Tag BBC

روس(نیٹ نیوز/ایمرا نیوز) روسی جوڑے نے آکسیجن کے بغیر پانی کے اندر طویل ترین وقت کے لیے رقص کرکے ایک نیا ریکارڈ قائم کردیا ہے۔روسی رقاص جوڑے ’ میرینا کازنکوفا ‘اور’ دمیتری مالاسینکو ‘نے اٹلی میں واقع دنیا کے سب سے بڑے سوئمنگ پول میں اپنے فن کا مظاہرہ کیا ہے جس کی تصدیق گنیز بک آف ورلڈ ریکارڈ نے بھی کردی ہے۔

اس سوئمنگ پول کا نام وائے 40 ہے اور اس مظاہرے کو دیکھنے کے لیے وہاں کئی افراد بھی موجود تھے۔دونوں نے ایک تنے ہوئے رسے پر انتہائی مہارت سے اپنا فن دکھایا اور انہوں نے کسی قسم کا آکسیجن استعمال نہیں کیا تھا۔اس ریکارڈ کے بعد جوڑے نے بتایا کہ انہوں نے اس مظاہرے کے لیے نفسیاتی اور جسمانی مشق کی تھی ۔اس رقص کا اسکرپٹ بھی لکھا گیا تھا اور خاص موسیقی بھی ترتیب دی گئی تھیں۔2016 میں مرینا نے کسی بیرونی مدد کے بغیر پانی کی 154 میٹر گہرائی تک پہنچ کر اپنا ایک اور ریکارڈ قائم کیا تھا اور اب تک وہ 15 فلموں میں بھی کام کرچکی ہیں۔

لاہور(نیٹ نیوز/ایمرا نیوز) متحدہ عرب امارات کی فضائی کمپنی ایمیریٹس نے پاکستان میں فضائی آپریشنز میں واضح کمی کرنے کا اعلان کر دیا۔کمپنی کی جانب سے ایک ای میل کے ذریعے باخبر کیا گیا ہے کہ مسافروں کی عالمی ضروریات کو پورا کرنے کے لئےکچھ اہم تبدیلیاں کی گئی ہیں جس کے سبب پاکستان کے کئی اہم شہروں کے لیے پروازوں میں کمی کرنی پڑے گی۔کمپنی کی جانب سے اس تبدیلی کا اطلاق جون سے کیا جائے گا۔پاکستان بھر میں تبدیل کئے جانے والے شیڈول کے مطابق ایمیریٹس نے دبئی سے سیالکوٹ جانے والی پروازیں ختم کر دیں جبکہ دبئی سے پشاور جانے والی پروازیں اسی طرح فضائی آپریشن جاری رکھیں گی۔ایک ہفتے میں دبئی سے لاہور جانے والی10 پروازیں گھٹا کر 9 کر دی گئیں ہیں ۔ایک ہفتے میں دبئی سے کراچی جانے والی 35 پروازوں کو گھٹا کر 23 کر دیا گیا ہے جبکہ ہفتے بھر میں دبئی سے اسلام آباد جانے والی 11 پروازوں میں کمی کر کے 7 کر دی گئی ہیں۔

