All posts by News Desk

اسلام آباد(ویب ڈیسک)پاکستان کے سابق فاسٹ بولر اور اسٹار کھلاڑی شعیب اختر سرکاری ٹی وی ’پی ٹی وی اسپورٹس‘ پر اینکر کی بدتمیزی پر پروگرام چھوڑ کر چلے گئے اور استعفی دے دیا۔
شعیب اختر پی ٹی وی اسپورٹس پر پروگرام میں شریک تھے جس میں ورلڈ کپ میں پاکستان کی کارکردگی اور کھلاڑیوں کے بارے میں گفتگو ہورہی تھی۔ پروگرام میں ان کے ساتھ غیر ملکی لیجنڈ کھلاڑی ویون رچرڈز، ڈیوڈ گاور اور سابق پاکستانی کرکٹرز عاقب جاوید، راشد لطیف ، عمر گل ، اظہر محمود، ثنا میر بھی شریک تھے۔
شعیب اختر انتہائی دھیمے اور شائستہ انداز میں گفتگو کررہے تھے جبکہ انہوں نے اپنی بات پر توجہ نہ دینے پر میزبان نعمان نیاز کو توجہ بھی دلائی۔ شعیب اختر نے لاہور قلندرز کی تعریف کرتے ہوئے حارث رؤف کی تعریف کی اور کہا کہ یہ نوجوان لاہور قلندرز کے پلیئر ڈولپمنٹ پروگرام سے سامنے آیا ہے۔
میزبان کو شعیب اختر کی نہ جانے کون سی بات بری لگی کہ انہوں نے تمام اسٹارز کی موجودگی میں قومی ٹی وی کی براہ راست نشریات کے دوران شعیب اختر سے بدتمیزی کرتے ہوئے کہا اگر اوور اسمارٹ بننا ہے تو پروگرام سے چلے جاؤ۔ شعیب اختر نے نعمان نیاز سے استفسار کیا اور ٹوکا تو وہ بریک پر چلے گئے۔
شعیب اختر نے بتایا کہ دوران بریک انہوں نے پاکستان کی عزت کے خیال سے میزبان کے ساتھ اس شرط پر مصالحت کی کہ وہ ان سے آن ایئر معافی مانگیں گے، لیکن جب نعمان نیاز نے معافی نہ مانگی تو وہ شو چھوڑ کر چلے گئے اور پی ٹی وی اسپورٹس سے استعفیٰ دے دیا۔قومی ہیرو اور راول پنڈی ایکسپریس کے ساتھ سرکاری ٹی وی پر کیے گئے نامناسب سلوک پر سوشل میڈیا پر صارفین اور پرستاروں نے شدید غصے اور برہمی کا اظہار کیا ہے ۔
دوسری جانب نعمان نیاز کا ردعمل بھی سامنے آگیا ہے جس میں انہوں نے شعیب اختر کی تعریف کرتے ہوئے انہیں بہترین کھلاڑی اور اپنا دیرینہ دوست قرار دیا ہے۔

سربراہ پاک فضائیہ ائیر چیف مارشل ظہیر احمد بابر سدھو نے پاک فضائیہ کے ایک آپریشنل بیس کا دورہ کیا۔ اپنے دورے کے دوران انہوں نے بیس پر جاری کثیر ملکی عسکری مشق ”ایسز میٹ 2-2021“ کا جائزہ لیا۔ پاک فضائیہ اور ترک فضائیہ ان مشقوں میں سرگرمی سے حصہ لے رہی ہیں جبکہ برطانیہ اور ازبکستان کی فضائیہ کو بطور مبصر مشقوں میں شرکت کی دعوت دی گئی ہے۔ ان فضائی مشقوں کا مقصد عسکری حکمت عملی کو بہتر بنانے کے ساتھ ساتھ پاک فضائیہ کی جنگی استعداد کو بڑھانا ہے۔ علاؤہ ازیں مشقوں میں شریک فضائی افواج کے مابین حقیقت پر مبنی مربوط ماحول اور عملی آپریشنل منظر نامے کو مدِ نظر رکھتے ہوئے باہمی تعاون کو مستحکم کرنا بھی ان مشقوں کے اہم مقاصد میں شامل ہے۔

