All posts by News Desk

جنیوا(ویب ڈیسک) یونیسیف کے ڈپٹی ایگزیکیٹو ڈائریکٹر عمر عبدی نے کہا ہے کہ طالبان بہت جلد ملک بھر میں چھٹی جماعت سے میٹرک تک لڑکیوں کی تعلیم کے لیے اسکول کھولنے کا اعلان کردیں گے۔
عالمی خبر رساں ادارے کے مطابق اقوام متحدہ کے ادارے برائے امدادِ اطفال ’’یونیسیف‘‘ کے ڈپٹی ایگزیکیٹو ڈائریکٹر عمر عبدی نے گزشتہ ہفتے افغانستان کا دورہ کیا اور جنگ کے زخم خوردہ ملک کے بچوں کی صحت، تعلیم، خوراک اور مستقبل کے حوالے سے طالبان حکومت کے نمائندوں سے گفتگو کی۔
اقوام متحدہ کے مرکزی دفتر میں میڈیا سے بات چیت میں عمر عبدی نے بتایا کہ طالبان حکومت بچیوں کے ماڈل سیکنڈری اسکول کے قیام پر کام کر رہی ہے اور ایک سے دو ماہ کے اندر ان اسکولوں کو کھولنے کا اعلان کردے گی۔
یونیسیف کے ڈپٹی ایگزیکیٹو ڈائریکٹر نے صحافیوں کو بتایا کہ اس وقت ملک بھر میں بچیوں کے پرائمری اسکول کھولے ہیں اور 34 صوبوں میں سے 5 صوبوں (بلخ، جوزجان، سمنگان، قندوز اور اروزگان) میں پہلے ہی سے لڑکیوں کی ثانوی تعلیم بھی جاری ہے۔
ڈپٹی ایگزیکیٹو ڈائریکٹر عمر عبدی کے مطابق طالبان حکومت کے وزیر تعلیم نے بتایا ہے کہ وہ ایک “فریم ورک” پر کام کر رہے ہیں جو تمام لڑکیوں کو چھٹی جماعت سے آگے اپنی تعلیم جاری رکھنے کی اجازت دے گا تاہم اس پر ایک سے دو ماہ میں عمل درآمد ہونا ممکن ہوگا۔
عمر عابدی نے مزید بتایا کہ افغانستان میں گزشتہ دو دہائیوں کے دوران 40 لاکھ لڑکیوں نے تعلیم جاری رکھی اور اسکولوں کی تعداد 6 ہزار سے بڑھ کر 18 ہزار ہو گئی تھی تاہم اب نئی صورت حال میں 26 لاکھ لڑکیوں سمیت 42 لاکھ بچے اسکول جانے سے محروم ہیں۔

