Category شوبز

بالی وڈ اداکارہ رنکو سنگھ کورونا کے باعث چل بسیں۔

بھارتی میڈیا رپورٹس کے مطابق 25 مئی کو رنکو سنگھ میں کورونا کی تشخیص ہوئی تھی جس کے بعد سے وہ گھر میں آئسولیشن میں تھیں۔

رپورٹس میں بتایا گیا ہے کہ گھر میں آئسولیشن کے دوران اداکارہ کی طبیعت بگڑنے پر اسپتال منتقل کیا گیا تھا جہاں انہیں وارڈ میں رکھا گیا پھر مزید حالت خراب ہونے پر انتہائی نگہداشت کے وارڈ شفٹ کیا گیا۔

رپورٹس کے مطابق اداکارہ دمے کی بھی مریضہ تھیں اور دوران علاج چل بسیں۔ اداکارہ کی کزن نے دعویٰ کیا ہے کہ رنکو سنگھ نے 7 مئی کو ویکسین لگوائی تھی اور جلد ہی انہیں دوسری ڈوز بھی لگنی تھی۔

رنکو سنگھ نے فلم ’ڈریم گرل‘ اور ’ہیلو چارلی‘ میں معاون کردار کیے ہیں۔

ماضی کی بولڈ اور مقبول بولی وڈ اداکارہ پوجا بیدی نے انکشاف ہے کہ انہوں نے سابق شوہر کی محبت اور اچھی بیوی و بہو بننے کی خاطر بولی وڈ سے دوری اختیار کی تھی۔

’جو جیتا، وہی سکندر‘ سے 1992 میں فلمی کیریئر کا آغاز کرنے والی پوجا بیدی نے ’لٹیرے، وشکانیا، آتنک ہی آتنک، پھر تیری کہانی یاد آئی‘ سمیت دیگر بھارتی زبانوں کی فلموں میں بھی کام کیا۔

پوجا بیدی نے متعدد ڈراموں میں بھی اداکاری کی جب کہ وہ 2011 میں ریئلٹی شو ’بگ باس’ کے پانچویں سیزن میں بھی شامل ہوئی تھیں، لیکن وہ گزشتہ کئی سال سے شوبز اور خصوصی طور پر بولی وڈ فلموں سے دور ہیں۔

پوجا بیدی کو اگرچہ شوبز تقریبات میں دیکھا جاتا ہے اور انہیں ٹی وی کے ریئلٹی شوز میں بطور مہمان بھی دیکھا گیا مگر انہوں نے کم از کم ڈیڑھ دہائی سے کسی فلم یا ڈرامے میں اداکاری نہیں کی۔

پوجا بیدی نے 1994 میں صنعت کار فرحان فرنیچر والا سے شادی اور دونوں میں 2003 میں طلاق ہوگئی تھی۔

پوجا بیدی کو 2 بچے ہیں، جن میں سے ایک بیٹی اور ایک بیٹا ہے، ان کی بیٹی نے سیف علی خان کے ساتھ فلم ’جوانی جانمن‘ سے کیریئر کا آغاز کیا ہے۔

پوجا بیدی 2019 میں اس وقت بھارتی میڈیا میں خبروں کی زینت بنی تھیں جب انہوں نے پہلی شادی کے خاتمے کے 16 سال بعد 48 سال کی عمر میں اپنے دیرینہ بوائے فرینڈ سے منگنی کی تھی۔

اب 51 سال کی عمر ہوجانے کے باوجود پوجا بیدی نے دوسری شادی نہیں کی ہے، تاہم وہ منگیتر مانک کنٹریکٹر کے ساتھ خوشگوار زندگی گزار رہی ہیں۔

حال ہی میں پوجا بیدی نے اداکار سمیر سونی کے ساتھ انسٹاگرام پر بات کرتے ہوئے بولی وڈ سے دوری کے معاملے پر کھل کر بات کی اور بتایا کہ دراصل انہوں نے اچھی بیوی اور بہو بننے کے لیے فلموں سے دوری اختیار کی تھی۔

