Tag column

لاہور(وقت نیوز آن لائن)
بشکریہ ڈیلی پاکستان

پاکستان کے بہت سے اہم معاملات سے متعلق بڑے بڑے فیصلو ں اور واقعات کا علم ہمیں میڈیا ہی کے ذریعے ہوتا ہے۔آج کا موضوع اس لحاظ سے اہم ہے کہ پاکستانی میڈیا پر کبھی اس طرح کا بحران نہیں آیا تھا،

جیسا اب آیا ہے۔ اس کے پیچھے حکمران اشرافیہ اور شریک اشرافیہ کی وہ ذہنیت کام کر رہی ہے جو ہر کسی پر غلبہ چاہتی ہے تاکہ ملک میں اس کی مرضی چلے اور معاملات اس کے ہاتھ سے باہر نہ جائیں۔ موجودہ بحران ایک باقاعدہ منصوبہ بندی کا نتیجہ ہے۔ تمام اداروں کو رام کرنے کی کوشش کی جارہی ہے۔ میڈیا کے معاملات پر بھی بہت غورو فکر کیا گیا ہے۔ یہ احساس سب کو ہے کہ میڈیا بڑے بڑوں کو نگل جاتا ہے…… کسی زمانے میں امریکہ کے ایک دانشورنے میڈیا کے ذریعے دنیا پر حکمرانی کرنے کا تصور پیش کیا تھا۔

اسی تصور کے پیش نظر پرویز مشرف کی آمریت کے دوران ملک میں ان گنت ٹیلی وژن چینلوں اور ایف ایم ریڈیو کے لائسنس دیئے گئے۔ اس کے بعد جسٹس افتخار محمد چودھری کی تحریک میں میڈیا نے حکومت مخالفت میں مؤثر کردار ادا کیا تو ملکی پاور سٹیک ہولڈر میڈیا کو کنٹرول کرنے کی منصوبہ بندی کرنے لگے۔یہ کام دو تین طریقوں سے کیا جا سکتا تھا۔کارکن صحافیوں کو ڈرانے اور خوف زدہ کرنے سے یا مالکان کو لالچ دے کریا ان پردباؤ ڈال کر……

لیکن جب ان طریقوں سے میڈیا کو کنٹرول کرنے میں کامیابی حاصل نہ ہوئی تو پھر حکومتی ہم خیال لوگوں کو صحافت میں آگے لانے اور نئے صحافتی ادارے قائم کرنے پر کام کیا گیا۔ان اداروں نے کارکن صحافیوں کو اچھا معاوضہ دینا اور ان سے مرضی کاکام لینا شروع کیا۔اس طرح 2002ء کے دھرنوں پر میڈیا نے اپنا زور رکھا۔ اس دوران حکومت کے جانے کی خبریں بھی چلیں، ”ڈان“ جیسے چینل نے بھی یہ خبر دی۔ اسی دوران ٹیلی وژن کیبلز کو کنٹرول کرنے کے لئے مختلف حربے برتنے اور ٹیلی وژن چینلوں پر حملوں کا سلسلہ بھی شروع ہوا۔ 2018ء کے انتخابات کے بعد تو نئی حکومت کے وزیراطلاعات فواد چودھری نے صاف کہہ دیا کہ نیوز چینلوں کی گنجائش نہیں، انہیں پیچھے لے جائیں گے اور انٹر ٹینمنٹ کو آگے لایا جائے گا۔

یہ بھی سوچا گیا کہ پاکستان میں چین، شمالی کوریا اور ایران جیسا میڈیا نظام ہونا چاہئے……جو اس لائن پر نہیں آتا تھا، اس کے خلاف فوری کارروائی ہوتی تھی۔ منصوبہ یہ تھا کہ میڈیا کو ایک”وٹس ایپ“ گروپ کے ذریعے چلایا جائے۔ میڈیا کو ہدایات دی جانے لگیں۔ معاملات میں جب سختی آئی تو نئے طریقے بھی ڈھونڈ لیے گئے۔ یہ منصوبہ بنایا گیا کہ نامی گرامی صحافیوں کو نشانہ بنایا جائے اور انہیں بدنام کیا جائے۔

یہ منصوبہ کامیاب نہ ہوسکا، اس سلسلے میں انہیں پیچھے ہٹنا پڑا، ہتک عزت جیسے معاملات میں تو میڈیا کے خلا ف مقدمات بننے چاہئیں، لیکن جب ایک سیاسی حکومت میڈیا پر پابندی عائد کرتی ہے تو اس کے خلاف بین الاقوامی دباؤ آتا ہے۔ ملک میں میڈیا کا گھیرا ؤ کرنے کی کوشش کی جارہی ہے، کارکنوں اور مالکان کی سطح پر گرو پنگ کرائی گئی، ہدایات اوپر سے آتی ہیں۔ میڈیا اداروں کو ایسے ایسے نوٹس آتے ہیں جو شرمناک ہیں۔ ایک گھیراؤ کی سی کیفیت ہے۔ فنانس روکنے کے انتظامات بھی کیے گئے۔ اشتہاری کمپنیوں کو مخصوص اداروں کو ادائیگی کرنے سے روک دیا گیا۔

اس طرح کے حربوں میں آئے روز اضافہ ہوتا چلاگیا۔ ایک مربوط ایکشن کے ذریعے میڈیا کا گھیراؤ کیا جاتا ہے۔ موجودہ حکومت کے آنے سے ہر طرح کے کاروبار اور صنعتی پیداوار میں بہت کمی آگئی ہے۔

آئی ایم ایف اور ایف اے ٹی ایف کے ذریعے ہماری اقتصادی مشکیں کس دی گئی ہیں۔ بلیک منی بھی کاروبار کا ایک اہم ذریعہ ہے، جس سے کاروبار چلتا رہتاہے، لیکن اب معیشت سے بلیک منی نکل گئی ہے۔ اب اشتہارات کی آمدنی میں بھی بہت کمی آ گئی ہے۔ ڈالر اوپر جانے سے بھی میڈیاکے حالات بگڑ گئے ہیں۔ معیشت کی کمزوری کے اثرات بھی میڈیا پر آگئے ہیں۔

ہم خود سوچ سکتے ہیں کہ اگر میڈیا ملازمین کو چھ چھ ماہ تک تنخواہ نہیں ملے گی تو ان پر کیا بیتے گی؟ حکومت نے دیئے گئے سرکاری اشتہارات کی ادائیگی بھی روک رکھی ہے۔ بار بار کے وعدوں کے بعد بھی ادائیگیاں نہیں ہو سکیں۔ ایسے میڈیا ہاؤسز بھی ہیں، جن کی آمدنی کے ذرائع کا کچھ علم نہیں۔ یہ میڈیا ہاؤسز ایک خاص انداز میں پر و پیگنڈا کررہے ہیں۔ حکومتیں میڈیا اور عدلیہ کو کنٹرول کرنے کی کوشش کرتی ہیں۔

اس ساری صورتِ حال میں میڈیا کے لئے کوئی نہ کوئی راستہ تو نکلے ہی گا،لیکن بہت مشکل ہے۔ صحافت میں خبروں پر گہری نظر رکھنے اور خبری تکنیکس کے علاوہ انگریزی سے اُردو میں ترجمہ کرنے کی مہارت اور وسیع معلومات عامہ کی ضرورت ہوتی ہے۔ الیکٹرانک میڈیا میں زبان کی کمزوریوں کی وجہ اس کی طرف سے ریٹنگ کے مسئلے کو اولیت دینا ہے۔ اب تو مختلف سیمینار ز میں اوپر والوں کی طرف سے بعض لوگ گھسا دیئے جاتے ہیں تاکہ وہ ایک مخصوص نقطہ نظر کا پر چار کریں۔ ایسے افراد کے لئے پیرا شوٹرز کی اصطلاح رائج ہے۔

اعلیٰ صحافی روایات اور اقدار کی دھجیاں اُڑائی گئی ہیں۔مختلف صحافتی اداروں میں اپنے بندے رکھو انے کا سلسلہ عرصے سے جاری ہے۔ ائیر ٹائم جنہوں نے خریدا ہوتا ہے، اس دوران انہی کی بات چلتی ہے۔ غیر جانبدار افراد کو آف ائیر کردیا گیا ہے۔ بہت سے کالم شائع کرنے سے انکار کر دیا جاتا ہے،جنہیں لوگ فیس بک پر ڈال دیتے ہیں۔ پیر اشوٹرز نے الیکٹرانک میڈیا میں بہت گند ڈالا ہے۔

