Tag 92 News

راولپنڈی(ایمرا نیوزآن لائن) پنجاب پولیس نے پولیس گردی کی نئی مثال قائم کرتے ہوئے اسنیپ چیکنگ کے دوران فائرنگ کرکے سابق کونسلر وحید انجم کو قتل کردیا۔

راولپنڈی کے علاقے کلر سیداں پولیس نے اسنیپ چیکنگ کے دوران کچھ افراد پر فائرنگ کردی جس کے نتیجے میں سابق کونسلر وحید انجم گولی لگنے سے جاں بحق ہوگئے۔ بعدازاں پولیس نے اپنے پیٹی بھائیوں کو بچانے کے لیے مقتول کے خلاف ہی پولیس کانسٹیبل کو زخمی کرنے کا مقدمہ درج کر لیا۔

پولیس گردی کے خلاف اہل علاقہ نے کلر سیداں روڈ اور جی ٹی روڈ بلاک کرکے شدید احتجاج کرتے ہوئے مطالبہ کیا کہ واقعے کے ذمہ داروں کو فوری گرفتار کیا جائے۔

اہل علاقہ کا کہنا تھا کہ ملزمان کی گرفتاری تک جی ٹی روڈ بند رہے گا تاہم کئی گھنٹے احتجاج کے بعد ایس پی صدر رائے مظہر اقبال کی ملزمان کی گرفتاری کی یقین دہانی کے بعد مظاہرین نے جی ٹی روڈ ٹریفک کے لیے کھول دیا۔ دوسری جانب سی پی او راولپنڈی کے حکم پر پولیس نے دو اے ایس آئیز اور تین کانسٹیبلز کے خلاف شہری کے قتل کا مقدمہ درج کرلیا۔

(ایمرا نیوزآن لائن) یکم دسمبر سے پیٹرولیم مصنوعات کی قیمتوں میں کمی کا امکان ہے۔

آئل اینڈ گیس ریگولیٹری اتھارٹی (اوگرا) کی جانب سے وزارت پیٹرولیم کو بھیجی گئی سمری میں پیٹرولیم مصنوعات کی قیمتوں میں کمی کی سفارش کی گئی ہے۔

ذرائع کے مطابق پیٹرول 25 پیسے اور مٹی کا تیل 83 پیسے فی لیٹر سستا ہونے کا امکان ہے جب کہ لائٹ ڈیزل 2 روپے 90 پیسے فی لیٹر سستا کرنے کی سفارش کی گئی ہے۔ ذرائع کا بتانا ہے کہ پیٹرولیم مصنوعات کی قیمتوں میں ردوبدل کا حتمی فیصلہ وزیراعظم کریں گے۔

(ایمرا نیوزآ ن لائن) جیسے جیسے انسان کی عمر بڑھتی جاتی ہے ویسے ویسے اسے صحت سے متعلق بے شمار مسائل کا سامنا بھی ہوتا ہے اور عمر کے ساتھ یادداشت بھی متاثر ہوتی ہے۔

ڈیمینشیا ایک ایسی بیماری ہے جس میں انسان کا حافظہ کمزور اور یادداشت آہستہ آہستہ ختم ہونے لگتی ہے لیکن ڈاکٹرز نے اس بیماری سے بچنے کے لیے حال ہی میں ایک تحقیق کی ہے۔

کینیڈا کی میک ماسٹر یونیورسٹی کے ایسوسی ایٹ پروفیسر نے بتایا کہ انسان اگر جسمانی طور پر پھرتیلا نہیں ہوگا تو اس کا تعلق بھی ڈیمینشیا کی بیماری سے ہے۔

ڈاکٹر نے کہا کہ ہماری حالیہ تحقیق کے مطابق ورزش کی شدت بے حد معنی رکھتی ہے، ہم نے بزرگوں کو ایک نئے ورزش پروگرام میں داخلہ دیا اور صرف 12 ہفتوں میں ہی ان بزرگوں کی یادداشتیں بہتر ہوگئیں لیکن یہ اس وقت ممکن ہوا جب انہوں نے (ہائی انٹنسیٹی) یعنی شدت والی ورزش کی جس کی وجہ سے انکی یادداشت بہتر ہوئی۔

