Category سائنس اور ٹیکنالوجی

ٹوکیو: (ایمرا نیوز) ٹیکنالوجی نے انسان کی مدد کے لیے مشینی بازو تیار کرلیے ہیں.
ایک ابتدائی تجربے میں آٹھ رضاکاروں نے اپنے دماغ سے مشینی بازو کنٹرول کرنے کا کامیاب مظاہرہ کرتے ہوئے ایک وقت میں دو مختلف امور انجام دیئے ہیں۔
اس ٹٰیکنالوجی کو مصروف انسانوں کےلیے تیار کیا ہے جو ایک وقت میں کئی کام کرنا چاہتے ہیں، یا پھر انہیں وزن وغیرہ اٹھانے کےلیے ایک اور دستِ تعاون درکار ہوتا ہے لیکن یہ بازو اب مشینی ہوگا جو دماغی اشاروں پر کام کرے گا۔ تجربے میں رضاکاروں کے دماغ پر سوچ پڑھنے والے برقیرے (الیکٹروڈز) لگائے گئے اور ان کے پاس ہی تیسرا مشینی بازو رکھ کر اس سے مختلف کام لیے گئے۔ رضاکاروں کے سر پر دو الیکٹروڈز لگائے گئے تھے جو دماغی احکامات اور سرگرمی روبوٹ کو سگنل کی صورت میں بھیج رہے تھے۔ پہلے مرحلے میں ایک بوتل تھامنے، بھینچنے اور اسے چھوڑنے کا کامیاب مظاہرہ کیا گیا۔
جب ماہرین نے روبوٹ بازو 15 رضاکاروں کے دماغ سے کنٹرول کرنے کی کوشش کی تو ان میں سے صرف آٹھ ہی کامیاب ہوسکے۔ ہر کارکن سے کہا گیا کہ وہ ایک جانب تو اپنے اصلی دونوں بازوؤں سے ٹرے میں گیند کو حرکت دیں اور اسی دوران دماغ سے مشینی بازو کنٹرول کرتے ہوئے ایک بوتل کو پکڑٰیں اورپھر اسے چھوڑیں۔
ان میں سے آٹھ افراد ایک ہی وقت میں بال گھمانے اور دماغی اشاروں سے بوتل تھامنے اور چھوڑنے کا کام کرتے رہے لیکن بقیہ سات افراد اس میں کامیاب نہ ہوسکے اور تھوڑے وقفے کےلیے ہی ایک وقت میں دو کام کرتے رہے۔ ’وجہ یہ ہے کہ دونوں گروہ کسی بھی طور پر بازو گرفت کرنے میں ناکام نہیں ہوئے بلکہ ایک وقت میں دو کام کرنے پر اپنی توجہ مرکوز رکھنے پر ناکام ہوئے،‘ اس تحقیق میں شامل شوئشی نیشیو نے کہا جو ٹوکیو میں ایڈوانسڈ ٹیلی کمیونی کیشن ریسرچ انسٹی ٹیوٹ سے وابستہ ہیں۔ انہوں نےکہا کہ جو افراد ایک وقت میں کئی کام کرتے ہیں وہ ایک وقت میں تینوں ہاتھوں سے کام لینے میں زیادہ کامیاب ہوتے ہیں۔
اسے بنانے کی وجہ یہ ہے کہ کارخانوں میں کام کرنے والوں کو وزن اٹھانے کےلیے ایک اور مددگار بازو فراہم کیا جائے تاکہ وہ اچھی طرح اپنے امور انجام دے سکیں۔ اس کے علاوہ بازو کو استعمال کرتے ہوئے مختلف افراد ایک وقت میں ایک سے زیادہ کام کرنے کی مشق کو بہتر بناکر اپنے ذہن کو ملٹی ٹاسکنگ (کثیرامور) کا عادی بھی بناسکتے ہیں۔ روبوٹک بازو کو دیکھتے ہوئے ماہرین نے کہا ہے کہ اسے درست انداز میں کنٹرول کرنے کےلیے عین وہی توجہ اور مشق درکار ہوگی جو کسی مراقبے کےلیے ضروری ہوتی ہے۔ تاہم دیگر ماہرین نے اسے ایک خوش آئند پیش رفت قرار دیا ہے۔

