Tag festival

اسلام اباد(ایمرا نیوزآن لائن) اسلام اباد میں پاکستان نیشنل کونسل آف دی آرٹس کے زیر اہتمام صوفی نائٹ کا اہتمام کیا گیاجس میں ملک بھر سے آئے گلو کاروں، موسیقاروں اور فنکاروں نے اپنے فن کا زبردست مظاہرہ کیا۔پی این سی اے میں منعقدہ شام موسیقی میں ملک کے مختلف حصوں سے آئے نامور فنکاروں نے عظیم صوفیا کا کلام نہایت خوبصورت انداز میں پیش کیا اور شائقین سے خوب داد وصول کی ۔مقبول گلو کاروں اور موسیقاروں کے علاوہ نئے ابھرتے چہروں نے بھی صوفیانہ کلام احسن انداز میں پیش کیا۔صوفی نائٹ میں جڑواں شہروں سے کثیر تعداد میں روحانی کلام کے شیدائیوں نے شرکت کی۔

لاہور:(ایمرا نیوزآن لائن) ورلڈ کپ کیلیے ستاروں کی کہکشاں سب گئی، تمام ٹیموں نے اپنے 15رکنی اسکواڈزکی فہرست جاری کردی جب کہ تبدیلیوں کی آخری تاریخ 23 مئی ہوگی۔پاکستان سمیت تمام ٹیموں نے ورلڈ کپ کیلیے اپنے اسکواڈز کا اعلان کردیا تھا،سب سے آخر میں 15 کرکٹرز کی فہرست جاری کرنے والی ٹیم ویسٹ انڈیز تھی، اگرچہ سب نے اپنے دستیاب بہترین 15 کرکٹرزکو اسکواڈز کا حصہ بنایا تاہم کسی کی فارم یا انجریز جیسے مسائل کو پیش نظر رکھتے ہوئے تبدیلیاں کرنے کی حتمی تاریخ 23 مئی مقرر کی گئی ہے، پاکستان کو مشکوک فٹنس کے ساتھ انگلینڈ پہنچنے والے محمد حفیظ اور وائرس کے شکار شاداب خان کے متبادل کی ضرورت پڑ سکتی ہے۔

اسی طرح یا انگلینڈ کیخلاف سیریز میں کسی پیسر کی ناقص کارکردگی کی صورت میں بھی متبادل کو لینا ممکن ہوگا، محمد عامر اور آصف علی امیدواروں میں شامل ہیں، کاؤنٹیز کے خلاف میچز اور انگلینڈ سے سیریز میں ان دونوں کی فارم کا بھی اندازہ ہو جائے گا۔ بھارت اور سری لنکا سمیت کئی ملک بھی چند ریزرو کھلاڑیوں کو انگلینڈ میں ساتھ رکھنے کا فیصلہ کرچکے اور اگر ضرورت محسوس کی تو ممکنہ تبدیلیوں پر غور کریں گے۔

یاد رہے کہ اسکواڈ میں تبدیلیوں کی ڈیڈ لائن ختم ہونے کے بعد اگر کسی ٹیم کو متبادل کی ضرورت پیش آئی تو اس کو ورلڈ کپ کی ٹیکنیکل کمیٹی کے سامنے اپنا کیس پیش کرنا ہوگا، انجری سمیت کوئی ٹھوس وجہ ثابت کئے بغیر کسی کو پلیئر تبدیل کرنے کی اجازت نہیں ہوگی۔

ٹوکیو: (ایمرا نیوزآن لائن) جاپان کے قصبے فروکاوا میں قدیم سالانہ میلے کا انعقاد کیا گیا جس میں سینکڑوں افراد نے شرکت کی، میلے کے آغاز پر سینکڑوں افراد نے کئی فٹ لمبے لکڑی کے بانس پر چڑھ کر کرتب کا مظاہرہ کیا۔میڈیا رپورٹ کے مطابق اس موقع پر نوجوان بانس پر چڑھ کر مختلف کرتب دکھاتے ہیں جبکہ دیگر اردگرد جمع ہو کر حوصلہ اٖفزائی کرتے ہیں، اس دوران ڈھول پیٹے جاتے ہیں جن کی لے کے ساتھ ہجوم تالیاں بجاتا ہے اور یوں میلہ اپنے جوبن پر پہنچ جاتا ہے.جاپان میں بانس پر چڑھ کر کرتب دکھانے کے قدیم سالانہ میلے فروکاوا کے دوران ایک شاندار پریڈ کا بھی انعقاد کیا گیا جس میں ڈرم کے فلوٹس شامل تھے۔ پریڈ میں سینکڑوں شرکا نے لالٹینیں بانس پر لٹکا کر مقررہ فاصلہ طے کیا۔

