Tag gas

گیس کی قیمتوں میں پھر 145فیصد تک اضافے کا مطالبہ
سوئی ناردرن گیس پائپ لائن لمیٹیڈ اور سوئی سدرن گیس کمپنی لمیٹیڈ نے گیس کی قیمتوں میں اضافے کے لیے درخواست دائر کر دی ، اضافہ کی صورت میں گیس کی موجودہ فی ایم ایم بی ٹی یو قیمت 501.17 سے بڑھ کر ایک ہزار 229 روپے تک پہنچ جائے گی
اسلام آباد(ایمرا نیوز آن لائن) آئندہ مالی سال کے لیے گیس یوٹلٹیز کی آمدن کی ضروریات کو پورا کرنے کے لیے یکم جولائی 2019 سے گیس کی قیمتوں میں 145فیصد تک اضافے کا مطالبہ کیا ہے۔ رپورٹ کے مطابق سوئی ناردرن گیس پائپ لائن لمیٹیڈ اور سوئی سدرن گیس کمپنی لمیٹیڈ نے گیس کی قیمتوں میں اضافے کے لیے درخواست دائر کی ہے اور یہ اقدام ایک ایسے موقع پر کیا گیا ہے جب اکتوبر 2018 میں گیس کی قیمتوں میں 35 فیصد اضافے کے سبب تحریک انصاف کی حکومت کو شدید سیاسی دباؤ کا سامنا ہے۔اس تمام تر عمل کے دوران اب تک دو کمپنیوں کے 4 منیجنگ ڈائریکٹرز کو ہٹایا جا چکا ہے۔آئل اینڈ گیس ریگولیٹری اتھارٹی(اوگرا) نے اعلان کیا ہے کہ پنجاب اور خیبر پختونخوا میں خدمات انجام دینے والی سوئی ناردرن گیس پائپ لائنز لمیٹیڈ نے مالی سال 20-2019 کے لیے یکم جولائی سے 144 فیصد اضافے کی تجویز پیش کرتے ہوئے 723روپے اضافے کے ساتھ قیمت ایک ہزار 224 روپے فی ایم ایم بی ٹی یو کرنے کی تجویز دی ہے۔ریگولیٹر کا کہنا ہے کہ سوئی ناردرن گیس کمپنی نے 19مارچ کو نظرثانی شدہ درخواست دائر کی جس میں اپنے قدرتی گیس کے کاروبار میں 722.51روہے فی ایم ایم بی ٹی یو اضافے کی درخواست کی گئی جو یکم جولائی 2019 سے نافذ العمل ہو گی۔اگر یہ اضافہ کیا جاتا ہے تو گیس کی موجودہ فی ایم ایم بی ٹی یو قیمت 501.17 سے بڑھ کر ایک ہزار 229 روپے تک پہنچ جائے گی۔اس کے ساتھ ساتھ کمپنی نے آر ایل این جی کی ڈومیسٹک صارفین کو منتقلی کی مد میں فی ایم ایم بی ٹی یو 111.32روپے اور ایل پی جی کے کاروبار کے لیے 6ہزار 84روپے فی ایم ایم بی ٹی یو اضافے کا مطالبہ کیا ہے۔دلچسپ امر یہ ہے کہ سوئی ناردرن گیس پائپ لائن لمیٹیڈ نے موجودہ قیمت 5.1 روپے فی یونٹ میں 14 فیصد یا 66روپے اضافہ کردیا ہے جس سے قیمت 566.97روپے فی یونٹ تک پہنچ گئی ہے جہاں وہ موجودہ مالی سال سمیت دو سال کی ا?مدنی کی ضروریات میں کمی کو پورا کرنے کی کوشش کررہی ہے۔دوسری جانب سوئی سدرن گیس کمپنی لمیٹیڈ نے موجودہ قیمت 591.67 فی یونٹ میں 106.54روپے اضافے کا مطالبہ کیا ہے جس سے فی یونٹ قیمت 698.21 ہو جائے گی۔متعدد پیٹرولیم پالیسیوں کے سبب گیس کی مقامی قیمتیں تیل کی عالمی قیمتیوں سے منسلک ہیں۔وزیر اعظم عمران خان یہ بات کہہ چکے ہیں کہ کمپنیوں کو گیس چوری اور بدانتظامی کی وجہ سے 50ارب ڈالر کے خسارے کا نقصان کا سامنا کرنا پڑ رہا ہے۔