسولین لگانے کی گائیڈلائن جاری انہوں نے بتایا کہ اس کانفرنس کا مقصد زیابطیس کے نتیجے میں ہونے والی باہ کاریوں سے آگہی پھیلانا ، ضرورت مند مریضوں کو انسولین کے استعمال کی طرف راغب کرنا ، انسولین کو استعمال کرنے کی آگہی فراہم کرنا اور غلط طریقوں سے انجکشن لگانے کے ممکنہ تباہ کاریوں سے مریضوں کو بچانا ہے ۔بقائی انسٹیٹیوٹ آف ڈائیبٹالوجی اینڈ انڈوکرائینالوجی سے وابستہ ڈاکٹر مسرت ریاض کا کہنا تھا کہ انسولین ایک جان بچانے والا محلول ہے جس کے ذریعے پوری دنیا میں ہر سال لاکھوں جانیں بچائی جاتی ہیں ۔بد قسمتی سے پاکستان میں انسولین استعمال کرنے والوں یی تعداد بہت کم ہے ان میں سے بھی مریضوں کی اکثریت انسولین کو غلط طریقے سے لگاتی ہے ۔انہوں نے اس موقع پر انسولین لگانے کی سفارشات (گائیڈلائن) پیش کیں اور ڈاکٹروں سے درخواست کی کہ وہ اپنے مریضوں کو Forum for injection techniques گائیڈ لائینز سے آگاہ کریں۔

لاہور: (نیٹ نیوز/ایمرا نیوز) آج دنیا بھر میں رواں برس کا آخری سورج گرہن ہے.
رواں برس کا تیسرا اور آخری جزوی سورج گرہن 11 اگست کو ہوگا۔
محکمہ موسمیات کا کہنا ہے کہ گذشتہ دونوں جزوی سورج گرہن کی طرح تیسرا سورج گرہن بھی پاکستان میں نہیں دیکھا جاسکے گا۔

جزوی سورج گرہن کا آغاز پاکستانی وقت کےمطابق دوپہر 1 بجکر 2 منٹ پر ہوگا جس کا اختتام 4 بجکر 31 منٹ پر ہوگا۔
یہ سورج گرہن شمالی و مشرقی یورپ اور شمالی و مغربی ایشیاء کے ممالک میں دیکھا جا سکے گا، جن میں تسمانیہ، نیوزی لینڈ، آئس لینڈ، انٹارکٹیکا، بحر اوقیانوس اور بحرہند شامل ہیں۔
واضح رہے کہ رواں برس کا پہلا جزوی سورج گرہن 16 فروری جبکہ دوسرا 13 جولائی کو دیکھا گیا تھا۔
سورج کو گرہن اُس وقت لگتا ہے جب چاند، سورج اور زمین کے درمیان آجاتا ہے، جس کی وجہ سے سورج کا مکمل یا کچھ حصہ دکھائی دینا بند ہو جاتا ہے اور اس صورت میں چاند کا سایہ زمین پر پڑتا ہے۔

کیلیفورنیا:(نیٹ نیوز/ایمرا نیوز) 2 سال میں فیس بک کا ٹریفک 50 فیصد کم ہوگیا ہے.
دنیا بھر میں مقبول سوشل میڈیا ویب سائٹ ’’فیس بک‘‘ کی مقبولیت کا گراف تیزی سے نیچے آرہا ہے۔ اب ایک محتاط اندازے کے مطابق گزشتہ دو برس میں اس پر آنے والے وزیٹرز کی تعداد یعنی ’’ٹریفک‘‘ میں 50 فیصد تک کمی واقع ہوگئی ہے۔

