Tag daily musawat

لاہور(ایمرا نیوز آن لائن)کمشنر لاہور ڈویژن سیف انجم نے لاری اڈہ بادامی باغ انتظامیہ کو لاری اڈہ میں مجوزہ 17مقامات مقاماتپر پینے کے پانی کے کولرنصب کرنے کی ہدایت کر دی۔ کمشنر کی زیر صدارت کمشنر آفس دیو سماج روڈ پر لاری اڈہ کے حوالے سے اجلاس میں

سی او ایم سی ایل علی عباس بخاری، ایڈمنسٹریٹر اڈا احمد رضا بٹ، سیکرٹیر آر ٹی اے غیاث الدین، ایم او میاں انور جاوید اور ایم او فنانس نے شرکت کی۔ کمشنر نے کہا کہ مزید واش رومز مہیا کئے جائیں گے، ان کی صفائی کو یقینی بنائیں۔ کمشنر نے ہدایت کی کہ مسافروں کے لئے

مرکزی نشست گاہ میں تمام سہولیات فراہم کریں۔ انہوں نے لاری اڈوں کی آمدن کا ایک حصہ اڈوں میں ترقیاتی کاموں کے لئے مختص کرنے کا معاملہ زیر غور ہے ۔ انہوں نے کہا کہ اڈے کے مختلف ٹھیکوں کی شرائط کو دو دن میں فائنل کریں۔

وہاڑی(ڈسٹرکٹ رپورٹر) جرمنی کے شہر ہینوورکی رہائشی لڑکی وہاڑی کے نوجوان کی محبت میں گرفتار ہو کر پاکستان پہنچ گئی، اسلام قبول کرنے کے بعدنوجوان سے نکاح کرلیا۔تفصیل کے مطابق جرمنی کے شہر ہینوور کی رہائشی نوجوان لڑکی تانیہ ہیلربوریوالہ کے رہائشی نوجوان کی محبت میں گرفتارہوکروہاڑی پہنچ گئی اور اسلام قبول کرلیا،

اس کااسلامی نام تانیہ جاویدرکھاگیاہے ۔تانیہ جاویدنے بتایاکہ بوریوالہ کے رہائشی جاویداقبال کے ساتھ ٹوئٹرپردوسال قبل رابطہ ہوا،پہلے جاوید کوجرمنی بلانے کاارادہ تھالیکن پھر خودپاکستان آ گئی، آہستہ آہستہ محبت پروان چڑھتی گئی ،میں نے اسلامی تعلیمات اور جاویداقبال کے اخلاق سے متاثرہوکراسلام قبول

کیااورپھر جاویداقبال کے ساتھ شادی کافیصلہ کرلیا،تانیہ جاویدنے بتایاکہ وہ جرمنی کے شہرہینوورمیں پرنٹنگ کے شعبہ میں ٹیکنیکل انجیئنرہے اورجرمن قوانین کے مطابق خود مختارہے ، جاویداقبال نے بتایاکہ وہ لاہورمیں پلمبرہے ۔

فرانس(ایمرا نیوز آن لائن) کیا آپ نے کبھی غور کیا کہ شیف کی ٹوپی پر شکنیں یا تہیں کیوں ہوتی ہیں؟دلچسپ بات یہ ہے کہ یہ شکنیں شعوری طور پر بنائی جاتی ہیں۔ شیف کی ٹوپی کو ’ٹوک‘ کہا جاتا ہے۔ سیکڑوں سال پہلے ٹوک پر سو شکنیں ڈالی جاتی تھی جو اس باورچی کے 100 مختلف طریقوں سے انڈہ بنانے کی صلاحیت کو ظاہر کرتی ہیں۔

اچھے باورچی خانوں میں شیف سفید ٹوک پہنتے ہیں۔ دلچسپ بات یہ ہے کہ ٹوک یا ہیٹ کی اونچائی شیف کے تجربے کو بھی ظاہر کرتی ہیں۔ کسی بھی ادارے میں سب سے اونچی ٹوک والا شیف سب سے زیادہ سینئر تصور کیا جاتا ہے۔

