Tag daily jung

وزیراعظم عمران خان عالمی اقتصادی فورم (ورلڈ اکنامک فورم) کے سالانہ اجلاس میں شرکت کے لیے سوئٹزرلینڈ کے شہر ڈیووس روانہ ہوگئے۔
ریڈیو پاکستان نے رپورٹ کیا کہ وزیراعظم کے ہمراہ وزیرخارجہ شاہ محمود قریشی، مشیر برائے تجارت عبدالرزاق داؤد، معاون خصوصی برائے بیرون ملک مقیم پاکستانی ذوالفقارعباس بخاری اور معاون خصوصی برائے قومی سیکیورٹی ڈویژن معید یوسف ہیں۔
اس کے علاوہ مشیر برائے خزانہ ڈاکٹر عبدالحفیظ شیخ اور بڑے پیمانے پر سرمایہ کاری کے سفیر علی جہانگیر صدیقی ڈیووس میں وزیراعظم کے ساتھ شریک ہوں گے۔
مذکورہ دورے کے 2 اہم نکات ہیں، جس میں وزیراعظم عمران خان کا عالمی اقتصادی فورم کے خصوصی سیشن سے اہم خطاب اور سی ای اوز اور کارپوریٹ لیڈرز کے ساتھ پاکستان اسٹریٹجی ڈائیلاگ پر بات چیت کرنا ہے۔
اجلاس کی سائڈ لائن پر وزیراعظم عمران خان، امریکی صدر ڈونلڈ ٹرمپ کے ساتھ ساتھ مختلف عالمی رہنماؤں کے ساتھ دوطرفہ ملاقاتیں بھی کریں گے۔
اس کے علاوہ کارپوریٹ، بزنس، ٹیکنالوجی اور فنانس ایگزیکٹو اور بین الاقوامی مالیاتی اداروں کے نمائندوں کے ساتھ مختلف ملاقاتیں بھی شیڈول ہیں۔
رپورٹ کے مطابق عمران خان فورم کے بین الاقوامی میڈیا کونسل کے سیشن کے دوران عالمی میڈیا کی سینئر شخصیات اور ایڈیٹرز سے بھی خطاب کریں گے۔

(ایمرا نیوز آن لائن)امریکا اور طالبان کے درمیان امن معاہدہ حتمی مرحلے میں داخل ہو گیا ہے۔ امریکی میڈیا کے مطابق طالبان کونسل نے عارضی جنگ بندی پر رضامندی ظاہر کر دی ہے۔ جنگ بند ی کے دوران امریکا کیساتھ امن معاہدے پر دستخط کا بھی امکان ہے۔
امریکی میڈیا کے مطابق سنئیر طالبان رہنما نے کہاکہ جنگ بندی کی حتمی منظوری طالبان کے سربراہ دیں گے۔ تاہم جنگ بندی کی مدت واضح نہیں، یہ دس دن کے لیے بھی ہو سکتی ہے جبکہ امن معاہدے کے دو ہفتے بعد انٹرا افغان مذاکرات شروع ہو سکتے ہیں۔
18 سال سے افغانستان میں موجود امریکی فوجیوں کی وطن واپسی کیلئے طالبان کیساتھ یہ امن معاہدہ انتہائی اہمیت کا حامل ہے۔ اس وقت افغان سرزمین پر کم وبیش 12 ہزار امریکی فوجی موجود ہیں۔