انہوں نے بتایا کہ شادی سے قبل ہی انہیں ان کے سابق شوہر نے بتایا تھا کہ اگر وہ ان سے شادی کریں گی تو انہیں فلموں کو چھوڑنا پڑے گا، کیوں کہ ان کا خاندان ذرا پرانے خیالات کا ہے۔

پوجا بیدی نے بتایا کہ انہوں نے دباؤ یا مجبوری میں فلموں سے دوری اختیار نہیں کی تھی بلکہ انہوں نے رضا خوشی سے فیصلہ کیا اور انہیں کوئی پچھتاوا نہیں، کیوں کہ انہیں جوانی کے 12 سال اچھے تعلق میں گزارے اور ان کی ازدواجی زندگی کامیاب گزری۔

انہوں نے بتایا کہ ان کے فیصلے کی وجہ سے ہی ان کی شادی اچھی چلی اور 12 سال کے دوران انہیں دو بچے ہوئے جب کہ 2003 میں طلاق کے بعد اب بھی ان کے سابق شوہر سے اچھے تعلقات ہیں۔

پوجا بیدی کے مطابق ان کے سابق شوہر نے ان کی بچپن کی سہیلی سے شادی کی ہے اور اب ان دونوں کو بچے بھی ہیں۔

سابق اداکارہ کے مطابق ان کے اپنے سابق شوہر اور بچپن کی سہیلی کے ساتھ اب بھی اچھے تعلقات ہیں جب کہ انہوں نے بھی بچپن کے دوست سے منگنی کرکے نئی زندگی کی شروعات کی۔

پوجا بیدی نے یہ واضح نہیں کیا کہ وہ دوسری شادی کا ارادہ کب تک رکھتی ہیں، تاہم انہوں نے بتایا کہ وہ منگیتر کے ساتھ خوشگوار زندگی گزار رہی ہیں۔

ایکشن اور جاسوسی فلم سیریز مشن امپوسیبل کی ساتویں فلم کی شوٹنگ کورونا وائرس کے باعث ایک مرتبہ پھر روک دی گئی۔

برطانوی خبر رساں ادارے ‘رائٹرز’ کی رپورٹ کے مطابق پیراماؤنٹ پکچرز نے بتایا کہ فلم میں کام کرنے والے کچھ افراد میں کورونا وائرس کی تشخیص کے بعد برطانیہ میں جاری شوٹنگ کو 2 ہفتوں کے لیے روک دیا گیا۔

تاہم فلم اسٹوڈیو کی جانب سے یہ نہیں بتایا گیا کہ کورونا وائرس کی تشخیص کن افراد میں ہوئی اور نہ ہی ان کی تعداد بتائی گئی۔

اس حوالے سے برطانوی جریدے دی سن نے کہا کہ جو لوگ کورونا وائرس کا شکار ہوئے ان میں فلم اسٹار ٹام کروز شامل نہیں تھے۔

پیراماؤنٹ پکچرز نے ایک بیان میں کہا کہ ‘ہم نے کورونا وائرس کے مثبت کیسز کے باعث عارضی طور پر مشن امپوسیبل 7 کی شوٹنگ 14 جون تک روک دی ہے’۔

بیان میں مزید کہا گیا کہ ‘ہم تمام حفاظتی قواعد پر عمل کررہے ہیں اور صورتحال کی نگرانی جاری رہے گی’۔

دی سن نے ذرائع کا حوالہ دیتے ہوئے کہا کہ نائٹ کلب سین کی شوٹنگ کے بعد پروڈکشن کے 14 ارکان کا کورونا وائرس کا ٹیسٹ مثبت آیا اور اسی وجہ سے ٹام کروز سمیت سیٹ پر کام کرنے والے دیگر افراد کو بھی 14 روز کے لیے خود کو آئسولیٹ کرنا ہوگا۔

ٹام کروز کے ترجمان نے جو ایکشن فلم کے ایک پروڈیوسر بھی ہیں انہوں نے اس حوالے سے رابطہ کرنے پر بھی جواب دیا۔

خیال رہے کہ مشن امپوسیبل، ہولی وڈ کی بڑی فرنچائزز میں سے ایک ہے۔

اس سے قبل فروری 2020 میں اٹلی کے شہر وینس میں عالمی وبا کورونا وائرس کے باعث مشن امپوسیبل 7 کی شوٹنگ روکی گئی تھی۔

