Category تعلیم

لاہور (ایمرا نیوز/رپورٹ‌ سبط اعوان سے)

یونیورسٹی آف سنٹرل پنجاب فیکلٹی آف میڈیا اینڈ کمیونیکیشن اسٹڈیز اور اجوکا تھیٹر کے درمیان ایم او یو پر دستخط کی تقریب یوسی پی میں منعقد ہوئی۔تقریب میں ڈین یوسی پی میڈیا سکول ڈاکٹر تیمور الحسن ،اجوکا تھیٹر کے ایگزیکٹو ڈائریکٹر شاہد ندیم ،ڈپٹی ڈائریکٹر نروان ندیم،فیکلٹی ممبران اور طلباوطالبات کی بڑی تعداد نے شرکت کی ۔

مفاہمت کے مطابق دونوں ادارے پرفارمنگ آرٹس اور تھیٹر کے فروغ کیلئے دو طرفہ تعاون اور اشتراک کو فروغ دیں گے۔ڈاکٹر تیمور الحسن اور شاہد ندیم نے اس موقع پر مفاہمتی یاداشت کا تبادلہ کیا اور اہم امور پر تفصیلی تبادلہ خیال کیا۔اجوکا تھیٹرکے ڈائریکٹرز کو یوسی پی ٹی وی اور ایف ایم ریڈیو کے اسٹوڈیوز اور پروڈکشن ہاؤس کا بھی دورہ کروایا گیا۔ مہمانوں نے طلباوطالبات کے کام کے معیار اور میڈیا سکول میں جدید سہولیات و انفراسٹرکچرکے معیار کو سراہا۔

(ایمرا نیوزآن لائن) صبح سویرے اسکول جانے والے طلبہ اکثر جلد بازی میں ناشتہ کیے بغیر ہی اسکول چلے جاتے ہیں اور کچھ بچوں کا صبح ناشتہ کرنے کا دل نہیں کرتا لیکن طلبہ کو اس بات کا اندازہ نہیں یہ عمل ان کی کارکردگی کو متاثر کرتا ہے۔ ہمیں یہ ایک عام سی بات لگتی ہے کہ ناشتے کے بغیر اسکول جانے سے کوئی خاص فرق نہیں پڑتا ہوگا لیکن برطانیہ میں کی گئی حالیہ تحقیق نے اس حوالے سے ایک انکشاف کیا ہے۔

تحقیق کے بعد ماہرین نے یہ نتیجہ اخذ کیا کہ وہ بچے جو صبح بغیر ناشتے کے اسکول جایا کرتے ہیں ان کے ’جی سی ایس ای‘ (جنرل سرٹیفیکیٹ آف سیکنڈری اسکول) گریڈز (نتائج) ان بچوں کے مقابلے میں کم ہوتے تھے جو کہ اسکول ناشتہ کر کے جایا کرتے تھے۔ ماہرین نے بتایا کہ سیکنڈری اسکول کے وہ طلبہ جو روزانہ ناشتہ کرکے اسکول جاتے تھے ان کے گریڈ ان بچوں کے مقابلے میں دو گنا زیادہ تھے جو کہ ناشتہ کیے بغیر اسکول آتے تھے۔

یہ تحقیق برطانیہ کی یونیورسٹی آف لیڈز کی جانب سے کی گئی جس کے بعد ماہرین نے بتایا کہ ناشتہ کیے بغیر اسکول جانےوالے بچوں کی تعداد میں روز بروز اضافہ ہوتا جارہا ہے۔ یارکشائر کے اسکولوں اور کالجوں میں طلبہ کا سروے کرنے والے ماہر تعلیم انگلینڈ کے ہر سرکاری اسکول میں طلبہ کو مفت ناشتے دینے کا مطالبہ بھی کیا ہے۔ فی الحال برطانیہ میں چیریٹیز میجک بریکفاسٹ اور فیملی ایکشن حکومت کے مالی تعاون سے معاشرتی اور معاشی طور پر پسماندہ علاقوں میں 1،800 سے زائد اسکولوں کے طلبہ کو ناشتہ فراہم کرتی ہے۔

