Category کرکٹ

انڈین پریمیئر لیگ (آئی پی ایل) کی مختلف ٹیموں کے کھلاڑیوں اور عملے کے ارکان میں کورونا کی تشخیص کے بعد لیگ کے 2021 سیزن کو غیر معینہ مدت کے لیے ملتوی کردیا گیا۔

لیگ کے ٹوئٹر اکاؤنٹ سے جاری بیان کے مطابق انڈین پریمیئر لیگ کی گورننگ کونسل اور بھارتی کرکٹ بورڈ (بی سی سی آئی) نے ہنگامی اجلاس میں فوری طور پر آئی پی ایل 2021 سیزن کو ملتوی کرنے کا متفقہ فیصلہ کیا۔

بیان میں کہا گیا کہ ‘بھارتی کرکٹ بورڈ کھلاڑیوں، سپورٹ اسٹاف اور آئی پی ایل کے انعقاد میں شامل دیگر افراد کی صحت پر سمجھوتہ نہیں کرنا چاہتا جبکہ یہ فیصلہ تمام اسٹیک ہولڈرز کی صحت اور حفاظت کو مدنظر رکھتے ہوئے کیا گیا ہے’۔

آئی پی ایل انتظامیہ نے کہا کہ بھارتی کرکٹ بورڈ، لیگ میں شریک تمام کھلاڑیوں کی بحفاظت واپسی کے لیے ہر ممکن اقدام اٹھائے گا۔

واضح رہے کہ گزشتہ روز بائیوسیکور ببل کے باوجود دو کھلاڑیوں کا کورونا ٹیسٹ مثبت آنے کے بعد لیگ کے جاری رہنے پر سوالات کھڑے ہوگئے تھے۔

کولکتہ نائٹ رائیڈرز کے ورون چکراوَرتھی اور سندیپ واریئر کے کورونا ٹیسٹ کے نتائج مثبت آنے کے بعد کولکتہ نائٹ رائیڈرز اور ویرات کوہلی کی رائل چیلنجرز بنگلور کا میچ آغاز سے چند گھنٹے قبل منسوخ کردیا گیا تھا۔

یہ 9 اپریل کو آئی پی ایل کے آغاز کے بعد پہلا موقع تھا کہ ایونٹ کے بائیو سیکیور ببل میں کوئی کووڈ-19 کا کیس رپورٹ ہوا، ایونٹ کے آغاز سے قبل نتیش رانا، اکشر پٹیل اور دیودٹ پڈیکل وائرس کا شکار ہوئے تھے۔

بعد ازاں باؤلنگ کوچ لکشمی پتھی بالاجی سمیت چنائی سپر کنگز کے اسکواڈ کے تین اراکین کا بھی کورونا ٹیسٹ مثبت آگیا تھا جس کے بعد پوری ٹیم کو آئیسولیٹ کردیا گیا۔

خیال رہے کہ آئی پی ایل کے تمام میچز بند دروازوں کے پیچھے ہوئے تھے لیکن 3 آسٹریلین کھلاڑیوں کے ٹورنامنٹ چھوڑ کر جانے کے بعد منتظمین اس بات کو یقینی بنا رہے تھے کہ باقی غیر ملکی کھلاڑی ‘مکمل محفوظ’ رہیں۔

آسٹریلوی حکومت کی جانب سے بھارت سے آنے والوں پر سفری پابند عائد کیے جانے سے قبل ایڈم زیمپا، اینڈریو ٹائی اور کین رچرڈسن اپنی، اپنی آئی پی ایل ٹیموں کو چھوڑ کر واپس چلے گئے تھے۔

پاکستان کرکٹ بورڈ (پی سی بی) نے بچوں کی پیدائش کے سلسلے میں کھلاڑیوں کو تنخواہ کے ساتھ چھٹی دینے سمیت جامع پالیسی کا اعلان کردیا۔

پاکستان کرکٹ میں موجود پیشہ ورانہ کھلاڑیوں کے لیے جاری کردہ اس پالیسی کا اطلاق مینز اور ویمنز دونوں کرکٹرز پر ہو گا جو بالترتیب دوران حمل اور بچے کی پیدائش کے موقع پر اس پالیسی سے مستفید ہو سکیں گے۔