اسلام آباد(نیٹ نیوز/ایمرا نیوز) پاکستانی طالبات پر مشتمل 15رکنی ٹیم نے ایک نشست والی فارمولا ریس کار تیار کی ہے جوپہلی مرتبہ کسی عالمی سطح کے مقابلے میں حصہ لے رہی ہے،اس میں خوش کن پہلو ٹیم کی تمام اراکین کا خواتین ہونا ہے۔لڑکیوں پر مشتمل ٹیم کا تعلق پاکستان کی نیشنل یونیورسٹی آف سائنس و ٹیکنالوجی (NUST) اسلام آبادسے ہے جنہوں نے فارمولا مقابلہ کے لئے ایک نشست کی فارمولہ کار تیار کی ہے اوراس کارکردگی پرٹیم کوایف ایس ایوارڈ سے بھی نواز گیا جس کی بنیاد پر فارمولا کار تیار کرنے والے اس ٹیم کو عالمی سطح کے مقابلے میں شرکت کا موقع ملا۔

(ایمرا نیوز) یوٹیوب کا نیا فیچر متعارف کرادیا گیا ہے.
مقبول ترین ویڈیو شیئرنگ ویب سائٹ یوٹیوب نے صارفین کی ویڈیو ہسٹری کی پردہ داری کے لیے اپنی ایپ میں اِن کوگنیٹو (Incognito) موڈ متعارف کروا دیا۔
رواں برس مارچ سے ہی یوٹیوب پر اِن کوگنیٹو فیچر آزمائشی مراحل میں تھا، جسے اب تمام اینڈرائیڈ صارفین کے لیے پیش کردیا گیا ہے۔
ٹیکنالوجی ویب سائٹ میش ایبل کی رپورٹ کے مطابق اِن کوگنیٹو موڈ کو فعال کرنے سے اُن تمام ویڈیوز کی سرچ ہسٹری چُھپ جائے گی، جو آرکائیو یا لائبریری فیچر میں محفوظ ہوں گی۔

یعنی اس موڈ کی مدد سے صارفین کو سہولت ہوگی کہ اگر کوئی دوسرا شخص ان کا فون استعمال کر رہا ہو تو وہ لائبریری ویڈیوز کو نہیں دیکھ سکے گا۔
علاوہ ازیں سرچ بار میں بھی تلاش کی گئی ویڈیوز نظر نہیں آئیں گی۔
اس موڈ کو فعال کرنے کے لیے دائیں جانب دیئے گئے مین مینیو (جہاں پروفائل تصویر نمایاں ہو) پر کلک کرکے وہاں موجود اِن کوگنیٹو آئیکون کو آن (on) کرنا ہوگا۔
جس کے بعد لائبریری یا آرکائیو ویڈیوز دکھائی نہیں دیں گی، یعنی صارف آف لائن شو ہوگا۔
ممکنہ طور پر کچھ دنوں میں اِن کوگنیٹو موڈ میں ٹائمر کی سہولت بھی دستیاب ہوجائے گی، جس سے صارف ‘آٹو ٹرن آف اور آن’ کے دورانیے کا انتخاب کرسکے گا۔

کیلیفورنیا:(ایمرا نیوز) فلکیات دانوں نے ابتدائی کائنات کے روشن ترین جسم کو دیکھا لیا.
فلکیات دانوں نے ایک اہم دریافت کرتے ہوئے بتایا ہے کہ انہوں نے قدیم یا ابتدائی کائنات کے روشن ترین جسم کو دیکھا ہے جو 13 ارب نوری سال کے فاصلے پر واقع ہے، یہ ایک کوزار ہے جو ایک قدیم کہکشاں کے مرکز میں بہت بڑے بلیک ہول پر مشتمل تھا۔