یونیورسٹی آف لیڈز اسکول آف سائیکالوجی کی تحقیق کے سربراہ ڈاکٹر کیٹی ایڈولفس نے کہا ہمارے مطالعے سے پتا چلا ہے کہ دماغ کو کارکردگی کرنے کے لیے ایندھن یعنی غذا کی ضرورت ہوتی ہے اور اگر طلبہ بغیر ناشتے کے اسکول جائیں گے تو یہ طلبہ کے لیے نقصان کا باعث ہوگا۔ ڈاکٹر کیٹی ایڈولفس نے مزید بتایا کہ ہم اس حوالے سے پہلے بھی ایک تحقیق کر چکے ہیں جس سے یہ بات ثابت ہوئی تھی کہ ناشتہ کرکے جانے والے بچوں کی کارکردگی زیادہ بہتر ہوتی ہے جس سے ان کے امتحانی نتائج پر مثبت اثر پڑتا ہے۔

ماہرین نے بتایا کہ بچے جب ناشتہ کرکے آتے ہیں تو ان کے جسم کو وہ تمام غذائی اجزاء ملتے ہیں جس سے وہ بہتر کارکردگی دکھا سکتا ہے اور اس سے جلد چیزوں کو سمجھنے میں بھی مدد ملتی ہے۔

(ایمرا نیوزآن لائن) اسرائیلی سفیر دانی دایان “فلسطین پر اسرائیل کے قبضے کی قانونی حکمت عملی” کے عنوان سے یونیورسٹی میں لیکچر دینے کے لیے 13 نومبر کو مدعو تھے۔

اس دوران ہال طالبعلوں سے کھچا کھچ بھرا ہوا تھا لیکن جیسے ہی اسرائیلی سفیر کو ڈائس پر طلب کیا گیا تو تمام طلبہ پلے کارڈز اٹھائے اچانک اپنی سیٹوں سے کھڑے ہوئے اور ہال سے اجتماعی طور پر واک آوٹ کر گئے۔ اس واقعے کی ویڈیو اس خبر کے شروع میں ملاحظہ کریں۔

(ایمرا نیوزآن لائن) امتحان کے دنوں میں طلبہ تناؤ اور دباؤ کا شکار ہوجاتے ہیں اور اس تناؤ کو کم کرنے کے لیے ماہرین نے بے شمار طریقے بتائے ہیں جس میں پالتو جانور کے ساتھ وقت گزارنا اور یوگا شامل ہے۔

ان تمام تر طریقوں کے بارے میں ہم پہلے سن چکے ہوں گے لیکن ریڈباؤڈ یونیورسٹی نے امتحان کے دنوں میں طلباء کے تناؤ کو کم کرنے کے لیے ایک عجیب و غریب طریقہ اپنایا ہوا ہے نیدرلینڈ کے قدیم شہر نجیمیگین کی ریڈباؤڈ یونیورسٹی نے امتحان کے دنوں میں طلبہ کے اندر تناؤ کی کیفیت دور کرنے کے لیے ایک کھلی قبر تیار کی ہوئی ہے، اسٹریس کو دور کرنے کا یہ طریقہ سننے میں کافی خطرناک اور عجیب لگتا ہے۔

اس یونیورسٹی میں ایک کھلی قبر تیار کی گئی ہے جو کہ امتحان کے دنوں میں تناؤ کی کیفیت کو کم کرنے کے لیے بنائی گئی ہے، یونیورسٹی کے بے شمار طلبا و طالبات یہاں جانے کے خواہش مند ہوتے ہیں۔اس قبر کے اندر ایک مختصر پیغام ’عجیب رہنا‘ بھی لکھا ہوا ہے، ریڈباؤڈ یونیورسٹی میں زیر تعلیم طلبہ کا کہنا ہے کہ یہ پروجیکٹ یونیورسٹی میں اتنا مقبول ہے کہ انتظامیہ کو یہاں جانے والوں کا نام ویٹنگ لسٹ یعنی انتظار کرنے کی فہرست میں ڈالا جاتا ہے کیونکہ خواہش مند طلبہ کی تعداد کافی زیادہ ہے۔