146 قبل مسیح میں بازنطینی حملہ آوروں سے ڈر کر کچھ یونانی باورچی دوسری جگہ پہنچے اور انہوں نے گرجا گھروں کے عملے سے متاثر ہوکر ان کی ٹوپیاں پہننا شروع کردیں۔ پھر یہ خوف ختم ہوگیا لیکن ٹوک یا ہیٹ پہننے کا رواج شروع ہوگیا۔

1800 کی ابتدا میں سفید ہیٹ کا رواج عام ہوگیا اور سفید ٹوک صفائی کو ظاہر کررہا تھا۔ اس کی ابتدا فرانس میں ہوئی۔ ہیٹ پر بنی شکنیں کسی بھی شیف کی انڈہ یا مرغی پکانے کے طریقوں کی نشاندہی کرتی تھی اور 100 شکنوں والا ہیٹ ماسٹر شیف کو پہنایا جاتا ہے۔اگرچہ اب ہیٹ پہننے کے طریقوں میں کچھ تبدیلی ضرور آئی ہے لیکن ہیٹ کی اونچائی اب بھی شیف کی مہارت کو ہی ظاہر کرتی ہے۔

(ایمرا نیوز آن لائن)
(بشکریہ جنگ لاہور)

3؍جنوری کو قومی اسمبلی کا بہت ہی مختصر اجلاس منعقد ہوا لیکن یہ مختصر اجلاس اپنے پیچھے ایک لمبی کہانی چھوڑ گیا۔ اجلاس شروع ہوا تو اسپیکر نے وزیر دفاع پرویز خٹک کو آرمی ایکٹ میں ترمیم کا قانون پیش کرنے کی دعوت دی لیکن مسلم لیگ (ن) کے پارلیمانی لیڈر خواجہ محمد آصف پوائنٹ آف آرڈر پر کھڑے ہو گئے۔اُنہوں نے اسپیکر کو یاد دلایا کہ قومی اسمبلی کے گرفتار اراکین شاہد خاقان عباسی، خواجہ سعد رفیق اور خورشید شاہ کے پروڈکشن آرڈر جاری نہیں ہوئے۔ وہ احسن اقبال کا نام بھول گئے۔

میری نظروں نے چند دن قبل رہا ہونے والے رانا ثناء اللہ کو تلاش کیا لیکن وہ ایوان میں موجود نہ تھے۔ اسپیکر نے خواجہ محمد آصف کی بات سُن کر پرویز خٹک کو ترمیمی بل پیش کرنے کی دعوت دی۔اُنہوں نے آرمی، ایئر فورس اور نیوی ایکٹ میں ترمیم کے بل پیش کئے اور اجلاس اگلے دن کے لئے ملتوی ہو گیا۔ وہ وزراء جنہوں نے ایک رات قبل مختلف ٹی وی چینلز پر دعوے کئے تھے کہ جمعہ کو یہ ترمیمی بل منظور ہو جائینگے،ایک دوسرے کا منہ دیکھ رہے تھے۔ یہ بل قائمہ کمیٹی برائے دفاع کو بھیج دیا گیا تھا اور بلاول بھٹو زرداری نے میڈیا سے گفتگو کرتے ہوئے اس بل کو قائمہ کمیٹی کو بھجوانا ایک بہت بڑی کامیابی قرار دیدیا۔

پارلیمنٹ ہائوس کی راہداریوں میں صحافی مسلم لیگ (ن) والوں کے پیچھے بھاگ رہے تھے اور وہ صحافیوں سے معذرت خواہانہ انداز میں کہہ رہے تھے ہمیں کچھ پتا نہیں کیا ہو رہا ہے، آپ خواجہ آصف کے پاس جائیں وہ سب جانتے ہیں۔ اس دوران نماز جمعہ کیلئے اذان ہو گئی۔پارلیمنٹ ہائوس میں نماز جمعہ کیلئے صف بندی شروع ہوئی تو تحریک انصاف کے ایک رکن قومی اسمبلی نے مجھے اپنے پہلو میں جگہ دیتے ہوئے کان میں ایک ایسی بات کہی جو ناقابل اشاعت ہے۔ مجھے نماز کے آغاز سے قبل یہ بات بڑی عجیب سی لگی۔شاید وہ بارگاہِ الٰہی میں اپنا سر جھکانے سے پہلے اپنا دل کھول کر دکھا رہا تھا۔ اُس کے الفاظ کا مفہوم یہ تھا کہ جب کسی سے اُس کی مرضی کے خلاف زیادتی کی جا رہی ہو اور وہ کچھ نہ کر سکتا ہو تو پھر اُسے اپنا آپ زیادتی کرنے والے کے رحم و کرم پر چھوڑ دینا چاہئے۔

