Tag شوبزنیوز

کراچی(ویب ڈیسک) اداکارہ سارہ خان نے وزیراعظم عمران خان کی تعریف کرتے ہوئے کہا ہے کہ ملک میں تبدیلی لانے کے لیے 5 سال بہت کم ہیں، انہوں نے عہدہ سنبھالتے ہی وہ کر دکھایا جو ماضی میں کوئی نہیں کر سکا۔
میڈیا رپورٹ کے مطابق سماجی رابطے کی ویب سائٹ پر سارہ خان کے ایک پُرانے انٹرویو کی ویڈیو کلپ وائرل ہورہی ہے جس میں وہ پاکستان کی موجودہ حکومت کی کارکردگی کی تعریف کرتی ہوئی نظر آرہی ہیں۔ سارہ خان نے کہا کہ ‘عمران خان نے وزیراعظم کا عہدہ سنبھالتے ہی وہ کام کر دکھایا ہے جو ماضی میں کوئی نہیں کرسکا۔’اداکارہ نے اپنی بات جاری رکھتے ہوئے کہا کہ ‘عمران خان نے اُن لوگوں کو بند کیا ہے جنہیں آج سے پہلے کوئی بند نہیں کرسکا۔اُنہوں نے کہا کہ ‘تبدیلی آنے کے لیے بہت وقت درکار ہے ، ہمیں ایسا کیوں لگتا ہے کہ صرف 5 سال کے اندر تبدیلی آجائے گی۔ سارہ خان نے مزید کہا کہ طویل فہرست ہے جس کی وجہ سے موجودہ حکومت تعریف کی مستحق ہے ۔

ممبئی(ویب ڈیسک) بالی ووڈ اداکارہ ایشوریا رائے بچن نے انکشاف کرتے ہوئے کہا ہے کہ جب شاہ رخ خان نے انہیں بغیر وجہ بتائے 5 فلموں سے نکالا تو انہیں بہت تکلیف ہوئی۔

بالی ووڈ کنگ شاہ رخ خان اور ایشوریا رائے بچن ایک ساتھ کئی ہٹ فلموں میں کام کرچکے ہیں جن میں ’’دیوداس‘‘،’’جوش‘‘ اور’’محبتیں‘‘ شامل ہیں۔ دونوں کو شوبز انڈسٹری میں اچھا دوست بھی مانا جاتا ہے۔ لیکن ایک وقت تھا جب دونوں کے پیشہ ورانہ تعلقات میں دراڑ آگئی تھی۔
ایشوریا رائے نے ایک ٹی و ی شو کے دوران اس بات کا اقرار کیا تھا کہ شاہ رخ خان نے انہیں سپر ہٹ فلم ’’ویرزارا‘‘ اور ’’چلتے چلتے‘‘ سمیت 5 فلموں سے الگ کردیا تھا۔
ماضی میں سیمی گریوال کے شو میں جب ایشوریا سے پوچھا گیا کہ کیا یہ سچ ہے کہ ایک ساتھ بہت اچھا کام کرنے کے باوجود شاہ رخ خان نے آپ کو کئی فلموں سے نکال دیا تھا؟ اس سوال پر ایشوریا کا کہنا تھا ’’میں کیسے اس سوال کا جواب دے سکتی ہوں؟‘‘ ہاں ایک وقت تھا جب ایک دو فلموں میں میرے اور شاہ رخ کے ایک ساتھ کام کرنے کے بارے میں بات ہورہی تھی۔ اور پھر اچانک بغیر کسی وضاحت کے یہ نہیں ہوا۔ میرے پاس اس کا کبھی جواب نہیں تھا کہ کیوں‘‘۔

بعد میں شاہ رخ خان نے اپنے فیصلوں پر افسوس کا اظہار کیا تھا۔ 2003 میں انڈیاٹوڈے کے ساتھ بات کرتے ہوئے کنگ خان نے کہا تھا ’’کسی کے ساتھ پراجیکٹ کا آغاز کرنا اور پھر اسے بغیر اس کی کسی غلطی کے تبدیل کردینا بہت مشکل ہے۔ ایش میری بہت اچھی دوست ہے لہذا یہ افسوناک ہے۔ ذاتی طور پر مجھے لگتا ہے کہ میں نے غلط کیا تھا لیکن بطور پروڈیوسر اس کی وجہ تھی، اور میں نے ایش سے اس کے لیے معافی مانگی تھی۔