ایک طالب علم کا کہنا تھا کہ میں اور میرا ایک اور دوست اس کھلی قبر میں اگلے ہفتے جانے والے تھے مگر ہمیں یہ بات معلوم ہوئی کہ یہاں جانے کے لیے پہلے ہی بہت لوگوں نے اپنا نام ویٹنگ لسٹ میں لکھوا رکھا تھا اور ہمیں فی الحال اس کھلی قبر میں جانے کا موقع نہیں ملا مگر ہم یہاں ضرور جائیں گے۔ اس قبر کا نام ’Purification Grave‘ ہے جس میں طلبہ کو اوڑھنے کے لیے ایک کمبل اور یوگا کرنے کے لیے میٹ بھی فراہم کیا جاتا ہے، کھلی قبر میں جانے والے طلبہ کو موبائل فون اور کتابیں لے جانا سختی سے منع ہے جب کہ نوجوان طلبہ یہاں اپنے بارے میں، قدرت کے بارے میں اور اپنی آنے والی زندگی کے حوالے سے سکون سے سوچ سکتے ہیں۔

طلبہ کی عبادت گاہ میں فرائض سرانجام دینے والے جان ہیکنگ اس پروجیکٹ کے بانی بھی ہیں اور ان کا کہنا ہے کہ یہ پروجیکٹ طلبہ کو اپنے ساتھ پرسکون اور اکیلے وقت گزارنے کے لیے بنایا گیا ہے۔ اس پروجیکٹ کے پوسٹرز یونیورسٹی میں جگہ جگہ لگائے گئے ہیں جس پر ایک لاطینی کہاوت ’یاد رکھیں آپ کو مرنا بھی ہے‘ لکھی ہوئی ہے۔ کھلی قبر میں جانے کا تجربہ طلبہ کو 30 منٹ سے لے کر 3 گھنٹے تک کی پیشکش کرتا ہے۔

پاکستانی فلم (ایمرا نیوزآن لائن) اور شوبز انڈسٹری کی معروف اداکارہ نیلم منیر نے سوشل میڈیا پرایک پوسٹ شیئر کی جس میں انہوں نے بتایا کہ وہ خیبر پختونخوا کے نئے تعلیمی نظام سے بے حد متاثر ہوئی ہیں۔

اداکارہ نے اپنے انسٹاگرام اکاؤنٹ پر اپنے آبائی صوبے خیبر پختونخوا میں ایک تصویر اور ویڈیو شیئر کی جس میں دیکھا جا سکتا ہے کہ نیلم منیر روایتی لباس میں ملبوس ہیں اور انہوں نے سفید رنگ کی چادر بھی اوڑھ رکھی ہے۔ نیلم منیر نے اس تصویر اور ویڈیو کے ساتھ ایک کیپشن بھی لکھا جس میں انہوں نے خیبرپختونخواہ کے تعلیمی نظام کی تعریف کی۔

اداکارہ نے کیپشن میں لکھا کہ ’پشاور میں مجھے گھر جیسا محسوس ہوتا ہے، میں خیبر پختونخوا کے نئے تعلیمی نطام سے بے حد متاثر ہوئی ہوں‘۔ انہوں نے مزید لکھا کہ ’یہ دیکھ کر مجھے بہت اچھا محسوس ہورہا ہے کہ یہاں کہ بچے مفت میں بہترین تعلیم حاصل کر رہے ہیں جب کہ ان اسکول کے اساتذہ بھی خیبر پختونخوا کو بہتر طور پر تبدیل کرنے کے لیے پُرعزم ہیں‘۔

