Category کھیل

ماسکو(سپورٹس ڈیسک/ایمرا نیوز) فیفا ورلڈ کپ کل سے روس میں شروع ہورہا ہے، سینکڑوں فنکار فن کا مظاہرہ کرینگے، ٹیموں کی آمد کا سلسلہ جاری ہے۔ 41 مقامات سے پروازوں کی آمدورفت بھی معطل رہیگی۔میزبان شہروں کو دلہن کی طرح سجا دیا گیا ‘شہروں کے گرد 100 کلومیڑ کی حدود میں ڈرون کیمروں کا استعمال ممنوع ہوگا، آرمی سٹیڈیمز کے اطراف میں جیمرز بھی نصب کریگی، پولیس آفیسرزسٹیڈیمز میں تعینات کیے جائینگے۔ ہزاروں شائقین روس کا رخ کرینگے۔ افتتاحی تقریب کی تیاریاں مکمل کر لی گئیں۔ صدر پیوٹن کو فیفا فین کارڈ جاری کردیا گیا۔ سیاحوں کے لئے خصوصی میٹرو ٹرینیں چلا دی گئیں۔ٹکٹ کے حصول کے لئے مقامی شائقین کی لمبی لائنیں لگی ہوئی ہیں۔

کراچی:(سپورٹس ڈیسک/ایمرا نیوز) پی ایس ایل مکمل طورپر پاکستان منتقل کرنے کی تجویز مسترد ہوگئی البتہ8 سے زائد میچزکرانے پر اتفاق ہوگیا ہے۔

فرنچائزز کی جانب سے لاہور اور ملتان اسٹیڈیمز میں ہوٹل تعمیر کرنے کی پیشکش پر ایک کمیٹی غور کریگی، دوسری جانب پی سی بی فرنچائزز کی جانب سے عدم ادائیگی پر تنگ آ گیا، گذشتہ روز کے اجلاس میں ایک ٹیم نے مکمل ادائیگی کا چیک تھما دیا مگر دوسری ڈیفالٹر ہی رہی، اس پر اسے48 گھنٹوں میں رقم ادا کرنے یا معاہدہ ختم کرنے کی دھمکی دے دی گئی۔

تفصیلات کے مطابق پی ایس ایل فرنچائزز اور پی سی بی حکام کا اہم اجلاس گذشتہ روز لاہور میں ہوا، اس موقع پر یو اے ای میں لیگز کی بھرمار کے سبب مکمل پی ایس ایل پاکستان منتقل کرنے کی تجویز زیرغور آئی مگر اسے منظوری نہ مل سکی، حکام کے خیال میں ابھی ملک میں سیکیورٹی صورتحال ایسی نہیں کہ غیرملکی کھلاڑیوں کو مکمل ایک ماہ تک یہاں رکھا جا سکے،چند روز کی بات الگ ہوتی ہے،اس کے علاوہ انفرااسٹرکچر کی بھی کمی ہے، البتہ 8 سے زائد میچز یہاں ضرور کرائے جائیںگے، اس موقع پر فرنچائزز نے پی سی بی کو پیشکش کی کہ اگر حکام اجازت دیں تو وہ مل کر قذافی اسٹیڈیم لاہور اور ملتان اسٹیڈیم میں200 کمروں کا ہوٹل بنا دیں، جس پر یہ معاملہ غور کیلیے ایک کمیٹی کے سپرد کر دیا گیا، بورڈ حکام نے یہ بھی کہا کہ اگر حکومت، سیکیورٹی ایجنسیز اور سیاسی تنظیمیں مستقبل میں یکجا ہو کر کہیں کہ مکمل پی ایس ایل کو پاکستان لے آئیں تو ہم ایسا کر گذریں گے۔

میٹنگ میں پی ایس ایل فرنچائزز کی جانب سے عدم ادائیگی کا معاملہ بھی زیرغور آیا، بڑے ارمانوں سے لیگ کا حصہ بننے والی ایک ٹیم نے آخرکار واجب الادا رقم کا چیک جمع کرا ہی دیا، دوسری جانب ایک اہم ترین فرنچائز کے آفیشل بدستور مالی مسائل کا جواز پیش کرنے لگے، اس پر بورڈ نے انھیں48گھنٹوں کاالٹی میٹم جاری کرتے ہوئے کہا کہ اس دوران اگر مکمل ادائیگی نہ ہوئی تو معاہدہ ختم کردیا جائے گا۔ اس موقع پر پی ایس ایل کے میڈیا رائٹس سمیت دیگر معاملات دیکھنے والی ہر کمیٹی میں فرنچائزز کا ایک نمائندہ شامل کرنے پر بھی اتفاق ہو گیا۔ دریں اثنا پی سی بی ٹی10لیگ کیلیے محدود تعداد میں پلیئرز ریلیزکرے گا،کوچ مکی آرتھر اورچیف سلیکٹر انضمام الحق ٹیم کا مفاد دیکھ فیصلہ کرینگے کہ کسے جانے دیا جائے۔