اس سلسلے میں بتایا گیا کہ اگر خواتین کرکٹرز چاہیں تو اپنی زچگی کی چھٹی کے آغاز سے لے کر بچے کی پیدائش تک نان پلیئنگ رول اختیار کر سکیں گی جبکہ وہ تنخواہ کے ساتھ 12 ماہ کی چھٹی اور کنٹریکٹ کی میعاد میں ایک سال کی توسیع کی بھی حقدار ہوں گی۔

زچگی کی چھٹی کے اختتام پر مذکورہ خواتین کرکٹرز کو دوبارہ کرکٹ کی سرگرمیوں کا حصہ بنایا جائے گا جبکہ بچے کی پیدائش کے بعد بحالی کے پروگرام کے بارے میں بھی مناسب طبی معاونت فراہم کی جائے گی۔

پی سی بی کی جانب سے جاری اعلامیے کے مطابق اگر کسی خاتون کرکٹر کو کرکٹ کی سرگرمی کے سلسلے میں سفر کرنا پڑتا ہے تو اپنے نوزائیدہ کی دیکھ بھال کے لیے انہیں من پسند فرد کے ساتھ سفر کی اجازت ہو گی اور اس سلسلے میں تمام اخراجات پی سی بی اور مذکورہ خاتون کرکٹر برابر تقسیم کریں گے۔

مرد کرکٹرز اگر والد بنتے ہیں تو وہ بھی مکمل تنخواہ کے ساتھ 30 دن کی چھٹی لینے کے حقدار ہوں گے تاہم انہیں یہ چھٹی اپنے بچے کی پیدائش کے 56 دن کے اندر حاصل کرنی ہو گی۔

پاکستان کرکٹ بورڈ کے چیف ایگزیکٹو وسیم خان نے کہا کہ ہر موقع پر اپنے کرکٹرز کا خیال رکھنا پی سی بی کا فرض ہے لہٰذا یہ مناسب ہے کہ ہمارے پاس والدین سے متعلق دوستانہ پالیسی ہو تاکہ ہمارے کھلاڑیوں کو زندگی کے اس اہم مرحلے پر مکمل معاونت حاصل ہو اور وہ اس دوران اپنے کیریئر کے حوالے سے بے فکر رہیں۔

انہوں نے اس پالیسی کو خواتین کرکٹرز کے لیے زیادہ اہم قرار دیتے ہوئے کہا کہ خواتین کسی بھی معاشرے کی ترقی میں اہم کردار ادا کرتی ہیں اور ہماری خواتین کرکٹرز نے عالمی سطح پر متعدد اعزاز بھی حاصل کیے ہیں۔

وسیم خان نے کہا کہ زچگی کی پالیسی کے بعد اُمید ہے کہ ماضی کی نسبت خواتین زیادہ تعداد میں اس کھیل کی طرف راغب ہوں گی کیونکہ اس پالیسی کے اجرا کے بعد انہیں اپنی زندگی میں توازن برقرار رکھنے میں مدد ملے گی۔

واضح رہے کہ پی سی بی کی جانب سے یہ پالیسی ایک ایسے موقع پر سامنے آئی ہے جب گزشتہ ماہ قومی ویمنز ٹیم کی سابق کپتان بسمہ معروف نے ماں بننے کی خوشخبری سناتے ہوئے کرکٹ سے کچھ وقت کے لیے کنارہ کشی اختیار کرنے کا اعلان کیا تھا۔

انہوں نے سماجی رابطوں کی ویب سائٹ ٹوئٹر پر اپنے پیغام میں کہا تھا کہ مجھے یہ اعلان کرتے ہوئے بہت خوشی محسوس ہو رہی ہے کہ میں ماں بننے والی ہوں اور اپنی زندگی کے ایک نئے باب میں داخل ہونے والی ہوں۔

قومی ٹیم کے سابق کپتان شاہد آفریدی کو ایم سی سی نے لائف ٹائم ممبر شپ کے اعزاز سے نواز دیا۔

میلبورن کرکٹ کلب کی جانب سے قومی ٹیم کے سابق اسٹار آل راؤنڈر شاہد آفریدی کو کرکٹ میں بے پناہ خدمات پر تاحیات ممبرشپ دے دی۔

اس سے قبل میلبورن کرکٹ کلب کی جانب سے قومی ٹیم کے 22 کھلاڑیوں کو ممبرشپ دی جاچکی ہے جن میں عمران خان، وسیم اکرم، وقار یونس، جاوید میانداد، رمیزراجہ اور مصباح الحق سمیت دیگر کھلاڑی شامل ہیں۔

