All posts by News Desk

کابل (ویب ڈیسک) افغانستان میں خواتین کے کھیلوں پر پابندی کے حوالے سے اہم بیان سامنے آیا ہے.افغان طالبان نے وومن کرکٹ سمیت خواتین کے کھیلوں پر باضابطہ پابندی لگانے کی خبر کی تردید کی ہے۔الجزیرہ نے افغان کرکٹ بورڈ کے نومنتخب چیئرمین عزیز اللہ فضلی سے اس حوالے سے بات کی تو انہوں نے بتایا کہ ان کی طالبان حکومت کے اعلیٰ حکام سے بات ہوئی ہے جنہوں نے بتایا ہے کہ خواتین کے کھیلوں پر کوئی پابندی نہیں، ہمیں خواتین کے کھیلوں میں حصہ لینے سے کوئی مسئلہ نہیں۔عزیز اللہ فضلی نے مزید بتایا کہ انہیں طالبان نے خواتین کو کرکٹ کھیلنے سے روکنے کا حکم نہیں دیا .ان کا کہنا تھا کہ ہماری 18 سال سے خواتین کی کرکٹ ٹیم ہے، اگرچہ وہ محدود پیمانے پر ہے، تاہم ہمیں اس معاملے میں اپنے مذہب اور ثقافت کا خیال رکھنے کی ضرورت ہے، اگر خواتین شائستہ لباس پہنیں تو ان کا کھیلوں میں حصہ لینا معیوب نہیں، اسلام میں خواتین کو نیکر پہننے کی اجازت نہیں لہٰذا ہمیں اس چیز کا خیال رکھنا ہوگا۔

سلیم صافی کے قلم سے…..

بڑے سادہ ہیں وہ لوگ جو عمران خان کو سادہ سمجھتے ہیں۔ بلاشبہ اسٹیٹس مین شپ ان کے قریب سے بھی نہیں گزری لیکن سیاست میں ان کا کوئی ثانی نہیں۔ ضرورت ختم ہو تو اکبر ایس بابر سے لے کر جہانگیر ترین تک جیسے محسنوں کو پرے پھینکنے میں دیر نہیں لگاتے اور ضرورت پڑے تو شیخ رشید احمد اور بابر اعوان جیسے لوگوں کو بھی گلے لگالیتے ہیں جنہوں نے ٹی وی پر بیٹھ کر ان کے روبروان پر ذاتی حملے کئے تھے۔

مذہب کا کارڈ خان صاحب جس طرح استعمال کررہے ہیں، اس طرح ہمارے سیاسی مولویوں نے بھی کبھی نہیں کیا۔ پہلے میاں نواز شریف کے خلاف توہین رسالت اور مذہب کا کارڈ استعمال کیا۔ اقتدار میں آنے کے بعد اپنے گرد شہباز گل، زلفی بخاری اور اسد عمر جیسے لوگ جمع کئے لیکن نام ریاست مدینہ کا استعمال کرنے لگے۔ عدلیہ، میڈیا اور نیب جیسے اداروں کو جس طرح انہوں نے استعمال کیا، وہ بیس نواز شریف اور دس آصف زرداری مل کر بھی نہیں کرسکتے۔ قومی سلامتی کے اداروں کو جس قدر انہوں نے متنازعہ بنایا، وہ سینکڑوں نریندر مودی بھی نہیں بناسکتے۔