چین (ایمرا نیوزآن لائن) چین میں روایتی لالٹین فیسٹیول کا انعقاد کیا گیا۔اس روشنیوں بھرے فیسٹیول میں سینکڑوں افراد ایک جگہ جمع ہوئے اور کاغذ سے بنی لالٹینوں پر اپنے دل کی خواہشات و پیغامات لکھے اور پھر اُن لالٹیوں کو روشن کر کے فضا میں بلند کیا تو آسمان روشنیوں سے بھر گیا۔اس روایتی فیسٹیول میں جہاں لوگوں نے لالٹینیں فضا میں بلندکر کے خوب انجوائے کیا وہیں ہزاروں لالٹینوں سے سجے خوبصورت منظر نے دیکھنے والوں کو اپنے سحر میں جکڑ لیا۔

برلن(ایمرا نیوز آن لائن) جرمن شہر ہینوور میں عالمی صنعتی میلے کا باقاعدہ آغاز ہو گیا ہے۔خبر رساں ادارے کی رپورٹ کے مطابق جرمن چانسلر انجیلامیرکل نے سویڈن کے وزیراعظم اسٹیفان لوفون کے ہمراہ اس نمائش کا افتتاح کیا۔ سویڈن اس سال کے ہینوور میسے کا پارٹنر ملک ہے۔ اس مرتبہ کی صنعتی نمائش کا مرکزی عنوان انسان اور مشینوں کے درمیان رابطہ ہے۔ جرمنی کے شہر ہینوور میں ایک ہفتے تک جاری اس عالمی نمائش میں قریب 75 ممالک کے نمائش کنندگان نت نئی مصنوعات پیش کریں گے۔

دونوں فلسطینی طالب علم غرب اردن کے شمالی شہر طولکرم میں قائم “خضوری” یونیورسٹی کے طالب علم ہیں
رملہ(ایمرا نیوز آن لائن )فلسطین کے دو طلبا نے تیونس میں منعقدہ بین الاقوامی سائنسی میلے میں شرکت کر کے تین ایوارڈ حاصل کر لیے۔ تفصیلات کے مطابق دونوں فلسطینی طالب علم غرب اردن کے شمالی شہر طولکرم میں قائم “خضوری” یونیورسٹی کے طالب علم ہیں۔ انہوں نے حال ہی میں تیونس میں منعقدہ بین الاقوامی سائنس ٹیکنالوجی کے مقابلے کے مختلف پروگراموں میں حصہ لیا۔ اس دوران مختلف ملکوں کے سیکڑوں طلبا نے حصہ لیا۔ مجموعی طورپر 35 عرب اور دوسرے ممالک کے طلبا نے اپنے 200 تحقیقی اور سائنسی پروگرام پیش کیے۔تیونس میں ہونے والے اس مقابلے میں ابراہیم عبارہ کو انجینیرنگ کے میدان میں پہلا اور تیسرا ایوارڈ دیا گیا۔اسی طرح طالب علم یوسف جعف نے ماحولیات اور توانائی کے حوالے سے ایک پروگرام میں حصہ لیا اور چاندی کا تمغہ حاصل کیا۔ جامعہ خضوری کے طالب علم امجد المصری نے بھی اس مقابلے میں حصہ لے کر ایوارڈ حاصل کیا۔

لاہور(ایمرا نیوزآن لائن رپورٹ اظہر محمود سے) لاہور میں کھانوں اور موسیقی کا تین روزہ میلہ اپنے رنگ بکھیر کر اختتام پزیر ہوگیا۔لاہور لیک سٹی میں کوک میوزک اینڈ فوڈ فیسٹیول میں تیسرے اور آخری روزبھی شہریوں نے بڑی تعداد میں شرکت کی،موج مستی کی اورکھابوں کا لطف اُٹھایا۔حاضرین نے آخری روز گلوکار عاطف اسلم کا کانسرٹ بھی خوب انجوائے کیا۔شہریوں نے مزے مزے کے کھانوں کے ساتھ معروف گلوکار عاطف اسلم کے شاندار کانسرٹ کوخوب انجوائے کیا ۔مرد ، خواتین بچوں بڑوں کی بڑی تعداد نے کانسرٹ میں شرکت کرکے میلے کی رونق کو دوبالا کر دیا۔عاطف اسلم کےمقبول گیتوں پرشائقین بھی جھومتے گاتے اوررقص کرتے نظرآئے۔