تیرہ ارب نوری سال پرانے اس منظر کے بارے میں یہی کہا جاسکتا ہے کہ یہ تماشا اب ختم ہوچکا ہوگا کیونکہ ہم کائنات کی 13 ارب سال پرانی تصویر دیکھ رہے ہیں۔ ماہرینِ فلکیات کے مطابق اس روشن تصویر کی وجہ یہ ہے کہ کوزار کے بیچوں بیچ موجود بلیک ہول بڑی تیزی سے مادہ نگل رہا تھا جس سے زبردست توانائی خارج ہورہی تھی جس کا مشاہدہ روشنی اور ریڈیو لہروں کی شکل میں گیا گیا ہے۔
مادے اور گرد کا ایک عظیم ذخیرہ بلیک ہول کے اندر گرتے ہوئے اس تیزی سے گھوم رہا تھا جیسے ایک گڑھے میں پانی گرتے ہوئے بھنور کی طرح چکر کھاتا ہے۔ اس سے بلیک ہول کے مرکز میں طاقتور ثقلی لہریں پیدا ہورہی تھیں۔ مادہ نگلتے دوران بلیک ہول سے پلازما کی بڑی مقدار خارج ہورہی تھی جو بہت روشن نظر آرہی ہے۔
اس کوزار کا نام پی 352-15 رکھا گیا ہے جواس وقت بنا تھا جب کائنات قدرے نوعمر تھی۔ اسے کارنیگی انسٹی ٹیوشن فار سائنس کے پروفیسر ایڈوارڈو باناڈوس اور ان کے ساتھیوں نے نیو میکسیکو میں واقع، 27 طاقتور ریڈیو دوربینوں کے مجموعے ’’ویری لارج ایرے‘‘ (وی ایل اے) کی مدد سے دریافت کیا گیا ہے۔
اب تک یہ دورترین مقام پر دریافت ہونے والا کوزار بھی ہے جس سے روشن پلازما کی دو بوچھاڑیں نکل رہی ہیں اور یوں یہ ایک روشن ترین جسم بھی ہے۔ ماہرین کا خیال ہے کہ یہ اس وقت کا منظر ہے جب کائنات کو وجود میں آئے ہوئے ایک ارب سال بھی نہیں ہوئے تھے۔
اس دریافت کی تفصیلات ’’ایسٹروفزیکل جرنل‘‘ کے تازہ شمارے میں شامل دو تحقیقی مقالوں میں شائع ہوئی ہیں۔

اسلام آباد(وقت نیوز) پاکستان نے جی پی ایس اور جی آئی ایس سے مزین اپنے دو سیٹلائٹس لانچ کر دئیے۔ترجمان دفتر خارجہ ڈاکٹر محمد فیصل کی جانب سے جاری کیے گئے بیان کے مطابق سیٹلائٹ پی ایس ایس آر 1 اور پاک ٹیس اے 1 صبح 8 بجکر57منٹ پر چین سے لانچ کیے گئے، جنہیں مکمل طور پر پاکستان میں ہی تیار کیا گیا۔ترجمان دفتر خارجہ کے مطابق سیٹلائٹس کی تیاری سے پاکستان کا کمرشل انحصار انتہائی کم ہو جائے گا اور ڈیٹا کلیکشن، پلاننگ، ریسورس مینجمنٹ اور معیارِ زندگی بہتر ہوگا۔دفتر خارجہ کے مطابق سیٹلائٹس لانچنگ سے پانی کے بحران، سیلاب اور قحط جیسے چیلنجز سے نمٹنے میں مدد ملے گی۔ترجمان دفتر خارجہ نے مزید بتایا کہ ان سیٹلائٹس کی مدد سے بارش کے پانی کی مقدار کو جانچنے اور اسٹوریج کی پلاننگ میں مدد ملے گی۔دوسری جانب پاکستان میں جنگلات کی صورتحال اور پلاننگ میں بھی یہ سیٹلائٹس مددگار ثابت ہوں گے۔