ان دنوں سیاسی ضرورتوں کے تحت عمران خان بولتے ہوئے وزیراعظم کم جبکہ علامہ، مورخ اور مبلغ زیادہ دکھنے کی کوشش کرتے ہیں۔ تاہم تاریخ کا حوالے دیتے ہیں تو بھی سلیکٹڈ دیتے ہیں اور کسی دینی حکم کا سہارا لیتے ہیں تو اس میں بھی مرضی کے مطابق سلیکشن کرلیتے ہیں۔ مثلاً ان دنوں انہوں نے ایک بار پھر حضرت عمرفاروق رضی اللہ عنہ کے ہاتھوں حضرت خالد بن ولیدؓ کی معزولی کا تذکرہ شروع کیا ہے اور ہر کوئی جانتا ہے کہ اس کے ذریعے وہ کس کو پیغام دینا چاہتے ہیں لیکن سوال یہ ہے کہ حضرت عمر فاروق ؓنے کیا صرف یہی ایک کام کیا تھا؟ جس کا وہ بار بار تذکرہ کرتے ہیں۔

حضرت عمر فاروقؓ کی شہرت تاریخ کے سب سے بڑے عادل حکمران کے حوالے سے ہے جس کا عمران خان کی حکومت میں نشان تک نہیں۔ سوال یہ ہے کہ وہ اس عدل کا ذکر کیوں نہیں کرتے ؟ آپؓ کی شہرت اس حوالے سے تھی کہ ان کے دور خلافت میں ان کے بیٹے کو سزا ہوئی جبکہ عمران خان نے اپنے آپ کو اور اپنے سب چہیتوں کو احتساب سے مبرا کردیا ہے۔ حضرت عمر فاروق ؓ وہ خلیفہ تھے کہ ان کے دسترخوان پر کبھی دو سالن نہیں رکھے گئے۔

کیا خان نے کبھی ان کی شخصیت کے اس پہلو کا ذکر کیا؟آپ رضی اللہ عنہ جب کسی سرکاری عہدے پر کسی شخص کا تقرر کرتے تو اس کے اثاثوں کا تخمینہ لگوا کر اپنے پاس رکھتے، کیا عمران خان نے شاہ محمود قریشی، زلفی بخاری اور دیگر سے متعلق ایسا کیا؟آپ رضی اللہ جب کسی کو گورنر بناتے تو اسے نصیحت فرماتے کہ کبھی ترکی گھوڑے پر نہ بیٹھنا، باریک کپڑے نہ پہننا، چھنا ہوا آٹا نہ کھانا، دربان نہ رکھنا اور کسی فریادی پر دروازہ بند نہ کرنا۔ کیا خود خان صاحب نے دربان نہیں رکھے؟ کیا وزیراعظم ہائوس اور بنی گالہ کے محل کے دروازے عام آدمی کے لئے کھلے ہیں؟ حضرت عمر فاروقؓ کا یہ فقرہ انسانی حقوق کے چارٹر کی حیثیت رکھتا ہے کہ ”مائیں بچوں کو آزاد پیدا کرتی ہیں، تم نے انہیں کب سے غلام بنا لیا ہے“۔

کیا خان نے اقتدار میں آنے کے بعد کبھی اس فقرے پر سوچا ؟ ان کے دور میں کتنے ہزار لوگ مسنگ ہیں؟ انہوں نے پرویز مشرف، زرداری اور نواز شریف کے دور کی دی ہوئی اظہار کی آزادی بھی چھین لی اور ایک ایک سیاسی مخالف حتیٰ کہ خواتین تک کو جیلوں میں ڈالا۔ حضرت عمر فاروق ؓ دنیا کےواحد حکمران تھے کہ جو فرمایا کرتے تھے کہ اگر فرات کے کنارے کوئی کتا بھی بھوک سے مر گیا تو اس کیباز پرس بھی عمر سے ہوگی۔ لیکن خان کی حکومت میں روزانہ کتنے لوگ بے گناہ قتل ہورہے ہیں۔

