Tag england

ممبئی (ایمرا نیوز آن لائن) ڈیوڈ وارنر اور ایرون فنچ نے بھارتی غرور اپنے پائوں تلے روند ڈالا، کینگروز نے گھر میں گھس کر کوہلی الیون کا شکار کرلیا۔اوپنرز کی ریکارڈ شراکت سے تقویت پاکر پہلے ون ڈے میں آسٹریلیا نے 10 وکٹ سے فتح سمیٹ لی،

ٹیم نے256 رنز کا ہدف 74 بالز قبل ہی حاصل کرلیا، وارنر 128 اور فنچ 110 رنز پر ناقابل شکست رہے، اس سے قبل میزبان ٹیم 255 رنز پر آئوٹ ہوگئی، شیکھر دھون 74 رنز کے ساتھ نمایاں رہے، مچل اسٹارک نے 3 وکٹیں لیں۔ممبئی کے وینکھیڈے اسٹیڈیم پر کینگروز نے 256 رنز کا ہدف 37.4 اوورز میں بغیر کسی نقصان کے حاصل کیا،

وارنر نے 112 بالز پر 3 چھکوں اور 17 چوکوں کی مدد سے ناقابل شکست 128 رنز بنائے، فنچ 110 رنز پر ناٹ آئوٹ رہے۔ انھوں نے 114 بالز میں سے 2 پر چھکے اور 13 پر چوکے جڑے۔ یہ بھارت کی مجموعی طور پر پانچویں جبکہ اپنے ملک میں ون ڈے میچ میں 10 وکٹ کی دوسری شکست ہے۔ آسٹریلیا نے اس مارجن سے پانچویں کامیابی حاصل کی ہے۔

اسلام آباد(ایمرا نیوز آن لائن) پاکستان اور چین نے آزادانہ تجارت کے معاہدے( ایف ٹی اے) کے فیز ٹو پر دستخط کردیے ہیں جس کے بعد یکم جنوری 2020 سے اس کا اطلاق ہوگیا ہے۔
فیز ون 15 سال قبل آپریشنل ہوا تھا۔ چین، امریکا کے بعد پاکستان کی دوسری بڑی برآمداتی منڈی ہے۔ پاکستان 8 فیصد برآمدات چین کو اور17 فیصد امریکا کو کرتا ہے۔

چین کو پاکستانی برآمدات صرف چند اجناس مثلاً کپاس اور چاول تک محدود ہیں۔ ان اجناس کا برآمدات میں حصہ 75 فیصد ہے۔ پاکستان سب سے زیادہ 29 فیصد برآمدات بھی چین سے کرتا ہے۔ ایف ٹی اے کے بعد دونوں ممالک کے مابین تجارت کا حجم 2005 میں 2.2 ارب ڈالر سے بڑھ کر 2019 میں 15.6 ارب ڈالر تک پہنچ گیا ہے۔

چین کو پاکستانی کی برآمدات 2006-07 میں 575 ملین ڈالر سے بڑھ کر 2017-18 میں 1.74 ارب ڈالر تک پہنچ گئیں۔ دونوں ممالک کے درمیان دو طرفہ تجارتی توازن چین کے حق میں ہے کیوں کہ چین کو پاکستانی کی برآمدات کم اور وہاں سے درآمدات زیادہ ہیں۔ مالی سال 2018-19 میں چین کے ساتھ تجارتی خسارہ کم

ہوکر 10.89 ارب ڈالر کی سطح پر آگیا جو پاکستان کے مجموعی تجارتی خسارے کا 34.22 فیصد ہے۔ مشیر تجارت اور سرمایہ کاری عبدالرزاق داؤد کے مطابق رواں سال ایف ٹی اے ٹو سے برآمداتی حجم میں 500 ملین ڈالر کا اضافہ ہوگا۔

جرمنی (ایمرا نیوز آن لائن) جرمنی میں سال نو کے موقع پر آتش بازی کے نتیجے میں آگ لگنے سے کئی بندر جل کر مرگئے۔ غیر ملکی خبر رساں ادارے کے مطابق سال نو کے موقع جرمنی کے شمال مغرب میں کی جانے والی آتش بازی کے شعلے چڑیا گھر میں جاگرے جس سے چڑیا گھر میں موجود بندروں کے پنجرے میں آگ لگ گئی۔

شعلے گرنے سے آتشزدگی کے نتیجے میں ایک درجن سے زائد بندروں سمیت 30 جانور جل کر ہلاک ہوگئے۔آتشزدگی سے جس پنجرے میں آگ لگی ان میں بندر،گوریلا، چیمپینزی سمیت دیگر جانور موجود تھے جب کہ آتشزدگی سے پنجرے میں موجود صرف 2 چیمپینزی محفوظ رہے۔

