Category کرکٹ

دبئی (سپورٹس ڈیسک/ایمرا نیوز) چیف سلیکٹر انضمام الحق منگل کو دبئی پہنچ گئے ہیں۔ انہوں نےٹیم انتظامیہ سے ہنگامی ملاقات کی۔ انضمام الحق نے آسٹریلیا کے خلاف ٹیسٹ سیریز کے انتخاب پر سرفراز احمد اور مکی آرتھرسے مشاورت کی ۔ ذرائع کا کہنا ہے کہ ایشیا کپ میں گیارہ کھلاڑیوں کی تشکیل پر بھی انضمام الحق کو تحفظات ہیں۔ انہوں نے مکی آرتھر سے بنگلہ دیش کے خلاف میچ میں الیون کے انتخاب پر بھی تبادلہ خیال کیا۔انہوں نے کپتان اور کوچ کو بھی اپنی رائے سے آگاہ کیا۔ وہ ٹیم کا پریکٹس سیشن دیکھنے آئے ۔ انہوں نے سرفراز احمد سے علیحدگی میں بات چیت کی اور ان سے حکمت عملی پر کھل کر اظہار خیال کیا۔

بنگلا دیش کے خلاف اہم میچ سے قبل پاکستان ٹیم کے چیف سلیکٹر انضمام الحق نے بھی ٹریننگ سیشن دیکھا، امام الحق اور بابر اعظم کو بیٹنگ کے ٹپس دیئے۔

آئی سی سی اکیڈمی میں پاکستان ٹیم کے ٹریننگ سیشن میں قومی ٹیم کے کھلاڑیوں کی اصل توجہ کیچنگ پریکٹس پر مرکوز رہی۔

اس کے بعد نیٹ پر بیٹنگ سیشن ہوا، جس میں چیف سلیکٹر انضمام الحق نے پہلے کپتان سرفراز سے علیحدہ بات چیت کی ، پھر نیٹ پر امام الحق اور بابر اعظم کو بیٹنگ کے ٹپس دیتے نظر آئے ۔

ذرائع کے مطابق قومی ٹیم کا یہ ٹریننگ سیشن 3 گھنٹے جاری رہا۔

ایشیا کپ میں سپر فور مرحلے کا آخری میچ پاکستان اور بنگلا دیش کے درمیان آج ابوظہبی میں کھیلا جائے گا۔

ابوظہبی کے شیخ زید اسٹیڈیم میں آج ہونے والے پاکستان اور بنگلا دیش کے میچ کی فاتح ٹیم 28 ستمبر کو بھارت کے خلاف فائنل کھیلے گی۔

ذرائع کے مطابق آج کے میچ میں فاسٹ بولر محمد عامر کی جگہ جنید خان کو ٹیم میں شامل کیے جانے کا امکان ہے، دونوں ٹیموں کے درمیان آج ہونے والا میچ سیمی فائنل کی سی اہمیت اختیار کر چکا ہے۔

اس ایونٹ میں دونوں ٹیمیں آج پہلی بار مدمقابل آرہی ہیں، پاکستان بنگلا دیش کی حالیہ کارکردگی کو دیکھتے ہوئے کانٹے کے مقابلے کی توقع کی جا رہی ہے۔

ابوظہبی میں آج ہونے والا میچ پاکستانی وقت کے مطابق شام ساڑھے 4 بجے شروع ہوگا۔

ایشیا کپ کے میچ میں بھارت اور افغانستان کا میچ سنسنی خیز مقابلے کے بعد ٹائی ہوگیا ، بھارت سے آخری اوور میں7رنز نہ بن سکے اور پوری ٹیم آئوٹ ہوگئی۔ شاندار سنچری اسکور کرنے پر افغان اوپنر محمد شہزاد مین آف دی میچ قرار پائے گئے۔

دبئی میں کھیلے گئے سپر فور مرحلے کے پانچویں میچ میں افغانستان اور بھارت کا مقابلہ آخری لمحات میں انتہائی دلچسپ موڑ اختیار کرگیا۔

افغانستان کی جانب سے دیے گئے 253رنز کے ہدف کے تعاقب میں بھارتی سورما ہدف حاصل کرنے میں ناکام رہے۔