ہارورڈ:(ایمرا نیوز) کیڑوں جیسا روبوٹ تیار ہوگیا.
حشرات اور کیڑوں سے متاثر ہوکر ہارورڈ یونیورسٹی کے ماہرین نے ایک ایسا روبوٹ بنایا ہے جو زمین پر چلتا ہے اور پانی میں تیرتا ہے۔ اس کے علاوہ یہ سمندر کے فرش پر چل بھی سکتا ہے۔

اسے ہارورڈ امبیولیٹری مائیکروبوٹ یا ایچ اے ایم آر کہا جاتا ہے۔ یہ روبوٹ انتہائی آڑے ترچھے موڑ لے سکتا ہے اور ہلکا پھلکا وزن بھی اٹھا سکتا ہے۔ اس کا وزن کاغذات جوڑنے والے کلپ کے برابر ہے جو پانی میں تیرسکتا ہے اور پانی کے فرش پر چل بھی سکتا ہے۔
اسے ہارورڈ یونیورسٹی میں جان اے پالسن اسکول آف انجینئرنگ کےماہرین نے تیار کیا ہے۔ ہلکا ہونے کے باوجود یہ پانی کا سطحی تناؤ (سرفیس ٹینشن) توڑ کر پانی کے اندر چلا جاتا ہے اور ڈوب جاتا ہے جبکہ تہہ میں بیٹھنے کے بعد یہ وہاں آسانی سے چل سکتا ہے۔
یہ ایک بہت چھوٹا سا مائیکروبوٹ ہے جس کا وزن صرف 1.65 گرام ہے جبکہ یہ 1.44 گرام سامان اٹھاسکتا ہے۔ مائیکروبوٹ خشکی اور پانی دونوں میں بہ آسانی چل سکتا ہے۔ ایچ اے ایم آر خطرناک ماحول میں جاسکتا ہے اور ساتھ ہی لوگوں کی تلاش اور جان بچانے کا مشن بھی انجام دے سکتا ہے جس کی تفصیلات ہفت روزہ نیچر میں شائع ہوئی ہیں۔
لیکن اتنے ہلکے اور چھوٹے روبوٹ کو ڈبونا اور تیرانا سب سے بڑا چیلنج ثابت ہوا تھا۔ اس کے چپو نما چار پیر ہیں جو اسے پانی پر کھڑا ہونے میں مدد دیتے ہیں۔ اس کی تیاری میں طبیعیات کے اصولوں کو بطورِ خاص مدِ نظر رکھا گیا ہے جن میں سے ایک الیکٹرو ویٹنگ کا اصول بھی ہے۔
جب اس کے پیروں پر وولٹیج دیا جاتا ہے تو اس کے پیر کا زاویہ کچھ بدلتا ہے اور یہ پانی میں اترجاتا ہے۔ اس طرح بجلی کی کمی بیشی سے یہ پانی اور خشکی پر چلتا ہے۔ اگلے مرحلے میں ماہرین اسے مزید دیرپا اور زائد وزن اٹھانے کے قابل بنانا چاہتے ہیں۔

(ایمرا نیوز) ایک ٹوئٹ نے 25 لڑکیوں کی زندگیاں بچا لیں.

I am traveling in Avadh express(19040). in s5. in my coach their are 25 girls all are juvenile some of them are crying and all feeling unsecure.@RailMinIndia @PiyushGoyal @PMOIndia @PiyushGoyalOffc @narendramodi @manojsinhabjp @yogi

