Category کھیل

کراچی:(سپورٹس ڈیسک/ایمرا نیوز) فرنچائزز کو پی ایس ایل کے مستقبل کی فکرستانے لگی،انھیں یہ بھی علم نہیں کہ لیگ کی پرانی منیجمنٹ برقرار رہے گی یا نئی کا تقرر کیا جائے گا۔
نجم سیٹھی کی رخصتی کے بعد احسان مانی نئے چیئرمین پی سی بی بن چکے ہیں، البتہ اب تک ان کا کسی پی ایس ایل فرنچائز سے باقاعدہ رابطہ نہیں ہوا ہے، صرف ایک اونر ازخود ملاقات کیلیے گئے تھے۔
ذرائع کا کہنا ہے کہ فرنچائزز بعض حوالوں سے تشویش کا شکار ہیں، انھیں یہ بھی علم نہیں کہ لیگ کی پرانی مینجمنٹ برقرار رہے گی یا نئی کا تقرر کیا جائے گا،بعض اونرز نے آپس میں رابطہ کر کے معاملات پر بات چیت کی ہے،انھیں سب سے زیادہ فکر براڈکاسٹنگ رائٹس پر ہے جس کیلیے متوقع رقم 75 ملین ڈالر سامنے آئی تھی، ان کی آمدنی کا زیادہ انحصار اسی پر ہوگا، اگر معاہدے سے قبل پلیئرز ڈرافٹ کا انعقاد ہوا تو متوقع رقم ملنے کا امکان کم ہوگا کیونکہ براڈ کاسٹر کی دلچسپی اسی پر ہوتی ہے کہ کتنے بڑے کھلاڑی ایونٹ میں آ رہے ہیں۔
واضح رہے کہ پی سی بی براڈکاسٹنگ آمدنی کا 85 فیصد حصہ فرنچائزز کو دیتا ہے مگر اس میں سے پروڈکشن کی رقم منہا کر لی جاتی ہے، ٹیموں کو اس پر بھی اعتراض ہے،ابھی بورڈ کو ٹائٹل اسپانسر شپ کا بھی نیا معاہدہ کرنا ہے۔
ادھر ذرائع کا کہنا ہے کہ احسان مانی ممکنہ طور پر 15 ستمبر کو پی ایس ایل گورننگ کونسل کے اجلاس کی صدارت کریں گے۔ انھوں نے اس کے سربراہ کی ذمہ داری سنبھال لی ہے، نجم سیٹھی کے مستعفی ہونے کے سبب گزشتہ ماہ کونسل کا اجلاس نہیں ہو سکا تھا، وہ فرنچائز مالکان کواپنے منصوبوں سے آگاہ اوریہ یقین دلائیں گے کہ چیئرمین کی تبدیلی سے ان پر کوئی فرق نہیں پڑے گا اور مفادات کا خیال رکھا جائے گا۔
ذرائع کا کہنا ہے کہ چیئرمین بورڈ بھی اچھی طرح یہ بات جانتے ہیں کہ اگر نئے معاہدوں میں ویلیو کے مطابق رقم نہ ملی تو اس سے ان کی ساکھ پر اثر پڑے گا، اس لیے وہ ان پر خصوصی توجہ دیں گے۔
واضح رہے کہ گذشتہ ماہ فرنچائزز نے پی سی بی کو خط ارسال کر کے میٹنگ کے حوالے سے وضاحت طلب کی تھی۔پی ایس ایل گورننگ کونسل میں چیئرمین بورڈ احسان مانی کے ساتھ سی او او سبحان احمد، سی ایف او بدر منظور خان، پروجیکٹ ڈائریکٹر نائلہ بھٹی، سینئر جی ایم مارکیٹنگ صہیب شیخ، جنرل منیجر لیگل سلمان نصیر، ہیڈ آف پلیئر ایکویزیشن اینڈ منیجمنٹ پی ایس ایل عمران احمد خان اور تمام فرنچائز اونرز شامل ہیں۔
ان میں سے نائلہ بھٹی کے حوالے سے صورتحال واضح نہیں ہے، وہ سابق چیئرمین نجم سیٹھی کے بیحد قریب تھیں اورگزشتہ دنوں چھٹیوں پر چلی گئی تھیں،البتہ اب دوبارہ ذمہ داریاں سنبھال لی ہیں، ابھی یہ واضح نہیں کہ ان کی جگہ نئے پروجیکٹ ڈائریکٹر کا تقرر کیا جائے گا یا وہی برقرار رہیں گی، اس پوسٹ کو پانے کیلیے پی سی بی کے بعض بااثر افسران بھی کوشاں ہیں۔

