Category شوبز

بھارت کے شہر لدھیانہ میں شوٹنگ کے دوران کورونا وائرس لاک ڈاؤن کے قوانین کی خلاف ورزی پر بولی وڈ اداکار جمی شیر گل اور ہدایت کار ایشور نواس سمیت 35 افراد کو گرفتار کرلیا گیا۔

انڈیا ڈاٹ کام کی رپورٹ کے مطابق وہ بنا اجازت اور کورونا ایس او پیز کی خلاف ورزی کرتے ہوئے اسرائیلی ویب شو کی ری میک ویب سیریز ‘یور آنر’ کی شوٹنگ میں مصروف تھے کہ پولیس نے چھاپا مار کر گرفتار کرلیا۔

جمی شیر گل سمیت عملے کے دیگر 35 افراد کے خلاف 27 اپریل کو مقدمہ درج کیا گیا تھا۔

ٹائمز آف انڈیا کی رپورٹ کے مطابق واقعے کو مقدمہ ڈویژن نمبر ون پولیس تھانے میں انڈین پینل کوڈ کی دفعات 188 اور 269 اور ایپیڈیمک ڈیزیز ایکٹ کی دفعہ 3 کے تحت درج کیا گیا ہے۔

رپورٹس کے مطابق سب انسپکٹر ہرجیت سنگھ نے بتایا کہ 27 اپریل کو رات 8 بجے لدھیانہ میں واقع آریا سینئر سیکنڈری اسکول میں عملے کے 150 افراد ویب سیریز کی شوٹنگ کررہے تھے۔

ان دنوں کورونا وائرس کی وبا کے پھیلاؤ پر قابو پانے کے لیے بھارتی پنجاب میں شام 6 بجے سے صبح 5 بجے تک لاک ڈاؤن نافذ ہوتا ہے۔

تاہم اسکول انتظامیہ نے کہا کہ عملے کی جانب سے لدھیانہ کے پولیس کمشنر راکیش اگروال سے شوٹنگ کی اجازت لی گئی تھی۔

اسکول کے پرنسپل راجندر کمار نے کہا کہ ہم نے عملے کو شوٹنگ کی اجازت اس وقت دی جب انہوں نے پولیس کمشنر سے اجازت لے لی تھی۔

انہوں نے کہا کہ پروڈکشن ٹیم نے 10 روز یعنی 23 اپریل سے 2 مئی تک کیمپس کے مختلف حصوں میں شوٹنگ کی اجازت طلب کی تھی۔

اسکول کے پرنسپل نے کہا کہ ہمیں انہوں نے کورونا پروٹوکولز پر عمل کرنے کا کہا تھا اور اس وقت شوٹنگ پریئر گراؤنڈ میں ہورہی تھی جہاں 800 افراد کی جگہ ہے۔

انہوں نے کہا کہ ہمارا اسکول 1849 میں بنا تھا اور ہم شوٹنگ کے لیے اپنی عمارت کی حدود کے استعمال پر کوئی رقم وصول نہیں کرتے، یہاں کئی فلموں کی شوٹنگ ہوئی ہے۔

رپورٹس کے مطابق بعدازاں جمی شیر گل اور عملے کے دیگر افراد کو ضمانت پر رہا کردیا گیا تھا۔

یہ بھی کہا جارہا ہے کہ جب پولیس جائے وقوع پر پہنچی تو اس وقت عدالت کے سین کی شوٹنگ ہورہی تھی اور جمی شیر گل اس سیریز میں جج کا کردار ادا کررہے ہیں۔

خیال رہے کہ بھارت میں ان دنوں کورونا وائرس سنگین صورتحال اختیار کرگیا ہے جس کی وجہ سے مختلف شہروں میں لاک ڈاؤن اور کرفیو نافذ ہے۔

پاکستان کے معروف ٹی وی اینکر، میزبان اور پاکستان تحریک انصاف (پی ٹی آئی) کے رکنِ قومی اسمبلی ڈاکٹر عامر لیاقت حسین نے بالآخر تیسری شادی کی افواہوں پر وضاحت دیتے ہوئے انہیں یکسر مسترد کردیا۔