— Adarsh Shrivastava (@AdarshS74227065) July 5, 2018

بھارتی میڈیا کے مطابق ریاست اتر پردیش میں ایک شخص ٹرین میں سفر کر رہا تھا کہ اس نے محسوس کیا کہ یہ لڑکیاں پریشانی میں ہیں اور رو بھی رہی ہیں۔
اس شخص نے انتظار کئے بغیر ٹوئٹر پر پیغام لکھ کر لڑکیوں کی پریشانی کے حوالے سے بھارتی وزیر اعظم نریندر مودی، وزیر ریلوے، وزیر اعلیٰ سمیت چند وزرأ کو ٹیگ کیا۔
اس کے ٹوئٹ میں ٹرین کا نام اور دوسری ساری معلومات شامل تھی،ساتھ ہی لکھا کہ ’لگ بھگ 25 لڑکیاں رو رہی ہیں اور کسی مشکل میں ہیں۔‘
کچھ گھنٹوں میں ہی اس ٹوئٹ الرٹ نے ریاست کے پولیس اسٹیشنوں اور ریلوے اسٹیشنوں پرہل چل مچا دی۔پولیس انسداد اسمگلنگ یونٹ سے رابطہ کر کے لڑکیوں کو ڈھونڈ نکالنے میں کامیاب ہو گئی۔

(ایمرا نیوز) آئی فون اب نئے رنگوں میں آگیا ہے.
جدید دور میں کچھ صارفین ٹیکنالوجی میں بھی فیشن کو ترجیح دیتے ہیں اور ایسے صارفین کے لیے اطلاع ہے کہ جلد ہی ایپل کمپنی آئی فون کے نئے ماڈلز کو اضافی خصوصیات اور منفرد رنگوں کے ساتھ پیش کرنے والی ہے۔

ٹیکنالوجی ویب سائٹ ٹیک کرنچ نے ایک سپلائی چین رپورٹ کے حوالے سے بتایا کہ آئی فون کے تین نئے ماڈلز جلد متعارف کروائے جائیں گے۔
یہ تمام نئے ماڈلز اسٹائلش ہونے کے ساتھ پائیدار بھی ہوں گے جن میں پہلا 5.8 انچ آئی فون ایکس ہوگا جس کی قیمت کم ہوگی۔
دوسرا 6.5 انچ آئی فون ایکس پلس ہوگا جس میں او ایل ای ڈی کی اسکرین فراہم کی جائے گی۔
جب کہ تیسرا 6.1 انچ آئی فون ہوگا جس میں فیس آئی ڈی کا خصوصی فیچر شامل ہوگا اور یہ گرے، سفید، سرخ، نیلے اور نارنجی رنگ میں دستیاب ہوگا۔
رپورٹ کے مطابق اسمارٹ فون مارکیٹ میں زیادہ تر سفید اور کالے رنگ کے ماڈلز متعارف ہوتے ہیں جن سے صارفین اب چھٹکارا چاہتے ہیں، اسی بات کے پیش نظر آئی فون کے نئے رنگین ماڈلز کی تیاری شروع کی جا رہی ہے۔

سان فرانسسکو:(ایمرا نیوز) امریکہ کی ایک کمپنی 9 کیمروں والا اسمارٹ فون بنائے گی.
بین الاقوامی میڈیا رپورٹس کے مطابق امریکا کی کیمرہ ساز اور ڈیجیٹل فوٹوگرافی کمپنی ’’لائٹ‘‘ نے اعلان کیا ہے کہ وہ جلد ہی ایک ایسا اسمارٹ فون پیش کرے گی جس میں 9 عقبی کیمرے (ریئر کیمراز) ہوں گے جن میں سے بیک وقت 5 سے 9 کیمروں کو تصویر کھینچنے یا ویڈیو بنانے میں استعمال کیا جاسکے گا۔
کمپنی کا دعویٰ ہے کہ یہ کیمرے 64 میگا پکسل تک بہترین تصاویر لینے کی صلاحیت کے حامل ہوں گے جب کہ کم روشنی میں بھی بہترین نتائج دینے کے قابل ہوں گے۔
کیمروں سے سجی یہ ڈیوائس آئی فون ایکس کے مقابلے میں زیادہ موٹی نہیں ہوگی جبکہ یہ اندرونی پروسیسنگ اور خصوصی الگورتھم استعمال کرتے ہوئے مختلف تصاویر کو یکجا کرکے ایک واضح اور انتہائی صاف ستھری تصویر کی شکل میں یکجا کرے گی۔ اس اسمارٹ فون میں اس کے علاوہ بھی بہت سے جدید فیچرز موجود ہوں گے تاہم جدید کیمروں کی وجہ سے اس فون کی قیمت زیادہ ہونے کا امکان ہے۔
یہ اسمارٹ فون ابھی تیاری کے ابتدائی مراحل میں ہے۔ اس کی لانچنگ میں کتنا وقت لگے گا؟ اس بارے میں کمپنی نے کوئی حتمی تاریخ نہیں بتائی ہے تاہم رواں سال کے آخر تک اسے مارکیٹ میں لانے کا امکان ہے۔
واضح رہے کہ حال ہی میں ’’لائٹ‘‘ کمپنی نے 16 کیمروں والا ایک ڈیجیٹل کیمرا ’’ایل16 ہیرو‘‘ پیش کیا ہے جس کی قیمت 1950 ڈالر (تقریباً 2 لاکھ 27 ہزار روپے) ہے۔ یہ ڈیجیٹل کیمرا اپنے 16 عقبی کیمروں کی مدد سے 54 میگا پکسل جتنی زبردست اور تفصیلی تصویر کھینچ سکتا ہے۔ البتہ آئندہ اسمارٹ فون اس سے کہیں بہتر معیار کی تصویر صرف 9 عقبی کیمرے استعمال کرتے ہوئے کھینچ سکے گا۔

