Tag express news

نیو یارک(ایمرا نیوز آن لائن)پاکستان سمیت دنیا بھر میں شادیوں پر بے تحاشا پیسے استعمال کیے جاتے ہیں تاہم کچھ لوگ سادگی کو ترجیح دیتے ہیں تاہم امریکا میں ایک جوڑے نے پیسے کم ہونے اور شادی کے اخراجات پورا کرنے کے لیے شادی میں شرکت کرنے والوں کو رقم دینا ہو گی۔

غیر ملکی خبر رساں ادارے کے مطابق ہم جب بھی کسی رشتے دار، دوست یا کسی کی بھی شادی بیاہ کی تقریبات میں شرکت کے لیے جاتے ہیں تو دلہا دلہن کے لیے تحائف تو ضرور ساتھ لیکر جاتے ہوں گے، نئے جوڑے کو نیک خواہشات کیساتھ ساتھ اپنی خوشی سے کچھ رقم بھی تھما دی جاتی ہے۔ لیکن کیا آپ نے کبھی یہ سنا ہے کہ دلہن خود اپنی شادی میں شرکت کرنے والوں سے رقم کا تقاضا کرے؟ یقیناً نہیں، لیکن امریکا میں دلہن نے اپنی شادی میں شرکت کرنے والوں کے لیے انٹری فیس مقرر کردی ہے۔

امریکی خبر رساں ادارے فوکس نیوز کے مطابق سوشل نیوز ویب سائٹ ریڈاِٹ پر ڈینٹی شیپ کے نام سے 19 سالہ صارف نے لکھا کہ ان کی کزن کی شادی اتوار کو ہو رہی ہے اور یہ اعلان کیا ہے کہ جو شادی میں شرکت کرنا چاہتا ہے اسے 50 ڈالر (تقریباً ساڑھے 7 ہزار روپے) دینا ہوں گے۔

ان کا کہنا تھا کہ رقم کی منتقلی کی سمارٹ فون ایپ وینمو کے ذریعے بھی انٹری فیس ادا کی جاسکتی ہے تاکہ انہیں فیس کی ادائیگی کے لیے قطار میں نہ کھڑا ہونا پڑے اور مہمان جو پہلے ہی رقم کی ادائیگی کردیں گے ان کے نام خصوصی مہمانوں کی فہرست میں شامل کر لیے جائیں گے۔

دلبرداشتہ لڑکی کا مزید کہنا تھا کہ جب انہوں نے شادی میں شرکت کے لیے فیس ادا کرنے سے انکار کیا تو انکی کزن، جس کی شادی ہونے جارہی تھی، نے خاندان کے بڑوں سے رابطہ کیا جس کے بعد ساری صورتحال ان کے لیے شرمندگی کا باعث بن گئی۔ وہ اپنی شادی پر خرچ کی گئی رقم کو اس طریقے سے واپس وصول کرنا چاہتی تھی۔

کزن کا کہنا تھا کہ میں اس طرح شادی میں شریک نہیں ہوسکوں گی کیونکہ میرے لیے اتنی رقم کا بندوبست کرنا مشکل ہوگا۔ کزن نے میری آنٹی سے رابطہ کیا اور انہوں نے مجھے بدتمیز اور گھٹیا کہا۔ میرے والدین نے میری انٹری کی رقم دینے کی پیشکش کی لیکن میں نے انکار کردیا۔

دبئی(ایمرا نیوز آن لائن)متحدہ عرب امارات کے ماہی گیر نے 350 کلو وزنی شارک پکڑ کر سب کو حیران کر دیا، ساتھی ماہی گیر احمد سلیمان کو مبارک باد دیتے نظر آئے۔