گزشتہ چند روز سے سوشل میڈیا پر عامر لیاقت کی تیسری شادی کی خبریں گردش کررہی تھیں۔

اداکارہ و ماڈل ہانیہ خان نے گزشتہ ہفتے سوشل میڈیا پر کچھ ویڈیوز و تصاویر جاری کرتے ہوئے دعویٰ کیا تھا کہ وہ عامر لیاقت کی تیسری بیوی ہیں۔

انہوں نے یہ الزام بھی لگایا تھا کہ عامر لیاقت اور ان کی دوسری بیوی طوبیٰ عامر نے انہیں نقصان پہنچانے کے لیے ان پر کالا جادو کروایا۔

ہانیہ خان کی جانب سے سوشل میڈیا پر واٹس ایپ چیٹ اور ویڈیو کالز کے اسکرین شاٹس، عامر لیاقت کے ساتھ تصاویر بھی شیئر کی گئی تھیں۔

ہانیہ خان نے دعویٰ کیا تھا کہ ان کا تعلق بہت پرانا اور ان کے اہلخانہ بھی عامر لیاقت سے ملاقات کرچکے ہیں۔

انہوں نے کہا تھا کہ ان دونوں کی شادی ہوئی تھی، ان کے خاندان بھی راضی تھے لیکن ان کی موجودہ بیوی طوبیٰ عامر نے ان کے خلاف مہم چلانا شروع کی۔

عامر لیاقت کو منافق قرار دیتے ہوئے انہوں نے یہ الزام بھی لگایا تھا کہ عامر لیاقت نے ان کے کیریئر کو بھی نقصان پہنچانے کی کوشش کی۔

سوشل میڈیا پر لائیو اسٹریم کے دوران ہانیہ خان نے یہ انکشاف بھی کیا تھا کہ انہوں نے متعدد مواقع پر خودکشی کی کوشش بھی کی تھی۔

ہانیہ خان نے عامر لیاقت پر یہ الزام بھی لگایا تھا کہ انہوں نے ان کے اہلخانہ سے دور کردیا کہ انہوں نے اینکر پرسن کی خاطر گھر والوں سے جھگڑا بھی کیا تھا۔

انہوں نے چیلنج کیا کہ اگر عامر لیاقت سچے اور ایماندار ہیں، جیسا وہ دعویٰ کرتے ہیں تو پھر انہیں اپنے تعلق کی سچائی بیان کرنی چاہیے اور تمام سوالوں کے جواب دینے چاہئیں۔

جس کے بعد انٹرنیٹ صارفین کی جانب سے عامر لیاقت کی تیسری مبینہ شادی پر حیرت کا اظہار کیا گیا تھا۔

جس کے بعد عامر لیاقت حسین نے انسٹاگرام پر ایک ویڈیو بیان میں ہانیہ خان کے شادی کے دعووں کو مسترد کردیا۔

عامر لیاقت نے انسٹاگرام پر شیئر کی گئی ویڈیو میں کہا کہ ‘آپ لوگوں نے ماشااللہ میری 3، 4 اور 5 شادیاں کراچکے ہیں لیکن میری ایک ہی شادی ہے جو طوبیٰ سے ہے’۔

عجیب و غریب بیانات پر مبنی اس ویڈیو میں عامر لیاقت نے کہا کہ ‘عورت کے زیادہ بولنے کا شکوہ تو سبھی کرتے ہیں لیکن گونگی عورت سے بھی کوئی شادی نہیں کرنا چاہتا’۔

انہوں نے مزید کہا کہ ‘ہر کوئی یہ چاہتا ہے کہ شادی کرے تو بولتی ہوئی عورت سے کرے’۔

اس کے بعد ویڈیو میں انہوں نے شاعرانہ انداز میں مزید کہا کہ ‘اور کبھی جو مجھے فتویٰ دینے کا ازن ملے، میں انسان کا انسان کے آگے رونا حرام لکھ دوں، رونا ہے تو صرف خدا کے آگے رونا ہے’۔

