Category شوبز

نامور اداکار فیصل قریشی نے ڈرامہ سیریل ’ارطغرل غازی‘ پسند نہ کرنے کی وجہ بتادی۔

پاکستان کے نامور اداکار ومیزبان فیصل قریشی نے نجی ٹی وی پروگرام میں اداکار اعجاز اسلم کے ہمراہ شرکت کی اس موقع پر میزبان کی جانب سے پوچھے گئے سوالات کے جوابات دیے۔

ارطغرل غازی دیکھنے سے متعلق پوچھے گئے سوال پر اداکار فیصل قریشی کا کہنا تھا کہ میں نے تو یہ ڈارمہ دیکھا ہی نہیں کیوں کہ میرا مسئلہ یہ ہے کہ مجھے اس طرح کے کوئی بھی ڈرامے یا فلمیں پسند نہیں آتی جن کی دوسری زبان میں ڈبنگ کی گئی ہو یا پھر ڈرامے یا فلم کے ساتھ سب ٹائٹل چل رہے ہوتے ہیں، تو میرے لیے اس طرح کے پروگرامز دیکھنا بہت مشکل ہوجاتا ہے۔

اداکار اعجاز اسلم کا کہنا تھا کہ میں نے ڈرامہ سیریل ’ارطغرل غازی‘ اس وقت دیکھا تھا جب اس کے بارے میں پاکستان میں دور دور تک کسی کو پتہ ہی نہیں تھا، میں نے یہ نیٹ فلکس پر دیکھا تھا اور یہ اچھا ڈرامہ ہے۔

بعد ازاں میزبان کی جانب سے ڈرامے میں ’ارطغرل غازی‘ کا کردار ادا کرنے والے ترک اداکار کی تصویر دکھائی گئی تو فیصل قریشی نے کہا کہ ڈرامہ سیریل ’ارطغرل غازی‘ اچھا پلے ہے اور پاکستانی ان سے بہت پیار کرتے ہیں اور ان لوگوں کو بھی پاکستان سے بہت پیار ہے لہذا ہم چاہتے ہیں یہ پیارومحبت کا رشتہ برقرار رہے۔

ماضی کے مقبول ترین ڈرامے تنہائیاں میں اداکاری کرنے والی مرینہ اور شہناز کی جوڑی کو مداحوں نے پھر سے ساتھ دیکھنے کی خواہش ظاہر کردی ہے۔

اداکارہ مرینہ خان نے انسٹاگرام پر ایک پوسٹ شیئر کی جس میں وہ شہناز شیخ کے ہمراہ کھڑی ہیں، چہرے پر دلکش مسکراہٹ سجائے دونوں نے مداحوں کے ذہنوں میں ماضی کی یادیں تازہ کردیں۔

مرینہ نے تصویر کے کیپشن میں لکھا کہ یہ شاندار دن رہا، شہناز اور میں 35 سال بعد اسکرین پر ایک ساتھ ہیں۔

اداکارہ کے اس مبہم کیپشن نے مداحوں کو خوشی سے نہال کردیا۔

ایک صارف نے خوشی کا اظہار کرتے ہوئے کہا کہ آپ دونوں کو دوبارہ ایک ساتھ دیکھنے کیلئے مزید انتظار نہیں کیا جاسکتا۔

ایک صارف نے پوچھا کہ کیا آپ لوگ کسی پراجیکٹ میں ساتھ آنے والے ہیں؟

دیگر صارفین نے مرینہ اور شہناز کو ایک ساتھ دیکھ کر گزرے دنوں کی یادیں تازہ ہونے کا اعتراف کیا۔

دوسری جانب اداکارہ ماہرہ خان اور عائزہ خان سمیت اردو مام نامی بلاگر نے بھی اس پوسٹ پر اپنی خوشی کا اظہار کیا۔

واضح رہے کہ ڈرامہ سیریل تنہائیاں حسینہ معین نے لکھا تھا جو 1986 میں پی ٹی وی پر نشر کیا گیا تھا۔ ڈرامے میں مرینہ خان نے ‘سنیا’ جب کہ شہناز شیخ نے ‘زارا’ کا کردار ادا کیا تھا، ڈرامے کے دیگر اداکاروں میں آصف رضا میر، بدر خلیل، بہروز سبزواری اور قاضی واجد شامل تھے۔