بھارتی بیٹسمین راشد خان کی جانب سے پھینکے گئے آخری اوورمیں7 رنز نہ بنا سکے اور پوری ٹیم 252رنز پر پویلین لوٹ گئی اور دونوں ٹیموں کے اسکور برابر ہونے کی وجہ سے میچ ٹائی ہوگیا۔

بھارتی ٹیم کے دونوں اوپنرز لوکیش راہول60 اور امباتی رائیودو 57کےساتھ نمایاں رہے تاہم افغان بولرز کی جانب سے محمد نبی، آفتاب عالم، راشد خان کے 2،2شکار اور جاوید احمدی نے ایک وکٹ حاصل کی۔

اس سے پہلے ٹاس جیت کر پہلے بیٹنگ کرنے والی افغان ٹیم نے اوپنر محمد شہزاد کی شاندار 124رنز کی اننگز کی بدولت افغانستان نے بھارت کو جیت کے لیے 253رنز کا ہدف دیا۔ انہوں نے مقررہ 50 اوورز میں 8 وکٹوں کے نقصان پر 252رنز اسکور کیے تھے۔

افغان اوپنر محمد شہزاد کی 124رنز کی اننگز میں 11چوکے اور 7 چھکے شامل تھےجبکہ اننگز کے آخری لمحات میں آل رائونڈر محمد نبی نے بھی 4چھکوں اور 3 چوکوں کی مدد سے زبردست 64رنز کی اننگز کھیلی اور بھارت کے لیے ایک اچھا مجموعہ ترتیب دینے میں اہم کردار ادا کیا۔

بھارتی بولرز کی جانب سے رویندرہ جدیجہ 3، کلدیپ یادو 2 تاہم خلیل احمد، دیپک چاہر اور کیدر جادو نے ایک، ایک وکٹ حاصل کی۔

اس سے قبل میچ کے ٹاس کے لئے افغانستان کے کپتان اصغر افغان اور مہندر سنگھ دھونی میدان میں اترے ۔

آج سابق بھارتی کپتان مہندرہ سنگھ دھونی بھارتی ٹیم کی کپتانی کے فرائض انجام دے رہے تھے، وہ 696 دنوں کے بعد بھارتی ٹیم کی کپتان بنے اور بطور کپتان آج ان کا 200واں ایک روزہ میچ تھا۔

بھارت کی پاکستان کے خلاف گزشتہ میچ کھیلنے والی ٹیم میں پانچ تبدیلیاں کی گئی تھیں اور روہت شرما، شیکھردھون ، جسپریت بمرا، بھونیشورکمار، یزویندرچاہل کو آج کے میچ میں آرام دیا گیا۔

بھارتی پلئنگ الیون مہندرہ سنگھ دھونی کپتان، لوکیش راہول، منیش پانڈے، دیپک چاہر، سدھارت کول، خلیل احمد، امباتی رائیدو، دنیش کارتک، کیدار جادیو، رویندر جدیجا اور کلدیپ یادیو پر مشتمل تھے۔

افغانستان کی فائنل الیون میں محمد شہزاد، جاوید احمدی، رحمت شاہ ،حشمت اللہ شاہدی ،نجیب اللہ زادران، محمد نبی، راشد خان، گلبدین نیب ،مجیب الرحمٰن اور آفتاب عالم شامل تھے ۔

بھارت سپر فور کے دونوں میچز جیت کر پہلے ہی فائنل کے لئے کوالیفائی کرچکا ہے جبکہ افغانستان کی ٹیم پاکستان اور بنگلادیش سے شکست کے بعد فائنل کی دوڑ سے باہر ہوگئی ہے ۔

ایونٹ میں افغانستان کی کارکردگی نے سب کو متاثر کیا، گروپ میچ میں بنگلادیش اور سری لنکا کو بڑے مارجن سے ہرایا جبکہ پاکستان سے بہت اچھا مقابلہ کیا۔