تاہم مذکورہ ویڈیو میں شادی کی افواہیں مسترد کرنے کے بیان کے علاوہ ان کی جانب سے کی جانے والی باتوں کو سمجھا نہیں جاسکا کہ وہ کس جانب اشارہ کررہے ہیں۔

خیال رہے کہ عامر لیاقت نے دوسری شادی کی تصدیق دسمبر 2018 میں کی تھی، ان کی دوسری شادی اداکارہ طوبیٰ عامر سے ہوئی تھی۔

عامر لیاقت نے پہلے شادی کو کچھ عرصہ خفیہ رکھا تھا تاہم جولائی 2018 میں ہونے والے عام انتخابات کے دوران کاغذات نامزدگی جمع کرانے کے دوران انہوں نے دوسری شادی کا اعتراف کیا تھا۔

عامر لیاقت کی جانب سے کاغذات نامزدگی میں دوسری شادی کے اعتراف کے بعد سوشل میڈیا پر کافی ہنگامہ سامنے آیا تاہم انہوں نے چند ماہ کی افواہوں کے بعد دسمبر 2018 میں پہلی بار عوامی سطح پر دوسری شادی کا اعتراف کیا۔

عامر لیاقت کی جانب سے دوسری شادی کے عوامی سطح پر اعتراف کے ٹھیک دو سال بعد دسمبر 2020 میں ان کی پہلی اہلیہ نے تصدیق کی تھی کہ شوہر نے انہیں طلاق دے دی تھی۔

سیدہ بشریٰ اقبال نے اپنی ٹوئٹ اور انسٹاگرام پوسٹ میں مختصر طور پر تصدیق کی تھی کہ عامر لیاقت حسین نے انہیں طلاق دے دی تھی۔

بشریٰ اقبال نے یہ واضح نہیں کیا تھا کہ عامر لیاقت نے انہیں کب طلاق دی تھی تاہم بتایا کہ سابق شوہر نے انہیں دوسری اہلیہ کی درخواست پر طلاق دی۔

کورونا کی بدترین صورتحال کے دوران بالی وڈ اداکارہ پریانکا چوپڑا نے امریکی صدر جوبائیڈن اور دیگر سے بھارت کی مدد کی اپیل کردی۔

بھارت میں کورونا سے صورتحال مزید ابتر ہوچکی ہے اور مسلسل کئی روز سے روزانہ کی بنیاد پر 3 لاکھ سے زائد کیسز رپورٹ ہورہے ہیں۔

کورونا مریضوں کی تعداد میں مسلسل اضافے کے بعد بھارت میں آکسیجن اور دیگر حفاظی سامان کی بھی شدید کمی ہوگئی ہے۔

ایسے میں اب امریکا میں موجود بھارتی اداکارہ پریانکا چوپڑا بھی خاموش نہیں رہ سکی ہیں اور انہوں نے امریکی صدر و دیگر سے بھارت کی مدد کرنے پر زور دیا ہے۔

اپنی ٹوئٹ میں کہا کہ میرا دل ٹوٹ گیا، بھارت کورونا کے باعث مشکلات سے دوچار ہے، ایسے میں امریکا نے 550 ملین ویکسین کا آرڈر دیا ہے جس کی اتنی ضرورت نہیں ہے۔

انہوں نے امریکی صدر جوبائیڈن اور حکومت کا شکریہ ادا کرتے ہوئے کہا کہ ویکسین ایسٹرازینیکا کو دنیا بھر میں دینے پر شکر گزار ہوں لیکن بھارت اس وقت کورونا سے بری طرح متاثر ہے کیا اس وقت فوری طور پر ان کو ویکسین دی جاسکتی ہے۔

ناموراداکار شان نے زندگی کی نصف سنچری مکمل کر لی، لالی ووڈ اداکار کے پرستاروں نے انہیں 50 ویں سالگرہ کی مبارکباد دیتے ہوئے نیک خواہشات کا اظہار کیا۔