لاہور(ویب ڈیسک)مسلم لیگ کی نائب صدر مریم نواز نے کہا ہے کہ وزیراعظم عمران خان کے گرد پٹرول مافیا نے گھیرا ڈالا ہوا ہے۔مریم نواز نے جاتی امراء رائیونڈ میں میڈیا سے گفتگو کرتے ہوئے کہا کہ پٹرول اور ڈیزل مافیا نے عمران خان کے اردگرد گھیرا ڈالا ہوا ہے، عوام کے پیسے سے ان سب کی جیبیں بھری گئی ہیں، موجودہ حکومت میں ہر چیز مہنگی ہوگئی ، ہر ایک کےپاس ایسی اے ٹی ایمز نہیں ہوتیں جو عمران خان کا کچن چلاتی ہیں ، پینڈورا پیپرز سے عمران خان کی اے ٹی ایم کے نام سامنے آئے ، ملک میں بہت سے لوگوں کی آمدن بیس ہزار سے کم ہے، سب بنی گالا میں نہیں رہتے ، حکومت نے عوام کو جتنا درد اور تکلیف دی اس کا ازالہ نہیں ہوسکتا ، حکومت کو یہ پتہ نہیں آج گئی یا کل گئی ، لوگ بجلی،گیس کے بل کہاں سے بھریں گے۔
مریم نواز نے کہا کہ ملک میں ڈینگی سے نہیں بلکہ حکومتی نالائقی سے اموات ہورہی ہیں، حکمرانوں کی پہلے اپوزیشن سے انتقام پر توجہ تھی اور اب حکومت بچانے پر ہے، عوام جانتے ہیں ملک سے کیا کھیل کھیلا جارہاہے، شہبازشریف اقتدار میں ہوتے تو ادویات گھروں میں پہنچتی تھیں، عمران خان ان پر ڈرامہ کرنے کا الزام لگاتے تھے، یہ اتنی بے حس حکومت ہے جس سے ڈرامہ بھی نہیں ہورہا، عوام جھولی اٹھاکر حکومت کو بددعا دے رہے ہیں، ن لیگ اور پی ڈی ایم شاید ابھی لانگ مارچ کی تیاری نہیں کررہیں، حکومت نے خود اپنے خلاف لانگ مارچ کی تیاری کرلی ہے، پہلے حکومت کی اپوزیشن کو مارنے کی کوشش تھی اور اب خود کو بچانے پر توجہ ہے، اپنی نالائقی سے حکومت کا 9 سال کا پلان تباہ و برباد ہوگیا ہے، 2023 تو دور کی بات حکمرانوں کیلئے 2021ء مکمل کرنا مشکل ہے، روز ان کی دوڑیں لگ رہی ہیں اور ہمیں چیزیں نظر آرہی ہیں، نوشتہ دیوار کو پڑھنا مشکل نہیں۔
مریم نواز کا کہنا تھا کہ عمران خان حکومت کو بچانے کے لیے جوڑ توڑ حساب کتاب میں مصروف ہیں کہ ع سے شروع ہوتا ہے یا ف سے، مارچ ٹھیک یا دسمبر ٹھیک ہے، وہ ان چیزوں میں الجھا ہے اس کی بلا سے غریب عوام پس جائے، غریب آدمی ختم ہوجائے۔
امریکی سفارتخانے کی ناظم الامور انجیلا ایگلر سے ملاقات سے متعلق سوال کے جواب میں مریم نواز نے کہا کہ ان سے بہت سے معاملات پر بات ہوئی ہے، جو لوگ امریکی صدر جوبائیڈن کے فون کا انتظار کررہے ہیں ان کے لیے تو یہ ایک بہت بڑی خبر ہے، میں نے اپنی اور ن لیگ کی طرف سے پاکستان سے متعلق خدشات سے امریکی ناظم الامور کو آگاہ کیا، ملاقات میں پارٹی کے سینئر لوگ بھی شریک ہوئے تھے۔

مریم نواز نے مزید کہا کہ کسی کا نام نہیں لوں گی لیکن ہر پارٹی میں ہر طرح کے لوگ ہیں اور ہر قسم کی سوچ ہوتی ہے، ہماری پارٹی میں جو لوگ ڈر رہے تھے ان کا ڈر بھی اب اتر گیا ہے اور پتہ چل گیا کہ نواز شریف جو کہہ رہے تھے ٹھیک کہہ رہے تھے۔

اسلام آباد(ویب ڈیسک) حکومت نے پٹرولیم مصنوعات کی قیمتوں میں 12 روپے 44 پیسے فی لیٹر تک اضافہ کردیا۔
وزارت خزانہ نے آئندہ 15 روز کے لیے پیٹرولیم مصنوعات کی قیمتوں میں 12 روپے 44 پیسے فی لیٹر تک اضافہ کردیا ہے۔ نئی قیمتوں کا اطلاق 31 اکتوبر تک ہوگا۔
نوٹی فکیشن کے مطابق آج سے پیٹرول 10 روپے 49 پیسے فی لیٹر اضافے کے بعد 137روپے 79 پیسے فی لیٹر ملے گا۔ ہائی اسپیڈ ڈیزل کی قیمت میں 12روپے 44 پیسے اور لائٹ ڈیزل کی قیمت میں 8 روپے 84 پیسے اضافہ کیا گیا ہے، مٹی کے تیل کی قیمت 10روپے 95 پیسے اضافے کے بعد 110 روپے 26 پیسے فی لیٹر مقرر کی گئی ہے۔
اس طرح ہائی اسپیڈ ڈیزل کی قیمت 122.04 روپے سے بڑھ کر 134.48 روپے فی لیٹر اور لائٹ ڈیزل کی قیمت 99.51 روپے سے بڑھ کر 108.35 روپے فی لیٹر کردی گئی ہے۔یاد رہے کہ اوگرا کی جانب سے پیٹرول کی قیمت 5روپے 90پیسے فی لیٹر تک بڑھانےکی تجویز کی گئی تھی۔واضح رہے کہ گزشتہ روز وفاقی کابینہ نے بجلی مہنگی کرنے کی منظوری دے دی جس کے بعد بجلی کی قیمت میں ایک روپے 68 پیسے اضافہ کیا گیا ہے۔

