Tag سانحہ ساہیوال

ساہیوال (ایمرا نیوز آن لائن)سانحہ ساہیوال کی عدالتی تحقیقات کرنے والے جج کی جانب سے ایک عوامی نوٹس جاری کیا گیا ہے جس کے مطابق شہریوں سے واقعے سے متعلق ثبوت فراہم طلب کیے گئے ہیں۔یہ عوامی نوٹس واقعے کی عدالتی تحقیقات کرنے والے افسر (جے آئی او) سینئر جج شکیل احمد گورایا کی جانب سے جاری کیا گیا ہے۔نوٹس میں کسی بھی قسم کے ثبوتوں کی فراہمی اور بیان کے ریکارڈ کروانے کے حوالے سے بتایا گیا ہے کہ خواہشمند افراد جے آئی او کی عدالت میں 22 سے 23 فروری کو شام 4 بجے تک پیش ہو کر ثبوت فراہم کرسکتے ہیں اور ان افراد کو قومی شناختی کارڈ کی کاپی کے ہمراہ آنے کی ہدایت کی گئی ہے۔نوٹس میں مزید کہا گیا کہ ‘ایسے افراد کو بعد ازاں عدالت کی جانب سے بیان ریکارڈ کروانے کے لیے طلب کیا جائے گا’۔سرکاری ذرائع کے مطابق جے آئی او 25 فروری کو جائے وقوع کا دورہ بھی کریں گے، جہاں 19 جنوری کو پولیس نے ایک کار پر فائرنگ کرکے ایک خاتون اور ایک کم عمر لڑکی کے ساتھ 4 افراد کو قتل کردیا تھا۔خیال رہے کہ 18 فروری کو شکایت کنندہ محمد جلیل، صحت کی خرابی کے باعث جے آئی او کے دفتر بیان ریکارڈ کروانے نہیں پہنچ سکے تھے اور عدالت نے انہیں 22 فروری کو دوبارہ طلب کیا ہے۔واضح رہے کہ لاہور ہائیکورٹ کے چیف جسٹس نے مقتولین کے اہل خانہ کی درخواست پر سانحہ ساہیوال کی عدالتی تحقیقات کا حکم دیا تھا، جس کا سربراہ سینئر جج شکیل احمد کو مقرر کیا گیا۔ذرائع کے مطابق جے آئی او نے پوسف والا تھانے کے ایس ایچ او امداد بلوچ کو آئندہ سماعت پر محمد جلیل کی حاضری کو یقینی بنانے کے لیے بھی ہدایات جاری کی ہیں اور اس کے لیے نئے سمن بھی فریقین کو جاری کردیئے گئے ہیں۔

ساہیوال(ایمرا نیوز آن لائن)سانحہ ساہیوال کی جوڈیشل انکوائری کیلئے سینئر سول جج شکیل گورایہ کو مقرر کردیا گیا ،اس ضمن میں سینئر سول عدالت نے تمام فریقین کو نوٹس جاری کردیئے ہیں ۔تفصیلات کے مطابق چیف جسٹس لاہور ہائیکورٹ جسٹس سردار شمیم خان نے گزشتہ روز سانحہ ساہیوال کی جوڈیشل انکوائری کا حکم دیا تھااورسیشن جج ساہیوال کو ایک ماہ میں رپورٹ پیش کرنے کا حکم دیا تھا،جس پر سانحہ ساہیوال کی جوڈیشل انکوائری کیلئے سینئر سول جج شکیل گورایہ کو مقرر کردیاگیا،سینئر سول جج نے تمام فریقین کو نوٹس جاری کردیئے۔سینئر سول جج شکیل گورایہ نے کہا کہ تمام فریق 18 فروری کو عدالت میں پیش ہوں۔

عدالت نے لسٹ دی ،حکم دیا کہ سب کو طلب کریں اور بیان ریکارڈ کریں لیکن افسوس ہے عملدرآمد نہیں ہوا
سیشن جج ساہیوال انکوائری کیلئے مجسٹریٹ تعینات کریں‘ لوگ بیان ریکارڈ کرانا چاہیں وہ جے آئی ٹی کو بیان ریکارڈ کرائیں: چیف جسٹس سردار شمیم