تفصیلات کے مطابق اداکارہ شان نے27 اپریل 1971 کو لاہور کے ایک فنکار گھرانے میں آنکھ کھولی۔ ہدایت کار ریاض شاہد اور اداکارہ نیلو کے صاحبزادے شان نے اپنے فلمی کیریئر کا آغاز بطور چائلڈ اسٹار کیا۔

1990ء میں بننے والی فلم بلندی سے شان نے لالی وڈ میں ہیرو کی حیثیت سے ڈیبیو کیا۔ شان نے بطور اداکار ڈیڑھ سو سے زائد پنجابی واردو فلموں میں کام کیا جب کہ دس سے زائد فلمیں بطور ہدایتکار بھی بنائیں، جن میں گنز اینڈ روزز، مجھے چاند چاہیے، موسیٰ خان، ظل شاہ، ارتھ سمیت دیگر فلمیں شامل ہیں۔

شان پاکستان فلم انڈسٹری کومعیاری فلم انڈسٹری بنانے میں ہمیشہ کوشاں رہے۔ 2007 میں ان کی فنی خدمات کے پیش نظر پرائیڈ آف پرفارمنس ایوارڈ سے بھی نوازا گیا۔

فیس بک کا نام سن کر ذہن میں کیا خیال آتا ہے؟

یقیناً تصاویر، ویڈیوز، ری ایکشنز، پوسٹس اور ایسے ہی لاتعداد چیزیں۔

مگر کیا کبھی آپ سوچ سکتے ہیں کہ فیس بک دنیائے فلم کا سب سے بڑا آسکر ایوارڈ جیت سکتی ہے؟

تو جان لیں کہ فیس بک نے اپنا پہلا آسکر ایوارڈ جیت لیا ہے۔

جی ہاں 93 ویں اکیڈمی ایوارڈز کی تقریب میں فیس بک کی زیرملکیت اوکیولوس رئیلٹی ہیڈ سیٹس اور ای ایز ریسپان انٹرٹینمنٹ گیم اسٹوڈیو کی تیار کردہ مختصر دستاویزی فلم نے ڈاکومینٹری شارٹ کیٹیگری کا آسکر ایوارڈ اپنے نام کیا۔

یہ پہلی بار ہے جب گیم انڈسٹری کے ایک پراجیکٹ نے آسکر ایوارڈ جیتا ہے۔

25 منٹ کی یہ فلم ‘کولیٹی’ فرنچ ریزیزٹنس کی سابق ممبر کولیٹی مارین کیتھرین کے گرد گھومتی ہے جو 74 سال میں پہلی بار جرمنی کا سفر کرتی ہیں۔

اس فلم کو دوسری عالمی جنگ کے حوالے سے تیار کی جانے والی وی آر ویڈیو گیم میڈل آف آنر کے لیے بنایا گیا تھا۔

کولیٹی نے اس کیٹیگری میں دیگر 4 فلموں کو شکست دی۔

اس مختصر فلم کو انتھونی Giacchino نے تحریر کرنے کے ساتھ ڈائریکٹ کیا، دلچسپ بات یہ ہے کہ فلم میں دکھائی جانے والی مرکزی کردار کی 92 ویں سالگرہ بھی 25 اپریل کو تھی۔

کولیٹی مارین کیتھرین کو اپنے ماضی کی جانب سے لوٹنے کے لیے ایک طالبعلم نے تیار کیا تھا جس نے انہیں قائل کیا کہ وہ اس کیمپ میں جائے جہاں نازیوں نے ان کے بھائی کو قتل کیا تھا۔

آسکرملنے پر ایک ٹوئٹ میں فلم ساز نے ہر ایک کا شکریہ ادا کیا۔

اسی طرح ایک بلاگ میں پروڈکشن ٹیم کا کہنا تھا کہ اس کامیابی کی اصل ہیرو کولیٹی ہی ہیں جنہوں نے اپنی کہانی شیئر کی،فلم میں نے ہم نے دیکھا تھا کہ مزاحمت کے لیے جرات کی ضروروت ہوتی ہے، مگر کسی کے لیے اپنے تکلیف دہ ماضی میں واپس جانا اس سے بھی زیادہ مشکل کام ہے۔