میڈیا والوں کو موضوعات دیئے جاتے ہیں۔ جہاں تک کشمیر کے مسئلے کا معاملہ ہے، اسے انسانی حقوق کے لحاظ سے تو اچھا لا جا رہا ہے، لیکن ہم استصواب رائے کی بات نہیں کررہے۔ اگر کوئی یہ بتائے کہ ہمیں عالمی سطح پر ڈپلومیسی میں کیا ناکامی ہوئی ہے؟ تو ایسا بتانا کسی طرح ملک دشمنی تو نہیں ہے۔ اپنے لوگوں کو تو ایسی باتیں واضح طور پر بتانی چاہئیں۔ ایسے حقائق سامنے نہ لانے کے نتائج خطرناک ہو سکتے ہیں۔ موجودہ صورت حال کی مثال ہم ایوب خان کے پریس اینڈ پبلی کیشنز آرڈ نینس سے بھی نہیں دے سکتے،جنہیں سیاہ قوانین کہا جاتا تھا۔

حاکموں کے لئے مشکل یہ ہے کہ اگر یہ سوشل میڈیا کو بند کرنے کی کوشش کریں گے تو اس سے بین لاقوامی پریشر کا سامنا کرنا پڑے گا۔ اس وقت حکومت مختلف بلا گرز کے خلا ف کیس بنا رہی ہے، جبکہ یہ لوگ آئین اور قانون کی بالادستی چاہتے ہیں اور سچے کھرے پاکستانی ہیں۔ میڈیا ریاست کا ستون ہے،اسے کمزور نہیں کیا جانا چاہیے، اس طرح پاکستان کمزور ہوگا۔ اگر کوئی خود کو مضبوط کرنے کے لئے چاہتا ہے کہ تین ستون کمزور کر دیئے جائیں تو اس طرح وہ خود بھی کمزور ہوگا۔ ہمیں حماقتوں سے بچنا بھی ہے اورآگے بھی بڑھنا ہے۔

اسلام اور پاکستان کے ساتھ ہماری وفاداری کسی شک و شبہ سے بالا تر ہے۔ایک ادارے ہی کا مفاد قوم کا مفاد نہیں ہو سکتا۔سب اداروں کو آزاد اور مؤثر ہونا چاہئے اوراپنے اپنے دائرے میں رہتے ہوئے کام کرنا چاہئے۔ معاشرے کے مختلف طبقات میں تقسیم پید ا کی گئی ہے، تقسیم سے قوم کمزور ہوتی ہے۔ صحافیوں کی سوچ وہی پہلے والی ہے، کیونکہ ہمارے مسائل بھی وہی پرانے ہیں۔

بہتر یہی ہے کہ اس سلسلے میں فریقین آئینی راستہ اختیار کریں۔ ہر کوئی آئین کے مطابق اپنا کردار ادا کرے۔ اسی طرح بہتر ی کی صورت نکلے گی۔ ہم نے صحافتی اداروں کو بھی بچانا ہے اور ملکی مفاد کو بھی دیکھنا ہے۔ اس وقت جوکچھ مسلم ممالک کے ساتھ کیا جارہا ہے، وہ ہم سب کے سامنے ہے۔ وائس آف امریکہ پرامریکی وزیر خارجہ پومپیو کا بیان تھا کہ پاکستان کا ایٹمی پروگرام امریکہ کے لئے خطرناک ہے۔ سی پیک کے سلسلے میں بھی امریکہ نے اپنا غصہ کبھی نہیں چھپایا۔ یہ درست ہے کہ جب تک ہم متحد ہو کر ان خطرات سے نہیں نمٹیں گے، مسائل حل نہیں ہوں گے۔

پورے ملک کا مفاد ہی سب کا مفاد ہے۔ یہاں یکساں انصاف نہیں، مقدس گائے کا تصور بالا ہے۔ بڑے بڑے مجرم ”محترم“ اور”معزز“ ہیں۔ جو آئین توڑتا ہے، وہ محترم بنا پھرتا ہے۔ اربوں کی کرپشن کرنے والے مزے میں رہتے ہیں۔

ایسے لوگوں کو بھی جیل میں ڈالیں تو سب درست ہو جائے گا۔ بظاہر ایسے اشارے موجود ہیں کہ پچھلے چند سالوں کے دوران کی جانے والی فاش غلطیوں کے ازالے کے لئے کچھ اقدامات کیے جارہے ہیں، لیکن شائد صورت حال کچھ زیادہ ہی بگڑ چکی ہے۔ معاملات کو مکمل طور پر درست سمت میں ڈال دیا جائے، تب بھی مثبت اثرات سامنے آنے میں کافی وقت لگے گا۔ کسی کو اچھا لگے یا برا لیکن اصل حقیقت یہی ہے۔

(ایمرا نیوز آن لائن)
(بشکریہ جنگ لاہور)
پاکستان کی عدلیہ کے سربراہ کی حیثیت سے محترم چیف جسٹس آصف سعید خان کھوسہ کے لیے احتساب عدالت کے جج ارشد ملک کی مبینہ وڈیو نے ایک مشکل صورتحال پیدا کر دی ہے۔ اس مبینہ وڈیو نے عدلیہ کے ادارے اور ججوں کے کنڈکٹ پر بہت سے سوال کھڑے کر دیئے ہیں۔ ان سوالوں کے جواب کے لیے ماسوائے عدلیہ کے، کوئی دوسرا ادارہ کچھ نہیں کر سکتا۔ اسی لیے سب کی نظریں چیف جسٹس اور سپریم کورٹ پر جمی ہیں۔ اپوزیشن جماعتوں کی طرف سے پہلے ہی اس معاملہ پر سوموٹو لینے کا مطالبہ سامنا آ چکا ہے جبکہ حکومت اور وزیراعظم نے بھی اس مسئلے پر انکوائری کے لیے معاملہ عدلیہ کے ہی سپرد کرتے ہوئے صاف صاف کہہ دیا ہے کہ حکومت اس معاملہ میں نہیں پڑے گی۔ مبینہ طور پر یہ معاملہ ایک ناانصافی کا ہے جس کا اعتراف احتساب عدالت کا جج خود کر رہا ہے اور اس اعتراف میں وہ کچھ ایسے افراد کا نام بھی لے رہا ہے جو اگرچہ ابھی تک میڈیا کے سامنے نہیں آئے لیکن ذرائع کے مطابق اُن میں سے ایک فرد بہت اہم عہدہ پر فائز رہا اور اب ریٹائر ہو چکا جبکہ دوسرا ابھی بھی ایک اہم عہدہ پر براجمان ہے۔ نون لیگ کے پاس ایک نہیں بلکہ کئی وڈیوز ہیں جس میں مبینہ طور پر جج ارشد ملک نے وہ باتیں کی ہیں جو اگر سچ ثابت ہوتی ہیں تو عدلیہ کے ادارے کے لیے بہت بدنامی کا باعث ہو سکتی ہیں۔ مبینہ طور پر جج ارشد ملک کی ملاقات دوسرے افراد کے علاوہ نواز شریف کے ایک قریبی عزیز سے مدینہ کے ایک ہوٹل میں گزشتہ رمضان کے آخری عشرہ میں بھی ہوئی، جس کی‘ ذرائع کے مطابق‘ وڈیو ریکاڑنگ شریف فیملی کے پاس موجود ہے۔ ان وڈیوز کی سچائی یا ان کے جھوٹا ثابت ہونے کے لیے ابھی فرانزک آڈٹ ہونا باقی ہے لیکن نون لیگ اور شریف خاندان کے ذرائع مطمئن ہیں کہ اُن کے پاس یہ ٹھوس ثبوت ہیں۔