شرکاء سے خطاب کرتے ہوئے ایئر چیف نے کہا کہ ”ایسز میٹ مشقیں اس لحاظ سے منفرد ہیں کہ ان فضائی مشقوں میں حصہ لینے والی فضائی افواج بذات خود آپریشنل سرگرمیوں، خواہ وہ دہشتگردی کے خلاف ہوں یا فضائی معرکوں پر مبنی ہوں، کا وسیع تجربہ رکھتی ہیں۔ موجودہ عالمی سیکیورٹی حالات اور ائیر وار فئیر کی بدلتی ہوئی صورتحال کے پیش نظر پاک فضائیہ اور ترک فضائیہ کے مابین شراکت داری میں اضافہ وقت کی اہم ضرورت ہے۔“ انہوں نے مزید کہا کہ یہ امر قابل ستائش ہے کہ ہر گزرتے سال کے ساتھ پاک ترک دوستی مزید مستحکم ہوتی جارہی ہے۔

مشترکہ فضائی مشق ”ایسز میٹ 2-2021“ میں پاک فضائیہ اور ترک فضائیہ کے جدید جنگی طیاروں اور دیگر سپورٹ عناصر شرکت کر رہے ہیں۔ خطے میں بدلتے ہوئے حالات اور سیکیورٹی کو لاحق خطرات کے تناظر میں پاک فضائیہ دوست ممالک کے ساتھ اس طرح کی آپریشنل مشقوں کا انعقاد باقاعدگی سے کرتی رہتی ہے۔ 

اسلام آباد(ویب ڈیسک) وزیراعظم عمران خان نے کہا ہے کہ ریاست مدینہ میں جو جرنیل اچھی کارکردگی دکھاتا وہ اوپر آتا تھا، میں آخری سانس تک ملک میں انصاف اور قانون کی بالادستی کی جنگ لڑتا رہوں گا۔
اسلام آباد میں قومی رحمت للعالمين ﷺ کانفرنس سے خطاب کرتے ہوئے وزیراعظم عمران خان نے کہا کہ پاناما کیس میں کیا بتاؤں کس طرح کے جھوٹ بولے گئے، یہ کیس برطانوی عدالت میں ہوتا تو ان کو اسی وقت جیل میں ڈال دیا جاتا، مغرب اورپاکستان کے عدالتی نظام میں زمین آسمان کا فرق ہے۔

وزیراعظم نے کہا کہ جب تک قانون آزادنہیں ہوگاملک اوپرنہیں جا سکتا، برطانوی جمہوریت میں ووٹ بکنے کا تصور بھی نہیں کیا جاسکتا، یہاں سب کو پتہ ہے کہ سینیٹ انتخابات میں پیسہ چلتا ہے، برطانیہ میں چھانگا مانگا جیسی یا مری میں بند کر کے ووٹ لینے کی سیاست نہیں ہوتی، اخلاقیات کا معیار نہیں تو جمہوریت نہیں چل سکتی۔
انصاف اور میرٹ کی حکمرانی

عمران خان نے کہا کہ ریاست مدینہ میں انصاف اور میرٹ کی حکمرانی تھی، جو جرنیل بھی اچھی کارکردگی دکھاتا تھا وہ اوپر آجاتا تھا، بڑا عہدہ ملنا کسی کا پیدائشی حق نہ تھا، حضرت بلالؓ جو پہلے غلام تھے جو وزیر خزانہ بن گئے تھے، جس میں بھی صلاحیت ہوتی وہ ترقی کرتا تھا، انہوں نے لیڈرز پیدا کیے، سارے صحابہؓ لیڈر بن گئے، لیڈر بننے کےلیے صادق و امین ہونا ضروری ہے۔
ہماری سب سے بڑی جنگ

عمران خان کا کہنا تھا کہ ہماری سب سے بڑی جنگ قانون کی بالادستی کو قائم کرنا ہے، جب تک یہ جنگ نہیں جیتیں گے، ملک میں نہ صحیح جمہوریت آئے گی اور نہ خوشحالی، قانون کی بالادستی کیلئےآخری دم تک لڑوں گا، ریاست مدینہ میں طاقتوروں کوقانون کےنیچےلایاگیا، جب تک طاقتورقانون کےنیچےنہیں آتا،معاشرہ ٹھیک نہیں ہوسکتا، میں جب تک زندہ ہوں، ملک میں انصاف اور قانون کی بالادستی کی جنگ لڑتا رہوں گا۔

ایک پاکستانی کے پاس اتنا پیسہ ہے جتنا ہمارا آئی ایم ایف کا قرضہ ہے
وزیراعظم نے بتایا کہ 90 لاکھ پاکستانی بیرون ملک ہیں جن میں سے صرف 30 یا 40 ہزار ہی پاکستان میں آکر سرمایہ کاری کرلیں تو ہمیں آئی ایم ایف کی ضرورت ہی نہیں پڑے، اتنا ان کے پاس پیسہ ہے، ایک پاکستانی کو جانتا ہوں ، اس اکیلے کے پاس اتنا پیسہ ہے جتنا ہمارا آئی ایم ایف کا قرضہ ہے، وہ ترستے ہیں پاکستان آنے کےلیے لیکن پاکستان کا نظام انہیں یہاں نہیں آنے دیتا۔

