Category کھیل

ابوظبی:(سپورٹس ڈیسک/ایمرا نیوز) فارم واپس آتے ہی قسمت سرفراز احمد سے روٹھ گئی جب کہ ابوظبی ٹیسٹ میں کپتان کی کہنی پر گیند لگ گئی۔ابوظبی ٹیسٹ کے پہلے روز فخرزمان کے ہمراہ پاکستان ٹیم کو بحران سے نکالنے والے میزبان کپتان سرفراز احمد90پر بیٹنگ کررہے تھے کہ مچل اسٹارک کی ایک شارٹ بال پسلیوں کی طرف آئی، بچاؤ کی کوشش میں انھوں نے کہنی آگے کردی، گیند لگنے کے بعد کپتان شدید تکلیف میں نظر آئے،فزیو نے درد کم کرنے کیلیے اسپرے کیا، گوکہ بعد میں وہ وکٹ کیپنگ کیلیے آئے اور ایک شاندار کیچ بھی لیا لیکن اب خدشہ ظاہر کیا جا رہا ہے کہ شاید وہ میچ میں مزید کیپنگ نہ کرسکیں۔پریس کانفرنس میں سرفراز احمد نے بتایا کہ گیند بڑی شدت کے ساتھ کہنی سے ٹکرائی تھی، اب بھی درد محسوس کررہا ہوں، رات کوبرف کی ٹکور کروں گا، امید ہے کہ سوجن کم ہوجائیگی، اگر بہتری نہیں آئی تو محمد رضوان میری جگہ وکٹ کیپنگ گلوز سنبھال لینگے، اس وقت ’’اے‘‘ ٹیم کے ساتھ موجود وکٹ کیپر کو طلب کرلیا ہے۔
یاد رہے کہ قوانین کے تحت میچ ریفری کی اجازت سے کسی کیپر کی انجری کی صورت میں ایسے متبادل کو بھی طلب کیا جاسکتا ہے جو 16رکنی اسکواڈ میں شامل نہ ہو۔

پریس کانفرنس میں ایک سوال پر سرفراز احمد نے بتایا کہ صرف 2اوورز میں 4وکٹیں گرنا خاصا حیران کن تھا،ابوظبی میں عام طور پر پچ چوتھے اور پانچویں روز اس طرح کی نظر آتی ہے لیکن ٹیسٹ کے پہلے دن 11بجے جو ہوا واقعی عجیب تھا، میرے لیے بھی کریز پر آنے کے بعد 15منٹ بڑے مشکل تھے،بہرحال کوشش کی اور کامیاب رہا، فخرزمان نے اسٹرائیک بہتر رکھنے میں اہم کردار ادا کیا۔کپتان نے کہا کہ ان فارم عثمان کی وکٹ حاصل کرنے کے بعد کینگروز پر مزید دباؤ بڑھائیں گے، کوشش ہے کہ اچھا ہدف دے کر چوتھی اننگز میں پچ کا فائدہ اٹھاتے ہوئے مہمان بیٹنگ لائن کو ڈھیراور سیریز اپنے نام کریں۔کپتانی چھوڑ دو، ٹیم سے نکال دو منفی تبصروں سے پریشان تھا، سرفراز احمد کپتان سرفراز احمد نے کہا ہے کہ منفی تبصروں کی وجہ سے میں دباؤ کا شکار تھا، کسی نے کہا کہ مجھے ٹیم سے نکال دو، کسی نے کپتانی چھوڑنے کی بات کہی، شکر ہے ابوظبی ٹیسٹ میں بڑی اننگز کھیل کر میں پریشر سے باہر نکل آیا۔