واشنگٹن:(نیٹ نیوز/ایمرا نیوز) ماہرین نے برسوں کی کوشش کے بعد چار کائناتی قوتوں میں سے ایک ’کمزور نیوکلیائی قوت‘ یا ویک نیوکلیئر فورس کی پیمائش میں کامیابی حاصل کی ہے۔ اس ضمن میں ماہرین دہائیوں سے کوشش کررہے تھے۔یہ نتائج اوک رِج نیشنل لیبارٹریز میں این ڈی پی گیما تجربات کے ذریعے انجام دیئے گئے ہیں جن کی نگراں پروفیسر ڈبلیو مائیکل سنو نے کی ہے جو انڈیانا یونیورسٹی بلومنگٹن کالج آف سائنسس میں پروفیسر بھی ہیں۔ وہ کہتے ہیں، ’ایٹموں کے اندر مرکزے (نیوکلیئس) میں موجود پروٹون اور نیوٹرون کے درمیان کمزور قوت کو ناپنا بہت اہم کام ہے۔ اس سے کائنات پر راج کرنے والی چار بنیادی قوتوں کو جاننے میں بہت مدد ملے گی۔‘‘فزکس کی رو سے مضبوط (اسٹرونگ) قوت، برقناطیسی (الیکٹرومیگنیٹک) قوت، کمزور (ویک نیوکلیئر) قوت، اور ثقل (گریوٹی) کی چاروں قوتوں سے ہی کائنات کا نظم و نسق چل رہا ہے۔ ان میں سے ایک بھی ختم ہوجائے تو زندگی اور کائنات دونوں کا وجود ختم ہوجائے گا۔ ہم جانتے ہیں کہ پروٹون اور نیوٹرون دیگر چھوٹے ذرات یعنی کوارکس سے مل کر بنتے ہیں اور اسٹرونگ فورس کوارکس کو مضبوطی سے باندھے رکھتی ہے جبکہ کمزور نیوکلیائی قوت، ایٹمی مرکزے میں نیوٹرون کو پروٹون میں بدلنے کی وجہ بنتی ہے جس کے نتیجے میں تابکاری (ریڈیو ایکٹیویٹی) کا عمل واقع ہوتا ہے۔اس تجربے میں کمزور نیوکلیائی قوت کو الگ کرکے اس کی پیمائش کی گئی تھی۔ اس کےلیے ایک پیچیدہ تجربہ کیا گیا جس میں این پی ڈی گیما نامی ایک خصوصی آلہ استعمال کیا گیا۔ اس میں انتہائی سرد نیوٹرونوں کے گھماؤ (اسپن) کو قابو کیا گیا۔ جب تمام نیوٹرونوں کا اسپن یا اینگیولر مومینٹم ایک سمت میں آگیا تو ان نیوٹرونوں کو مائع ہائیڈروجن میں موجود پروٹونوں سے ٹکرادیا گیا جس سے طاقتور گیما شعاعیں پیدا ہوئیں۔ اب ان گیما شعاعوں کی عددی قیمت کی بنیاد پر کمزور قوت کی پیمائش کی گئی ۔یعنی ماہرین نے نیوٹرون اور پروٹون کے گھماؤ کی بنیاد پر گیما شعاعوں اور ان کے تشاکلات (سمٹری) کی پیمائش کی۔اس تحقیق کی تفصیلات ہفت روزہ تحقیقی جریدے ’’نیچر‘‘ کے تازہ شمارے میں شائع ہوئی ہیں۔

ویت نام:(نیٹ نیوز/ایمرا نیوز) ہم جانتے ہیں کہ جونک (لیچ) دوسروں کے خون پر زندہ رہتی ہیں۔ لیکن ایک انوکھا واقعہ اس وقت پیش آیا جب ڈاکٹروں نے ایک خاتون کے حلق سے زندہ جونک برآمد کی ۔63 سالہ ویت نامی خاتون اپنے حلق میں بے آرامی اور کسی پھوڑے کی شکایت لے کر ہسپتال آئیں تو ڈاکٹروں نے ان کا معائنہ کیا تو وہ حیران رہ گئے کہ ان کے حلق کے ایک جانب 6 انچ لمبی جونک چپکی ہوئی ہے جو ان کا خون پی کر زندہ تھی۔

آنکھ، ناک اور حلق کے ڈاکٹروں نے ان کے حلق میں گوشت کا غیرمعمولی ٹکڑا دیکھا اور اسے فوری طور پر نکالا جو حقیقت میں ایک جونک تھی۔ہا گیانگ شہر کے ایک ڈاکٹر نگوین تان کا خیال ہے کہ خاتون نے کسی تالاب کا کنویں کا پانی پیا تھا جس میں بچہ جونک تھی اور وہ خاتون کے حلق میں جاکر چپک گئی۔ اس کے بعد خاتون نے سانس لینے میں دقت اور ناک بند ہونے کی شکایت کی اور جب یہ کیفیت مزید خراب ہوگئی تو وہ ہنگامی حالت میں ہسپتال پہنچیں۔ڈاکٹروں کے مطابق یہ ایک عجیب طبی واقعہ ہے۔ اگر خون پینے والی اس جونک کو بروقت نہ نکالا جاتا تو یہ یہ دردِ سر، حلق کی بندش اور یہاں تک کہ جان لیوا کیفیات کی شکار بھی ہوسکتی تھیں۔ تاہم اس سے قبل چین میں ایک شخص کے ناک میں تین ماہ سے چپکی جونک کو نکالا گیا تھا اور ایک خاتون کے جسم سے جونک برآمد کی گئی تھی۔