خبروں کے مطابق چیف جسٹس آصف سعید کھوسہ نے اس معاملہ پر قائم مقام چیف جسٹس اسلام آباد ہائیکورٹ سے گزشتہ روز بات کی ہے۔ اب ہوگا کیا؟ عدلیہ کیا کارروائی کرے گی؟ اس کا سب کو انتظار ہے۔ اگر ایک طرف جج ارشد ملک کے تبادلہ اور کارروائی کے متعلق سوچا جا رہا ہے تو یہ بھی لازم ہے کہ اُس مبینہ گفتگو کی حیثیت کو بھی جانچا جائے جو احتساب عدالت کے جج نے ان وڈیوز میں کی۔ کس نے جج کو بلیک میل کیا، کون جج کو لگاتار دبائو میں رکھتا رہا اور یہ مطالبہ کرتا رہا کہ نواز شریف کو ہر حال میں سزا دی جائے۔ یہ امید چیف جسٹس آف پاکستان سے ہی وابستہ کی جا سکتی ہے کہ وہ ایسے کرداروں کے خلاف کارروائی کرکے عدلیہ کے ادارہ کو داغدار ہونے سے ضرور بچائیں گے۔ پاکستان کی عدلیہ کے اعلیٰ ترین منصب پر فائز چیف جسٹس کھوسہ ہی نے اس بات کو یقینی بنانا ہے بالخصوص ایسے حالات میں جب یہ سوال پیدا ہو گیا ہے کہ نواز شریف کا ٹرائل شفاف تھا یا مشکوک ؟اور اگر ٹرائل شفاف نہیں ہے تو پھر نواز شریف کی سزا کا کیا ہوگا؟

سابق چیف جسٹس افتخار محمد چوہدری نے اپنے ایک انٹرویو میں کہا ہے کہ نہ صرف احتساب عدالت کے جج کو فوری تبدیل کر دیا جائے تاکہ مزید ملزمان کو مشکوک سزائوں سے بچایا جا سکے بلکہ مبینہ وڈیو کے سامنے آنے کے بعد نواز شریف کے خلاف دیئے گئے فیصلے کو اسلام آباد ہائیکورٹ میں درخواست کے ذریعے ختم کروایا جا سکتا ہے۔ ایک مشکوک ٹرائل کے نتیجے میں دیئے گئے فیصلہ کو قائم رکھنا نہ صرف بڑی ناانصافی کی بات ہوگی بلکہ اس کو تاریخ میں بھی ایک سیاہ باب کے طور پر لکھا جائے گا۔

ویسے ہی ہماری عدلیہ کا ماضی داغدار ہے، اس کی تاریخ ایسے واقعات سے بھری پڑی ہے جہاں ججوں نے دبائو میں آکر ایسے ایسے فیصلے کیے جو ہمیشہ کے لیے دوسروں کے علاوہ خود عدلیہ کے لیے بھی پچھتاوے کا باعث بن گئے۔ ذوالفقار علی بھٹو کا عدالتی قتل، مارشل لائوں کو اس ملک میں بار بار عدالت کی جانب سے جواز فراہم کرنا وہ چند مثالیں ہیں جو عدلیہ کے ساتھ ساتھ پوری قوم کے لیے شرمندگی کا باعث ہیں۔ ایسی شرمندگیوں کے بوجھ کو بڑھانے کے بجائے کم کرنے کی سب سے اہم ذمہ داری عدلیہ کے اپنے کندھوں پر ہی عائد ہوتی ہے۔