لاہور (نیٹ نیوز/ایمرا نیوز) پاکستان نے آسٹریلیا کے خلاف ابوظہبی ٹیسٹ میں ٹاس جیت کر بیٹنگ کا فیصلہ کیا ہے۔
اس سے قبل دبئی ٹیسٹ میں دونوں ٹیموں کے درمیان پہلے ٹیسٹ کا کوئی نتیجہ نہیں نکل سکا تھا۔ بے جان وکٹ پر کھیلنے جانے والے اس میچ میں بائولرز کو وکٹ سے کوئی مدد نہ مل سکی اور پاکستان آسٹریلیا کے آخری دو بلے بازوں کو آئوٹ کرنے میں کامیاب نہیں ہوسکا جس کے باعث یہ میچ بے نتیجہ ختم ہوا تھا۔
پاکستان کی جانب سے آئوٹ ہونے والے پہلے بلے باز محمد حفیظ تھے جو صرف 4 رنز بنا کر مچل سٹارک کی گیند پر کیچ آئوٹ ہوگئے، آج کے میچ میں وہاب ریاض کو ٹیم کا حصہ نہیں بنایا گیا ، ان کو خراب کارکردگی کی وجہ سے ٹیم سے نکالا گیا اور ان کی جگہ میر حمزہ کو ٹیسٹ کیپ دی گئی ہے۔
پاکستان کے دوسرے آئوٹ ہونے والے کھلاڑی اظہر علی تھے جو 15 رنز بنا کر آئوٹ ہوئے، تیسرے کھلاڑی حارث سہیل تھے جو بغیر کوئی رن بنائے آئوٹ ہوئے ، چوتھے کھلاڑی اسد شفیق تھے جو 0 پر پویلین لوٹ گئے اور پانچویں کھلاڑی بابر اعظم بھی صفر پر ہی پویلین واپس آگئے۔

(نیٹ نیوز/میڈیا 92 نیوز)ابوظہبی: پاکستان نے آسٹریلیا کے خلاف دو ٹیسٹ میچز پر مشتمل سیریز کے دوسرے میچ میں ٹاس جیت کر بیٹنگ کا فیصلہ کیا ہے۔ شیخ زید اسٹیڈیم میں کھیلے جانے والے ٹیسٹ میں قومی ٹیم کے کپتان سرفراز احمد نے ٹاس جیت کر پہلے بیٹنگ کا فیصلہ کیا، اس سے قبل پہلے میچ میں بھی قومی ٹیم کے کپتان نے یہی فیصلہ کیا تھا۔ آسٹریلیا کے خلاف دوسرے ٹیسٹ کے لیے زخمی اوپنر امام الحق کی جگہ فخر زمان کو ٹیم میں شامل کیا گیا ہے جو اپنا ڈیبیو میچ کھیلیں گے۔ پاکستان کی جانب سے میر حمزہ بھی ڈیبیو کرنے والے کھلاڑی ہیں جنہیں وہاب ریاض کی جگہ ٹیم میں شامل کیا گیا ہے۔ قومی اسکواڈ کپتان سرفراز احمد، اسد شفیق، محمد حفیظ، اظہر علی، حارث سہیل، بابراعظم، فہیم اشرف، بلال آصف، محمد عباس، محمد رضوان، عثمان صلاح الدین، وہاب ریاض، یاسر شاہ، میر حمزہ اور شاداب خان شامل ہیں۔ ٹم پین کی قیادت میں آسٹریلوی ٹیم میں کوئی تبدیلی نہیں کی گئی، دبئی ٹیسٹ کی گیارہ رکنی ٹیم ہی ابوظہبی ٹیسٹ میں جلوہ گر ہوگی۔

دبئی(نیٹ نیوز/ایمرا نیوز) آسٹریلوی فاسٹ بولر مچل اسٹارک پاکستان کے فاسٹ بولر محمد عباس کے مداح ہو گئے، کہتے ہیں کہ محمد عباس اسپیڈ کم ہونے کے باوجود تسلسل کے ساتھ بولنگ کرتا ہے، اس نے ہماری ٹیم کے دفاع کو چیلنج کیا ہے۔
ایک انٹرویو میں مچل اسٹارک نے کہا کہ دبئی ٹیسٹ میں عباس نے عمدہ بولنگ کی، محمد عباس کی بولنگ کے دوران فیلڈ سیٹنگ کو بغور نوٹ کیا ہے۔اسٹارک نے کہا کہ عباس کی اسپیڈ زیادہ نہیں ہے لیکن انہوں نے ہماری ٹیم کے دفاع کو چیلنج کیا ہے ، عباس کی بولنگ کے خلاف ایک پلان کے مطابق کھیلنے کی کوشش کی ہے۔مچل اسٹارک کا کہنا ہے کہ ہمیں تسلیم کرنا پڑے گا کہ آسٹریلیا کی طرز پر یہاں اٹیکنگ بولنگ نہیں کر سکتے ۔انہوں نے کہا کہ وہ دوسرے ٹیسٹ کے لیے مکمل فٹ اور تیار ہیں اور اب ایک مختلف بولر نظر آئیں گے۔