لندن:(نیٹ نیوز/ایمرا نیوز) برطانوی پارلیمان میں وزیراعظم ٹریزامے کے خلاف اپوزیشن کی جانب سے پیش کی گئی تحریک عدم اعتماد ناکام ہوگئی۔پارلیمان سے بریگزٹ معاہدہ منظور کرانے میں ناکامی کے بعد اپوزیشن لیبر پارٹی کے سربراہ جیریمی کوربن نے وزیراعظم ٹریزامے کے خلاف تحریک عدم اعتماد پیش کی جس پر ایوان میں رائے شماری کرائی گئی۔تحریک عدم اعتماد میں برطانوی وزیراعظم ٹریزامے کی حمایت میں 325 اور مخالفت میں 306 ووٹ آئے اور اس طرح ان کے خلاف تحریک عدم اعتماد 19 ووٹوں کے فرق سے ناکام ہوگئی۔اس سے قبل برطانوی دارالعوام میں بریگزٹ معاہدے پر ووٹنگ ہوئی جس کے دوران 202 اراکین نے حق میں جب کہ 432 نے مخالفت میں ووٹ دیا، یہاں تک کہ کنزرویٹو پارٹی کے تقریباً 118 ارکان نے حزب مخالف کے ساتھ مل کر اس معاہدے کے خلاف ووٹ دیا۔بریگزٹ معاہدے کی پارلیمان سے منظوری نہ ہونے کو وزیراعظم کے لیے بڑا دھچکا قرار دیا جارہا ہے، اس معاہدے پر ووٹنگ ابتدائی طور پر دسمبر میں ہونا تھی تاہم وزیراعظم ٹریزامے نے اس وقت بھی شکست کو بھانپتے ہوئے اسے ملتوی کر دیا تھا۔یاد رہے کہ برطانیہ کی یورپی یونین سے علیحدگی کی حتمی تاریخ 29 مارچ مقرر ہے اور اس معاہدے میں برطانیہ کے یورپی یونین سے انخلا کی شرائط متعین کی گئی تھیں۔برطانیہ میں یورپی یونین میں رہنے یا اس سے نکل جانے کے حوالے سے 23 جون 2017 کو ریفرنڈم ہوا تھا جس میں بریگزٹ کے حق میں 52 جبکہ مخالفت میں 48 فیصد ووٹ پڑے جس کے بعد اس وقت کے وزیراعظم ڈیوڈ کیمرون کو عہدے سے استعفیٰ دینا پڑا، کیوں کہ وہ بریگزٹ کے مخالف تھے۔واضح رہے کہ برطانیہ نے 1973 میں یورپین اکنامک کمیونٹی میں شمولیت اختیار کی تھی تاہم برطانیہ میں بعض حلقے مسلسل اس بات کی شکایات کرتے رہے ہیں کہ آزادانہ تجارت کے لیے قائم ہونے والی کمیونٹی کو سیاسی مقاصد کے لیے استعمال کیا جارہا ہے جس کی وجہ سے رکن ممالک کی ملکی خودمختاری کو نقصان پہنچتا ہے۔