کیا انہوں نے حضرت عمر فاروق ؓکی سنت پر عمل کرتے ہوئے کبھی یہ سوچا کہ قیامت کے دن اس ایک ایک قتل کے لئے ان سے پوچھا جائے گا؟ لئےحضرت عمر فاروقؓ کی ایک وجہ شہرت یہ بھی ہے کہ آپ ؓکے دورِ خلافت میں مسلمانوں کو بے مثال فتوحات اور کامیابیاں نصیب ہوئیں۔ قیصر و کسریٰ کو پیوند خاک کرکے اسلام کی عظمت کا پرچم لہرانے کے علاوہ مسلمان فاتح بن کر شام، مصر، عراق، جزیرہ، خوزستان، عجم، آرمینہ، آذربائیجان، فارس، کرمان، خراسان اور مکران تک جا پہنچے۔ دوسری طرف عمران خان کی حکومت میں مودی نے ہم سے ہمارا کشمیر ہڑپ کرلیا اور ہم تماشہ دیکھتے رہ گئے۔

عمران خان صاحب اپنی تقریروں کا آغاز ایاک نعبدوایاک نستعین سے کرتے اورپھر روایتی سیاستدانوں والی باتیں شروع کرتے۔ میں نے کئی بار بالواسطہ اور بلاواسطہ سمجھانے کی کوشش کی کہ وہ اھدناالصراط المستقیم بھی ساتھ پڑھ لیا کریں لیکن وہ اور ان کے ساتھی صرف ایاک نعبدووایاک نستعین پر اکتفا کرتے۔ چنانچہ نتیجہ یہ ہوا کہ حکمران بننے کے بعد صراط مستقیم پر چلنے کے بجائے وہ یوٹرن پر یوٹرن لے رہے ہیں۔ اب میری ان سے گزارش ہے کہ وہ اگر حضرت عمر فاروق رضی اللہ کی شخصیت یا دور خلافت کا ذکر کرنا چاہتے ہیں تو صرف خالد بن ولید کے واقعے کو سلیکٹ نہ کریں۔

ان کی شخصیت کے دیگر محاسن، عدل، خوداحتسابی اور مثالی طرز حکومت کا بھی تذکرہ کریں۔ ویسے خان صاحب کی اطلاع کے لئے یہ بھی عرض ہے کہ حضرت عمر فاروقؓ کا بطور امیرالمومنین انتخاب ان کے انتخاب کی طرح متنازعہ نہیں تھا۔ان کا انتخاب حضرت ابوبکر صدیق رضی اللہ عنہ نے کیا تھا جس کے بعد تمام اکابر صحابہ اور مسلمانوں نے شورائیت کے اصولوں کے تحت انہیں امیرالمومنین مانا تھا۔ یہ بھی مدنظر رکھیں کہ خلفائے راشدین صرف حکمران نہیں بلکہ سپریم کمانڈر بھی تھے۔ کبھی عمران خان، حضرت خالد بن ولیدؓ کی معزولی کی وجہ بھی معلوم کرلیں۔

مورخین بتاتے ہیں کہ حضرت عمر فاروقؓ کو یہ احساس ہونے لگا تھا کہ کہیں مسلمان اپنی فتوحات کو اللہ کی نصرت کی بجائے ایک شخصیت سے منسوب نہ کرنے لگ جائیں۔ گویا حضرت عمر فاروقؓ شخصیت کو بت بنانے کی بجائے اجتماعیت اور شورائیت کے قائل تھے لیکن یہاں تو عمران خان نے کرکٹ میں پوری ٹیم کی فتح کو اپنی ذات کے کارنامے میں بدل دیا۔ اور ہاں حضرت خالد بن ولید کو معزول کرکے حضرت ابوعبیدہؓ جیسے جلیل القدر صحابی کو سپہ سالار مقرر کیا گیا تھا لیکن کیا قوم نہیں جانتی کہ عمران خان کا انتخاب شہباز گل، شبلی فراز، فردوس عاشق اعوان اور فیاض چوہان جیسے لوگ ہوا کرتے ہیں۔
بشکریہ جیو نیوز