نماز ختم ہوئی۔ دعا کے بعد میں جوتے پہن رہا تھا تو میں نے مذکورہ ایم این اے سے کہا کہ مجھے آپ کی بات سمجھ نہیں آئی۔ موصوف نے اپنی بات کو انگریزی میں دہرایا تو نماز سے فارغ ہونے والے تحریک انصاف کے ایک اور ایم این اے نے مجھے کہا ’’یہ بالکل ٹھیک کہتا ہے‘‘۔کچھ ہی دیر میں نیشنل پارٹی کے صدر سینیٹر حاصل بزنجو اور پختونخوا ملی عوامی پارٹی کے سینیٹر عثمان کاکڑ نے میڈیا کے سامنے اعلان کر دیا کہ وہ آرمی ایکٹ میں ترمیم کے بل کی حمایت نہیں کریں گے۔ایسا ہی اعلان پی ٹی ایم کے علی وزیر نے کیا اور سہ پہر تک جے یو آئی (ایف) کے سربراہ مولانا فضل الرحمٰن اور جماعت اسلامی کے سینیٹر مشتاق احمد خان کا موقف بھی سامنے آ گیا۔ آرمی ایکٹ میں ترمیم کے بل پر اپوزیشن تقسیم ہو چکی تھی۔

سوشل میڈیا پر مسلم لیگ (ن) کے حامی اپنی جماعت پر خوب برس رہے تھے جبکہ سیاستدانوں کو گالیاں دے کر رزق کمانے والے ’’محبِ وطن‘‘ عناصر مسلم لیگ (ن) پر بوٹ پالش کرنے کا الزام لگا رہے تھے۔مخصوص ٹی وی چینلز پر ایک مخصوصی بیانیہ پیش کرنے والے ان ’’محبِ وطن‘‘ عناصر کے مسلم لیگ (ن) پر تابڑ توڑ حملوں سے اس شک کو تقویت ملتی ہے کہ مسلم لیگ (ن) کے ساتھ ڈبل گیم ہو رہی ہے۔ مسلم لیگ (ن) کے ایک سینیٹر نے مجھے پوچھا کہ دو تین دن سے سارے جمہوریت پسند ہمیں گالیاں دے رہے ہیں لیکن آپ نے ہلکی پھلکی موسیقی پر گزارا کیا ہے۔میں نے اس سینیٹر سے کہا کہ مجھے کبھی بھی یہ غلط فہمی نہ تھی کہ نواز شریف ایک نظریاتی لیڈر ہے۔ میرا خیال تھا کہ نواز شریف اپنی ضد اور انا پسندی کی وجہ سے اُن لوگوں کیساتھ کوئی سمجھوتا نہیں کرینگے جنہوں نے اُنہیں جیل پہنچایا لیکن پھر نواز شریف کو اُن کی والدہ کے ذریعے مجبور کرکے بیرونِ ملک بھجوا دیا گیا۔

