Category شوبز

پاکستانی ماڈل و اداکارہ نادیہ حسین نے گزشتہ چند روز سے سوشل میڈیا پر گھریلو ملازمہ سے بدسلوکی کی ویڈیو وائرل ہونے پر وضاحت دے دی۔

خیال رہے کہ 3 روز قبل نادیہ حسین کی ایک ویڈیو وائرل ہوئی تھی جس میں انہیں گھریلو ملازمہ کو ڈانٹتے ہوئے اور اس پر چیختے چلاتے دیکھا گیا تھا۔

اب نادیہ حسین نے اس ویڈیو کے حوالے سے وضاحتی بیان جاری کرتے ہوئے کہا ہے کہ ملازمہ کو ڈانٹنے سے متعلق وائرل ہونے والی ویڈیو ایک مہم کا حصہ ہے اور برانڈ کی تفصیلات بعد میں جاری کی جائیں گی۔

نادیہ حسین نے اپنی پوسٹ میں کہا کہ ‘میں حقیقتاً یہ محسوس کرتی ہوں کہ عملے کی لاپرواہی جو بجلی کے شدید خطرے یا کسی نقصان یا تحفظ کی خلاف ورزی کی وجہ بنے، اسے نظرانداز نہیں کرنا چاہیے اور انہیں سخت سرزنش اور تنبیہ کرنے کی ضرورت ہوتی ہے’۔

انہوں نے کہا کہ جونیئر آرٹسٹ جسے رقم کی ادائیگی کے ساتھ بنائی گئی ویڈیو، میں جسمانی یا زبانی بدسلوکی کی مرتکب نہیں ہورہی بلکہ میں عملے کے ساتھ سختی کرنے کے مؤقف پر قائم ہوں۔

نادیہ حسین نے کہا کہ ‘جب میرے گھر اور خاندان یا میرے سیلونز اور دیگر عملے کی صحت اور تحفظ کی بات آئے گی تو میں انہیں ضرور ڈانٹوں گی’۔

ماڈل و اداکارہ نے کہا کہ جب آپ کام کے لیے باہر نکلتے ہیں تو ہر فرد کو اپنے فرائض کی انجام دہی کے لیے ذمہ دار ہونے کی ضرورت ہوتی ہے، اس سے قطع نظر کہ آپ کس طبقے سے تعلق رکھتے ہیں۔

خیال رہے کہ گزشتہ 3 روز سے مختلف سوشل میڈیا پلیٹ فارمز پر نادیہ حسین کی ایک ویڈیو گردش کررہی ہے جس میں ماڈل و اداکارہ کو اپنے سامنے ہاتھ باندھ کر کھڑی ملازمہ کو سوئچ بند نہ کرنے اور موبائل میں مگن رہنے پر ڈانٹتے ہوئے دیکھا جاسکتا ہے۔

وائرل ہونے والی ویڈیو میں نادیہ حسین کو ملازمہ پر چیختے ہوئے سنا جاسکتا ہے کہ ‘تمہیں کہا ہے کہ جب بھی بجلی جھٹکے مارے فوراً مین سوئچ بند کیا کرو لیکن پتا نہیں تمہاری عقل کیا اس موبائل میں ہے’۔

ویڈیو میں انہوں نے مزید کہا تھا کہ ‘صرف تمہاری وجہ سے مہینے میں دوسری مرتبہ مشین جلی ہے، صرف اس مصیبت فون کی وجہ سے’۔

بعد ازاں نادیہ حسین کو ملازمہ کو ڈانٹتے ہوئے کہتے دیکھا گیا تھا کہ اب تم اس کا بل بھروگی۔

یہ ویڈیو وائرل ہونے کے بعد سوشل میڈیا صارفین کی ایک بڑی تعداد کی جانب سے نادیہ حسین پر شدید تنقید کی گئی تھی۔

مقبول اداکارہ علیزے شاہ نے خود سے متعلق یاسر نواز کے تنقیدی بیان پر ردِ عمل کا اظہار کیا ہے۔

اداکارہ کا ایک انٹرویو سوشل میڈیا پر وائرل ہورہا ہے جس میں ان کے ہمراہ اداکار علی سفینہ موجود ہیں جنہوں نے علیزے سے متعلق کچھ افواہوں کے حوالے سے سوالات کیے۔