سماجی رابطے کی ویب سائٹ پر ٹوئٹ کرتے ہوئے شاہد آفریدی نے اس اعزاز پر ردعمل دیتے ہوئے کہا ’’میرے لیے یہ بہت بڑے اعزاز کی بات ہے کہ دنیائے کرکٹ کے سب سے بڑے کلب نے مجھے عزت بخشی، میں اس اعزاز پر ایم سی سی کا مشکور ہوں جب کہ کرکٹ کو آن دی فیلڈ اور آف دی فیلڈ پروموٹ اور سپورٹ کرنے کی اپنی کوششیں جاری رکھوں گا۔

دبئی: آئی سی سی نے ون ڈے رینکنگ جاری کردی جس کے مطابق قومی ٹیم چھٹی پوزیشن پر موجود ہے۔

آئی سی سی نے ون ڈے ٹیم کی رینکنگ جاری کردی ہے جس کے مطابق نیوزی لینڈ نے انگلینڈ کو پیچھے دھکیل کر پہلی پوزیشن حاصل کرلی جب کہ قومی ٹیم چھٹی پوزیشن پر موجود ہے، رینکنگ کے مطابق نیوزی لینڈ پہلے، آسٹریلیا دوسرے، بھارت تیسرے، انگلینڈ چوتھے اور جنوبی افریقا پانچویں نمبر پر ہے۔

بھارت میں کورونا کے پھیلاؤ اور کھلاڑیوں کے ٹیسٹ مثبت آنے کے باعث آج کلکتہ اور بنگلور کی ٹیموں کے درمیان ہونے والا انڈین پریمیئر لیگ (آئی پی ایل) کا میچ منسوخ کر دیا گیا۔

کرکٹ کے معاملات پر نظر رکھنے والی ویب سائٹ ‘کرک بز’ کے کی رپورٹ کے مطابق بھارتی کرکٹ بورڈ 3 مئی کو ہونے والا کلکتہ نائٹ رائڈرز اور رائل چیلنجر بنگلور کا میچ ری شیڈول کرنے کی منصوبہ بندی کر رہا ہے۔

کرک بز کی رپورٹ کے مطابق بھارتی حکام کی جانب سے میچ کی منسوخی کی کوئی وجہ نہیں بتائی گئی ہے تاہم یہ معلوم ہوا ہے کہ کلکتہ نائٹ رائڈرز کی ٹیم کے کھلاڑیوں کے کورونا ٹیسٹ مثبت آنے کے باعث یہ میچ منسوخ ہوا۔

رپورٹ کے مطابق جن کھلاڑیوں کے کورونا ٹیسٹ مثبت آئے ہیں ان میں ورن چکرورتی اور سندیپ واریرز شامل ہیں اور دونوں کھلاڑیوں کو اس وقت کورونا ہوا جب وہ انجری کے باعث میڈیکل چیک اپ کے لیے باہر گئے تھے۔

پاکستان کے سینئر اسپورٹس جرنلسٹ ماجد بھٹی نے بھی سوشل میڈیا پر اپنے پیغام میں کلکتہ نائٹ رائڈرز اور رائل چیلنجر بنگلور کے درمیان میچ کھلاڑیوں کے کورونا ٹیسٹ مثبت آنے کے باعث مسنوخ ہونے کی تصدیق کی ہے۔

بھارت میں کورونا وائرس کے بڑھتے ہوئے کیسز اور ہر گزرتے دن کے ساتھ ابتر ہوتی صورتحال کے پیش نظر رواں سال شیڈول ٹی20 ورلڈ کپ کو بھارت سے متحدہ عرب امارات منتقل کرنے پر غور شروع کردیا گیا ہے۔

ٹی20 ورلڈ کپ رواں سال اکتوبر-نومبر میں بھارت میں شیڈول ہے جس کا فائنل 14 نومبر کو کھیلا جائے گا اور ٹورنامنٹ میں 16 ٹیمیں شرکت کریں گی۔

ٹورنامنٹ ڈائریکٹر دھیرج ملہوترا نے بی بی سی پوڈ کاسٹ میں گفتگو کرتے ہوئے کہا کہ ہم ہر طرح کی صورتحال کے لیے خود کو تیار کررہے ہیں اور اگر صورتحال بدترین شکل اختیار کر جاتی ہے تو ٹورنامنٹ کو متحدہ عرب امارات منتقل کر کے وہاں میزبانی کریں گے۔