دو سال پہلے تک فیس بک پر وزٹس کی ماہانہ تعداد 8.5 ارب (آٹھ ارب پچاس کروڑ) تھی جو اس سال یعنی 2018 کے وسط تک کم ہو کر 4.7 ارب (چارارب ستر کروڑ) ماہانہ رہ گئی ہے۔ اس بات کا انکشاف ویب سائٹ ٹریفک پر نظر رکھنے اور تجزیہ کرنے والے آزاد پلیٹ فارم سمیلر ویب کی ذیلی ویب سائٹ ’’مارکیٹ انٹیلی جنس ڈاٹ آئی او‘‘ پر ایک تجزیہ نگار نے اپنے تازہ جائزے ’’پیراڈائم شفٹ‘‘ میں کیا ہے۔ جائزے کے مطابق ایک طرف فیس بُک پر آنے والے صارفین کی تعداد میں نمایاں کمی واقع ہوئی ہے جبکہ دوسری جانب یوٹیوب پر آنے والے افراد کی تعداد میں غیرمعمولی اضافہ ہوا ہے۔
سمیلر ویب کے مطابق گزشتہ ماہ جولائی میں یوٹیوب پر ساڑھے چار ارب افراد آئے تھے اور اگر اسی رفتار سے یہ گراف بڑھتا رہا تو بہت جلد فیس بک دوسری اور یوٹیوب پہلی مقبول ترین ویب سائٹ بن جائے گی؛ جبکہ دنیا کے سب سے بڑے ویب سرچ انجن (گوگل) پر گزشتہ ماہ وزیٹرز کی تعداد 15 ارب 20 کروڑ نوٹ کی گئی۔
اگرچہ یہ فیس بک کے لیے ایک بری خبر تو ہے جو پرائیویسی کے معاملات، امریکی انتخابات میں جعلی خبروں اور اسٹاک مارکیٹ میں گرتے حصص کی وجہ سے پہلے ہی بہت نقصان اٹھا چکا ہے تاہم سمیلر ویب نے فیس بک کو موبائل ایپس میں بہترین قرار دیا ہے۔
فیس بک صارفین براؤزر کے بجائے بہت تیزی سے ایپس کی جانب متوجہ ہورہے ہیں۔ اسی طرح فیس بک ایپ کے صارفین بھی تیزی سے بڑھ رہے ہیں، لیکن یہ اضافہ براؤزر چھوڑنے والوں کی تعداد کے لحاظ سے بہت کم ہے۔ اسی بنا پر کہا گیا ہے کہ فیس بک ٹریفک میں مجموعی طور پر کمی واقع ہوئی ہے۔
اسی طرح فیس بک کے دیگر پلیٹ فارمز مثلاً انسٹاگرام اور میسنجر پر بھی صارفین کی تعداد بڑھ رہی ہے۔ البتہ فیس بک تجزیہ کاروں نے کہا ہے کہ شاید اس کی وجہ یہ بھی ہے کہ ادارہ فیس بک اپنے مرکزی پلیٹ فارم کے بجائے اپنی دیگر اور مختلف اقسام کی سروسز پر توجہ دے رہا ہے۔

جنوبی کوریا:(نیٹ نیوز/ایمرا نیوز) نیاگیلکسی نوٹ 9 اس ماہ دھوم مچانے کو تیار ہے.
سام سنگ نے اعلان کیا ہے کہ اس کا نیا گیلکسی نوٹ 9 اس ماہ یعنی اگست 2018 کے تیسرے ہفتے میں فروخت کےلیے پیش کیا جائے گا۔ اس بار بڑی اسکرین، 20 فیصد زیادہ بیٹری اور بلیو ٹوتھ پین اس کے نئے فیچرز میں شامل ہیں۔
گیلکسی نوٹ 9 کی بیٹری اس بار 4000 ایم اے ایچ کی ہے جو پہلے ماڈل سے 20 فیصد زیادہ ہے۔ نئے نوٹ میں بعض تبدیلیوں کی پہلے ہی پیش گوئی کی جاچکی تھی جن میں ایس نائن پلس سے ڈبل کیمرہ لیا گیا ہے، چھ یا آٹھ جی بی ریم کے ساتھ اسنیپ ڈریگن 845 چپ سیٹ اور 6.4 انچ اسکرین کے ساتھ یہ 128 جی بی سے شروع ہورہا ہے اور 512 جی بی تک میں دستیاب ہوگا۔