آتشزدگی کی اطلاع ملتے ہی فائر فائٹرز نے آگ پر قابو پایا اور اسے قریب موجود دیگر عمارتوں تک پھیلنے سے محفوظ رکھا۔رپورٹس کے مطابق آگ لگنے کی ابتدائی وجوہات میں بتایا گیا ہے کہ آگ فضا میں بلند ہونے والے آتش گیر مادے کی وجہ سے لگی جب کہ جائے حادثہ سے فضا میں بلند ہونے والے پٹاخوں کا کچرا بھی ملا ہے۔

اقوام متحدہ(ایمرا نیوز آن لائن)نئے سال کے پہلے روز سب سے زیادہ بچے کس ملک میں پیدا ہوئے؟نئے سال کے پہلے روز دنیا بھر میں تقریباً 3 لاکھ 92 ہزار 78 بچوں کی پیدائش ہوئی۔

اقوام متحدہ کے ادارے یونیسیف کی رپورٹ کے مطابق بھارت میں سال 2020 کے پہلے روز یعنی یکم جنوری کو 67 ہزار 385 بچوں کی پیدائش ہوئی جو دنیا بھر میں سب سے زیادہ ہے۔

رپورٹ میں بتایا گیاہےکہ نئے سال کے پہلے روز دنیا بھر میں تقریباً 3 لاکھ 92 ہزار 78 بچوں کی پیدائش ہوئی جن میں سے 17 فیصد بچوں کی پیدائش صرف بھارت میں ہوئی جو دنیا بھر میں سب سے زیادہ ہے۔

رپورٹ کے مطابق بھارت کے بعد چین میں 46 ہزار 299، نائیجیریا میں 26 ہزار 39، پاکستان میں 16 ہزار 787، انڈونیشیا میں 13 ہزار 20 اور امریکا میں 10 ہزار 452 بچوں کی پیدائش ہوئی۔

دوسری جانب بھارتی میڈیا کی رپورٹس میں بتایا گیا ہےکہ زیادہ تر بچوں کی پیدائش دارالحکومت نئی دہلی میں ہوئی۔

برسبین(ایمرا نیوز آن لائن)قومی ٹیم کے وکٹ کیپر بلے باز محمد رضوان آسٹریلیا کے خلاف پہلے ٹیسٹ کی پہلی اننگز میں امپائر کے متنازع فیصلے کا شکار ہو گئے۔آسٹریلیا کے خلاف پہلی اننگز میں محمد رضوان کا اسکور 37 رنز پر پہنچا تو 55 ویں اوورز کی دوسری گیند پر میں ٹیم پین نے رضوان کا کیچ لیا۔

ٹی وی ری پلے مطابق پیٹ کمنز نے نو بال کی تھی لیکن امپائرز نے فیصلہ بولر کے حق میں دے دیا۔ اس فیصلے پر کمنٹیٹرز سمیت مبصرین سب ہی حیران رہ گئے۔معروف کرکٹ ویب سائٹ کرک انفو نے بھی کمنٹری میں لکھ ڈالا،کہ گیند نو بال لگ رہی ہے لیکن تھرڈ امپائر نے کئی بار ری پلے دیکھ کر بھی فیصلہ نہ بدلا اور آؤٹ دے دیا۔

لندن(ایمرا نیوز آن لائن)اس دنیا میں چائے کے شوقین بے شمار افراد ہیں مگر ہم آپ کو ایک ایسی خاتون کے بارے میں بتائیں گے جو دن میں تقریباً 40کپ چائے پیتی تھیں اور انہوں نے مرنے سے پہلے جو وصیت کی اس کا تعلق بھی چائے سے ہی تھا۔لیسیٹر شائر کے برونسٹون ٹاؤن کی 73 سالہ ٹینا واٹسن دن میں 40 کپ چائے پیتی تھیں، اور انہوں نے مرنے سے قبل اپنی بیٹی ڈیبس ڈونوان سے ایک انوکھی خواہش ظاہر کی تھی۔ٹینا نے اپنی بیٹی کو کہا کہ میری آخری خواہش ہے کہ مرنے کے بعد مجھے ’ٹی بیگ کے ڈبّے‘ جیسے تابوت میں ڈال کر دفن کیا جائے۔