علی سفینہ نے علیزے شاہ سے سوال پوچھا کہ تمہارے بارے میں لوگ یہ کیوں کہتے ہیں کہ علیزے کے ساتھ کام کرنا بہت مشکل ہے۔

سوال کا جواب دیتے ہوئے اداکارہ نے کہا کہ مجھے ایسا لگتا ہے پانچوں انگلیاں برابر نہیں ہوتیں، ہر انسان الگ ہوتا ہے اور وہ ہر کسی کے ساتھ تعلق نہیں جوڑ سکتا۔

علیزے نے کہا کہ چونکہ ہر شخص دوسرے سے مختلف ہوتا ہے اس لیے اسے لگتا ہے کہ میرے ساتھ کام کرنا مشکل ہے۔

اداکارہ کا کہنا تھا کہ جو انسان جیسا رویہ اختیار کرے گا میں بھی اس کے ساتھ ویسا ہی برتاؤ کروں گی، اگر وہ مجھ سے بدتمیزی کرے گا تو میں کیوں خاموش رہوں گی، تو جیسے آپ خود ہوں گے ویسے ہی دوسرے کے بھی ہونے کی امید رکھیں۔

خیال رہے کہ گزشتہ ماہ اداکار و ہدایتکار یاسر نواز اہلیہ ندا یاسر کے ہمراہ نجی ٹی وی کے ایک پروگرام میں شریک ہوئے تھے جہاں انہوں نے یہ انکشاف کیا تھا کہ علیزے شاہ کے ساتھ مجھے کام کرکے بالکل مزہ نہیں آیا، میں بہت زیادہ پریشان ہوگیا تھا یہاں تک کہ میں پچھتانے لگا تھا کہ علیزے کے ساتھ کام کیوں کیا۔

کراچی: اداکارہ بشریٰ انصاری ڈانس ویڈیو وائرل ہونے پر تنقید کی زد میں آگئیں۔

حال ہی میں سوشل میڈیا کے مختلف پیلٹ فارمز پر معروف اداکارہ بشریٰ انصاری کی ڈانس ویڈیو وائرل ہوئی ہے جس میں دیکھا جاسکتا ہے کہ اداکارہ بھارتی گانے پر اذان سمیع خان کے ساتھ ڈانس کر رہی ہیں۔

ویڈیو وائرل ہوتے ہیں سوشل میڈیا صارفین نے بشریٰ انصاری کو خوب آرے ہاتھوں لیا۔ صارفین نے اداکارہ کے اس عمل کو شرمناک قرار دیتے ہوئے ان پر خوب تنقید کی۔

صارفین میں سے ایک نے کہا کہ ’یہ وہی بشریٰ انصاری ہیں جن کی بہن ابھی کچھ وقت پہلے کورونا وائرس کے باعث چل بسیں۔۔۔ بڑے حوصلے ہیں ان کے‘۔ ایک اور صارف نے کہا کہ ’یہ وہی ہیں جو دوسروں کا اسلام کا درس دیتی ہیں اور ان کی اپنی حرکات دیکھیں‘۔ جب کہ دوسرے نے کہا کہ ’لگتا ہے کہ انہیں جنت مرزا کی بددعا لگی ہے‘۔

ممبئی: بالی ووڈ کے اداکار عامر خان اور کرن راؤ میں طلاق کے بعد راکھی ساونت نے اداکار کو شادی کی پیشکش کردی۔

ٹائمز آف انڈیا کے مطابق عامر خان اور کرن راؤ میں طلاق پر اداکارہ راکھی ساونت کا ردعمل سامنے آگیا ہے۔ راکھی ساونت نے میڈیا سے بات چیت کرتے ہوئے کہا کہ یہاں میرا گھر نہیں بس رہا اور لوگوں کی طلاقیں ہو رہی ہیں، 15 سال پہلے میں نے ایک انٹرویو میں کہا تھا کہ عامر خان نے اپنی پہلی بیوی کو چھوڑ کر کرن راؤ سے شادی کرلی جس پر میں ناخوش ہوں۔