(ایمرا نیوزآن لائن) والدین کے لیے بچوں کی تربیت کرنا ایک مشکل مرحلہ ہوتا ہے اور خاص طور پر جب وہ اپنے بچوں کو اعلیٰ تعلیم دینے کے لیے کوشاں ہوتے ہیں اور وہ اس حد تک اس بات کو اپنے سر پر سوار کرلیتے ہیں جس سے ان کو نقصان کا بھی خدشہ ہوتا ہے، ایسا ہی چین میں ہوا جب ایک ماں کو بچے کو پڑھاتے ہوئے دل کا دورہ پڑ گیا۔

چینی میڈیا کے مطابق چین کی 36 سالہ خاتون اپنے 9 برس کے بیٹے کو ریاضی کے سوالات سمجھا رہی تھیں مگر ان کے بیٹے کو یہ سوالات سمجھ نہیں آرہے تھے، خاتون اس وجہ سے بے حد تناؤ کا شکار ہوگئیں اور انہیں دل کا دورہ پڑ گیا۔ اس حوالے سے خاتون نے بتایا کہ ’میں نے اپنے بیٹے کو کئی مرتبہ سوالات سمجھائے مگر اس کو یہ سوال سمجھ نہیں آرہے تھے جس کی وجہ سے مجھے شدید غصہ آگیا، میرا دل اچانک تیزی سےدھڑکنے لگا اور میں سہی سے سانس بھی نہیں لے پا رہی تھی۔‘

خوش قسمتی سے خاتون کو فوراً ہی احساس ہوا کہ ان کے ساتھ کچھ عجیب سا ہورہا ہےتو انہوں نے اپنے شوہر کو فون کیا اور ان کے شوہر نے انہیں اسپتال منتقل کردیا جہاں ڈاکٹروں نے خاتون کو ’مایوکارڈیل انفیکشن‘ کی تشخیص کی جسے عام طور پردل کا دورہ کہا جاتا ہے۔ ڈاکٹرز کا کہنا تھا کہ وہ خوش قسمت ہیں کہ بالکل سہی وقت پر اسپتال میں داخل ہوگئیں کیونکہ اسپتال پہنچنے میں تھوڑی سی تاخیر بھی ان کی موت کا سبب بن سکتی تھی۔

خاتون نے بتایا کہ وہ اپنے بیٹے کو روزانہ پڑھاتی ہیں ، جب ان کے بیٹے کو سمجھ نہیں آتا تو وہ اکثر اس بات سے بے حد پریشان ہوجاتی ہیں لیکن انہوں نے ایسا کبھی بھی نہیں سوچا تھا کہ اس غصے سے ان کی صحت پر اس طرح کے سنگین نتائج برآمد ہوں گے۔ ڈاکٹر ز کا کہنا تھاکہ اکثر یہ نو عمر ماؤں کے ساتھ ہوتا ہے کیونکہ وہ متوازن غذا کا استعمال نہیں کرتیں جس کی وجہ سے جذباتی اور نفسیاتی طور پر انہیں بے حد مشکلات کا سامنا کرنا پڑتا ہے۔

(ایمرا نیوزآن لائن) موجودہ اور آئندہ دور میں تعلیم کی اہمیت سے انکار ناممکن ہے لیکن اس کے باوجود تحقیق میں یہ بات سامنے آئی ہےکہ طلبا کی زیادہ تر تعداد یونیورسٹی میں صرف 2 گھنٹے کا لیکچر لیتی ہے۔

برطانیہ میں کی گئی تحقیق کے مطابق یونیورسٹی کے طلبا سالانہ 11 ہزار 663 سے زائد ڈالرز یونیورسٹی کی فیس ادا کرتے ہیں اور یہ بات جاننے کے باوجود بھی وہ دن میں دو سے بھی کم گھنٹے لیکچر میں شرکت کرتے ہیں۔