اسلام آباد:(نیٹ نیوز/ایمرا نیوز) چیف جسٹس پاکستان کے منصب سے سبکدوش ہونے والے جسٹس میاں ثاقب نثار نے کہا ہےکہ انہوں نے آئین میں تعین کردہ حق زندگی، تعلیم اور صحت کے مسائل حل کرنے کی کوشش کی اور ججز کے ضابطہ اخلاق کے اندر رہتے ہوئے کام کیا۔چیف جسٹس پاکستان جسٹس میاں ثاقب نثار کی مدت ملازمت پوری ہونے پر سپریم کورٹ میں ان کے اعزاز میں فل کورٹ ریفرنس کا انعقاد کیا گیا جس میں عدالتِ عظمیٰ کے 17 میں سے 16 جج صاحبان نے شرکت کی۔فل کورٹ ریفرنس سے چیف جسٹس پاکستان کے منصب پر بیٹھنے والے جسٹس آصف سعید کھوسہ اور سبکدوش ہونے والے چیف جسٹس ثاقب نثار نے بھی خطاب کیا۔جسٹس میاں ثاقب نثار نے بطور چیف جسٹس پاکستان فل کورٹ ریفرنس سے اپنے آخری خطاب میں عدالتِ عظمیٰ کے اہم فیصلوں پر روشنی ڈالی۔انہوں نے کہا کہ اس عدالت نے کئی معرکتہ الآراء فیصلے دیے، سب سے پہلے گلگت بلتستان کا فیصلہ ہے، دوسرا مسئلہ عدالت نے آبادی میں اضافے کا اٹھایا، بیرون ملک مقیم پاکستانیوں کو ووٹ کا حق دیا۔جسٹس میاں ثاقب نثار کا کہنا تھاکہ عدالت نے ملک میں پانی کی کمی کا نوٹس لیا اور پوری قوم نے پانی کے لیےعطیات دیے، پسے ہوئے لوگوں کے حقوق کے لیے کام کیا اور ہر شخص کو عزت سے زندگی گزارنے کا حق دیا، نجی اسپتالوں کی فیسوں پر نوٹس لیا، خواجہ سراؤں کو شناختی کارڈ جاری کرنےکے معاملے کا نوٹس لیا، عدالت نے طیبہ سمیت گھروں میں کام کرنے والے بچوں کا بھی نوٹس لیا۔انہوں نے مزید کہا کہ آئین میں تعین کردہ حق زندگی، تعلیم اور صحت کے مسائل حل کرنے کی کوشش کی اور ججز کے ضابطہ اخلاق کے اندر رہتے ہوئے کام کیا۔جسٹس میاں ثاقب نثار کا کہنا تھا کہ ججوں کا کام انتہائی مشکل ہے، عدلیہ میں کرپشن انصاف کا قتل ہے، میرے لیے اعزاز کی بات ہے کہ میں نے ملک کے لیے کام کیا۔سبکدوش ہونے والے چیف جسٹس نے کہا کہ لوگوں نے جو عزت دی اس کو لوٹانے کی کوشش کی۔واضح رہےکہ جسٹس میاں ثاقب نثار 31 دسمبر 2016 کو چیف جسٹس پاکستان کے منصب پر فائز ہوئے، ان کے دور میں عدالتِ عظمیٰ نے انتہائی اہم نوعیت کے فیصلے دیے جن کے ملک کی سیاست پر بھی گہرے اثرات پڑے۔

ممبئی(شوبز ڈیسک/ایمرا نیوز) بالی وڈ کنگ شاہ رخ خان کی فلموں کو گزشتہ دو برس سے مسلسل ناکامی کا سامنا ہے، ایسے میں انہوں نے اپنے ڈوبتے ہوئے کیریئر کو بچانے کے لیے فلم ’ڈان 3‘ کو قبول کرلیا ہے۔شاہ رخ خان نے 2017 میں ریلیز ہونے والی فلم ’جب ہیری میٹ سیجل‘ میں ایک ٹور گائیڈ کا کردار نبھایا تھا جبکہ گزشتہ برس کے آخر میں ریلیز ہونے والی فلم ’زیرو‘ میں انہوں نے ایک بونے کا کردار نبھایا، تاہم یہ دونوں ہی کردار مداحوں کو متاثر کرنے میں ناکام رہے۔

اب وہ دوبارہ سے فلم ’ڈان‘ کے تیسرے سیکوئل میں کام کرنے جارہے ہیں، جس کے لیے امید کی جارہی ہے کہ وہ ’ڈان 2‘ کی طرح ان کے لیے کامیاب ثابت ہوگی۔ بھارتی میڈیا کے مطابق شاہ رخ خان نے فلم ساز سدھارتھ رائے کپور کی فلم ’سارے جہاں سے اچھا‘ کے لیے انکار کردیا ہے جس میں انہیں ایک سائنسدان کا کردار نبھانا تھا تاہم انہوں نے ہدایت کار فرحان اختر کی ’ڈان 3‘ میں جلوہ گر ہونے کی تصدیق کردی ہے۔فلم کی مکمل کاسٹ کے حوالے سے فی الحال کوئی تفصیلات سامنے نہیں آئیں۔واضح رہے کہ قیاس آرائیاں تھیں کہ ’ڈان 3‘ میں مرکزی کردار دپیکا پڈوکون نبھائیں گی، جس کی تردید کردی گئی تھی۔