پاکستان اسکواش فیڈریشن نے مصحف اسکواش کمپلیکس اسلام آباد میں مردوں کے چیف آف دی ائیر سٹا ف ۔ سیرینا ہوٹلز انٹرنیشنل اسکواش ٹورنامنٹ اور خواتین کے سیرینا۔کومبکس اسپورٹس انٹرنیشنل اسکواش ٹورنامنٹس، پاک فضائیہ، سیرینہ ہوٹلز اورکومبکس سپورٹس کے مشترکہ تعاون سے  11 تا 15 اکتوبر 2021 منعقد کروائے۔ پاکستان کے بشمول دنیا کے 11 مختلف ممالک آسٹریا، جمہوریہ چیک، مصر، انگلینڈ، فرانس، ہانگ کانگ، روس، سربیا، سپین اور سوئٹزرلینڈ کے 22 کھلاڑی اس ایونٹ کے مردوں اور خواتین کے مقابلوں میں شریک ہوئے۔

مردوں اور عورتوں کے ایونٹس کے فائنلز آج کھیلے گئے۔ سربراہ پاک فضائیہ ائیر چیف امارشل ظہیر احمد بابر سدھو، جو پاکستان اسکواش فیڈریشن کے صدر بھی ہیں، اختتامی تقریب کے مہمانِ خصوصی تھے۔ انہوں نے فائنل کھیلنے والے کھلاڑیوں میں ٹرافیاں اور انعامات تقسیم کئے۔

خواتین کا فائنل عالمی نمبر 69 فرانس کی میری اسٹیفن اور مصر کی عالمی نمبر 81 سلمیٰ الطیب کے درمیان کھیلا گیا جس میں سلمیٰ الطیب نے مدِمقابل کھلاڑی کو 18 منٹ جاری رہنے والے مقابلے میں 11-6,12-10,11-04  کے گیم سکور کے ساتھ  شکست دی جبکہ مردوں کا فائنل عالمی نمبر 59 فرانس کے آگسٹ ڈسورڈ اور عالمی نمبر 67 مصر کے مصطفیٰ ال سرٹی کے درمیان کھیلا گیا جس میں مصطفیٰ ال سرٹی نے مدِمقابل کھلاڑی کو 47 منٹ جاری رہنے والے مقابلے میں 09-11, 11-07, 11-06, 12-10  کے گیم سکور کے ساتھ  شکست دیکر چیمپئن شپ کا فائنل جیت لیا۔

ان ایونٹس کی کامیاب میزبانی کے ساتھ توقع ہے کہ دنیا بھر سے بڑی تعداد میں غیر ملکی کھلاڑیوں کی شرکت کھیلوں کے میدان میں پاکستان کا مثبت پہلو اجاگر کرے گی اور مستقبل میں پاکستان کو زیادہ انعامی رقم کے بین الاقوامی ٹورنامنٹس ملنے میں مدد حاصل ہو گی۔

اسلام اباد(ویب ڈیسک)وزیراعظم عمران خان نے کسان پورٹل کے اجرا کی تقریب سے خطاب کیا.وزیراعظم عمران خان نے کہا کہ تحریک انصاف نے انصاف کی تحریک چلائی، اللہ تعالیٰ کمزور اور محنت کش طبقے کی آواز خاص طور پر سنتا ہے، چھوٹا آدمی انصاف کی تلاش میں رہتا ہے۔
انہوں نے ایک بار پھر اپوزیشن رہنماؤں کو آڑے ہاتھوں لیتے ہوئے کہا کہ چھوٹا کسان باہر پیسہ لے کر نہیں جائے گا، لندن میں فلیٹ نہیں لے گا، بڑا آدمی انصاف نہیں این آر او چاہتا ہے، چھوٹا کسان قرضہ لینے جاتا ہے تو اسے بہت سود دینا پڑتا ہے، چھوٹا کسان سب سے زیادہ محنت کرتاہے اور مشکلات کا بھی سامنا کرتا ہے۔