اس قسم کے گھریلو دبائو کا سامنا ذوالفقار علی بھٹو کو بھی تھا۔ اُنہیں ترکی نے پناہ دینے کی پیشکش کی اور بیگم نصرت بھٹو سے کہا گیا کہ وہ جنرل ضیاء الحق کو رحم کی اپیل کریں لیکن بھٹو صاحب نے یہ پیشکش مسترد کر دی۔جو لوگ نواز شریف میں ایک نیا بھٹو تلاش کر رہے تھے وہ مایوس ہیں اور جو مریم نواز کو بینظیر بھٹو بنانا چاہتے تھے، وہ بھی تنقید کا نشانہ ہیں۔ کوئی مانے یا نہ مانے، لیکن آپ کو یہ کریڈٹ تو نواز شریف کو دینا پڑے گا کہ ڈکٹیٹر پرویز مشرف کا ٹرائل اُنہی کے دورِ حکومت میں شروع ہوا۔ایک رائے یہ ہے کہ مشرف کے خلاف آئین سے غداری کا مقدمہ چلانا نواز شریف کا ذاتی انتقام نہیں بلکہ مجبوری تھی کیونکہ اپریل 2013ء میں توفیق آصف ایڈووکیٹ اور مولوی اقبال حیدر نے سپریم کورٹ میں درخواستیں دائر کیں کہ مشرف کے خلاف 31جولائی 2009ء کے فیصلے پر عملدرآمد کرایا جائے۔ مشرف 2013ء کے انتخابات سے قبل پاکستان واپس نہ آتے تو شاید یہ درخواستیں دائر نہ ہوتیں۔

ان درخواستوں پر سماعت کے بعد سپریم کورٹ نے حکم دیا کہ مشرف پر مقدمہ شروع کیا جائے اور نواز شریف نے جون 2013ء میں قومی اسمبلی میں مقدمہ چلانے کا اعلان کر دیا۔ اگر وہ یہ نہ کرتے تو اُن پر بھی یوسف رضا گیلانی کی طرح توہین عدالت کا الزام لگتا۔ اس مقدمے کے باعث نواز شریف حکومت کو کئی مشکلات کا سامنا کرنا پڑا۔ شہباز شریف اور چوہدری نثار علی خاں نے نواز شریف سے کہا کہ آپ مشرف کو پاکستان سے باہر جانے کی اجازت دے دیں تو حکومت کیلئے تمام مشکلات ختم ہو جائیں گی۔نواز شریف نے مارچ 2016ء میں مشرف کو باہر جانے کی خاموش اجازت دیدی لیکن مشکلات ختم نہ ہوئیں۔ پہلے پاناما اسکینڈل اور پھر ڈان لیکس کے ذریعے اُن کیلئے نئی مشکلات کھڑی کر دی گئیں۔ اُنہوں نے غلطی یہ کی کہ اعلیٰ عدلیہ کے ساتھ محاذ آرائی شروع کر دی اور لوہے کا چنا بننے کی کوشش کی۔ عدلیہ نے لوہے کے اس چنے کو وزیراعظم ہائوس سے اُٹھا کر باہر پھینک دیا۔ پھر نواز شریف لندن چلے گئے۔

جولائی 2018ء کے انتخابات سے چند دن قبل واپس آئے اور گرفتار ہو گئے۔ واپس نہ آتے تو شاید آج شہباز شریف پاکستان کے وزیراعظم ہوتے۔ بہرحال شہباز شریف نے بھائی کا ساتھ نہیں چھوڑا اور اُنہیں جیل سے نکال کر دوبارہ لندن لے گئے۔مسلم لیگ (ن) کے اراکین پارلیمنٹ کی بڑی اکثریت نے آرمی ایکٹ میں ترمیم کی مخالفت کی ہے۔ ان مخالفین کا کہنا ہے کہ آرمی چیف کی مدتِ ملازمت میں توسیع کو ایک قانون بنا دینے سے سازشوں کے دروازے کھل جائیں گے اور جب بھی کسی آرمی چیف کی مدتِ ملازمت کے تین سال پورے ہونے کو آئیں گے تو توسیع کے لئے جوڑ توڑ شروع ہو جائے گی، اس لئے بہتر ہے کہ آرمی چیف کی تقرری کو سنیارٹی سے مشروط کر دیا جائے وہ (ن) لیگی جو اس ترمیمی بل کے حامی ہیں، کا دعویٰ ہے کہ اس بل کی حمایت کے نتائج بہت جلد سامنے آئیں گے۔ہمیں ان نتائج سے کوئی غرض نہیں کیونکہ ہمارے لئے تحریک انصاف، مسلم لیگ (ن) اور پیپلز پارٹی میں فرق ختم ہو چکا ہے، ان سب نے اپنے آپ کو کسی کے رحم و کرم پر چھوڑ رکھا ہے۔ ہمیں تو وہ شعر بار بار یاد آتا ہے جو کسی زمانے میں نواز شریف اپنی تقریروں میں استعمال کیا کرتے تھے۔