میڈیا رپورٹ کے مطابق ماہی گیر احمد سلیمان سمندر میں جال ڈالے بیٹھا تھا کہ اس کے ہاتھ 350 کلو گرام وزنی شارک لگ گئی جسے دیکھ کو وہ خود بھی حیران رہ گیا۔ ماہی گیر نے شارک کی تصویر سوشل میڈیا پر شیئر کر دی جو دیکھتے ہی دیکھتے وائرل ہو گئی۔

اماراتی ماہی گیر احمد سلیمان کا اپنے پیغام میں کہنا ہے کہ مجھے بہت لمبا عرصہ لگا اور اپنی ٹیم کی مدد سے میں نے بڑی مچھلی کو پکڑنے میں کامیابی حاصل کرلی ہے جس کا وزن 350 کلو گرام ہے۔ ساتھی ماہی گیروں نے احمد کو کامیابی پر خوب مبارکباد دی۔

اسلام آباد(ایمرا نیوز آن لائن)ایل این جی ریفرنس میں ن لیگی رہنما شاہد خاقان عباسی کے جوڈیشل ریمانڈ میں 4 فروری تک توسیع، سماعت 4 فروری تک ملتوی کر دی گئی۔
ایل این جی ریفرنس، سابق وزیراعظم شاہد خاقان عباسی و دیگرملزمان کو عدالت پیش کیا گیا، ن لیگی رہنما مفتاح اسماعیل حاضری سےاستثنیٰ کے باعث پیش نہ ہوئے۔عدالت نے چیئرپرسن اوگراعظمیٰ عادل، سابق چیئرمین سعید احمد کو حاضری یقینی بنانے کیلئے ایک کروڑ کے مچلکے جمع کرانے کا حکم دیا، فاضل جج نے ریمارکس دیئے کہ ایک مفرورملزم کی وجہ سے فرد جرم عائد نہیں کر سکتے، رپورٹ آ جائے پھر کارروائی آگے بڑھے گی۔ انہوں نے نیب سے مفرورملزم شاہد اسلام کے وارنٹ گرفتاری کی رپورٹ بھی طلب کر لی۔ عدالت نے ن لیگی رہنما شاہد خاقان عباسی کے جوڈیشل ریمانڈ میں 4 فروری تک توسیع کرتے ہوئے ایل این جی ریفرنس کی سماعت 4 فروری تک ملتوی کر دی۔

لاہور(ایمرا نیوز آن لائن): پنجاب انسٹیٹیوٹ آف کارڈیالوجی (پی آئی سی) پر حملے کے افسوس ناک واقعے کے بعد وکلا اور ڈاکٹرز دونوں اپنی اپنی انا پر اڑ گئے اور ایک دوسرے کے خلاف احتجاج کررہے ہیں۔
پنجاب بار کونسل اور خیبر پختونخوا بار کونسل کی اپیل پر پی آئی سی حملے میں ملوث 39 وکلا کی گرفتاری، پولیس تشدد اور ڈاکٹرز کے رویے کے خلاف دونوں صوبوں میں وکلا ہڑتال کررہے ہیں۔ اس موقع پر وکلا نے عدالتی کارروائی کا بائیکاٹ کردیا اور مقدمات کی سماعت کے لیے پیش نہیں ہوئے۔

وکلا نے عدالتوں اور کچہریوں کے دروازے بند کردیئے جس کے نتیجے میں ہزاروں مقدمات التوا کا شکار ہوگئے اور ہزاروں سائلین کو شدید پریشانی کا سامنا کرنا پڑا۔
اسلام آباد سمیت ملک کے دیگر شہروں میں بھی وکلا برادری کالے کوٹ سے اظہار یکجہتی کرتے ہوئے ڈاکٹرز اور پولیس کے خلاف احتجاج کررہی ہے۔ اس حوالے سے ریلیاں نکالی جارہی ہیں اور احتجاجی مظاہرے ہورہے ہیں۔