جس کے بعد گزشتہ برس ناروے، اٹلی اور برطانیہ سمیت مختلف ممالک میں فلم کے مناظر کی عکسبندی کی گئی تھی۔

اسی دوران دسمبر 2020 میں ٹام کروز کی آڈیو ٹیپ سامنے آئی تھی جس میں کورونا وائرس کے حفاظتی قواعد کی خلاف ورزی پر انہیں عملے پر چلاتے ہوئے سنا گیا تھا۔

یہ بھی کہا جارہا ہے کہ فلم مشن امپوسیبل 7، مئی 2022 میں ریلیز ہوگی لیکن اس حوالے سے کوئی حتمی اعلان سامنے نہیں آیا۔

عرب مؤرخ اور لوگوں کی تنقید کے بعد معروف فرانسیسی فیشن برانڈ لوئی وٹون (Louis Vuitton) (ایل وی) نے دنیا بھر میں مزاحمت کی علامت بن جانے والے فلسطینی رومال کی فروخت بند کردی۔

لوئی وٹون نے چند دن قبل اپنی ویب سائٹ پر فلسطینی رومال جسے عربی میں (كُوفِيَّة) کہا جاتا ہے، اسے فروخت کے لیے پیش کیا تھا۔

لوئی وٹون نے دنیا بھر میں اور خصوصی طور پر فلسطین کی حمایت کرنے والے افراد میں مزاحمت کی علامت بن جانے والے مذکورہ رومال کی فروخت حال ہی میں ایسے وقت میں شروع کی جب کہ گزشتہ ماہ مئی میں اسرائیل نے فلسطینیوں پر حملے کیے۔

ویب سائٹ انسائڈر کے مطابق لوئی وٹون نے خاص طور پر فلسطینی رومال کی فروخت اس وقت شروع کی تھی جب کہ گزشتہ ماہ امریکی ماڈل بیلا حدید کو دوسری معروف خواتین کے ساتھ امریکا میں فلسطین کے حق میں مذکورہ رومال پہن کر احتجاج کرتے دیکھا گیا۔

فلسطینی رومال خصوصی طور پر مسلم دنیا اور ان افراد میں مزاحمت کی علامت سمجھا جاتا ہے جو فلسطین کی حمایت کرتے ہیں۔

عام طور پر مذکورہ رومال پاکستانی ایک سے ڈیڑھ ہزار روپے میں مل جاتا ہے لیکن فرانسیسی فیشن ہاؤس نے اسے پاکستانی تقریبا ایک لاکھ 10 ہزار روپے کی قیمت تک فروخت کے لیے پیش کیا تھا۔

فرانسیسی فیشن برانڈ کو جہاں دیگر لوگوں نے تنقید کا نشانہ بنایا تھا کہ وہ خود کو غیر سیاسی قرار دیتے ہیں مگر ان کی جانب سے فلسطینی رومال کی فروخت کا عمل ثابت کرتا ہے کہ وہ غیر سیاسی نہیں۔

تاہم دلچسپ بات یہ ہے کہ فرانسیسی فیشن برانڈ پر عرب مؤرخ سمیت دیگر عرب افراد نے بھی تنقید کی تھی اور برانڈ پر فلسطینی رومال کو تبدیل کرکے فروخت کے لیے انتہائی مہنگے داموں بیچنے کا الزام لگایا تھا۔

امریکی یونیورسٹی میں تاریخ کے پروفیسر خالد بدیون نے فرانسیسی برانڈ پر خوب تنقید کی تھی اور انہیں بتایا تھا کہ دراصل انہوں نے فلسطینی رومال کی غیر معیاری کاپی بنا کر مزاحمت کی علامت سمجھے جانے والے رومال کو تبدیل کرکے فلسطینیوں کے ساتھ دھوکا کیا ہے۔

ساتھ ہی مذکورہ مؤرخ نے بتایا تھا کہ فلسطینی رومال اتنی مہنگی قیمت پر کبھی فروخت نہیں ہوا، اس لیے مذکورہ برانڈ فیشن کی آڑ میں فلسطینی جدوجہد کو نقصان نہ پہنچائے۔