اے طائر لاہوتی اُس رزق سے موت اچھی
جس رزق سے آتی ہو پرواز میں کوتاہی

لاہور(ایمرا نیوز آن لائن)بال گرنا ایک ایسا مسئلہ ہے جس سے تقریباً ہر کوئی ہی دوچار رہا ہوگا اور اس مسئلے سے نمٹنے کے لیے مہنگے سے مہنگی ترکیبیں آزمائی جاتی ہیں۔لیکن اب ہم آپ کو اس مسئلے کا سستا اور بہترین حل بتانے جا رہے ہیں، جی ہاں! ہم آپ کو آج ایک ایسے تیل کے بارے میں بتانے والے ہیں جس کا استعمال کرکے بال گرنا ختم اور بال مضبوط اور گھنے ہونا شروع ہوجائیں گے۔

روغنِ ارنڈ جسے انگریزی زبان میں کیسٹر آئل بھی کہا جاتا ہے، یہ بالوں کے لیے ایسا بہترین تیل ہے جس سے بالوں کا گرنا کم اور بال مضبوط اور گھنے ہوجاتے ہیں۔اس تیل کا استعمال کرنے سے بال مضبوط ہوتے ہیں جب کہ یہ تیل سر کی جلد میں جراثیم کی افزائش کے خلاف مزاحمت کا کام بھی کرتا ہے۔روغنِ ارنڈ میں ایسے وٹامن موجود ہوتے ہیں جو بالوں کی نشوونما کے لیے بے حد معاون ثابت ہوتے ہیں جب کہ یہ تیل بالوں کو گھنا کرنے کی بھی صلاحیت رکھتا ہے۔

دوسری جانب روغنِ ارنڈ کو بھوؤں اور پلکوں پر بھی استعمال کیا جاسکتا ہے، اس تیل کا استعمال کرنے سے بھویں گہری جب کہ پلکیں بھی دراز ہوتی ہیں۔روغنِ ارنڈ میں اومیگا 6 اور اومیگا 9 فیٹی ایسڈ اور وٹامن ای وافر مقدار میں پایا جاتا ہے یہی وجہ ہے کہ اس تیل کا استعمال کرنے سے بال گرنا بند جب کہ بال مضبوط بھی ہوتے ہیں۔اس تیل میں اینٹی بیکٹیریل اور اینٹی فنگل خاصیت بھی پائی جاتی ہے جو سر کی جِلد کو انفیکشنز اور خشکی سے دور رکھتی ہے۔

لاہور(ایمرا نیوز آن لائن)ماہرہ شوٹنگ کس وجہ سے منسوخ کرتی ہیں؟ماہرہ خان نے انکشاف کیا ہے کہ وہ بالی ووڈ کی کامیاب ترین فلم ’دل والے دلہنیا لے جائیں گے‘ بغیر بور ہوئے 10 سے زائد بار دیکھ سکتی ہیں۔

مائیکرو بلاگنگ سائٹ ٹوئٹر پر ماہرہ خان نے ’آسک ماہرہ‘ کا سیشن رکھا جس میں انہوں نے مداحوں کے سوالوں کے جواب دیئے۔ماہرہ کے اس سیشن میں ناصرف ان کے مداحوں نے بڑھ چڑھ کر حصہ لیا بلکہ مشہور و معروف شخصیات نے بھی ماہرہ سے سوالات کئے۔صارف نے ماہرہ سے گلوکار عاطف اسلم کے پسندیدہ گانے پوچھے تو ماہرہ نے عاطف اسلم کے تین گانے میری کہانی، ہونا تھا پیار، ربا سچیا کا نام لیا۔