مہمان کالم
آپ اورنج لائین ٹرین کی مثال لے لیجئے‘ پنجاب حکومت نے چین کی مدد سے 25 اکتوبر 2015ءکو لاہور میں یہ منصوبہ شروع کیا‘ یہ 27 کلو میٹر لمبی ٹرین سروس تھی‘ یہ سروس 25 کلو میٹر پلوں کے ذریعے زمین سے اوپر چلنی تھی اور یہ تقریباً پونے دو کلو میٹر زیر زمین ٹنلز میں بننی تھی‘ منصوبے کی لاگت 164 ارب روپے تھی‘ یہ منصوبہ شروع ہوا‘ سول سوسائٹی سامنے آئی‘ احتجاج ہوا‘ مظاہرین لاہور ہائی کورٹ گئے اور ہائی کورٹنے 28 جنوری 2016ءکو پنجاب حکومت کے خلاف سٹے آرڈر جاری کر دیا‘ ہائی کورٹ نے حکم دیا حکومت تاریخی عمارتوں سے دو سو فٹ کی حدود میں کام بند کر دے‘ عدالت کے حکم کے بعد شالا مار باغ‘ گلابی باغ‘ بدو کا آوا‘ چوبرجی‘ زیب النساءکا مقبرہ‘ لکشمی بلڈنگ‘ جی پی او‘ ایوان اوقاف‘ سپریم کورٹ رجسٹری بلڈنگ‘ سینٹ اینڈریو چرچ اور موج دریار دربار پر کام بند ہو گیا تاہم حکومت سٹے سے قبل ان تمام مقامات پر کھدائیاں شروع کر چکی تھی‘ سڑکیں توڑی جا چکی تھیں‘ ستون کھڑے کئے جا چکے تھے اور ٹنلز کےلئے زمین میں سوراخ ہو چکے تھے‘ عدالتی حکم کے بعد یہ کام رک گیا‘ مقدمہ چلنے لگا‘ ہائی کورٹ نے 19 اگست 2016ءکو پنجاب حکومت کے خلاف حتمی فیصلہ بھی دے دیا‘ حکومت نے 13 اکتوبر 2016ءکو ہائی کورٹ کا فیصلہ سپریم کورٹ میں چیلنج کر دیا‘ سپریم کورٹ نے پانچ رکنی بینچ بنایا‘ سماعتیں شروع ہوئیں‘ وکیل آتے اور جاتے رہے اور دلائل دیے اور لئے جاتے رہے یہاں تک کہ سپریم کورٹ نے 17 اپریل 2017ءکو فیصلہ محفوظ کر دیا‘ یہ فیصلہ 8 دسمبر 2017ءتک محفوظ رہا‘ سپریم کورٹ نے 8 دسمبر کو پنجاب حکومت کو اورنج ٹرین لائین ٹرین مکمل کرنے کی اجازت دے دی تاہم ٹرین چلنے کے بعد تھرتھراہٹ چیک کرنے کےلئے کمیٹی بنا دی گئی یوں انصاف کا یہ عمل 22 ماہ جاری رہا‘ ان 22 ماہ میں منصوبے کی کاسٹ 164 ارب روپے سے 260 ارب تک ہو گئی‘ وہہزاروں لوگ جن کے گھروں اور دکانوں کے راستے کھدے ہوئے تھے‘ وہ 22 ماہ تک ذلیل ہوتے رہے‘ لوگوں کے اربوں روپے کے کاروبار تباہ ہوگئے‘ سینکڑوں چھوٹے بڑے حادثے ہوئے اور ان حادثوں میں بے شمار لوگ جان سے گزر گئے‘ لاہور شہر میں 22 ماہ پولوشن بھی پھیلتا رہا‘ یہ پولوشن بھی ہزاروں لوگوں کو بیمار کر گیا‘ یہ منصوبہ 2017ءمیں مکمل ہونا تھا‘ یہ اب 2018ءتک چلا جائے.
گا‘ ریاست کو اس تاخیر کی کاسٹ بھی برداشت کرنا پڑے گی ‘ سپریم کورٹ نے 17 اپریل کو فیصلہ محفوظ کیا تھا‘یہ فیصلہ سات ماہ محفوظ رہا‘ ان سات ماہ کے دوران حکومت کا دو کروڑ روپے روزانہ نقصان ہوتا رہااور حکومت چینی کمپنیوں کو اس نقصان کے علاوہ دس ارب روپے اضافی بھی ادا کرے گی۔میں ادب کے ساتھ یہ پوچھنا چاہتا ہوں اس تاخیر‘ اس نقصان کا ذمہ دار کون ہے؟ کیا یہ عوامی منصوبہ نہیں تھا؟ کیا یہ رقم غریب عوام کی امانت نہیں تھی اور کیا پاکستان دنیا کا پہلا ملک تھا جس میں اس نوعیت کا منصوبہ شروع ہوا؟ دنیا کے پچاس ملکوں کے 148 شہروں میں زیر زمین ٹرینیں چلتی ہیں‘ٹرینوں کے ٹریک دو دو سو فٹ زمین کے نیچے بچھے ہیں‘ زمین کے اوپر پورے کے پورے شہر آباد ہیں اور نیچے ٹرینیں چل رہی ہیں‘ یہ ٹریک آج سے سو سال پہلے اس وقت بنائے گئے جب ٹیکنالوجی ننگے پاﺅں چل رہی تھی‘ لندن میں 1863ءمیں زیر زمین ریلوے سسٹم بنایا گیا اور یہ پیرس میں 1900ءمیں بنا‘ یہ دونوں شہر لاہور سے قدیم بھی ہیں اور یہ ہمارے مقابلے میں ہزار گناہ زیادہ ”ثقافتی اثاثے“ بھی ہیں لیکن وہاں کوئی سٹے آرڈر جاری ہوااور نہ ہی یہ منصوبے 22 ماہ تک لٹکے رہے‘لاہور میں چند سٹیشنوں کا ایشو تھا‘ ٹیکنالوجی ماضی کے مقابلے میں ہزار گناہ بہتر تھی‘ لندن اور پیرس کی ٹرینیں نوے فیصد زمین کے اندر چلتی ہیں‘ لاہور کی اورنج لائین ٹرین کا نوے فیصد حصہ زمین سے اوپر تھا لیکن ہم نے ان حقائق کے باوجود یہ منصوبہ 22 ماہ روکے رکھا‘ کیوں؟ ہم چند لمحوں کےلئے یہ کیوں بھی سائیڈ پر رکھ دیتے ہیں اور ہم یہ فرض کر لیتے ہیں اورنج لائین ٹرین منصوبے میں عدالتوں کا اطمینان ضروری تھا لیکن یہاں سوال پیدا ہوتا ہے جو فیصلہ 22 ماہ میں ہوا کیا وہ دو ماہ میں ممکن نہیں تھا؟ہم نے سات ماہ تک فیصلہ کیوں محفوظ رکھا؟ یہ فیصلہ اگر اپریل میں آ جاتا تو کیا حرج تھا؟ اس تاخیر کا کس کو فائدہ ہوا اور کس کو نقصان ہوا؟ میں دل سے سمجھتا ہوں ہمارے سیاسی اور عسکری نظام کی طرح ہمارے عدالتی نظام کو بھی اصلاح کی ضرورت ہے‘ ریاست کو بہرحال ترقیاتی منصوبوں اور عوامی فلاح کے پراجیکٹس کو عام عدالتی نظام سے الگ کرنا ہو گا‘ ہمیں اس کےلئے الگ ٹریبونل بھی بنانا ہوگا‘ ٹریبونل سے سٹے آرڈر کا استحقاق بھی لینا ہوگا اور ٹریبونل کو فیصلوں کےلئے ٹائم فریم کا پابند بھی کرنا ہوگا ورنہ یہ سسٹم اور یہ ملک نہیں چل سکے گا۔آپ کو یاد ہوگا جسٹس افتخار محمد چودھری نے2006ءمیں سٹیل مل پر سوموٹو نوٹس لے لیا تھا‘ شوکت عزیز حکومت21 ارب68 کروڑ روپے میں سٹیل مل فروخت کرنا چاہتی تھی‘ سودے میں زمین اور دوسری تنصیبات شامل نہیں تھیں‘ سپریم کورٹ نے سودا منسوخ کرا دیا‘ ریاست اب تک سٹیل مل پر 164 ارب روپے خرچ کر چکی ہے لیکن سٹیل مل اس کے باوجود چل نہیں رہی‘ مل کے قرضے بھی بڑھتے چلے جا رہے ہیں‘یہ مل اگر 2006ءمیں فروخت ہو جاتی تو کم از کم 164 ارب روپے تو بچ جاتے‘آپ دیکھ لیجئے گا ہم یہ مل بھی ضرور فروخت کریں گے لیکن ہم اس وقت تک اس پر 500 ارب روپے خرچ کر چکے ہوں گے‘ ہمیں اس کا ایک دھیلا بھی نہیں ملے گا‘ ہم اسے کباڑیوں کے ہاتھوں بیچیں گے اور کباڑ اٹھانے والوں کو معاوضہ بھی دیں گے‘ آپ اسی طرح ریکوڈک کی مثال بھی لے لیجئے‘ افتخار محمد چودھری نے یہ منصوبہ 7 جنوری 2013ءمیں رکوا دیا‘ ریاست اب تک اس پر 250 ارب روپے خرچ کر چکی ہے لیکن ہم ابھی تک سونے کے ان ذخائر تک نہیں پہنچے جنہوں نے قوم کا مقدر بدلنا تھا‘ہم نے اسی طرح 2012ءمیں عدالتی حکم پر ترکی کے رینٹل پاور پلانٹ ”کارکے“ کا معاہدہ منسوخ کر دیا‘ کارکے عالمی عدالت انصاف میں چلی گئی‘ عالمی عدالت نے پاکستان کو 830 ملین ڈالر کا جرمانہ ٹھونک دیا‘ اب یہ نوے ارب روپے کون ادا کرے گا؟ اور کراچی میں اب عدالتی حکم پر عمارتیں گرائی جا رہی ہیں‘ یہ عمارتیں کن کی ملکیت ہیں اور اس کا نقصان کس کو ہوگا؟ آپ یقین کیجئے سینکڑوں لوگ ایک عدالتی فیصلے پر ایک رات میں فٹ پاتھ پر آگئے۔یہ درست ہے کراچی میں پانی کا شدید بحران ہے لیکن یہ بحران پورے عرب امارات‘ پورے یونان‘ پورے لیبیا اور پورے جاپان میں ہے لیکن کیا وہاں عمارتیں گرائی جا رہی ہیں؟ ایمسٹرڈیم شہر کا ایک تہائی حصہ سمندر پر بنا ہے‘ یہ فلوٹنگ ہے لیکن وہاں عمارتیں بنانے پر کوئی پابندی نہیں‘ کیوں؟ میری سپریم کورٹ سے درخواست ہے آپ عمارتیں گرانے یا ہاﺅسنگ سکیموں پر پابندی لگانے کی بجائے تمام ڈویلپرز کو حکم دیں یہ سکیم بنانے سے پہلے سمندر کے کھارے پانی کو استعمال کے قابل بنانے کے پلانٹ لگائیں اور یہ ہر فلیٹ‘ ہر گھر میں واش روم اور واش بیسن کی لائنیں بھی الگ الگ لگائیں ‘یہ مسئلہ ہمیشہ ہمیشہ کےلئے حل ہو جائے گا‘ آپ عمارتوں کو گرانے اور تعمیر پر پابندی کے بجائے اسی طرح ہاﺅسنگ سکیموں کے مالکان اور حکومت کو سمندری پانی کو استعمال کے قابل بنانے کا حکم بھی دیں‘ ہمیں بیرونی سرمایہ کاری‘ انٹرنیشنل کمپنیوں اور ملک کا ملکوں کے ساتھ معاہدوں کے معاملے میں بھی اپنا رویہ تبدیل کرنا ہوگا‘ ہمیں یہ فیصلہ بھی کرنا ہوگا کیا ہمیں ترقیاتی منصوبے چاہئیں‘ کیا ملک میں سڑکیں‘ پل‘ انڈر پاسز‘ اوورہیڈ برج‘ میٹروز اور ٹرینیں ہونی چاہئیں اور ہمیں یہ فیصلہ بھی کرنا ہوگا کیا ائیر لائینز‘ سٹیل ملز اور فیکٹریاں چلانا حکومت کا کام ہے اور ہم کب تک عوام کا پیٹ کاٹ کر قومی سرمایہ سٹیل مل‘ پی آئی اے اور ریلوے جیسے جہنموں میں جھونکتے رہیں گے؟ہمیں یہ فیصلہ بھی کرنا ہوگا ہم کب تک ایل ڈی اے‘ سی ڈی اے اور کے ڈی اے جیسے سفید ہاتھی پالتے رہیں گے‘ ہمیں یہ فیصلہ بھی کرنا ہوگا کیا ہمیں واقعی بیرونی سرمایہ کاری‘ بیرونی کمپنیاں اور بیرونی ایکسپرٹس کی ضرورت ہے اور ہمیں یہ فیصلہ بھی کرنا ہوگا کیا سرکار کی املاک واقعی سرکار کی ہیں‘ ریاست کی سڑکیں واقعی ریاست کی ہیں یا پھر یہ کسی دشمن ملک کی ملکیت ہیں‘ ہم جس دن یہ فیصلہ کر لیں گے ہم اس دن زیادہ بہتر فیصلوں کے قابل ہو جائیں گے‘ ہم اس دن وکلاءکے ہاتھوں سے ملتان جوڈیشل کمپلیکس کے شیشے‘ دروازے اور کھڑکیاں بھی بچا لیں گے اور ہم اس دن اسلام آباد‘ لاہور اور کراچی کی مرکزی شاہراہوں کو بھی دھرنے بازوں سے محفوظ بنا لیں گے۔آپ یقین کیجئے امریکی صدر ڈونلڈ ٹرمپ نے جس دن واشنگٹن میں بیت المقدس کو اسرائیل کا دارالحکومت تسلیم کیا تھا اسلام آباد کے شہری اس دن گھروں میں بیٹھے بیٹھے سہم گئے تھے‘ لوگوں کا خیال تھا ہماری قوم اب بیت المقدس کا مقدمہ اسلام آباد کی سڑکوں پر لڑے گی‘ یہ اپنے راستے‘ اپنی سرکاری املاک اور اپنی گاڑیوں کو نقصان پہنچا کر صدر ٹرمپ کو سبق سکھائیں گے‘ ہم نے جس دن اپنی سڑکوں کو اپنی سڑکیں اور سرکاری املاک کو اپنی املاک سمجھ لیا ہم اس دن اپنے لئے اچھے فیصلے کر لیں گے ورنہ دوسری صورت میں ہم اسی طرح اپنے منہ پر تھپڑ مار کر دوسروں سے انتقام لیتے رہیں گے‘ ہم اپنے منصوبوں کی کاسٹ بڑھا کر اپنے شملے اونچے کرتے رہیں گے اور عوام اسی طرح ایک دوسرے سے پوچھتے رہیں گے ”اس کا ذمہ دار کون ہے؟“۔