اس سروے میں 30 ہزار سے زائد طلبا و طالبات شامل تھے اور ان کا تعلق برطانیہ کے 31 انسٹی ٹیوٹ سے تھا۔ سروے کے مطابق یونیورسٹی کے 54 فیصد طلبا باقاعدہ کلاسس اور سیمینار میں ہفتے میں 11 گھنٹوں سے بھی کم وقت گزارتے ہیں۔ ایجوکیشن کنسلٹنسی ایڈوانس کے اس سروے میں یہ بات بھی سامنے آئی ہے کہ یونیورسٹی میں تعلیم حاصل کرنے والے 24 فیصد طلبا پڑھائی کے دوران یونیورسٹی چھوڑنے پر بھی غور کرتے ہیں۔

تحقیق کے مطابق آرٹس کے مضامین، جن میں انگریزی اور تاریخ وغیرہ شامل ہیں، ان مضامین کے طلبا توقع کرتے ہیں کہ یہ آزادانہ طور پر کام کرنے میں زیادہ وقت گزاریں۔ یہ تحقیق ایسے طلبا کے لیے لمحہ فکریہ ہے جو اعلیٰ تعلیم پر لاکھوں روپے خرچ کرنے کے باوجود بھی اس میں سنجیدہ نہیں ہوتے۔

مظفرگڑھ (میڈیا 92 نیوزآن لا ئن ) نامعلوم شخص نے مدرسے کے 13 سالہ طالبعلم پر مبینہ طور پر پیٹرول چھڑک کر آگ لگا دی۔

مظفر گڑھ کی تحصیل جتوئی میں مدرسے کے 13 سالہ طالبعلم محمد یعقوب پر مبینہ طور پر پیٹرول چھڑک کر آگ لگادی گئی جسے نشتر اسپتال ملتان کے برن یونٹ میں منتقل کردیا گیا۔

پولیس کی مطابق آگ لگنے سے یعقوب کے جسم کا تقریباً 30 فیصد حصہ جھلس گیا ہے۔ ورثاء کے پولیس کو دیے گئے بیان کے مطابق طالب علم یعقوب مدرسے سے دولت واہی میں اپنے گھر واپس جارہا تھا کہ راستے میں کھیت میں چھپے نامعلوم شخص نے اس پر پیٹرول چھڑکا اور آگ لگادی، پولیس نے واقعے کا مقدمہ تھانہ جتوئی میں درج کرلیا ہے۔