جب یہ بات ایشوریا کو بتائی گئی تو انہوں نے سیمی کو ردعمل دیتے ہوئے کہا میرے پاس کوئی جواب نہیں ہے۔ اور میں نے اس بارے میں کبھی شاہ رخ سے کوئی بات نہیں کی کیونکہ یہ میری فطرت میں نہیں ہے۔

ایشوریا رائے کا مزید کہنا تھا کہ وہ اس بارے میں بہت کنفیوز تھیں اور انہیں تکلیف ہوئی تھی۔ دیکھیں جب آپ کے پاس وضاحت نہیں ہوتی تو آپ کو تکلیف ہوتی ہے اور آپ حیران اورکنفیوز (الجھے ہوئے) ہوتے ہیں۔ اگر کوئی شخص کسی چیز کی وضاحت کرنے کی ضرورت محسوس کرتا ہے تو وہ کرے گا۔ یہ میری فطرت میں نہیں ہے کہ سوال کروں کہ کیا اور کیوں۔ اور میں کبھی کسی کے پاس جاکر نہیں پوچھوں گی کہ آپ نے ایسا کیوں کیا۔

واضح رہے کہ شاہ رخ خان اور ایشوریا رائے بچن آخری بار کرن جوہر کی 2016 میں ریلیز ہوئی فلم ’’اے دل ہے مشکل‘‘ میں نظرآئے تھے جس میں شاہ رخ خان نے مہمان اداکار کے طور پر کام کیا تھا۔

لاہور(ویب ڈیسک) عدالت نے مسجد وزیر خان میں شوٹنگ اور ویڈیو بنانے کے کیس میں اداکارہ صبا قمر اور گلوکار بلال سعید کے وارنٹ گرفتاری منسوخ کردئیے۔

ضلع کچہری لاہور میں مسجد وزیر خان میں شوٹنگ اور ویڈیو بنانے کے معاملے پر سماعت ہوئی۔ عدالت نے اداکارہ صبا قمر اور گلوکار بلال سعید کے وارنٹ گرفتاری منسوخ کردئیے۔ جوڈیشل مجسٹریٹ نے صبا قمر اور بلال سعید کے وکیل کی درخواست پر تحریری حکم جاری کردیا۔ عدالت نے دونوں کی جانب سے 30 ہزار روپے کے شورٹی بونڈز جمع کرنے کے بعد وارنٹ گرفتاری منسوخ کیے۔
صبا قمر اور بلال سعید کے وکلاء نے عدالت میں آئندہ سماعت پر دونوں کو پیش کرنے کی یقین دہائی کروادی۔ عدالت نے دونوں کو 6 اکتوبر کو ذاتی حیثیت میں پیش ہونے کا حکم دے دیا۔
واضح رہے کہ دو روز قبل عدالت نے اداکارہ صبا قمر اور گلوکار بلال سعید کے پیش نہ ہونے پر وارنٹ گرفتاری جاری کیے تھے۔خیال رہے کہ گزشتہ برس سوشل میڈیا پر صبا قمر اور بلال سعید کے گانے کی ریکارڈنگ کی ویڈیو وائرل ہوئی تھی جس میں تاریخی مسجد وزیر خان کے تقدس کو پامال کیا گیا تھا۔ ویڈیو پر سماجی اور مذہبی حلقوں سمیت سوشل میڈیا پر اس کی بھرپور مذمت کی گئی تھی۔ مسجد وزیر خان کے تقدس کی پامالی کرنے پر اداکارہ اور گلوکار کے خلاف فرحت منظور خان کی مدعیت میں لاہور کے اکبری تھانے میں مقدمہ درج کیا گیا تھ

