Tag FIA

لاہور (حافظ عمر سعید)خیبر پختونخوا حکومت نے پنجاب میں ناقص کارکردگی پر بلیک لسٹ کی گئی کمپنی کو بی آر ٹی اک ٹھیکہ دیا۔تفصیلات کے مطابق ایف آئی اے نے پنجاب حکومت سے پشاور میٹروبس کے ٹھیکیدار کالسن اینڈ مقبول کا ریکارڈ طلب کرلیا ہے۔

ایف آئی اے پشاور نے چیف جسٹس پشاور ہائی کورٹ کے حکم پر انکوائری شروع کردی ہے۔محکمہ ٹرانسپوٹ پنجاب ،پنجاب ماس ٹرانزٹ اتھارٹی اور ایل ڈی اے نے ایف آئی اے پشاور کو ریکارڈ فراہم کر دیا ،جس کے مطابق کالسن اینڈ مقبول کمپنی کو اورنج لائن میٹروٹرین منصوبے کے ایک پیکج ٹھیکہ دیا گیا تھا،

محکمہ ٹرانسپورٹ پنجاب کے مطابق ناقص کارگردگی پر پنجاب حکومت نے پشاور میٹروبس کی ٹھیکیدار کمپنی کو بلیک لسٹ کردیا تھا۔

(میڈیا 92 نیوز آن لائن) کرتار پور راہداری پر بھارت سے آئے سکھ یاتریوں کی کلیئرنس کے عمل میں تیزی لانےکے لیے 80 امیگریشن کاؤنٹرز قائم کر دیئے گئے ہیں۔

گزشتہ ہفتے پاکستان اور بھارت کے درمیان کرتارپور راہداری کے معاہدے پر دستخط ہوئے تھے، جس کے تحت بھارت کے سکھ یاتری بغیر ویزے پاکستان میں موجود اپنے چند مقدس مقامات کا دورہ کر سکیں گے۔

کرتارپور راہداری معاہدے کے مطابق روزانہ 5 ہزار سکھ یاتری اس راہداری کا استعمال کرتے ہوئے گوردوارہ دربار صاحب کا دورہ کرسکیں گےجہاں گرو نانک نے اپنی زندگی کے آخری 18 سال گزارے تھے۔

میڈیا رپورٹس کے مطابق وزارت داخلہ کی جانب سے بھارت سے آئے یاتریوں کی سہولت کے لیے تین داخلی راستے بنائے گئے ہیں۔ فیڈرل انویسٹی گیشن ایجنسی (ایف آئی اے) یاتریوں کی کلیئرنس لسٹ اُن کی آمد سے 10 روز قبل بھارتی حکام کو بھیجے گی ۔ میڈیارپورٹس کے مطابق پاکستان رینجرز کےزیر نگرانی خصوصی بسوں میں یاتریوں کو گوردوارہ دربار صاحب لے جایا جائے گا جبکہ گوردوارے میں داخل ہونے سے قبل اُن کے پاسپورٹ اسکین کیے جائیں گے۔

پاکستان اور بھارت دونوں ممالک سے آئے یاتریوں کو گوردوارہ دربار صاحب میں داخلےسے قبل بائیو میٹرک اسکریننگ کروانی ہوگی۔ اس کے علاوہ زیارت کے لیے آئے یاتری واپسی کے لیے اُسی گیٹ کا استعمال کریں گےجہاں سے وہ تصدیق کے بعد اندر آئے تھے۔

رپورٹ کے مطابق وزارت داخلہ نے راہداری پر کارروائیوں میں آسانی پیدا کرنے کے لیے 169 انسپکٹر اور سب انسپکٹر ، کانسٹیبل اور خواتین کانسٹیبل کے علاوہ دو اسسٹنٹ ڈائریکٹر اور ایک ڈپٹی ڈائریکٹر مقرر کیا ہے۔ کرتارپور راہداری پر زیارت کے لیے آئے یاتریوں سے 20 ڈالر سروس چارجز لیے جائیں گے۔

یہ بھی پڑھیے: کرتار پور: سکھ یاتریوں کیلئے ہدایت نامہ جاری پاکستان امیگریشن حکام ہر بھارتی یاتری کو ایک ’بار کوڈ‘ والا کارڈ جاری کریں گے، بھارتی یاتریوں کی آمد صبح 8سے دن 12بجے تک ہوگی اور غروب آفتاب تک سب یاتریوں کو واپس جانا ہوگا۔