لاہور:(سپورٹس ڈیسک/ایمرا نیوز) قومی کرکٹرز نے افغان پریمیئر لیگ میں شرکت کے لیے نو آبجیکشن سرٹیفکٹ ( این او سی) نہ ملنے پر کرکٹ بورڈ سے رابطہ کرلیا اور مطالبہ کیا ہے کہ لیگ کھیلنے کی اجازت دی جائے۔
ذرائع کے مطابق 5 اکتوبر سے شروع ہونے والی افغان پریمیئر لیگ میں شرکت کے لیے کرکٹر کامران اکمل اور محمد عرفان نے پی سی بی سے رابطہ کیا اور مطالبہ کیا کہ این او سی جاری کرتے ہوئے کھلاڑیوں پر لیگ میں شرکت نہ کرنے سے متعلق فیصلے پر نظر ثانی کی جائے۔

کرکٹرز نے مطالبہ کیا کہ افغان پریمیئر لیگ کا حصہ بننے کے لیے انہیں این او سی جاری کیے جائیں اور این او سی کے حوالے سے بورڈ کو پالیسی واضح کرنی چاہیے۔
پی سی بی نے موجودہ کھلاڑیوں کو افغان پریمیئر لیگ کھیلنے سے روک دیا
کھلاڑیوں کا کہنا ہے کہ این او سی کے حوالے سے غیر یقینی صورت حال کی وجہ سے نقصان کھلاڑیوں کا ہوتا ہے۔
یاد رہے کہ پی سی بی نے افغان پریمیئر لیگ میں ان ایکشن کھلاڑیوں کو شرکت سے روک دیا تھا اور کہا تھا کہ صرف ریٹائرڈ کھلاڑی ہی لیگ کا حصہ بن سکتے ہیں۔
پی سی بی کے فیصلے سے وہاب ریاض، سہیل تنویر، محمد عرفان، فہیم اشرف، محمد حفیظ، کامران اکمل اور افتخار احمد افغان پریمیئر لیگ سے آؤٹ ہوگئے اور ریٹائرڈ کرکٹرز میں سے صرف شاہد آفریدی کا لیگ سے معاہدہ ہے۔

لاہور: انٹر نیشنل کرکٹ کونسل نے سنسنی خیز انکشاف کیا ہے کہ گزشتہ ایک سال میں ٹیسٹ کھیلنے والے ملکوں کے چار کپتانوں سمیت مجموعی طور پانچ کپتانوں سے سٹے بازوں نے رابطہ کیا ہے۔

آئی سی سی نے براہ راست پاکستان کے کپتان سرفراز احمد کا نام بتانے سے گریز کیا ہے لیکن ‘روزنامہ جنگ’ کی تحقیق کے مطابق ان پانچ کپتانوں میں ایک سرفراز احمد بھی ہیں جنہیں گزشتہ سال دبئی میں ایک پاکستانی عرفان انصاری نے پیشکش کی تھی۔

حیران کن طور پر آئی سی سی نے میڈیا بریفنگ میں زمبابوے کے سابق کپتان گریم کریمر کا اعترافی ویڈیو بیان بھی دکھایا جس میں برینڈن پیشکش کے بارے میں بتا رہے تھے۔

آئی سی سی کے اینٹی کرپشن یونٹ کے جنرل منیجر ایلکس مارشل کا کہنا ہے کہ پچھلے ایک سال کے دوران بک میکرز نے پانچ کپتانوں سے رابطہ کیا جنھوں نے اس بارے میں آئی سی سی کو فوراً رپورٹ کر دی، ان پانچ کپتانوں میں چار آئی سی سی کے مکمل رکن ممالک کے کپتان شامل ہیں۔

سٹے باز زیادہ تر کپتانوں سے اس لئے رابطہ کرتے ہیں کیوں کہ گراؤنڈ میں پورے میچ کو کپتان کنٹرول کرتا ہے اگر کپتان ان سے مل جائے تو وہ اسے پورا کر دیتے ہیں،آٹھ کھلاڑی ان واقعات میں ملوث پائے گئے جن میں چار سابق کھلاڑی اور پانچ کرکٹ ایڈمنسٹریٹرز بھی شامل ہیں۔