اس موقع پر وکلا نے شدید نعرے بازی کرتے ہوئے وکلا پر تشدد میں ملوث ڈاکٹروں کی گرفتاری اور اپنے ساتھیوں کی رہائی کا مطالبہ کیا۔دوسری جانب ڈاکٹرز بھی کسی سے پیچھے نہیں رہے۔ امراض قلب کا اسپتال پنجاب انسٹیٹیوٹ آف کارڈیالوجی (پی آئی سی) بند ہے اور ڈاکٹرز و طبی عملہ غیر حاضر ہے۔دیگر شہروں کے سرکاری اسپتالوں میں بھی یوم سیاہ منایا جا رہا ہے اور ینگ ڈاکٹرز سراپا احتجاج ہیں۔ مختلف ڈاکٹرز تنظیموں نے احتجاجی ریلیاں نکالیں اور وکلا گردی کے خلاف نعرے لگائے۔

ینگ ڈاکٹرز ایسوسی ایشن اور گرینڈ ہیلتھ الائنس نے تین روزہ سوگ کا اعلان کرتے ہوئے کہا ہے کہ ڈاکٹرز کالی پٹیاں باندھ کر کام کریں گے۔ انہوں نے وزیراعلی پنجاب عثمان بزدار،وزیر قانون پنجاب راجہ بشارت،وزیر صحت یاسمین راشد سے مستعفی ہونے اور 24 گھنٹوں میں سیکورٹی بل آرڈیننس لانے کا مطالبہ بھی کیا۔

ڈاکٹرز کے احتجاج کی وجہ سے ہزاروں مریضوں اور ان کے لواحقین کو شدید پریشانی کا سامنا ہے۔ شہریوں کا کہنا ہے کہ زندگی کے 2 اہم شعبوں سے تعلق رکھنے والے پیشہ ور افراد کے اس افسوس ناک رویے کی قیمت عوام کو چکانی پڑ رہی ہے۔

(میڈیا 92 نیوز آن لائن)موسم سرما میں ہمیں نزلا، زکام، کھانسی اور بے شمار موسمی مسائل کا سامنا رہتا ہے اور بہت سے لوگوں کو سردی زیادہ بھی محسوس ہوتی ہے۔

آئیے ان تمام تر مسائل سے نمٹنے اور موسم سرما میں ترو تازہ رہنے کے لیے آپ کو ایسے بہترین مشروبات کے بارے میں بتائیں جن کا استعمال کرکے آپ موسم سرما میں بیماریوں سے دور رہیں گے۔ یہ گرم مشروبات صحت کے ساتھ ساتھ نظامِ قوت مدافعت اور نظامِ ہاضمہ کے لیے بھی بہترین سمجھے جاتے ہیں۔

1. گرم پانی اور لیمو سے بنا مشروب: موسم سرما میں اس مشروب کا استعمال بے حد مفید ثابت ہوتا ہے۔ اس مشروب میں اینٹی انفلامیٹری اور اور اینٹی آکسیڈینٹس پائے جاتے ہیں جو کہ ہر قسم کی الرجی کے خلاف مزاحمت کا کام کرتا ہے۔

مشروب بنانے کا طریقہ کار: سب سے پہلے ایک سے ڈیڑھ کپ پانی کو ابالیں۔ پانی میں جوش آتے ہی اس میں ایک سے دو لیموں کا رس ڈالیں۔ لیمو کا رس شامل کرنے کے بعد مشروب میں ایک چٹکی ہلدی شامل کر لیجیے۔ ہلدی شامل کرنے کے بعد ایک چٹکی گُڑ شامل کرکے کپ میں نکال لیجیے۔

2. ادرک کا قہوہ: جیسا کہ ہم سب جانتے ہیں کہ ادرک نظامِ ہاضمہ کے لیے بہترین تصور کی جاتی ہے۔ موسم سرما میں ادرک کا استعمال الرجی اور گلے کی سوزش کو کم کرنے کے لیے بہترین دوا ہے۔