لوگوں کی تنقید کے بعد لوئی وٹون نے اپنی ویب سائٹ سے فلسطینی رومال کی فروخت کا صفحہ ہٹا دیا اور اس کی تصدیق پروفیسر خالد بدیون نے بھی کی۔

مذکورہ پروفیسر نے لوئی وٹون کے ساتھ ساتھ دوسرے معروف برانڈ ’فینڈی‘ پر بھی غیر معیاری فلسطینی رومال کو انتہائی مہنگے داموں فروخت کرنے کا الزام لگایا۔

خالد بدیون نے ’فینڈی‘ کی جانب سے بھی فلسطینی رومال کو فروخت کرنے کی پوسٹ لگائی اور کہا کہ معروف برانڈ ڈیڑھ ہزار روپے تک ملنے والے رومال کو سوا دو لاکھ روپے کی قیمت میں فروخت کر رہا ہے۔

انہوں نے دونوں معروف برانڈز کی جانب سے بنائے گئے فلسطینی رومال کی کاپی کو ناقص اور فلسطینی مزاحمت کی علامت کو نقصان پہچانے کے مترادف بھی قرار دیا۔

مذہب اسلام کی خاطر موسیقی و شوبز کی دنیا کو خیرباد کہنے والی سابق گلوکارہ و اداکارہ رابی پیرزادہ نے ملالہ یوسف زئی کے فیشن میگزین ’ووگ‘ کو دیے گئے انٹرویو پر رد عمل دیتے ہوئے حیرانی کا اظہار کیا ہے۔

رابی پیرزادہ نے اپنی انسٹاگرام پوسٹ اور ٹوئٹ میں ملالہ یوسف زئی کی پرانی تصویر اور ’ووگ‘ میں شائع نئی تصویر کو شیئر کرتے ہوئے انہیں مخاطب ہوتے ہوئے کہا کہ ’کیا سے کیا ہوگئے دیکھتے دیکھتے‘۔

رابی پیرزادہ نے اپنی ٹوئٹ میں لکھا کہ اگرچہ انہوں نے موسیقی چھوڑ دی ہے مگر انہیں ملالہ کو دیکھ کر نہ جانے کیوں مرحوم موسیقار استاد نصرت فتح علی خان کا مقبول گانا ’کیا سے کیا ہوگئے دیکھتے دیکھتے‘ یاد آگیا۔

انہوں نے اپنی ٹوئٹ میں مزید لکھا کہ ’مسلمان فسق کی باتیں نہیں کرتے، اللہ سب کو ہدایت دے‘۔

سابق گلوکارہ نے ملالہ یوسف زئی کی کسی بات کو کوڈ کیے بغیر گانے کی صورت میں انہیں طعنہ دیا کہ وہ اب بدل گئی ہیں۔

رابی پیرزادہ کی مذکورہ ٹوئٹ کو درجنوں افراد نے ری ٹوئٹ کیا جب کہ سیکڑوں لوگوں نے ان کی ٹوئٹ پر کمنٹس کرتے ہوئے ان سے اتفاق کیا اور نوبیل انعام یافتہ کارکن کو تنقید کا نشانہ بنایا۔

بعد ازاں رابی پیرزادہ نے مذکورہ ٹوئٹ میں کمنٹس کرتے ہوئے واضح کیا کہ وہ ملالہ یوسف زئی کی مخالف نہیں ہیں، بس وہ کسی غلط بات کو ٹھیک کرنے کی کوشش کر رہی ہیں۔

رابی پیرزادہ نے ساتھ ہی لکھا کہ چوں کہ انہیں لاکھوں لوگ فالو کرتے ہیں، اس لیے ان کا فرض بنتا ہے کہ اگر کوئی چیز غلط ہو رہی ہے تو وہ انہیں درست کریں۔

رابی پیرزادہ نے اپنی ٹوئٹس میں ملالہ یوسف زئی کے کسی بھی بیان کو کوڈ نہیں کیا، البتہ انہوں نے فیشن میگزین کے لیے کھچوائی گئی ان کی ایک تصویر شیئر کی، جس میں نوبیل انعام یافتہ کارکن کو حجاب کے ساتھ پاکستانی ثقافت سے مشابہ لباس میں دیکھا جا سکتا ہے۔