ایلکس مارشل کا کہنا ہے کہ کرکٹ میں کرپشن کے سلسلے میں بھارتی بک میکرز سب سے نمایاں ہیں، بھارتی سٹے باز دنیا بھر میں کھیل کے لئے شدید رسک ہیں، وہ ٹی ٹوئنٹی کے پرائیویٹ لیگز کو ہدف بناکر اپنے مقاصد کی تکمیل کررہے ہیں۔

آئی سی سی اینٹی کرپشن یونٹ کے جنرل منیجر ایلکس نے کہا کہ بک میکرز کے لیے اپنے مقاصد حاصل کرنے کا سب سے بہترین ذریعہ ٹی 20 لیگز ہیں، درحقیقت یہ لوگ ٹی 20 کو پسند کرتے ہیں اور اسے اپنا ہدف بناتے ہیں، بک میکرز کے لیے پورا میچ فکس کرنا ممکن نہیں ہیں لہٰذا وہ یا تو سپاٹ فکسنگ کرتے ہیں یا میچ کے کسی ایک خاص سیشن پر توجہ مرکوز رکھتے ہیں۔

آئی سی سی نے حکام انکشاف کیا ہے کہ گزشتہ ایک سال کے دوران سٹے بازی کے 32 واقعات پر تحقیقات ہوئیں جبکہ آئی سی سی کو 23 واقعات رپورٹ ہوئے۔

پاکستان کے کپتان سرفراز احمد سمیت ٹیسٹ کھیلنے والے ممالک کی چار ٹیموں کے کپتانوں نے اسپاٹ فکسنگ واقعات رپورٹ کئے جبکہ ایک کپتان کا تعلق ٹیسٹ کھیلنے والے ملک سے نہیں تھا۔

میڈیا کے کیمرے بند کر کے انہیں سٹے بازوں کے بارے میں ایک ویڈیو بھی دکھائی گئی جس میں زمبابوے کے سابق کپتان برینڈن ٹیلر اعتراف کررہے ہیں کہ انہیں کس طرح اپروچ کیا گیا، ایک سٹے باز جس کا نام انیل منور بتایا گیا اس کی تصویر دکھائی گئی اور صحافیوں سے کہا گیا کہ اگر آپ اسے جانتے ہیں یا اس کی اصل شہریت اور نام کا علم ہے تو ہمیں بتایا جائے۔

ایلکس مارشل نے بتایا کہ پچھلے 12 ماہ کے دوران آئی سی سی کے اینٹی کرپشن یونٹ نے 32 تحقیقات کیں جن میں سے 23 ایسی ہیں جن کے بارے میں آئی سی سی کو مطلع کیا گیا، اس عرصے میں آٹھ کرکٹر کرپشن میں ملوث پائے گئے جن میں چار سابق کرکٹرز شامل ہیں۔

کراچی:(سپورٹس ڈیسک/ایمرا نیوز) پی سی بی پرٹی10 لیگ کیلیے کھلاڑیوں کو ریلیز کرنے کا دباؤ بڑھنے لگا۔
گزشتہ برس سابق چیئرمین پی سی بی نجم سیٹھی شارجہ میں منعقدہ ٹی ٹین لیگ کیلیے پلیئرز کو ریلیز کرنے پر شدید تنقید کی زد میں آئے تھے،انھوں نے کہا تھا کہ اس کے عوض بورڈ کو آرگنائزرز نے چار لاکھ ڈالرز ادا کیے،نئے چیئرمین احسان مانی نے گزشتہ دنوں ایونٹ پر بعض شکوک ظاہر کیے تھے اس کے بعد اب بورڈ پررواں برس بھی ایونٹ کیلیے کرکٹرز کو ریلیز کرنے کا دباؤ بڑھ گیا ہے۔
بعض ایسی شخصیات جن کا لیگ سے مفاد وابستہ ہے وہ چیئرمین کو یقین دلا رہی ہیں کہ کچھ غلط نہیں ہوگا،اس برس چونکہ زیادہ میچز ہونے ہیں اور ایونٹ کا دورانیہ بھی بڑھ چکا لہذا منتظمین نے پی سی بی کو 6 لاکھ ڈالر دینے پر آمادگی ظاہر کر دی ہے۔
لیگ کے سربراہ شجیح الملک کی چیئرمین پی سی بی احسان مانی سے گزشتہ دنوں پاک بھارت ایشیا کپ میچ کے دوران دبئی اسٹیڈیم میں ملاقات بھی ہوئی تھی جس میں ایونٹ کے حوالے سے تبادلہ خیال کیا گیا۔
ٹی ٹین کے سابق پارٹنر سلمان اقبال نے ایونٹ کی شفافیت پر سوال اٹھاتے ہوئے علیحدگی اختیار کر لی تھی مگر اب انھیں منانے کی کوششیں تیزی سے جاری ہیں۔
واضح رہے کہ ٹی ٹین لیگ کا دوسرا ایڈیشن23 نومبر سے 2 دسمبر تک شارجہ میں ہوگا، اس دوران پاکستان ٹیم یو اے ای میں ہی نیوزی لینڈ سے ٹیسٹ سیریزکھیل رہی ہو گی، یوں ٹیسٹ پلیئرز ایونٹ میں حصہ نہیں لے سکیں گے.