ان کا کہنا تھا کہ ہم ٹورنامنٹ کے بھارت میں انعقاد کی ہر ممکن کوشش کررہے ہیں اور اس وقت مستقل انٹرنیشنل کرکٹ کونسل(آئی سی سی) سے رابطے میں ہیں۔

بھارت میں کورونا وائرس کے کیسز اور اموات کے ساتھ ساتھ بھارت میں خطرناک ہوتی صورتحال کو دیکھتے ہوئے کرکٹ برادری نے ٹی20 ورلڈ کپ کے بھارت میں انعقاد کے حوالے سے اپنے تحفظات کا اظہار کیا ہے۔

کرکٹ برادری نے ان سوالات کرنے شروع کردیے ہیں کہ ورلڈ کپ کے انعقاد میں اب محض 6ماہ باقی ہیں تو کیا ایسے میں بھارت ایونٹ کی میزبانی کے لیے موزوں ملک ہے۔

دھیرج ملہوترا نے کہا کہ اگر آئی سی سی کو ایونٹ کے لیے بھارت غیرمحفوظ ملک لگا تو بورڈ آف کنٹرول فار کرکٹ ان انڈیا(بی سی سی آئی) نے ایونٹ کو ہنگامی بنیادوں پر متحدہ عرب امارات منتقل کرنے کا منصوبہ بنایا ہے۔

بھارتی بورڈ نے 9 مقامات پر ورلڈ کپ کے انعقاد کا منصوبہ بنایا ہے جس میں ممبئی، احمد آباد، لکھنؤ، چنائی، بنگلورو، دہلی، دھرمشالا ، کولکتہ اور حیدرآباد شامل ہیں جبکہ فائنل کی میزبانی احمدآباد میں بنایا گیا دنیا کا سب سے بڑا کرکٹ اسٹیڈیم کرے گا جس میں ایک لاکھ 10 ہزار افراد کے بیٹھنے کی گنجائش ہے۔

آئی سی سی کی ٹیم کو انتظامات، حفاظتی اقدامات اور سہولیات کا جائزہ لینے کے لیے بھارت کا دورہ کرنا تھا لیکن متحدہ عرب امارات کی جانب سے بھارت پر عائد سفری پابندیوں کی وجہ سے جائزہ ٹیم کسی موزوں وقت پر دورہ کرے گی۔

دھیرج نے کہا کہ ابھی ہم اصل منصوبے پر عمل کرنے کے لیے پرعزم ہیں کیونکہ ابھی تک ہمیں نہیں پتہ کہ کیا صورتحال جنم لیتی ہے البتہ متبادل منصوبہ بنایا جا چکا ہے۔

واضح رہے کہ اس وقت بھارت میں انڈین پریمیئیر لیگ کا انعقاد ہو رہا ہے جس میں 8 ٹیموں میں دنیا بھر کی بہترین ٹیموں کے کھلاڑی شریک ہیں لیکن جب اس ایونٹ کا آغاز ہوا، اس وقت پڑوسی ملک میں صورتحال نسبتاً بہتر تھی البتہ گزشتہ دو ہفتوں میں صورتحال تباہ کن شکل اختیار کر چکی ہے۔

کئی ممالک نے بھارت میں پروازوں پر پابندی عائد کردی ہے اور کئی ممالک سے بھارت امداد پہنچنے کا سلسلہ شروع ہو چکا ہے۔

بھارت میں آج پہلی مرتبہ 4 لاکھ سے زائد کیسز رپورٹ ہوئے جبکہ ساڑھےئ تین ہزار سے زائد اموات ہوئیں اور یہ تعداد ہر گزرتے دن کے ساتھ بڑھتی چلی جا رہی ہے۔

بھارت میں اب تک 2 لاکھ سے زائد افراد کورونا وائرس کا شکار ہو کر موت کے منہ میں جا چکے ہیں جبکہ ایک کروڑ 90 لاکھ وائرس کا شکار ہو چکے ہیں۔

واضح رہے کہ گزشتہ سال آسٹریلیا میں شیڈول ٹی20 ورلڈ کپ کورونا وائرس کے سبب منسوخ کردیا گیا تھا اور اب وہ ایونٹ 2022 میں ہو گا۔