وزیر اعظم عمران خان 9نومبر کو کرتارپور راہداری کا افتتاح کریں گےجبکہ بابا گرو نانک کے 550 ویں جنم دن کی تقریبات کا آغاز 12 نومبر سے کیا جائے گا۔

( میڈیا 92 نیوز آن لائن ) جیل سے رہائی پاتے وقت اس نے جیلر کے کاندھے پر ہاتھ رکھتے ہوئے کہا ’’جتنی جلدی ہو سکے ایمانداری کا بھوت دماغ سے نکال دو پیسہ بھی ملے گا اور عزت و شہرت بھی ورنہ بیوی، بچے رل جائیں گے اور کسی دن تم بھی بے ایمانی میں نکال دیئے جاؤ گے‘‘۔

جیل کے باہر ایک بڑی گاڑی اس کا انتظار کر رہی تھی۔ عام طور پر قیدی اندر اور باہر جانے کے لئے چھوٹا دروازہ استعمال کرتے ہیں کیونکہ جھک کر جانا پڑتا ہے مگر اس کے لئے بڑا دروازہ کھولا گیا۔

جاتے ہوئے اس نے پولیس والوں کے ہاتھوں میں پانچ، پانچ سو کے نوٹ انعام کے طور پر رکھے اور کہا ’’خرچی ملتی رہے گی، کوئی پریشانی ہو تو اس کو بتا دینا‘‘۔ اس نے ایک قیدی کی طرف اشارہ کرتے ہوئے کہا۔ پھر جیلر سے کہا۔ ’’میں ہی ’خبر‘ ہوں، یقین نہ آئے تو باہر کھڑے کیمرہ مین اور رپورٹرز کو دیکھ لو‘‘۔ ابھی جیلر یہ قصہ مجھے سنا ہی رہا تھا کہ ایک خاتون اندر داخل ہوئیں اور انتہائی نفیس لہجے میں فرمایا۔ منصور صاحب کو بلوا دیں۔ بعد میں جیلر نے بتایا کہ یہ ان کی اہلیہ ہیں۔ شوہر نے ’’پلی بارگین‘‘ کر لی ہے اور چند دن میں رہائی عمل میں آ جائے گی۔

سچ بولوں مظہر صاحب میں ہار گیا ہوں اور تھوڑا بہت سمجھوتا حالات سے کر لیا ہے کیونکہ جس کمرے میں اس وقت آپ بیٹھے ہیں وہاں بڑے مجرموں سے بڑے بڑے لوگ ملنے آتے ہیں، کبھی ہمیں بیٹھنے کی اجازت ہوتی ہے اور کبھی مجھے کمرے سے باہر جانا پڑتا ہے فیصلہ آپ پر ہے کہ جیل میں میرا رعب چلے گا یا اس مجرم کا جس کے لئے مجھے کمرے سے باہر جانا پڑتا ہے۔ میں نے مایوسی کا اظہار کرتے ہوئے کہا، تم نے مجھے مایوس کیا، یہی تو امتحان ہوتا ہے۔ پھر اس نے مجھے ایک اور قصہ سنا کر حیران کر دیا۔

آپ کو یاد ہے ایک صاحب کچھ عرصے کے لئے وزیراعظم بنے تھے۔ وہ باہر سے لائے گئے تھے اور ان کی بڑی شہرت تھی۔ میں نے کہا ہاں، کیوں کیا ہوا تھا۔ اس نے چہرے پر ہلکی مسکراہٹ لاتے ہوئے کہا وہ کراچی ایئرپورٹ پر آئے تو سب سے پہلے جس شخص سے گلے ملے اس پر بعد میں نیب کا مقدمہ چلا، سزا ہوئی اور پھر ایک اور وزیراعظم کے کہنے پر پیرول پر مستقل رہائی مل گئی۔ وہ بھی مجھے جیل میں ایسے ہی مشورے دیتا تھا کہ حالات سے سمجھوتا کر لو۔ دیکھو میں زیادہ پڑھا لکھا نہیں ہوں مگر FIAمیں اعلیٰ پوزیشن پر رہا ہوں۔