لاہور:(سپورٹس ڈیسک/ایمرا نیوز) آئی سی سی کی ثالثی کمیٹی پاکستان اور بھارت کے درمیان دو طرفہ سیریز نہ کھیلنے کے کیس کی سماعت یکم اکتوبر سے دبئی میں کرے گی جس کے لیے پاکستان کرکٹ بورڈ نے اپنی 4 رکنی لیگل ٹیم کا اعلان کردیا ہے۔
ایمرا نیوز کے مطابق ایڈووکیٹ سپریم کورٹ خواجہ احمد حسان اور پی سی بی کے جی ایم لیگل ڈیپارٹمنٹ سلمان نصیر کے ساتھ دو برطانوی الیگزینڈر پینیادیس اور ابراہیم حسن پاکستان کرکٹ بورڈ کی 4 رکنی لیگل ٹیم کا حصہ ہوں گے۔ چاروں وکلا مائیکل بیلوف کی سربراہی میں قائم کرکٹ کی گورننگ باڈی کی تین رکنی غیر جانبدار کمیشن کے سامنے پاکستان کا موقف اجاگر کریں گے۔ کمیشن میں مائیکل بیلوف کے ساتھ جان پولیسن اور انبیلے بینٹ شامل ہیں۔
کمیشن اس معاملے کی سماعت آئی سی سی ہیڈ کوارٹر میں 3 روز تک کرے گا۔ 2014 میں پاکستان اور بھارتی کرکٹ بورڈز کے درمیان پانچ سال میں 8 سیریز کھیلنے کا معاہدہ ہوا تھا، جس کی بھارتی بورڈ نے پاسداری نہیں کی، اس معاہدے کے تحت دونوں ممالک کے مابین آٹھ سیریز کھیلی جانی تھیں، جن میں 5 سیریز کا میزبان پاکستان تھا جب کہ تین سیریز بھارت میں طے تھیں۔معاہدے کی خلاف ورزی پرپی سی بی نے بھارتی بورڈ پر ساٹھ ملین ڈالر ہرجانے کا دعوی کررکھا ہے۔
بھارتی بورڈ کا موقف رہا ہے کہ ان کی حکومت سیریز کھیلنے کی اجازت نہیں دے رہی، جس پر پی سی بی نے اپنا کیس آئی سی سی کو بجھوا رکھا ہے۔ آئی سی سی کا 3 رکنی کمیشن دونوں بورڈز کا موقف سننے کے بعد فیصلہ دے گا۔