ادرک کا قہوہ بنانے کا طریقہ کار: سب سے پہلے ایک کپ پانی لیجیے۔ اس پانی میں 3 اونس باریک ادرک کے ٹکڑے شامل کر لیجیے۔ ادرک کو پانی میں ڈالنے کے بعد اسے اچھی طرح جوش دیجیے۔ اب اس قہوے کو چھان کر اس میں ایک چمچ شہد ملا کر پیا جا سکتا ہے۔

3.ہلدی والا دودھ: ہلدی کو ایک اینٹی بائیوٹک بھی کہا جاتا ہے۔ ہلدی میں ایسی خاصیت ہوتی ہے جو کہ جراثیم کے خلاف لڑتی ہے، یہی وجہ ہے کہ اس کا استعمال کرنے سے صحت پر بے حد مثبت اثرات مرتب ہوتے ہیں۔

ہلدی دودھ بنانے کا طریقہ: سب سے پہلے ایک کپ گرم دودھ لیجیے۔ اس گرم دودھ میں ایک چمچ ہلدی شامل کر لیجیے۔ دودھ میں ہلدی شامل کرنے کے بعد اس میں ایک چمچ شہد بھی شامل کر لیں۔ اسے اچھی طرح چمچے کی مدد سے حل کرکے پیا جا سکتا ہے۔

نوٹ: یہ معلومات مختلف انٹرنیشنل جرنلز میں شائع شدہ تحقیقات سے حاصل کی گئی ہیں۔ اگر آپ کسی الرجی یا بیماری میں مبتلا ہیں تو اپنے معالج سے ضرور مشورہ کریں۔

(ایمرا نیوزآن لائن) پاکستان پیپلز پارٹی کے 52 ویں یوم تاسیس کے موقع پر شاندار تقریب کا انعقاد کیا گیا، اس دوران شاہد مجید کا کہنا تھا کہ قربانیوں اور جہدوجہد کا سلسلہ جاری رکھا جاے گا۔

پی پی پی جاپان کے راہنماؤں شاہد مجید ایڈوکیٹ، سید یاسر گیلانی اور یوسف علی کے زیر اہتمام شاندار پر وقار تقریب منعقد کی گئی جس میں جاپان بھر کی نمایاں سیاسی، سماجی اور دینی تنظیموں کے سربراہان سمیت کمیونٹی کےہر طبقہ فکر کی شخصیات نے شرکت کی۔

تقریب میں جیالوں کی نعرے بازی اور جوش خروش دیکھنے والا تھا، ہال جئے بھٹو اور پیپلز پارٹی زندہ باد کے نعروں سے بار بار گونجتا رہا، اس موقع پر مقررین نے پی پی کے جیالوں کو یوم تاسیس کی مبارک باد پیش کی اور کہا کہ آج پی پی کے جیالوں نے کمیونٹی کا گلدستہ سجایا ہے ، ہم اس پر انہیں مبارک باد پیش کرتے ہیں ۔ پیپلز پارٹی کے جیالوں نے آنے والے تمام معزز مہمانوں کا شکریہ ادا کیا اور ان کا کہنا تھا شہید بھٹو کے مشن کی تکمیل تک جدوجہد جاری رکھیں گے۔

تقریب میں دور دراز سے آئے پی پی کارکنان کی کثیر تعداد شریک تھی، تقریب سے پیپلز پارٹی کے رہنماوں شاہد مجید یاسر گیلانی، خلیل بیگ، یوسف علی سمیت عوامی نیشنل پارٹی جاپان کے صدر نعیم خان، امیر اہل سنت مولانا عبدالمجید مغل، اسلامی سینٹر تجویذالقران جاپان کے چیئرمین قاری علی ، حسن ممتاز صحافی، حمائیوں مغل صحیم عباسی، ن لیگ ٹوکیو کے صدر شیخ زولفقار علی، آواز اسلام کے چئیرمین غنی یوسف اور کاروباری شخصیات حاجی عبداللّٰہ خان، محمد شہزاد، ھودو نیوز کے چئیرمین یوسف علی، سینیر پاکستانی طیب خان پاکستان ایسوسی ایشن جاپان کے جنرل سیکرٹری الطاف غفار ہم خیال دوست چوہدری ارشاد روبی ساچو نے خطاب کیا۔