یہ80کی دہائی کی بات ہے جب ایک صاحب نے ایک جعلی کاروبار کے ذریعے ہزاروں خاندانوں کی برسوں کی کمائی لوٹ لی۔ مجھے آج بھی یاد ہے میں جس اخبار میں ان دنوں کام کرتا تھا اس نے بڑی خبریں دیں کہ یہ فراڈ ہے مگر اس نے بڑے بڑے اشتہارات دے کر منہ بند کر دیئے۔ آج بھی یہ بہترین طریقہ ہے زبان بندی کا۔ غرض یہ کہ ایک دن وہ پکڑا گیا مگر کاروبار چلتا رہا۔ وہ جیل سے کورٹ لایا جاتا اور وہاں موجود ایک پک اپ میں بیٹھ کر دھندہ جاری رکھتا۔ تو تمہیں مہران بینک بھی یاد ہوگا۔

جی جی یاد ہے۔ اس نے میری طرف دیکھتے ہوئے کہا۔ اس کو عدالت نے دس سال کی سزا سنائی تھی مگر وہ تین سال میں باہر آ گیا۔ کمال کا فنکار آدمی تھا۔ دبلا پتلا، چھوٹا قد مگر جب اس کے حوالے سے اس وقت کے ہوم سیکریٹری واجد رانا کی وفاقی و صوبائی حکومت کو لکھی جانے والی رپورٹ دیکھی تو میں حیران تھا کس کس طرح اس نے اپنی سزا میں کمی کروائی۔

جیسا کہ بیٹھے بٹھائے امتحان پاس کرنا، سانپ نہ ہوتے ہوئے بھی مارنا، حد تو یہ ہے کہ جتنا خون اس کے جسم میں نہیں تھا اتنا خون وہ دے چکا تھا۔ کبھی بلڈ گروپ ایک ہوتا تو کبھی دوسرا۔ یہ سب کاغذی کارروائیاں تھیں۔ ہوم سیکریٹری نے لکھا کہ نہ صرف اس کی سزا بحال کی جائے بلکہ فراڈ کا مقدمہ قائم کیا جائے۔ اس خط کا نتیجہ یہ ہوا کہ رانا صاحب کا ٹرانسفر اسلام آباد ہو گیا اور وہ جیل سے باہر آ گیا۔

جیل میں ایسے لوگوں کا قیدی بھی انتظار کرتے ہیں اور عملہ بھی۔ آپ جتنے بڑے ملزم ہیں سہولتیں بھی اسی حساب سے۔ البتہ اگر آپ کسی دہشت گرد تنظیم سے تعلق رکھتے ہیں تو سہولتیں خوف میں بھی مل جاتی ہیں۔ آپ کو کیا بتاؤں لاک اپ میں کیا نہیں ہوتا۔ جیلر نے کہا، مجھے پتا ہے۔ ابھی جیلر سے میری ملاقات ختم نہیں ہوئی تھی کہ ایک پرانا سیاسی قیدی ملا۔ ایک یہ ہیں جن پر نظریات کا بھوت سوار ہے، نہ کبھی ہم سے سہولت مانگی اور نہ ہی یقین دلایا کہ ان کی پارٹی برسر اقتدار آئے گی تو یہ ہماری ترقی کروا دیں گے۔

اس سے بہتر تو کرپشن کے الزام میں بند لوگ ہوتے ہیں، جیل کے اندر سے ہی ہمارے مسائل حل کروا دیتے ہیں۔ یہ تم نہیں تمہارا حالات سے کیا ہوا سمجھوتا بول رہا ہے۔ میں نے اس سیاسی قیدی سے بات کے دوران جیلر سے کہا۔ کچھ عرصے بعد خبر آئی کہ اس جیلر کو کچھ نامعلوم افراد نے ایم اے جناح روڈ کے قریب گولی مار کر قتل کر دیا ہے۔

کچھ عرصہ پہلے دوبارہ شوق اٹھا ’’خبر‘‘ کی تلاش کا۔ جیلر نیا تھا مگر اس سے ملاقات ہو چکی تھی۔ جب وہ اپنے ایک ریسرچ پیپر کے سلسلے میں مجھ سے ملنے آیا تھا۔ اس وقت کچھ سیاستدان اور کاروباری لوگ بند تھے۔ ’’اوپر چلے جائیں خبر مل جائے گی‘‘۔ تنگ سیڑھیوں سے ہوتے ہوئے کمرے میں پہنچے تو بڑا تیز اے سی چل رہا تھا اور ملزمان کھانا کھا رہے تھے۔ کچھ کو میں جانتا تھا، کچھ کو نہیں۔ ابھی حال ہی میں ایک سروے میں کرپشن کا نواں نمبر آیا۔