لاہور(ایمرا نیوز آن لائن) چیف جسٹس لاہور ہائیکورٹ جسٹس سردار شمیم نے سانحہ ساہیوال کی جوڈیشل انکوائری کا حکم دےدیا۔تفصیلات کے مطابق ساہیوال واقعے کی جوڈیشل کمیشن کی تشکیل سے متعلق درخواستوں پر چیف جسٹس سردار شمیم خان کی سربراہی میں بینچ سماعت کررہا ہے۔جمعرات کو سماعت کے آغاز پر جسٹس سردار شمیم نے استفسار کیا کہ ”اب تک کیا کارروائی کی گئی ہے“، عدالت نے لسٹ دی اور حکم دیا تھا کہ سب کو فون کر کے طلب کریں اور بیان ریکارڈ کریں لیکن افسوس کی بات ہے عدالتی حکم پر عمل درآمد نہیں کیا گیا۔چیف جسٹس لاہور ہائیکورٹ نے ایڈیشنل آئی جی پنجاب سے مکالمہ کرتے ہوئے کہا ”کیوں نہ آپ کو عدالتی حکم پر عمل درآمد نہ کرنے پر نوٹس کردیں“۔جسٹس صداقت علی خان نے ایڈیشنل آئی جی سی ٹی ڈی سے استفسار کیا ”کیا آپ کبھی دفتر سے باہر بھی نکلتے ہیں“۔اس موقع پر استغاثہ کے وکیل احتشام نے استدعا کی کہ واقعے کی تحقیقات کے لیے جوڈیشل انکوائری کا حکم دےدیں۔عدالت نے سانحہ ساہیوال کی جوڈیشل انکوائری کا حکم دیا اور چیف جسٹس سردار شمیم نے کہا سیشن جج ساہیوال انکوائری کے لیے مجسٹریٹ تعینات کریں۔چیف جسٹس لاہور ہائیکورٹ نے کہا جو لوگ بیان ریکارڈ کرانا چاہیں وہ جے آئی ٹی کو بیان ریکارڈ کرائیں۔واضح رہے کہ حکومت پنجاب نے سانحہ ساہیوال کی تحقیقات کرنے والی جے آئی ٹی کو 19 فروری تک رپورٹ پیش کرنے کا حکم دے رکھا ہے جبکہ پنجاب فارنزک لیبارٹری مں سی ٹی ڈی اہلکاروں کے زیر استعمال بھیجے گئے ،ہتھیاروں میں رد و بدل کا بھی انکشاف ہوا ہے۔گزشتہ ماہ 19 جنوری کی سہہ پہر پولیس کے محکمہ انسداد دہشتگردی (سی ٹی ڈی) نے ساہیوال کے قریب جی ٹی روڈ پر ایک مشکوک مقابلے کے دوران گاڑی پر اندھا دھند فائرنگ کردی تھی، جس کے نتیجے میں ایک عام شہری خلیل، اس کی اہلیہ اور 13 سالہ بیٹی سمیت 4 افراد جاں بحق اور تین بچے زخمی ہوئے جبکہ 3 مبینہ دہشتگردوں کے فرار ہونے کا دعویٰ کیا گیا۔واقعے کے بعد سی ٹی ڈی کی جانب سے متضاد بیانات دیئے گئے، واقعے کو پہلے بچوں کی بازیابی سے تعبیر کیا گیا، تاہم بعدازاں ویڈیو منظر عام پر آنے کے بعد مارے جانے والوں میں سے ایک کو دہشتگرد قرار دے دیا گیا۔میڈیا پر معاملہ آنے کے بعد وزیراعظم عمران خان نے بھی واقعے کا نوٹس لیا، دوسری جانب واقعے میں ملوث سی ٹی ڈی اہلکاروں کو حراست میں لے کر تحقیقات کے لیے جے آئی ٹی تشکیل دےدی گئی، جس کی رپورٹ میں مقتول خلیل اور اس کے خاندان کو بے گناہ قرار دے کر سی ٹی ڈی اہلکاروں کو ذمہ دار قرار دےدیا گیا۔

لاہور(ایمرا نیوزآن لائن) سانحہ ساہیوال سے متعلق یڈیشنل چیف سیکرٹری ہوم پنجاب فضیل اصغر نے نیا انکشاف کردیا ہے. ان کے مطابق ذیشان ایک دہشت گرد اور ایک دہشت گرد گروہ کا حصہ تھا، ان کے مطابق سی ڈی اے کی ابتدائی معلومات کے مطابق کار میں چار دہشت گرد موجود تھے جن میں ذیشان میں موجود تھا، فضیل اصغر نے کہا کہ اس بات کا انہیں پتا ان کو دہشتگرد عدیل حفیظ کی ہلاکت کےبعد چلا.