لندن(ایمرا نیوزآن لائن) : برطانیہ میں پارلیمانی انتخابات کے لئے ووٹنگ آج ہو گی، انگلینڈ، ویلز، اسکاٹ لینڈ اور نارتھ آئرلینڈ میں 650 نشستوں پر ووٹ ڈالیں جائیں گے، ووٹنگ کا آغاز پاکستانی وقت کے مطابق دوپہر بارہ بجے ہوگا۔
برطانیہ میں آج ہونے والے انتخابات کے نتائج سے بریگزٹ کے مستقبل کا فیصلہ ہو گا۔ 650 انتخابی حلقوں پر مشتمل برطانوی ایوان نمائندگان کے لیے ٹوٹل تین ہزار تین سو بائیس امیدوار میدان میں ہیں جن میں ستر مسلمان امیدوار بھی شامل ہیں۔ حکومت بنانے کے لیے 326 ارکان کی تعداد درکار ہو گی۔ انگلینڈ، اسکاٹ لینڈ، ویلز اور شمالی آئرلینڈ میں ہونے والے انتخابات میں 4 کروڑ 57 لاکھ سے زائد افراد اپنا حق رائے دہی استعمال کریں گے۔ ووٹنگ کا آغاز پاکستانی وقت کے مطابق دوپہربارہ بجے ہو گا، جو رات تین بجے تک جاری رہے گا۔

برطانوی میڈیا کے مطابق نتائج جمعے کی صبح آنا شروع ہو جائیں گے۔ ووٹنگ کےدوران پولنگ اسٹیشن کے اندر سیلفی اور فوٹو لینے پر پابندی ہو گی۔
انتخابات میں کنزرویٹو پارٹی، لیبر پارٹی، لبرل ڈیموکریٹس، گرین پارٹی، اسکاٹش نیشنل پارٹی اور ڈیموکریٹک یونینسٹ پارٹی اہم سیاسی جماعتیں ہیں۔ تاہم اصل مقابلہ دو بڑی جماعتوں برطانوی وزیراعظم بورس جانسن کی کنزرویٹو پارٹی اور اپوزیشن لیڈر جیریمی کوربن کی لیبر پارٹی کے درمیان ہوگا۔ برطانیہ میں آج ہونے والے انتخابات گذشتہ 5 سال کے دوران ہونے والے تیسرے الیکشن ہیں۔ نئے الیکشن کے لیے ووٹنگ برطانوی وزیراعظم بورس جانسن کی درخواست پرکی گئی۔ انہیں امید ہے کہ نئے انتخابات کے ذریعے انہیں عوام دوبارہ زیادہ مینڈیٹ دیں گے جس کے ذریعے وہ بریگزٹ ڈیل اور پارلیمانی ڈیڈلاک کو ختم کر سکیں گے۔

کراچی(میڈیا 92 نیوز آن لائن) : رواں برس ڈینگی سے متاثرہ شہروں میں شہر قائد سرفہرست ہے جہاں سندھ کے کل 15521 ڈینگی کے کیسز میں سے 14443کا تعلق کراچی سے ہے۔
یہ انکشاف وزیراعلیٰ سندھ مراد علی شاہ کو دی گئی بریفنگ میں کیا گیا۔
وزیراعلیٰ سندھ کو بتایا گیا کہ رواں برس سندھ کے دیگر اضلاع سے 1078 کیسز رپورٹ ہوئے ہیں۔
مراد علی شاہ کو آگاہ کیا گیا کہ رپورٹ ہوئے 15521 کیسز میں سے42 افراد کا انتقال ہوگیا۔
اعداد و شمار جاننے کے بعد وزیراعلیٰ سندھ نے ڈینگی کنٹرول پروگرام کی انتظامیہ کو تحقیق پر مبنی کام کرنے کی ہدایت دی۔
وزیراعلیٰ سندھ مراد علی شاہ نے کہا کہ ااگاہ کیا جائے کہ کس ضلع سے کون سے اور کتنے مریض آئے اور کتنے مریضوں کی اموات واقع ہوئیں۔
سندھ کے وزیراعلیٰ نے انتظامیہ کو مخاطب کرتے ہوئے کہا کہ جب تک تحقیق پر مبنی کام نہیں ہوگا آپ اپنی عوام اور لوگوں کو کس طرح آگاہ کریں گے۔
وزیراعلیٰ سندھ مراد علی شاہ نے ہدایات جاری کیں کہ ڈینگی کیسز کے سامنے آنے سے پہلے انسداد ڈینگی پروگرام کی انتظامیہ کو متعلقہ محکمے آگاہ کریں تاکہ بروقت اقدامات اٹھائے جا سکیں۔ مراد علی شاہ کا کہنا تھا کہ یہ ڈیٹا صرف اسپتالوں سے نہیں بلکہ لیبارٹریوں سے بھی حاصل کیا جائے تاکہ کیسز کی درست معلومات حاصل کی جا سکیں۔