قومی ٹیم کے بولنگ کوچ وقار یونس فاسٹ بولر حسن علی کے ہمت نہ ہارنے والے رویے سے متاثر ہو گئے ہیں اور ان کا کہنا ہے کہ حسن علی نے جس طرح کم بیک کیا ہے اس کی جتنی تعریف کی جائے کم ہے۔

حسن علی لگ بھگ 2 برس فٹنس مسائل سے جنگ لڑتے رہے اور اس دوران انہیں پسلیوں میں فریکچر بھی ہوا، قومی ٹیم سے ڈراپ ہوئے، سینٹرل کنٹریکٹ بھی نہ ملا، پہلی مرتبہ ڈومیسٹک کرکٹ میں کم بیک کی کوشش کی، کامیاب نہ ہوئے اور پھر نیشنل ہائی پرفارمنس سینٹر میں ری ہیب کیا، پھر گزشتہ برس قائد اعظم ٹرافی کے وسط میں ایسا شاندار کم بیک کیا کہ دنیا نے دیکھا، جنوبی افریقا کے خلاف ہوم سیریز اور اب زمبابوے کے خلاف پہلے ٹیسٹ میں پرفارمنس سب کے سامنے ہے۔

وقار یونس نے بتایا کہ حسن علی میچ ونر اور حیران کر دینے والا کرکٹر ہے، بولنگ ہو، بیٹنگ یا فیلڈنگ، 100 فیصد جان مارنے کے لیے تیار رہتا ہے۔
حسن علی نے زمبابوے کے خلاف پہلے ٹیسٹ میں 50 وکٹیں مکمل کیں اور 9 وکٹیں لے کر مین آف دی میچ قرار پائے۔

بولنگ کوچ نے کہا کہ حسن علی نے جس طرح کم بیک کیا ہے اس کی جتنی تعریف کی جائے کم ہے، حسن علی کا شاندار کم بیک کرنا ان کے ہمت نہ ہارنے والے رویے کا نتیجہ ہے۔

وقار یونس نے کہا کہ حسن علی ذہنی طور پر بہت مضبوط ہے، وہ ایک شاندار کریکٹر ہے، میں ہمیشہ حسن علی کے ساتھ اپنی مثال دیتا ہوں، مجھے بھی کیرئیر میں کمر کی تکلیف رہی، لوگوں نے مجھے بہت مایوس کر دیا تھا، حسن علی کی طرح مجھے بھی لوگوں نے کہا کہ میرا کیرئیر آگے نہیں بڑھے گا لیکن رویہ اگر ہمت نہ ہارنے والا ہو تو آگے بڑھنےسےکوئی نہیں روک سکتا اور کامیابی ملتی ہے۔

انہوں نے کہا کہ حسن علی کو جب بھی بال دو مایوس نہیں کرتا، اس نے مجھے بہت متاثر کیا ہے۔

وقار یونس آسٹریلیا میں اہلیہ کی سرجری کی وجہ سے زمبابوے کے خلاف سیریز کے لیے دستیاب نہیں تھے، وہ ان دنوں سڈنی میں اپنے گھر جانے سے قبل 14 روز کا سخت قرنطینہ مکمل کر رہے ہیں جس کے ابھی 7 روز باقی ہیں۔

ہینگ زو: پاکستانی بیس بال ٹیم نے سپورٹس ایونٹ ایشین گیمز کیلئے کوالیفائی کر لیا ہے۔ یہ ایونٹ 2022ء میں چین کے شہر ہینگ زو میں منعقد کیا جائے گا۔

پاکستان بیس بال فیڈریشن کے صدر سید فاخر علی شاہ نے بتایا ہے کہ پاکستانی ٹیم سمیت اس ایونٹ میں 12 ٹیمیں حصہ لیں گی۔ ایشین گیمز کے بیس بال مقابلوں میں حصہ لینے والی ٹیموں میں پاکستان کے علاوہ ورلڈ نمبر ون جاپان، ورلڈ نمبر ٹو کوریا، ورلڈ نمبر تھری تائیوان، چین، ہانگ کانگ، تھائی لینڈ، فلپائن،منگولیا اور لاؤس شامل ہیں۔

ان کا کہنا تھا کہ پاکستان نے اس سے قبل گزشتہ ایشین گیمز کے بیس بال ایونٹ میں بھی بھرپور حصہ لیا تھا۔ جکارتہ میں منعقد ہونے والے ان مقابلوں میں پاکستان کی 16 رکنی ٹیم نے شرکت کی تھی۔