فلمی دنیا کے سب سے معتبر فلمی ایوارڈ ‘آسکر’ کا 93واں میلہ سج گیا جس میں نومیڈ لینڈ نے بہترین فلم جبکہ اس کی اداکارہ فرانسس میک ڈورمینڈ نے بہترین اداکارہ کا ایوارڈ جیت لیا۔

خبررساں اداروں کی رپورٹس کے مطابق ابرطانیہ کے اینتھونی ہاپکنز نے غیر متوقع طور پر ‘دی فادر’ میں ڈیمینشیا کے مرض کا مقابلہ کرنے والے شخص کا کردار ادا کرنے پر بہترین اداکار کا اعزاز حاصل کیا۔

یہ امکان تھا کہ 93ویں آسکر ایوارڈ کا میلہ چیڈوک بوسمین کی آخری فلم بلیک باٹم جیتے گی لیکن ایسا نہیں ہوا۔

حیران کن طور پر چین کی کلوئی زاؤ نے سرچ لائٹ پکچرز کی نومیڈلینڈ کے لیے بہترین ہدایت کار کا ایوارڈ حاصل کیا۔

کلوئی زاؤ ہدایت کاری کا آسکر جیتنے والی پہلی ایشیائی خاتون اور اکیڈمی ایوارڈ جیتنے والی دوسری چینی خاتون بن گئیں۔

73 سالہ یون یو جنگ نے میناری میں اپنے کردار پر بہترین معاون اداکارہ کا اعزاز حاصل کیا، وہ آسکر جیتنے والی جنوبی کوریا کی پہلی اداکارہ ہیں۔

خیال رہے کہ کلوئی زاؤ سے 11 برس قبل کیتھرین بیگلو، عراق جنگ پر بنے ڈرامے ‘ دی ہرٹ لاکر’ کی ہدایات پر آسکر جیتنے والی پہلی خاتون بنی تھیں۔

سیاہ فام مرکزی کردار پر مبنی پکسر کی پہلی فلم ‘سول’ نے بہترین اینیمیٹڈ فیچر کا اعزاز حاصل کیا۔

برطانیہ کے ڈینیئل کلویا نے 1960 کے بلیک پینتھر ایکٹویسٹ فریڈ ہیمپٹن کے کردار پر بیسٹ سپورٹنگ رول کا ایوارڈ حاصل کیا۔

تاہم سماجی دوری کی وجہ سے آسکر کی تقریب میں کچھ تبدیلیاں کی گئی تھیں اور اسے لاس اینجلس میں یونین اسٹیشن کی طرف منعقد کیا گیا تھا۔

کورونا وائرس کے سخت ٹیسٹنگ اور قرنطینہ پروٹوکولز کے بعد، نامزد کیے گئے افراد اور دیگر مہمان کی اکثریت بغیر ماسک کے شریک تھے۔

آسکرز کے فاتحین کا انتخاب اکیڈمی آف موشن پکچر آرٹس اینڈ سائنسز کے 9 ہزار اراکین کے خفیہ بیلٹ میں کیا گیا تھا۔

93ویں آسکر ایوارڈز کے فاتحین کی مکمل فہرست کچھ یوں ہے:

بہترین پکچر: فرانسس میک ڈورمینڈ، نومیڈلینڈ

بہترین اداکار: اینتھونی ہاپکنز، دی فادر

اوریجنل اسکرین پلے: ایمریلڈ فینل، پرومسنگ ینگ وومین

ایڈاپٹڈ اسکرین پلے: فلورین زیلر اور کرسٹوفر ہیمپٹن، دی فادر

بین الاقوامی فلم: این ادر راؤنڈ، ڈنمارک

بہترین معاون اداکار: ڈینیئل کلویا ، جوداس اور بلیک مسیحا

بہترین معاون اداکارہ: یوہ-جنگ یون ، میناری

بہترین ہدایت کار: کلوئی زاؤ ، نومیڈلینڈ

ساؤنڈ: ساؤنڈ آف میٹل

میک اپ اور ہیئر سٹائلنگ: ما رائنیز بلیک باٹم

کاسٹیوم ڈیزائن: این روتھ، ما رائنیز بلیک باٹم

لائیو ایکشن شارٹ فلم: 2 ڈسٹنٹ اسٹرینجرز

اینیمیٹڈ شارٹ فلم: اف اینیتھنگ ہیپنز آئی لو یو

اینیمٹڈ فیچر: سول

ڈاکیومنٹری شارٹ سبجیکٹ: کولیٹ

ڈاکیومنٹری فیچر: مائی آکٹوپس ٹیچر

وژیول ایفیکٹس: ٹینیٹ

پروڈکشن ڈیزائن: مانک

سنیمیٹوگرافی: مانک

فلم ایڈیٹنگ: ساؤنڈ آف میٹل

اوریجنل اسکور: سول ، ٹرینٹ ریزنور ، اٹیکس راس اور جون بٹسٹ

اوریجنل سانگ: جوداس اور بلیک مسیحا کا ‘فائٹ فار یو’

اوباش نوجوان نے تھپڑ کے جواب میں اداکارہ فاطمہ ثنا شیخ کو مکا دے مارا۔

بالی ووڈ میں فلم دنگل سے اپنی پہچان بنانے والی اداکارہ فاطمہ ثنا شیخ اب تک فلم ’ٹھگس آف ہندوستان‘، ’سورج پر منگل بھاری‘، ’لڈو‘ میں اداکاری کے جوہر دکھاچکی ہیں جب کہ رواں سال ان کی فلم ’بھوت پولیس‘ ریلیز ہوگی جس میں وہ سیف علی خان اور علی فضل کے مدمقال کردار ادا کریں گے۔

ایک انٹریو میں اداکارہ نے انکشاف کیا کہ ایک بار وہ جم سے واپس آرہی تھیں کہ ایک اوباش نوجوان نے ان کا پیچھا کرنا شروع کیا لیکن جب انہیں محسوس ہوا تو وہ رک گئیں تو وہ گھورنے لگا جس پر اداکارہ نے پوچھا کیوں گھور رہے ہو، لڑکے نے جواب دیا ’’گھورتا رہوں گا اور پھر مجھے چہرے پر چھوا تو میں نے سے تھپڑ ماردیا۔
فاطمہ ثنا شیخ نے مزید بتایا کہ اوباش نوجوان نے مجھے تھپڑ کے جواب میں مکا دے مارا جس پر میں نے فوراً اپنے والد کو بلایا جو میرے پیچھے پیچھے ہی چلتے ہوئے آرہے تھے، انہوں نے فوراً اس لڑکے کا پیچھا کیا اور چلاتے ہوئے کہا کون تھا جس نے میری بیٹی کو ہاتھ لگایا، لیکن میرے والد کے قریب آنے تو وہ لڑکا گلیوں میں بھاگ گیا۔

اداکارہ نے اپنے فلمی کیریئر پر بات کرتے ہوئے کہا ’’بالی ووڈ میں کاسٹنگ کاؤچ کلچر موجود ہے اور مجھے بھی اس سے گزرنا پڑا ہے، میرے کیریئر میں ایسا وقت بھی آیا جب مجھے کہا گیا کہ فلم چاہیے تو جسمانی تعلق قائم کرنا ہوگا جب کہ متعدد بار میرے پراجیکٹس دیگر اداکاراؤں کو دیے گئے ہیں‘‘۔

سابقہ اداکارہ نور بخاری نے بھارتیوں کو کورونا کے علاج کے لیے سورۃ رحمٰن سننے کا مشورہ دے دیا۔

سوشل میڈیا پلیٹ فارم انسٹاگرام پر اداکارہ نے پوسٹ شیئر کرتے ہوئے بھارتیوں کے نام پیغام دیا۔