73 سالہ ٹینا واٹسن کی بیٹی کا کہنا تھا کہ میری والدہ کا ذوقِ مزاح بہت اچھا تھا اور وہ دن میں 30 سے 40 کپ چائے پیتی تھیں کیونکہ انہیں چائے بے حد پسند تھی۔ٹینا واٹسن 73 سال کی عمر میں حرکتِ قلب بند ہو جانے کے باعث انتقال کر گئیں تھیں۔ان کی بیٹی ڈیبس ڈونوان کا اپنی والدہ کے حوالے سے کہنا تھا کہ انہوں نے دو مرتبہ کینسر سے جنگ لڑی اور اسی سلسے میں ان کے دونوں پاؤں کاٹ دیے گئے تھے، اس سب کے باوجود بھی انہیں دوسروں کے چہروں پر مسکراہٹیں بکھیرنے کا بہت شوق تھا۔

انہوں نے مزید بتایا جب میں اور میرے والد ان کے کفن دفن کی تیاری کرنے کے بارے میں سوچ رہے تھے تو مجھے اچانک اپنی ماں سے ہونے والی گفتگو یاد آ گئی۔ڈیبس نے بتایا کہ میری والدہ نے مجھ سے کہا تھا کہ جب میں مر جاؤں تو مجھے ایک بڑے تابوت میں دفنایا جائے جو کہ دکھنے میں بالکل ایک ’ٹی بیگ کے ڈبّے‘ جیسا ہو۔ڈیبس نے کہا کہ اپنی والدہ کی یہ خواہش مجھے ایک مذاق لگی اور ان کی بات پر میں زور سے ہنسی جس پر والدہ بھی ہنسی مگر انہوں نے کہا کہ وہ اس معاملے میں بے حد سنجیدہ ہیں۔

73 سالہ خاتون کی بیٹی نے بتایا کہ 14 سال قبل میری والدہ کے پاؤں پر کسی کیڑے نے کاٹ لیا تھا اور انفیکشن کی وجہ سے ان کا ایک پاؤں کاٹ دیا گیا تھا جس کے بعد یہ انفیکشن پھیلتا گیا اور ان کا دوسرا پاؤں بھی اس سے شدید متاثر ہوا۔لیسیٹر کے گلروس قبرستان میں 73 سالہ ٹینا کے جنازے کا انعقاد کیا گیا، جنازے کے ڈائریکٹر کا پال پینڈر کا کہنا تھا کہ یہ اب تک کی سب سے عجیب سی خواہش تھی لیکن ہم ان کی خوشی میں ہی خوش ہیں۔

برطانیہ(ایمرا نیوز آن لائن)برطانیہ کے شہزادہ چارلس کے پسندیدہ سرکاری مکانات میں سے ایک مکان میں لگی 6 کروڑ 46 لاکھ 79 ہزار 950 ڈالرز مالیت کی پینٹنگز جعلی نکلیں۔ڈم فریز ہاؤس ’دی پرنس فاؤنڈیشن‘ کا صدر مقام ہے جہاں ان قیمتی فن پاروں کو عوامی نمائش کے لیے لگایا گیا تھا لیکن جعل سازی کا آرٹ اسکینڈل سامنے آنے کے بعد اِن پینٹنگز کو ہٹا دیا گیا ہے۔دی میل آن سنڈے کے مطابق وہاں لگی بہت سی پینٹنگز میں سے دو فن پارے جس میں سے ایک 5 کروڑ 43 لاکھ 31 ہزار 158 ڈالر زکی پکاسو کی پینٹنگ تھی جب کہ دوسری 1 کروڑ 55 لاکھ 23 ہزار 188 ڈالرز کی مصور ڈالی کی پینٹنگ تھی، ان دونوں کو بھی جعلی قرار دے دیا گیاہے۔
دیوالیہ بزنس مین جیمس اسٹنٹ کی طرف سے 17 پینٹنگز قرض پر دی گئی تھیں۔پرنس فاؤنڈیشن کے ترجمان نے اس بات کی تصدیق کی ہے کہ ڈم فریز ہاؤس وقتاً فوقتاً افراد اور دیگر تنظیموں کے قرض پر فن پاروں کو قبول کرتا رہتا ہے۔ان کا کہنا تھا کہ یہ انتہائی افسوسناک ہے کہ ان مخصوص پینٹنگز کی صداقت کے حوالے سے شکوک و شبہات سامنے آئے ہیں اور اب انہیں نمائش سے بھی ہٹا دیا گیا ہے۔

جعلی آرٹ بنانے کے مقدمے میں 6 ماہ قید کی سزا کاٹنے والے امریکی فنکار ٹونی ٹیٹرو کا کہنا ہے کہ یہ تصاویر انہوں نے بنائی تھیں اور مسٹر اسٹنٹ کو فروخت کر دیں تھیں۔مسٹر ٹیٹرو قانونی طور پر ایک ایسے مصور ہیں جو کہ صارفین کے گھروں اور دفاتر کے نجی استعمال کے لیے ماسٹر پیس کی نقل تیار کرتے ہیں، اور مسٹر اسٹنٹ نے ان سے 11 ماسٹر پیس کی نقل حاصل کی تھیں۔ٹیٹرو نے مزید بتایا کہ آپ میری بنائی ہوئی تصویروں سے اپنے دوستوں کو متاثر تو لیکن اسکروٹنی کے ماہر اسے کبھی پاس نہیں کریں گے۔تاہم جعل سازی کے اس اسکینڈل کے حوالے سے اسٹنٹ نے اصرار کیا ہے کہ میرا کوئی سامان جعلی نہیں ہے۔