اداکارہ نے کہا کہ لگتا ہے 15 سالوں بعد عامر خان نے میری بات کو سنجیدہ لے کر کرن راؤ کو طلاق دے دی۔ عامر خان کو مخاطب کرتے ہوئے اداکارہ نے کہا کہ ’عامر جی، آپ اپنی بیوی کو مت چھوڑیں‘۔ اس پر میڈیا کے نمائندؤں نے انہیں بتایا کہ عامر خان نے بیوی کو طلاق دے دی ہے اور اب کچھ نہیں ہوسکتا۔
راکھی ساونت نے کہا کہ ’عامر جی، میں کنواری ہوں، آپ میری بارے میں کیا سوچتے ہیں؟‘۔ اداکارہ نے کہا کہ میں طلاق ہونے پر دکھی ہوں، میرا گھر بس نہیں رہا اور لوگوں کی طلاقیں ہو رہی ہیں، میرے لیے کوئی شوہر ڈھونڈ کر لائے، اس بار میں ضرور شادی کروں گی۔

خیال رہے کہ کچھ روز قبل ایک ویب سائٹ کو انٹرویو دیتے ہوئے اداکارہ کا کہنا تھا کہ میں بہترین اداکارہ ہوں، لیکن اب ایک اچھی بیوی اور اچھی ماں بننا چاہتی ہوں۔

بولی وڈ مسٹر پرفیکشنسٹ عامر خان اور ان کی اہلیہ کرن راؤ کی جانب سے 3 جولائی کو طلاق کی تصدیق کیے جانے کے بعد جہاں ان کے مداح پریشان دکھائی دے رہے ہیں، وہیں ان کی طلاق کے بعد چہ مگوئیاں بھی شروع ہوگئیں۔

عامر خان اور کرن راؤ کی جانب سے تصدیق کیے جانے کے بعد بھارت سمیت پاکستان میں بھی ٹوئٹر پر ان کا نام ٹاپ ٹرینڈ رہا اور لوگوں نے عامر خان کے حوالے سے کئی انکشافات بھی کیے۔

بھارتی ویب سائٹ ’فری پریس جرنل‘ کے مطابق عامر خان کی طلاق کے بعد ان کا نام ٹاپ ٹرینڈ رہا اور لوگ اداکارہ فاطمہ ثنا شیخ کو ان کی طلاق کے معاملے میں لے آئے۔

کئی لوگوں نے ٹوئٹس کیں کہ عامر خان اور کرن راؤ کی طلاق کی ممکنہ وجہ فاطمہ ثنا شیخ ہیں، جن سے مسٹر پرفیکشنسٹ کے تعلقات کی خبریں کچھ سال سے زیر گردش تھیں۔

کئی لوگوں نے اپنی ٹوئٹس میں دعویٰ کیا کہ عامر خان نے کرن راؤ کو فاطمہ ثنا شیخ کے چکر میں ہی طلاق دی ہے، ساتھ ہی کچھ افراد نے ان کے لیے لکھا کہ مسٹر پرفیکشنسٹ کا صرف قد چھوٹا ہے، باقی ان کے کام بڑے ہیں۔

کچھ افراد نے عامر خان اور کرن راؤ کی طلاق کے بعد مسٹر پرفیکشنسٹ کے ساتھ فاطمہ ثنا شیخ کی تصاویر شیئر کرتے ہوئے انہیں ایڈوانس مبارک باد بھی پیش کی۔

بعض ٹوئٹس میں تو یہ دعویٰ بھی کیا گیا کہ یہ تو 2016 کی فلم ’دنگل‘ سے ہی خدشہ تھا کہ عامر خان کا اگلا ہدف اداکارہ فاطمہ ثنا ہوں گی۔

سوشل میڈیا پر عامر خان کی طلاق کے معاملے میں اپنا نام گھسیٹے جانے پر تاحال فاطمہ ثنا شیخ نے کوئی رد عمل نہیں دیا اور اب تک مسٹر پرفیکسنسٹ کی طلاق کا سبب بھی معلوم نہیں ہوسکا۔

ابتدائی طور پر فاطمہ ثنا شیخ اور عامر خان کے درمیان 2017 میں تعلقات کی چہ مگوئیاں اس وقت شروع ہوئی تھیں جب دونوں نے میگا بجٹ فلم ’ٹھگس آف ہندوستان‘ میں ایک ساتھ کام کیا تھا۔

’ٹھگس آف ہندوستان‘ سے قبل 2016 میں دونوں نے ’دنگل‘ میں بھی ایک ساتھ کام کیا تھا، جس میں فاطمہ ثنا شیخ نے بولی وڈ مسٹر پرفیکشنسٹ کی بیٹی کا کردار ادا کیا تھا۔

