Tag CJP

اسلام آباد:(ایمرا نیوزآن لائن) چیف جسٹس پاکستان جسٹس آصف سعید کھوسہ نےکہا ہےکہ بدقسمتی سے انصاف کا شعبہ پارلیمنٹ کی ترجیحات میں نہیں لہٰذا پارلیمنٹ اور انتظامیہ کو بھی عدلیہ کی طرح انصاف کے شعبے میں بہتری کی ذمہ داری لینا ہوگی۔وفاقی جوڈیشل اکیڈمی میں فوری فراہمی انصاف کے حوالے سے کانفرنس سے خطاب کرتے ہوئے چیف جسٹس پاکستان جسٹس آصف سعید کھوسہ نے کہا کہ برطانیہ اور دیگر ملکوں میں مقدمے کے فیصلوں کے لیے وقت مقرر کیا جاتا ہے، امریکا اور برطانیہ کی سپریم کورٹ سال میں 100 مقدمات کے فیصلے کرتی ہیں، پاکستان کی سپریم کورٹ نے ایک سال میں 26 ہزار مقدمات کے فیصلے کیے۔انہوں نے کہا کہ پاکستان کی عدلیہ کے 3 ہزار ججز نےگزشتہ سال 34 لاکھ مقدمات کے فیصلے کیے، فوری اور سستے انصاف کی فراہمی عدلیہ کی ذمے داری ہے جب کہ ماڈل کورٹس کے قیام کا مقصد فوری اور سستے انصاف کی فراہمی تھا، ماڈل کورٹس مشن کے تحت قائم کی گئی تھیں، ماڈل کورٹس کا تجربہ آئین کے آرٹیکل 37 ڈی پر عملدرآمد کرنا ہے، ماڈل کورٹ کا مقصد التوا کا باعث بننے والی رکاوٹوں کو دور کرنا ہے۔چیف جسٹس پاکستان کا کہنا تھاکہ جب سے جج بنا ہوں، میرا مقصد فوری انصاف کی فراہمی رہا ہے، جوڈیشل پالیسی کے تحت مقدموں کے لیے وقت مقرر کیا جائے گا، مقدما ت کا التوا ختم کرنے کے لیے ہر ممکن اقدام کر رہے ہیں، پولیس کو مقدمے کی فوری تحقیقات کر کے چالان پیش کرنا چاہیے۔جسٹس آصف سعید کھوسہ نے مزید کہا کہ مقدمات کا وقت مقرر کرنے سے انصاف کا حصول آسان ہوگا، کسی وجہ سے وکیل کے پیش نہ ہونے پر جونیئر کو مقرر کیا جائے گا، مقدمے میں کسی وجہ سے استغاثہ کے پیش نہ ہونے پر متبادل انتظام کیا جائے گا، کیمیکل ایگزامینر اور فرانزک اتھارٹیز کی رپورٹس کو مقررہ مدت پرپیش کرنےکو یقینی بنانا ہوگا۔معزز چیف جسٹس پاکستان نے کہا کہ جوڈیشل پالیسی بہتر بنانے کے لیے سفارشات اور ترامیم کو پارلیمنٹ میں پیش نہیں کیاگیا، بدقسمتی سے انصاف کا شعبہ پارلیمنٹ کی ترجیحات میں نہیں، پارلیمنٹ اور انتظامیہ کو بھی عدلیہ کی طرح انصاف کے شعبے میں بہتری کی ذمہ داری لینا ہوگی۔ان کاکہنا تھاکہ عدالتی قوانین واضح ہیں بس انہیں سمجھنے کی ضرورت ہے، انسداد دہشتگردی ایکٹ سمجھنے کے لیے قانون میں تعارف موجود ہے، قوانین میں ابہام دور کرنے کے لیے اٹارنی جنرل سے رائے مانگی جاتی ہے، ملکی قوانین میں انسانی حقوق کو مد نظر رکھاجاتا ہے۔

