Tag اسلام اباد

اسلام آباد(ویب ڈیسک) پاکستان کے ذمہ واجب الادا غیر ملکی اور مقامی قرضوں کا مجموعی حجم 253ارب ڈالر جبکہ پاکستانی کرنسی میں مجموعی قرضہ بڑھ کر39ہزار859 ارب روپے ہوگیا ہے۔

گزشتہ ایک سال2020-21 میں پاکستان کے ذمہ واجب الادا قرضے میں تین ہزار461 ارب روپے کا اضافہ ہوا ہے۔ وفاقی حکومت کے مطابق قرضوں میں اضافے کی بنیادی وجوہات میں مقررہ تخمینے سے زیادہ وفاقی مالیاتی خسارہ، اثاثوں کی عدم دستیابی کی وجہ سے مقررہ ہدف سے کم سکوک بانڈز کا اجراء، انعامی بانڈزکے بڑی تعداد میں کیش ہونے کی وجہ سے محکمہ قومی بچت کے پاس موجود بچتوں میں کمی، حکومتی اداروں کی نجکاری کا مقررہ ہدف پورا نہ ہونا شامل ہے۔
وزارت خزانہ نے30جون2021 تک پاکستان کے ذمے واجب الادا مجموعی قرضوں کی تازہ ترین تفصیلات جاری کردی ہیں جن میں بتایا گیا ہے کہ امریکی ڈالرز میں پاکستان کے غیر ملکی اور مقامی قرضوں کا حجم 253ارب ڈالر ہے جن میں سے پاکستان کے مجموعی غیر ملکی قرضے 86ارب ڈالر ہیں اورپاکستان کے مجموعی مقامی قرضے 167ارب ڈالر ہیں۔ کل قرضوں میں غیر ملکی قرضوں کاحجم34 فیصد اور مقامی قرضوں کاحجم66 فیصد ہے۔کل غیر ملکی قرضے جی ڈی پی کے 74.9فیصد کے مساوی ہیں۔
رپورٹ کے مطابق پاکستان نے آئی ایم ایف سے 7.38ارب ڈالر کے قرضے لئے پیرس کلب سے 10.72ارب ڈالر اور ملٹی لیٹرل کے 33.83 ارب ڈالر کے قرضے ہیں، عالمی بنک سے حاصل کردہ قرضوں کا حجم18.13 ارب ڈالر، ایشائی ترقیاتی بینک کے قرضے13.42 ارب ڈالر ہیں۔ وزارت خزانہ کے مطابق تمام قرضوں کا تخمینہ 157.3روپے فی ڈالر کے ریٹ سے لگایا گیا ہے۔

اقتصادی ماہرین کا کہنا ہے کہ تیس جون سے اب تک روپے کی قدر میں بڑے پیمانے پر کمی کے باعث ڈالر170روپے سے تجاوز کرچکا ہے اور روپے کی قدر میں کمی کے باعث رواں مالی سال کی پہلی سہ ماہی میں پاکستان کے ذمہ واجب الادا قرضوں میں تین ہزار دو سو تیرہ ارب روپے سے زائد کا اضافہ ہوچکا ہے۔ رواں مالی سال کی پہلی سہ ماہی کے دوران ڈالر کے مقابلے میں روپے کی قدر میں12.7روپے فی ڈالر کی کمی واقع ہوئی ہے۔

وزارت خزانہ کی رپورٹ میں بتایا گیا ہے کہ گذشتہ مالی سال2020-21 کے دوران وفاقی حکومت نے مالی خسارہ پورا کرنے کیلئے زیادہ تر انحصار مقامی ڈیبٹ مارکیٹ پر کیا ہے اور وفاقی مالیاتی خسارے کا 64 فیصد مقامی مارکیٹ سے قرضوں کے ذریعے پورا کیا گیا۔ مالیاتی خسارہ پورا کرنے کیلئے گزشتہ مالی سال کے دوران حکومت نے ملکی جی ڈی پی کے0.2 فیصد کے برابر مجموعی طور پر 105ارب روپے کی نئی گارنٹیاں جاری اور رول اوور کیں۔

رپورٹ کے مطابق پاکستان کے ذمہ واجب الادا مقامی قرضہ30 جون2019 تک 20 ہزار732 ارب روپے تھا جو30 جون2020 تک بڑھ کر 23ہزار283 ارب روپے اور 30 جون 2021تک بڑھ کر26 ہزار 265ارب روپے ہوگیا ہے۔

اسلام آباد(ویب ڈیسک) نیشنل الیکٹرک پاور ریگولیٹری اتھارٹی (نیپرا) نے سستے ایندھن سے بجلی پیدا کرنے کے طویل مدتی منصوبے کی منظوری دے دی۔