(ایمرا نیوزآن لائن) : فیس بک صارفین کیلئے خوشخبری ہے کہ فیس بک صارفین اب گوگل تصاویر سے براہ راست تصاویر اور ویڈیوز اپنی فیس بک وال پر شیئر کرسکیں گے.
فیس بک انتظامیہ کے مطابق یہ فیچر سب سے پہلے آئرلینڈ میں متعارف کرایا جارہا ہے اور دنیا بھر کے صارفین اگلے سال کے وسط تک اس نئی سہولت سے فائدہ اٹھا سکیں گے، نئے فیچر کا تمام ڈیٹا محفوظ ہوگا اور کوئی بھی فائل ٹرانسفر کرنے سے پہلے صارف سے اس کا پاسورڈ پوچھا جائے گا۔

(ایمرا نیوزآن لائن)ناروے میں کھلے آسمان تلے سیکڑوں مسلمانوں نے قرآن پاک کی تلاوت کی، یہ اجتماع اس جگہ ہوا جہاں قرآن پاک کی بے حرمتی کی گئی تھی۔
تفصیلات کے مطابق ناروے کے دارالحکومت اوسلو میں گزشتہ دن دنیا کے مختلف ممالک سے تعلق رکھنے والے سینکڑوں مسلمان جن میں پا کستانی بھی شامل تھے، کھلے آسمان تلے جمع ہوئے اور پورا ایک گھنٹہ سورۃ یاسین کی تلاوت کرکے قرآن کریم سے اپنی عقیدت اور وابستگی کا اظہار کیا۔ ذرائع کے مطابق یہ اجتماع اوسلو کے علاقے گرورود کے فٹ بال گراونڈ میں منفی آٹھ درجے سینٹی گریڈ انتہائی سرد موسم میں منعقد ہوا۔
اس تقریب میں گرورود گرجا گھر کی خاتون پادریہ مس انے بریت ایوانگ نے خصوصی طور پر شریک ہو کر مسلمانوں سے یکجہتی کا اظہار کیا۔اجتماع میں بڑی تعداد میں خواتین اور بچے بھی شریک ہوئے، اختتام پر دعا کی گئی۔
واضح رہے کہ ناروے کے دارالحکومت اوسلو میں یہ اجتماع ایسے وقت میں منعقد کیا گیا جب دوہفتے قبل ناروے کے جنوبی شہر کرستیان ساند میں ایک انتہاپسند شخص نے پولیس کے منع کرنے کے باوجود لوگوں کے سامنے قرآن کریم کی بے حرمتی کی اس موقع پر ایک مسلمان نوجوان نے اپنے ساتھیوں کی مدد سے قرآن کریم کی بے حرمتی کرنے والے اس متعصب شخص کو روکا۔
اس واقعہ سے پوری دنیا کے مسلمانوں میں غم و غصے کی لہر پھیل گئی تھی اور دنیا بھر میں‌ مقدس کتاب کی بے حرمتی پر مسلمان سراپا احتجاج ہیں پاکستان سمیت مختلف ممالک میں واقعے کے خلاف احتجاجی مظاہرے کیے گئے، جن میں ملعون کے خلاف کارروائی کا مطالبہ کیا گیا۔ اس واقعے کے بعد ناروے سمیت پورے یورپ میں لوگوں میں قرآن کریم کے مطالعے کے رحجان میں اضافہ ہوا یورپی مسلمانوں نے قرآن کریم سے اپنی محبت کے اظہار کے لیے اس کلام الٰہی کو پہلے سے زیادہ پڑھنا شروع کردیا ہے اور غیرمسلم اس لیے اس کا مطالعہ کررہے ہیں تاکہ دیکھا جائے اس کتاب میں ایسا کیا ہے، جس کے تقدس کو مسلمان ہرگز پامال نہیں ہونے دیتے۔