لاہور(ویب ڈیسک)جوڈیشل مجسٹریٹ نے ماڈل عفت عمر اور ٹیلی ویژن اداکار علی گل پیر کے وارنٹ گرفتاری کردیے ہیں جبکہ گلوکارہ میشا شفیع کو آئندہ سماعت پر طلب کرلیا ہے۔
گزشتہ روز لاہور جوڈیشل مجسٹریٹ میں عفت عمر اور علی گل پیر کے خلاف ہتک عزت کیس کی سماعت ہوئی جس میں دونوں عدالت کے روبرو پیش نہیں ہوئے۔ گلوکار علی ظفر نے میشا شفیع کیس میں دونوں کے خلاف ہتک عزت کا مقدمہ کر رکھا ہے۔ عدالت نے عفت عمر اور علی گل پیر کو نوٹس جاری کیے تھے تاہم مسلسل غیر حاضری پر اب دونوں کے خلاف ناقابل ضمانت وارنٹ گرفتاری جاری کردیے گئے ہیں۔
ماڈل عفت عمر نے گزشتہ روز ہونے والی سماعت کے لیے حاضری سے اسثتنیٰ کی درخواست دی تھی جبکہ کیس میں نامزد لینا غنی، فریحہ ایعوب، فیضان اور حسیم الزماں نے مستقل حاضری سے استثنیٰ کی درخواستیں دی تھیں۔ عدالت نے تمام درخواستوں کو مسترد کردیا ہے۔

عدالت نے اپنے تحریری فیصلے میں یہ کہا ہے کہ کیس میں نامزد ملزمان غیرحاضری کی وجہ سے عدالت کو مطمئن کرنے میں ناکام رہے ہیں۔عدالت نے گلوکارہ میشا شفیع کو اگلی سماعت پر پیش ہونے کا حکم دیتے ہوئے کیس کی سماعت 6 اکتوبر تک ملتوی کردی ہے۔
خیال رہے کہ 2018ء میں میشا شفیع نے علی ظفر پر الزام عائد کیا تھا کہ علی ظفر نے انہیں متعدد مرتبہ جسمانی ہراساں کیا جس پر علی ظفر نے ان کے خلاف ہتک عزت کا مقدمہ دائر کر دیا۔ عفت عمر اور علی گل پیر پر مبینہ طور پر علی ظفر کے خلاف سوشل میڈیا مہم چلانے کا الزام ہے۔

ہرانسان کسی نہ کسی چیز کو بے حد پسند کرتاہے،اور بعض دفعہ تو وہ دیوانہ ہی ہوجاتاہے،،،اداکار اور اداکارائیں بھی اسی طرح کسی نہ کسی کی دیوانی نکلتی ہیں…بالی وڈ کی معروف اداکارہ کترینہ کیف نے ترکی کے معروف اور شہرہ آفاق ڈرامہ سیریل ارطغرل غازی کے حوالے سے اپنی پسندیدگی کا اظہار کیا ہے۔
کترینہ کیف ان دنوں سلمان خان کے ہمراہ فلم ٹائیگر 3کی شوٹنگ کے لیے ترکی میں موجود ہیں جہاں بالی وڈ کی مقبول شخصیات نے ترکی کے وزیر سیاحت و ثقافت مہمت نوری اسرائے سے ملاقات کی۔

تاہم اب سوشل میڈیا پلیٹ فارم انسٹاگرام پر کترینہ کیف کی سلمان خان اور ترکی کے وزیر کے ہمراہ میڈیا سے گفتگوکی ایک ویڈیو وائرل ہو رہی ہے، ویڈیو میں کترینہ کو صحافی کے سوال کا جواب دیتے سنا جاسکتا ہے کہ ارطغرل میری پسندیدہ سیریز ہے، میں نے ارطغرل کی 85 اقساط دیکھی ہیں۔
کترینہ کی گفتگو کے دوران سلمان خان نے کترینہ کی ارطغرل ڈرامہ سیریل کے حوالے سے پسندیدگی کا اعتراف کیا اور کہا کہ کترینہ ترک اداکاروں کو بھی پسند کرتی ہیں۔
خیال رہے کہ گزشتہ برس اسلامی فتوحات پر مبنی عالمی شہرت یافتہ تُرک ڈرامہ سیریل ارطغرل غازی گنیز بُک آف ورلڈ ریکارڈ میں جگہ بنانے میں کامیاب ہوچکاہے۔
ڈرامہ سیریل ارطغرل غازی کا دنیا کی 39 مختلف زبانوں میں ترجمہ کیا جا چکا ہے جو ایک ریکارڈ ہے جبکہ دنیا کے دیگر ملکوں کی طرح پاکستان میں بھی اس ڈرامے کے خوب چرچے ہیں۔