نیپرا کے مطابق طویل المدتی پیداواری صلاحیت 30-2021 کے منصوبے آئی جی سیپ کی منظوری دی گئی ہے اور 10سال کی منصوبہ بندی کو بجلی کی طلب کے حساب سے ہر سال نظر ثانی کی جائے گی۔ نیپرا کا کہنا ہےکہ بجلی کی پیداوار درآمدی وسائل کے بجائے مقامی وسائل سے کی جائے گی، اس طرح فرنس آئل سے بجلی کی پیداوار 19 سے کم ہو کر صرف 2 فیصد رہ جائے گی جب کہ آر ایل این جی سے پیداوار 17 سے کم ہو کر 11 فیصد اور درآمدی کوئلے سے پیداوار 11 فیصد سے کم ہو کر 8 فیصد ہو جائے گی۔نیپرا کے مطابق 2030 تک قابل تجدید توانائی سے بجلی کی پیداوار 60 فیصد سے زائد ہو جائے گی۔

اسلام آباد(ویب ڈیسک) ملک بھر میں کورونا وائرس سے 24 گھنٹوں کے دوران مزید 71 افراد انتقال کرگئے۔
نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 55 ہزار 027 ٹیسٹ کیے گئے جن میں سے 2580 افراد میں کورونا وائرس کی تصدیق ہوئی۔
گزشتہ روز اس وبا نے مزید 71 افراد کی زندگیوں کو نگل لیا۔ جب کہ مثبت کیسز کی شرح4.68 فیصد ریکارڈ ہوئی ہے۔ اس کے علاوہ 4964 مریضوں کی حالت تشویشناک ہے۔
کورونا وائرس کے خلاف یہ احتیاطی تدابیراختیارکرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازے کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلا کربیٹھنے کے بجائے پنکھے کی ہوا میں بیٹھیں۔
سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پرکوئی اثرنہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔
پانی گرم کرکے تھرماس میں رکھ لیں اورہرایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

اسلام آباد(ویب ڈیسک)پٹرول اورخوردنی تیل پر لگنے والے اس ٹیکس کی وجہ سے ہی ان کی قیمتیں ملکی تاریخ کی بلند ترین سطح پر پہنچ گئیں۔
حکومت نے رواں مالی سال کے پہلے دومہینوں جولائی اوراگست کے دوران درآمدی اشیاء پر وصول کیے جانے والے ٹیکسوں میں سے ایک تہائی ٹیکس پٹرول اور خوردنی تیل کی درآمدات سے اکٹھا کیا جو 149ارب روپے بنتا ہے۔
تیل اورخوردنی تیل کی درآمد سے اکٹھا کیا جانے والا یہ ٹیکس گزشتہ سال کے اسی عرصہ کے دوران ان اشیاء پروصول کیے جانے والے ٹیکس سے 132فیصد زیادہ ہے ۔گزشتہ سال کے اس عرصہ کے دوران پٹرول اور خوردنی تیل کی درآمد سے 64 ارب روپے ٹیکس اکٹھا کیا گیا تھا۔
پٹرول اورخوردنی تیل پر لگنے والے اس ٹیکس کی وجہ سے ہی ان کی قیمتیں ملکی تاریخ کی بلند ترین سطح پر پہنچ گئی ہیں۔ڈالرکے مقابلے میں روپے کی قدر میں کمی بھی قیمتوں میں اضافہ کا سبب بنی ہے۔پٹرول کی قیمت 123 روپے لٹر کرنے کی منظوری خود وزیراعظم نے دی۔
حکومت کی طرف سے پٹرولیم مصنوعات پر کسٹم ڈیوٹی میں اضافہ سے بھی ان کی قیمتیں بڑھی ہیں۔خام تیل کی درآمد پر17 فیصد سیلزٹیکس لگایا گیا،پٹرول پرکسٹمزڈیوٹی بھی پانچ فیصد سے بڑھا کر10فیصد کردی گئی۔
اسی طرح پام آئل کی درآمد پر ٹیکس ریٹس میں بھی اضافہ کیا گیا۔ان اشیا کے مہنگا ہونے سے غریب اورمتوسط طبقات بری طرح متاثر ہورہے ہیں۔مختلف عوامل کی وجہ سے پاکستان کی درآمدات میں بھی بہت تیزی سے اضافہ ہورہا ہے۔
اسٹیٹ بینک نے رواں مالی سال کی درآمدات کا تخمینہ 61 ارب ڈالر لگایا ہے لیکن وزارت تجارت 72ارب ڈالر کا اندازہ لگا رہی ہے۔رواں مالی سال کے پہلے دوماہ کے دوران تجارتی خسارہ 2.3 ارب ڈالر تر پہنچ گیا ہے۔
ماہ جولائی اوراگست کے دوران حکومت نے پٹرول کی درآمد اوراس پردیگرٹیکسوں کی مد میں28.6 ارب روپے اکٹھے کیے جو پٹرول کی درآمد میں کمی کے باوجود 80 فیصد یا12.8ارب روپے زیادہ تھے۔پٹرول کی درآمد پرکسٹم ڈیوٹیوں کی مد میں 12.1 ارب روپے اکٹھے کیے گئے۔