ہر سال ایک ہزار ارب ڈالر چوری ہوکر آف شور اکاؤنٹس میں جاتا ہے

عمران خان نے کہا کہ اقوام متحدہ نے غریب ممالک میں غربت بڑھنے کی وجہ معلوم کرنے کےلیے رپورٹ مرتب کی جس میں بتایا گیا کہ ہر سال پاکستان جیسے ممالک جہاں قانون کی حکمرانی نہیں اور طاقتور کو قانون کے نیچے لانے کی طاقت نہیں، وہاں سے ایک ہزار ارب ڈالر ہر سال چوری اور منی لانڈر ہوکر آف شور اکاؤنٹس میں جاتا ہے جس سے لندن اور بڑے شہروں میں جائیدادیں خریدی جاتی ہیں۔

ہالی ووڈ اوربالی ووڈ کلچر سے ہمارا خاندانی نظام تباہ ہوجائے گا

وزیراعظم نے کہا کہ ہالی ووڈ اوربالی ووڈسےجوکلچرآرہاہےاس سےہمارا خاندانی نظام تباہ ہوجائے گا، ملک میں تیزی سے جنسی جرائم بڑھ رہے ہیں، یہ معاشرے کے لیے بہت بڑا خطرہ ہے، باہرکےملکوں میں اب ڈھائی سال سےزیادہ شادی نہیں چلتی وہاں فحاشی عام ہے، برطانیہ میں خاندانی نظام ٹوٹ گیا تب سمجھ آیا کہ پردے کا تصور کیوں ضروری ہے، ہم نے اپنے بچوں کو بچانا ہے، ان کے پاس موبائل فون ہے، جس پر ہر طرح کی انفارمیشن ہے، انسانی تاریخ میں اس طرح کی انفارمیشن کبھی نہ تھی، ہم بچوں سے زبردستی موبائل فون نہیں لے سکتے، سوشل میڈیا بند نہیں کرسکتے لیکن کم از کم بچوں کی تربیت کرسکتے ہیں، انہیں اس کلچر کے نقصانات بتاسکتے ہیں۔

پاکستان ائیر فورس اکیڈمی اصغرخان میں 145ویں جنرل ڈیوٹی پائلٹ، 91ویں انجینئرنگ اور 101ویں ائیر ڈیفینس کورسز کی گریجویشن تقریب منعقد ہوئی۔ سربراہ پاک فضائیہ ائیر چیف مارشل ظہیر احمد بابر سدھو اس تقریب کے مہمان خصوصی تھے۔ مہمانِ خصوصی کی اکیڈمی آمد پر ائیر وائس مارشل قیصر جنجوعہ، ائیر آفیسر کمانڈنگ پی اے ایف اکیڈمی اصغر خان نے انکا خیر مقدم کیا۔تقریب میں 05 رائل سعودی فضائیہ کے کیڈٹس سمیت کل 125 ایوی ایشن کیڈٹس گریجویٹ ہوئے ۔ مہمانِ خصوصی نے گریجویٹ ہونے والے افسران کو برانچ انسگنیا اور نمایاں پوزیشن حاصل کرنے والوں میں ٹرافیاں تقسیم کیں۔ جنرل سروس ٹریننگ میں بہترین کارکردگی کی چیئرمین جوائنٹ چیفس آف اسٹاف کمیٹی ٹرافی ایوی ایشن کیڈٹ اسکواڈرن انڈر آفیسر نیئر اشفاق جبکہ ائیرڈیفنس اور ائیروناٹیکل انجینئرنگ میں بہترین کارکردگی کی چیف آف دی ائیر سٹاف ٹرافیاں بالترتیب ایوی ایشن کیڈٹ سارجنٹ ہنزلہ معین خان اور ایوی ایشن کیڈٹ سارجنٹ محمد عاقب نے حاصل کیں۔ کالج آف فلائنگ ٹریننگ میں بہترین کارکردگی کی چیف آف دی ائیر اسٹاف ٹرافی ایوی ایشن کیڈٹ سارجنٹ عبدالرحمٰن نے حاصل کی۔ ایوی ایشن کیڈٹ ونگ انڈر آفیسر سفیان صدیق نے کالج آف ائیروناٹیکل انجینئرنگ جبکہ ایوی ایشن کیڈٹ اسکواڈرن انڈر آفیسر انس مصطفیٰ نے کالج آف فلائنگ ٹریننگ میں مجموعی طور پر بہترین کارکردگی کی اعزازی شمشیر حاصل کیں۔