گلوکارہ و اداکارہ میشا شفیع نے کئی ماہ تربیت لینے کے بعد یوگا میں گریجوئیشن کرکے سرٹیفائیڈ یوگا ٹیچر کا اعزاز حاصل کرلیا۔

میشا شفیع نے انسٹاگرام پر یوگا گریجوئیشن مکمل کرکے ٹیچر سرٹیفکیٹ حاصل کرنے سے متعلق پوسٹ کی اور بتایا کہ انہوں نے کورونا کی وبا کے دوران سخت شیڈول اور مصروفیات کے باوجود 200 گھنٹوں تک تربیت حاصل کی۔

لمبی چوڑی پوسٹ کے ساتھ میشا شفیع نے یوگا گریجوئیشن مکمل کرنے کے بعد ملنے والے سرٹیفکیٹ اور میڈل کے ساتھ اپنی تصویر بھی شیئر کی اور ساتھ ہی انہوں نے اپنے اساتذہ کا بھی شکریہ ادا کیا۔

گلوکارہ نے بتایا کہ 200 گھنٹوں کی تربیت لینے کے بعد اب وہ باضابطہ طور پر یوگا ٹیچر بن چکی ہیں اور انہیں مذکورہ اعزاز حاصل کرنے پر خوشی اور فخر ہے۔

میشا شفیع نے یوگا کی خصوصیات بتاتے ہوئے لکھا کہ جب سے وہ یوگا سے منسلک ہوئیں، تب سے انہوں نے اپنی زندگی میں مثبت تبدیلیاں محسوس کیں جب کہ کورونا کی وبا کے دوران یوگا سے منسلک رہنے پر بھی ان کی ذہنی، جسمانی و جذباتی صحت پر مثبت اثرات پڑے۔

میشا شفیع نے لکھا کہ ابتدائی طور پر یوگا کے حوالے سے 7 سال قبل انہیں ایک دوست نے بتایا تھا اور تب سے ان کا خواب تھا کہ وہ یوگا میں گریجوئیشن کریں اور بالآخر اب ان کا خواب پورا ہوگیا۔

یوگا گریجوئیشن مکمل کرنے پر جہاں انہوں نے اپنے اساتذہ اور دوستوں کا شکریہ ادا کیا، وہیں انہوں نے شوہر اور بچوں کا بھی شکریہ ادا کیا اور ساتھ دینے پر ان کی تعریفیں بھی کیں۔

یوگا میں گریجوئیشن مکمل کرنے پر میشا شفیع کو کئی شخصیات اور مداحوں نے مبارک باد پیش کی اور ساتھ ہی امید کا اظہار کیا کہ اب وہ دوسروں کو یوگا کی تربیت دیتی دکھائی دیں گی۔

میشا شفیع یوگا کی تربیت کے دوران انسٹاگرام پر ورزش کے دوران کھچوائی گئی تصاویر اور ویڈیوز شیئر کرتی رہتی تھیں، انہوں نے کینیڈا میں یوگا سیکھا۔

میشا شفیع گزشتہ کچھ عرصے سے کینیڈا میں مقیم ہیں اور وہیں پر ہی وہ یوگا سمیت میوزک سے وابستہ منصوبوں میں مصروف دکھائی دیتی ہیں۔

پاکستان کی معروف ماڈل اور اداکارہ ایمان علی نے معروف مصنف اور لکھاری خلیل الرحمان کے ساتھ کام کرنے سے صاف انکار کردیا۔

ایمان علی حال ہی میں ایک نجی ٹی وی کے شو میں شریک ہوئیں اور دوران شو اپنی فلمی کیریئر سے متعلق بھی گفتگو کی، ایمان علی کے مطابق، انھوں نے اپنےکیریئر کی کئی فلمیں دوستی میں کیں ، لیکن فلم ’خدا کے لیے‘ اسکرپٹ اور کردار دونوں حوالوں سے ان کی پسندیدہ ہے۔