مہمان کالم
میں نے برسوں پہلے انگریزی کی کسی طبی کتاب میں بہترین زندگی کے چالیس بہترین اصول پڑھے تھے‘ میں نے وہ صفحات کاپی کر کے اپنے پاس رکھ لئے‘ میں گاہے بگاہے یہ صفحات نکال کر پڑھتا رہتا تھا‘ میں ان اصولوں پر عمل کی کوشش بھی کرتا تھا‘ میں نے دس سال قبل تفاسیر اور احادیث کا مطالعہ شروع کیا تو پتہ چلا یہ چالیس اصول دنیا کے کسی طبی ادارے یا یورپ اور امریکا کے کسی سیلف ہیلپ انسٹی ٹیوٹ نے ڈویلپ نہیں کئے‘ یہ تمام اصول ہمارے پیارے رسولؐ کی حیات طیبہ کا نچوڑ ہیں‘ یہ سیرت البنیؐ سے اخذ کئے گئے ہیں‘ ہمارے رسولؐ نے پوری زندگی اپنے اصحابؓ کو ان اصولوں کی ٹریننگ دی‘ آپؓ کے صحابہ کرامؓ بہترین زندگی کے ان چالیس بہترین اصولوں کی چلتی پھرتی تصویر تھے‘ میں نے اس دن سے ان اصولوں پر عبادت کی طرح عمل شروع کر دیا‘ گو میں ابھی تک ان پر مکمل عملدرآمد نہیں کر سکا لیکن مجھے یقین ہے اللہ تعالیٰ میری توفیق میں ضرور اضافہ کرے گا اور میں کسی نہ کسی دن آپؐ کے وضع کردہ ان اصولوں پر عمل میں کامیاب ہو جاؤں گا‘یہ چالیس اصول کیا ہیں‘ آپ وہ اصول اور ان اصولوں کی جدید سائنسی توجہیات ملاحظہ کیجئے‘ مجھ سے اگر تشریح میں کوئی غلطی ہو جائے تو مجھے معاف کر دیجئے گا‘ میرے لئے دعا بھی فرمائیے گا۔آپؐ نے فرمایا فجر اور اشراق‘ عصر اور مغرب اور مغرب اور عشاء کے دوران سونے سے باز رہا کرو۔ اس فرمان میں بے شمار طبی حکمتیں پوشدہ ہیں‘ مثلاً آج میڈیکل سائنس نے ڈسکور کیا کرہ ارض پر فجر اور اشراق کے دوران آکسیجن کی مقدار سب سے زیادہ ہوتی ہے‘ہم اگر اس وقت سو جائیں تو ہم اس آکسیجن سے محروم ہو جاتے ہیں اور یوں ہماری طبیعت میں بوجھل پن آ جاتا ہے‘ ہم آہستہ آہستہ چڑچڑے اور بیزار ہو جاتے ہیں‘ عصر سے مغرب اور مغرب سے عشاء کے درمیان بھی آکسیجن کم سے کم تر ہوتی چلی جاتی ہے‘ ہم اگراس وقت بھی سو جائیں تو ہمارا جسم آکسیجن کی کمی کا شکار ہو جاتا ہے اور ہم دس مہلک بیمایوں میں مبتلا ہو جاتے ہیں‘ دمہ بھی ان دس بیماریوں میں شامل ہے چنانچہ آپ یہ اوقات جاگ کر گزاریں‘آپ پوری زندگی صحت مند رہیں گے‘ میرا تجربہ ہے ہم اگر ان تین اوقات میں واک کریں تو ہماری طبیعت میںبشاشیت آ جاتی ہے۔ آپؐ نے فرمایا‘بدبودار اور گندے لوگوں کے ساتھ نہ بیٹھا کرو۔یہ حکم بھی حکمت سے لبالب ہے‘ بدبو انسان کو ڈپریس کرتی ہے جبکہ خوشبو ہماری توانائی میں اضافے کا باعث بنتی ہے‘ انسان اگر روزانہ دس منٹ بدبو دار اور گندے لوگوں میں بیٹھنا شروع کر دے تو یہ بیس دنوں میں ڈپریشن کا شکار ہو جائے گا‘ ہمارے رسولؐ نے ہمیں شاید اسی لئے بدبودار لوگوں سے پرہیز کا حکم دیا‘آپ بھی یہ کر کے دیکھیں آپ کا مزاج بدل جائے گا۔آپؐ نے فرمایا ان لوگوں کے درمیان نہ سوئیں جو سونے سے قبل بری باتیں کرتے ہیں۔یہ فرمان بھی حکمت کے عین مطابق ہے‘ آج سائنس نے ڈسکور کیا نیند سے قبل ہماری آخری گفتگو ہمارے خوابوں کا موضوع ہوتی ہے اور یہ خواب ہمارے اگلے دن کا موڈ طے کرتے ہیں‘ ہم اگر برا سن کر سوئیں گے تو ہم برے خواب دیکھیں گے اور ہمارے برے خواب ہمارے آنے والے دن کا موڈ بن جائیں گے‘ ہم خوابوں کے طے کردہ موڈ کے مطابق دن گزارتے ہیں چنانچہ نیند سے قبل ہماری آخری محفل اچھی ہونی چاہیے۔
ہمارا اگلا دن اچھا گزرے گا۔ فرمایا تم بائیں ہاتھ سے نہ کھاؤ۔یہ فرمان بھی عین سائنسی ہے‘ہمارے دماغ کے دو حصے ہیں‘ دایاں اور بایاں‘ دایاں حصہ مثبت اور بایاں منفی ہوتا ہے‘ ہم جب اپنے جسم کو دائیں ہاتھ سے ”فیڈ“ کرتے ہیں تو ہماری مثبت سوچ مضبوط ہوتی ہے اور ہم جب اپنے بدن کو بائیں ہاتھ سے کھلاتے ہیں تو ہماری منفی سوچ طاقتور ہوتی چلی جاتی ہے‘ آپ مشاہدہ کر لیں آپ کو بائیں ہاتھ سے کھانے والے اکثر لوگ منفی ملیں گے‘ یہ آپ کو ہمیشہ شکوہ شکایت‘ غیبت اور دوسروں کو نقصان پہنچاتے نظر آئیں گے۔فرمایا منہ سے کھانا نکال کر نہ کھاؤ۔یہ فرمان بھی سائنس سے درست ثابت ہوتا ہے‘ ہمارے منہ میں دس کروڑ سے ایک ارب تک بیکٹیریا ہوتے ہیں‘ یہ بیکٹیریا مہلک جراثیم بن جاتے ہیں‘یہ جراثیم ہمارے کھانے میں مل جاتے ہیں‘ یہ کھانا معدے میں جاتا ہے تو معدے کے غدود ان جراثیم کو مار دیتے ہیں یوں یہ ختم ہو جاتے ہیں لیکن جب ہم جراثیم ملے کھانے کو منہ سے نکال لیتے ہیں تو ان جراثیم کو آکسیجن مل جاتی ہے‘ یہ آکسیجن سیکنڈ کے ہزارویں حصے میں ان جراثیم کی تعداد کھربوں تک پہنچا دیتی ہے‘یہ جراثیم معدے کے غدودوں سے بھی طاقتور ہوتے ہیں‘ ہم جب منہ سے نکلے لقمے کو دوبارہ منہ میں رکھتے ہیں تو یہ لقمہ معدے میں پہنچ کر زہر بن جاتا ہے اور یہ زہر ہمارے پورے نظام ہضم کو تباہ کر دیتا ہے‘ آپ کو زندگی میں کبھی کوئی ایسا شخص صحت مند نہیں ملے گا جسے منہ سے لقمہ نکال کر کھانے کی عادت ہو جبکہ آپ کو ہونٹ بھینچ کر اور آواز پیدا کئے بغیر کھانے والے لوگ ہمیشہ صحت مند ملیں گے۔