سوال تھا پاکستان کے بڑے مسائل کیا ہیں۔ مجھے حیرت ہوئی کیونکہ اس ملک میں پیسے کے بغیر تو لوگ قومی ایوارڈ نہیں دیتے، نوکری کیا دیں گے۔ آخر مالی سے مالدار بننے والے قائم خانی کو بھی تو حکومت پاکستان نے یہ اعزاز دیا ہے۔ یعنی کرپشن جیت گئی، جمہوریت ہار گئی۔

لاہور(ایمرا نیوزآن لائن) ایف آئی اے نے شانگلہ الپوری روڈ کی تعمیر میں مبینہ کرپشن کے الزام میں مسلم لیگ ن کے رہنما امیر مقام کے بیٹے کو گرفتار کر لیا۔ایف آئی اے کے مطابق کرپشن انکوائری مکمل ہونے کے بعد امیر مقام کے بیٹے اشتیاق سمیت دیگر پانچ ٹھیکیداروں کو گرفتار کرکے مقدمہ درج کر لیا گیا۔

انکوائری میں این ایچ اے کے 11 اعلیٰ افسران کے خلاف محکمانہ کارروائی کی سفارش کی گئی ہے جبکہ انکوائری میں امیر مقام اینڈ کمپنی کو بلیک لسٹ کرنے اور کمپنی سے 626 ملین روپے کی ریکوری کی بھی تجویز دی گئی ہے۔انکوائری کے مطابق پراجیکٹ امیر مقام اینڈ کمپنی کو 850 ملین میں ایک سال میں مکمل کرنا تھا پراجیکٹ 10 سال بعد بھی نامکمل رہا اور تخمینہ 2800 ملین سے تجاوز کر چکا ہے۔

لاہور(ایمرا نیوزآن لائن) ایف آئی اے کے ہیومن ٹریفکنگ سیل نے جھانسہ سے کر پاکستانی لڑکیوں سے شادی کرنے والے چینی باشندوں کے گروہ کے سربراہ کو مزید 7 افراد سمیت گرفتار کرلیا ہے۔وفاقی تحقیقاتی ادارے ( ایف آئی اے) کے مطابق ہیومن ٹریفکنگ سیل راولپنڈی نے کارروائی کرتے ہوئے 3 چینی باشندوں سمیت 7 افراد کو گرفتار کرلیا جن میں گینگ کا سربراہ چینی باشندہ’ سونگ چو یونگ‘ بھی شامل ہے۔ذرائع کے مطابق ڈی جی ایف آئی اے کے سامنے دو خواتین پیش ہوئیں جن کی درخواست پر ایف آئی اے اسلام آباد نے انکوائری شروع کی اور ڈپٹی ڈائریکٹر کامران علی کی سربراہی میں ٹیم نے کارروائی کی۔آج گرفتار کیے جانےوالے چینی باشندوں میں 2 جوڑے بھی شامل ہیں جبکہ دو چینی باشندوں نے دو پاکستانی لڑکیوں کو اپنی بیوی ظاہر کیا۔پاکستانی خواتین سے شادی اور ان سے جسم فروشی کا مکروہ دھندہ کرانے والے گروہ کے اب تک گرفتار ہونے والے ملزمان کی تعداد 19 ہوگئی ہے۔

ڈپٹی ڈائریکٹر ایف آئی اے کامران علی کے مطابق گرفتار ملزمان خود کو جعلی طور پر مسلمان ظاہر کرتے اور پاکستانی خواتین سے شادی کر کے ان سے جسم فروشی کراتے تھے جب کہ ملزمان خواتین کے اعضا بھی فروخت کرنے میں ملوث تھے۔واضح رہے کہ ایف آئی اے نے گزشتہ روز مکروہ دھندے میں ملوث 8 چینی باشندوں اور ان کے 4 پاکستانی ساتھیوں کو گرفتار کیا تھا۔

ایف آئی اے حکام کے مطابق گروہ کا سرغنہ پنجاب پولیس کے افسر کا بیٹا ہے جس کی گرفتاری کے لیے چھاپہ مارا گیا تو وہ فرار ہوگیا جب کہ ملزم نے فرار کے بعد 13 مئی تک عبوری ضمانت کرالی ہے۔ایف آئی اے حکام کا کہنا ہے کہ ملزمان لڑکیوں کو چین لے جا کر ان سے جسم فروشی کراتے تھے اور لڑکیوں کے گھر والوں کو ماہانہ 50 ہزار روپے بھجواتے تھے۔