عثمان نامی ایک صارف نے پوچھا کہ کیا کبھی ایرانی فلم میں کام کرنے کے بارے میں سوچا ہے؟ماہرہ کا کہنا تھا کہ انشاء اللہ ایک دن ضرور کروں گی۔ایک صارف نے آخری دہائی کی بہترین یاد پوچھی تو ماہرہ نے بیٹے اذلان کی پیدائش کا کہا۔پاکستان کی صف اول کی اداکارہ ماہرہ خان نے بتایا کہ وہ صرف اپنے بیٹے کی وجہ سے کوئی بھی شُوٹنگ منسوخ کرواتی ہیں ۔

ایک صارف نے ماہرہ سے کہا کہ آپ کو عوام میں کبھی غصہ کرتے ہوئے نہیں دیکھا، آپ اس سب پہ کیسے قابو پاتی ہیں؟ماہرہ نے جواب دیا کہ مجھے غصہ آتا بھی ہے اور غصہ کرتی بھی ہوں لیکن صرف قریبی دوستوں پر ۔

ایک صارف کے جواب پر ماہرہ نے بریانی سے اپنی پسندیدگی کا اظہار کیا۔شادی کے بارے میں سوال کا جواب دیتے ہوئے ماہرہ نے کہا کہ جب انہیں لگا کہ شادی کرنی چاہیے وہ کر لیں گی۔سرحد پار بھارت سے بھی ماہرہ کے مداحوں نے ان کے اس سیشن میں حصہ لیا۔جویریہ صدیقی نے ماہرہ سے پچھلی صدی کا جائزہ لینے کا کہا تو ماہرہ نے بڑا دلچسپ جواب دیتے ہوئے لکھا کہ ’اس فلم میں پیار، ایکشن، جذبات، محبت، حادثات سب ہیں۔سیشن کے اختتام پر ماہرہ نے اپنے مداحوں کا شکریہ ادا کرتے ہوئے نئے سال کی مبارکباد بھی دی۔

سیالکوٹ(ایمرا نیوز آن لائن)وزیراعظم کی معاون خصوصی فردوس عاشق اعوان نے کہا کہ ڈنکے کی چوٹ پر کہتی ہوں کہ عمران خان سیاست دان نہیں، سیاست دان اور سماجی کارکن بننا الگ ہے،سماجی کارکن کا تعلق انسانیت سے ہوتاہے،عمران خان نے دکھی انسانیت کیلئے شوکت خانم ہسپتال بنایا، شوکت خانم غریت اورمستحق مریضوں کیلئے امیدکی کرن ہے۔

معاون خصوصی فردوس عاشق اعوان نے سیالکوٹ میں تقریب سے خطاب کرتے ہوئے کہا کہ سٹیٹس کوکے خلاف کھڑے ہونے سے رکاوٹیں آتی ہیں،تحریک انصاف ملک میں ہیلتھ ریفارمز لاناچاہتی ہے،عمران خان ناممکن کو ممکن بنا کر ایوان میں آئے،انہوں نے کہا کہ پاکستان کاتعارف اسلامی فلاحی ریاست ہے، ریاست کی ذمہ داری ہے کہ عوام کو بہتر سہولیات فراہم کرے۔

انہوں نے کہا کہ سیاست میں روزگاریا کاروبار کیلئے نہیں آئی، ڈاکٹر انسانیت کے ساتھ گہرائی سے جڑے رہتے ہیں،پرائیویٹ میڈیکل کالجز کےخلاف نہیں،دکھ ہوتاہے جب سرمایہ داراپنے بچوں کیلئے سیٹیں خریدتے ہیں،فردوس عاشق اعوان نے کہا کہ میڈیکل تعلیم کے اخراجات کم از کم ایک کروڑ روپے ہیں،لوگ ڈاکٹر بننے کے بعد پیسے بٹورنے کی کوشش کرتے ہیں،ایساکرنے سے ڈاکٹراورمریض کاتعلق کمزورپڑجاتا ہے،معاشرتی تنزلی کے شکار میڈیکل کے شعبے کو تبدیل کرنا ہے ،وزیراعظم میڈیکل شعبے میں اصلاحات کیلئے پرعزم ہیں۔