رابی پیرزادہ سے قبل اداکارہ متھیرا اور دیگر چند شخصیات بھی ملالہ یوسف زئی کے حالیہ انٹرویو اور بیانات کو تنقید کا نشانہ بنا چکے ہیں۔

ملالہ یوسف زئی نے ’ووگ‘ کو انٹرویو دیا تھا، جس کا کچھ حصہ 2 جون کو شائع کیا گیا لیکن ان کا مکمل اور تفصیلی انٹرویو مذکورہ میگزین کے آئندہ ماہ جولائی کے شمارے میں شائع کیا جائے گا۔

ووگ کے جولائی کے شمارے میں ملالہ یوسف زئی سرورق کی زینت بھی بنیں گی۔

ملالہ یوسف زئی پر ہونے والی تنقید کے بعد گزشتہ روز ان کے والد نے بھی ٹوئٹ کی تھی کہ ان کی بیٹی کے بیان اور خاص طور پر ان کی جانب سے شادی سے متعلق کہی گئی بات کو سیاق و سباق سے ہٹ کر پیش کیا جا رہا ہے۔

ملالہ یوسف زئی نے میگزین کو دیے گئے انٹرویو میں کہا تھا کہ ان کا فوری طور پر شادی کا ارادہ نہیں ہے اور انہیں یہ بات سمجھ نہیں آتی کہ لوگ ساتھ رہنے کے لیے شادی ہی کیوں کرتے ہیں اور شادی کے دستاویزات (نکاح نامے) پر ہی دستخط کیوں کرتے ہیں۔

ان کی جانب سے شادی کے لیے مذکورہ بیان کے بعد ان پر تنقید کی جا رہی ہے اور ان کا نام ٹوئٹر پر ٹاپ ٹرینڈز میں بھی شمار ہو رہا ہے، تاہم کئی لوگ نوبیل انعام یافتہ کی حمایت بھی کر رہے ہیں۔

نوبیل انعام یافتہ سماجی کارکن ملالہ یوسف زئی کے والد ضیا الدین یوسف زئی نے کہا ہے کہ شادی سے متعلق ان کی بیٹی کے بیان کو انٹرویو کے سیاق و سباق سے ہٹ کر شیئر کیا جا رہا ہے۔

ضیا الدین یوسف زئی نے مفتی شہاب الدین پوپلزئی کی جانب سے ٹوئٹر پر کیے جانے والے سوال کے جواب میں کہا کہ میڈیا اور سوشل میڈیا ان کی بیٹی کے بیان کو غلط پیش کر رہا ہے۔

مفتی شہاب الدین پوپلزئی نے ملالہ یوسف زئی کے والد سے پوچھا تھا کہ ’کل سے سوشل میڈیا پر ایک خبر زیر گردش ہے کہ ان کی بیٹی نے رشتہ ازدواج کو یکسر مسترد کرتے ہوئے کہا ہے کہ شادی کرنے سے بہتر ہے کہ پارٹنر شپ کی جائے نہ کہ نکاح‘۔

مفتی شہاب الدین نے ضیا الدین یوسف زئی کو بتایا تھا کہ مذکورہ خبر کے بعد ہم سب شدید اضطراب میں مبتلا ہیں، اس لیے وہ اس کی وضاحت فرمادیں۔

مفتی صاحب کے سوال پر نوبیل انعام یافتہ کارکن کے والد نے جواب دیا کہ ’محترم مفتی پوپلزئی صاحب ایسی کوئی بات نہیں، میڈیا اور سوشل میڈیا نے ان کی بیٹی کے انٹرویو کی اقتباس کو سیاق و سباق سے ہٹ کر اور تبدیل کرکے اپنی تاویلات کے ساتھ شئیر کیا ہے، اور بس‘۔

ضیا الدین یوسف زئی کی جانب سے جواب دیے جانے پر بھی کئی صارفین مطمئن دکھائی نہیں دیے اور انہوں نے ان سمیت ان کی بیٹی پر تنقید کی اور کہا کہ اگر مذکورہ خبر جھوٹ ہے تو تاحال ملالہ یوسف زئی خاموش کیوں ہیں؟