ڈاکٹر کا کہنا تھا کہ اب ہمارا اگلا قدم یہ سمجھنا ہے کہ ورزش کس طرح دماغ کو تبدیل کرتی ہے، لہٰذا ہم نے دماغی صحت کی مشق کے حوالے سے کچھ تجاویز مرتب کی ہیں، جو کہ یہ ہیں۔

صحت مند دماغ کیلیے تربیت: جیسا کہ ہم سب جانتے ہیں کہ بڑھتی ہوئی عمرکو ڈیمینشیا پیدا ہونے کے کچھ خطرہ ہوتے ہیں، اس بیماری میں ہمارے طرزِزندگی بہت اہمیت کی حامل ہے۔ نئے شواہد کے مطابق بہتر طرزِزندگی، تعلیم اور صحت کا خیال ڈیمینشیا کی بیماری کے خطرات میں واضح کمی کرتا ہے۔ صحت مند دماغ کی تربیت کے لیے سب سے زیادہ مددگار جسمانی طور پر فعال رہنا ہے، جسمانی طور پر فعال یعنی ورزش کرتے رہنے سے ڈیمینشیا کے خطرات کم ہوجاتے ہیں۔

ورزش غذا کا کام کرتی ہے: ماہرین کا کہنا ہے کہ ورزش ایک ایسی چیز ہے جو کہ دماغ کو دوبارہ تخلیق کرنے کے مترادف ہے، ورزش کرنے سے دماغ میں نئے نیورونز بنتے ہیں جو کہ حافظے کو بہتر بناتے ہیں، ورزش کرنے سے جسم میں نئے خلیوں کی افزائش اور دماغ کی بہترین نشونما ہوتی ہے۔

ورزش کی شدت معنی رکھتی ہے: ماہرین کا کہنا ہے کہ ورزش کی شدت بے حد معنی رکھتی ہے، تحقیق سے یہ بات ثابت ہوئی ہے کہ اگر آپ ورزش کی شدت میں اضافہ کردیں گے تو اس کے صحت پر حیرت انگیز نتائج برآمد ہوں گے۔

ورزش کی شدت میں اضافہ کرنے کا مطلب یہ ہے کہ چہل قدمی سے زیادہ بہتر دوڑ صحت کے لیے مفید ہے۔

(ایمرا نیوزآن لائن) چین کے شہر چانگشا میں حال ہی میں ایک بلڈر نے مالکان کو نئے رہائشی کمپلیکس میں پارک اور جھیل کے نام پر پلاسٹک کی جھیل بنا کر چونا لگادیا۔

رہائشی کمپلیکس کے مالکان کا کہنا ہے کہ بلڈر نے ان سے کمپلیکس میں جھیل اور پارک ویو بنانے کا کہا تھا لیکن یہ سب دیکھنے کے بعد ہم بہت ناخوش ہیں۔

مالکان نے بتایا کہ کمپلیکس کا درمیانی جھیل والا حصہ ایک نیلے رنگ کے پلاسٹک کے مواد سے بنا ہوا تھا جو کہ ایک جعلی جھیل تھی، اس نقلی پلاسٹک کی جھیل پر لکڑی کا چھوٹا سا پُل بنایا گیا تھا اور یہ ویسی نہیں تھی جس کی لوگ امید کر رہے تھے۔

رہائشی کمپلیکس کے ایک اور مالک کا کہنا تھا کہ ’میں جھیل کے بیچ میں پانی پر کھڑا ہوں، اس جھیل میں پانی نہیں بلکہ یہ ایک پلاسٹک سے بنی نقلی جھیل ہے۔‘ متعدد مالکان نے بلڈر کے بنائے ہوئے اس نقلی لیک ویو سے اپنی ناراضگی کا اظہار کیا۔