لندن (سپورٹس ڈیسک/ایمرا نیوز) انگلینڈ اور آسٹریلیا کی کرکٹ ٹیموں کے درمیان پانچ ایک روزہ بین الاقوامی کرکٹ میچوں پر مشتمل سیریز کا پہلا میچ آج لندن میں کھیلا جائیگا۔ دونوں ٹیموں کے درمیان میچ دے اینڈ نائٹ ہوگا۔ دونوں ٹیموں کے کپتانوں نے سیریز میں کامیابی کے لئے بیانات دیئے ہیں اور توقع کی جا رہی ہے کہ شائقین کرکٹ کو کانٹے دار مقابلے دیکھنے کو ملیں گے ۔ واضح رہے کہ دونوں ٹیموں کے درمیان پانچ میچوں کی سیریز کا دوسرا میچ 16 جون کو کارڈف میں کھیلا جائیگا، سیریز کا تیسرا میچ 19 جون کو نوٹنگھم میں کھیلا جائیگا، سیریز کا چوتھا میچ 21 جون کو چیسٹرلی سٹریٹ میں کھیلا جائیگا جبکہ سیریز کا پانچواں اور آخری میچ 24 جون کو مانچسٹر میں کھیلا جائیگا۔ دونوں ٹیموں کے درمیان واحد ٹی ٹونٹی کرکٹ میچ 27 جون کو برمنگھم میں کھیلا جائیگا جو ڈے اینڈ نائٹ ہوگا۔

ایڈنبرا (سپورٹس ڈسیک/ایمرا نیوز ) پاکستان نے پہلے ٹی ٹوئنٹی میچ میں اسکاٹ لینڈ کو 48 رنز سے شکست دے دی۔ پاکستان کی جانب سے کپتان سرفراز احمد اور شعیب ملک نے عمدہ بیٹنگ کی۔ 89 رنز کی شاندار اننگز کھیلنے پر پاکستانی کپتان سرفراز احمد کو میچ کا بہترین کھلاڑی قرار دیا گیا۔ ہوم ٹیم جارحانہ آغاز کے بعد ٹیمپو برقرار نہیں رکھ سکی ۔ ابتدا میں پاکستانی بولرز نے پٹائی برداشت کرنے کے بعد اسکاٹ بیٹنگ لائن کو قابو کرلیا۔ اسپنرز شاداب خان ، محمد نواز اور فاسٹ بولر حسن علی نے ہوم ٹیم کو ٹارگٹ سے دور رکھا۔ شاداب نے 25 اور حسن نے 33 رنز دے کر دو جبکہ نواز نے 22 رنز دے کر ایک وکٹ لی۔ محمد عامر کے چار اوورز میں 45 رنز بنے، انہوں نے بھی ایک وکٹ لی۔ پاکستان کے چار وکٹ پر 204 رنز کے جواب میں اسکاٹ لینڈ کی ٹیم چھ وکٹ پر 156 رنز بناسکی۔ قبل ازیں پاکستان نے پہلے بیٹنگ کرتے ہوئے مقررہ 20 اوورز میں 4 وکٹ کے نقصان پر 204 رنز بنائے۔ اس سے قبل قومی ٹیم کے کپتان سرفراز احمد نے ٹاس جیت کر پہلے بیٹنگ کا فیصلہ کیا۔ پاکستان کے لیے فخرزمان اور احمد شہزاد نے ٹیم کو 33 رنزکا جارحانہ