لاہور:(سپورٹس ڈیسک/ایمرا نیوز) جنوبی افریقی کھلاڑی اے بی ڈی ویلیئرز پی ایس ایل فور میں ان ایکشن ہوں گے۔
جنوبی افریقی بیٹسمین اے بی ڈی ویلیئرز نے ایک ویڈیو پیغام میں کہا کہ ”پاکستان سپر لیگ دنیا کی بہترین ٹی 20 لیگ بن چکی ہے، اس لیگ نے پاکستانی عوام کو لطف اندوز ہونے کے لیے بہت کچھ دیا، پی ایس ایل کے گزشتہ ایڈیشنز کے میچز دیکھ کر لطف اٹھایا تاہم اب پی ایس ایل 2019 اس سے مختلف ہوگا کیونکہ میں اس ایڈیشن میں آپ کو ایکشن میں نظر آﺅں گا۔“

اے بی ڈی ویلیئرز نے پیغام کے آخر میں اردو میں شائقین کا شکریہ بھی ادا کیا، چیئرمین پی سی بی احسان مانی نے بھی ڈی ویلیئرز کی پی ایس ایل میں شمولیت کو خوش آئند قرار دیا ہے۔

Bengaluru: Royal Challengers Bangalore’s AB de Villiers in action during an IPL 2018 match between Sunrisers Hyderabad and Royal Challengers Bangalore at M. Chinnaswamy Stadium in Bengaluru, on May 17, 2018. (Photo: IANS)

لاہور:(نیٹ نیوز/ایمرا نیوز) نومنتخب چیئرمین پی سی بی احسان مانی نے گزشتہ روز نیشنل کرکٹ اکیڈمی میں جاری پروگرامز پر بریفنگ لی۔
احسان مانی نے اکیڈمی کا دورہ کرتے ہوئے وہاں سہولیات اور سرگرمیوں کا جائزہ لیا،اس موقع پرگورننگ بورڈ میں شامل وزیر اعظم اور چیف پیٹرن عمران خان کے نامزد کردہ دوسرے حکومتی رکن ملک اسد علی خان اور چیف آپریٹنگ آفیسر سبحان احمد بھی ہمراہ تھے،این سی اے میں کرکٹ اکیڈمیز کے ڈائریکٹر مدثر نذر اور سینئر جنرل منیجر علی ضیاء نے پریزینٹیشن میں چیئرمین کو سرگرمیوں سے آگاہ کیا۔
سینئر جنرل منیجر آپریشنز مشتاق احمد نے بھی بریفننگ دی،آفیشلز نے اکیڈمی میں اب تک مکمل کی جانے والے پروگرامز اور ان کے نتائج کے بارے میں بتایا،مستقبل کے پلان اور سرگرمیوں کی تفصیلات بھی بتائی گئیں۔
ذرائع کے مطابق چیئرمین نے اکیڈمی کی کارکردگی پر اطمینان کا اظہار کرتے ہوئے نئے ٹیلنٹ کو نکھارنے کیلیے وضع کیے جانے والے پروگرامز پر پسندیدگی کا اظہار کیا۔ ان کا کہنا تھا کہ اکیڈمیز کو زیادہ فعال بنانے کیلیے مزید کام کیا جائے گا، کرکٹرز کی فٹنس اور مہارت بہتر بنانے کیلیے نہ صرف نیشنل کرکٹ اکیڈمی کی ضروریات پوری کی جائیں گی بلکہ دیگر شہروں میں اکیڈمیز بنانے کیلیے بھی کوشش ہوگی۔

(نیٹ نیوز/ایمرا نیوز) پی سی بی نے آل راؤنڈر محمد حفیظ کو منالیا۔ محمد حفیظ کے ٹیم سے ڈراپ ہونے کا معاملہ حل ہوگیا۔ بورڈ کی جانب سے محمد حفیظ کو پیغام دیا گیا کہ آپ کی ٹیم کو مزید ضرورت ہے، مستقبل میں موقع دیا جائے گا۔ محمد حفیظ نے پریس کانفرنس کرتے ہوئے کہا کہ پچھلے ایک دن اور اس سے بھی پہلے سے میرے حوالے سے میڈیا پر بہت سی خبریں آئیں جس میں یہ کہا گیا کہ میں کرکٹ سے ریٹائر ہو رہا ہوں۔ میں واضح کرنا چاہتا ہوں کہ کرکٹ سے ریٹائرڈ نہیں ہورہا، مجھ سے منسوب خبریں من گھڑت ہیں۔ میں ہمیشہ پاکستان کرکٹ بورڈ کے ساتھ ہوں اور ان کے ہر فیصلے کے بھی ساتھ ہوں۔