کراچی: کاروباری ہفتے کے پہلے روز یعنی پیر کے دن پاکستان اسٹاک ایکسچینج میں تیزی دیکھی جارہی ہے، دن کے آغاز پر ہی 100 انڈیکس 450 پوائنٹس اضافے کے بعد 39 ہزار 740 پوائنٹس پر پہنچ گیا۔ تفصیلات کے مطابق گزشتہ ہفتے پاکستان اسٹاک ایکسچینج میں زبردست تیزی کے بعد نئے ہفتے کے پہلے روز یعنی پیر کے دن بھی مارکیٹ میں تیزی کا رجحان دیکھا جارہا ہے، دن کے آغاز پر 100 انڈیکس میں 200 سے زائد پوائنٹس کا اضافہ دیکھا گیا۔ ایک گھنٹے بعد 100 انڈیکس میں مزید 250 یعنی کل 450 سے زائد پوائنٹس کا اضافہ ہوا جس کے بعد انڈیکس 39 ہزار 740 پوائنٹس کی سطح عبور کر گیا۔

100 انڈیکس میں 39 ہزار کی سطح گزشتہ ہفتے عبور ہوگئی تھی اور یہ 8 ماہ بعد ہوا تھا۔ گزشتہ ہفتے میں 100 انڈیکس میں 13 سو 61 پوائنٹس کا اضافہ ہوا تھا۔ جمعے کے روز 500 سے زائد پوائنٹس کے اضافے کے بعد 100 انڈیکس 39 ہزار 287 پوائنٹس پر بند ہوا تھا۔ گزشتہ ہفتے سرمایہ کاروں کا اعتماد بھی بحال ہوا، مارکیٹ میں 1.73 ارب شیئرز کے سودے ہوئے۔ مارکیٹ کے ہفتہ وار کاروبار کی مالیت 61 ارب روپے رہی۔ کاروبار میں تیزی کے بعد مارکیٹ کیپٹلائزیشن 264 ارب روپے اضافے سے 7511 ارب روپے رہی۔

اسلام آباد (ایمرا نیوزآن لائن) : حکومت نے آرمی چیف جنرل قمر جاوید باجوہ کی مدت ملازمت میں توسیع سے متعلق قانون سازی کے معاملے پر مشاورتی عمل کیلئے3رکنی کمیٹی قائم کردی ،کمیٹی حکومت ایکٹ میں ترمیم کیلئےاپوزیشن سے مشاورت کرے گی۔

تفصیلات کے مطابق ذرائع کا کہنا ہے کہ حکومت کی جانب سے آرمی چیف جنرل قمر جاوید باجوہ کی مدت ملازمت میں توسیع سے متعلق قانون سازی کے معاملے پر سیاسی جماعتوں سے رابطوں کیلئے وزرا کی 3 رکنی کمیٹی تشکیل دے دی گئی ۔

ذرائع کے مطابق کمیٹی میں وزیر خارجہ شاہ محمود قریشی، وزیر دفاع پرویز خٹک اور وزیر منصوبہ بندی اسد عمر شامل ہیں، کمیٹی حکومت ایکٹ میں ترمیم کیلئے اپوزیشن سے مشاورت کرے گی۔ یاد رہے سپریم کورٹ نے مختصر فیصلہ میں آرمی چیف کی مدت ملازمت میں 6ماہ کی توسیع کرتے ہوئے حکومت کا نوٹیفکیشن مشروط طور پر منظور کرلیا اور کہا آرمی چیف جنرل قمر باجوہ اپنے عہدے پر برقرار رہیں گے۔
فیصلے میں کہا گیا تھا آرمی چیف کی مدت ملازمت میں توسیع چیلنج کی گئی، حکومت نے یقین دلایا 6 ماہ میں اس معاملےپرقانون سازی ہوگی، حکومت نے 6ماہ میں قانون سازی کی تحریری یقین دہانی کرائی، 6 ماہ بعداس سلسلےمیں کی گئی قانون سازی کاجائزہ لیا جائے گا۔
سپریم کورٹ کا کہنا تھا کہ اس معاملے پرقانون سازی کرناپارلیمنٹ کااختیار ہے ، قانون سازی کے لئے معاملہ پارلیمنٹ بھیجا جائے، تحمل کا مظاہرہ کرکے معاملہ پارلیمنٹ پر چھوڑتے ہیں، پارلیمنٹ آرٹیکل 243 اور ملٹری ریگولیشن 255 کے سقم دور کرے۔بعد ازاں تحریری فیصلے میں سپریم کورٹ نے آرمی چیف جنرل قمر جاوید باجوہ سے متعلق قانون سازی کے لئے حکومت کو پارلیمنٹ کا پابند کر تے ہوئے کہا تھا ایکٹ آف پارلیمنٹ کے ذریعے 6 ماہ میں آرٹیکل 243 کی وسعت کا تعین کیا جائے۔