خیال رہے کہ نوبیل انعام یافتہ سماجی کارکن نے ووگ میگزین کو حال ہی میں انٹرویو دیا تھا، وہ میگزین کے آئندہ ماہ کے شمارے کی سرورق کی زینت بنیں گی۔

ملالہ یوسف زئی نے انٹرویو میں ان کہی باتوں پر کھل کر گفتگو کی تھی اور انہوں نے شادی سے متعلق بھی کہا تھا کہ اگر کسی شخص کو دوسرے شخص کا ساتھ چاہیے تو اس کے لازمی نہیں ہے کہ شادی کے کاغذات (نکاح نامے) پر دستخط کیے جائیں۔

ملالہ یوسف زئی کا کہنا تھا کہ ان کا فی الحال شادی کا کوئی ارادہ نہیں ہے اور نہ ہی وہ بچے پیدا کرنے کا ارادہ رکھتی ہیں۔

نوبیل انعام یافتہ کارکن کے مذکورہ بیان کے بعد ان پر شدید تنقید کی گئی اور ٹوئٹر پر ان کا نام ٹاپ ٹرینڈ بھی رہا۔

اکتوبر 2020 میں شوبز کو چھوڑ کر مذہب کی تعلیمات کے مطابق زندگی گزارنے والی سابق اداکارہ ثنا خان نے تعلیم اور پردے کا طعنہ دینے والے مداح کو کرارا جواب دے کر خاموش کرادیا۔

ثنا خان نے بولی وڈ فلمز ‘ہلہ بول، جے ہو، وجہ تم ہو اور ٹوائلٹ: ایک پریم کتھا’ میں سمیت دیگر فلموں میں بھی کام کیا تھا۔

انہوں نے ریئلٹی ٹی وی شو بگ باس، خطروں کے کھلاڑی، کامیڈی نائٹس بچاؤ، انٹرٹینمنٹ رات، جھلک دکھلا جا 7 اور کچن چیمپئن میں بھی حصہ لیا تھا۔

اس کے علاوہ ثنا خان نے تامل اور تیلگو فلموں میں بھی کام کیا، سال 2007 میں انہوں نے بولی وڈ فلم دھن دھنا دھن گول میں آئٹم سانگ ’بلو رانی’ بھی کیا تھا۔

تاہم انہوں نے اکتوبر 2020 میں شوبز چھوڑ کر مذہبی تعلیمات کے مطابق زندگی گزارنے کا اعلان کیا تھا، بعد ازاں نومبر 2020 میں انہوں نے مذہبی اسکالر مفتی انس سے شادی کرلی تھی۔

شادی کے بعد ثنا خان کو ہمیشہ حجاب اور پردے میں دیکھا گیا اور وہ پردے کے ساتھ ہی اپنے شوہر کے ہمراہ ویڈیوز اور تصاویر شیئر کرتی رہتی ہیں۔

حال ہی میں جب انہوں نے حجاب میں اپنی تصویر شیئر کی تو ہمیشہ کی طرح جہاں کچھ مداحوں نے ان کی تعریف کی، وہیں بعض مداحوں نے ان کی پوسٹ پر نامناسب کمنٹس کیے۔

ایک مداح نے ان کی تصویر پر کمنٹ کیا کہ ’حجاب اور بکنی‘ ہونی چاہیے تھی۔

اسی طرح ایک مداح نے انہیں طعنہ دیا کہ اتنی پڑھائی لکھائی کرنے کا کیا فائدہ ہوا، سب کی طرح پردے میں رہنا پڑا۔

مذکورہ مداح کے کمنٹس پر ثنا خان نے جواب دیا کہ جب وہ پردے میں رہ کر کام کر سکتی ہیں تو انہیں اور کیا چاہیے؟ انہوں نے لکھا کہ انہیں اتنے اچھے شوہر ملے، اتنے اچھے سسرالی ملے اور وہ پردے و حجاب میں رہتے ہوئے تمام کام سر انجام دی رہی ہیں۔