دوسری جانب عمارت تعمیر کرنے والی کمپنی کا کہنا تھا کہ ہم نے کبھی بھی اپنے اپارٹمنٹ کمپلیکس کے اندر مصنوعی جھیل کا وعدہ نہیں کیا تھا جب کہ مالکان کا کہنا ہے کہ اس رہائشی کمپلیکس کے بروشر میں پلاسٹک کی جھیل سے زیادہ خوبصورت جھیل بنی ہوئی دکھائی دے رہی تھی۔

(ایمرا نیوزآن لائن) پولیس نے راولپنڈی میں انٹرنیشنل ڈارک ویب سائٹ کے رکن ملزم سہیل ایاز کے قریبی ساتھی خرم عرف کالا کو بھی حراست میں لے لیا گیا۔

ملزم کے پاس سے ملنے والے 12 سالہ بچے نے انکشاف کیا ہے کہ ملزمان منشیات کے مکروہ دھندے میں بھی ملوث ہیں۔ پولیس نے تیسرے مرکزی ملزم اعجاز کو بھی گرفتار کر لیا ہے۔ پولیس کا دعویٰ ہے کہ 38 سال کے ملزم سے ڈارک ویب سمیت اہم شواہد ملے ہیں۔

خیال رہے کہ چند روز قبل پولیس نے بچوں سے زیادتی کی لائیو ویڈیو بنانے والے عالمی گینگ کے سرغنہ سہیل ایاز کو گرفتار کیا تھا جس نے دوران تفتیش انکشاف کیا ہے کہ وہ خیبرپختونخوا حکومت کا ملازم ہے اور ماہانہ 3 لاکھ 45 ہزار روپے تنخواہ لیتا ہے۔

(ایمرا نیوزآن لائن) وزیر مملکت برائے انسداد منشیات شہریار آفریدی نے سینتھیٹک نشے کو ایٹم بم سے بھی زیادہ خطرناک قرار دیتے ہوئے پاکستان کو ڈرگ سے پاک کرنے کے عزم کا اعادہ کیا ہے۔

پشاور میں تقریب سے خطاب کرتے ہوئے وزیر مملکت شہریار آفریدی کا کہنا تھا کہ انسداد منشیات فورس (اے این ایف) نے منشیات کے خلاف وہ جہاد کیا جس کی مثال پوری دنیا دیتی ہے، انسداد منشیات فورس کی کارکردگی مثالی ہے۔ انہوں نے کہا کہ ماضی کی حکومت نے کیوں منشیات کے خلاف اقدامات نہیں اٹھائے؟ پولیس کے اسپتالوں میں ری ہیب سینٹر بنانے پر کسی نے توجہ نہیں دی۔

ان کا کہنا تھا کہ جیلوں میں مختلف قسم کی منشیات مل رہی ہوتی ہے، منشیات کے ناسور کو سب سے زیادہ منافع بخش کاروبار سمجھا جاتا ہے۔ وزیر مملکت نے کہا کہ ملک کے کسی بڑے اسکول میں یوتھ کے ساتھ کیا ہو رہا ہے، انہیں منشیات کون سپلائی کر رہا ہے؟ آج والدین کو یہ نہیں پتا کہ سینٹیتھک ڈرگز کیا ہے، اس حوالے سے ہم قانون سازی کر رہے ہیں۔

ان کا کہنا ہے وزیراعظم کی ہدایات ہیں کہ گھر گھر جاؤ اور سب کو بتاؤ کہ ایٹم بم سے زیادہ خطرناک سینتھیٹک ڈرگز ہیں۔ انہوں نے کہا کہ قبرستانوں میں، پلوں کے نیچے لوگ نشے میں ہوتے ہیں، کیا یہ ہماری اولادیں نہیں ہیں؟ قانون کی بالادستی کو ہر صورت یقینی بنائیں گے۔ شہریار آفریدی نے کہا کہ اے این ایف کے جوانوں نے منشیات کے خاتمے کے لیے جانوں کی قربانیاں بھی دی ہیں، منشیات کے کاروبار میں بڑے بڑے مگر مچھ ملوث ہیں، منشیات کے کاروبار میں کوئی بھی ملوث ہو، نشان عبرت بنائیں گے۔