لاہور(ایمرا نیوزآن لائن) دنیا بھر میں ہندو برادری آج ہولی کا تہوار منا رہی ہے، اور پاکستان میں بھی ہندو برادری اپنے مذہبی برادری اس تہوار کو بھرپور طریقے سے منا رہی ہے.وزیراعظم عمران خان نے بھی ہندو برادری کو ہولی کے تہوار کی مبارکباد پیش کی ہے. ملک کے مختلف حصوں میں جہاں جہاں ہندو برادری کے افراد رہائش پذیر ہیں وہاں ہولی کی خوشیاں منائی جارہی ہیں، تھر کا صحرا بھی ہولی کے رنگوں میں رنگ گیا ہے۔ہولی کو ‘رنگوں کا تہوار بھی کہا جاتا ہے، اس تہوار کے موقع پر ہندو برادری کے افراد ایک جگہ جمع ہوتےاور ایک دوسرے کے چہروں پر غلال لگاتے اور رنگ پھینکتے ہیں۔ایک دوسرے کو تحفے تحائف بھی پیش کئے جاتے ہیں جبکہ گھروں پر تقاریب کا اہتمام بھی کیا جاتا ہے۔ہندو براردی ہر سال اپنا تہوار جوش و خروش سے مناتے ہیں،خوشی کے اس موقع پر اگر میٹھا نہ ہو تو یہ ممکن نہیں،تہوار پر لوگ ایک دوسرے کو مٹھائیاں کھلاتے نظر آتے ہیں۔اس موقع پر حکومت پاکستان اور سیاسی رہنماؤں کی جانب سے بھی ہندو برادری کو ہولی کی مبارک باد پیش کی جارہی ہے۔چیئرمین پیپلز پارٹی بلاول بھٹو زرداری نے ٹوئٹر پیغام میں ہندو برادری کو ہولی کی مبارک باد پیش کی اور لکھا کہ سب مل کر امن اور خوشیوں کا پیغام پھیلاتے ہیں۔وفاقی وزیر برائے انسانی حقوق شیریں مزاری نے بھی ہندو برادری کے رنگا رنگ تہوار ہولی کی مبارک باد دی۔

الہ آباد(نیٹ نیوز/ایمرا نیوز) بھارتی شہرالہ آبادمیں ہندوؤں کا سب سے بڑا اجتماع قرار دیا جانے والا کمبھ میلہ سج گیا ، میلے کے دوران کروڑوں افرادگنگا اور جمنا کے سنگم پر جمع ہوکر عقیدے کے مطابق اپنے گناہ دھوئیں گے۔بھارتی میڈیا کے مطابق کمبھ میلے کا آج مقدس ترین دِن ہے، اس میلے کے دوران کم از کم 12 کروڑ افراد الہ آبار کا رخ کریں گے اور گنگا اور جمنا کے سنگم پر جمع ہوں گے جن میں دس لاکھ کے قریب غیرملکی بھی شامل ہیں۔یہ میلہ 49 دن تک جاری رہے گا اور چار مارچ کو اپنے اختتام کو پہنچے گا، میلے کے پہلے دن ڈیڑھ کروڑ افراد کی آمد متوقع ہے۔اس موقع پر الہ آباد کے ضلع پریا گنج کے تمام اسکول اور کالجز تین دن کے لیے بند کر دیے گئے ہیں۔شہر کو آنے والی تمام سڑکوں پر بھی رکاوٹیں کھڑی کر دی گئیں ہیں اور گاڑیوں کو شہر سے باہر روک لیا گیا ہے جہاں سے لوگوں کو شٹل بسوں اور رکشوں کے ذریعے میلے کے مقام تک پہنچایا جا رہا ہے۔واضح رہے کمبھ مذہبی میلہ ہے جسے بھارت میں ’زمین پر منعقدہ عظیم تقریب‘ بھی قرار دیا جاتا ہے۔

یہ میلہ ہر 12 سال بعد منعقد ہوتا ہے۔ کمبھ کے میلے کے موقع پر زائرین دریائے گنگا میں نہاتے ہیں۔ ہندو عقائد کے تحت اس رسم سے گناہ دھلتے ہیں اور جنت کا راستہ کھلتا ہے۔بھارتی میڈیا کے مطابق اس مرتبہ میلے کی سرگرمیاں 45 مربع کلومیٹر کے علاقے میں پھیلی ہوئی ہیں جبکہ ماضی میں یہ علاقہ 20 مربع کلومیٹر تک ہوتا تھا۔میلے میں 300 کلومیٹر سڑک بنائی گئی ہے۔ شہر کے چاروں طرف وسیع پیمانے پر کار پارکنگ بنائی گئی ہے تاکہ تقریباً پانچ لاکھ گاڑیوں کو پارک کیا جا سکے۔
حکام کے مطابق اس سال میلے کے انتظامات پر چار ہزار کروڑ روپے سے زیادہ لاگت آئی ہے۔میلے کے منتظم وجے کرن آنند کا کہنا تھا کہ ’پہلا مقدس غسل 15 جنوری کو صبح سوا پانچ بجے ہو گا اور ہر گھاٹ پر 45 منٹ کے دورانیے کے لیے اشنان ہو گا اور یہ سلسلہ شام چار بجے تک چلے گا‘۔کمبھ میلہ الہ آباد میں صدیوں سے منعقد ہو رہا ہے لیکن گذشتہ دو دہائیوں سے یہ ایک میگا ایونٹ کی شکل اختیار کر گیا ہے۔برطانوی نشریاتی ادارے کے مطابق اس برس یہ میلہ بہت بڑا ہے اور خیال کیا جاتا ہے کہ ملک کی ہندو قوم پرست حکومت نے اس کا انتظام ملک میں ہونے والے عام انتخابات کو نظر میں رکھ کر کیا ہے۔