میزبان نے ایمان علی کی وضاحت پر ان سے سوال کیا کہ وہ کچھ ایسی فلمیں بھی جانتے ہیں جہاں ایمان نے کام سے انکار کردیا ،تو اس کے پیچھے وجہ اسکرپٹ تھی یا ہدایت کار؟

سوال کے جواب میں ایمان کا کہنا تھا کہ مسترد کی گئی فلموں میں کچھ ایسی فلمیں بھی شامل ہوسکتی ہیں کہ جن کے ہدایت کار اگرچہ دوست ہوں لیکن ان کے لکھاری بالکل بھی دوست نہ ہوں یا پھر کوئی زہر بھی لگ رہا ہو۔

دوران شو ایمان علی نے انکشاف کیا وہ ماضی میں خلیل الرحمان کی لکھی گئی فلم میں کام کرنے سے انکار کرچکی ہیں ، انکار کی وجہ بتاتے ہوئے انھوں نے کہا فلم میں خلیل صاحب نے ہیروئن کے کردار سے دغا کیا، فلم کے رائٹر کو پنجابی اور پنجاب کا پتہ تھا لیکن انھوں نے اس کے برخلاف لکھا ۔

میزبان نے دوران شو ایمان علی سے مزید اسکرین پر نظر آنے کی خواہش کا اظہار کیا، جس پر اداکارہ کا کہنا تھا کہ ان کی خواہش ہے کہ کوئی ان کے پاس بہترین اسکرپٹ لے کر آئے اور انہیں کام کی پیشکش کرے۔

میزبان نے خلیل صاحب کو مخاطب کرتے ہوئے ایمان کی خواہش پر توجہ دلائی تاہم ایمان نے صاف انکار کرتے ہوئے واضح کردیا کہ وہ خلیل صاحب کے ساتھ کام کرنے کا ارادہ نہیں رکھتی۔

اداکار علی عباس نے جیو نیوز کے خصوصی پروگرام ’جشنِ کرکٹ‘ میں گفتگو کرتے ہوئے کہا ہے کہ مسلم لیگ (ن) کے صدر شہباز شریف پسندیدہ شخصیت ہیں، وکالت پڑھی ہے اور موقع ملا تو آصف زرداری کا مقدمہ لڑوں گا۔

ایک نجی ٹی وی کے پروگرام کے دوران علی عباس نے بتایا کہ وہ کرکٹ کے بہت بڑے مداح ہیں اور پاکستان سپر لیگ میں لاہور قلندرز کی ٹیم کو سپورٹ کررہے ہیں۔

اداکار نے امید ظاہرکی کہ پی ایس ایل کا رواں سیزن قلندرز اپنے نام کریں گے۔

پروگرام کے دوران علی عباس نے بتایا کہ شہباز شریف جس تیز انداز میں تقاریر کرتے ہیں وہ بے حد پسند ہے اس کے علاوہ انہوں نے شہباز شریف کو آل ٹائم فیورٹ قرار دیا۔

اداکار نے بتایا کہ انہوں نے وکالت پڑھی ہے جب کہ ایک سال پریکٹس بھی کرچکے ہیں۔

علی عباس کا کہنا تھا کہ اگر انہیں موقع ملا تو وہ آصف علی زرداری کے حق میں مقدمہ لڑیں گے کیونکہ وہ ایک اسمارٹ اور قابل سیاستدان ہیں۔

ہانیہ عامر اور عاصم اظہر کے حالیہ تنازعے سے متعلق گفتگو کرتے ہوئے اداکار نے کہا کہ دونوں ہی اپنی جگہ درست ہیں تاہم مجھے موقع ملا تو ان کی صلح کروانا پسند کروں گا۔

بالی ووڈ اداکارہ شلپا شیٹھی کے شوہر راج کندرا کی پہلی بیوی کویتا نے الزام لگایا ہے کہ ان کی اور راج کندرا کی طلاق کی ذمہ دار شلپا شیٹھی ہیں۔