اسلام آباد:(ایمرا نیوز) قتل کے مقدمے میں جھوٹی گواہی کا معاملہ، سپریم کورٹ نے مبینہ جھوٹے گواہ کیلئے عمر قید کی سزا کا عندیہ دیئے ہوئے معاملہ سیشن کورٹ کے سپرد کر دیا۔تفصیلات کے مطابق سپریم کورٹ میں چیف جسٹس کی سربراہی میں قتل کے مقدمے میں چھوٹی گواہی کیس کی سماعت ہوئی تو جسٹس آصف سعید کھوسہ نے انسداد دہشت گردی عدالت فیصل آباد کو مبینہ جھوٹے گواہ محمد ارشد کیخلاف سیشن کورٹ میں شکایت درج کرانے کا حکم دیا۔ سیشن کورٹ فیصل آباد محمد ارشد کیخلاف تمام قانونی تقاضے پورے کرتے ہوئے ٹرائل چلائے۔انہوں نے مزید کہا کہ ناکافی شواہد اور گواہ محمد ارشد کی گواہی کے باعث ملزم ظہیر کو بری کیا گیا۔ بظاہر لگتا ہے محمد ارشد نے جھوٹی گواہی دی۔س پر سرکاری وکیل نے درخواست کی کہ جھوٹی گواہی کا معاملہ سپریم کورٹ تک نہیں آنا چاہیے۔ ٹرائل کورٹ کو جھوٹی گواہی پر سزا دینی چاہیے۔چیف جسٹس نے استفسار کیا کہ ٹرائل کورٹ میں تو صرف پھانسی کی سزا دی جاتی ہے۔ گواہ نے اپنی صفائی میں کہا کہ میرے چھوٹے چھوٹے بچے ہیں نظر کرم کریں۔ جس پر چیف جسٹس نے پوچھا کہ کیا آپ نے لوہے کی پتلون پہن رکھی تھی جو آپ کو چھرے نہیں لگے؟ محمد ارشد نے کہا کہ بازو میں لگے چھرے خارش کرکے نکال دیے۔چیف جسٹس نے ریمارکس دیئے کہ پہلا بیان بھی آپ نے حلف پر دیا تھا اور آپ وقوعہ کے چشم دید گواہ بنے۔ گواہ نے کہا کہ میں میڈیکل کیلئے گیا لیکن ڈاکٹر دستیاب نہیں تھا۔ اسی وجہ سے میڈیکل میں تاخیر ہوئی۔ مجھے تین تین ماہ تنخواہ نہیں ملتی۔ محنت مزدوری کرتا ہوں۔چیف جسٹس نے پوچھا کہ کیا آپ کی مزدوری جھوٹی گواہی دینا ہے؟ حلف میں کہا جاتا ہے جھوٹ بولوں تو اللہ کا قہر نازل ہو۔ ممکن ہے اللہ کو قہر نازل کرنا منظور ہوگیا ہو۔چیف جسٹس آف پاکستان نے جھوٹی گواہی دینے پر عمر قید کی سزا کا عندیہ دیدیا۔

ایک شخص قمر عباس کی وجہ سے سینکڑوں پاکستانیوں کو خمیازہ بھگتنا پڑا، اس ملزم کی وجہ سے دنیا بھر میں پاکستان کی بدنامی ہوئی،سماعت کے دوران ریمارکس
اسلام آباد (ایمرا نیوز آن لائن)چیف جسٹس پاکستان جسٹس آصف سعید کھوسہ نے کہاہے کہ ایک ملزم قمرعباس کی وجہ سے ساری دنیا میں پاکستانیوں کا اپنے ملک میں قید کاٹنے کا معاہدہ معطل ہوگیا تھا جس کے سبب سینکڑوں پاکستانی مختلف ممالک کی جیلوں میں قید ہیں۔سپریم کورٹ کے تین رکنی بینچ نے چیف جسٹس آصف سعید کھوسہ کی سربراہی میں معاملے کی سماعت کی ۔عدالت نے حکم دیا کہ بیرونی ممالک میں قید پاکستانیوں کا پاکستانی جیلوں میں سزائیں کاٹنے کا معاہدہ بحال کرایا جائے۔چیف جسٹس پاکستان نے ریمارکس دیے کہ لندن میں ملزم قمرعباس کو گرفتار کیا گیا پھر سزا پوری کرنے کیلئے پاکستان بھیجا گیا۔ برٹش ہائی کمیشن کے لوگ جیل میں دیکھنے آئے تو ملزم موجود نہیں تھا۔آصف سعید کھوسہ نے ریمارکس دیے کہ پاکستان میں ایک سیکشن آفسر کے جعلی کاغذ پر ملزم جیل سے نکل گیا۔