اسلام آباد:(نیٹ نیوز/ایمرا نیوز) امریکی نمائندہ خصوصی برائے افغان مفاہمتی عمل زلمے خلیل زاد پاکستان پہنچ گئے۔زلمےخلیل زاد دورہ پاکستان کے دوران وفود کی سطح پر مذاکرات اور اعلیٰ سطح کی ملاقاتیں کریں گے۔واضح رہے کہ زلمے خلیل زاد کی پاکستان آمد کے شیڈول میں امریکی حکام کی جانب سے کئی بار تبدیلی کی گئی ہے، اس سے قبل شیڈول کے مطابق زلمے خلیل زاد نے 15 جنوری کی سہ پہر پاکستان پہنچنا تھا تاہم شیڈول میں تبدیلی کے بعد زلمے خلیل زاد کی کابل سے اسلام آباد آمد کا وقت رات 9 سے 12 بجے کے درمیان بتایا گیا۔جسے دوسری مرتبہ تبدیل کرتے ہوئے بتایا گیا کہ وہ 17 جنوری کی صبح 7 سے 8 بجے کے درمیان بذریعہ خصوصی طیارہ اسلام آباد پہنچیں گے، تاہم یہ شیڈول بھی تبدیل کردیا گیا اور اب امریکی نمائندہ خصوصی آج کابل سے پاکستان پہنچے ہیں۔ترجمان دفتر خارجہ ڈاکٹر محمد فیصل نے ہفتہ وار بریفنگ کے دوران بتایا کہ ‘زلمے خلیل زاد کی آج شام کو دفترخارجہ اور دیگر حکام کے ساتھ ملاقات ہوگی’۔ ترجمان کے مطابق ‘پاکستان نے امریکا اور طالبان مذاکرات میں مدد کی اور ہم سمجھتے ہیں کہ انٹرا افغان ڈائیلاگ مسئلے کے حل کے لیے ضروری ہے’۔ان کا مزید کہنا تھا کہ ‘بھارت کا افغانستان میں یا افغان امن عمل میں کوئی کردار نہیں’۔دوسری جانب امریکی صدر کی معاون خصوصی برائے جنوبی و وسطی ایشیا لیزا کرٹس بھی پاکستان میں موجود ہیں، جو 15 جنوری کو یہاں پہنچی تھیں۔ترجمان دفتر خارجہ کے مطابق ‘لیزا کرٹس کا دورہ افغان مفاہمتی عمل کے حوالے سے ہے’۔سفارتی ذرائع کا کہنا ہے کہ زلمے خلیل زاد باقاعدہ طور پر وفود کی سطح پر دفتر خارجہ میں مذاکرات کریں گے، ان کے دورے کا مقصد افغانستان میں فوجی انخلا اور افغان طالبان سے بات چیت پر مشاورت ہے۔واضح رہے کہ امریکا نے افغانستان سے فوجی انخلا کے لیے پہلے مرحلے میں 7 ہزار فوجیوں کی واپسی کا اعلان کیا ہے اور امریکی فوجی انخلا سے قبل طالبان اور امریکا کے درمیان مذاکرات کے کئی دور بھی ہوچکے ہیں۔