دبئی(سپورٹس ڈیسک/ایمرا نیوز) قومی کرکٹ ٹیم کے کپتان سرفراز احمد کا کہنا ہے کہ کوچ مکی آرتھر سے کوئی اختلافات نہیں، ہم ایک ہی پیج پر ہیں، جو ہوا وہ ماضی کا حصہ بن گیا اب آگے دیکھنا ہے ۔
پاکستان کرکٹ ٹیم کے کپتان سرفراز احمد نے ابوظہبی ٹیسٹ سے قبل میڈیا سے گفتگو کرتے ہوئے کہا کہ دبئی ٹیسٹ میں اچھا کھیل کر نہ جیت سکے جس کا افسوس ہے، ابوظہبی ٹیسٹ جیتنے کی پوری کوشش کریں گے۔
سرفراز احمد نے بتایا کہ ابوظہبی ٹیسٹ میں فخر زمان ٹیسٹ ڈیبیو کریں گے انہیں امام الحق کی انجری کے بعد ٹیم میں شامل کیا گیا ہے۔مکی آرتھر کے ساتھ اختلافات کے سوال پر سرفرازاحمد کا کہنا تھا کہ کوچ اور کپتان دونوں ہی ایک پیج پر ہیں، جو فیصلہ لیا وہ ٹیم مینجمنٹ کو اعتماد میں لے کر کیا تھا جو ہوگیا وہ ماضی کا حصہ ہے ، ابھی فوکسڈ دوسرے ٹیسٹ پر ہے۔سرفراز احمد کا کہنا تھا کہ وہ اپنی بیٹنگ فارم کو دیکھ رہے ہیں ، جب بھی ضرورت پڑی اچھی اننگز کھیلیں گے۔
دوسری جانب آسٹریلین کپتان ٹم پین پہلاٹیسٹ ڈرا کرنے کے بعد کافی مطمئن نظر آئے ، ان کا کہنا تھا کہ 2011 سے ایشیا میں کوئی ٹیسٹ سیریز نہیں جیتیں ہیں، اس لئے پہلے ٹیسٹ کی پرفارمنس کے بعد کافی پرجوش ہیں۔