سرکاری وکیل نے عدالت کو بتایا کہ سیکشن آفیسر علی محمد وفات پاچکے ہیں۔بینچ کے سربراہ نے استفسار کیا کہ ملزم کی سزا کتنی بنتی ہے؟عدالت کو بتایا گیا کہ ملزم کی گیارہ سال سزا ہے جو جولائی 2019 کو پوری ہونا ہے۔ عدالت نے حکم دیا کہ ملزم قمر عباس قانون کے مطابق اپنی سزا پوری کرے گا۔چیف جسٹس آصف سعید کھوسہ کا کہنا تھا کہ جعل سازی کرنے والا سیکشن افسر اپنی جان سے چلا گیا، کم از کم پاکستان کا معطل شدہ معاہدہ تو بحال کرائیں، کوئی پاکستانی قیدی تھائی لینڈ میں جیل میں قید ہے تو کوئی کسی اور ملک میں ہے۔بینچ کے سربراہ نے ریمارکس دیے کہ ایک شخص کی وجہ سے سینکڑوں پاکستانیوں کو خمیازہ بھگتنا پڑا، اس ملزم کی وجہ سے دنیا بھر میں پاکستان کی بدنامی ہوئی۔

عدالت نے قتل مقدمے میں ملزمان کی بریت کیخلاف دائر نظر ثانی اپیلیں خارج کر دیں
اسلام آباد(ایمرا نیوز آن لائن) چیف جسٹس آف پاکستان آصف سعید کھوسہ نے ملزمان کی بریت کیخلاف نظر ثانی اپیل کی سماعت کے دوران ریمارکس دیئے ہیں کہ اﷲ تعالٰی نے سچی شہادت کا حکم دیا جبکہ لاہور ہائی کورٹ نے 40 سال پہلے جھوٹے گواہان کو کھلی چھٹی دے دی ۔ اسلامی یا انگلش قوانین میں سے کوئی بھی جھوٹی گواہی تسلیم نہیں کرتا ۔ لاہور ہائی کورٹ کے 4 دہائیوں قبل دیئے گئے فیصلے میں جھوٹ بولنے کا لائسنس دیا گیا ۔ قرآن مجید میں بھی جھوتی گواہی کی شہادت خارج کرنے کا حکم ہے ۔ چند دن میں ہی انشاءاﷲ جھوٹی گواہی خارج کرنے ولا وقت واپس آئے گا ۔ مجوزہ معاملہ میں بھی گواہان نے سچ نہیں بولا ۔ ملزمان حنیف اور شریف پر 2 افراد کے قتل کا الزام تھا کہ وہ رشتہ لینے گئے اور 2 افراد کو قتل اور 4 کو زخمی کر آئے ۔ رشتہ مانگنے والوں کو تو کوئی جان سے نہیں مارتا ۔ ٹرائل کورٹ نے ایک ملزم کو بری جبکہ دوسرے کو سزائے موت دی تھی ۔ ہائی کورٹ نے دوسرے ملزم کو بھی بری کر دیا تھا ۔ عدالت عظمٰی نے ہائی کورٹ کے فیصلہ کو برقرار رکھتے ہوئے ملزمان کی بریت کے خلاف دائر نظرثانی اپیل خارج کرتے ہوئے معاملہ نمٹا دیا ہے ۔( جاوید/ توصیف احمد عباسی )

اسلام آباد(نیٹ نیوز/ایمرا نیوز) جسٹس آصف سعیدکھوسہ نےبطورچیف جسٹس پہلاکیس نمٹاتے ہوئے منشیات کے کیس کا فیصلہ سنادیا۔پاکستان کے نئے چیف جسٹس آصف سعیدکھوسہ کی زیر صدارت سپریم کورٹ میںمنشیات کےکیس کی سماعت میں سزا یافتہ نورمحمد کی سزا میں کمی کی درخواست مستردکردی ۔سپریم کورٹ نے قرار دیا کہ اس کیس میں گواہ سرکاری ملازمین تھے، جن کا مجرم سے کوئی عناد نہیں تھا۔یاد رہے کہ 12سوگرام چرس رکھنےپرنورمحمد کوساڑھے4 سال قید اورجرمانے کی سزا سنائی گئی تھی ۔چیف جسٹس پاکستان جسٹس آصف سعید کھوسہ ایوان صدر میں حلف برداری کی تقریب کے بعد سپریم کورٹ پہنچے جہاں انہیں آج کمرہ عدالت نمبر ایک میں تین فوجداری مقدمات کی سماعت کرنا تھی۔