حاضرین سے خطاب کرتے ہو ئے مہمانِ خصوصی نے کہا کہ مجھے افواج پاکستان پر فخر ہے کہ وہ پیشہ ورانہ طور پر انتہائی قابل و تربیت یافتہ ہیں اور اندرونی و بیرونی چیلنجز کا سامنا کرنے کی بھرپور صلاحیت رکھتی ہیں۔ ہمارے بہادر جنگجو ہوابازوں نے ہمیشہ مشکل حالات میں اعلیٰ بہادری کا مظاہرہ کیا اور قائد کے پاک فضائیہ کے متعلق فرمان ” ہمارا کوئی ہمسر نہیں” کی عملی مثال بن کر دکھایا ہے۔ میں آپ کو یقین دلاتا ہوں کہ پاک فضائیہ آزاد وطن کی حفاظت کیلئے ہمہ وقت تیار ہے۔ ایئر چیف نے اس امر پر بھی زور دیا کہ پاکستانی ایک امن پسند قوم ہیں اور تمام ممالک کے ساتھ دوستانہ تعلقات استوار کرنے کے خواہاں ہیں۔ تاہم امن کی راہ میں ہماری خواہش کو ہماری کمزوری نہیں سمجھا جانا چاہیئے۔ میں یہ بات واضح کرنا چاہتا ہوں کہ مسئلہ کشمیر کے پرامن تصفیے کے بغیر خطے میں امن ناگزیر ہے۔ ہم مقبوضہ کشمیر میں انسانی حقوق کی خلاف ورزیوں کی پرزور مذمت کرتے ہیں۔ اقوام عالم کو مقبوضہ جموں و کشمیر میں ہونے والی انسانی حقوق کی خلاف ورزیوں کے خاتمے میں اپنا کردار ادا کرنا چاہیے۔

گریجویٹ ہونے والے کیڈٹس سے اپنے خطاب میں سربراہ پاک فضائیہ نے کہا کہ یاد رکھئے آج پاک فضائیہ میں بطور افسران آپ کے سفر کا آغاز ہوا ہے۔ آپکی پاک فضائیہ جیسے عظیم ادارے میں تربیت اس بات کی غماز ہونی چاہیے کہ آپ محنت و لگن سے اپنا کام جاری رکھیں گے اور جدید فضائی جنگی حکمت عملی میں پاک فضائیہ کے کردار کو تقویت دینے میں اپنا کردار ادا کریں گے۔ آپ کو اپنے پیشروؤں کے نقش قدم پر چلنا ہے جنہوں نے ہر قسم کے کٹھن حالات میں پاک فضائیہ کے پرچم کو ہمیشہ سربلند رکھا۔ تقریب میں پی اے ایف اکیڈمی اصغر خان کی ائیرو بیٹکس ٹیم ” شیر دل ” نے انتہائی مسحور کن فضائی مظاہرہ پیش کیا۔ اس تقریب میں اعلیٰ فوجی و سول حکام اور گریجو یٹ ہونے والے زیر تربیت افسران کے والدین نے بھی شرکت کی۔