اسلام آباد(ایمرا نیوز آن لائن)وزیر خارجہ شاہ محمود قریشی کا کہنا ہے کہ بنگلادیشی کرکٹ بورڈ نے بھارتی دباؤ میں آکر پاکستان میں کھیلنے سے انکار کیا۔ملتان میں پریس کانفرنس کرتے ہوئے وزیر خارجہ شاہ محمود قریشی نے ملکی اور بین الاقوامی سیاست کے علاوہ کرکٹ پر بھی بات کی۔

سری لنکن ٹیم کے دورہ پاکستان پر بات کرتے ہوئے وزیر خارجہ شاہ محمود قریشی کا کہنا تھا کہ سری لنکا کے بہت شکر گزار ہیں کہ ان کی ٹیم پاکستان آئی اور یہاں ٹیسٹ کرکٹ کھیلی۔وزیر خارجہ نے مزید کہا کہ سری لنکا کے دورے سے پاکستان میں مزید ٹیموں کے آنے کی راہ ہموار ہو گی۔

بنگلا دیشی کرکٹ بورڈ کی جانب سے پاکستان میں ٹیسٹ سیریز کھیلنے سے انکار پر شاہ محمود قریشی کا کہنا تھا کہ سری لنکا کے دورے کے بعد کوئی وجہ نہیں کہ بنگلا دیشی ٹیم پاکستان آنے سے انکار کرے، بنگلا دیش نے بھارتی دباؤ میں آکر پاکستان آنے سے انکار کیا۔

لاہور(ایمرا نیوز آن لائن)مسلم لیگ ن کے رہنما اور ممبر قومی اسمبلی رانا ثناء اللہ کا کہنا ہے کہ ن لیگ اور پیپلز پارٹی نے دھرنے میں دل سے مولانا فضل الرحمان کا ساتھ نہیں دیا۔مسلم لیگ ن کے سینئر رہنما رانا ثنااللہ کا جیو پارلیمنٹ میں گفتگو کرتے ہوئے کہنا تھا کہ اینٹی نارکوٹکس فورس (اے این ایف) کا گرفتار کرنا بہت حیران کن واقعہ تھا۔انہونے نے بتایا کہ سابق ڈی جی ایف آئی اے بشیر میمن نے گرفتاری کا بتایا تھا، وزیراعظم میرا نام لے کر گرفتار کرنے کی ہدایات دیتے رہے، اس طرح گرفتاری سے لگا کہ ملک میں جنگل کا قانون ہے۔

ان کا کہنا تھا کہ معاملہ پارلیمان میں رکھوں گا، جوڈیشل یا پارلیمانی کمیشن نہ بنا تو عدالت سے رجوع کروں گا۔رانا ثناء اللہ نے بتایا کہ مسلم لیگ ن میں منحرف گروپ بنانے میں رکاوٹ بننے پر میرے خلاف کارروائی کی گئی۔سابق وزیر قانون پنجاب رانا ثناء اللہ کو رہا کر دیا گیا انسداد منشیات فورس نے ن لیگی رہنما رانا ثناء اللہ کو حراست میں لے لیا جیل میں گزرے ایام کے حوالے سے بات کرتے ہوئے رہنما ن لیگ نے کہا کہ جن حالات میں جیل میں رکھا کوئی اور ایسے نہیں رہ سکتا، فرش پر لیٹا، ساری رات بندہ سو نہیں سکتا تھا۔

ممبر قومی اسمبلی نے بتایا کہ آنکھ کے علاج پر کہا گیا ہدایت ہے کہ جیل اسپتال میں قدم بھی نہ رکھوں، نواز شریف اور شہباز شریف میرے اہل خانہ سے رابطے میں رہے۔جے یو آئی ف کے مارچ کے حوالے سے بات کرتے ہوئے رانا ثناء اللہ نے بتایا کہ مولانا نے یکطرفہ فیصلہ کیا لیکن بہت طاقتور احتجاج کیا، ن لیگ اور پیپلزپارٹی نے دل سے مولانا کا ساتھ نہیں دیا۔یاد رہے کہ اے این ایف نے رانا ثناءاللہ کو 2 جولائی 2019 کو فیصل آباد سے لاہور جاتے ہوئے گرفتار کیا تھا اور اے این ایف نے دعویٰ کیا تھا کہ رانا ثناء کی گاڑی سے بھاری مقدار میں منشیات برآمد کی گئی۔