امریکا میں گیلکسی نوٹ 9 کو گہرے نیلے اور بنفشی رنگ میں پیش کیا جارہا ہے۔ اس کا ڈسپلے سپر اے ایم اوایل ای ڈی پر مبنی ہے جس سے اسکرین کا معیار بڑھا ہے۔ سام سنگ کا دعویٰ ہے کہ کیمرے سے تصاویر کےلیے آرٹیفشیل سین آپٹیمائزر بنایا گیا ہے لیکن تجزیہ کار اس سے متاثر نہیں ہوئے ہیں۔
صرف 40 سیکںڈ میں چارج ہونے والا پین
گیلکسی نوٹ کا لازمی حصہ ایس پین اس بار بلیو ٹوتھ فیچر کے ساتھ پیش کیا جارہا ہے جو فون سے صرف 40 سیکنڈ میں چارج ہوجاتا ہے جبکہ بلیو ٹوتھ ایل ای کنکشن کے ساتھ یہ آدھے گھنٹے میں چارج ہوتا ہے۔ سام سنگ کیمروں کے سافٹ ویئر میں صارفین نے غیرضروری کنٹراسٹ اور تبدیلیوں کی شکایت کی تھی۔ اسی بنا پر اب مصنوعی ذہانت پر مبنی کیمرہ پیش کیا گیا ہے۔

گیلکسی ایس پین اب ریموٹ کنٹرول کی سہولت بھی فراہم کررہا ہے۔ اس پر لگے بٹن ایپ کھولنے، تصویر لینے اور دیگر ضروری کاموں کےلیے استعمال ہوسکتے ہیں۔
128 جی بی گیلکسی نوٹ کی قیمت ایک ہزار ڈالر ہوگی جبکہ 512 جی بی والا ماڈل 1250 ڈالر میں فروخت کیا جائے گا۔

اسلام آباد: (نیٹ نیوز/ایمرا نیوز) ماہرین نے جنوبی ایشیا کے تمام بڑے دریاؤں کے متعلق ہوش اُڑ دینے والا انکشاف کردیا.
ماہرین نے کہا ہے کہ مستقبل میں پاکستان سمیت جنوبی ایشیا کے تمام بڑے دریاؤں میں پانی کی فراہمی اور بہاؤ میں غیرمعمولی اضافہ ہوگا۔
اقوامِ متحدہ کے تحت بین الحکومتی پینل برائے آب و ہوائی تبدیلی (آئی پی سی سی) کی پانچویں تجزیاتی رپورٹ میں ماہرین نے کہا ہے کہ نمی سے بھرپور مستقبل جنوبی ایشیائی دریاؤں کا منتظر ہے اور اس کےلیے ماہرین نے 1976 سے 2005 کے درمیان خطے کے دریاؤں کا ایک بیس لائن سروے کیا ہے۔