لاہور(ویب ڈیسک) سائبر کرائمز سرکل لاہور نے نشہ آور مشروب پلا کر نرسز اور لیڈی ڈاکٹرز کی برہنہ ویڈیو بنانے والے ڈاکٹر کو گرفتار کر لیا.تفصیلات کے مطابق
نرسز اور لیڈی ڈاکٹرز کی برہنہ ویڈیو بنانے والےجناح ہسپتال کے ایک ڈاکٹر کو گرفتار کیا گیا ہے. ملزم کے موبائل سے متاثرہ خواتین کی 50 برہنہ ویڈیوز برآمد ہوئی ہیں .ایف آئی اے حکام کے مطابق ملزم مختلف بہانوں سے نرسز اور لیڈی ڈاکٹرزکو نشہ آور مشروب پلا کر ان کی برہنہ وڈیوز بنالیتا تھا اور اس گھناؤنے کام میں اس کے دیگر دوست بھی شامل تھے جن کے خلاف تحقیقات شروع کردی گئی ہیں.

ممبئی (ویب ڈیسک) بالی ووڈ اداکار اور سیاستدان شتروگھن سنہا نے کہا ہے کہ آریان خان کو اس لیے نشانہ بنایا جارہا ہے کیونکہ وہ شاہ رخ خان کا بیٹا ہے۔منشیات کیس میں گرفتار آریان کے حق میں بھارتی فلم انڈسٹری کے کئی اداکار آواز اٹھا رہے ہیں انہی میں سے ایک سینئر اداکار اور سیاستدان شتروگھن سنہا کا نام بھی شامل ہو گیا ہے.انہوں نے ایک انٹرویو کے دوران کہا کہ آریان خان کو شاہ رخ خان کا بیٹا ہونے کی وجہ سے نشانہ بنایا جارہا ہے۔ انڈسٹری سے وابستہ لوگ شاہ رخ خان کےلیے متحد ہونے میں وقت لے رہے ہیں اور چاہتے ہیں کہ کنگ خان اپنی جنگ خود لڑیں۔
شتروگھن سنہا نے مزید کہا کہ کوئی بھی سامنے نہیں آنا چاہتا۔ ہر کوئی یہ سوچ رہا ہے کہ یہ دوسرے شخص کا معاملہ ہے اور وہ خود ہی معاملے سے نمٹے۔ یہ انڈسٹری خوف زدہ لوگوں کا ایک گروپ ہے۔و شتروگھن سنہا نے کہا ہم نہیں کہہ سکتے کہ ان کا مذہب ان کے راستے میں آرہا ہے، لیکن کچھ لوگوں نے اب اس موضوع کو استعمال کرنا شروع کردیا ہے جوکہ بالکل ٹھیک نہیں ۔کوئی بھی شخص جو ہندوستانی ہے وہ ہندوستان کا بیٹا ہے اور ہمارے آئین کے مطابق سب برابر ہیں۔

غازی آباد (ویب ڈیسک) بھارت میں مسلمانوں پر ظلم کے واقعات بڑھتے جا رہے ہیں .شدت پسند ہندو مسلمانوں کو بھارت میں رہنے نہیں دے رہے.اسی سلسلے میں ایک افسوسناک واقعہ دیکھنے میں آیا ہے.انڈیا میں ایک پنڈت اور اس کے حواریوں نے 10 سالہ مسلم لڑکے کو شدید تشدد کا نشانہ بنایا .تفصیلات کے مطابق داسنا دیوی مندر میں 10 سالہ مسلم لڑکا غلطی سے داخل ہوگیا جس پر شدت پسند ہندو اور اس کے حواریوں نے اس پر بہیمانہ تشدد کیا اور پولیس کے حوالے کردیا۔پنڈت کے تشدد سے وہ مسلم لڑکا شدید زخمی ہوگیا جسے سفاک انتہا پسند ہندوؤں نے طبی امداد بھی فراہم نہیں کی. سوشل میڈیا پر تصاویر وائرل ہونے کی وجہ سے پولیس حرکت میں آئی اور پنڈت کے خلاف مقدمہ درج کیا مگرتاحال اسے گرفتار نہیں کیا گیا ہے۔