اسلام آباد(ویب ڈیسک) پاکستان کے سب سے بڑے رئیل اسٹیٹ پورٹل زمین ڈاٹ کام کی جانب سےاسلام آباد کے نجی ہوٹل میں پراپرٹی سیلز ایونٹ کا کامیاب انعقاد کیا گیا جس میں ویکسین شدہ شہری ایس او پیز کی پیروی کرتے ہوئے اپنی فیملیز کے ہمراہ شریک ہوئے۔ پراپرٹی سیلز ایونٹ میں گرینڈ پلاڈیم، ریور کورٹ یارڈ، رمادا بائی ویندم، ایمپوریم سکوئر، مال آف انکلیو، ایلیٹ ٹاور،وی 9 مال، ٹومارو لینڈ کنٹری کلب اینڈ ریزارٹ، کینری ریذیڈنسی، 68 ہائی اسٹریٹ، وِن ٹاور-2، رومن گروو، مال آف گجرات، گرینڈ گیلری، گرینڈ ہلز اور لائف سٹائل عوام الناس کی دلچسپی کیلئے پیش کئے گئے ۔ ایونٹ میں پیش کئے جانے والے منصوبوں کی مارکیٹنگ اور فروخت کے تمام حقوق صرف زمین ڈاٹ کام کو حاصل ہیں۔ اس ایونٹ میں شرکاء کو بہترین ڈیلز اور خصوصی آفرزبھی پیش کی گئیں۔
اس موقع پر گفتگو کرتے ہوئے زمین ڈاٹ کام کےسینئر ڈائریکٹر سیلز نارتھ حسن دانش نے کہا کہ پراپرٹی سیلز ایونٹس کا مقصد ایک ہی جگہ پر شاندار اور منافع بخش تعمیراتی منصوبوں کے حوالے سے شہریوں کو مکمل معلومات فراہم کرنا ہے، زمین ڈاٹ کام کی جانب سے پیش کردہ منصوبے بہترین اور قابل اعتماد ہونے کی بدولت شہریوں میں یکساں مقبول ہیں ۔
زمین ڈاٹ کام کے ڈائریکٹر پراجیکٹ سیلز نارتھ خرم حسین کا کہنا تھا کہ زمین ڈاٹ کام نے پراجیکٹ سیلز کی دنیا میں اپنی شاندار خدمات سرانجام دی ہیں جس کی وجہ سے آج ملکی معیشت میں رئیل اسٹیٹ سیکٹر ایک مرکزی شعبے کی حیثیت رکھتا ہے، اس ایک شعبے کی مزید تعمیر وترقی سے پچاس سے زائد دیگر منسلک صنعتیں بھی ترقی کی منازل طے کریں گی۔ پراپرٹی سیلز ایونٹ کے دوران زمین ڈاٹ کام کی باخبر سیلز ٹیم نے مارکیٹ کی صورتحال، تحقیق اور مکمل اعداد و شمار پر مشتمل پریزنٹیشن کے ذریعے صارفین کو محفوظ سرمایہ کاری کے حوالے سے رہنمائی اور معلومات بھی فراہم کیں۔

لاہور(ویب ڈیسک) مسلم لیگ ن کی رہنما عظمیٰ بخاری نے فیصل آباد میں پی ڈی ایم کے جلسے میں ایک نوجوان کو تھپڑ مادیا۔
فیصل آباد میں پاکستان ڈیموکریٹک موومنٹ کے جلسے میں عوام کی بڑی تعداد نے شرکت کی اور خوب جوش و خروش کا مظاہرہ کیا تھا،عظمیٰ بخاری سیاہ رنگ کی گاڑی میں ن لیگ کی دیگر خواتین رہنماؤں کے ہمراہ جلسے میں شرکت کے لیے پہنچیں اور جب گاڑی سے اترنے لگیں تو ان کے قریب کارکنوں اور گارڈز کا ہجوم تھا۔ اسی دوران کسی بات پر عظمیٰ بخاری نے ایک نوجوان کو غصے میں تھپڑ دے مارا۔ انہوں نے پوچھا یہ کس کے ساتھ ہے تو کسی نے جواب دیا کہ یہ سیکورٹی میں ہے۔ جس پر عظمی بخاری نے اس نوجوان کے بازو پر لگا بیج بھی اتاردیا۔بعدازاں نوجوان کو تھپڑ مارنے پر عظمیٰ بخاری نے ردعمل میں کہا کہ یہ پی ڈی ایم کا جلسہ ہے جس میں 10 جماعتیں ہیں، جب اتنا ہجوم ہو تو تھوڑی بہت دھکم پیل تو ہوجاتی ہے یہ کوئی بڑی بات نہیں، کچھ نہیں ہوتا، داخلی دروازے پر چھوٹے موٹے مسئلے ہوجاتے ہیں، اس میں کون سی بڑی بات ہے۔