اسلام آباد(نیٹ نیوز/ایمرا نیوز) جسٹس آصف سعید کھوسہ نے پاکستان کے 26ویں چیف جسٹس کے طور پر حلف اٹھالیا۔پاکستان کے 26ویں چیف جسٹس کی حلف برداری کی تقریب ایوان صدر میں ہوئی، جہاں صدر مملکت ڈاکٹر عارف علوی نے جسٹس آصف کھوسہ سے چیف جسٹس کے عہدے کا حلف لیا۔تقریب میں وزیر اعظم پاکستان عمران خان، چاروں صوبوں کے وزرائے اعلیٰ، گورنرز، آرمی چیف جنرل قمر جاوید باوجوہ، نیوی و فضائیہ کے سربراہان، وزراء، مشیروں اور اہم عہدوں پر تعینات دیگر شخصیات نے شرکت کی۔واضح رہے کہ گزشتہ روز جسٹس میاں ثاقب نثار 65 برس کے ہونے پر چیف جسٹس پاکستان کے عہدے سے ریٹائر ہو گئے ہیں۔چیف جسٹس آصف سعید کھوسہ 11 ماہ کے لیے اس عہدے پر فائز ہوئے ہیں اور اسی سال دسمبر میں ریٹائر ہو جائیں گے۔چیف جسٹس آصف سعید کھوسہ نے گزشتہ روز عدالتی اصلاحات اور زیر التواء مقدمات نمٹانے کے عزم اور چارٹر آف گورننس بنانے کی خواہش کا اظہار کیا ہے۔ان کا کہنا ہے کہ اس میں صدر مملکت، عدالت، انتظامیہ اور پارلیمنٹ کے سربراہان اور فوج شامل ہو تاکہ کوئی ادارہ کسی دوسرے ادارے کی حدود میں مداخلت نہ کرے۔

اسلام آباد:(نیٹ نیوز/ایمرا نیوز) چیف جسٹس پاکستان کے منصب سے سبکدوش ہونے والے جسٹس میاں ثاقب نثار نے کہا ہےکہ انہوں نے آئین میں تعین کردہ حق زندگی، تعلیم اور صحت کے مسائل حل کرنے کی کوشش کی اور ججز کے ضابطہ اخلاق کے اندر رہتے ہوئے کام کیا۔چیف جسٹس پاکستان جسٹس میاں ثاقب نثار کی مدت ملازمت پوری ہونے پر سپریم کورٹ میں ان کے اعزاز میں فل کورٹ ریفرنس کا انعقاد کیا گیا جس میں عدالتِ عظمیٰ کے 17 میں سے 16 جج صاحبان نے شرکت کی۔فل کورٹ ریفرنس سے چیف جسٹس پاکستان کے منصب پر بیٹھنے والے جسٹس آصف سعید کھوسہ اور سبکدوش ہونے والے چیف جسٹس ثاقب نثار نے بھی خطاب کیا۔جسٹس میاں ثاقب نثار نے بطور چیف جسٹس پاکستان فل کورٹ ریفرنس سے اپنے آخری خطاب میں عدالتِ عظمیٰ کے اہم فیصلوں پر روشنی ڈالی۔انہوں نے کہا کہ اس عدالت نے کئی معرکتہ الآراء فیصلے دیے، سب سے پہلے گلگت بلتستان کا فیصلہ ہے، دوسرا مسئلہ عدالت نے آبادی میں اضافے کا اٹھایا، بیرون ملک مقیم پاکستانیوں کو ووٹ کا حق دیا۔جسٹس میاں ثاقب نثار کا کہنا تھاکہ عدالت نے ملک میں پانی کی کمی کا نوٹس لیا اور پوری قوم نے پانی کے لیےعطیات دیے، پسے ہوئے لوگوں کے حقوق کے لیے کام کیا اور ہر شخص کو عزت سے زندگی گزارنے کا حق دیا، نجی اسپتالوں کی فیسوں پر نوٹس لیا، خواجہ سراؤں کو شناختی کارڈ جاری کرنےکے معاملے کا نوٹس لیا، عدالت نے طیبہ سمیت گھروں میں کام کرنے والے بچوں کا بھی نوٹس لیا۔