سید فاخر علی نے کہا کہ پاکستان بیس بال کی ٹیم پورے ایشیا میں پانچویں نمبر پر ہے۔ دلچسپ بات یہ ہے کہ پورے ملک میں کہیں بھی بیس بال کا کوئی گراؤنڈ نہیں لیکن اس کے باوجود ہمارے کھلاڑی بین الاقوامی سطح پر پاکستان کا نام روشن کر رہے ہیں۔

لاہور: فواد عالم نے کیریئر کی ابتدائی چاروں ففٹیز کو سنچریوں میں تبدیل کرنے کا 55سال پرانا ریکارڈ برابر کردیا۔

پاکستانی بیٹسمین نے گزشتہ روز زمبابوے کیخلاف ہرارے ٹیسٹ میں کیریئر کی چوتھی سنچری بنائی،یہ چوتھا موقع تھا جب انھوں نے 50رنز مکمل کرنے کے بعد اسے تھری فیگر اننگز میں تبدیل کیا، یوں ابھی تک فوادنے کوئی ففٹی نہیں بنائی۔

یاد رہے کہ فواد عالم 10سال اور 259دنوں کے طویل اور صبر آزما انتظار کے بعد قومی ٹیم میں واپس آئے تھے،اس دوران 40نئے کرکٹرز کو ٹیسٹ کیپس دی گئیں۔
دوسری جانب فواد عالم ڈومیسٹک کرکٹ میں رنز کے انبار لگاتے رہے، انھوں نے 56.68کی اوسط سے 7ہزار 9سو 65رنز بنائے،ان میں 26سنچریاں اور 33ففٹیز شامل تھیں۔

پاکستان کرکٹ بورڈ نے قومی کرکٹرز کے لیے نئے سینٹرل کنٹریکٹ میں بڑے پیمانے پر اکھاڑ بچھاڑ کا فیصلہ کیا ہے۔

قومی کرکٹرز کے حالیہ سینٹرل کنٹریکٹ کی مدت 30 جون کو ختم ہو رہی ہے اور کھلاڑیوں کو نئے سینٹرل کنٹریکٹ یکم جولائی سے ملیں گے۔

ذرائع کا کہنا ہے کہ کنٹریکٹس کے لیے ہیڈ کوچ مصباح الحق، چیف سلیکٹر محمد وسیم، ڈائریکٹر انٹرنیشنل ذاکر خان اور چیف ایگزیکٹو وسیم خان مشاورت کریں گے۔

ذرائع کا کہنا ہے کہ سینٹرل کنٹریکٹ کو دورہ زمبابوے کے بعد حتمی شکل دیے جانے کا امکان ہے، نئے سینٹرل کنٹریکٹ میں کھلاڑیوں کی ترقی اور تنزلی کے ساتھ نئے کھلاڑیوں کو بھی شامل کیا جائے گا۔

ذرائع کے مطابق فاسٹ بولر حسن علی، آل راؤنڈر فہیم اشرف اور عثمان قادر کو کنٹریکٹ ملیں گے جبکہ عثمان شنواری اور افتخار احمد کو کنٹریکٹ ملنے کی امید نہیں ہے۔

فاسٹ بولر حارث رؤف اور محمد حسنین کو سی کیٹگری جبکہ فخر زمان کو بی کیٹگری میں ترقی مل سکتی ہے لیکن اسد شفیق، شان مسعود اور حارث سہیل کی تنزلی کا امکان ہے۔

ذرائع کا بتانا ہے کہ محمد حفیظ کو ایک بار پھر کنٹریکٹ پیش کیا جائے گا، انہوں نے فروری میں سی کیٹگری لینے سے انکار کیا تھا، اس وقت محمد رضوان کو اے کیٹگری میں ترقی دی گئی تھی جبکہ فواد عالم کو سی کٹگری میں شامل کیا گیا تھا۔

ذرائع کا کہنا ہے کہ اظہر علی ایک فارمیٹ کھیلتے ہیں اس لیے انہیں اے سے بی میں لانے کی تجویز پر غور ہو گا جبکہ فواد عالم کی سی سے بی کیٹگری میں ترقی ہو گی۔ اس کے علاوہ محمد نواز، عمران بٹ اور زاہد محمود کے نام بھی زیر غور ہوں گے۔