ابوظبی:(سپورٹس ڈیسک/ایمرا نیوز) سینئر بیٹسمین اظہر علی نے تسلیم کیا ہے کہ دوسرے ٹیسٹ میں آسٹریلیا کو شکست دینے کا دباؤ پاکستان پر ہوگا تاہم میدان میں فتح کا مقصد لے کر اتریں گے۔
اظہر علی کہتے ہیں کہ میں یہ تو نہیں کہہ سکتا کہ پاکستان یا آسٹریلیا میں سے کس پر دباؤ زیادہ ہوگا مگر چونکہ ہم ہوم سائیڈ ہیں اس لیے لوگ ہم سے فتح کی امیدیں باندھے ہوئے ہیں اس چیز کا دباؤ تو بہرحال ہوگا۔
اظہر کا کہنا تھا کہ جیسا کہا جاتا ہے کہ یہ کنڈیشنز ہمارے لیے موزوں ہیں اس لیے ہمیں ان سے زیادہ سے زیادہ فائدہ اٹھانے کی ضرورت ہے، ہر میچ میں دباؤ مختلف نوعیت کا ہوتا ہے، یہ ایک فیصلہ کن میچ ہے۔ ہوم ٹیم ہونے کے ناطے ہمیں اس میں کامیابی حاصل کرنا ہے، وہ اسی سوچ کے ساتھ ہی میدان میں اتریں گے، ہم مثبت کرکے کھیلیں گے اور امید کرتے ہیں کہ نتیجہ ہمارے ہی حق میں برآمد ہوگا۔
واضح رہے کہ امام الحق کے انجرڈ ہونے کی وجہ سے دوسرے ٹیسٹ میں پاکستان کی جانب سے ایک تبدیلی ہوگی، اظہر کو بطور اوپنر کھلانے یا پھر فخر زمان کو میدان میں اتارنے کا آپشن موجود ہے، اظہر کسی بھی پوزیشن پر کھیلنے کو تیار ہیں، وہ کہتے ہیں کہ پاکستان کے لیے کھیلتے ہوئے کسی بھی چیز کیلیے تیار رہنا چاہیے، میں ہمیشہ اس بات پر یقین رکھتا ہوں کہ جوفیصلہ مینجمنٹ یا کپتان کرے میں اس پر عمل کروں۔
دبئی ٹیسٹ کے حوالے سے اظہر کا کہنا تھا کہ میں یہ تو نہیں کہتا کہ ہمارے دل ٹوٹ گئے ہیں تاہم یہ درست ہے کہ کافی مایوسی ہوئی ہے، پورے میچ پر ہمارا کنٹرول تھا اور پھر بھی ہم نہیں جیت پائے یہ بدقسمتی کی بات ہے تاہم اس کا کریڈٹ آسٹریلوی ٹیم کو بھی جاتا ہے جنھوں نے بھرپور فائٹ کی۔
اس وقت خود اظہر علی کی اپنی فارم تشویش کا باعث بنی ہوئی ہے انھوں نے گذشتہ 4 ٹیسٹ میچز میں مجموعی طور پر صرف 95 رنز ہی بنائے ہیں تاہم وہ کہتے ہیں کہ بیٹسمین ہمیشہ ہی رنز اسکور کرنا چاہتے اور جب ایسا نہیں ہوتا تو پھر برا بھی محسوس ہوتا ہے مگر اس سے زیادہ اہم بات یہ ہے کہ آپ اپنی توجہ مرکوز اور اس بات پر یقین رکھیں کہ آپ نے ایک اچھی اننگز کھیلی تو پھر چیز بہتر ہونا شروع ہوجائیں گی۔

دبئی(نیٹ نیوز) ٹیسٹ کے پانچویں اور آخری دن آسڑیلیا نے اپنی دوسری نا مکمل اننگز 136 رنز 3 کھلاڑی آوٹ سے شروع کی تو اس کے سامنے جیت کے لیے مزید 326 رنز کا ایک مشکل ہدف تھا۔

دوسری جانب سرفراز الیون کو جیت کے لیے پورے دن محض 7 وکٹیں درکار تھیں جو بظاہر مشکل نہیں لگ رہا تھا مگر عجیب اتفاق کرکٹ کے کھیل میں سرفراز الیون کے ساتھ وہ ہوا جس کی شاید کوئی توقع نہیں کر رہا تھا۔

ٹیم آسڑیلیا جو پہلی اننگز میں 83.2 اوورز میں 202 رنز پر پویلین لوٹ گئی تھی دوسری اننگز میں عثمان خواجہ کی شاندار سینچری اور ٹریوس ہیڈ اور کپتان ٹم پین کی نصف سینچریوں کے ساتھ 139.5 اوورز میں 8 وکٹ پر 362 رنز بنا کر میچ بچا گئی۔

میچ کے اختتام پر رمیز راجا سے گفتگو کرتے ہوئے کوچ مکی آرتھر نے کپتان سرفراز احمد کا وہاب ریاض کے بولنگ کروانے کے فیصلے سے اختلاف کرتے ہوئے بتایا کہ’ ڈریسنگ روم میں طے پایا تھا کہ محمد عباس اور یاسر شاہ کے ساتھ ہم پانچویں دن بولنگ کی شروعات کریں گے لیکن ایسا نہ ہوا اور سینئرز کھلاڑیوں کے مشورے پر کپتان نے ریورس سوئنگ کو مد نظر رکھتے ہوئے وہاب ریاض کو گیند تھما دی‘۔