لاہور(سپورٹس ڈیسک/ایمرا نیوز) قومی ٹیم کے سابق فاسٹ بولرشعیب اختر نے چیئرمین پی سی بی کے مشیرکے عہدے سے استعفیٰ دے دیا۔
انہوں نے سوشل میڈیا پر پیغام جاری کرتے ہوئےکہا ہے کہ میں نے پی سی بی کے چیئرمین کے مشیر کے عہدے سے استعفیٰ دے دیا ہے جس کا اطلاق فوری طور پر ہوگا۔
شعیب اختررواں سال 17 فروری کو چیئرمین پی سی بی کے مشیر برائے کرکٹ افیئرز مقرر کئے گئے تھے۔
عہدہ سنبھالنے کے بعد ان کا کہنا تھا کہ ان اہم عہدوں کیلئے ان کا انتخاب باعث فخر ہے اور ان کی کوشش ہوگی کہ اسی طرح اپنی خدمات انجام دیں جیسے کہ وہ کھیل کے زمانے میں ادا کیا کرتے تھے۔

This is to announce that i have resigned from the post of Advisor to the Chairman #PCB effective immediately.@TheRealPCB
#ShoaibAkhtar

— Shoaib Akhtar (@shoaib100mph) September 6, 2018

واضح رہے نئی حکومت کے قیام کے بعد نجم سیٹھی نے چیئرمین پی سی بی کی عہدے سے استعفیٰ دے دیا تھا جس کے بعد احسان مانی اس عہدے پر فائز ہوگئے۔

لاہور:(نیٹ نیوز/ایمرا نیوز) ایشیا کپ سے ڈراپ کئے جانے پر آل راؤنڈر محمد حفیظ بھڑک اٹھے، کپتان، کوچ اورچیف سلیکٹر کے
کردار پر بھی تحفظات کا اظہار کردیا۔
پروفیسرسلیکشن کے امتحان میں فیل ہوکرایشا کپ سے باہرہوگئے،محمد حفیظ نے دلبرداشتہ ہوکر کرکٹ کو خیرباد کہنے کے حوالے سے سوچ بچار شروع کردی۔
محمد حفیظ آج سہ پہراہم پریس کانفرنس کرکے مستقبل کا لائحہ عمل واضع کریں گے۔
حفیظ نے ٹیم مینجمنٹ اور سلیکشن کمیٹی پر انگلیاں اٹھادیں،نومنتخب چیئرمین احسان مانی سے معاملے کو دیکھنے کی اپیل کردی۔
محمد حفیظ کا کہنا ہے کہ اس طرح کے رویئے سے بہتر ہے کرکٹ چھوڑ دوں،مناسب موقع دیں ،کارکردگی نہ دکھاؤں تو ڈراپ کر دیاجائے۔