نئی دہلی(ویب ڈیسک) بھارتی اداکارہ، ماڈل اور ڈانسر نورا فتیحی کو 200 کروڑ کے فراڈ اور منی لانڈرنگ کیس میں طلب کیا گیا ہے۔
بھارتی میڈیا کے مطابق نورافتیحی کو قانون نافذ کرنے والے ادارے انفورسمنٹ ڈائریکٹوریٹ، جسے مختصراً ای ڈی کہا جاتا ہے، نے کیس میں سمن جاری کیا ہے۔
بھارتی نیوز ایجنسی اے این آئی کے مطابق نورا کو سمن جاری ہونے کے بعد ای ڈی آفس کے باہر دیکھا گیا۔ اے این آئی نے آج صبح ٹوئٹ کیا کہ اداکارہ نورا فتیحی سکیش چندراشیکھر فراڈ کیس کے سلسلے کی تحقیقات میں شامل ہونے کے لیے انفورسمنٹ ڈائریکٹوریٹ کے آفس پہنچیں۔
اس سے قبل اداکارہ جیکولین فرنینڈس نے بھی اگست میں اسی کیس کے سلسلے میں انفورسمنٹ ڈائریکٹوریٹ میں بطور گواہ اپنا بیان ریکارڈ کروایا تھا۔ ای ڈی 5 گھنٹوں تک اداکارہ سے پوچھ گچھ کرتی رہی۔
بھارتی میڈیا کے مطابق انفورسمنٹ ڈائریکٹوریٹ نے اداکارہ جیکولین فرنینڈس کو 15 اکتوبر کو دوبارہ پوچھ گچھ کے لیے ای ڈی آفس بلایا ہے۔
واضح رہے کہ 200 کروڑ کے فراڈ، بھتہ خوری اور منی لانڈرنگ کیس میں سکیش چندرا شیکھر نامزد ملزم ہیں۔ اداکارہ جیکولین فرنینڈس اس شخص کی قریبی دوست اور پارٹنر لینا پال کے ذریعے اس ریکٹ کا شکار ہوئیں۔
بھارتی میڈیا کے مطابق سکیش چندرا شیکھر جیل کے اندر سے بھتہ خوری کا ریکٹ چلا رہاتھا اور ایک تاجر سے 200 کروڑ روپے بھتہ لیا۔ انفورسمنٹ ڈائریکٹر نے اپنے بیان میں کہاتھا کہ چندرا شیکھر اس فراڈ کا ماسٹر مائنڈ ہے۔ وہ 17 سال کی عمر سے جرائم کی دنیا کا حصہ رہا ہے۔ اس کے خلاف پولیس اسٹیش میں کئی شکایات درج ہیں اور وہ جیل میں بند ہے۔

لاہور(ویب ڈیسک)ایف آئی اے نے خواتین کی نازیبا ویڈیوز اور تصاویر وائرل کرنے والی ہیکر خاتون کو گرفتار کرلیا ہے۔میڈیارپورٹس کے مطابق خواتین کی نازیبا ویڈیوز اور تصاویر جاری کرنے والی ہیکر خاتون نے بلیک میلنگ میں مردوں کو پیچھے چھوڑ دیا، تاہم ایف آئی اے نے ملزمہ کو گرفتار کرلیا۔ گرفتار ہونے والی ہیکر خاتون کے بارے میں ایف آئی اے کی تحقیقات میں اہم انکشافات سامنے آئے۔
ایف آئی آر میں بتایا گیا ہے کہ حنا محمود نامی خاتون ہیکر نے بلال شبیر نامی ایک شہری کے جی میل، اسنیپ چیٹ، ہاٹ میل، اسکائپ اور انسٹاگرام کے اکاؤنٹ ہیک کئے، اکاؤنٹ ہیک کرنے کے بعد اس پر عائشہ اور حفظہ نامی لڑکیوں کی قابل اعتراض تصاویر اور ویڈیوز شیئر کیں، واٹس ایپ کے دو نمبروں کے ذریعے بھی خواتین کی ویڈیوز کو وائرل کیا، اور مکار ہیکر نے اپنی شناخت چھپانے کے لئے وی پی این کا سہارا بھی لیا تاکہ اسے ٹریس نہ کیا جاسکے۔
ایف آئی اے نے بلال شبیر اور عائشہ کی شکایت پر موبائل ڈیٹا کی مدد سے چالاک ملزمہ حنا محمود کو لوکیٹ کرکے اسے گرفتار کیا، ملزمہ سے برآمد ہونے والے موبائل میں قابل اعتراض مواد اور واٹس ایپ نمبر موجود پائے گئے، ملزمہ کے موبائل پر ویڈیوز وائرل کرنے کے لئے بلال شبیر کی مختلف آئی ڈیز استعمال ہورہی تھیں، درخواست گزاروں کے خلاف قابل اعتراض مواد بھی موبائل فون سے برآمد ہوا۔

لاہور(ویب ڈیسک)سابق کپتان فضل محمود اور عبدالقادر کو پی سی بی کے ہال آف فیم میں شامل کرلیا گیا ہے۔پاکستان کرکٹ بورڈ کے بیان کے مطابق قومی کرکٹ ٹیم کے سابق کپتان فضل محمود اور عبدالقادر کو پی سی بی کے ہال آف فیم میں شامل کرلیا گیاہے۔ اس سے قبل حنیف محمد، عمران خان، جاوید میانداد، وسیم اکرم، وقار یونس اور ظہیر عباس پی سی بی کے ہال آف فیم میں شامل ہوچکے ہیں۔
دونوں کھلاڑیوں کو ووٹنگ کے ایک شفاف عمل کے تحت پی سی بی کے ہال آف فیم کا حصہ بنایا گیا ہے۔ اس عمل کے تحت پی سی بی کی کرکٹ کمیٹی نے چند نامور کھلاڑیوں کی فہرست تشکیل دی۔ اس فہرست میں انہیں شامل کیا گیا جنہیں انٹرنیشنل کرکٹ سے ریٹائرمنٹ لیے ہوئے کم از کم پانچ سال کا عرصہ گزر چکا ہو۔
اس حوالے سے 13 رکنی آزاد ووٹنگ پینل میں آئی سی سی ہال آف فیم کے تین ارکان، پاکستان کے چار سابق کپتانوں اور پرنٹ اور الیکٹرانک میڈیا سے تعلق رکھنے والے چھ صحافیوں نے ووٹ کا استعمال کیا۔ایک انٹرنل آڈیٹر نے اس عمل کی نگرانی کی۔