رانا ثناء اللہ نے اپنی گرفتاری کے خلاف عدالت میں مقدمہ دائر کیا اور پھر 24 دسمبر کو لاہور ہائیکورٹ نے رانا ثناء اللہ کو ضمانت پر رہا کرنے کا حکم دیا، رانا ثناء اللہ کی جانب سے 10، 10 لاکھ روپے کے دو حفاظتی مچلکے جمع کرائے جانے کے بعد 26 دسمبر کو انہیں رہا کر دیا گیا۔انسداد منشیات فورس نے پاکستان مسلم لیگ کے رہنما رانا ثناء اللہ کی ضمانت پر رہائی کو افسوسناک قرار دیتے ہوئے سپریم کورٹ میں جانے کا اعلان کیا ہے۔

سھہبالی ووڈ(ایمرا نیوز آن لائن)بالی وڈ کی معروف شخصیات اداکارہ روینہ ٹنڈن، ہدایت کار فرح خان اور کامیڈین بھارتی سنگھ کے خلاف ایف آئی آر ز درج کر لی گئیں۔بھارتی میڈیا کے مطابق روینہ ٹنڈن، فرح خان اور بھارتی سنگھ کے خلاف کامیڈی ٹی وی شو میں اقلیتی برادری کے مذہبی جذبات کو ٹھیس پہنچانے کے الزام میں ایف آئی آرز درج کی گئی ہیں۔

تفصیلات کے مطابق بالی وڈ کی معروف شخصیات کے خلاف کرسچن فرنٹ آف اجنالا بلاک کے صدر کی طرف سے کرسمس تہوار کے موقع پر نشر ہونے والے کامیڈی ٹی وی شو میں مذہبی جذبات کو ٹھیس پہنچانے کی شکایت پر مقدمہ درج کیا گیا ہے۔بالی وڈ کی تینوں شخصیات پر انڈین پینل کوڈ (آئی پی سی) کی دفعہ 295 اے کے تحت مقدمہ درج کیا گیا ہے جس کا تعلق مذہب کی توہین یا مذہبی جذبات کو مجروح کرنے سے ہے۔

اسی ضمن میں مدعی نے شو کی ویڈیو کلپس بھی جمع کروائے ہیں جن میں یہ الزام لگایا گیا ہے کہ عیسائی برادری کے مذہبی جذبات مجروح ہوئے ہیں۔اس حوالے سے پولیس کا کہنا ہے کہ وہ مزید تحقیقات کر رہے ہیں۔

دوسری جانب ایف آئی آر درج کرنے پر بالی وڈ اداکارہ روینہ ٹنڈن نے صفائی پیش کرتے ہوئے مائیکرو بلاگنگ سائٹ پر ایک پوسٹ شیئر کی۔روینہ ٹنڈن نے اپنی پوسٹ میں لکھا کہ آپ تمام لوگ اس ویڈیو کو دیکھیں، ہم تینوں میں سے کسی نے بھی کسی کے جذبات کو ٹھیس نہیں پہنچائی، اگر پھر بھی ہم نے ایسا کیا ہے تو تکلیف پہنچانے پر دل سے معافی مانگتے ہیں۔

علاوہ ازیں بالی وڈ ہدایت کارہ فرح خان نے بھی ٹوئٹر پیغام کے ذریعے سب سے معافی مانگتے ہوئے کہا کہ میں بہت افسردہ ہوں کہ میرے شو کے ذر یعے سے کسی کو تکلیف پہنچی، میں تمام مذاہب کی عزت کرتی ہوں اور یہ قطعی میں نے جان بوجھ کر نہیں کیا، میں اپنی پوری ٹیم کی طرف سے دل سے معافی مانگتی ہوں۔