لاہور(سپورٹس ڈیسک/ایمرا نیوز) قومی ٹیم کے اوپنر فخرزمان نے بھارت کے خلاف ایشیا کپ میچ میں چیمپئنز ٹرافی فائنل کی کارکردگی دہرانے کے عزم کا اظہار کیا ہے۔قذافی اسٹیڈیم میں جاری تربیتی کیمپ کے دوران میڈیا سے بات کرتے ہوئے فخر زمان کا کہنا تھا کہ ایبٹ آباد میں کنڈیشنگ کیمپ کا فائدہ ہوا، لاہور میں اچھی پریکٹس کا موقع مل رہا ہے جب کہ بھارت کے خلاف میچ میں چیمپئنز ٹرافی فائنل کی کارکردگی دہرانے کی پوری کوشش کروں گا۔
فخرزمان کا کہنا تھا کہ میری کوشش ہوتی ہے کہ ٹیم کے لیے لمبا اسکور کروں، انٹرنیشنل کرکٹ کا دباﺅ ہوتا ہے، بھارت کیخلاف میچ میں بھی دباﺅ ہوگا، اس روز بہتر کھیلنے والی ٹیم ہی جیتے گی۔ انہوں نے کہا کہ ویرات کوہلی ایک ورلڈ کلاس کھلاڑی ہیں تاہم امید ہے کہ ٹیم اچھی کارکردگی کا مظاہرہ کرتے ہوئے ٹائٹل اپنے نام کرنے میں کامیاب ہوجائے گی۔
ایک سوال کے جواب میں انہوں نے بتایا کہ بولنگ پریکٹس بھی کررہا ہوں اور ضرورت پڑنے پر بطور باﺅلر بھی اپنی صلاحیتوں کا اظہار کرسکتا ہوں۔یاد رہے کہ ایشیاءکپ کرکٹ ٹورنامنٹ 15 سے 28 ستمبر تک متحد ہ عرب امارات میں کھیلا جائے گا جس میں پہلی مرتبہ چھ ٹیمیں ایکشن میں دکھائی دیں گی، پاکستان،، بھارت،، سری لنکا،، بنگلہ دیش اور افغانستان نے براہ راست ایونٹ میں جگہ بنائی تھی جب کہ ہانگ کانگ، ملائیشیا، نیپال، اومان، سنگاپور اور متحدہ عرب امارات میں سے کوئی ایک ٹیم کوالیفائنگ مرحلہ عبور کر کے ایونٹ تک رسائی حاصل کرے گی۔

ٹیموں کو دو گروپس میں تقسیم کیا گیا ہے، پاکستان،، بھارت اور کوالیفائر ٹیم کو گروپ اے، بنگلہ دیش،، سری لنکا اور افغانستان کو گروپ بی میں رکھا گیا ہے، ہر گروپ سے دو ٹیمیں سپر فور مرحلے کیلئے کوالیفائی کریں گی جہاں پر چاروں ٹیمیں آپس میں مدمقابل ہوں گی اور دو ٹاپ ٹیموں کے درمیان فائنل کھیلا جائے گا۔ 15 ستمبر کو افتتاحی میچ میں سری لنکا کا مقابلہ بنگلہ دیش سے ہو گا، پاکستانی ٹیم 16 ستمبر کو کوالیفائر ٹیم کے خلاف مہم کا آغاز کرے گی، گرین شرٹس 19 ستمبر کو روایتی حریف بھارت کے آمنے سامنے ہوں گے، سپر فور مرحلے کے میچز 21 سے 26 ستمبر تک کھیلے جائیں گے، دو ٹاپ ٹیموں کے درمیان فائنل 28 ستمبر کو دبئی میں کھیلا جائےگا۔

لاہور:(سپورٹس ڈیسک/ایمرا نیوز) نئے چیئرمین پی سی بی احسان مانی کو مالیاتی اور انتظامی امور میں یکساں مہارت حاصل ہے۔
نئے چیئرمین پی سی بی احسان مانی 23مارچ 1945 کو راولپنڈی میں پیدا ہوئے، جڑواں شہروں میں تعلیمی مصروفیات کے ساتھ وہ مقامی کلب میں بطور آل راؤنڈر کھیلتے رہے،گریجویشن مکمل کے بعد اعلیٰ تعلیم کیلیے انگلینڈ گئے اور 1960 کے آخر تک وہاں مقیم رہے۔