ملزموں کیخلاف 5 ایف آئی آرزدرج کرلی گئیں ہیں‘ایف آئی اے حکام
لاہور(ایمرا نیوز آن لائن)ایف آئی اے نے منی لانڈرزکیخلاف کارروائی کرتے ہوئے کراچی کے دو افراد سمیت 11 ملزموں کو گرفتار کرلیا۔میڈیا رپورٹس کے مطابق ایف آئی اے نے منی لانڈرزکیخلاف کارروائی کرتے ہوئے کراچی کے دو افراد سمیت 11 ملزموں کو گرفتار کرلیا۔ ایف آئی اے کا کہنا ہے کہ ملزموں کیخلاف 5 ایف آئی آرزدرج کرلی گئی ہیں ،ملزموں نے 15 ارب مالیت کے ڈالرز بیرون ملک سمگل کئے ،یہ ٹرانزیکشن دسمبر2016 سے جنوری 21017 کے ددوران ہوئیں۔

ایف آئی اے حکام کو خط لکھ دیا گیا ہے تحقیقات میں معلومات کا تبادلہ کیا جائے، یونیورسٹی ترجمان
لاہور(ایمرا نیوز آن لائن )پنجاب یونیورسٹی کی انتظامیہ نے طالبات کا ڈیٹا چوری ہونے کے معاملے پر وضاحتیں دینا شروع کردی ہیں۔ترجمان یونیورسٹی کی وضاحت سے لگ یہ رہاہے کہ پنجاب یونیورسٹی انتظامیہ معاملہ سمجھنے سے قاصر ہے۔ یونیورسٹی انتظامیہ نے تحقیقات کے لیے ایف آئی کو خط لکھ دیا ہے۔پنجاب یونیورسٹی کے ترجمان کی طرف سے جاری بیان میں کہا گیا ہے کہ ایف آئی اے حکام کو خط لکھ دیا گیا ہےاور کہا گیا ہے کہ تحقیقات میں معلومات کا تبادلہ کیا جائے۔ترجمان کے مطابق پنجاب یونیورسٹی کی سرکاری ویب سائٹ پر طالبات کی کسی قسم کی معلومات موجود نہیں ہیں۔ ویب سائٹ پر معلومات نہ ہونے کے باعث ویب سائٹ سے ڈیٹا ہیک ہونے کا سوال ہی پیدا نہیں ہوتا۔ ڈیٹا چوری سے متعلق خبروں میں کسی قسم کی صداقت نہیں ہے ۔ ایف آئی اے حکام یا یونیورسٹی انتظامیہ کو کسی طالبہ کی جانب سے کوئی شکایت بھی موصول نہیں ہوئی۔ذرائع کا کہنا ہے کہ طالبات کا ڈیٹا ڈارک ویب پر تاحال موجود ہے اور یہ ڈیٹا موبائل فونز سے چوری ہواہے۔یاد رہے 9اپریل کو خبر سامنے آئی تھی کہ ہیکرز کی جانب سے پنجاب یونیورسٹی کی طالبات کا ڈیٹا ہیک کرکے فروخت ہونے کا انکشاف ہوا ہے۔اسپائی ایپلیکیشنز کے ذریعے چرائی گئی یونیورسٹی طالبات کی معلومات کو مارکیٹ میں فروخت کیا جارہا ہے۔ ڈیپ ویب پرطالبات کی تصاویر، ویڈیوز اور فون نمبرز بھی دستیاب ہیں۔پنجاب یونیورسٹی کی طالبات کی معلومات ڈیجیٹل کرنسی بٹ کوائنز میں فروخت ہورہی ہیں۔ ایک بٹ کوائن کی قیمت پاکستانی سات لاکھ پاکستانی روپے بنتے ہیں۔اسکینڈل کا انکشاف ہونے کے بعد ایف آئی اے سائبر کرائم ونگ نے معاملے کی تحقیقات شروع کردی ہیں۔واضح رہے کہ گزشتہ برس برطانوی میڈیا نے انکشاف کیا تھا کہ ہیکرز نے سماجی رابطوں کی معروف ویب سائٹ فیس بک کے 81 ہزار صارفین کی معلومات چرا کر فروخت کے لیے پیش کی گئی ہیں۔