اسلام آباد (ویب ڈیسک) وزیر اعظم عمران خان اور آرمی چیف جنرل قمر جاوید باجوہ کے درمیان نئے ڈی جی آئی ایس آئی کی تقرری پر مشاورت مکمل ہو گئی ہے.تفصیلات کے مطابق وفاقی وزیر اطلاعات فواد چوہدری نے ٹوئٹر پرایک بیان میں کہا ہے کہ وزیر اعظم اور آرمی چیف میں نئے ڈی جی آئی ایس آئی کی تقرری پر مشاورت مکمل ہوگئی ہے اور نئےڈی جی آئی ایس آئی کی تقرری کاپراسس شروع ہوچکا ہے۔علاوہ ازیں ان کا کہنا تھا کہ ایک بارپھرسول اورفوجی قیادت نےثابت کردکھایا کہ ملک کے استحکام،سالمیت ،ترقی کے لئے ادارے متحد اور یکساں ہیں۔

پاکستان کرکٹ ٹیم کے سابق کپتان جاوید میانداد نے ٹی ٹوئنٹی ورلڈکپ میں پاک بھارت میچ کیلئے قومی ٹیم کو مشورہ دیا ہے، جاوید میانداد کا کہنا ہے کہ بھارت کے خلاف ہر کھلاڑی کو اپنی ذمہ داری کا احساس کرنا ہوگا اور ضروری نہیں پرفارمنس دینے والا ہی اچھا کھیلے۔ ان کا کہنا تھاکہ بھارت کے خلاف جیت کیلئے مستقل مزاجی ضروری ہے۔ جاوید میانداد کا کہنا تھاکہ رمیز راجہ جیت اور کرکٹ پر توجہ دیں۔
واضح رہے کہ ٹی ٹوئنٹی ورلڈکپ میں پاکستان اور بھارت کے درمیان میچ 24 اکتوبر کو کھیلا جائے گا۔

نئے ڈی جی آئی ایس آئی کی تقرری، اتھارٹی وزیراعظم ہیں، قانونی طریقہ کار اختیار کیاجائے گا،وفاقی وزیراطلاعات فواد چودھری کا کہنا تھا کہ نئےڈی جی آئی ایس آئی کی تقرری کیلئے قانونی طریقہ کار اختیار کیاجائے گا۔ وفاقی وزیر اطلاعات فواد چودھری کا کابینہ اجلاس کے بعدبریفنگ میں کہناتھاکہ پاکستان کی سول اور ملٹری حکومت میں بہت اچھے تعلقات ہیں جبکہ گزشتہ رات وزیر اعظم عمران خان اور آرمی چیف کے درمیان طویل نشست ہوئی ہے۔ وزیر اعظم اور آرمی چیف کے درمیان ملاقات خوشگوار ماحول میں ہوئی۔
انہوں نے کہا کہ آرمی چیف اور وزیر اعظم دونوں کا اتفاق رائے ہے کہ اتھارٹی وزیر اعظم ہیں۔ وزیر اعظم آفس اور آرمی چیف کوئی ایسا قدم نہیں اٹھائیں گے جس سے فوج اور ملک کے وقار میں کمی ہو۔ وفاقی وزیر نے کہا کہ ڈی جی آئی ایس آئی کی تقرری کا اختیار وزیر اعظم کے پاس ہے اور ڈی جی آئی ایس آئی سے متعلق کابینہ کو اعتماد میں لیا گیا ہے۔ انہوں نے کہا کہ نئے ڈی جی آئی ایس آئی کی تعیناتی پر وزیر اعظم اور آرمی چیف میں اتفاق رائےہے۔