احسان مانی پیشے کے اعتبار سے چارٹرڈ اکاؤنٹنٹ ہیں ،کرکٹ کے انتظامی امور میں انھوں نے 1989 میں قدم رکھا جب آئی سی سی میں پاکستان کے نمائندے منتخب ہوئے، ورلڈکپ 1996کے انعقاد میں انھوں نے اہم کردار ادا کیا۔
احسان مانی میگا ایونٹ کیلیے آئی سی سی کی ایڈوائزری کمیٹی میں پاکستان کے نمائندے تھے،اسی برس انھیں کونسل کی فنانس اور مارکیٹنگ کمیٹی کا چیئرمین منتخب کیا گیا، جون 2002 میں یہ عہدہ تحلیل کردیا گیا،وہ عالمی گورننگ باڈی کے نائب صدر بنے اور مختلف کمیٹیوں میں بھی اہم ذمہ داریاں انجام دیں۔
بھارت کے جگموہن ڈالمیا اور احسان مانی نے کروڑوں افرادکے پسندیدہ کھیل کرکٹ میں پیسہ لانے میں اہم کردار ادا کیا، قائدانہ صلاحیتوں اور مالیاتی امور میں مہارت کی بدولت مانی جون 2003 میں آئی سی سی کے صدر بن گئے اور 2006 تک اس عہدے پر برقرار رہے۔
احسان مانی نے متعدد بڑے بینکوں کے اہم عہدوں پر فرائض انجام دیے اور اس وقت بھی برطانیہ کے متعدد بینکوں اور ریئل اسٹیٹ کمپنیوں کے بورڈ آف گورنرز میں شامل ہیں، احسان مانی شوکت خانم میموریل ٹرسٹ کے بورڈ آف ٹرسٹیز کے رکن اور گلیات ڈیولپمنٹ اتھارٹی کے سربراہ بھی ہیں۔
آئی سی سی کی صدارت چھوڑنے کے باوجود وہ کرکٹ کے امور میں پی سی بی کی معاونت کرتے رہے،انھوں نے عالمی سطح پر کرکٹ پر اجارہ داری کیلیے بنائے گئے ’’بگ تھری‘‘ کی مخالفت کا سلسلہ جاری رکھا، وہ پی سی بی میں ذکا اشرف اور نجم سیٹھی کے درمیان اقتدار کیلیے رسہ کشی کے مخالف تھے، مالیاتی اور انتظامی امور میں بھی یکساں مہارت رکھنے والے احسان مانی پی سی بی اور پی ایس ایل میں بہتری لانے میں اہم کردار ادا کرسکتے ہیں۔