https://emra.tv/2019/01/24/کیا-کوئی-پاکستان…ورٹ-کا-حامل-اسرا/
اس موقع پر انہوں نے ذیشان کی ایک آڈیو سنائی جس میں فیصل آباد میں ہلاک دہشتگرد عدیل حفیظ سے بات کررہے ہیں اور یہ آڈیو سانحہ ساہیوال سے کچھ روز پہلے کی ہے. فضیل اصغر نے مزید بتایا کہ حساس ادارے اور سی ڈی اے مل کر کام کرتے ہیں.انہوں نے کہا خلیل اور اس کی فیملی بے گناہ تھی لیکن ذیشان ان کا استعمال کررہا تھا، جس کی وجہ سے ان کی جان چلی گئی. فضیل اصغر نے کہا ذیشان کا تعلق داعش کے ساتھ تھا، اور ہلاک دہشتگرد عدیل حفیظ داعش کے نائب امیر کے نام سے کام کرتا تھا اور وہ گاڑی جس میں ذیشان اور خلیل کی فیملی جارہی تھی وہ بھی اس دہشتگرد عدیل حفیظ کی تھی.

لاہور(نیٹ نیوز/ایمرا نیوز) سانحہ ساہیوال پر جے آئی ٹی کی ابتدائی رپورٹ جاری۔خلیل کے خاندان کےقتل کا ذمے دارسی ٹی ڈی کوٹھہرایا گیا ہے۔ ایڈیشنل آئی جی پنجاب آپریشن اظہر حمید کھوکھر ،،ایڈیشنل آئی جی سی ٹی ڈی رائے طاہر اور ایس ایس پی سی ٹی ڈی سمیت مقابلے میں ملوث افسران کیخلاف کاروائی کا فیصلہ کیا گیا ۔ ایڈیشنل آئی جی پنجاب آپریشن اظہر حمید کھوکھر کو فوری عہدے سے ہٹا کر وفاقی حکومت کو رپورٹ کرنے کا حکم دیا گیا ہے ۔ صوبائی وزیرقانون بشارت راجہ نے میڈیا بریفنگ میں ابتدائی رپورٹ سے آگاہ کیا ۔

لاہور(نیٹ نیوز/ایمرا نیوز) وزیراعلیٰ پنجاب سردار عثمان بزدار کے زیر صدارت اہم اجلاس میں سی ٹی ڈی کے اعلیٰ افسران کو ان کے عہدوں سے ہٹاتے ہوئے سانحہ ساہیوال میں ملوث اہلکاروں کیخلاف انسداد ددہشتگردی عدالت میں مقدمہ چلانے کا فیصلہ کیا گیا ہے۔ اجلاس کے بعد میڈیا کو بریفنگ دیتے ہوئے وزیر قانون پنجاب رابہ بشارت کا کہنا تھا کہ سانحہ ساہیوال پنجاب حکومت کیلئے ایک ٹیسٹ کیس ہے۔ ہم نے انصاف کے تقاضے مکمل کرنے ہیں۔ حکومت نے شفاف تحقیقات کا وعدہ مکمل کیا ہے۔ وزیراعظم عمران خان کے حکم پر جوائنٹ انوسٹی گیشن ٹیم (جے آئی ٹی) بنائی گئی تھی۔ وزیر قانون راجہ بشارت کا کہنا تھا کہ ابنتدائی رپورٹ کے مطابق سانحہ ساہیوال کے ذمہ دار انسداد دہشتگردی ڈیپارٹمنٹ (سی ٹی ڈی) کے اہلکار ہیں۔ پانچ سی ٹی ڈی اہلکاروں کا چالان مکمل کر کے عدالت کو بھجوایا جائے گا۔ ایک سوال کے جواب میں ان کا کہنا تھا کہ آپریشن 100 فیصد درست اطلعات پر مبنی تھا تاہم سانحہ ساہیوال میں جاں بحق ہونے والے خلیل کے خاندان کے ہمراہ جان سے ہاتھ دھونے والے ذیشان نامی شخص کے بارے میں مزید تحقیقات کی جائے گی، اس بارے میں جے آئی ٹی کے سربراہ نے مزید وقت مانگا ہے۔ اس سے قبل سانحہ ساہیوال کی تحقیقات کیلئے قائم کی گئی جوائنٹ انوسٹی گیشن ٹیم (جے آئی ٹی) نے اپنی ابتدائی فیکٹ فائنڈنگ رپورٹ وزیراعلیٰ پنجاب سردار عثمان بزدار کو پیش کی۔ وزیراعلیٰ پنجاب سردار عثمان بزدار کے زیر صدارت سانحہ ساہیوال پر اہم اجلاس میں جے آئی ٹی کی رپورٹ میں بتایا گیا کہ خلیل کے خاندان کا دہشت گردوں سے دور دور تک کوئی تعلق نہیں، بہت سے پہلوؤں کا جائزہ لیا گیا لیکن مقتولین کا کوئی تعلق ثابت نہیں ہوا۔ ذرائع کے مطابق رپورٹ میں کہا گیا کہ سی ٹی ڈی کے اہلکار گاڑی رکنے کے بعد اسے چیک کر سکتے تھے لیکن سارے آپریشن میں مجرمانہ غفلت کا مظاہرہ کیا گیا۔ ذیشان کی گاڑی کو مشکوک جان کر ریکی کی گئی۔ ادھر جے آئی ٹی سربراہ کی جانب سے حکومت کو پیش کی گئی ابتدائی رپورٹ میں درخواست کی گئی ہے کہ تفتیش مکمل کرنے کے لئے وقت درکار ہے۔ شہادتیں، شواہد اور بیانات کی روشنی میں تفتیش آگے بڑھائی جا رہی ہے۔ دنیا نیوز ذرائع کے مطابق آپریشن میں شریک اہلکاروں کے بیانات کی روشنی میں پہلے اور وقوعہ کے وقت کے حالات کو جانچا جا رہا ہے۔ سی ٹی ڈی ذیشان بارے اپنے موقف پر قائم ہے۔ یاد رہے کہ آج جے آئی ٹی اراکین نے ساہیوال میں جائے قوعہ کا دورہ کیا اور علاقہ مکینوں کے بیان قلمبند کئے۔ اس موقع پر جے آئی ٹی سربراہ اعجاز شاہ نے کہا کہ واقعہ کا ہر پہلو سے جائزہ لیا جا رہا ہے، 6 سی ٹی ڈی اہلکار حراست میں ہیں جن کا تعلق سی ٹی ڈی ساہیوال سے ہے۔ ان کا کہنا تھا کہ اتنے بڑے واقعہ کی رپورٹ اتنی جلدی مکمل نہیں کی جا سکتی۔ گزشتہ روز پنجاب اسمبلی کے باہر میڈیا سے گفتگو کرتے ہوئے سردار عثمان بزدار نے کہا تھا کہ اب جے آئی ٹی کی رپورٹ کا انتظار ہے، قوم دیکھے گی کہ رپورٹ کی روشنی میں سخت ایکشن لیا جائے گا اور ایکشن ہوتا نظر بھی آئے گا۔ اس سے قبل وزیراعلیٰ پنجاب عثمان بزدار کے زیر صدارت پنجاب اسمبلی کے کیفے ٹیریا میں پارلیمانی پارٹی کا اجلاس ہوا جس میں سوگوار خاندان سے دکھ اور افسوس کا اظہار کیا گیا اور جاں بحق افراد کے درجات کی بلندی کیلئے دعا کی گئی۔ وزیراعلیٰ نے خطاب کرتے ہوئے کہا کہ ساہیوال واقعہ پر ہر آنکھ اشکبار ہے اور پنجاب حکومت غمزدہ خاندان کے دکھ میں برابر کی شریک ہے۔ پوری قوم صدمے کی حالت میں ہے۔ انہوں نے کہا زخمی بچوں کے دکھ کو الفاظ میں بیان نہیں کیا جا سکتا۔ متاثرہ فیملی کے بچے میرے اپنے بچوں کی طرح ہیں، ان کا دکھ اور صدمہ دیکھ کر رات بھر سو نہیں سکا۔ وزیراعلیٰ نے کہا متاثرہ خاندان کو انصاف دینے کا وعدہ کیا ہے جسے پورا کروں گا، کسی کو انصاف کی فراہمی کی راہ میں حائل نہیں ہونے دینگے۔ مشترکہ تحقیقاتی ٹیم واقعہ کی انکوائری کر رہی ہے۔ انہوں نے کہا تھا کہ انصاف نہ صرف ہوگا بلکہ ہوتا ہوا نظر بھی آئے گا۔ متاثرہ خاندان کو انصاف دلانا ہماری ذمہ داری اور فرض بھی ہے، انصاف کر کے دکھائیں گے۔