آغاز فراہم کیا لیکن احمد شہزاد چوتھے اوور میں 14 رنز کی اننگز کھیل کر پویلین لوٹ گئے۔ حسین طلعت تیسرے نمبر پر بیٹنگ کے لیے آئے اور فخرزمان کے ساتھ ملکر اسکور بورڈ میں صرف 13 رنز کا ہی اضافہ کیا تھا کہ فخرزمان اپنی وکٹ گنوا بیٹھے انہوں نے دو چوکوں اور ایک چھکے کی مدد سے 21رنز بنائے۔ کپتان سرفراز احمد 46 پر دو وکٹ گرنے کے بعد کریز کا رخ کیا۔ وہ پراعتماد انداز میں کھیلے۔ اور حسین کے ساتھ مل کر 41 رنز کی اہم شراکت قائم کی تاہم حسین طلعت 16 گیندوں پر دو چوکوں کی مدد سے 18 رنز بناکر پویلین لوٹ گئے۔ اس موقع پر سرفراز کا ساتھ نبھانے کہنہ مشق شعیب ملک آئے اور اسکاٹ بولرز کے چھکے چھڑادیے۔ دونوں نے چوتھی وکٹ کے لیے 96 رنز کی جارحانہ شراکت داری قائم کی، اس دوران دونوں نے اپنی نصف سنچریاں مکمل کیں، شعیب ملک 27 گیندوں پر 53 رنز کی اننگز کھیل کر آؤٹ ہوئے، ان کی اننگز میں 5 چھکے بھی شامل تھے۔ کپتان سرفراز نے اپنے ٹی ٹوئنٹی کیریئر کی بہترین اننگز کھیلتے ہوئے ناقابل شکست 89 رنز بنائے جس میں 3 چھکے اور 10 چوکے شامل تھے۔ اسکاٹ لینڈ کی جانب سے ایلسڈیئر ایوانز 23 کے عوض تین وکٹ لے کر کامیاب ترین بولر ثابت ہوئے۔ بیرنگٹن نے ایک کھلاڑی کو آئوٹ کیا۔ بعدازاں ہدف کے تعاقب میں اسکاٹ لینڈ مقررہ اوورز میں 6وکٹ کے نقصان پر 156 رنز ہی بناسکی۔ اسکاٹ لینڈ کی جانب سے جارج منسی اور کائیل کوئٹزر نے 53 رنزکا آغاز فراہم کیا، کپتان کائیل نے 31 رنز پر محمد نواز کا شکار بنے، منسی کی وکٹ حسن علی کے حصے میں آئی وہ 25رنز بناکر آؤٹ ہوئے۔ جس کے بعد شاداب خان نے لگاتار دو کھلاڑیوں کو پویلین کی راہ دکھا کر میزبان ٹیم کی مشکلات میں اضافہ کیا۔ تیسرے نمبر پر بیٹنگ کے لیے آنے والے رچی بیرنگٹن صرف 3 رنز کے مہمان ثابت ہوئے اور کالم مکلاوڈ کی اننگز 12 رنز تک ہی محدود رہی۔مڈل آرڈر بلے باز ڈیلان بج نے مزاحمت کی کوشش کی لیکن محمد عامر نے ان کی مزاحمت 24 رنز پر ختم کردی۔ مائیکل لیسک اور میتھیو کراس نے چھٹی وکٹ کے لیے 43 رنز کی اہم شراکت قائم کرکے اسکور بورڈ کو آگے بڑھایا لیکن حسن علی نے کراس کو پویلین بھیج کر اس شراکت داری کا خاتمہ کیا، وہ 13 رنز ہی بناسکے جب کہ مائیکل لیسک 37 رنز پر ناٹ آؤٹ رہے۔دوسرا ٹی 20بدھ کو کھیلا جائے گا۔

ویب ڈیسک(میڈیا 92 نیوز) فیفا ورلڈ کپ میں ایک دن باقی رہ گیا ہے ایسے میں جعلی ویب سائٹس کے زریعے لوگوں سے ٹکٹوں کے نام پر پیسے بٹورنے کا سلسلہ ذوروشور سے جاری ہے۔
فیفا کے اعلیٰ عہدیداروں نے عوام کو خبردار کرتے ہوئے کہا ہے کہ ان ویب سائٹس کی جانب سے جاری کی جانے والی ٹکٹیں جعلی ہیں۔
’کروکس‘ نامی جعلی فیفا ویب سائٹ نے فینز کے ساتھ جعلسازی کرکے 23 ہزار پاؤنڈ (ساڑھے 36 لاکھ روپے) مالیت کے نقلی ٹکٹ فروخت بھی کردیے۔
انگلینڈ کے ٹیم کے کوالیفائر گروپ گیمز کے لیے ٹکٹ تین ہزار 200 پاؤنڈ (پانچ لاکھ روپے) میں جب کہ فائنل کا ٹکٹ 14 ہزار پاؤنڈ (22 لاکھ روپے) میں فروخت ہوا ہے۔
میڈیا 92 نیوزکی رپورٹ کے مطابق لوگوں کو یہ لالچ دی جارہی ہے کہ مہنگے ٹکٹ خریدنے والوں کو روسی سیاستدانوں اور تاجروں سے ملاقات کا موقع دیا جائے گا۔
فیفا نے صورتحال سے نپٹنے کے لیے ’ویاگوگو‘ نامی جعلی ویب سائٹ کے خلاف سویٹزرلینڈ میں قانونی چارہ جوئی کرنے کا فیصلہ کیا ہے۔
فیفا نے اعلان کیا ہے کہ ویب سائٹ سے خریدنے والوں کی ٹکٹیں کینسل کردی جائیں گی۔ فیفا کے اعلان کے کچھ دیر بعد ویاگوگو ویب سائٹ نے ٹکٹوں کی فروخت بند کردی۔