کوچ مکی آرتھر اس حوالے سے کہتے ہیں کہ ’کوچ اور کپتان حکمت عملی بناتے ہیں، عملدار آمد کپتان کرتا ہے اور میچ کے اختتام پر دونوں ان امور پر تبادلہ خیال کرتے ہیں کہ کیا غلطیاں ہوئیں جو جیت اور ہار کا محرک ثابت ہوئیں‘۔

مکی آرتھر کی اس وضاحت سے پہلے ایک نئی بحث چھڑ گئی جس پر پی سی بی کے چند سینیئر افسران سمجھتے ہیں کہ کوچ نے میڈیا میں ڈریسنگ روم کی بات کر کے غیر ذمہ داری کا مظاہرہ کیا جس سے یہ تاثر ابھر رہا ہے کہ کپتان کے غلط فیصلوں کے باعث دبئی ٹیسٹ جو جیتا جا سکتا تھا وہ ڈرا ہوگیا۔

اس تاثر کا ابھرنا افسوس کی بات ہے، کیوں کہ ایسا نہیں ہونا چاہیے، ٹیم کی جیت ہی نہیں ہر نتیجے پر کوچ کو ذمہ داری قبول کرنا چاہیے ناکہ جیت کے علاوہ سامنے آنے والے کسی بھی نتیجے پر وہ ساری ذمہ داری کپتان کے کندھوں پر ڈال دیں۔

دوسری جانب اس کے برعکس کپتان سرفراز احمد نے دبئی ٹیسٹ کے ڈرا ہونے کے معاملے پر اس تاثر کو پریس کانفرنس کے دوران مسترد کردیا۔

انہوں نے ایک سال بعد یاسر شاہ کی واپسی کے بعد کارکردگی پر اطمینان کا اظہار کیا جب کہ میچ نہ جیتنے پر کسی کو مورد الزام ٹھہرایا نہ ہی غصے کا اظہار کیا۔

البتہ مکی آرتھر کے بیان نے کپتان کی سینیئرز کی بات ماننے پر میڈیا میں آکر جس ناگورای کا مظاہرہ کیا اس سے کچھ حلقوں کے خیال میں اس تاثر کو تقویت ملی ہے کہ کچھ ماضی میں آسڑیلیا اور جنوبی افریقا میں سینئیر کھلاڑیوں کے ساتھ جس انداز میں الجھے اب اس بات میں کوئی دو رائے نہیں کہ وہ موجودہ ٹیم میں بھی سینئیرز کے حق میں نہیں ۔

یہی وجہ تھی کہ آسڑیلیا کے خلاف ٹیسٹ سیریز میں ان کی مخالفت کے باوجود سرفراز احمد نے چیف سلیکڑ انضمام الحق کو اسکواڈ میں محمد حفیظ کو شامل کروایا اور پہلی اننگز میں سابق کپتان نے 208 گیندوں پر 15 چوکوں کے ساتھ شاندار 126 رنز بنا کر اپنے انتخاب کو نہ صرف درست ثابت کیا بلکہ کپتان کے اعتماد پر بھی پورا اترے۔

کراچی(نیٹ نیوز) ایشین بریڈ مین اور قومی کرکٹ ٹیم کے سابق کپتان ظہیر عباس عارضہ قلب میں مبتلا ہوگئے۔

ظہیر عباس کی کراچی کے علاقے کلفٹن کے ایک اسپتال میں 4 گھنٹے کے پیچیدہ آپریشن کے دوران اینجیو گرافی کی گئی اور دو اسٹنٹ ڈالنے کے بعد انہیں سی سی یو منتقل کردیا گیا ہے۔

ظہیر عباس کے چھوٹے بھائی صغیر عباس نے بتایا کہ جمعے کو دل میں تکلیف کے بعد 71 سالہ ظہیر عباس کو مقامی اسپتال منتقل کیا گیا تھا جہاں ڈاکٹروں نے فوری طور پر دل کی شریانوں کی بندش کے باعث اینجیو گرافی کرنے کا فیصلہ کیا۔