کیلیفورنیا:(ایمرا نیوز) فیس بک اور انسٹا گرام نے اپنا نیا فیچر متعارف کرادیا ہے.
فیس بک اور انسٹا گرام دونوں ہی بہت جلد ’ڈو ناٹ ڈسٹرب‘ کا آپشن پیش کررہے ہیں۔

سوشل میڈیا پر نظر رکھنے والی ویب سائٹس کے مطابق اس آپشن کی بدولت ایپس پر 30 منٹ، ایک گھنٹے، دو گھنٹے، آٹھ گھنٹے، ایک دن اور خود اپنی مرضی سے نوٹیفیکیشن اوردیکھی جانے والی پوسٹوں کو بند کیا جاسکتا ہے۔ پھر یہ آپشن ازخود یا آپ خود ہی ختم کرسکتے ہیں۔
رپورٹس کے مطابق یہ دونوں فیچرزبعض اکاؤنٹس پر دیکھے گئے ہیں۔ اس کے علاوہ نوٹفکیشن کےلیے آواز اور تھرتھراہٹ کے آپشنز بھی بند اور کھولے جاسکیں گے۔ ایک اطلاع کے مطابق فیس بک اورانسٹا گرام پر ان کی آزمائش کی جارہی ہے۔
اس آپشن کے ذریعے ایک جانب تو فیس بک اور انسٹا گرام سے وقتی طورپردوررہا جاسکتا ہے اوراس کا دوسرا مقصد یہ ہے کہ لوگوں کو فیس بک اورانسٹا گرام اکاؤنٹ ختم یا بند کرنے سے روکا جائے تاہم انسٹاگرام اورفیس بک کے ترجمانوں نے اس آپشن پر لب کشائی نہیں کی۔
اس سے قبل انسٹا گرام نے ’یو آر آل کوٹ اپ‘ نامی ایک آپشن بھی پیش کیا ہے جو آپ کو پہلے سے ہی دیکھی جانے والی پوسٹس پر اضافی اسکرولنگ سے روکتا ہے۔ انسٹا گرام کا یہ آپشن ایپ پر گزارے آپ کے وقت کا حساب بھی رکھتا ہے جسے ایک دن یا ایک ہفتے کے لیے بھی معلوم کیا جاسکتا ہے۔
اس فیچر پر انسٹا گرام کے سی ای او کیون سسٹروم نے کہا ہے کہ ’یو آر آل کوٹ اپ‘ فیچر کا مقصد لوگوں کو ایپس پر خرچ کردہ وقت سے آگاہ کرنا ہے۔ سسٹروم نے ٹویٹر پر کہا، ’ہم سمجھتے ہیں کہ اس طرح تمام آن لائن کمپنیوں کو ایماندارانہ فیصلہ کرنا چاہیے کیونکہ ہم اس کا حل چاہتے ہیں۔‘