دونوں کی جانب سے ’دنگل‘ میں ایک ساتھ کام کیے جانے کے بعد 2017 میں افواہیں آنا شروع ہوئیں کہ 29 سالہ فاطمہ ثنا شیخ کے خود سے 27 سال زائد العمر عامر خان سے تعلقات استوار ہوگئے ہیں۔

اور ان تعلقات میں اس وقت مضبوطی کی خبریں سامنے آئیں جب کہ دونوں نے ’ٹھگس آف ہندوستان‘ میں کام کیا۔

فاطمہ ثنا شیخ اور عامر خان کے درمیان تعلقات کی خبریں آنے کے بعد اداکارہ نے ایک انٹرویو میں ان پر رد عمل بھی دیا تھا اور کہا تھا کہ انہیں اس معاملے پر خبریں پڑھ کر پریشانی ہوئی۔

فاطمہ ثنا شیخ کا کہنا تھا کہ ایک دن ان کی والدہ نے عامر خان اور ان کے تعلقات سے متعلق ٹی وی پر خبر دیکھی تو پریشان ہوگئیں اور اگلے ہی دن ان کی تصاویر عامر خان کے ساتھ شائع ہوئیں اور انہوں نے اپنے متعلق بہت کچھ غلط پڑھا۔

اداکارہ کا کہنا تھا کہ انہیں شروع میں ایسی خبریں پڑھ کر پریشانی ہوتی تھی لیکن اب انہیں ایسا کوئی مسئلہ درپیش نہیں آتا اور وہ ایسی خبروں کو پڑھ کر نظر انداز کردیتی ہیں۔

اگرچہ فاطمہ ثنا شیخ نے عامر خان سے اپنے تعلقات کی خبریں شائع ہونے پر بات کی تھی لیکن انہوں نے واضح طور پر مسٹر پرفیکشنسٹ سے تعلقات کی تردید تا تصدیق نہیں کی تھی۔

اور اب عامر خان کی دوسری اہلیہ سے بھی طلاق ہوجانے پر چہ مگوئیاں ہیں کہ ممکنہ طور پر فاطمہ ثنا شیخ ہی اس کا سبب ہیں۔

تاہم عامر خان کے قریبی دوست ایسا نہیں سجھتے.

عامر خان کے قریبی دوست امین حاجی کے مطابق عامر اور کرن کے درمیان لاک ڈاؤن میں ہی اختلافات شروع ہوگئے تھے اور مجھے فروری میں دونوں کے اختلافات کا پتا چلا تو بے حد دکھ ہوا۔

امین نے بتایا کہ دونوں کے اختلافات ختم کرانے کیلئے بات کی تو میری آنکھیں نم ہوگئیں اور دونوں سے بڑی التجا کی کہ علیحدگی نہ اختیار کریں لیکن آج وہ خبر سننے کو مل ہی گئی۔

ان کا کہنا تھاکہ عامر اور کرن کے درمیان علیحدگی کی وجہ جاننے کیلئے سب ہی بیتاب ہیں لیکن علیحدگی کے اعلان کے وقت بھی دونوں لداخ میں فلم ’لال سنگھ چڈھا’ کی شوٹنگ میں مصروف ہیں جبکہ اس فلم کی پروڈیوسر کرن ہی ہیں۔

امین حاجی نے مزید بتایا کہ رشتہ ٹوٹنا ذاتی نوعیت کا معاملہ ہے اور مجھے لگتا ہے کہ عامر شاید کام کی وجہ سے گھر کو وقت نہیں دے پا رہے ہوں، اسی وجہ سے ایسا ہوا ہو۔

ان کا کہنا تھاکہ عامر کی علیحدگی کی کئی وجوہات بیان کی جارہی ہیں اور کہا جارہا ہے کہ ان کی زندگی میں کوئی اور آگیا ہے، اس کی میں تردید کرتا ہوں کیونکہ ایسا ہوتا تو مجھے ضرور علم ہوتا۔

خیال رہے کہ امین حاجی اور عامر خان 2 دہائیوں سے زیادہ آپس میں دوست ہیں اور ساتھ کئی فلموں میں بھی کام کرچکے ہیں۔