کراچی (ایمرا نیوزآن لائن) :فلم، ٹی وی اداکارہ اور ماڈل آمنہ الیاس نے کہا کہ پاکستان مجھے اپنی جان سے زیادہ پیارا ہے، اس کیلئے جان بھی حاضر ہے میں نے اسی ملک میں جنم لیا اور اسی ملک نے مجھے عزت شہرت دی۔
میڈیا رپورٹ کے مطابق شوبز میں بھی میری شناخت اسی ملک کے حوالے سے ہے، بھارتی فلموں میں آفرز ملنے کے باوجود فی الحال کام کرنے کا کوئی ارادہ نہیں، ان خیالات کا اظہار انہوں نے ایک ملاقات میں کیا۔ اداکارہ کا کہنا تھا کہ فیشن انڈسٹری سے زیادہ اس وقت ملکی فلموں میں مصروف ہوں۔ فلم باجی کی شاندار کامیابی نے میرے فلمی کیریئر میں ایک نیا موڑ لیا ہے۔ آئندہ دنوں اسلام آباد میں فلم کی عکس بندی میں مصروف رہوں گی ،فلم کو آئندہ برس ریلیز کیا جائے گا۔

ایڈیلیڈ (ایمرا نیوزآن لائن) قومی کرکٹ ٹیم کو وائٹ واش کا خطرہ، آسٹریلیا کےخلاف دوسری اننگزمیں بھی ٹاپ آرڈر ناکام، کپتان اظہر علی ، امام الحق ،بابراعظم پھر ناکام،شان مسعود اور اسد شفیق نے کینگروز کے خلاف مزاحمت کی، قومی بلے بازوں کی ناقص کارکردگی کا سلسلہ جاری ہے اور آدھی ٹیم پویلین لوٹ چکی ہے۔

پنک بال ٹیسٹ کی دوسری اننگز میں پاکستان نے آسٹریلیا کے 589 رنز کے جواب میں 5 وکٹوں کے نقصان پر 161 رنز بنا لیے ہیں اور اسے میزبان ٹیم کی پہلی اننگز کی برتری ختم کرنے کے لیے مزید 126 رنز درکار ہیں۔کھیل کے چوتھے روز پاکستان نے اپنی دوسری نامکمل اننگز کا آغاز کیا تو اسے آسٹریلیا کی پہلی اننگز کی برتری ختم کرنے کے لیے مزید 248 رنز درکار تھے اور شان مسعود اور اسد شفیق وکٹ پر موجود تھے۔

پاکستان کا اسکور 123 رنز پر پہنچا تو شان مسعود 68 رنز بنا کر ناتھن لیون کا شکار ہو گئے، اسد شفیق بھی ناتھن لیون ہی کے ہاتھوں آؤٹ ہوئے، انہوں نے 57 رنز کی اننگز کھیلی۔ خیال رہے کہ برسبین ٹیسٹ میں بھی آسٹریلیا نے پاکستان کو ایک اننگز اور 5 رنز سے شکست دی تھی۔