(سپورٹس ڈیسک/ایمرا نیوز)
پاکستان کرکٹ بورڈ کی جانب سے سنٹرک کنٹریکٹ کے کھلاڑیوں میں کمی کرنے کا فیصلہ کیا گیا ہےاس کے ساتھ ساتھ معاوضہ بھی بڑھایا جائے گا۔

پاکستان کرکٹ بورڈ نے انگلینڈ میں شیڈول کرکٹ ورلڈ کپ 2019 کیلئے مخصوص کھلاڑیوں کو ہی کنٹریکٹ دینے کا فیصلہ کیا ہے۔آنےوالے سال میں کھلاڑیوں کی تعداد بڑھانے کا فیصلہ کیا گیا ہے، کھلاڑیوں کی تعداد اب22 ہوگی۔

گذشتہ سال پینتیس کھلاڑیوں کو تیس جون دوہزار اٹھارہ تک سنٹرل کنٹریکٹ جاری کیے گئے تھے۔
رواں سال بورڈ نے ورلڈ کپ 2019 کیلئے مخصوص کھلاڑیوں کو ہی سنٹرل کنٹریکٹ دینے کا فیصلہ کیا ہے۔

کنٹریکٹ میں کھلاڑیوں کی تعداد محدود کرنے کی وجہ انٹرنیشنل ٹی ٹونٹی لیگز سے دور رکھنا ہے کیونکہ پی سی بی نے سنٹرل کنٹریکٹ یافتہ کھلاڑیوں کی دو سے زائد لیگز میں شرکت پر پابندی عائد کررکھی ہے۔

آئندہ سال کیلئے مخصوص کردہ سنٹرل کنٹریکٹ میں عمر امین، بلال آصف، آصف ذاکر، سمیع اسلم، شان مسعود، سہیل خان، عامر یامین اور محمد حسان کو کنٹریکٹ نہ ملنے کا امکان ہے۔

ایڈنبرا:(سپورٹس ڈیسک/ایمرا نیوز) پاکستان اور اسکاٹ لینڈ کے درمیان 2 میچز کی سیریز کا پہلا ٹوئنٹی20 انٹرنیشنل آج ایڈنبرا میں کھیلا جائے گا۔

پاکستان اور اسکاٹ لینڈ کے مابین 2ٹی ٹوئنٹی میچز کی سیریز کا پہلا مقابلہ منگل کو ایڈنبرا میں ہوگا،ون ڈے کرکٹ میں عالمی نمبر ون انگلینڈ کیخلاف غیر متوقع فتح حاصل کرنے والی میزبان ٹیم نے ٹی ٹوئنٹی رینکنگ میں سرفہرست گرین شرٹس کیلیے بھی خطرے کی گھنٹی بجا دی ہے۔

اسکاٹش ٹیم کی بیٹنگ زبردست فارم میں نظر آرہی ہے، کیلم میکلوڈ نے انگلینڈ کیخلاف 94گیندوں پر 140رنز کی ناقابل شکست اننگز کھیل کر فتح میں اہم کردار ادا کیا۔ میٹ کروس، کپتان کائیل کوئٹزر، رچی بیرنگٹن اور جارج منسی کا بیٹ بھی خوب چل رہا ہے، مارک واٹ، الیسڈیئر ایوانز اور سفیان شریف ہوم کنڈیشنز میں مہمان بیٹنگ کیلیے مشکلات پیدا کرسکتے ہیں۔
دوسری جانب پاکستان ٹیم کے چند کھلاڑی آئرلینڈ اور انگلینڈ کیخلاف ٹیسٹ میچز کے بعد کنڈیشنز سے تو واقف ہیں تاہم خود کو مختصر فارمیٹ سے ہم آہنگ کرنا ایک چیلنج ہوگا،فخرزمان، انجرڈ بابر اعظم کا خلا پُرکرنے والے حارث سہیل اور کپتان سرفراز احمد پہلے سے ہی انگلینڈ میں موجود تھے۔