لاھور(ایمرا نیوز)2018ءمیں آپ کو کون سی ڈگریاں بہترین تنخواہیں دِلوا سکتی ہیں؟ 2018ءاور اس کے بعد جو گریجویٹس کیریئر کا آغاز کرنے والے ہیں، انھیں اپنی پہلی نوکری میں تنخواہ کی کتنی امید رکھنی چاہیے؟ جب آپ عملی زندگی میں قدم رکھنے والے ہوں اور اس وقت آپ کو یہ پتہ ہو کہ آپ نے جو تعلیم حاصل کی ہے، وہ پیشہ ورانہ زندگی میں کافی اہمیت رکھتی ہے، تو یقیناً آپ اچھا محسوس کریں گے۔
تعلیم مکمل کرنے کے بعد، جب آپ کو نوکری کی پیش کشیں موصول ہونے لگیں گی، اس وقت اگر آپ کو اپنی تعلیم کے لحاظ سے تنخواہوں کے موجودہ رجحانات کا پتہ ہوگا تو آپ کو نوکری کے انتخاب یا پھراس کی تلاش میں آسانی رہے گی۔ اگر آپ انڈرگریجویٹ ہیں تو اس وقت بھی آپ کو نوکری کے لیے مختلف پیشوں کےانتخاب کے بارے میں سوچنا چاہیے کہ کون سےپیشہ آپ کوبہترآمدنی مہیا کرسکتاہے، پھر آپ گریجویشن کے بعد اپنا میجر بھی اسی کے مطابق کریں ۔
2018ء مجموعی عالمی معیشت کے لیے بہتر سال ثابت ہورہا ہے اور ایسے میں کمپنیاں اپنے توسیعی منصوبوں کے لیے کالج گریجویٹس کو ہاتھوں ہاتھ لے رہی ہیں۔ امریکا کی نیشنل ایسوسی ایشن آف کالجز اینڈ ایمپلائرز کا تخمینہ ہے کہ 2017ءکے مقابلے میں 2018ءکے دوران کمپنیوں میں نوکریوں کے مواقعوں میں کم از کم 4فیصد اضافہ ہوگا۔ ایسوسی ایشن کے سروے میں یہ بھی کہا گیا ہے کہ سرفہرست کے 10میجرز میں سے 8میجرز کا تعلق بزنس ڈسپلن جیسے فائنانس، اکاؤنٹنگ، بزنس ایڈمنسٹریشن، مینجمنٹ انفارمیشن سسٹمز، مارکیٹنگ، سیلز، ہیومن ریسورسز اور لاجسٹکس سے ہے۔
ایک اور سروے جو کالجیٹ ایمپلائمنٹ ریسرچ انسٹی ٹیوٹ، مشی گن اسٹیٹ یونیورسٹی نے کیا ہے، اس میں سال 2019ء کے دوران امریکا میں 19فیصد زیادہ نوکریوں کے مواقع پیدا ہونے کی پیش گوئی کی گئی ہے۔ سروے میں کاروبار میں توسیع، ریٹائرمنٹ، ملازمین کی نوکری (یا انڈسٹری) بدلنے کو اس اضافی کھپت کی وجہ قرار دیا گیا ہے۔
STEM Degrees(سائنس، ٹیکنالوجی، انجینئرنگ، میتھس) گزشتہ کئی برسوں کی طرح2018ء اور کم از کم آنے والےچند سال تک بھی اہمیت کی حامل اور STEMگریجویٹس سب سے زیادہ تنخواہیں حاصل کرنے والے امیدواروں میں شامل رہیں گے۔ نیشنل ایسوسی ایشن آف کالجز اینڈ ایمپلائرزکے سروے میں کہا گیا ہے کہ کمپنیاں سب سے زیادہ تنخواہ انجینئرنگ گریجویٹس کو دینے کا ارادہ رکھتی ہیں، جو66,521ڈالر سالانہ ہے جبکہ کمپیوٹر سائنس گریجویٹس 66,005 ڈالرسالانہ حاصل کرنے کی توقع رکھ سکتے ہیں۔
اس کے علاوہ میتھس اور سائنس گریجویٹس سالانہ اوسطاً 61,867ڈالر تنخواہ حاصل کرسکتے ہیں،تاہم 69,900ڈالر کے ساتھ فزکس گریجویٹس سب سے نمایاں رہیں گے (سروے کے مطابق فزکس کے شعبے میں نوکری کے محدود مواقع پیدا ہونگے)۔
بزنس ڈگریز:بزنس گریجویٹس اوسطاً 56,720ڈالر سالانہ کی ابتدائی تنخواہ حاصل کرنے کی توقع رکھ سکتے ہیں۔ تاہم بزنس ڈسپلن میں 62,624ڈالر کی اوسط سالانہ تنخواہ کے ساتھ مارکیٹنگ گریجویٹس سب سے نمایاں رہیں گے۔
سوشل سائنسز اینڈ ہیومینٹیز:سوشل سائنسز میں گریجویٹ کرنے والے نوجوان سالانہ اوسطاً 56,689ڈالر تنخواہ حاصل کرسکتے ہیں، جبکہ ہیومینٹیز کے گریجویٹس کے لیے یہ تخمینہ 56,688ڈالر لگایا گیا ہے۔ ایگری کلچر اور نیچرل ریسورسز کے گریجویٹس 53,565ڈالر سالانہ جبکہ کمیونیکیشنز کے گریجویٹ 51,448ڈالرسالانہ اوسط تنخواہ حاصل کرسکتے ہیں۔