تقریب میں ہم خیال دوست ملک سلیم بوئیکی تایا امجد راجہ عتیق ملک زولفقار رضا بھائی۔ زولفقار گجر، فیاض شیروانی۔ حیدر علی زیشان خان۔ عارف انصاری۔ عابد چندریگر جاپانی۔ پروفیسر سکیگوچی ۔ پاکستان ایسوسی ایشن کے نایب صدر مجاہد ٹونی سلیم باشی شاہد علی شاہ امجد ناگارا ، محمدانور محمد حبیب سمیت دیگر شخصیات بھی شریک تھیں۔

اسلام آباد(ایمرا نیوزآن لائن) ایڈیشنل اٹارنی جنرل طارق کھوکھر نے عہدے سے استعفیٰ دے دیا۔

طارق کھوکھرنے سابق صدر پرویز مشرف ٹرائل کیس سے متعلق اسلام آباد ہائی کورٹ میں وفاق کی درخواست دائرکی تھی۔ طارق کھوسہ نے اپنے عہدے سے استعفیٰ دیتے ہوئے کہا ہےکہ ان کا ضمیر انہیں اجازت نہیں دیتا کہ اس کیس کی پیروی کروں۔ ذرائع کے مطابق ایڈیشنل اٹارنی جنرل طارق کھوکھر نے وزیراعظم عمران خان سے ملاقات میں انہیں استعفیٰ پیش کیا۔

(ایمرا نیوزآن لائن) پولیس نے راولپنڈی میں انٹرنیشنل ڈارک ویب سائٹ کے رکن ملزم سہیل ایاز کے قریبی ساتھی خرم عرف کالا کو بھی حراست میں لے لیا گیا۔

ملزم کے پاس سے ملنے والے 12 سالہ بچے نے انکشاف کیا ہے کہ ملزمان منشیات کے مکروہ دھندے میں بھی ملوث ہیں۔ پولیس نے تیسرے مرکزی ملزم اعجاز کو بھی گرفتار کر لیا ہے۔ پولیس کا دعویٰ ہے کہ 38 سال کے ملزم سے ڈارک ویب سمیت اہم شواہد ملے ہیں۔

خیال رہے کہ چند روز قبل پولیس نے بچوں سے زیادتی کی لائیو ویڈیو بنانے والے عالمی گینگ کے سرغنہ سہیل ایاز کو گرفتار کیا تھا جس نے دوران تفتیش انکشاف کیا ہے کہ وہ خیبرپختونخوا حکومت کا ملازم ہے اور ماہانہ 3 لاکھ 45 ہزار روپے تنخواہ لیتا ہے۔

(ایمرا نیوزآن لائن) وائلڈ لائف کے ڈپٹی ڈائریکٹر نعیم ڈار کا کہنا ہے کہ پکڑے جانے والا پائیتھن ماحول دوست اژدھا ہے اور یہ فصلوں کوچوہوں سے بچاتے ہیں اور اس سے انسانوں کو کوئی خطرہ نہیں ہوتا۔

انہوں نے بتایا کہ وائلڈ لائف کے اہلکار ضلع بھمبرکے سیرلہ گاؤں سے دس فٹ طویل پائیتھن کوجنگل میں چھوڑ یں گے ۔ یاد رہے کہ گزشتہ شب دس فٹ طویل اژدھامقامی آبادی میں داخل ہوگیا تھا تاہم مقامی افراد نے اژدھے کو زندہ پکڑ کرواقعے کی اطلاع وائلڈ لائف کو دی تھی ۔