رپورٹ کے مطابق 2046 سے 2075 کے درمیان جنوبی ایشیا کے تمام بڑے دریاؤں میں پانی کی مقدار 20 سے 30 فیصد تک بڑھ جائے گی۔ اس بات کا انکشاف رپورٹ کے مرکزی مصنف ہونگ ژنگ زینگ نے کیا ہے جس کی تفصیلات جرنل آف ہائیڈرولوجی میں شائع ہوئی ہیں۔
اس وقت جنوبی ایشیا کے جو علاقے خشک ہیں وہاں نمی دو فیصد سے زائد اور موجود نمی سے بھرپور علاقوں میں ڈیڑھ سے دو فیصد نمی بڑھ جائے گی۔ ماہرین نے 29 برس تک جنوبی ایشیا کے دریاؤں کے بہاؤ میں کمی بیشی کو احتیاط سے نوٹ کیا ہے۔
جنوبی ایشیا 54 بڑے دریاؤں کی سرزمین ہے جن میں دریائے سندھ، دریائے گنگا اور دریائے برہم پترا اور اس کے طاس بہت مشہور ہیں۔ ان کا ظہور چین علاقے تبت سے ہوتا ہے۔ دریائے سندھ کا طاس چین کو افغانستان، پاکستان اور بھارت سے ملاتا ہے جبکہ برہم پترا اور گنگا سے جڑنے والے ممالک میں بنگلہ دیش، بھوٹان، بھارت اور نیپال شامل ہیں۔
سروے کے دوران ماہرین نے زمینی اور سیٹلائٹ ڈیٹا اور تصاویر سے دریاؤں کا مستقبل نامہ تخلیق کیا ہے جو نئے مطالعے سے ہم آہنگ بھی ہے۔
دریائے سندھ کا پانی 10 فیصد بڑھ جائے گا
ماہرین نے کہا ہے کہ مستقبل میں دریائے سندھ کے پانی کا بہاؤ 10 فیصد تک بڑھ سکتا ہے جبکہ گنگا اور برہم پترا میں پانی کی مقدار 15 فیصد تک بڑھ سکتی ہے۔ سری لنکا کے نرمدا تاپتی علاقے کے دریاؤں میں پانی میں 20 فیصد تک اضافہ ہوگا۔
پاکستان کے بالائی علاقوں میں ہزاروں گلیشیئر موجود ہیں اور ان کا پگھلاؤ تیزی سے جاری ہے۔ برف گھلنے سے گلگت، استور اور دیگر علاقوں کا پانی بھی دریائے سندھ میں شامل ہوجائے گا۔ اس طرح پورے دریائے سندھ میں پانی کی مقدار اور بہاؤ بڑھے گا۔
لیکن ماہرین نے بڑھتے ہوئے درجہ حرارت کو اس کی وجہ قرار دیا ہے جس سے سردیاں بھی گرم ہوں گی اور گرمیوں میں اوسط درجہ حرارت بڑھے گا جس کا مشاہدہ ہم آج بھی کررہے ہیں۔ اس ضمن میں بین الاقوامی مرکز برائے پہاڑ اور ترقی (آئی سی آئی ایم او ڈی) سے وابستہ دریائی طاس کے نگران ارون شریستہ کہتے ہیں کہ ہم سمجھ رہے تھے کہ جنوبی ایشائی دریاؤں میں پانی کم ہورہا ہے لیکن خود ان دریاؤں سے حاصل ڈیٹا، فیلڈ رپورٹس اور سیٹلائٹ تصاویر بتاتی ہیں کہ تمام دریا کے پانی میں اضافہ ہوگا۔
شریستا کےمطابق اگر اس پانی کو درست طریقے سے استعمال کیا جائے تو جنوبی ایشیا میں غربت کے خاتمے اور معاشی ترقی میں مدد مل سکے گی کیونکہ خطے میں آبادی کا انحصار زراعت پر ہے۔ تاہم دریائی بہاؤ سے سیلاب، زمینی کٹاؤ، سیم اور خشک سالی کے خطرات بھی بڑھیں گے۔
پاکستان کے 145 اضلاع میں سے 50 ایسے ہیں جو براہِ راست سیلابی راستوں کی زد میں آتے ہیں۔ دوسری جانب گلیشیئر پگھلنے سے بھی پاکستان کے بالائی علاقوں میں غیرمتوقع اور فوری سیلاب کا خطرہ اپنی جگہ موجود ہے۔
پاکستان محمکہ موسمیات کے ڈائریکٹر جرنل اور جنوبی ایشیا میں آب و ہوا میں تبدیلی کے ممتاز ماہر ڈاکٹر غلام رسول نے اس رپورٹ پر تبصرہ کرتے ہوئے کہا کہ اب پاکستان کو سیلاب جھیلنے والی زراعت، پانی میں اگنے والی فصلوں اور انفراسٹرکچر پر سرمایہ کاری کی ضرورت ہے۔ غلام رسول نے جنوبی ایشیائی ممالک کے درمیان مشترکہ تعاون اور سیلاب سے بروقت خبردار کرنے والے نظام کی ضرورت پر بھی زور دیا۔
یہ خبر سائنس اینڈ ڈویلپمنٹ نیٹ ورک لندن کی ویب سائٹ پر شائع ہوئی ہے جسے پاکستانی صحافی سلیم شیخ نے رپورٹ کیا ہے۔

واشنگٹن:(نیٹ نیوز/ایمرا نیوز) سائنسدانوں کا ہماری زمین سے متعلق خطرناک انکشاف سامنے آگیا ہے.
دنیا کے ممتاز سائنسدانوں کی ٹیم نے اپنے ایک تازہ تحقیقی مقالے میں خبردار کیا ہے کہ اگر انسان نے اپنا قبلہ درست نہ کیا اور ماحولیاتی آلودگی کا سلسلہ یونہی جاری رکھا تو صرف چند عشروں بعد ہی زمین کا اوسط درجہ حرارت قبل صنعتی عہد (پری انڈسٹریل ایج) کے اوسط سے دو درجہ سینٹی گریڈ بڑھ سکتا ہے جس کے بعد زمین نہ صرف شدید گرم ہوجائے گی بلکہ اس کے نہ رکنے والے سانحاتی اثرات بھی مرتب ہوں گے۔