ہرچندکہ رواں سال سب سے زیادہ تنخواہیں انجینئرنگ اور کمپیوٹر سائنس گریجویٹس کو آفر کی جارہی ہیں، تاہم 2018ء اور 2019ء میں ان شعبوں میں میجرز کرنے والے گریجویٹس کی تنخواہوں میں سالانہ بنیادوں پر محض ایک فیصد اضافہ ہوسکتا ہے۔ میتھس اور سائنس گریجویٹس کی تنخواہوں میں 4.2فیصد، جبکہ بزنس گریجویٹس کی تنخواہوں میں 3.5فیصد اضافے کا تخمینہ ہے۔
حیران کن طور پر، سب سے زیادہ اضافے کا تخمینہ ہیومینٹیز کے گریجویٹس کے لیے لگایا گیا ہے، جو کہ 16.3فیصد ہے۔ سوشل سائنسز کے گریجویٹس گزشتہ سال کے مقابلے میں ابتدائی تنخواہوں میں 6فیصد اضافے کی توقع رکھ سکتے ہیں۔
نیشنل ایسوسی ایشن آف کالجز اینڈ ایمپلائرزکے سروے کے مطابق، بہترین تنخواہیں (سالانہ بنیادوں پر) دینے والی صنعتوں میں مینجمنٹ کنسلٹنگ (67,569ڈالر)، کیمیکل مینوفیکچرنگ (65,669ڈالر)، انفارمیشن ٹیکنالوجی (63,902ڈالر)، فائنانس، انشورنس اینڈ ریئل اسٹیٹ (63,826ڈالر) اور انجنیئرنگ سروسز (63,624ڈالر )شامل ہیں۔
ان سرویز میں سامنے آنے والی تنخواہیں، متعلقہ انڈسٹری کی اوسط تنخواہوں کی نمائندگی کرتی ہیں، تاہم کسی بھی گریجویٹ کو ان کی صلاحیتوںجیسے گریڈز، مضبوط انٹرشپ تجربے، کیمپس پروفائل یا کمیونٹی لیڈرشپ اور ایوارڈز کے مطابق کم یا زیادہ تنخواہ کی پیشکش کی جاسکتی ہے۔ اچھے تعلیمی اداروں کے گریجویٹس کو ہمیشہ دیگر کے مقابلے میں بہتر تنخواہوں کی پیشکش کی جاتی ہے۔
اتنی ساری چوائسز کی موجودگی میں، ڈگری کے لیے میجرز کا انتخاب کرنا آسان کام نہیں۔ طالب علموں کو اس سلسلے میں اپنی اِسکلز، پرسنالٹی اورینٹیشن، دلچسپیوں، ذاتی اقدار، لائف اسٹائل چوائسز، متعلقہ صنعت میں آگے بڑھنے اور نوکریوں کے نئے مواقع پیدا ہونے جیسے عناصر کو مدِنظر رکھنا چاہیے۔ یہ ممکن ہے کہ جن شعبوں میں زیادہ تنخواہیں دی جارہی ہیں، وہ Job Satisfactionاور ورک/لائف بیلنس کے اشاریوں پر اتنی بہتر ثابت نہ ہوتی ہوں۔ ایسے میں آپ کو زیادہ تنخواہ اور ورک/لائف بیلنس میں سے کسی ایک کا انتخاب کرنا ہوگا۔
کیا آپ جاب مارکیٹ میں اپنے لیے نوکری کی تلاش میں کود پڑنے کے لیے تیار ہیں؟ گریجویشن کے فوری بعد، جاب مارکیٹ میں نوکری کی تلاش میں کامیابی کے لیے آپ کو تیاری شروع کردینی چاہیے۔ آج کا کام کل پر نہ چھوڑیں، آج کے دور میں جاب مارکیٹ میں بہت زیادہ مسابقتی ماحول پایا جاتا ہے۔ ایک ہی نوکری کے لیے آپ کو اپنے مقابلے میں آپ سے زیادہ باصلاحیت لوگوں کی کمی نہیں ملے گی، اس لیے اپنے مطلب کی ہر نوکری کے لیے خود کو ہر ممکن حد تک بہترین انداز میں پیش کریں اور تیاری میں کوئی کسر نہ چھوڑ رکھیں کہ کل آپ کو پچھتانا نہ پڑے۔
یاد رکھنے کی بات یہ ہے کہ، آپ کے ہاتھ میں بہترین تیاری اور بہترین کوشش کرنا ہے، اگر کسی وجہ سے نوکری کے حصول کی پہلی کوشش میں آپ کو ناکامی کا سامنا کرنا پڑے تو اس سے مایوس ہونے کے بجائے، اس سے سیکھنے کی کوشش کریں۔ ناکامی اہم نہیں، اہم آپ کی کوشش ہے۔ پہلی کوشش میں ناکامی کے بعد، اگلی بار اپنی کمزوریوں پر کام کریں، آپ کامیابی کو اپنے لیے منتظر پائیں گے۔