لاہور (ایم نائن ٹو ڈاٹ ٹی وی )   کوک انتظامیہ اور حکام کی نا اہلی کی وجہ سے مقامی ہوٹل میں منعقد کیا جانے والا فوڈ فیسٹیول شہریوں کےلیے وبال جان بن گیا ،فیسٹیول کے موقع پر سٹی ٹریفک پولیس کے 3لفٹر اور درجنوں اہلکار ٹریفک کنٹرول کر نے میں بری طرح ناکام ،شالیمار، باغبانپورہ اور مغلپورہ کے علاقے لاہور سے کٹ کر رہ گئے، بدترین ٹریفک جام سے شہری بدحال ، ایمبولینسیں اور دیگر امدادی گاڑیاں بھی ٹریفک جام میں پھنسی رہیں، ہوٹل انتظامیہ سرے سے کنسرٹ سے ہی لاعلم نکلی اور کہا کہ انہیں صرف فوڈ فیسٹول کا بتایا گیا تھا تاہم چیف ٹریفک افسر رائے اعجاز حسین نے بتایا کہ سڑک بلاک کرنے اور ٹریفک کے بہاؤمیں خلل ڈالنے پر کوک انتظامیہ کے خلاف مقدمہ درج کرکے کارروائی شروع کردی گئی ہے ۔ بتایا گیا ہے کہ گزشتہ روز مقامی ہوٹل میں کوک فوڈفیسٹیول کا انعقاد کیا گیا جس میں موسیقی سمیت مختلف سٹالز وغیرہ لگا ئے گئے تھے۔ اتوار کے روز چھٹی ہونے کی وجہ سے کوک فوڈفیسٹیول میں شہریوں کی بڑی تعداد کی آمد پرکوک فوڈ فیسٹیول منعقد کروانے والی انتظامیہ کی جانب سے ناقص انتظامات کی بناءپر ہوٹل کے باہر رانگ پارکنگ اور ٹریفک کے درہم برہم نظام کے باعث گاڑیوں کی لمبی لائنیں لگ گئیں اور دیکھتے ہی دیکھتے بدترین ٹریفک جام ہو گیا۔اس موقع پر گاڑیوں کی لمبی لائنیں لگ گئیں اور شہری کئی گھنٹوں تک بدترین ٹریفک جام میں اذیت سے دوچار ہوتے رہے۔ مقامی ہوٹل کے ترجمان نے بتایا ہے کہ کوکا کولا فوڈ فیسٹیول کی انتظامیہ نے ہمیں یہ نہیں بتایا کہ وہ اس میں کنسرٹ بھی کررہے ہیں۔ کنسرٹ کی وجہ سے لوگوں کی تعداد بڑھ گئی اور زیادہ گاڑیوں کی وجہ سے پارکنگ مسائل بڑھے۔ اس میں ہمارا کوئی قصور نہیں کوکا کولا کو چاہیے تھا کہ وہ ہمیں صورتحال سے آگاہ کرتے۔ ترجمان نے بتایا کہ رات گئے پولیس کی مدد سے ٹریفک جام پر قابو پالیا گیاہے۔ادھر چیف ٹریفک آفیسر رائے اعجاز نے کہا کہ فیسٹیول کے حوالے سے کوک انتظامیہ کی جانب سے میسج کے ذریعے تشہیر کرکے لوگوں کو مدعو کیا گیا جس وجہ سے ٹریفک کا نظام درہم برہم ہوا۔ ان کا کہنا تھا کہ کوک انتظامیہ کو پہلے سے کہا گیا تھا کہ وہ شہرمیں 4 مختلف جگہوں پر پارکنگ پوائنٹس بنا کر وہاں فی پوائنٹ 10 بسوں کے حساب سے40 بسیں چلائیں تاکہ ٹریفک میں خلل نہ پڑے لیکن انہوں نے کوئی عملدرآمد نہیں کیا جس وجہ سے شدید مشکلات کا سامنا کرنا پڑا۔ سی ٹی او رائے اعجاز کا کہنا تھا کہ کوک انتظامیہ پر روڈ بلاک کرنے اور ٹریفک بہاؤ میں خلل ڈالنے کی دفعات کے تحت مقدمہ درج کرلیا گیا ہے اور اس پر کارروائی بھی کی جارہی ہے۔