کراچی (سپورٹس ڈیسک/ایمرا نیوز) چھ ماہ بعد انٹر نیشنل کرکٹ میں واپس آنے کی کوشش کرنے والے آل رائونڈر عماد وسیم کو اس وقت دھچکہ لگا جب پیر کو پاکستان ٹیم کے فٹنس ٹیسٹ کی آزمائش میں عماد وسیم فٹنس ٹیسٹ پاس کرنے میں ناکام رہے۔ ان کی پاکستان ٹیم میں شمولیت فٹنس سے مشروط ہے۔ منگل کو ہیڈ کوچ مکی آرتھر اور سپورٹ اسٹاف عماد وسیم کو فٹنس ٹیسٹ پاس کرنے کے لئے ایک اور چانس دیں گے۔ حیران کن طور پر فٹنس ٹیسٹ میں سابق کپتان اور آل رائونڈر محمد حفیظ نے شرکت نہیں کی انہوں نے ٹیم انتظامیہ کو بتایا کہ وہ اپنی بہن کی علالت کی وجہ سے نہیں آسکتے تاہم شام کو حفیظ پریکٹس کرتے ہوئے دکھائی دیے۔ ذرائع نے امکان ظاہر کیا ہے کہ محمد حفیظ منگل کو فٹنس ٹیسٹ دیں گے۔ تاہم انہیں پاکستان ٹیم میں جگہ بنانے میں مشکل پیش آرہی ہے۔ ان کی جگہ ایشیا کپ کی ٹیم میں اوپنر شان مسعود شمولیت کے مضبوط امیدوار دکھائی دے رہے ہیں۔ قومی اکیڈمی میں پاکستان کرکٹ ٹیم کے فٹنس ٹیسٹ میں کپتان سرفراز احمد سپر فٹ قرار پائے اور دوسروں کے لئے مثال بن
گئے۔ سرفراز احمد نے کراچی میں گذشتہ دو ہفتے کلفٹن میں سخت ٹریننگ کی تھی جس کے بعد ان کے فٹنس لیول میں نمایاں بہتری دکھائی دی۔ یویو ٹیسٹ میں کھلاڑیوں کی اوسط اٹھارہ اعشاریہ نو رہی۔ کپتان سرفراز احمد کا ٹیسٹ میں کیریئر کا بہترین نتیجہ سامنے آیا۔ سرفراز احمد کا فٹنس لیول 18.4 فیصد رہا۔ یو یو ٹیسٹ میں کھلاڑیوں کیلئے کم سے کم 17.4 پوائنٹس حاصل کرنا لازمی تھا۔ حسن علی کی فٹنس میں بھی بہتری نظر آئی، انہوں نے 20 پوائنٹس حاصل کیے۔ فاسٹ بولر جنید خان کی یو یو ٹیسٹ میں ٹاپ 3 پوزیشن رہی۔ ذرائع شعیب ملک کے فٹنس لیول میں بھی بتدریج بہتری آرہی ہے،انہیں 17.8 پوائنٹس ملے۔ ذرائع کا کہنا ہے کہ دوسرے دن عماد وسیم کو مکی آرتھر ایک اور موقع دیں گے۔ عماد وسیم فروری میں پاکستان سپر لیگ کے دوران ان فٹ ہوئے تھے اس کے بعد وہ مسلسل کرکٹ سے باہر ہیں۔ کیمپ میں آنے سے قبل انہوں نے کیریبین لیگ میں شرکت کی۔ تاہم وہ فٹنس کو بہتر بنانے میں ناکام رہے ہیں۔ حفیظ نے ٹیسٹ نہیں دیا لیکن ان کا کیس کمزور دکھائی دے رہا ہے۔ منگل سے پاکستان ٹیم کا ٹریننگ کیمپ شروع ہوگا۔ کیمپ کا دوسرا مرحلہ قذافی اسٹیڈیم میں شروع ہوگیا ہے۔10 ستمبر تک جاری رہنے والی مشقوں میں کھلاڑیوں کے فٹنس ٹیسٹ لیے جائیں گے جس کے بعد بیٹنگ، بولنگ اور فیلڈنگ بہتر بنانے کیلیے مشقیں کی جائیں گی۔ قبل ازیں آرمی فزیکل ٹریننگ اسکول ایبٹ آباد میں تین روزہ کیمپ میں27 رکنی اسکواڈ کی فزیکل فٹنس بہتر بنانے کیلیے مشقیں کی گئیں، جس کے بعد پلیئرز کو شارٹ لسٹ کرتے ہوئے دوسرے مرحلے کیلیے ان کی تعداد 18 کر دی گئی۔ ٹورنامنٹ کے لئے پاکستانی ٹیم کا اعلان بھی منگل کو متوقع ہے اگر عماد وسیم فٹنس ٹیسٹ پاس نہ کر سکے تو محمد نواز ٹیم میں شامل ہوں گے۔ واضح رہے کہ اس سے قبل عمر اکمل اور یاسر شاہ کو پہلی بار فٹنس ٹیسٹ میں ناکامی کے بعد دوسرا موقع دیا گیا تھا۔ لاہورمیں شیڈول کیمپ کیلیے طلب کیے گئے کھلاڑیوں میں کپتان سرفراز احمد، شان مسعود، امام الحق، فخر زمان، محمد حفیظ، شعیب ملک، حارث سہیل، آصف علی، بابر اعظم، شاداب خان، محمد نواز، عماد وسیم، حسن علی، عثمان خان شنواری، محمد عامر، جنید خان، شاہین شاہ آفریدی اور فہیم اشرف شامل ہیں۔ ایشیا کپ 15ستمبر سے یو اے ای میں شروع ہوگا۔ گرین شرٹس اپنا پہلا میچ 16 ستمبر کو گروپ اے کی کوالیفائر ٹیم کے خلاف کھیلیں گے جبکہ 19ستمبر کو روایتی حریف بھارت سے مقابلہ شیڈول ہے۔

لاہور(سپورٹس ڈیسک/ایمرا نیوز) احسان مانی پاکستان کرکٹ بورڈ کے نئے چیئر مین منتخب ہو گئے ہیں ،ان کے مقابلے میں کسی امیدوار نے کاغذات نامزدگی جمع نہیں کرائے اور یوں وہ بلا مقابلہ منتخب ہو گئے، وہ آئی سی سی کے صدربھی رہ چکے ہیں۔

نیا چیئرمین منتخب کرنے کیلئےآج اس کا باقاعدہ طور پرطریقہ کار اختیار کرنا تھا لیکن مقابلے میں کوئی دوسراامیدوار نہیں تھا جس کی وجہ سے احسان مانی بلا مقابلہ چیئر مین منتخب ہو گئے ۔
احسان مانی اگلے تین سال تک بحیثیت چیئرمین کرکٹ بورڈ فرائض انجام دیں گے۔
عمران خان نے وزیر اعظم منتخب ہوکر احسان مانی کو کرکٹ بورڈ کا نیا چیئرمین نامزد کیا تھا،چیئر مین کی نامزدگی ملک کا وزیراعظم پیٹرن ان چیف ہونے کی حیثیت سے کرتا ہے۔ احسان مانی آئی سی سی کے صدربھی رہ چکے ہیں۔