اداکارہ نے اپنے پیغام میں لکھا کہ ہماری دعائیں بھارت کے لیے ہیں، اللہ بھارت پر رحم کرے، میری انڈیا سے تعلق رکھنے والے اپنے تمام فینز اور مداحوں سے گزارش ہے کہ برائے مہربانی کورونا کے علاج کے طور پر قاری عبدالباسط کی آواز میں دن میں 3 مرتبہ سورۃ الرحمٰن کی تلاوت سنیں۔

اداکارہ نے مزید لکھا کہ اگر کوئی کورونا میں مبتلا ہے تو اس کے پاس یہ سورۃ رکھ دیں ، گھر میں رہیں اور محفوظ رہیں ۔

خیال رہے کہ پڑوسی ملک بھارت میں کورونا کی صورتحال ابتر ہوگئی ہے اور آکسیجن کی کمی کی وجہ سے لوگوں کی ہلاکتوں میں اضافہ ہو گیا ہے۔ دکھ کی اس گھڑی میں پاکستانی فنکاروں سمیت شہریوں کی بڑی تعداد بھی بھارتیوں سے اظہار یکجہتی کرتے ہوئے ان کے لیے دعاگو ہے ۔

دوسری جانب بھارت میں آج بھی کورونا کے مزید3لاکھ 50 ہزار کیسز سامنے آئے ہیں جب کہ مزید 2 ہزار 760 افراد جان سے چلے گئے ہیں۔

بولی وڈ اداکارہ کنگنا رناوٹ کو تنگ نظر، ڈراما کوئین اور اسکینڈل کوئین بھی کہا جاتا ہے جو اکثر متنازع بیانات دیتی رہتی ہیں۔

کنگنا رناوٹ نے ماضی میں پاکستان کے خلاف بھی کئی بار بیانات دیئے ہیں تاہم اس بار انہوں نے ایک ٹوئٹ میں پاکستانی شہریوں کو سراہا ہے۔

بھارت میں کورونا وائرس سے یومیہ کیسز اور ہلاکتوں میں ریکارڈ اضافے کے ساتھ آکسیجن کی قلت پر پاکستانی ٹوئٹر صارفین نے پڑوسی ملک کی صورتحال پر تشویش کا اظہار کیا تھا۔

پاکستانی ٹوئٹر صارفین نے وزیراعظم عمران خان پر زور دیا تھا کہ وہ انسانی بنیادوں پر بھارت کے لیے امداد بھیجیں۔

اس حوالے سے کئی ٹرینڈز بھی سامنے آئے جن میں سے ایک پاکستان اسٹینڈ وڈ ود انڈیا بھی تھا۔

ہندوستان ٹائمز کی رپورٹ کے مطابق اس ٹرینڈ کے حوالے سے کنگنا رناوٹ نے ایک ٹوئٹ پوسٹ کیا۔

اداکارہ نے لکھا ‘پاکستان میں #PakistanstandswithIndia کو ٹاپ ٹرینڈ دیکھنا خوش کن ہے، ہمیں اس آزمائش کے وقت میں پاکستانیوں کی ہمدردی کا اعتراف کرنا چاہیے’۔

بھارت میں 24 اپریل کو کورونا وائرس سے 24 گھنٹوں میں 2624 ہلاکتیں رپورٹ ہوئیں جبکہ ملک بھر میں آکسیجن کی سپلائی نہ ہونے کے برابر ہے، جس کے نتیجے میں ہلاکتوں میں اضافہ ہوا ہے۔

آکسیجن کے ساتھ ساتھ جان بچانے والی ادویات اور ہسپتالوں میں بستروں کی قلت سے بھی ہلاکتوں میں اضافہ ہورہا ہے۔

اس سے قبل کنگنا رناوٹ نے ایک ٹوئٹ میں خون میں آکسیجن میں کمی کا ایک حل بھی پیش کیا تھا۔