پاکستان سے تازہ کمک بھی پہنچ چکی،احمد شہزاد، فخرزمان کے ساتھ اننگز کا آغاز کرسکتے ہیں،شعیب ملک کا تجربہ بھی ٹیم کے کام آئے گا،فہیم اشرف اورحسین طلعت آل رائونڈ کارکردگی دکھا سکتے ہیں جب کہ جارح مزاج آصف علی بھی سلیکشن کیلیے دستیاب ہونگے۔

محمد عامر،حسن علی، راحت علی اور شاہین آفریدی میں سے پیس بیٹری کا انتخاب مشکل فیصلہ ہوگا،شاداب خان بیٹ اور اسپن بولنگ دونوں کی مددسے ٹیم کے کام آسکتے ہیں۔پاکستان کی پوری کوشش ہوگی کہ اس فارمیٹ میں اپنے تجربے سے اسکاٹ لینڈ کا اعتماد متزلزل کردے،ایڈنبرا میں پچ بیٹنگ کیلیے سازگار ہوگی، گذشتہ روز بارش کے سبب پاکستانی ٹیم کا پریکٹس سیشن جلد ختم ہو گیا۔

میچ کے دوران بھی موسم کی مداخلت کا امکان موجود ہوگا۔میڈیا سے بات چیت کرتے ہوئے کپتان سرفراز احمد نے کہا کہ انگلینڈ کیخلاف تاریخی فتح پر میزبان ٹیم کو مبارکباد پیش کرتا ہوں۔

اتوار کو اسکاٹ لینڈ کا دن تھا، کھلاڑیوں نے بیٹنگ، بولنگ اور فیلڈنگ میں بہترین کارکردگی پیش کی،ہمارے لیے یہ ایک سبق ہے کہ انٹرنیشنل کرکٹ میں کسی بھی حریف کو آسان نہیں سمجھنا چاہیے، ہمیں اسکاٹ لینڈ کے خلاف کھیلنے کا تجربہ نہیں، کھلاڑی نئے ہیں اور ہوم گرائونڈ کا سب کو ایڈوانٹیج بھی حاصل ہوتا ہے، ٹی ٹوئنٹی فارمیٹ بھی ایسا ہے کہ میدان میں کوئی بھی ٹیم حیران کن کارکردگی پیش کرسکتی ہے۔

حال ہی میں افغانستان نے بنگلہ دیش کو 3-0سے کلین سوئپ کیا، اس لیے کوئی بھی غلطی نہیں کی جاسکتی،ہمیں پوری توجہ کھیل پر مرکوز رکھنا ہوگی۔انھوں نے کہا کہ اسکاٹ لینڈ کو بڑی ٹیموں کیخلاف ایکشن میں آنے کے مواقع ملتے رہے تو کھیل نکھرتا جائے گا،البتہ میں آئی سی سی کی جانب سے ورلڈکپ کو صرف 10ٹیموں تک محدود کرنے کے فیصلے پر رائے نہیں دے سکتا۔

اسکاٹ لینڈ کے کوچ گرانٹ بریڈبرن نے کہا کہ ون ڈے میں عالمی نمبر انگلینڈ کے بعد ٹی ٹوئنٹی میں ایک اور سرفہرست ٹیم کو زیر کرنے کا ہمیں جادوئی موقع مل رہا ہے،اس کا بھرپور فائدہ اٹھانے کی کوشش کرینگے۔

(سپورٹس ڈیسک/ایمرا نیوز)
لیونل میسی نے ورلڈکپ کے بعد ریٹائرمنٹ پرغورشروع کردیابیونس آئرز(11جون، 2018)ارجنٹیناکے سپراسٹار لیونل میسی نے ورلڈکپ کے بعد ریٹائرمنٹ پرغورشروع کردیاہے،اس سے قبل انھوں نے2016 میں بھی ریٹائرمنٹ کااعلان کیاتھالیکن عوامی دباؤ کے بعدفیصلہ واپس لے لیاتھا۔ارجنٹینا کے فٹبال ٹیم ورلڈکپ میں شرکت کے لئے روس پہنچ گئی ہے۔ جہاں شائقین نے ٹیم کابھرپور استقبال کیا۔میگاایونٹ کے بعد لیونل میسی کی ارجنٹیناٹیم کی نمائندگی غیریقینی ہے۔گذشتہ ورلڈکپ دوہزارچودہ میں جرمنی نے میسی کی ٹیم ارجنٹینا کوشکست دیکر چوتھی مرتبہ عالمی فٹبال کااعزاز حاصل کیاتھا۔لیونل میسی کاکہنا ہے کہ وہ نہیں جانتے کہ ارجنٹینا کی ٹیم میں ان کا مستقبل کیاہے۔ وہ ریٹائرمنٹ پرغورکررہ ہیں۔لیکن اس کا انحصار ورلڈکپ میں ٹیم کی کارکردگی پرہوگا۔ارجنٹینا16جون کو ماسکو میں ورلڈکپ کی نووارد ٹیم آئس لینڈ کےخلاف اپنی مہم کا آغاز کرے