ممبئی: مسٹرپرفیکشنسٹ عامر خان اور اہلیہ کرن راؤ نے 15 سال بعد علیحدگی کا اعلان کردیا۔

بالی ووڈ کے مسٹرپرفیکشنسٹ عامر خان اوراہلیہ کرن راؤ نے باہمی رضامندی سے اپنی شادی ختم کرنے کا اعلان کردیا جب کہ وہ بیٹے کی پرورش مل کر کریں گے۔

دونوں کی جانب سے جاری کردہ بیان میں کہا گیا کہ شادی کے خوبصورت 15 سال ہم نے بہترین اندازمیں گزارے جہاں خوشیاں تھیں اورہمارا رشتہ یقین، احترام اورمحبت پرمبنی تھا۔ اب ہم ایک نئی زندگی کا آغاز چاہتے ہیں لیکن اس میں ہم شوہراوربیوی کے طورپر نہیں ہوں گے۔
ہم نے علیحدگی کا فیصلہ کچھ عرصے قبل ہی کیا تھا جس کا باقائدہ ہم اعلان کررہے ہیں لیکن ہم اپنے بیٹے کی پرورش و دیکھ بھال والدین کے طورپر ہی کریں گے۔ جاری بیان میں کہا گیا کہ ہم اپنے پراجیکٹس پر بھی ویسے ہی کام کریں گے جیسے ہم کرتے آئے ہیں۔

دوونوں کی جانب سے ان تمام لوگوں کا شکریہ ادا کیا گیا جنہوں نے انہیں نیک تمنائیں دیں اور آگے بھی ان ہی دعاؤں کے منتظر ہیں۔ یہ بھی کہا گیا کہ آپ سب کو ہماری طلاق ایک باب کا بند ہونا نہیں بلکہ زندگی کے ایک باب کی طرح لگے گی۔

واضح رہے کہ دونوں کی شادی 2005 میں ہوئی تھی اور ان کا ایک بیٹا آزاد بھی ہے۔

معروف ٹک ٹاکر حریم شاہ ان دنوں مبینہ طور پر پیپلز پارٹی کے رکن سندھ اسمبلی سے کیے گئے شادی کے دعوے کے بعد خبروں میں ہیں ۔

شوہر سے متعلق مختلف شخصیات کا نام جوڑے جانے کے سوال پر حریم شاہ نے کہا کہ ’پیپلزپارٹی کے رکن سندھ اسمبلی اور صوبائی وزیر سے کی گئی شادی کے اعتراف کے بعد میں نے مداحوں سے کچھ روز تک شوہر کی شناخت مخفی رکھنے کے لیے گزارش کی تھی لیکن اس کے باوجود سوشل میڈیا سمیت کئی میڈیا ہاؤسز نے میرا نام مختلف سیاسی شخصیات کے ساتھ جوڑ دیا، یہ تمام ویڈیوز خبریں بالکل بے بنیاد اور غیر مصدقہ ہیں جو نامناسب ہیں‘۔

ٹک ٹاکر کا کہنا تھا کہ ’فی الوقت میں نے کسی بھی شخصیت کو اپنا شوہر کہنے کے حوالے سے کوئی نام نہیں لیا، میں نے صرف شوہر کی پارٹی کے حوالے سے اعتراف کیا تھا اور کہا تھا کہ اعلانیہ بتاؤں گی کہ شوہر کا نام کیا ہے‘۔

نہ پہلے کبھی شادی ہوئی ، نہ اولاد ہوئی اور نہ کبھی طلاق ہوئی
حریم شاہ نے کہاکہ ’میری پہلی شادی اور طلاق کے حوالے سے بھی بہت کچھ میڈیا پر آچکا ہے لیکن میں اپنے تمام مداحوں کو بتانا چاہتی ہوں نہ میں اس سے پہلے شادی شدہ تھی، میری کوئی اولاد نہیں نہ ہی میری کبھی طلاق ہوئی اور نہ ہی زندگی بھر کوئی بوائے فرینڈ بنایا‘۔

ترکی کے دورے سے متعلق حریم نے کو بتایا کہ ’الحمداللہ شوہر کے ساتھ جلد ترکی جارہی ہوں ، یہ میرا نجی دورہ ہے چونکہ کئی پراجیکٹ پر کام کررہی ہوں لہٰذا جلد واپسی ہوگی‘۔