اداکارہ نے ایک ویڈیو شیئر کی تھی جس میں ایک خاتون گہرے سانس لے رہے تھی اور لکھا ‘ہر ایک جس کو آکسیجن کی کمی کا سامنا ہے، اسے ایسا کرنا چاہیے، شجرکاری اس مشکل کا مستقل حل ہے، اپنے کپڑوں کو ری سائیکل کرنا، ماحول دوست غذا کا استعمال اور سادہ زندگی مستقل حل ہیں، جو اس وقت مددگار ثابت ہوسکتے ہیں’۔

کنگنا نے موجودہ صورتحال کی وجہ بھارت کی زیادہ آبادی کو قرار دیا تھا۔

پاکستان شوبز انڈسٹری کی سینئر اداکارہ بشریٰ انصاری نے کورونا وائرس سے متاثرہ اپنی بہن سنبل شاہد کے لیے سوشل میڈیا پر جذباتی پیغام شیئر کیا ہے۔

پاکستان کی سینئر اداکارہ بشریٰ انصاری کی بہن اور اداکارہ سنبل شاہد کی حالت تشویشناک ہے اور وہ وینٹی لیٹر پر ہیں۔

بشریٰ انصاری نے کورونا سے متاثرہ اپنی بہن کے نام ایک جذباتی پیغام سوشل میڈیا پر شیئر کیا ہے۔

انہوں نے اپنے انسٹاگرام اکاؤنٹ پر سنبل شاہد کے ساتھ تصویر شیئر کی اور لکھا کہ ‘میری پیاری بہن سنبل شاہد اٹھ جاؤ، ہم پریشان ہیں’۔

بشریٰ انصاری نے مزید لکھا کہ ‘جلد ٹھیک ہوجاؤ، خدا کے لیے سنبل ٹھیک ہوجاؤ’۔

خیال رہے کہ بشریٰ انصاری نے 10 اپریل کو اپنی بہن سنبل شاہد کے کورونا وائرس سے متاثر ہونے سے آگاہ کیا تھا۔

بشریٰ انصاری نے اپنی پوسٹ میں لکھا تھا کہ ‘میری پیاری بہن سنبل شاہد ان دنوں کورونا وائرس کے خلاف جنگ لڑرہی ہیں’۔

انہوں نے مداحوں سے اپیل کی تھی کہ وہ ان کی بہن کی جلد صحتیابی کے لیے دعا کریں۔

بشریٰ انصاری نے اپنی پوسٹ کے کیپشن میں مزید لکھا تھا کہ ‘چار چاند سلامت رہیں آمین’۔

بعدازاں اسما عباس نے 22 اپریل کو فوٹو شیئرنگ ایپ انسٹاگرام پر ان کی حالت بگڑنے سے متعلق بتایا تھا۔

اسما عباس نے اپنی پوسٹ میں لکھا تھا کہ ‘میری پیاری باجی وینٹی لیٹر پر ہیں، برائے مہربانی ان کی صحتیابی کے لیے دعا کریں’۔

اداکارہ اسما عباس نے انسٹاگرام پر شیئر کی گئی پوسٹ میں سنبل شاہد کی تصویر بھی شیئر کی تھی۔

خیال رہے کہ سال 2020 میں کورونا کی پہلی لہر کے پھیلاؤ سے لے کر اب تک پاکستان میں شوبز سے وابستہ کئی شخصیات بھی کورونا وائرس کا شکار ہوئیں، جن میں سے زیادہ تر شخصیات کم از کم 2 ہفتے جبکہ کچھ ڈیڑھ ماہ بعد صحتیاب ہوئی تھیں۔

ان دنوں پاکستان میں کورونا وائرس کے یومیہ کیسز کی تعداد میں اضافہ دیکھا جارہا ہے، این سی او سی کے مطابق گزشتہ 24 گھنٹوں میں ملک میں کورونا کے 5 ہزار 611 کیسز کی تصدیق ہوئی جبکہ 118 افراد وبا سے انتقال کرگئے۔

ملک میں کورونا کی صورتحال بگڑنے کے پیش نظر پابندیوں میں سختی کردی گئی ہے جبکہ حالات قابو نہ ہونے کی صورت میں لاک ڈاؤن کا عندیہ بھی دیا گیا ہے۔