لاہور (ایمرا نیوز آن لائن) ایف آئی اے کے اینٹی انسانی سمگلنگ ونگ نے گلبرگ کے علاقہ مکہ کالونی میں کارروائی کر کے انسانی سمگلنگ میں ملوث دو افراد محمد آصف اور علی حیدر کو گرفتار کر لیا ہے۔ ایف آئی اے نے ملزمان کے خلاف مقدمہ درج کر کے تفتیش شروع کر دی ہے۔ ملزمان پر سادہ لوح شہریوں سے لاکھوں روپے بٹور کر انہیں غیر قانونی طریقے سے بیرون ملک بھجوانے کا جھانسہ دے رکھا تھا۔ (اے ملک)

لاہور(ایمرا نیوزآن لائن) ایف آئی اے حکام نے منی لانڈرنگ و وائٹ کالر کرائم، میں ملوث گروہ کو قانون کی گرفت میں لانے اور اس کی روک تھام کے لئے ایف آئی اے کے افسران اور عملے کو خصوصی ٹاسک سونپ دئیے ہیں ، اس حوالے سے ماہرین کی خدمات حاصل کی گئی ہے اور ایف آئی اے افسران اور عملے کو ٹریننگ ورکشاپ کے ذریعے جدید ٹیکنالوجی کے استعمال، قانونی تقاضوں کے مطابق کیس کی پیروی کرنے اور عصر حاضر کے متعلقہ امور کے متعلق تربیت بھی شروع کردی گئی ہے ، جن ماہرین کی خدمات حاصل کی گئی ہیں ان کا منی لانڈرنگ ، ڈیجیٹل فرانزک اور وائٹ کالر کرائم کے حوالے سے وسیع تجربہ ہے ، یہ ماہرین بالخصوص ایف آئی اے کارپوریٹ کرائم سرکل،اینٹی کرپشن سرکل،بنکنگ سرکل اور اینٹی ہیومن ٹریفکنگ سرکل کے افسران اور اہلکاروں کو تربیت دیں گے ، ذرائع کے مطابق حکومت کی جانب سے وائٹ کالر کرائم میں ملوث افراد کے گرد گھیرا تنگ کیا جائے گا ، ایف آئی اے حکام کی جانب سے چھاپوں کا سلسلہ تیز ہونے پر منی لانڈرنگ میں ملوث گروہ کے ارکان نے بھی اپنی حکمت عملی تبدیل کر لی ، کئی گروہ دبئی شفٹ ہو گئے ، بعض افراد پوش علاقوں سے نکل کر رورل ایریا میں شفٹ ہو گئے تھے ، لاہور کے تجارتی علاقوں شاہ عالم،اعظم مارکیٹ، پاکستان مارکیٹ،لوہاری گیٹ،گلبرگ،منٹگمری روڈ،میکلوڈ روڈ،بادامی باغ، ٹرک اڈا، اچھرہ اور دیگر علاقوں میں منی لانڈنگ اور حوالہ کا کام کیا جاتا ہے ، پنجاب کے دیگر اضلاع میں بھی ہنڈی حوالہ میں ملوث گروہ موجود ہیں، ، ایف آئی اے کے مطابق لاہور،گجرات، کھاریاں، شیخوپورہ، ڈسکہ، فیصل آباد اور دیگر علاقوں چھاپے مار کر منی لانڈرنگ اور ہنڈی حوالہ میں ملوث کئی ملزمان کو گرفتار کیا گیا ، ان کے قبضہ سے کروڑوں روپے مالیت کی نقدی اور ہنڈی حوالہ کی رسیدیں برآمد کی گئی ہیں ۔

لاہور(نیٹ نیوز/ایمرا نیوز) وفاقی تحقیقاتی ادارے(ایف آئی اے) نےاپوزیشن لیڈرپنجاب حمزہ شہباز کو لندن جانےسےروک دیا۔ذرائع کے مطابق حمزہ شہبازاپنے بھائی سے ملنےنجی ایئرلائن کی پرواز سے لندن جارہےتھے کہ ایف آئی نے بروقت پہنچ کر انہیں جانے سے روک دیا۔اس موقع پرحمزہ شہباز کا کہنا تھا کہ امیگریشن کاؤنٹر پر پہنچا تو بتایا گیا کہ میرا نام بلیک لسٹ میں ہے۔انہوں نے ایف آئی اے کو بتایا کہ نیب میں چلنے والی انکوائری میں مطلوب نہیں ہوں۔واضح رہے کہ نیب حمزہ شہباز کے خلاف آمدن سے زائد اثاثوں کے کیس کی تحقیقات کر رہا ہے، جس میں گرفتاری سے بچنے کے لیے انہوں نے حفاظتی ضمانت حاصل کر رکھی ہے۔