امریکہ(ایمرا نیوز آن لائن)عالمی دہشت گرد تنظیم داعش نے اپنے سربراہ ابوبکر البغدادی کی ہلاکت کی تصدیق کر دی۔امریکی میڈیا کے مطابق داعش نے ابوبکر البغدادی کی ہلاکت کی تصدیق آڈیو پیغام میں کی۔داعش نے ابو ابراہیم الہاشمی القریشی کو دہشت گرد تنظیم کا نیا سربراہ بھی مقرر کرنے کا اعلان کیا۔امریکا نے داعش سربراہ ابوبکر البغدادی کی ہلاکت کی ویڈیو جاری کردی خیال رہے کہ چند روز قبل امریکی فورسز نے شام کے علاقے ادلب میں خفیہ کارروائی کرتے ہوئے داعش کے سربراہ کو ہلاک کرنے کا دعویٰ کیا تھا جس کی امریکی صدر ڈونلڈ ٹرمپ نے بھی تصدیق کی تھی۔

بعدازاں امریکی حکام کا کہنا تھا کہ القاعدہ کے سربراہ اسامہ بن لادن کی طرح داعش کے سربراہ کی باقیات بھی سمندر برد کر دی گئی ہیں۔گزشتہ روز امریکی محکمہ دفاع پینٹاگون نے ابو بکر البغدادی پر حملے کی پہلی ویڈیو بھی جاری کی تھی جس میں امریکی ہیلی کاپٹرز کے حملے کے بعد فوجیوں کو اس کمپاؤنڈ کی طرف بھاگتے ہوئے دیکھا جاسکتا ہے جہاں سرنگ میں جانے سے پہلے ابوبکر البغدادی موجود تھا۔

برطانیہ(ایمرا نیوز آن لائن)پارلیمنٹ کی منظوری کے بعد برطانیہ میں 12 دسمبر کو عام انتخابات کا اعلان کیا گیا ہے۔برطانوی وزیراعظم بورس جانسن کی جانب سے الیکشن کی درخواست پر ہونے والی ووٹنگ کے حق میں 438 ووٹ ڈالے گئے جب کہ مخالفت میں صرف 20 ووٹ پڑے۔برطانوی ایوان نمائندگان (ہاؤس آف کامنز) سے پاس کردہ بل منظوری کے لیے ہاؤس آف لارڈز بھیجا جائے گا اور اس بات کا امکان ہے کہ یہ بل رواں ہفتے کے آخر تک قانون کا حصہ بن جائے۔

وزیراعظم بورس جانسن نے کہا تھا کہ عوام کو اس بات کا موقع ضرور ملنا چاہیے کہ وہ اپنے مستقبل اور بریگزٹ کے حوالے سے فیصلہ کر سکیں۔یورپی یونین نے بریگزٹ کی تاریخ میں 3 ماہ توسیع کی منظوری دے دی بورس جانسن پرامید ہیں کہ نئے انتخابات کے ذریعے انہیں عوام دوبارہ سے مینڈیٹ دیں گے تاکہ وہ بریگزٹ ڈیل اور پارلیمانی ڈیڈلاک کو ختم کر سکیں۔ برطانوی وزیراعظم نے کہا کہ یہ وقت ہے کہ ہم آپس میں بیٹھیں اور بریگزٹ کو مکمل کریں۔

دوسری جانب برطانوی پارلیمنٹ میں قائد حزب اختلاف اور لیبر پارٹی کے سربراہ جیریمی کاربن کا کہنا ہے کہ یہ الیکشن ملک کو تبدیل کرنے کے لیے ہماری نسل کے پاس ایک موقع ہے تاکہ عوام کے ضائع کئے گئے حقوق انہیں دوبارہ دلائے جا سکیں۔جیریمی کاربن نے کہا کہ ان کی جماعت ملک میں حقیقی تبدیلی کے لیے بامقصد اور فطری الیکشن مہم چلائے گی۔خیال رہے کہ برطانوی وزیراعظم بورس جانسن کی درخواست پر یورپی یونین نے بریگزٹ ڈیل میں جنوری 2020 تک توسیع کی منظوری دیدی ہے۔