ماسکو ( ایمرا نیوز ) کرسٹیانو رونالڈو، لیونل میسی، نیمار محمد صلاح، میسوت اوزل، پال پوگبا، گریزمین، ڈیوڈ سلوا، ہیمز روڈریگوئز جیسے کھلاڑی روس پہنچ گئے ہیں۔ ورلڈ کپ فٹ بال کا جنون عروج پر ہے۔ٹیموں کی روس آمد جاری ہے۔ دو روز بعد کھیلوں کا سب سے بڑا فیسٹول ماسکو میں میزبان روس اور سعودی عرب کے درمیان میچ سے شروع ہوجائے گا۔ دنیا بھر کی نظریں اپنے فیورٹ اسٹار اور ٹیموں پر لگی ہوئی ہیں۔ کرسٹیانو رونالڈو کی یورپی چیمپئن ٹیم پرتگال ، میسی کی ارجنٹینا، نیمار کی برازیل اور دفاعی چیمپئن جرمنی سب ہی ٹائٹل کیلئے فیورٹس میں شامل ہیں۔ مصر کی تمام ترامیدیں محمد صلاح سے وابستہ ہیں، تاہم ان کی شرکت اب تک غیریقینی ہے۔ مصری کھلاڑیوں نے روس پہنچ کر اتوار کو باقاعدہ پریکٹس کا آغاز کردیا لیکن صلاح نے پریکٹس میں شرکت نہیں کی، تاہم وہ میگا ایونٹ میں کھیلنے کیلئے پرعزم ہیں۔ رونالڈو نے البتہ ٹیم کے ساتھ ٹریننگ اور پریکٹس میں شرکت کی، انہیں دیکھ کر وہاں موجود درجنوں پرستاروں میں خوشی کی لہر دوڑ گئی۔ پرتگالی ٹیم آئندہ جمعہ