بھارتی میڈیا کے مطابق شلپا شیٹھی کے شوہر اور پروڈیوسر راج کندرا کی پہلی بیوی کویتا کی ایک پرانی ویڈیو سوشل میڈیا پر وائرل ہورہی ہے جس میں وہ شلپا شیٹھی پر الزام لگاتے ہوئی کہہ رہی ہیں کہ ان کی اور راج کندرا کی طلاق کے پیچھے شلپا شیٹھی کا ہاتھ تھا۔ تاہم اب راج کندرا نے اپنی سابق اہلیہ کے ان الزامات پر خاموشی توڑ دی ہے۔

میڈیا رپورٹس کے مطابق راج کندرا نے ان کی سابق اہلیہ کی جانب سے لگائے جانے والے تمام الزامات کی تردید کرتے ہوئےالٹا اپنی بیوی کے بارے میں کئی انکشاف کیے ہیں۔ ایک انٹرٹینمنٹ پورٹل کو انٹرویو دیتے ہوئے راج کندرا نے کہا کہ ان کی سابق اہلیہ کویتا کو ان کی موجودہ اہلیہ شلپا شیٹھی کے خلاف بیانات اور انٹرویوز دینے کے لیے کئی ہزار پاؤنڈز دئیے گئے۔

راج کندرا نے اپنی سابق اہلیہ کے بارے میں مزید بتاتے ہوئے کہا کہ جب وہ لوگ لندن میں رہتے تھے اس وقت ان کی بیوی کے میرے بہنوئی (بہن کے شوہر) کے ساتھ تعلقات تھے۔ اور جب میں بزنس کے سلسلے میں باہر جاتا تھا تو دونوں ایک دوسرے کے ساتھ زیادہ سے زیادہ وقت گزارتے تھے۔ مجھے ان دونوں کے تعلقات کے بارے میں میرے گھر والوں یہاں تک کہ میرے ڈرائیور نے بھی بتایا تھا۔

واضح رہے کہ شلپا شیٹھی اور راج کندرا کی شادی 2009 میں ہوئی تھی۔ شلپا راج کندرا کی دوسری بیوی ہیں دونوں کا ایک بیٹا ہے جس کا نام ویان راج کندرا ہے۔

بالی وڈ فلموں کے ناقد و اداکار کمال راشد خان المعروف کے آر کے نے سلمان خان کو ’بڈھا اداکار‘ قرار دے دیا۔

سلمان خان کی فلم ’رادھے‘ کی ریلیز کے بعد سے شروع ہونے والا تنازع اب تک تھم نہیں سکا جب کہ اس حوالے سے قانونی کارروائی بھی جاری ہے۔

عدالت میں درخواست ہونے کے باوجود اب ایک بار پھر کمال راشد خان نے سلمان خان پر تنقید کی ہے۔

کے آر کے نے اداکارہ دشا پٹانی کی سالگرہ پر انہیں ٹوئٹ کرکے مبارکباد دی لیکن ساتھ میں سلمان پر طنز بھی کیا۔

کمال راشد خان نے سلمان کا نام لیے بغیر اداکارہ کو مشورہ دیا کہ آپ بوڑھے اداکار کے ساتھ انتہائی خوفناک لگتی ہیں، اسی لئے برائے مہربانی صرف ٹائیگر شروف کے ساتھ کام کیا کریں۔

خیال رہے کہ سلمان خان کے ساتھ دشا پٹانی نے حال ہی میں فلم ’رادھے‘ میں مرکزی کردار ادا کیا ہے جبکہ اسی فلم پر کمال راشد خان کے ریویو کے بعد سے تنازع جاری ہے۔

شہنشاہ غزل مہدی حسن کی آج نویں برسی منائی جارہی ہے۔

چار دہائیوں تک فلم ، ٹی وی اور ریڈیو میں اپنی مسحورکن آواز کا جادو جگانے والے مہدی حسن 1927 میں بھارتی ریاست راجستھان کے علاقے لونا میں پید اہوئے۔ مہدی حسن کا تعلق موسیقی کے اس بڑے گھرانے سے تھا جس کی کئی پُشتوں نے موسیقی کی خدمت کی۔