اسلام آباد:(نیٹ نیوز/ایمرا نیوز) چیف جسٹس پاکستان جسٹس میاں ثاقب نثار کی ملازمت کا آج آخری روز ہے جس کے بعد وہ ریٹائرڈ ہوجائیں گے۔چیف جسٹس پاکستان جسٹس میاں ثاقب نثار کے دور میں نواز شریف کو وزارت عظمیٰ سے برطرف کرنے سمیت کئی اہم مقدمات کے فیصلے کیے گئے، کچھ سیاستدان نااہل ہوئے اور بعض صادق اور امین کے منصب سے ہی نیچے گرادیے گئے۔چیف جسٹس ثاقب نثار، نواز شریف کے دوسرے دور حکومت میں سیکریٹری قانون رہے، لاہور سے وکالت شروع کی، ایڈووکیٹ جنرل آف پنجاب کے عہدے پر بھی فائز رہے اور جج بننے سے پہلے مسلم لیگ (ن) کے قریب سمجھے جاتے تھے۔
میاں ثاقب نثار 22 مئی 1998 میں بطور لاہور ہائیکورٹ کے جج تعینات ہوئے اور 11 فروری 2010 کو سپریم کورٹ میں جج کی حیثیت سے فرائض سنبھالے، جسٹس میاں ثاقب نثار نے 31 دسمبر 2016 کو ملک کی سب سے بڑی عدالت کے چیف جسٹس کی حیثیت سے حلف اٹھایا۔چیف جسٹس پاکستان کی حیثیت سے جسٹس ثاقب نثار نے سیاسی مقدمات، ازخود نوٹسز کے ذریعے کرپشن کی روک تھام، ڈیم کی تعمیر اور آبادی میں کنٹرول جیسے منصوبوں پر توجہ مرکوز کیے رکھی۔ اس دوران زیر التواء مقدمات کی تعداد بڑھتی گئی، ان کے منصب سنبھالنے پر یہ تعداد 30 ہزار 404 تھی اور آج مقدمات کی تعداد بڑھ کر 40 ہزار 540 ہوگئی۔ چیف جسٹس ثاقب نثار کے دور میں اثاثے چھپانے کے مقدمات میں نواز شریف اور جہانگیر ترین کو زندگی بھر کے لیے نااہل قرار دیا گیا جب کہ توہین عدالت کے مقدمات میں دانیال عزیز، نہال ہاشمی اور طلال چوہدری سمیت متعدد پارلیمنٹرینز کو نااہل قرار دے کر گھر یا جیل کی راہ دکھائی گئی۔چیف جسٹس ثاقب نثار کی سربراہی میں بینچ نے نواز شریف کو پارٹی صدارت سے بھی نااہل قرار دیا، سینیٹ انتخابات کے لیے (ن) لیگی امیدواروں کو نواز شریف کے دستخطوں سے جاری پارٹی ٹکٹ کالعدم ہو گئے اور انہیں آزاد حیثیت میں الیکشن لڑنا پڑا۔ن لیگ کے سینیٹرز ہمایوں اختر اور سعدیہ عباسی کو دہری شہریت پر نااہل قرار دیا گیا جس کے بعد پنجاب سے سینیٹ کی یہ دونوں نشستیں تحریک انصاف کے حصے میں آئیں۔چیف جسٹس ثاقب نثار نے 2018 کے عام انتخابات سے پہلے 42 ارب روپے کے مبینہ جعلی اکاؤنٹس اسکینڈل کا ازخود نوٹس بھی لیا اور اس پر نیب کو تحقیقات کا حکم دیا، اس مقدمے میں پیپلز پارٹی کے چیئرمین بلاول بھٹو زرداری، شریک چیئرمین آصف علی زرداری اور فریال تالپور کے نام سامنے آئے۔

لاہور(سپورٹس ڈیسک/ایمرا نیوز) پاکستان کے سب سے پہلے کرکٹ کپتان عبدالحفیظ کاردار کی 94 ویں سالگرہ پر گوگل نے انہیں خراج عقیدت پیش کرتے ہوئے اپنا ڈوڈل ان کے نام کردیا۔عبدالحفیظ کاردار 17 جنوری 1925 کو پنجاب کے مشہور کاردار آرائیں گھرانے میں پیدا ہوئے جنہوں نے اپنا کریئر بطور کرکٹر بنایا۔ان کا شمار اُن تین کھلاڑیوں میں ہوتا جنہوں نے بھارت اور پاکستان دونوں کے لیے کرکٹ کھیلی ہے، ان کے علاوہ عامر الہیٰ اور گل محمد بھی ایسے ہی کھلاڑی ہیں۔پاکستان بننے سے قبل عبدالحفیظ کاردار بھارت کے لیے کھیلتے تھے لیکن قیام پاکستان کے بعد وہ یہاں آگئے اور قومی ٹیم میں شمولیت اختیار کرلی۔عبدالحفیظ کاردار بائیں ہاتھ سے بلے بازی کے شاندار جوہر دکھاتے تھے، انہوں نے اپنے کریئر میں 6 ہزار 832 رنز بنائے جب کہ 344 وکٹیں حاصل کیں۔

وہ بانی پاکستان قائد اعظم محمد علی جناح کے بھی حامی تھے، بعدازاں انہوں نے سیاست میں بھی قدم رکھا اور پاکستان کرکٹ بورڈ کی صدر کی حیثیت سے اپنی خدمات انجام دیں۔کرکٹ سے ہٹ کر وہ فلاحی کاموں میں بھی پیش پیش رہے جس کی وجہ سے لوگ ان کی خدمات آج بھی یاد کرتے ہیں۔انہیں متعدد اعزازات سے بھی نوازا گیا، جس میں پرائیڈ آف پرفارمنس ایوارڈ بھی شامل ہے۔عبدالحفیظ کاردار 21 اپریل 1996 کو دنیائے فانی سے کوچ کرگئے لیکن کرکٹ کی دنیا میں ان کا نام آج بھی سرفہرست ہے۔