عمران خان کا کہنا تھا کہ کسان شوگر ملوں کے باہر لائن میں کھڑے رہتے تھے، کسانوں کو گنے کی کم قیمت ملتی تھی، میں نے سوچا تھا جب میری باری آئے گی تو کسان کو پورا پیسہ دلاؤں گا۔انہوں نے مزید کہا کہ 50سال بعدپاکستان میں بڑے ڈیمزبن رہے ہیں، دریاؤں میں پانی برسات اور گلیشیئر پگھلنے سے آتا ہے، پانی اسٹورکریں گے تو کسان کو پانی دے سکیں گے۔

لاہور(ویب ‌ڈیسک) کینال ہاؤسنگ سوسائٹی میں طالب علم کو سوشل میڈیا پر اسلحے کی ویڈیو اپ لوڈ کرنا مہنگا پڑگیا۔
حسین آصف نے کالج کے کلاس روم میں بیگ سے پستول نکل کر ویڈیوز اسنیپ چیٹ پر اپ لوڈ کر دی تھی۔ویڈیو اپ لوڈ ہوتے ہی امریکن انتظامیہ نے انٹرپول کے ذریعے رابطہ کیا کہ یہ لڑکا کالج میں فائرنگ اور طالب علموں کو قتل کرسکتا ہے اور جانی نقصان کا خطرہ ہے۔ انٹرپول سے پاکستان ایمرجنسی کال آئی کہ معاملے پر فوری کارروائی کی جائے۔
ڈی جی ایف آئی اے کی ہدایت پر سائبر ونگ نے فوری کارروائی کرتے ہوئے کینال ہاؤسنگ سوسائٹی سے حسین آصف کو گرفتار کر لیا جو ایک نجی کالج کا اسٹوڈنٹ ہے۔ ایف آئی اے سائبر ونگ کے مطابق ملزم سے برآمد پستول نقلی نکلا۔ایف آئی اے سائبر ونگ کے ڈائریکٹر بابر بخت قریشی نے رپورٹ ڈی جی کو بھجوا دی کہ پستول اصلی نہیں بلکہ کھلونا تھا۔ ڈی جی ایف آئی اے نے رپورٹ انٹر پول کے ذریعے امریکن انتظامیہ کو بھجوا دی۔

اسلام آباد(ویب ڈیسک) وزیراعظم آفس کو نئے ڈی جی آئی ایس آئی کی تقرری کے لیے وزارت دفاع کی جانب سے سمری موصول ہوگئی ہے۔

میڈیارپورٹس کے مطابق وزارت دفاع کی جانب سے نئے ڈی جی آئی ایس آئی کی تقرری کے لیے سمری وزیراعظم آفس کو بھجوادی گئی ہے، وزیراعظم کی منظوری کے بعد نئے ڈی جی آئی ایس آئی کی تقرری کا اعلان کیا جائے گا۔
اس سے قبل اپنی ٹوئٹ میں فواد چوہدری نے کہا تھا کہ وزیر اعظم عمران خان اور آرمی چیف جنرل قمر جاوید باجوہ کے درمیان نئے ڈی جی آئی ایس آئی کی تقرری پر مشاورت کا عمل مکمل ہو چکا ہے اور نئی تقرری کا عمل بھی شروع ہو چکا ہے۔ذرائع کا کہنا ہے کہ گزشتہ روز وفاقی کابینہ کے اجلاس میں بھی سول ملٹری تعلقات کے حوالے سے قیاس آرائیوں پر گفتگو ہوئی تھی۔ وزیر اعظم نے پاک فوج میں تبادلوں سے متعلق کابینہ ارکان کو اعتماد میں لیا اور کہا کہ اہم عہدوں پر تعیناتیوں کے حوالے سے کوئی اختلاف نہیں اس معاملے میں ہونے والی قیاس آرائیوں پر توجہ نہ دیں۔