مہدی حسن نے 1956 میں ریڈیو پاکستان سے گائیکی کا آغاز کیاجبکہ 1962 میں پاکستانی فلم ’’شکار‘‘ کے لیے پہلی مرتبہ گیت ریکارڈ کرایا۔ مہدی حسن کے گائے ہوئے گیت، غزلیں اور قومی ترانے آج بھی شائقین موسیقی کی سماعتوں میں گونج رہے ہیں۔

انھوں نے 365 سے زائد فلموں میں اپنی مدھر آواز کا جادو جگایا۔ فلمی صنعت میں ان کی آواز کامیابی کی ضمانت سمجھی جاتی تھی۔ مہدی حسن نے40 سال تک فن موسیقی کے افق پر حکمرانی کی۔ وہ موسیقی کا ایک پورا عہد تھے۔ ان کے گائے راگ کو دنیا بھر میں پے پناہ شہرت ملی۔ اسی وجہ سے مہدی حسن کو ’’شہنشاہ غزل‘‘ کے خطاب سے نواز گیا۔

مہدی حسن نے 25 ہزار سے زائد گیت اور غزلیں ریکارڈ کراکے ایک تاریخ رقم کی. شعبہ موسیقی میں غیر معمولی خدمات پر مہد ی حسن کو صدارتی تمغہ برائے حسن کارکردگی تمغہ امتیاز، ہلال امتیاز جبکہ بھارت میں سہگل اور نیپال میں گورکھا دک شینا باہو ایوارڈ سے نوازا گیا۔

مہدی حسن 13 جون 2012 کواس دار فانی سے کوچ کرگئے تھے لیکن ان کی مدھر آواز آج بھی کانوں میں رس گھولتی ہے۔

اداکارہ منال خان اور احسن محسن اکرام نے باضابطہ طور پر 11 جون کو قریبی دوستوں اور رشتے داروں کی موجودگی میں کراچی میں منگنی کرلی۔

منال خان اور احسن محسن کے درمیان گزشتہ دو سال سے تعلقات تھے اور رواں برس فروری میں محبتوں کے عالمی دن (ویلنٹائنز ڈے) پر دونوں نے رومانوی تصاویر شیئر کی تھیں، جن میں سے ایک تصویر میں منال خان نے منگنی کی انگوٹھی بھی دکھائی تھی۔

اگرچہ اس وقت دونوں نے واضح طور پر نہیں بتایا تھا کہ دونوں نے منگنی کرلی یا پھر ابھی منگنی کا ارادہ کیا ہے، تاہم اداکارہ کی جانب سے انگوٹھی کی تصویر شیئر کیے جانے پر مداحوں نے انہیں منگنی کی مبارک باد پیش کی تھی۔

بعد ازاں منال خان اور احسن محسن اکرام نے 18 مئی کو سوشل میڈیا پر دوبارہ اپنی رومانوی تصاویر شیئر کرتے ہوئے ’بات پکی‘ کے ہیش ٹیگ کے ساتھ تصاویر شیئر کی تھیں اور دوسری مرتبہ بھی اداکارہ نے منگنی کی انگوٹھی دکھائی دی تھی۔

دونوں کی جانب سے ’بات پکی‘ کے ہیش ٹیگ کے ساتھ تصاویر شیئر کیے جانے کے بعد ایک مرتبہ پھر شوبز شخصیات اور مداحوں نے انہیں نئی زندگی کی مبارک باد دی تھی اور اس وقت بھی لوگوں نے خیال کیا تھا کہ شاید اب دونوں نے باضابطہ طور پر منگنی کی ہے۔

تاہم 11 جون کو دونوں کی منگنی کی تقریب تصاویر اور ویڈیوز وائرل ہونے پر مداح پریشان دکھائی دیے کہ اگر اب انہوں نے باضابطہ طور پر منگنی کی ہے تو پہلے کیا کیا تھا؟

11 جون کو منال خان اور احسن محسن نے منگنی کی تصاویر اور ویڈیوز شیئر کیں لیکن انہوں نے واضح طور پر نہیں لکھا کہ انہوں نے منگنی کرلی۔