دبئی(سپورٹس ڈیسک/ایمرا نیوز) بھارت کے خلاف ایشیا کپ کرکٹ ٹورنامنٹ میں 5 دن میں 2 میچ ہارنے والی پاکستان ٹیم کے وکٹ کیپر کپتان سرفراز احمد تنقید کی زد میں ہیں، اگرچہ سرفراز احمد نے سپر فور مرحلے میں دبئی میں چوتھے نمبر پر کھیلتے ہوئے 44 رنز اسکور کیے، تاہم بطور بیٹسمین سرفراز احمد کی اہلیت پر ناقدین سوالات اٹھا رہے ہیں۔
ایسے ماحول میں سابق بھارتی کپتان سارو گنگولی پاکستانی کپتان کے دفاع کے لیے میدان میں آگئے۔
سارو گنگولی کا کہنا تھا کہ سرفراز احمد ایک دلیر اور بڑے دل کا کھلاڑی ہے، خصوصاً گذشتہ سال چیمپیئنز ٹرافی میں بطور وکٹ کیپر کپتان سرفراز احمد نے جس انداز میں ٹیم کو کھلایا، وہ کمال تھا۔
بھارت پاکستان کو شکست دیکر ایشیا کپ کے فائنل میں پہنچ گیا
گنگولی کا کہنا تھا کہ وہ خود بھی کپتان رہے ہیں، اگر ٹیم کی کارکردگی میں اتار چڑھاؤ آئے تو اس کا براہ راست اثر کپتان پر پڑتا ہے۔
بائیں ہاتھ سے کھیلنے والے بیٹسمین سارو گنگولی نے اس بات پر بھی حیرانگی کا اظہار کیا کہ پاکستان ٹیم میں ہر سیریز میں دو سے چار نئے کھلاڑی شامل ہو رہے ہیں۔
گنگولی نے بھارتی ٹیم کے حوالے سے کہا کہ انگلینڈ سے ٹیسٹ سیریز میں ناکامی کے بعد روہت شرما، مہندرا سنگھ دھونی اور شیکھر دھون کے مستقبل کے لیے ایشیا کپ اہمیت کا حامل ہے۔
سارو گنگولی نے پاکستان کرکٹ بورڈ اور سابق کرکٹرز کو مشورہ دیا کہ بطور کپتان سرفراز احمد کو اعتماد اور حوصلہ دیں،کیوں کہ ان کے خیال میں ٹیم پاکستان کی حالیہ فتوحات میں سرفراز احمد کے فیصلوں کا اہم کردار رہا ہے اور وہ سمجھتے ہیں کہ سرفراز احمد جیسے کرکٹرز روز روز پیدا نہیں ہوتے۔
واضح رہے کہ سارو گنگولی 1992 سے 2008 تک بھارت کے لیے 113 ٹیسٹ اور 311 ون ڈے میچز کھیل چکے ہیں جبکہ انہوں نے 49 ٹیسٹ اور 147ون ڈے میچز میں ٹیم کی قیادت کی ہے۔

لاہور(سپورٹس ڈیسک/ایمرا نیوز) سابق و موجودہ قومی کرکٹرز نے ایشیا کپ کے ایک اور میچ میں بھارت کے ہاتھوں پاکستان کی شکست پرمایوسی کا اظہار ہے۔
سوئنگ کے سلطان وسیم اکرم نے کہا ہے کہ پاکستان ٹیم چھوٹی ٹیموں کے خلاف تو اچھا کھیلتی ہے لیکن جب کوئی بڑی ٹیم سامنے آجاتی ہے تو کھلاڑی دباؤ کا شکار ہوجاتے ہیں ۔
پاکستان کی شکست پر اظہار خیال کرتے ہوئے سابق فاسٹ بولر شعیب اختر کا کہنا ہے کہ جس وکٹ پر تین سو رنز بن سکتے ہیں وہاں 237 رنز بنائیں گے تو کیسے جیتیں گے ؟
ٹیسٹ کرکٹر سہیل تنویر نے کہا کہ پاکستان نے مایوس کن بیٹنگ کی ،اتنے کم اسکور کا دفاع نہیں کیا جا سکتا ۔
کرکٹ کے سکندر،سکندر بخت کا کہنا ہے کہ بھارتی بولرز کی گیند سوئنگ بھی نہیں ہو رہی پھر بھی ہمارے بیٹسمین نہیں کھیل پا ئے ۔
بھارت نے ایشیا کپ 2018ء میں پاکستان کو لگاتار دو میچوں میں شکست سے دوچار کیا ہے۔ سپرفور مرحلے میں 9وکٹوں سے شکست دی، جبکہ گروپ میچ میں 8 وکٹوںسے ہرایا تھا۔