ہمارے رسول ؐ نے فرمایا ہاتھ کے کڑاکے نہ نکالا کرو۔سائنس کا کہنا ہے ہم میں سے جو لوگ انگلیوں کے کڑاکے نکالتے رہتے ہیں ان کے جوڑ کھلنا شروع ہو جاتے ہیں اور یہ جلد آرتھریٹس کا شکار ہو جاتے ہیں‘ یہ جوڑوں کے درد کی شکایت بھی کرتے ہیں۔ فرمایا جوتا پہننے سے قبل اسے جھاڑ لیا کرو۔ہماری زندگی کے عام واقعات میں کیڑے مکوڑے‘ بچھو‘ چھپکلیاں‘ چھوٹے سانپ اور بھڑیں ہمارے جوتوں میں پناہ لے لیتی ہیں‘ ہمارے بچے بھی جوتوں میں کیل‘ کانٹے اور بلیڈ پھینک دیتے ہیں چنانچہ ہم جب جوتا پہنتے ہیں تو ہمارے پاؤں زخمی ہو جاتے ہیں یا پھر ہمیں کیڑے مکوڑے کاٹ لیتے ہیں لہٰذا جوتا پہننے سے قبل اسے جھاڑ لینا ہمیشہ فائدہ مند رہتا ہے۔فرمایا نماز کے دوران آسمان کی طرف نہ دیکھو‘یہ فرمان بھی درست ہے‘ آسمان میں ایک وسعت ہے‘ یہ وسعت ہمیشہ ہماری توجہ کھینچ لیتی ہے‘ ہم جب بھی آسمان کی طرف دیکھتے ہیں ہماری توجہ بٹ جاتی ہے‘ہمیں توجہ واپس لانے میں ٹھیک ٹھاک وقت لگتا ہے‘ نماز کیلئے یکسوئی درکار ہوتی ہے‘ ہم جب نماز کے دوران آسمان کی طرف دیکھتے ہیں تو ہم سجدے اور رکوع بھول جاتے ہیں چنانچہ حکم دیا گیا نماز کے دوران آسمان کی طرف نہ دیکھو‘ یہ فارمولہ تخلیقی کاموں کیلئے بھی اہم ہے۔
اگر لکھاری لکھتے‘ مصور تصویر بناتے اور موسیقار دھن بناتے ہوئے آسمان کی طرف دیکھ لے تو اس کا تسلسل ٹوٹ جاتا ہے‘یہ اپنا کام مکمل نہیں کر پاتا شاید یہی وجہ ہے دنیا کا زیادہ تر تخلیقی کام بند کمروں میں مکمل ہوا‘ یہ کھلی فضا میں پروان نہیں چڑھا‘ بیتھون کی سمفنیاں ہوں‘ ڈاونچی کا لاسٹ سپر ہو یا پھر ٹالسٹائی کا وار اینڈ پیس دنیا کا ہر ماسٹر پیس بند کمرے میں تخلیق ہوا‘ آپ تخلیق کا آئیڈیا لینا چاہتے ہیں تو آپ کھلے آسمان کے نیچے کھلی فضا میں واک کریں‘آپ آئیڈیاز سے مالا ہول ہو جائیں گے لیکن آپ اگر ان آئیڈیاز پر کام کرنا چاہتے ہیں تو پھر آپ کمرے میں بند ہو جائیں‘ آپ کمال کر دیں گے‘ آپ کو انبیاء‘ اولیاء اور بزرگان دین بھی بند غاروں میں مراقبے کرتے ملیں گے‘ یہاں تک کہ مہاتما بودھ کو نروان بھی ایک ایسے درخت کے نیچے ملا تھا جس سے آسمان دکھائی نہیں دیتا تھا‘ وہ درخت اتنا گھنا تھا کہ وہ بارش تک روک لیتا تھا۔ آپؐ نے فرمایا رفع حاجت کی جگہ (ٹوائلٹ) مت تھوکو۔ یہ حکم اپنے اندر دو حکمتیں رکھتا ہے‘ٹوائلٹ میں تھوکنے سے بعد میں آنے والوں کو بھی تکلیف ہوتی ہے اور دوسرا ٹوائلٹس میں لاکھوں قسم کے جراثیم بھی ہوتے ہیں‘ ہم جب تھوکنے کیلئے منہ کھولتے ہیں تو یہ جراثیم ہمارے منہ میں پہنچ جاتے ہیں‘ یہ ہمارے لعاب دہن میں پرورش پاتے ہیں‘یہ معدے اور پھیپھڑوں میں پہنچتے ہیں اورپھر یہ ہمیں بیمار کر دیتے ہیں‘ آپ کو یہ جان کر حیرانی ہو گی ہماری ناک جراثیم کو پھیپھڑوں تک نہیں جانے دیتی‘ ہماری ناک سے صرف کیمیکلز جسم میں داخل ہوتے ہیں‘ جراثیم زیادہ تر منہ سے بدن میں اترتے ہیں اور ان کا بڑا سورس ٹوائلٹس ہوتے ہیں چنانچہ آپ ٹوائلٹ میں لمبی لبی سانس لینے‘ تھوکنے‘ گانا گانے‘ آوازیں دینے اورموبائل فون پر بات کرنے سے پرہیز کریں‘ آپ کی صحت اچھی رہے گی۔آپؐ نے فرمایا لکڑی کے کوئلے سے دانت صاف نہ کرو۔ ہم میں سے بے شمار لوگ کوئلے سے دانت صاف کرتے ہیں‘ کوئلے سے ہمارے دانت وقتی طور پر چمک جاتے ہیں لیکن یہ بعد ازاں مسوڑے بھی زخمی کر دیتاہے‘ دانتوں کی جڑیں بھی ہلا دیتا ہے اور یہ منہ میں بو بھی پیدا کرتا ہے‘ لکڑی کا کوئلہ سیدھا سیدھا کاربن ڈائی آکسائیڈ ہوتا ہے‘ یہ ”ہائی جینک“ بھی نہیں ہوتا چنانچہ رسول اللہ ﷺ نے اس سے پرہیز کا حکم دیا۔ آپؐ نے فرمایا ہمیشہ بیٹھ کر کپڑے تبدیل کیا کرو۔ ہم میں سے اکثر لوگ شلوار‘پتلون یا پائجامہ پہنتے وقت اپنی ٹانگ پھنسا بیٹھتے ہیں اور گر پڑتے ہیں‘ ہم میں سے ہر شخص زندگی میں کبھی نہ کبھی اس صورتحال کا شکار ضرور ہوتا ہے بالخصوص ہم بڑھاپے میں شلوار یا پتلون بدلتے وقت ضرور گرتے ہیں‘ آپؐ نے شاید اس قسم کے حادثوں سے بچنے کیلئے یہ حکم جاری فرمایاتھا اور آپؐ نے فرمایا اپنے دانتوں سے سخت چیز مت توڑا کرو۔ ہم لوگ اکثر بادام‘ اخروٹ یا نیم پکا گوشت توڑنے کی کوشش میں اپنے دانت تڑا بیٹھتے ہیں‘ دانت ایکٹو زندگی کا قیمتی ترین اثاثہ ہوتے ہیں‘ آپؐ نے شاید اسی لئے دانتوں کو سخت چیزوں سے بچانے کا حکم دیا۔ نوٹ: یہ کامیاب صحت مند زندگی کے بارہ اصول ہیں‘ 28 ابھی باقی ہیں‘ یہ آپ اگلے کالم میں ملاحظہ کیجئے گا۔