شادی والدین کی شرکت کے بغیر اور مسنون طریقے سے ہوئی
حریم نے انکشاف کیا کہ’شادی والدین کی شرکت کے بغیر اور مسنون طریقے سے ہوئی، چونکہ والدین میرے میڈیا میں آنے کے خلاف تھے لہٰذا انہوں نے شادی میں بھی شرکت نہیں کی‘۔

’شادی ڈیڑھ ہفتہ قبل جمعرات کے روز ہوئی اور اگلے روز میں نے نماز جمعہ ادا کی‘
انہوں نے کہا کہ ’میں تاریخوں کے حوالے سے خاصی کمزور یادداشت کی مالک ہوں ، شادی ڈیڑھ ہفتہ قبل جمعرات کے روز ہوئی اور اگلے روز میں نے نماز جمعہ ادا کی‘۔

عروسی لباس سے متعلق حریم کا کہنا تھا کہ ’میں شادی کے روز روایتی دلہن نہیں بنی تھی اور نہ ہی میں نے شادی کی کوئی تصویر اب تک سوشل میڈیا پر اپ لوڈ کی، نہ ہی کسی برائیڈل شوٹ کا تعلق میری شادی سے ہے‘۔

روبینہ شیر علی کو دکھانا چاہتی تھی کہ کوئی بھی چیز انسان کی پہنچ سے بہت دور نہیں ہوتی
ٹک ٹاکر نے مزید کہا کہ ’روبینہ شیر علی نے کہا تھا کہ حریم شاہ کون ہے؟ جو وزیراعلیٰ ہاؤس میں دندناتی پھرتی ہے؟ روبینہ شیر علی کو دکھانا چاہتی تھی کہ کوئی بھی چیز انسان کی پہنچ سے بہت دور نہیں ہوتی‘۔

ان کا کہنا تھا کہ ’ میں نے بارہا کہا کہ میں پی ٹی آئی کی سپورٹر ہوں لیکن میں نے یہ بھی کہا تھا کہ میری پسندیدہ پارٹی پیپلز پارٹی ہے اور بے نظیر بھٹو پسندیدہ ہیں‘۔

شوہر میں پسندیدگی سے متعلق حریم نے کہا کہ ’میرے شوہر کی سب سے خاص بات یہ ہے کہ انہوں نے شادی سے قبل مجھے کوئی خواب نہیں دکھائے، انہوں نے مجھے اپنی پہلی شادی، پہلی بیوی اور بچوں سے متعلق سب سچ بتادیا‘۔

شادی کے لیے شوہر کی جانب سے پروپوز کیا گیا اور جب انہوں نے شادی کی پیشکش کی تو میں نے دو سے تین دن کا وقت مانگا

ان کا کہنا تھا کہ ’شادی کے لیے شوہر کی جانب سے پروپوز کیا گیا اور جب انہوں نے شادی کی پیشکش کی تو میں نے دو سے تین دن کا وقت مانگا اور پھر میں نے کچھ لوگوں سے مشورے کیے اور میرے دل سے آواز آئی’ ہاں‘ جس کے بعد ہماری شادی ہوگئی‘۔

شوہر کو تین چار ماہ پہلے سے ہی جانتی ہوں
حریم شاہ نے بتایا کہ ’شوہر کو تین چار ماہ پہلے سے ہی جانتی ہوں لیکن اس دوران ہماری کوئی دوستی یا تعلق نہیں بنا بس دو تین مرتبہ ملے دیکھا اور شادی ہوگئی‘۔

ممبئی: اداکار سلمان خان کا کہنا ہے کہ کترینہ کیف نے ’کترینہ خان‘ بننے کا بڑا موقع گنوا دیا۔

بھارتی میڈیا کی رپورٹس کے مطابق ایک مرتبہ شادی کی تقریب میں بالی ووڈ کے سپر اسٹار سلمان خان اور انڈسٹری کی باربی ڈول کترینہ کیف مدعو تھے۔ سلمان خان اسٹیج پر موجود تھے کہ اسی دوران گلوکار میکا سنگھ کا گانا ’چکنی چمیلی‘ بجا جس پر فلم ’اگنیپتھ‘ میں کترینہ کیف نے رقص کیا تھا۔