ایف بی آراعداد وشمارکے مطابق درآمدات کی مد میں گیس دوسری سب سے بڑی آئٹم تھی جس سے 25.6 ارب روپے ٹیکس اکٹھے کیے گئے جو گزشتہ سال کے اسی عرصہ کے مقابلے میں 16.8ارب روپے یا 190 فیصد زیادہ تھے۔

خام تیل کی درآمد سے 22 ارب روپے سے زائد ٹیکس اکٹھا کیا گیا،اس میں سیلزٹیکس سے اکٹھا ہونے والا ریونیو18.6ارب روپے تھا۔ہائی سپیڈ ڈیزل سے 17.5ارب روپے ٹیکس اکٹھا کیا گیا۔ڈیزل کی قیمتوں میں اضافہ کی وجہ سے باقی اشیاء بھی مہنگی ہورہی ہیں۔
حکومت نے دوماہ کے دوران کوئلے کی درآمد سے بھی 12.2 ارب روپے ریونیواکٹھا کیا۔خوردنی تیل کیلئے پام آئل کی درآمدات سے بھی 12.1ارب روپے ٹیکس کی مد میں اکٹھے کیے گئے۔اس کی بدولت ککنگ آئل کے مختلف برانڈزکی قیمتیں بڑھ کر 330 تا360 روپے لٹر تک پہنچ گئی ہیں۔حکومت نے فرنس آئل کی درآمد سے بھی دوماہ میں 11.8ارب روپے ٹیکس اکٹھا کیا ہے جوگزشتہ سال کے اسی عرصہ کے مقابلے میں 9 ارب روپے زیادہ ہے۔

اسلام آباد(ویب ڈیسک) اپوزیشن نے پارلیمنٹ کے مشترکہ اجلاس سے صدر کے خطاب کے دوران واک آؤٹ کردیا۔
پارلیمنٹ کے مشترکہ اجلاس میں وزیراعظم عمران خان، قائد حزب اختلاف شہبازشریف، شاہد خاقان عباسی، چاروں صوبوں کے گورنرز اور ورزائے اعلیٰ بھی موجود تھے۔ اس کے علاوہ آزاد کشمیرکے صدر، سروسز چیفس اور مختلف ممالک کے سفیر بھی مہمانوں کی گیلری میں موجود تھے۔صدرِ مملکت عارف علوی کے مشترکہ اجلاس سے خطاب کے آغاز پر ہی اپوزیشن اراکین نے ایوان میں شور شرابا شروع کردیا اور شدید احتجاج کیا۔

اپوزیشن کے شدید احتجاج کے باعث صدر نے دوران صدر مملکت نے دوسری بار پانی پیتے ہوئے کہا کہ مجھے شروع میں زور زور سے بولنا پڑا۔صدر کے خطاب کے دوران اپوزیشن اراکین نے مسلسل نعرے بازی کی اور اسپیکر ڈائس کے سامنے جمع ہوگئے، اپوزیشن اراکین نے پلے کارڈز اٹھا رکھے تھے جس پر آزاد میڈیا پر حملہ نامنظور، لوگوں کا معاشی قتل بند کرو، میڈیا پر مارشل لاء مسترد اور پی ایم ڈی اے کو مسترد کیے جانے سے متعلق نعرے درج تھے۔بعد ازاں اپوزیشن اراکین نے صدر مملکت کے خطاب کے دوران ہی ایوان سے واک آؤٹ کردیا۔

اسلام آباد(ویب ڈیسک)وزیر خارجہ شاہ محمود قریشی نے مقبوضہ کشمیر کی صورتحال پر ڈوزیئر پیش کرتے ہوئے کہا ہے کہ مقبوضہ کشمیرمیں انسانی حقوق کی مسلسل خلاف ورزی ہورہی ہے۔اسلام آباد میں نیوز کانفرنس کے دوران شاہ محمود قریشی نے کہا کہ مقبوضہ کشمیر میں انسانی حقوق کی مسلسل خلاف ورزی ہو رہی ہے، بھارت کشمیریوں کی آواز دبا رہا ہے ، جب سے ہندوتوا حکومت بھارت میں آئی ہے ان پامالیوں میں اضافہ ہو گیا ہے، مقبوضہ کشمیر میں بھارتی فوج کے محاصرے کو 769 دن ہو چکے ہیں، بھارت کی 9 لاکھ افواج مقبوضہ وادی پرمسلط ہیں، آزاد مبصرین کو مقبوضہ کشمیر جانے کی اجازت نہیں، آج کی دنیا میں انسانی حقوق کا پرچار ہوتا ہے، انسانی حقوق کو اس انداز میں پامال کرنا نامناسب ہے۔