پی سی بی ہال آف فیم میں شامل 8 کھلاڑیوں (بشمول پاکستان سے تعلق رکھنے والے آئی سی سی کے 6 ہال آف فیمرز) کی باضابطہ شمولیت اس کرکٹ سیزن کے دوران کی جائے گی۔چیئرمین پی سی بی رمیزراجا نے کہا کہ ہم سب جانتے ہیں کہ فضل محمود اور عبدالقادر دو مختلف ادوار میں کرکٹ کے لیجنڈز رہے ہیں۔ ان دونوں کھلاڑیوں کو اپنے ساتھیوں اور مداحوں کی طرف سے پی سی بی ہال آف فیم میں شامل کرنا ان کی مقبولیت اور کھیل کے لیے خدمات کا اعتراف ہے۔ فضل محمود کی بہادری نے پاکستان کرکٹ کو ابتدائی ایام میں دنیا کے سامنے ایک قوت کے طور پر متعارف کرایا ۔ انہوں نے اپنے کھیل کے ذریعے نوجوانوں کو فاسٹ باؤلنگ کے لیے بھی متاثر کیا۔ جادوگر اسپنر عبدالقادر نے کلائی کے استعمال سے اسپن باؤلنگ کے ختم ہونے والے فن کو دوبارہ زندہ کیا۔

رمیز راجا نے کہا کہ فضل محمود اور عبدالقادر 2 شاندار کھلاڑی ہونے کے ساتھ ساتھ پاکستان اور عالمی کرکٹ کے شاندار سفیر بھی تھے۔

فضل محمود کا تعارف:

فضل محمود کو پاکستان کی کرکٹ کا سب سے پہلا سپر اسٹار مانا جاتا ہے ،وہ 18 فروری 1927 کو لاہور میں پیدا ہوئے اور انہوں نے 1952 سے 1962 تک 34 ٹیسٹ میں 139 وکٹیں حاصل کیں جن میں 13 مرتبہ ایک اننگز میں پانچ وکٹیں اور ایک میچ میں چار مرتبہ 10 یا اس سے زیادہ وکٹیں حاصل کرنا شامل تھا۔ تاہم ، ان کے فرسٹ کلاس کیریئر کا آغاز چھ سال قبل ہوا تھا جب انہوں نے رانجی ٹرافی میں شمالی ہندوستان کی نمائندگی کی تھی۔ انہوں نے 112 میچوں میں 466 وکٹیں حاصل کیں۔

1952 میں بھارت میں پاکستان کی پہلی ٹیسٹ سیریز میں ، فضل محمود نے 20 وکٹیں حاصل کیں ، جس میں لکھنؤ ٹیسٹ میں 12 وکٹیں کرنا بھی شامل تھا ۔ پاکستان نےیہ ٹیسٹ ایک اننگز اور 43 رنز سے جیتا تھا۔ سیزن 55-1954 میں فضل محمود نے چار ٹیسٹ میچز میں 15 وکٹیں حاصل کیں ، جبکہ سیزن 61-1960 میں انہوں نے پانچ ٹیسٹ میچز میں نو وکٹیں حاصل کیں۔

فضل محمود 1955 میں ، ویزڈن کے پانچ کرکٹرز آف دی ایئر میں شامل ہونے والے پہلے پاکستانی کرکٹر تھے، ایک سال بعد ان کی پرفارمنس نے پاکستان کو انگلینڈ کے خلاف اپنی پہلی سیریز ڈرا کرنے میں مدد کی۔انہوں نے چار ٹیسٹ میچز پر مشتمل سیریز میں 20 وکٹیں حاصل کیں ۔

فضل محمود نے سیزن 58-1957 میں دورہ کیریبین میں 20 وکٹیں حاصل کیں۔ انہیں 1958 میں صدر پاکستا ن نے پرائیڈ آف پرفارمنس ایوارڈ دیا گیا۔ 2012 میں ، انہیں پاکستان کرکٹ کے لیے ان کی خدمات کے اعتراف میں ہلال امتیاز-دوسرا اعلیٰ ترین سول ایوارڈسے نوازا گیا۔