سلو میاں نے گانا بجتے ہی اداکارہ کو اسٹیج پر آنے کی دعوت دیتے ہوئے کہا ’کترینہ۔۔‘، پھر سلمان خان نے وقفہ لیا اور آگے کہا ’کیف‘، اداکار نے ایک بار پھر وقفہ لے کر کہا ’کپور۔۔‘۔ اس کے بعد سلمان خان نے اداکارہ پر طنزاً کہا کہ ’کتنا بڑا موقع گنوا دیا خان بننے کا۔۔‘۔
سلمان خان کی اس بات پر تقریب میں موجود لوگوں نے زوردار قہقہے لگائے۔

پاکستان شوبز انڈسٹری کے معروف اداکار فواد کی اہلیہ ڈیزائنر صدف فواد سے ایک مداح نے دلچسپ سوال پوچھا جس کا جواب سوشل میڈیا پر زیرِگردش ہے۔

صدف فواد نے انسٹاگرام پر اپنے کام سے متعلق سوال و جواب کا ایک سیشن رکھا اور مداحوں سے سوالات پوچھنے کا کہا۔

ایک مداح نے لکھا کہ میرے پاس آپ کے لیے ایک دلچسپ سوال ہے۔ کیا آپ فواد خان کو اپنے برانڈ کی ماڈلنگ کرنے کا معاوضہ دیتی ہیں؟

اداکار کی اہلیہ نے مسکراتے ہوئے ایموجی کے ساتھ کہا کہ جی ہاں، میں بالکل دیتی ہوں بہت تعظیم اور مہربانی کے ساتھ۔

کراچی: اداکارہ و ماڈل نادیہ حسین کی اپنی ملازمہ کو جھاڑ پلانے کی ویڈیو سوشل میڈیا پر وائرل ہورہی ہے۔

نادیہ حسین کی ایک ویڈیو سوشل میڈیا پر وائرل ہورہی ہے جس میں وہ اپنی ملازمہ کو بہت بری طرح سے ڈانٹ رہی ہیں۔ ویڈیو میں دیکھا جاسکتا ہے کہ نادیہ حسین اپنی ملازمہ سے کہہ رہی ہیں کتنی بار تمہیں سمجھایا ہے کہ جب بجلی جھٹکے مارے تو پیچھے سے مین سوئچ آف کردیا کرو لیکن تم ہر وقت موبائل میں لگی رہتی ہو۔

نادیہ حسین ملازمہ کو ڈانٹتے ہوئے مزید کہہ رہی ہیں کہ مہینے میں دوسری بار میری مشین جلی ہے صرف تمہاری وجہ سے۔ اس کے علاوہ نادیہ اپنی ملازمہ کو بجلی کا زیادہ بل آنے پر بھی ڈانٹتی ہوئی نظر آئیں۔ اور کوئی تیسرا شخص دروازے کے پیچھے سے ان کی یہ ویڈیو بنارہا ہے۔

مختلف سوشل میڈیا پلیٹ فارمز پر اداکارہ نادیہ حسین کے ملازمہ کے ساتھ کیے جانے والے اس سلوک کی مذمت کی جارہی ہے۔ سوشل میڈیا پر بھی لوگ ویڈیو پر تبصرے کرتے ہوئے نادیہ حسین کو ملازمہ کے ساتھ اس طرح بات کرنے پر تنقید کا نشانہ بنارہے ہیں۔

لیکن کچھ صارفین نادیہ حسین کے حق میں بھی بولتے ہوئے نظر آئے اور کہا کہ ملازمہ کی غلطی ہے جب اسے کہا گیا ہے کہ گھر کی چیزوں پر دھیان دو تو اس کا دھیان گھر کے بجائے موبائل پر ہے۔ غلطی پر ہی ڈانٹ پڑتی ہے۔ ایک اور صارف نے لکھا کام والی ملازمائیں بھی بہت تنگ کرتی ہیں۔

تاہم سوشل میڈیا پر بہت سے لوگ اس ویڈیو کو جعلی قرار دیتے ہوئے کہہ رہے ہیں کہ یہ حقیقت نہیں بلکہ کسی ڈرامے کی شوٹنگ کا منظر لگ رہا ہے۔ دوسری جانب نادیہ حسین کی جانب سے ابھی تک اس وائرل ویڈیو کے حوالے سے کوئی بیان سامنے نہیں آیا ہے کہ یہ ویڈیو اصلی ہے یا ڈرامے کی شوٹنگ کا کوئی منظر۔