یورپی یونین نے امارات اسلامیہ افغانستان کے لیے ایک ارب یورو کے امدادی پیکج کا اعلان کر دیا۔افغانستان میں سیکیورٹی اور انسانی صورتحال پر جی20ممالک کا ورچوئل اجلاس منعقد ہوا جس کی میزبانی اٹلی نے کی۔ یورپی کمیشن نے کہا کہ افغانستان میں کسی بڑے انسانی، سماجی و معاشی بحران کا سامنا کرنے کے لیے امدادی پیکج کا اعلان کیا گیا ہے۔ یورپی کمیشن کی سربراہ ارسلا کا کہنا ہے کہ یورپی یونین کی جانب سے فوری امدادی ضروریات کو پورا کرنے کی غرض سے 300 ملین یورو کی رقم کا اعلان کیا گیا تھا جس میں 250 ملین یورو کی اضافی امداد کا وعدہ جی ٹوئنٹی ممالک کے سربراہی اجلاس میں کیا گیا۔
انہوں نے کہا کہ باقی کی امدادی رقم افغانستان کے ہمسایہ ممالک کو دی جائے گی جو طالبان کے آنے کے بعد افغانستان سے جانے والے شہریوں کو پناہ دے رہے ہیں اور افغانستان میں بھی یہ رقم طالبان کی عبوری حکومت کو نہیں دی جائے گی کیونکہ اسے اب تک یورپی یونین کی جانب سے قبول نہیں کیا گیا ہے۔
یورپی یونین کی جانب سے اعلان کردہ امدادی رقم افغانستان میں کام کرنے والے بین الاقوامی اداروں کے ذریعے فراہم کی جائے گی۔ واضح رہے کہ یورپی یونین کی سربراہ ارسلا وون ڈی لیین نے جی ٹوئنٹی ممالک کے سربراہی اجلاس میں ایک ارب یورو کی امدادی رقم کا وعدہ کیا ہے۔

اسلام آباد (ویب ڈیسک) چیف جسٹس پاکستان جسٹس گلزار احمد نے ایک کیس کی سماعت کے دوران ریمارکس دیے ہیں کہ باپ کی جگہ بیٹے کو نوکری دینے کا قانون ہی عجیب وغریب ہے اور ایسا نہیں ہوسکتا کہ باپ کا انتقال ہوتو بیٹا بھرتی ہوجائے۔سپریم کورٹ میں چیف جسٹس پاکستان کی سربراہی میں دوران سروس انتقال کرنے والے ملازمین کے بچوں کونوکری دینے سے متعلق کیس کی سماعت ہوئی. عدالت نے کہا کہ سرکاری ملازمت کے اہل وہی بچے ہوں گے جن کے والد کا انتقال2005 کے بعد ہوا ہو، 2005 سے پہلے انتقال کرنے والے ملازمین کے بچوں پر وزیراعظم پیکج لاگو نہیں ہوگا۔
چیف جسٹس پاکستان نےاس موقع پر مزید ریمارکس دیے کہ سرکاری دفاتر وراثت میں ملنے والی چیز تو نہیں ، اس طرح نوکریاں دینے سے میرٹ کا مکمل خاتمہ ہوتا ہے، ابتدائی طور پریہ قانون پولیس اور دیگر شہدا کیلئے تھا، کم آمدن والے ملازمین کیلئے قانون بنا تھا لیکن بھرتی افسران کے بچے ہوتے ہیں، اے ایس آئی کا بیٹا کہتا ہے ڈائریکٹ ڈی ایس پی بھرتی کرو۔
دورانِ سماعت درخواست گزار سراج محمد نے مؤقف اپنایا کہ والد کی جگہ بھرتی ہونے کی درخواست دی تھی جووفاقی وزارت تعلیم نے مسترد کردی ہے، پشاور ہائیکورٹ نے مجھے بھرتی کرنے کا حکم دیا ہے، قربانی تو سب کی برابرہوتی ہے،2005 سے پہلے کی ہو یا بعد کی۔عدالت نے درخواست گزار کا مؤقف سننے کے بعد پشاور ہائیکورٹ کا فیصلہ کالعدم قرار دےد یا۔