لاہور (ویب ڈیسک)مسلم لیگ ن کی نائب صدر مریم نواز نے وزیراعظم عمران خان پر الزام لگایا ہے کہ یہ اہم تقرریاں جادو ٹونے سے کرتے ہیں۔مریم نواز نےاسلام آباد میں میڈیا سے گفتگوکی .انہوں نے کہا کہ نیب نے میری ضمانت منسوخی کی درخواست دی ہے میں اس ہمدرد کو دیکھنا چاہتی ہوں، اس شخص کا چہرہ قوم کو دکھانا چاہیے اوراس کو21 نہیں 22 توپوں کی سلامی دینی چاہیے۔ انہوں نے کہا کہ میں نہ گرفتاری سے ڈرتی ہوں اور نہ جعلی مقدمے سے ، ضمانت منسوخ کریں اور گرفتار کریں تاکہ لوگوں کو پتا چلے کہ آپ کتنا ڈرتے ہیں۔
مریم نواز نے وزیراعظم کوشدید تنقید کا نشانہ بناتے ہوئے کہا کہ عمران خان آئینی وزیراعظم نہیں ہیں،جادو ٹونا اتنا ہی کامیاب ہے تو عوام کی بھلائی کے لیے استعمال کیوں نہیں کرتے؟جنتر منتر اتنا کامیاب ہے تو پیٹرول، ڈیزل، آٹا، سستا کریں، جب آپ جنات کے ذریعے یہ سب کریں تو یہ ہی ہو گا، جنات کچھ اور کہہ رہے ہیں اور آپ کا حساب کچھ اور، ایسے لوگوں پر ہنسی آتی ہے، اگریہی طریقہ رہا تو ملک کا اللہ ہی حافظ ہے۔

اسلام آباد (ویب ڈیسک)پاکستان کرکٹ بورڈ سےوسیم خان کے مستعفی ہونے کے بعد چیف ایگزیکٹو کی تلاش کا آغاز کر دیا گیا ہے.تفصیلات کے مطابق پاکستان کرکٹ بورڈ نے چیف ایگزیکٹو آفیسر کیلئے اشتہار دے دیا ہےجس کےبعد عہدے کے خواہش مند اور معیار پر پورا اترنے والے امیدوار 27 اکتوبر تک درخواستیں جمع کرا سکتے ہیں۔
پی سی بی کے چیف ایگزیکٹو آفیسر کے عہدے کی مدت ابتدائی طور پر 3 سال کی رکھی گئی ہے، بورڈ میں سی ای او کا عہدہ اس وقت خالی ہے جب کہ سی او او سلمان نصیر کو قائم مقام چیف ایگزیکٹو آفیسر مقرر کیا ہوا ہے۔ وسیم خان کے مستعفی ہونے کے بعد چیف ایگزیکٹو آفیسر پی سی بی کا عہدہ خالی ہوا، ان کے عہدے کی مدت فروری 2022 میں ختم ہونا تھا لیکن چیئرمین رمیز راجہ اور وسیم خان کے درمیان اختیارات کی وجہ سے اختلافات پیدا ہوئے اور وسیم خان نے اختیارات میں کمی دیکھتے ہوئے مدت ہونے ختم سے پہلے استعفیٰ دے دیا۔

سندھ (ویب ڈیسک) سابق وزیراعظم بینظیر بھٹو کی بڑی صاحبزادی بختاور بھٹو کے ہاں بیٹے کی پیدائش ہوئی ہے جس کے بعد بختاور بھٹو کی جانب سے NICU
کی ایک تصویر وائرل ہوئی ہے.اب بختاور بھٹو نے بچے کے انتہائی نگہداشت یونٹ میں ہونے کی وجہ سب کو بتادی ہے۔بختاور بھٹو نے ٹوئٹر پرایک پیغام جاری کیا اور تمام چاہنے والوں کا شکریہ ادا کیا۔بختاور نے لکھا کہ ان کے ہاں بیٹے کی پیدائش وقت سے تقریباً ایک ماہ قبل ہوئی ہے جس کے باعث نوزائیدہ کو طبی مسائل کا سامنا ہے، اسی تناظر میں بیٹے کو انتہائی نگہداشت یونٹ میں رکھا گیا ہے۔انہوں نے مزیدبتایا کہ بیٹے کی آمد 8 نومبر کو متوقع تھی لیکن اس نے 10 اکتوبر کو دنیا میں آکر ہم سب کو حیران کردیا، بیٹا فی الحال این آئی سی یو میں ہے لیکن دن بدن بہتر ہورہا ہے، اسے اپنی دعاؤں میں یاد رکھیں۔