انہوں نے مزید لکھا کہ انہوں نے اپنی تعلیم مکمل کی اور سب کو کچھ حاصل کیا اور سب سے بڑھ کر پردے میں ان کی حفاظت خدا کر رہا ہے۔

بالی وڈ ایکشن ہیرو ٹائیگر شروف کے بعد اداکارہ دیشا پٹانی کے خلاف بھی کورونا ایس اوپیز کی خلاف ورزی پر مقدمہ درج کرلیا گیا۔

بھارتی میڈیا کے مطابق دونوں اداکاروں کو شام کے وقت کار ڈرائیونگ سے لطف اندوز ہوتے اور گھومتے پھرتے دیکھاگیا تھا، اسی دوران پولیس نے انہیں روک کر پوچھ گچھ کی۔

بھارتی میڈیا کا بتانا ہے کہ گاڑی میں اداکارہ دیشا پٹانی فرنٹ اور اور ٹائیگر شروف بیک سیٹ پر موجود تھے تاہم پوچھ گچھ کے دوران دونوں اداکار پولیس کو دوپہر 2 بجے کے بعد باہر گھومنے پھرنے کا کوئی مناسب جواز پیش نہ کرسکے جو کہ کورونا ایس اوپیز کی خلاف ورزی ہے۔

رپورٹ کے مطابق ممبئی پولیس نے اداکار ٹائیگر شروف اور دیشا پٹانی سمیت دیگر کورونا ایس او پیز کی خلاف ورزی کرنے والے افراد کے خلاف مقدمہ درج کرلیا۔

ورسٹائل اداکارہ سونیا حسین کو مداحوں نے مادھوری ڈکشت سے مشابہ قرار دے دیا۔

معروف اداکارہ نے انسٹاگرام پر اپنے حالیہ فوٹوشوٹ کی تصاویر پوسٹ کیں جس میں انہیں عروسی لباس میں ملبوس دیکھا جاسکتا ہے۔

اداکارہ کی پوسٹ پر مداحوں کے تبصروں کا سلسلہ شروع ہوگیا اور متعدد صارفین نے اس خیال کا اظہار کیا کہ سونیا اس شوٹ میں بالکل بالی وڈ حسینہ مادھوری ڈکشت کی طرح لگ رہی ہیں۔

اداکارہ کو مادھوری سے مِلانے کی ایک وجہ یہ رہی کہ سونیا کا انداز اور دلکش مسکراہٹ ان تصاویر میں کافی حد تک بھارتی اداکارہ کی طرح تھی۔

خیال رہے اس سے قبل بھی سوشل میڈیا پر اداکارہ سونیا حسین کو پریانکا چوپڑا کی ہمشکل کہا جاتا رہا ہے۔

بھارت کی متنازع اداکارہ راکھی کا ساونت کا کہنا ہے کہ انہوں نے بھارت میں خلائی مخلوق کو دیکھا ہے۔

انسٹاگرام پر راکھی نے ایک ویڈیو شیئر کرتے ہوئے دعویٰ کیا کہ انہوں نے سڑک پر خلائی مخلوق کو دیکھا ہے۔

گزشتہ روز راکھی کی جانب سے ایک ایڈیٹ ویڈیو شیئر کی گئی جس میں اداکارہ کا کہنا ہے کہ دوستو میں ایک خلائی مخلوق بن گئی ہوں، میری آنکھوں کو دیکھیں مجھ میں ایک طاقت آرہی ہے ، کیا ہوگیا ہے مجھے۔

ویڈیو دیکھ کر اندازہ لگایا جاسکتا ہے کہ راکھی نے بظاہر یہ ویڈیو ایک نئے فیچر پر بنائی ہے جو کہ مداحوں کو لطف اندوز ہونے کے لیے شیئرکی گئی ہے۔

خیال رہے کہ اس سے قبل بھارتی ریاست جھاڑکھنڈ کے ڈیم پر مبینہ ’خلائی مخلوق‘ کی ویڈیو سوشل میڈیا پر خاصی وائرل ہوئی اور 30 سیکنڈ کی ویڈیو میں ایک چلتی ہوئی چیز کو دیکھا جاسکتا ہے۔