مہمان کالم
سموگ کا آغاز لندن سے ہوا تھا‘ لوگ 5 دسمبر 1952ءکی صبح اٹھے توشہر گہرے سیاہ دھوئیں میں ڈوب چکا تھا‘ ہاتھ کو ہاتھ سجائی نہیں دے رہا تھا‘ حد نظر صفر ہو چکی تھی‘ گاڑیاں گاڑیوں کو نظر نہیں آ رہی تھیں‘ ٹرین ڈرائیور پٹڑی نہیں دیکھ پا رہے تھے‘ پائلٹس کو رن وے نظر نہیں آ رہا تھااوربچے والدین اور میاں بیوی ایک دوسرے کو دکھائی نہیں دے رہے تھے‘ پورا شہر دھند میں گم تھا‘ شام کے وقت پتہ چلا یہ دھند دھند نہیں یہ عذاب ہے‘ یہ گاڑھا سیاہ دھواں ہے‘ یہ دھواں اگلے دن چار ہزار لوگوں کی جان لے گیا‘ لوگ کھانس کھانس کر دم توڑنے لگے‘ لندن کی سماجی زندگی رک گئی‘ ٹریفک بند ہو گئی‘ ٹرینیں معطل ہو گئیں‘ فلائیٹس منسوخ ہو گئیں‘ دفتروں اور سکولوں میں چھٹی ہو گئی‘ شاپنگ سنٹرز بند ہو گئے اور لوگوں نے گھروں سے باہر نکلنا ترک کر دیا‘ شہر میں سناٹا تھا‘یہ سناٹا ایمبولینسز کی آوازوں سے پنکچر ہوتا تھا‘ قبرستان بھر چکے تھے اور ہسپتالوں میں مردے اور بیمار دونوں ایک بیڈ پر پڑے تھے‘ یہ عذاب پانچ دن جاری رہا‘ نو دسمبر کی رات بارش شروع ہوئی اور فضا آہستہ آہستہ دھل گئی لیکن اموات کا سلسلہ جاری رہا‘ دسمبر کے آخر تک لندن کے بارہ ہزار لوگ انتقال کر چکے تھے جبکہ ڈیڑھ لاکھ لوگ دمے‘ آشوب چشم‘ ٹی بی اور نروس بریک ڈاؤن کا شکار تھے‘ ماحولیات کے ماہرین نے تحقیقات شروع کر دیں‘ پتہ چلا 5 سے 9 دسمبر کے دوران لندن کی فضا میں روزانہ ہزار ٹن سموک پارٹیکلز پیدا ہوتے رہے‘ ان میں 140 ٹن ہائیڈرو کلورک ایسڈ‘ 14 ٹن فلورین کمپاؤنڈ اور 370 ٹن سلفر ڈائی آکسائیڈ شامل ہوتی تھی‘ یہ تمام مادے صحت کےلئے انتہائی مضر تھے‘ ماہرین نے سوچنا شروع کیا ”یہ تمام پارٹیکلز آئے کہاں سے تھے“ پتہ چلا یہ ساڑھے سات سو سال کی غلطیوں کا دھواں ہے‘ یہ سلسلہ 1200ءمیں شروع ہوا تھا‘ ساڑھے سات سو برسوں میں لندن کی آبادی میں دس گناہ اضافہ ہو گیا‘ جنگل کٹ گئے‘ ندیاں اور جھیلیں ختم ہو گئیں‘ گاؤں دیہات شہر میں آ گئے‘ کھیت کھلیانوں کی جگہ ہاؤسنگ سوسائٹیاں بن گئیں‘ صنعتی انقلاب آیا‘ شہر میں ہزاروں فیکٹریاں لگ گئیں‘ بجلی ایجاد ہوئی‘ کوئلے سے چلنے والے پاور پلانٹ لگ گئے‘ ٹرین سروس شروع ہوئی‘ ٹرام آئی‘ گاڑیاں آئیں‘ تعمیرات شروع ہوئیں‘ دوسری جنگ عظیم نے بھی دھواں اڑایا اور آخر میں لوگ بھی آلودگی پھیلانے لگے چنانچہ لندن کی فضا آلودہ ہوتی چلی گئی‘ ہوا میں آکسیجن کم ہو گئی‘ یہ سلسلہ چلتے چلتے 1952ءتک پہنچ گیا‘ سردی شروع ہوئی‘ لوگوں نے اپنی انگیٹھیوں میں کوئلہ جلایا‘ لاکھوں ٹن دھواںپیدا ہوا‘ یہ دھواں ساڑھے سات سو سال کی آلودگیوں میں ”مکس اپ“ ہوا‘ دسمبر کی دھند میں ملا اور گہری‘ دبیز اور سیاہ گیس میں تبدیل ہو گیا اور یہ گیس پانچ دن شہر کے اندر گھومتی پھرتی رہی‘ ماہرین نے اس دھند کو سموک اور فاگ دو لفظ ملا کر ”سموگ“ کا نام دے دیا اور لندن کے اس ”سانحے کو گریٹ سموگ آف لندن“ قرار دے دیا۔ماحولیات کے ماہرین نے سموگ کی تشخیص کر لی‘ اب علاج کی باری تھی‘ علاج کی ذمہ داری کنزرویٹو پارٹی کے ایم پی سر گیرالڈ ڈیوڈ نے لی‘ یہ شریف خاندان کی طرح بزنس مین اور کارخانے دار تھے‘ یہ 1950ءمیں سیاست میں آئے ‘ یہ گریٹ سموگ آف لندن کے دنوں میں ہاؤس آف کامنز کے تازہ تازہ رکن بنے تھے‘ یہ اٹھے اور لندن کی فضا کو صاف کرنے کا پلان بنانا شروع کر دیا‘ یہ ماہرین کے ساتھ مل کر چار سال منصوبہ بندی کرتے رہے یہاں تک کہ انہوں نے 1956ءمیں ”کلین ائیر ایکٹ“ بنا لیا‘ یہ ایکٹ ہاؤس آف کامنز میں پیش ہوا اور ایوان نے 5 جولائی 1956ءکو اس کی منظوری دے دی‘ یہ ایکٹ چھ بنیادی اصلاحات پر مشتمل تھا‘ حکومت نے شہر کے اندر کوئلے کے استعمال پر پابندی لگا دی‘ عوام کو ”فائر پلیس“ کےلئے متبادل ذرائع فراہم کرنے کا اعلان کر دیا گیا‘ حکومت نے ایک سال میں یہ ذرائع فراہم کر دیئے‘ ماڈرن ہیٹنگ سسٹم اسی ایکٹ کی پیداوار تھا‘ سردیوں میں بجلی بھی سستی کرنے کا فیصلہ کیا گیا تاکہ لوگ بجلی کے ذریعے گھر گرم کر لیں‘ حکومت نے شہر کے اندر فیکٹریاں بند کر دیں‘ مالکان کو شہر سے دور مفت جگہ بھی فراہم کی گئی‘ ٹیکس میں گنجائش بھی اور فیکٹریاں شفٹ کرنے کےلئے قرضے بھی دیئے گئے۔