وزیر مملکت نے کہا کہ ہم نے منشیات کے خلاف آگاہی مہم شروع کر دی ہے، ہم گھر گھر، اسکول، یونیورسٹی جا رہے ہیں اور آگہی دے رہے ہیں، سب منشیات کے خاتمے میں اپنا کردار ادا کریں۔ ان کا کہنا ہے کہ جو ہماری نسل کی زندگیوں سے کھیل رہے ہیں، ملک میں ان کے لیے کوئی جگہ نہیں ہے، چاہےکوئی جتنا بھی بڑا آدمی ہو، منشیات کے کیس میں معاف نہیں کریں گے۔

انہوں نے کہا کہ والدین بچوں کی بہتر پروش کے لیے دو دو نوکریاں کر رہے ہیں لیکن بچوں کو وقت نہیں دے رہے، آج یہ سینتھیٹک ڈرگز ہر گھر پر دستک دی رہی ہے۔ شہریار آفریدی نے کہا کہ جب قوم کے حکمران سوتے رہتے ہیں تو قوموں کے جنازے نکلتے ہیں۔ انہوں نے کہا کہ ہم نے اینٹلیجنس ڈیٹا تیار کیا ہے جس میں دنیا بھر میں منشیات کیسوں میں سزا یافتہ افراد کی معلومات ہیں۔ ان کا کہنا ہے ڈرگ فری پاکستان کے لیے اقدامات کر رہے ہیں، ہم نے سی پیک کے پورے روٹ کو ڈرگ فری بنانا ہے، سی پیک روٹ پر اسٹیٹ آف آرٹ ٹیکنالوجی کو نصب کریں گے۔

(ایمرا نیوزآن لائن) دنیا میں بہت سے لوگ ایسےہیں جن کے خون میں شکرکی مقدار زیادہ ہوجاتی ہے اور وہ اس بات سے بے خبر ہوتے ہیں، کیونکہ ہمیں یہ بات معلوم ہی نہیں ہے کہ خون میں شکر کی مقدار کے اضافے کی کیا علامات ہوتی ہیں۔

نیشنل انسٹیٹیوٹ آف ڈائبیٹیز ، ڈائجسٹو اینڈ کڈنی ڈیزیز کے مطابق تقریباً 25 فیصد افراد ایسے ہیں جو کہ ذیابیطس کی بیماری میں مبتلا ہیں اور انہیں اس بات کا علم ہی نہیں ہوتا۔

خون میں شکر کی مقدار میں اضافے کا سبب؟ ہم یہ سوچتے ہوں گے خون میں شکر کی مقدار میں اضافہ زیادہ میٹھا کھانے کی وجہ سے ہوتا ہے لیکن زیادہ شکر کے ساتھ ساتھ زائد کاربوہائیڈریٹس کا استعمال بھی خون میں موجود شکر کی مقدار کو بڑھاتا ہے جبکہ تناؤ کی کیفیت بھی خون میں شکر کی مقدار کے اضافے کا سبب بنتی ہے۔

خون میں شکر کی مقدار بڑھ جانے کی علامات جس شخص کو ذیابیطس یعنی شوگر کی تشخیص ہو چکی ہے وہ لوگ ان علامات سے بخوبی واقف ہوں گے مگر اکثریت ان سے لاعلم ہے۔

آئیے ہم آپ کو خون میں شکر یعنی شوگر کی مقدار بڑھ جانے کی چند علامات بتائیں۔

تھکاوٹ: خون میں شکر کی مقدار میں اضافے کی ایک علامت تھکاوٹ بھی ہے۔ ڈاکٹرز کا کہنا ہے اکثر خون میں شکر کی مقدار کم ہونے کی وجہ سے بھی تھکاوٹ ہوتی ہے۔