تاہم ان کی تقریب کے وران استعمال کیے گئے بینر میں ان کی ‘منگنی کی تقریب’ کو پڑھا جا سکتا ہے۔

دونوں کی جانب سے تقریب کی تصاویر اور ویڈیوز شیئر کیے جانے کے بعد ایک بار پھر مداحوں اور شوبز شخصیات نے انہیں مبارک باد بھی پیش کی لیکن مداحوں نے انہیں مشورہ دیا کہ اب وہ شادی کرلیں۔

دونوں کی جانب سے تصاویر اور ویڈیوز میں واضح طور پر منگنی کا لفظ استعمال نہ کیے جانے کی وجہ سے کئی مداحوں میں کنفیوژن برقرار رہی کہ انہوں نے شادی کی ہے یا منگنی؟

تاہم ان کی تقریب کے انتظامات کرنے والی کمپنی ’انوویٹو ایونٹ‘ کے بانی علی کاشان نے ڈان نیوز ڈاٹ ٹی وی کے ساتھ بات کرتے ہوئے تصدیق کی کہ منال خان اور احسن محسن اکرام کی شادی نہیں بلکہ منگنی ہوئی ہے۔

علی کاشان نے ڈان سے بات کرتے ہوئے تصدیق کی کہ دونوں کی منگنی کی تقریب 11 جون کو کراچی کے علاقے ڈیفینس میں ہوئی، جس میں دونوں کے قریبی رشتہ داروں اور دوستوں نے شرکت کی۔

علی کاشان کا کہنا تھا کہ تقریب کو کورونا کی وجہ سے سادہ اور مختصر رکھا گیا تھا جب کہ تمام احتیاطی تدابیر کو بھی اختیار کیا گیا۔

دونوں کی باضابطہ طور پر منگنی ہوجانے کے بعد اب خیال کیا جا رہا ہے کہ دونوں رواں برس کے اختتام تک شادی کے بندھن میں بندھ جائیں گے لیکن اس حوالے سے کچھ بھی کہنا قبل از وقت ہے۔

معروف اداکارہ حمائمہ ملک نے ایمان علی کے بیان پر رد عمل میں کہا ہےکہ انہیں امید ہے ایمان خواجہ سراؤں سے معافی مانگیں گی۔

انسٹاگرام پر حمائمہ ملک کی جانب سے اسٹوری شیئر کی گئی جس میں انہوں نے لکھا کہ ہم ایسے ماحول میں زندگی گزار رہے ہیں جہاں دوسرے کو نیچا دکھانا بہت عام تصور کیا جاتا ہے۔

اداکارہ کا کہنا تھا کہ خواجہ سرا کسی سے کمتر نہیں، وہ اللہ کی بنائی گئی مخلوق ہیں جو ہماری ہی طرح انسان ہیں، بجائے اس کے کہ ہم اللہ کی دوسری مخلوق کی طرح ان سے محبت کریں، ہم ان میں تفریق کرتے ہیں اور مذاق اڑاتے ہیں۔

حمائمہ نے کہا کہ ایک سلیبریٹی ہونے کی حیثیت سے ہمیں اپنے الفاظ بہت سوچ سمجھ کر کہنے چاہئیں، کسی کے جذبات مجروح کرنے کے بجائے ہمیں اپنی نسل کیلئے کچھ اچھا اور سیکھنے کے قابل کرنا چاہیے۔

اداکارہ نے ایمان علی کے بیان کو ایک سنگین غلطی قرار دیتے ہوئے امید ظاہر کی کہ ایمان خواجہ سرا کمیونٹی سے معافی مانگ لیں گی۔

واضح رہے کہ کچھ روز قبل ایمان علی ایک پروگرام میں جلوہ گر ہوئیں جہاں انہوں نے خود کو خراجہ سرا سے تشبیہ دی اور کہا کہ انہیں اپنا آپ اور شکل پسند نہیں۔

اداکارہ کے اس بیان پر سوشل میڈیا صارفین اور معروف شخصیات کی جانب سے سخت ردعمل کا اظہار کیا گیا۔