بجلی کے تمام پلانٹس دو برسوں میں لندن سے دور جنگلوں میں منتقل کر دیئے گئے‘ لندن اور لندن کے اطراف میں درخت کاٹنا‘ زرعی زمینوں کے سٹیٹس میں تبدیلی اور گرین ایریاز کے خاتمے پر پابندی لگا دی گئی‘ ملکہ تک کو درخت کاٹنے سے قبل تحریری اجازت کا پابند بنا دیا گیا اور پبلک ٹرانسپورٹ میں اضافے‘ پرائیویٹ گاڑیوں کی حوصلہ شکنی اور پٹرول کے معیار کو بلند کرنے کا فیصلہ کیا گیا‘ ہاؤس آف کامنز نے ان اصلاحات کی منظوری دی‘ حکومت نے کام شروع کیا اور ایکٹ کی منظوری کے صرف چار سال بعد 1960ءمیں لندن کی فضا مکمل طور پر ”سموگ فری“ ہو گئی‘ یہ ایکٹ اس قدر مکمل اور سخت تھا کہ سرگیرالڈ ڈیوڈ کو خود اس کا نقصان اٹھانا پڑا‘ ان کی اپنی فیکٹریاں بھی لندن سے باہر منتقل ہوئیں۔ہم اب گریٹ سموگ آف لندن سے گریٹ سموگ آف لاہور کی طرف آتے ہیں‘ پنجاب پچھلے تین برسوں سے شدید سموگ کا شکار چلا آ رہا ہے‘ نومبر کے مہینے میں لاہور‘ بہاولنگر‘ پاکپتن‘ فیصل آباد اور ٹوبہ ٹیک سنگھ زہریلی دھند میں گم ہو جاتے ہیں‘پنجاب اس بار بھی سموگ میں دفن ہے‘ ہماری فضا میں اگر 80 مائیکرو گرام زہریلے مادے ہوں تو ہمارے پھیپھڑے انہیں برداشت کر جاتے ہیں لیکن لاہور اور اس کے مضافات میں اس وقت آلودگی کی شرح 200مائیکرو گرام کیوبک میٹر ہے‘ ہم اگر فضا کا ٹیسٹ کریں تو ہمیں اس میں کاربن مانو آکسائیڈ‘ سلفر اور نائیٹروجن کی بھاری مقدار ملے گی‘ یہ تمام مادے زہر ہیں‘ لاہور کی فضا میں تین سو سے چار سو فٹ تک آکسیجن کی شدید کمی بھی ہے‘ یہ فضا کتنی مضر صحت ہے آپ اس کا اندازہ سگریٹ سے لگا لیجئے‘ ہم اگر روزانہ 50 سگریٹ پئیں تو ہمارے پھیپھڑوں کو اتنا نقصان ہو گا جتنا لاہور کی فضا میں ایک دن سانس لینے سے ہو رہا ہے‘ بھارت ہم سے بھی بری صورتحال کا شکار ہے‘ بھارت میں 2012ءمیں سموگ کی وجہ سے پندرہ لاکھ لوگ مر گئے ‘ لاہور میں بھی اس سال چار لاکھ لوگ متاثر ہوئے ہیں‘ یہ لوگ 2018ءکے دوران انتقال فرما جائیں گے۔یہ سموگ کہاں سے آ رہی ہے‘ یہ سوال بہت اہم ہے‘ اس کے چار بڑے سورس ہیں‘ پہلا سورس بھارتی پنجاب کا شہر ہریانہ ہے‘ ہریانہ میں دس سال میں چاول کی فصل میں آٹھ گنا اضافہ ہوا‘ ہریانہ کے کسان ا کتوبر کے آخر میں چاول کے پودے کے خشک ڈنڈل اور خالی سٹے جلاتے ہیں‘ بھارتی کسانوں نے اس سال 3 کروڑ 50 لاکھ ٹن ڈنڈل جلائے‘ ڈنڈلوں کے دھوئیں نے دہلی سے لے کر لاہور تک پورے پنجاب کی مت مار دی‘ دو‘ لاہور کی فیکٹریوں میں اضافہ ہوتا جا رہا ہے‘ یہ فیکٹریاں دھواں پیدا کر رہی ہیں‘ تین‘ حکومت نے لاہور کے گردونواح میں درجن کے قریب بڑے پاور پلانٹس لگائے‘ بجلی کا ایشو ختم ہو گیا لیکن فضا آلودہ ہو گئی اور چوتھا سورس گاڑیاں ہیں‘ لاہور شہر میں دس لاکھ گاڑیاں ہیں‘ ہمارے پٹرول کا معیار انتہائی پست ہے چنانچہ یہ گاڑیاں چلتا پھرتا سموگ ہیں‘ ان چاروں سورسز کے علاوہ بھی سورسز ہیں‘ لاہور میں ٹائروں کو جلا کر تاریں اور تیل حاصل کیا جاتا ہے‘ شہر میں ٹائر جلانے والے سینکڑوں احاطے ہیں اور سیالکوٹ ریجن میں بھی اس موسم میں مونجی کی باقیات جلائی جاتی ہیں‘ لاہور کی آبادی بھی پھیل رہی ہے‘ مضافات میں جنگل‘ کھیت اور کھلیان بھی ختم ہو رہے ہیں اور دیہات بھی‘ آپ لاہور کے گرد ہاؤسنگ سوسائٹیوں کا ڈیٹا نکال کر دیکھ لیجئے‘ آپ سر پیٹ کر رہ جائیں گے۔
یہ ان سوسائٹیوں کا کمال ہے‘ ہم اب سبزیاں‘ پھل اور اناج بھی چین سے امپورٹ کر رہے ہیں‘ ہم امرود‘ تربوز‘ آڑو‘ کینو اور آم بھی درآمد کر رہے ہیں چنانچہ لاہور تیزی سے سموگ میں ڈوبتا چلا جا رہا ہے۔ہمیں ماننا ہوگا ترقی انتہائی اہم ہے‘ ہمیں یہ بھی ماننا ہوگا میاں شہبا زشریف نے پنجاب کےلئے بے تحاشہ کام کیا‘ لاہور اس وقت ملک کا خوبصورت اور ترقی یافتہ ترین شہر بن چکا ہے‘ پنجاب میں انگریز کے بعد پہلی مرتبہ اتنے بڑے پیمانے پر ترقیاتی کام ہوئے۔ ہمیں بہرحال میاں شہباز شریف کو اس کا کریڈٹ دینا ہوگا لیکن اس کے ساتھ ساتھ یہ بھی حقیقت ہے ترقی کا جھنڈا لاشوں پر نہیں لگا کرتا‘ پنجاب اگر اس ترقی کے ہاتھوں بیمار ہو گیا یا لوگ اگر مرنا شروع ہو گئے تو یہ ذمہ داری بھی بہرحال میاں شہباز شریف کے کندھوں پر جائے گی چنانچہ میری درخواست ہے پنجاب حکومت فوری طور پر کلین پنجاب کمیشن بنائے‘ فضائی آلودگی کی وجوہات تلاش کرے‘ اصلاحات کرے‘ اسمبلی سے منظوری لے اور لاہور کو لندن کی سپرٹ سے صاف کرنا شروع کر دے‘لاہور اور اس کے گردونواح میں اصلی شجرکاری کرائے‘ فیکٹریاں باہر شفٹ کرائے‘ گاڑیوں کی تعداد کنٹرول کرے‘ پٹرول کا معیار بہتر بنائے‘ کوڑا‘ ٹائر اور کوئلہ جانے پر پابندی لگائے اور درخت کاٹنے کی سزا متعین کرے‘ حکومت کلین ائیر لندن ایکٹ سے بھی مدد لے سکتی ہے اور یہ بھوٹان ماڈل کو بھی سٹڈی کر سکتی ہے‘ یہ بھارتی حکومت کے ساتھ مل کر دھان کی باقیات جلانے پر بھی پابندی لگا سکتی ہے اور یہ بچوں کے سلیبس میں ماحولیات کا مضمون بھی متعارف کرا سکتی ہے‘ یہ اقدامات ضروری ہیں ورنہ دوسری صورت میں پنجاب بالخصوص لاہور ایک ترقی یافتہ قبرستان بن جائے گا اور اورنج لائین ٹرین مردے ڈھونے کے کام آئے گی۔ کیا میاں شہبازشریف یہ پنجاب چاہتے ہیں۔