عبدالقادر کا تعارف:

عبد القادر نے کُل 236 وکٹیں حاصل کیں (15 مرتبہ ایک اننگز میں پانچ وکٹیں اور پانچ مرتبہ ایک میچ میں 10 وکٹیں) اور 1029 رنز بنائے ۔ وہ ایک روزہ کرکٹ میں انتہائی کارآمد ثابت ہو تے تھے ۔ 132 وکٹیں حاصل کر کے ۔ انہوں نے 1984 سے 1993 تک 104 ون ڈے میں 641 رنز بنائے۔ 1975 سے 1995 تک 209 فرسٹ کلاس میچز میں انہوں نے 960 وکٹیں حاصل کیں اور 3،740 رنز بنائے ، جس میں دو سنچریاں بھی شامل ہیں۔

15 ستمبر 1955 کو لاہور میں پیدا ہونے والے عبدالقادر نے 1977 میں انگلینڈ کے خلاف ٹیسٹ کیریئر کا آغاز کیا اور حیدرآباد میں صرف اپنے دوسرے میچ میں چھ وکٹیں حاصل کیں ۔ انہیں کچھ ہی عرصےبعد اپنی نوعیت کی “سب سے قابل ذکر دریافت” قرار دیا۔ انہوں نے لاہور میں کھیلے گئے ایک میچ میں نے 56 رنز کے عوض 9 وکٹیں حاصل کیں ۔

عبدالقادر کے یادگار باؤلنگ سپلیز میں سے ایک فیصل آباد ٹیسٹ1986 میں مضبوط ویسٹ انڈیز کے خلاف شامل تھا۔ انہوں نے اس میچ میں ویو رچرڈز کی ٹیم کو 53 رنز پر آؤٹ کرکے پاکستان کو 186 رنز سے فتح دلا دی ۔

عبدالقادر 1983 اور 1987 کے ورلڈ کپ میں بھی نمایاں رہے ، انہوں نے نو میچوں میں 24 وکٹیں حاصل کیں ، جن میں سری لنکا کے خلاف ہیڈنگلے میں 44 رنز دے کر پانچ وکٹیں حاصل کرنا بھی شامل تھا۔
د
1988 میں عبدالقادر کو پرائیڈ آف پرفارمنس ایوارڈ ملا جبکہ 2020 میں انہیں ستارہ امتیاز سے نوازا گیا ، جو پاکستان کا تیسرا اعلیٰ ترین سول ایوارڈ ہے ۔

لندن (ویب ڈیسک) عمران خان کی سابق اہلیہ جمائما نے شوہر سے علیحدگی اور پاکستان چھوڑنے سے متعلق کہا ہے کہ میرے خلاف سیاسی بنیادوں پر کیسز بنائے جارہے تھے جنہیں عمران خان کو نشانہ بنانے کے لیے استعمال کیا جارہا تھا۔
برطانوی ویب سائٹ ایوننگ اسٹینڈرڈ کو انٹرویو دیتے ہوئے جمائما نے کہا ہے کہ پاکستان اس لیے چھوڑا کہ میں نے خود سے کافی بڑی عمر کے شخص سے شادی کی تھی جو سیاسی طور پر طاقت ور تھا، مجھ پر سیاسی بنیادوں پر کیسز بنائے جارہے تھے اور انہیں عمران خان کو نشانہ بنانے کے لیے استعمال کیا جارہا تھا۔
جمائما ںے عنقریب آنے والے اپنے ایک شو کے بارے میں کہا کہ انہیں مونیکا لیونسکی اور اپنی کہانی میں بہت مماثلت لگتی ہے۔ واضح رہے کہ اس شو میں جمائما نے مونیکا لیونسکی کا انٹرویو کیا جس میں سابق امریکی صدر بل کلنٹن اور مونیکا لیونسکی کے تعلق سے پیدا شدہ سیاسی بحران پر بات کی گئی۔
جمائما نے ارینج میرج کے بیان پر بات کرتے ہوئے کہا کہ جب پاکستان گئی تو ارینج میرج کے بارے میں میرے خیالات منفی تھی تاہم دس سال بعد جب واپس لوٹی تو ارینج میرج کے کچھ فوائد نظر آرہے تھے، جب میں پاکستان میں تھی تو ارینج میرج بھی کرواتی تھی حتی کہ عمران خان کے بہت سے دوستوں کے بچوں کی شادیاں بھی کرائیں۔