لیکن اگر کسی شخص کو روزانہ کھانا کھانے کے فوراً بعد تھکاوٹ محسوس ہو تو یہ علامت خون میں شکر کی مقدار زیادہ ہونے کی ہے۔ نیشنل انسٹیٹیوٹ آف ڈائبیٹیز اینڈ ڈاجیسٹو کڈنی کی ماہر ذیابیطس ڈاکٹر ہیٹیپوگلو کا کہنا ہے کہ ہم نے اکثر لوگوں کو یہ کہتے سنا ہوگا کہ کھانے کے بعد ان کو فوراً سونے کا دل کرتا ہے، بہت سے لوگ میٹھا یا آلو سے بنی کوئی چیز کھانے کے بعد کہتے ہیں کہ ہمیں نیند آرہی ہے۔ یہ علامت خون میں شکر کی مقدار زیادہ ہونے کی وجہ سے ہوسکتی ہیں اور ایسی صورت میں آپ کو فوراً اپنے ڈاکٹر کے مشورے سے ٹیسٹ کروانے چاہییں۔

آنکھوں میں دُھندلاہٹ: ماہرین ذیابیطس کا کہنا ہے کہ خون میں شکر کی مقدار زیادہ ہونے کی وجہ سے یہ جسم کے کسی بھی حصے کو متاثر کر سکتی ہے۔ خون میں شکر کی زائد مقدار آنکھوں کے درمیانی حصے کو جزوی طور پر متاثر کرتی ہے جس کی وجہ سے انسان کو دھندلا نظر آنے لگتا ہے۔ تاہم، یہ جزوی طور پر دھندلاہٹ آنکھوں کو ہمیشہ کے لیے نقصان نہیں پہنچاتی۔

زخم دیر سے ٹھیک ہونا ماہرِ ذیابیطس ڈاکٹر ہیٹیپوگلو کا کہنا تھا کہ خون میں شکر کی زائد مقدار جسم کے دورانِ خون کے نظام کو بھی متاثر کرتی ہے جس کی وجہ سے جسم پر لگنے والی چوٹ یا زخم دیر سے ٹھیک ہوتا ہے۔

دانتوں کی بیماریاں ہمارے منہ میں موجود لعاب اور خون میں گلوکوس موجود ہوتا ہے لیکن اس گلوکوس کی مقدار اگر زیادہ ہوجائے تو اس وجہ سے منہ میں خطرناک بیکٹیریا جنم لیتے ہیں جس کی وجہ سے دانت گرنا، یا دانتوں سے جُڑی بیماریاں ہونے لگتی ہیں۔ اگر آپ کو ان علامات کا سامنا ہے توپریشانی ہوئے بغیر فوراً ڈاکٹر سے رجوع کریں کیونکہ کسی بھی بیمار ی کی بروقت تشخیص جان بچا سکتی ہے۔

اسلام آباد(میڈیا9نیوزآن لائن) وزیراعظم عمران خان زیر صدارت وفاقی کابینہ کا اجلاس جاری ہے۔

وفاقی کابینہ کے اجلاس میں 7 نکاتی ایجنڈے پر غور کیا جائے گا جب کہ آزادی مارچ اور ملکی و سیاسی صورتحال پر بھی غور ہوگا۔ اس کے علاوہ اقتصادی رابطہ کمیٹی کے 6 اور 8 نومبر کےاجلاسوں میں کیے گئے فیصلوں کی توثیق کی جائے گی۔

وفاقی کابینہ کے اجلاس میں ممبر اوگرا کی تعیناتی، ہیلتھ کیئر ریگولیشن ایکٹ کے تحت اتھارٹی کے بورڈ ممبران کی تعیناتی کی منظوری دی جائے گی اور وفاقی کابینہ کے فیصلوں پر عملدرآمد کا جائزہ لیا جائے گا۔ کابینہ کو سٹیزن پورٹل پر سمندرپار پاکستانیوں کی شکایات کے حل پر بریفنگ دی جائے گی۔