انہوں نے مزید کہا کہ آئین میں تعین کردہ حق زندگی، تعلیم اور صحت کے مسائل حل کرنے کی کوشش کی اور ججز کے ضابطہ اخلاق کے اندر رہتے ہوئے کام کیا۔جسٹس میاں ثاقب نثار کا کہنا تھا کہ ججوں کا کام انتہائی مشکل ہے، عدلیہ میں کرپشن انصاف کا قتل ہے، میرے لیے اعزاز کی بات ہے کہ میں نے ملک کے لیے کام کیا۔سبکدوش ہونے والے چیف جسٹس نے کہا کہ لوگوں نے جو عزت دی اس کو لوٹانے کی کوشش کی۔واضح رہےکہ جسٹس میاں ثاقب نثار 31 دسمبر 2016 کو چیف جسٹس پاکستان کے منصب پر فائز ہوئے، ان کے دور میں عدالتِ عظمیٰ نے انتہائی اہم نوعیت کے فیصلے دیے جن کے ملک کی سیاست پر بھی گہرے اثرات پڑے۔

اسلام آباد:(نیٹ نیوز/ایمرا نیوز) چیف جسٹس پاکستان جسٹس میاں ثاقب نثار کی ملازمت کا آج آخری روز ہے جس کے بعد وہ ریٹائرڈ ہوجائیں گے۔چیف جسٹس پاکستان جسٹس میاں ثاقب نثار کے دور میں نواز شریف کو وزارت عظمیٰ سے برطرف کرنے سمیت کئی اہم مقدمات کے فیصلے کیے گئے، کچھ سیاستدان نااہل ہوئے اور بعض صادق اور امین کے منصب سے ہی نیچے گرادیے گئے۔چیف جسٹس ثاقب نثار، نواز شریف کے دوسرے دور حکومت میں سیکریٹری قانون رہے، لاہور سے وکالت شروع کی، ایڈووکیٹ جنرل آف پنجاب کے عہدے پر بھی فائز رہے اور جج بننے سے پہلے مسلم لیگ (ن) کے قریب سمجھے جاتے تھے۔
میاں ثاقب نثار 22 مئی 1998 میں بطور لاہور ہائیکورٹ کے جج تعینات ہوئے اور 11 فروری 2010 کو سپریم کورٹ میں جج کی حیثیت سے فرائض سنبھالے، جسٹس میاں ثاقب نثار نے 31 دسمبر 2016 کو ملک کی سب سے بڑی عدالت کے چیف جسٹس کی حیثیت سے حلف اٹھایا۔چیف جسٹس پاکستان کی حیثیت سے جسٹس ثاقب نثار نے سیاسی مقدمات، ازخود نوٹسز کے ذریعے کرپشن کی روک تھام، ڈیم کی تعمیر اور آبادی میں کنٹرول جیسے منصوبوں پر توجہ مرکوز کیے رکھی۔ اس دوران زیر التواء مقدمات کی تعداد بڑھتی گئی، ان کے منصب سنبھالنے پر یہ تعداد 30 ہزار 404 تھی اور آج مقدمات کی تعداد بڑھ کر 40 ہزار 540 ہوگئی۔ چیف جسٹس ثاقب نثار کے دور میں اثاثے چھپانے کے مقدمات میں نواز شریف اور جہانگیر ترین کو زندگی بھر کے لیے نااہل قرار دیا گیا جب کہ توہین عدالت کے مقدمات میں دانیال عزیز، نہال ہاشمی اور طلال چوہدری سمیت متعدد پارلیمنٹرینز کو نااہل قرار دے کر گھر یا جیل کی راہ دکھائی گئی۔چیف جسٹس ثاقب نثار کی سربراہی میں بینچ نے نواز شریف کو پارٹی صدارت سے بھی نااہل قرار دیا، سینیٹ انتخابات کے لیے (ن) لیگی امیدواروں کو نواز شریف کے دستخطوں سے جاری پارٹی ٹکٹ کالعدم ہو گئے اور انہیں آزاد حیثیت میں الیکشن لڑنا پڑا۔