اسلام آباد: وزارت سائنس و ٹیکنالوجی کے ماتحت کام کرنے والے طلبہ کی جانچ پڑتال کے حوالے سے معروف ادارے نیشنل ٹیسٹنگ سروس (این ٹی ایس) میں دو سال قبل بڑے پیمانے میں مالی بےضابطگیوں کا انکشاف ہونے کے باوجود حکومت خاموش ہے۔

ہم نیوز کے پروگرام ’بڑی بات‘ میں بتایا گیا کہ اس ادارے میں 20 ارب روپے سے زائد کی مالی بے قاعدگیوں کا انکشاف دو سال قبل آڈیٹر جنرل آف پاکستان کی رپورٹ میں کیا گیا تھا تاہم سابق حکومت اور موجودہ حکومت کی جانب سے اب تک اس پر کوئی کارروائی نہیں کی گئی ۔

بتایا گیا ہے کہ این ٹی ایس سے تقریباً تمام حکومتی ادارے مستفید ہو رہے ہیں اور ہر سال یہاں سے ہزاروں لاکھوں افراد اس سروس کے تحت ٹیسٹ دیتے ہیں۔

ہم نیوز کے نمائندہ خصوصی ریاض الحق کے مطابق این ٹی ایس کا ادارہ 2002 میں قائم کیا گیا جس کا 2016 میں پہلی بار آڈیٹر جنرل آف پاکستان کی جانب سے آڈٹ کیا گیا تھا۔

انہوں نے بتایا کہ نیشنل ٹیسٹنگ سروس ایک نجی ادارہ ہے، جب قومی اسمبلی میں اس کے حوالے سے سوال کیا گیا تو بتایا گیا کہ چونکہ یہ نجی ادارہ ہے تو ہم اس سے متعلق کوئی جواب نہیں دے سکتے۔

ان کا کہنا تھا کہ اس ادارے میں اربوں روپے کی بےضابطگیاں پائی گئی ہیں، لوگوں کو پیسے دیے گئے ہیں جس کا کوئی ریکارڈ موجود نہیں ہے۔

ریاض الحق نے بتایا کہ آڈٹ میں اس بات کی بھی نشاندہی کی گئی ہے کہ شروعات میں این ٹی ایس کو بنانے کا مقصد جامعہ کامسیٹس میں داخلہ لینے کی خاطر ٹیسٹنگ سروس مہیا کرنا تھا، بعد ازاں اس نے لاکھوں بچوں اور اداروں کے ٹیسٹ لینا شروع کر دیے۔

ان کا کہنا تھا کہ حال ہی میں وزارت کے ایک افسر نے اعلیٰ حکام سے این ٹی ایس کے حوالے سے پوچھا ہے تاہم انہیں کوئی جواب نہیں ملا ۔

انہوں نے بتایا کہ این ٹی ایس کے معاملے میں وزارت سائنس و ٹیکنالوجی کے وزیر فواد چوہدری کو بھی اندھیرے میں رکھا جا رہا ہے۔

ان کا کہنا تھا کہ آڈٹ رپورٹ میں جن کرداروں کے نام لئے گئے ہیں ان میں سے کئی اب بھی کامسیٹس یونیورسٹی میں کام کر رہے ہیں