سائنس کی زبان میں اسے ’’ہاٹ ہاؤس‘‘ یا ’’گرم گھر‘‘ بھی کہا جاتا ہے۔ یہ ایک ایسی ممکنہ کیفیت کا نام ہے کہ جب (انسانی کارگزاریوں کے باعث) گرمی بڑھنے کے نتیجے میں قطبین اور دوسرے سرد مقامات پر موجود بیشتر گلیشیئرز پگھل جائیں گے جس سے سطح سمندر بلند ہوگی اور زمین کے بعض علاقے رہائش کے قابل بھی نہیں رہیں گے۔ ماہرین نے خبردار کیا ہے کہ درجہ حرارت میں اضافے کو دو درجہ سینٹی گریڈ تک برقرار رکھنے سے بھی انسانیت کو سنگین خطرات لاحق ہوں گے۔
یہ رپورٹ پیرکے روز امریکی تحقیقی جریدے ’’پروسیڈنگز آف دی نیشنل اکیڈمی آف سائنسز‘‘ (PNAS) کے تازہ شمارے میں آن لائن شائع ہوئی ہے۔ ماہرین کہتے ہیں کہ اگر زمینی سطح کے درجہ حرارت کا اوسط، صنعتی عہد سے پہلے کے اوسط زمینی درجہ حرارت کے مقابلے میں صرف 2 درجہ سینٹی گریڈ بھی بڑھ گیا تو زمین کی ماحولیاتی تباہی ایک نیا رُخ اختیار کرلے گی، وہ ’’گرم گھر‘‘ میں بدل جائے گی اور اس کے بعد ہولناک قدرتی آفات کا نہ رکنے والا سلسلہ شروع ہوسکتا ہے۔
قدرتی سانحات پر بات کرتے ہوئے اسٹاک ہوم یونیورسٹی کے ماہر اور تحقیق ٹیم کے رکن پروفیسر جوہان راکسٹروم کہتے ہیں کہ اوسط گرمی بڑھنے سے ڈومینو اثر کے تحت واقعات کا سلسلہ شروع ہوجائے گا اور زمین کے بعض علاقے رہنے کے قابل نہ ہوں گے۔

اس ضمن میں ماہرین نے زمین پر رونما ہونے والے 9 اہم قدرتی سانحات کا ذکر بھی کیا ہے جن میں مستقل برفیلے علاقوں (پرما فروسٹ) میں برف کا پگھلاؤ، سمندری فرش سے میتھین ہائیڈریٹس کا اخراج، خشکی اور سمندروں میں کاربن جذب کرنے والے قدرتی نظام (carbon sink) کی کمزوری، عالمی تپش بڑھنے سے سمندری بیکٹیریا میں اضافہ اور نتیجتاً سطح سمندر سے کاربن ڈائی آکسائیڈ کا زیادہ اخراج، ایمیزون جنگلات کی موت، موسمِ گرما کے دوران قطب شمالی پر برف میں غیرمعمولی کمی، صنوبر کے جنگلات (کونیفیرس فارسٹس) میں کمی، قطب جنوبی پر برف کا پگھلاؤ اور قطبین پر برف کی چادروں کا سکڑنا شامل ہیں۔
رپورٹ کے مطابق یہ ہولناک واقعات تو تشویشناک مستقبل کی صرف ایک جھلک ہیں جبکہ گرمی بڑھنے سے مزید ایسے سانحات بھی ہوسکتے ہیں جن کے بارے میں ہم نے سوچا بھی نہیں۔ مثلاً آج دنیا کے جو جنگلات اور سمندر ہر سال ساڑھے چار ارب ٹن کاربن ڈائی آکسائیڈ جذب کررہے ہیں وہ الٹا کاربن ڈائی آکسائیڈ خارج کرنے لگ جائیں گے۔
ماہرین نے کہا ہے کہ ہمارے نیلگوں سیارے کا حساس نظام ایک حد کی جانب تیزی سے بڑھ رہا ہے اور اسے دوبارہ سے ٹھیک کرنا ممکن نہ ہوگا۔ اس ہولناک صورتحال سے زمین کے کچھ علاقے انسانوں کے رہنے کے قابل نہ رہیں گے۔