ن لیگ کے سینیٹرز ہمایوں اختر اور سعدیہ عباسی کو دہری شہریت پر نااہل قرار دیا گیا جس کے بعد پنجاب سے سینیٹ کی یہ دونوں نشستیں تحریک انصاف کے حصے میں آئیں۔چیف جسٹس ثاقب نثار نے 2018 کے عام انتخابات سے پہلے 42 ارب روپے کے مبینہ جعلی اکاؤنٹس اسکینڈل کا ازخود نوٹس بھی لیا اور اس پر نیب کو تحقیقات کا حکم دیا، اس مقدمے میں پیپلز پارٹی کے چیئرمین بلاول بھٹو زرداری، شریک چیئرمین آصف علی زرداری اور فریال تالپور کے نام سامنے آئے۔

اسلام آباد(نیٹ نیوز/ایمرا نیوز) چیف جسٹس پاکستان میاں ثاقب نثار کہتے ہیں کہ لعنت ہے ایسے لوگوں پر جو جعلی ادویات بناتے ہیں۔ادویات کی قیمتوں میں اضافے سے متعلق کیس کی سپریم کورٹ آف پاکستان میں سماعت ہوئی جس کے دوران ڈریپ کے نمائندے نے ادویات کی قیمتوں میں اضافے کی رپورٹ عدالت میں پیش کر دی ہے۔چیف جسٹس آف پاکستان نے استفسار کیا کہ قیمتوں میں اضافے کی رپورٹ دیکھ لی ہے،ڈریپ کو جعلی ادویات کے خلاف ایکشن کے لیے کیا تحفظ چاہیے؟ڈریپ حکام نے عدالت کو بتایا کہ ایورسٹ کمپنی کے خلاف 73 ایف آئی آرز کا اندراج ہو چکا ہے۔چیف جسٹس نے اپنے ریمارکس میں کہا کہ جعلی ادویات سے گندہ بیوپار نہیں ہو سکتا، لعنت ہے ایسے لوگوں پر جو جعلی ادویات بناتے ہیں۔عدالت نے کہا کہ نیب اور ایف آئی اے ڈریپ کے خلاف براہ راست ایکشن نہیں لیں گے، تحقیقاتی ایجنسی سربراہان ڈریپ کے خلاف شکایت کا جائزہ لیں، تحقیقاتی ایجنسی اٹارنی جنرل کی مشاورت سے ایکشن لیں۔چیف جسٹس ثاقب نثار نے اپنے ریمارکس میں مزید کہا کہ جعلی ادویات ناسور ہیں، جعلی ادویات کے بیوپار میں ملوث شخص پر لعنت ہے۔

اسلام آباد(نیٹ نیوز/ایمرا نیوز) اٹھارہویں ترمیم سے متعلق سندھ حکومت کی درخواست سپریم کورٹ نے مسترد کردی۔چیف جسٹس نے اٹھارہویں ترمیم کے حوالے سے فیصلہ سناتے ہوئے کہاکہ سندھ حکومت کی درخواست مسترد کرنے کی وجوہات سپریم کورٹ کے تفصیلی فیصلے میں دی جائیں گی۔واضح رہے سندھ حکومت نے صوبائی اختیارات سے متعلق سپریم کورٹ میں درخواست دائر کر رکھی تھی،سپریم کورٹ نے سندھ حکومت کی درخواست مسترد کرتے ہوئے کیس نمٹادیا۔یاد رہے کہ پاکستان کے آئین میں اٹھارویں ترمیم 8 اپریل 2010 کو قومی اسمبلی نے منظور کی گئی جس کے تحت صدر کے پاس موجود تمام ایگزیکٹو اختیارات پارلیمان کو منتقل ہوئے۔اس ترمیم کے ذریعے پاکستان کے شمالی مغربی سرحدی صوبے (سرحد) کا نام تبدیل کر کے خیبر پختونخوا رکھا گیا اور وفاق سے زیادہ تر اختیارات صوبوں کو منتقل ہوئے۔