کو سابق عالمی چیمپئن اسپین کے خلاف سوچی میں اپنی مہم شروع کرے گی۔ میگا ایونٹ میں ان کی امیدوں کا محور بلاشبہ رونالڈو ہی ہوں گے۔ عالمی نمبر دو اور پانچ بار کی چیمپئن برازیل کو اس بار بھی فیورٹ قرار دیا جارہا ہے۔ اعدادو شمار میں بھی برازیل کے چانس کافی بہتر دکھائی دیتے ہیں۔ لیکن برازیل کو 2014 عالمی کپ میں جرمنی کے ہاتھوں 7-1 سے عبرت ناک شکست کا زخم بھلانا ہوگا۔ اس کے حوصلہ افزا بات نیمار کی میدانوں میں واپسی ہے۔ انہوں نے خود کو ویسے تو 80 فیصد فٹ قرار دیا ہے لیکن وہ برازیل کے آخری وارم اپ میچ میں کروشیا کے خلاف بطور متبادل میدان میں اترے اور گول بھی داغا۔ 26سالہ نیمار اب ملک کیلئے 54 انٹرنیشنل گول اسکور کرچکے ہیں ۔ اتوار کو انہوں نے برازیل کی آسٹریا کے خلاف 3-0 کی فتح میں بھی گیند کو جال کی راہ دکھائی۔ ان کے ساتھ کوٹنہو اور گبریئل جیسس نے بھی ایک ایک گول کیا۔ نیمار برازیل کیلئے ٹاپ اسکوررز روماریو، رونالڈو اور پیلے کے قریب ہیں۔ برازیلی ٹیم کا نیمار کے ساتھ کوٹنہو اور ایلیسن پر بھی کافی انحصٓار ہوگا۔ ٹورنامنٹ میں فرانس کی ٹیم بھی کسی سے کم نہیں۔ اسے پال پوگبا، ایٹوئن گریزمین،ایمباپے اور ڈیمبلیلے جیسے اسٹارز کی خدمات حاصل ہیں۔ یہ پلیئرز اگر اپنی اہلیت کے مطابق کھیل پیش کرنے میں کامیاب ہوئے تو فرنچ سائیڈ کو روکنا بہت بڑا چیلنج ہوسکتا ہے۔ عالمی چیمپئن جرمنی انٹرنیشنل رینکنگ میں بھی نمبر ون ہے۔ اس کے پاس میسوت اوزل، جوشوا کیمیچ، لیون گورٹزکا جیسے نوجوان اور باصلاحیت کھلاڑی بھی موجود ہیں،منیجر جوکھیم لیوف اچھی جانتے ہیں کہ ان کی ٹیم کا راستہ روکنے کیلئے حریفوں نے زبردست حکمت عملی بنائی ہوگی۔ انہیں یہ بھی علم ہوگا کہ 1962 میں سوائے برازیل کے کوئی اور ٹیم آج تک ورلڈ کپ کا دفاع نہیں کرسکی ہےاس کی پیش نظر انہوں نے کھلاڑیوں کو پیغام دیا ہے کہ انہیں دوبارہ چیمپئن بننا ہے تو سپر ہیروز کی طرح کھیلنا ہوگا۔ اسپین کو بھی ٹورنامنٹ میں ہرگز نظر انداز نہیں کیا جاسکتا ۔ 2014 ورلڈ کپ اور 2016 یورپین کپ میں ابتدائی مراحل سے باہر ہونے کے بعد اب ہسپانوی ٹیم سنبھل چکی ہے۔ اب اسپینش سائیڈ میں کئی نوجوان کھلاڑی آگئے ہیں۔ وہ کچھ کردکھانے کیلئے پرعزم ہیں۔ ورلڈ کپ کوالیفائنگ رائونڈ اور وارم اپ میچز میں اسپین نے شاندار کارکردگی پیش کرکے اپنے عزائم ظاہر کردیے ہیں۔ ڈیوڈ سلوا کی کارکردگی ورلڈ کپ میں اسپین کیلئے بہت اہم ہوگی، کوالیفائنگ رائونڈ میں پانچ گولز کرکے انہوں نے اپنی فارم کا ثبوت پیش کیا ہے۔ میسی کی ٹیم ارجنٹینا کو ماہرین کسی بھی طرح آسان نہیں لے رہے۔ 2014 کی فائنلسٹ ٹیم نے کوالیفائنگ رائونڈ میں بھی زیادہ متاثر کن کارکردگی نہیں دکھائی لیکن میسی کی موجودگی میں فارورڈ لائن بہت خطرنا ثابت ہوسکتی ہے۔ ارجنٹینا نے گذشتہ ہفتے اسرائیل کے خلاف اپنی وارم اپ میچ منسوخ کیا تھا۔

ایڈنبرا:(سپورٹس ڈیسک/ایمرا نیوز) اسکاٹ لینڈ نے پاکستان کیلیے خطرے کی گھنٹی بجادی، واحد ون ڈے میں سنسنی خیز مقابلے کے بعد انگلینڈ کو 6 رنز سے شکست دے دی۔

اسکاٹ لینڈ نے انگلینڈ کو واحد ون ڈے میں دلچسپ مقابلے میں 6 رنز سے شکست دے کر پاکستان کیلیے خطرے کی گھنٹی بجادی ہے جس سے اس نے منگل اور بدھ کو دو ٹوئنٹی 20 میچز کی سیریز کھیلنی ہے۔

372 رنز ہدف کے تعاقب میں جونی بیئر اسٹو کے لاٹھی چارج کی بدولت انگلینڈکو پہلی وکٹ سے 129 رنز کی بنیاد نصیب ہوئی، اس دوران جیسن روئے 34 رنز بناکر مارک ویٹ کی گیند پر ان کا ہی کیچ بن گئے، دوسرے اینڈ پر موجود جونی بیئر اسٹو نے ہارڈ ہٹنگ کا مظاہرہ جاری رکھتے ہوئے صرف 59 بالز کا سہارا لیتے ہوئے 105 رنز بنائے، انھیں برنگٹن نے مونسی کی مدد سے قابو کیا، اس دوران انھوں نے 6 چھکے اور 12 چوکے جڑے۔