(ایمرا نیوزآن لائن) امتحان کے دنوں میں طلبہ تناؤ اور دباؤ کا شکار ہوجاتے ہیں اور اس تناؤ کو کم کرنے کے لیے ماہرین نے بے شمار طریقے بتائے ہیں جس میں پالتو جانور کے ساتھ وقت گزارنا اور یوگا شامل ہے۔

ان تمام تر طریقوں کے بارے میں ہم پہلے سن چکے ہوں گے لیکن ریڈباؤڈ یونیورسٹی نے امتحان کے دنوں میں طلباء کے تناؤ کو کم کرنے کے لیے ایک عجیب و غریب طریقہ اپنایا ہوا ہے نیدرلینڈ کے قدیم شہر نجیمیگین کی ریڈباؤڈ یونیورسٹی نے امتحان کے دنوں میں طلبہ کے اندر تناؤ کی کیفیت دور کرنے کے لیے ایک کھلی قبر تیار کی ہوئی ہے، اسٹریس کو دور کرنے کا یہ طریقہ سننے میں کافی خطرناک اور عجیب لگتا ہے۔

اس یونیورسٹی میں ایک کھلی قبر تیار کی گئی ہے جو کہ امتحان کے دنوں میں تناؤ کی کیفیت کو کم کرنے کے لیے بنائی گئی ہے، یونیورسٹی کے بے شمار طلبا و طالبات یہاں جانے کے خواہش مند ہوتے ہیں۔اس قبر کے اندر ایک مختصر پیغام ’عجیب رہنا‘ بھی لکھا ہوا ہے، ریڈباؤڈ یونیورسٹی میں زیر تعلیم طلبہ کا کہنا ہے کہ یہ پروجیکٹ یونیورسٹی میں اتنا مقبول ہے کہ انتظامیہ کو یہاں جانے والوں کا نام ویٹنگ لسٹ یعنی انتظار کرنے کی فہرست میں ڈالا جاتا ہے کیونکہ خواہش مند طلبہ کی تعداد کافی زیادہ ہے۔

ایک طالب علم کا کہنا تھا کہ میں اور میرا ایک اور دوست اس کھلی قبر میں اگلے ہفتے جانے والے تھے مگر ہمیں یہ بات معلوم ہوئی کہ یہاں جانے کے لیے پہلے ہی بہت لوگوں نے اپنا نام ویٹنگ لسٹ میں لکھوا رکھا تھا اور ہمیں فی الحال اس کھلی قبر میں جانے کا موقع نہیں ملا مگر ہم یہاں ضرور جائیں گے۔ اس قبر کا نام ’Purification Grave‘ ہے جس میں طلبہ کو اوڑھنے کے لیے ایک کمبل اور یوگا کرنے کے لیے میٹ بھی فراہم کیا جاتا ہے، کھلی قبر میں جانے والے طلبہ کو موبائل فون اور کتابیں لے جانا سختی سے منع ہے جب کہ نوجوان طلبہ یہاں اپنے بارے میں، قدرت کے بارے میں اور اپنی آنے والی زندگی کے حوالے سے سکون سے سوچ سکتے ہیں۔

طلبہ کی عبادت گاہ میں فرائض سرانجام دینے والے جان ہیکنگ اس پروجیکٹ کے بانی بھی ہیں اور ان کا کہنا ہے کہ یہ پروجیکٹ طلبہ کو اپنے ساتھ پرسکون اور اکیلے وقت گزارنے کے لیے بنایا گیا ہے۔ اس پروجیکٹ کے پوسٹرز یونیورسٹی میں جگہ جگہ لگائے گئے ہیں جس پر ایک لاطینی کہاوت ’یاد رکھیں آپ کو مرنا بھی ہے‘ لکھی ہوئی ہے۔ کھلی قبر میں جانے کا تجربہ طلبہ کو 30 منٹ سے لے کر 3 گھنٹے تک کی پیشکش کرتا ہے۔