ڈاکٹروں کا کہنا ہے کہ پیچیدہ آپریشن میں کئی مسائل کا سامنا تھا تاہم سی سی یو منتقل کرنے کے بعد ظہیر عباس کی حالت میں بہتری آئی ہے۔

صغیر عباس نے مزید بتایا کہ ظہیر عباس کی ملاقات پر پابندی ہے تاہم ان کے پرستاروں سے دعائے صحت کی اپیل ہے۔

واضح رہے کہ ظہیر عباس واحد ایشین بیٹسمین ہیں جنہوں نے فرسٹ کلاس کرکٹ میں 100 سینچریاں بنائیں اور وہ انٹرنیشنل کرکٹ کونسل کے صدر کی حیثیت سے بھی خدمات انجام دے چکے ہیں۔

ظہیر عباس پاکستان کی جانب سے 78 ٹیسٹ میچوں میں 44 کی اوسط سے 5062 رنز بنا چکے ہیں جس میں 12 سینچریاں بھی شامل ہیں جب کہ 62 ایک روزہ میچز میں وہ 7 سنچریوں کی مدد سے 2572 رنز بھی بنا چکے ہیں۔

ظہیر عباس مستقل گولف کھیلتے ہیں اور سوشل حلقوں میں کافی متحرک ہیں، انہیں پہلی بار دل کی تکلیف ہوئی ہے۔

لاھور (نیٹ نیوز) ایسا لگ رہا ہے کہ قومی ٹیم کے کپتان سرفراز احمد نے اوپنر محمد حفیظ کو ٹیم میں طلب کرنے کے لئے سلیکشن کمیٹی پر دباؤ ڈال کر ہیڈ کوچ مکی آرتھر کو ناراض کر دیا ہے۔

پاکستان کرکٹ بورڈ نے ہیڈ کوچ مکی آرتھر کے متنازع انٹر ویو پر ابوظہبی میں ٹیم انتظامیہ سے وضاحت طلب کر لی ہے۔

ایک غیر ملکی خبر رساں ایجنسی کو انٹرویو میں مکی آرتھر کا کہنا تھا کہ دبئی ٹیسٹ کے آخری دن سرفراز نے سینئر کرکٹرز کے مشورے پر عمل کیا اور میرے مشورے کے مطابق یاسر شاہ اور محمد عباس کے ساتھ بولنگ شروع نہیں کی۔

پاکستان کرکٹ ٹیم کے ہیڈ کوچ مکی آرتھر دبئی ٹیسٹ ڈرا ہونے کے بعد خراب حکمت عملی کا ملبہ کپتان سرفراز احمد پر ڈال رہے ہیں اور میڈیا میں یہ تاثر دینے کی کوشش کر رہے ہیں کہ بولنگ میں تبدیلیاں کپتان کی غلط حکمت عملی کا نتیجہ ہیں۔

تاہم مکی آرتھر ٹیسٹ میچ ڈرا ہونے کے 48گھنٹے بعد ٹیم کی حکمت عملی کو میڈیا میں پی سی بی کے ضابطہ اخلاق کی خلاف ورزی کر رہے ہیں اور کرکٹ بورڈ نے ہیڈ کوچ کے متنازع انٹرویو پر ٹیم انتظامیہ سے جواب طلب کیا ہے۔

ذرائع کا کہنا ہے کہ مکی آرتھر کا رویہ ایشیا کپ کے بعد تبدیل ہو ا ہے، جب سے سرفراز احمد نے مکی آرتھر کی ہدایات کو نظر انداز کرکے محمد حفیظ کو طلب کیا اور محمد حفیظ نے دبئی ٹیسٹ میں سنچری بنا کر ہیڈ کوچ کو بھرپور جواب دیا۔

ذرائع کے مطابق مکی آرتھر کے بارے میں جنوبی افریقا اور آسٹریلیا کے کھلاڑی بھی یہی رائے رکھتے تھے کہ وہ بعض دفعہ خود غرض ہو جاتے ہیں، ایشیا کپ کے بعد کپتان کے ساتھ ان کے رویے میں تلخی کے اشارے مل رہے ہیں حالانکہ میچ کی حکمت عملی میں ان کی رائے کو اہمیت دی جاتی ہے۔