ممبئی(ویب ڈیسک)بالی وڈ اداکارہ کنگنا رناوت بھارت کی خوبرواداکارہ ہیں اور فلم میں ان کی موجودگی فلم ہٹ ہونے کی دلیل بھی سمجھی جاتی ہے،ان کی پرکشش شخصیت کی وجہ سے لوگ انہیں‌پسند کرتے ہیں،نہ صرف یہ بلکہ ان کی اداکاری بھی اپنی نوعیت کی بہترین خصوصیت سمجھی جاتی ہے…انہوں نے اپنی آنے والی نئی فلم ’تھالے وی‘ کی پروموشن میں رکاوٹ پر اسٹاگرام انتظامیہ پر برہمی کا اظہار کیا ہے۔
اداکارہ کنگنا رناوت نے انسٹاگرام اسٹوری کے ذریعے انسٹاگرام انتظامیہ کو مخاطب کرتے ہوئے کہا ہے کہ میں اپنی پروفائل میں نئی فلم کے ٹیلر کا لنک لگانا چاہتی ہوں۔ چونکہ میرا اکاؤنٹ ویریفائیڈ ہے اور گزشتہ کئی سالوں سے اسے استعمال کر رہی ہوں اس کے باوجود مجھے پروفائل میں ردوبدل کے لیے انسٹاگرام سے اجازت لینے کی ضرورت پڑتی ہے۔
کنگنا رناوت نے لکھا کہ بھارت میں موجود آپ کی ٹیم مجھے کہتی ہیں کہ انہیں اپنے بین الاقوامی مالکان سے اجازت لینی ہوتی ہے، اس مسئلے کو ایک ہفتہ گزر چکا ہے اور مجھے ایسا محسوس ہو رہا ہے کہ میں بےوقوف گوروں کے ایک گروہ کی غلام ہوں، اپنی ایسٹ انڈیا کمپنی کے رویے کو تبدیل کریں۔
اداکارہ نے ایک اور انسٹاگرام اسٹوری میں لکھا کہ جب سے میں نے اپنی فلم کی پروموشن کے لیے انسٹاگرام پر اپنے نام کے ساتھ تھالے وی لکھا ہے تب سے ایڈیٹ سیکشن لاک ہوگیا ہے اور میں انسٹاگرام کی ٹیم کی اجازت ملنے کا انتظار کر رہی ہوں۔کنگنا رناوت نے آخر میں کہا کہ اس طرح کا غیر پیشہ وارانہ رویہ کسی صورت قابل برداشت نہیں ہے۔

ممبئی(ویب ڈیسک) اداکار راج کمار راؤ کو کون نہیں جانتا،فلم بین تو انہیں اچھی طرح جانتے ہیں اور یہ بھی معلوم ہوگا کہ نوجوانی میں بالی وڈ کے ’کنگ خان‘ شاہ رخ خان کے بڑے فین تھے اور شاہ رخ خان کی وجہ سے انہیں لڑکی سے اظہار محبت کرنا مہنگا پڑگیا تھا۔
’ایسٹ انڈیا کمپنی بمقابلہ بالی وڈ‘ نامی یوٹیوب چینل سے گفتگو کرتے ہوئے اداکار راج کمار راؤ نے بتایا کہ میں اپنے اسکول کے دنوں میں بہت شرارتی ہوا کرتا تھا اور میری خواہش تھی کہ میں بڑا ہو کر اداکار بنوں۔ یہی وجہ تھی کہ جب میں نے کالج میں قدم رکھا تو اپنی تمام بری عادتیں ختم کردیں۔راج کمار راؤ نے بتایا کہ کالج کے دنوں میں، میں نے شاہ رخ خان کی فلم ’کچھ کچھ ہوتا ہے‘ دیکھی تھی۔ کالج میں مجھے ایک لڑکی سے محبت ہوگئی جو بالکل فلم میں ’انجلی‘ نامی لڑکی جیسی تھی، میں نے اس لڑکی کی ماں کو تلاش کیا اور پھر کسی نہ کسی طرح ہم دونوں ملاقاتیں کرنے لگے لیکن بدقسمتی سے اس کا ایک بوائے فرینڈ بھی تھا۔
اداکار نے بتایا کہ لڑکی کے بوائے فرینڈ نے ہمیں دیکھ لیا تھا اور اس نے 25 لڑکوں کے ساتھ مل کر میری پٹائی کی، وہ مجھے گولی مارنا چاہتے تھے لیکن میرے دوستوں نے موقع پر پہنچ کر مجھے وہاں سے بچایا۔