جوئے روٹ 29 رنز بناکر رن آئوٹ ہوگئے، کپتان ایون مورگن بھی صرف 20 رنز کے مہمان ثابت ہوئے، وہ ایوانز کی گیند کی کوئیٹزر کا کیچ بنے، الیکس ہیلز نے برنگٹن کی گیند پر ایوانز کا کیچ بننے سے قبل 3 چھکوں اور اتنے ہی چوکوں کی مدد سے 56 گیندوں پر 52 رنز بنائے، سام بلنگز (12) کو ویٹ نے کوئیٹزر کا کیچ بنایا، ڈیوڈ ویلی (7) ایوانز کا شکار بنے، کیچ کراس نے تھاما، معین علی 33 بالز پر 46 رنز بناکر لانگ آن پر مونسی کا کیچ بنے، کامیاب بولر ویٹ تھے۔

سیکنڈ لاسٹ اوور میں عادل (5) رن آئوٹ ہوئے، آخر میں مارک ووڈ (1)کو صفیان شریف نے ایل بی ڈبلیو کرکے انگلش اننگز کا 365 پر اختتام کردیا۔ اس سے قبل کالم میک لیوڈ کی شاندار ناقابل شکست سنچری نے اسکاٹ لینڈ کو 5 وکٹ پر ان کے ریکارڈ مجموعے 371 تک پہنچایا، اس سے قبل اسکاٹش سائیڈ کا 50 اوورز کی کرکٹ میں سب سے بڑا مجموعہ 9 وکٹ پر 341 رنز تھا جوکہ اس نے نان ٹیسٹ نیشن کینیڈا کے خلاف چار برس قبل کرائسٹ چرچ میں اسکور کیا تھا۔ ۔ میک لیوڈ 140 رنز پر ناٹ آئوٹ رہے۔

ٹاس انگلش کپتان ایون مورگن نے جیت کر میزبان سائیڈ کو پہلے بیٹنگ کی دعوت دی جس نے چھوٹے گرائونڈ کا فائدہ اٹھاتے ہوئے تیز کھیلنے کی کوشش کی مگر 15 اوورز میں 107 رنز کے دوران اس کی یکے بعد دیگر دو وکٹیں گرگئیں، اوپنرز میتھیو کراس اور کپتان کائیل کوئیٹزر نے ٹیم کو 103 رنز کا اسٹینڈ فراہم کیا تاہم عادل رشید نے کوئیٹزر کو 58 رنز پر وکٹ کیپر سام بلنگز کا کیچ بنوا کر اپنی ٹیم کو خوشی منانے کا موقع فراہم کیا، اگلے اوور میں لیام پلنکٹ نے بھی بلنگز کے ہی تعاون سے دوسرے اوپنر کراس کو 48 رنز پر میدان بدر کیا۔

اب وکٹ پر میک لیوڈ اور برنگٹن یکجا ہوئے، دونوں نے مجموعے کو 200 تک پہنچایا ہی تھا کہ پلنکٹ نے برنگٹن کو پویلین واپس بھیج دیا، جوئے روٹ کا کیچ بننے سے قبل انھوں نے 39 رنز بنائے، میک لیوڈ کے قدم نہیں ڈگمگائے بلکہ انھوں نے جارج مونسی کے ساتھ اسکور بورڈ کو متحرک رکھا، ان دونوں کے درمیان چوتھی وکٹ کیلیے 107 رنز کی شراکت ہوئی، جس کا خاتمہ عادل رشید کے ہاتھوں ہوا، انھوں نے ووڈ کی مدد سے مونسی کو 55 رنز پر قابو کیا۔

آخری اوور میں مارک ووڈ نے ڈیلان بوج (11) کو بولڈ کرکے اسکاٹش ٹیم کی گرنے والی وکٹوں کی تعداد 5 کی تاہم میک لیوڈ کی کاوش کی بدولت میزبان سائیڈ 5 وکٹ پر ہی 371 رنز بنانے میں کامیاب رہی۔

29 سالہ میک لیوڈ نے سنچری 70 بالز پر مکمل کی، یہ ان کی ٹاپ لیول پر ساتویں ایک روزہ سنچری ہے تاہم کسی بھی متحرک ٹیسٹ نیشن کے خلاف انھوں نے پہلی بار تھری فیگر اننگز کا کارانہ انجام دیا ہے، یہ انگلینڈ کے خلاف بھی کسی اسکاٹش بیٹسمین کی پہلی سنچری شمار ہوئی ہے، مجموعی طور پر انھوں نے 94 بالز کا سامنا کیا جن میں سے 16 کو چوکے اور 3 کو چھکے کیلیے بائونڈری کے باہر بھیجا۔ عادل رشید اور لیام پلنکٹ نے 2،2 وکٹیں لیں۔