مکی آرتھر کہتے ہیں کہ دبئی ٹیسٹ کے آخری روز کپتان سرفراز احمد نے ان کے بجائے سینئر کرکٹرز کے مشورے پر عمل کیا۔

دبئی ٹیسٹ کے آخری روز سرفراز احمد سے کہا کہ عباس اور یاسر شاہ کے ساتھ بولنگ کریں مگر سرفراز نے کچھ سینئرز کے مشورے پر وہاب ریاض کو گیند تھما دی تاکہ ریورس سوئنگ سے فائدہ اٹھایا جا سکے۔

مکی آرتھر نے کہا کہ اس بات میں کوئی شک نہیں کہ آسٹریلیا خطرناک ٹیم ہے لیکن میں پُرامید ہوں کہ ابوظہبی میں پاکستان ٹیم اچھی کرکٹ کھیلے گی، کھلاڑی ذہنی طور پر مضبوط اور کارکردگی دکھانے کیلئے تیار ہیں۔

ان کا کہنا تھا کہ ہم ٹیسٹ میچ جیت سکتے تھے لیکن عثمان خواجہ اور کپتان ٹم پین کی اننگز ہماری جیت کی راہ میں رکاوٹ بن گئی۔

آسٹریلوی ٹیم پہلی اننگز کی کارکردگی کے بعد دوسری اننگز میں خطرناک ٹیم ثابت ہوئی لیکن ہم اچھا کھیل رہے ہیں اور ہم آسٹریلیا کے لئے مزید خطرناک ثابت ہوں گے۔

ہیڈ کوچ پاکستان ٹیم کا کہنا تھا کہ میچ کا نتیجہ پاکستانی ٹیم کے لئے مایوس کن ہے لیکن کھلاڑیوں کو احساس ہے کہ ہمیں میچ جیتا چاہیے تھا، کھلاڑی ذہنی طور پر مضبوط اور میچور ہو رہے ہیں۔

ٹیسٹ کرکٹر وہاب ریاض کا ٹیسٹ کیرئیر خدشات سے دو چار ہو گیا ہے ۔ خراب پرفارمنس کی وجہ سے آسٹریلیا کے خلاف ابو ظہبی ٹیسٹ میں وہاب ریاض کی ٹیم میں شمولیت کا امکان نہیں ہے ۔

بائیں ہاتھ کے فاسٹ باؤلر وہاب ریاض کا آسٹریلیا کے خلاف ٹیسٹ سیریز میں کم بیک ہوا ۔ حالانکہ وہاب ریاض کی ٹیسٹ ٹیم میں شمولیت سے قبل ڈومیسٹک کرکٹ میں بھی فارم نہیں تھی انہوں نے واپڈا کی جانب سے دو میچوں میں 2 وکٹیں حاصل کیں لیکن تجربے کی بنیاد پر انہیں ٹیم میں شامل کر لیا گیا ۔
دبئی ٹیسٹ میں وہ کوئی وکٹ حاصل نہ کر سکے ۔ پہلی اننگز میں 11 اوورز میں 39 اور دوسری اننگز میں 16 اوورز میں 42 رنز دیئے ۔ اس پرفارمنس کی بنیاد پر وہاب ریاض کی ٹیم منجمنٹ کی نظروں میں خاص اہمیت نہیں رہی ہے اس لیئے ابوظہبی ٹیسٹ میں ان کی ٹیم میں شمولیت کا امکان نہیں ہے ۔

ہیڈ کوچ مکی آرتھر پہلے ہی وہاب ریاض کے بارے میں برملا کہہ چکے ہیں کہ وہاب نے دو برسوں میں پاکستان ٹیم کو کوئی میچ نہیں جتوایا ۔

مبصرین کا کہنا ہے کہ دبئی ٹیسٹ نے وہاب ریاض کے کیرئیر کو خدشات سے دوچار کر دیا ہے ۔ انہیں اب ٹیسٹ اسکواڈ میں جگہ بنانے میں بڑی دشواری کا سامنا کرنا پڑے گا ۔