گیس کی قیمتیں سال میں دو مرتبہ تبدیل کی جاتی ہیں، پہلی مرتبہ یکم جولائی اور پھر جنوری میں ہوتی ہیں، ملک میں انتخابات اور سیاسی تبدیلی کے سبب قیمتیں یکم جولائی کی جگہ 27ستمبر 2018 کو تبدیل کی گئی تھیں، اس موقع پر 35فیصد اضافہ کیا گیا تھا تاکہ اضافی 116ارب روپے کی آمدنی حاصل کی جا سکے جبکہ ڈومیسٹک صارفین کو 143فیصد تک قیمتوں میں اضافے کا سامنا کرنا پڑا تھا۔

وفاقی کابینہ کا اجلاس گیس صارفین کو اڑھائی ارب روپے واپس کرنے کافیصلہ
اسلام آباد(ایمرا نیوزآن لائن) وفاقی حکومت نے گیس بلوں کی مد میں صافین کواڑھائی ارب واپس کرنے کا فیصلہ کیا ہے ۔وفاقی کابینہ کے اجلاس کے بعد پریس کانفرنس کرتے ہوئے وفاقی وزیر اطلاعات ونشریات فواد چودھری نے بتایا کہ وفاقی کابینہ کے اجلاس میں سب سے پہلے کرائسٹ چرچ حملے کی مذمت کی گئی اور شہدا کے لواحقین سے اظہار تعزیت کرتے ہوئے دعا بھی کی گئی ۔مغرب میں اسلامو فوبیا ہے ، وہاں مسلمانوں کیخلاف نفرت پھیلائی گئی جس کے اب نتائج آرہے ہیں۔ اگر نفرت کی مہم چلائی جائے گی تودنیا پرامن نہیں ہو گی۔انہوں نے بتایا کہ تحقیقاتی کمیٹی کی ابتدائی رپورٹ میں انکشاف ہوا ہے کہ 32 لاکھ صارفین کو گیس کے اضافی بل بھجوائے گئے ، یہ اس سال نہیں ہوا بلکہ 2016 اور 2017 سے اضافی بلز بھجوائے جارہے تھے ۔گیس بلز میں اضافے کی تحقیقات جاری ہیں اور ایسا لگ رہا ہے بڑے بڑے نام سامنے آئیں گے ۔بڑی بڑی کمپنیوں کو گیس کنکشن دینے سے عام صارفین متاثر ہوئے ۔ لگ یوں رہا ہے کہ بڑی کمپنیز کو گیس چوری کرائی گئی اور بل عام صارفین کے کھاتے میں ڈال دیا گیا۔مختلف اداروں کے سربراہان تقرری کا یکساں طریقہ کار وضع کیا جارہا ہے ،اداروں کے سربراہان کی تقرری ابتدائی کمیٹی کا سربراہ وزیر ہوگا،اداروں کے سربراہان کی شارٹ لسٹنگ کیلئے کمیٹی قائم کی جارہی ہے ،پاکستان میں مشکل معاشی حالات ہیں، وزیر اعظم نے وزرا، سیکرٹریز اور محکموں کو اخراجات کم کرنے کی ہدایت کی ہے ۔وزیراعظم نے ہمیشہ سادگی کلچر اپنانے کی بات کی۔ اسلئے انٹرٹینمنٹ اور گفٹ بجٹ ختم کردیا گیا ہے ۔ نیشنل انفارمیشن ٹیکنالوجی بورڈ کی تنظیم نو کا فیصلہ کیا گیا ہے ۔نیشنل انفارمیشن ٹیکنالوجی بورڈ کو خود مختار ادارہ بنایا جارہا ہے ۔احتساب عدالت راولپنڈی نمبر 2 کو اسلام آباد منتقل کرنے کا فیصلہ کیا گیا ہے ۔سرکاری جائیدادوں کی فروخت کیلئے ٹاسک فورس قائم کی گئی ہے ۔کابینہ میں کرتار پورراہداری کا بھی جائزہ لیا گیاہے ۔نوجوت سنگھ سدھو نے خط لکھا تھا کہ جس زمین پر باباگرونانک کاشت کرتے رہے اس پرتعمیر نہیں کی جائے گی،یہ 30ایکڑبنتی ہے اس پر تعمیر نہیں ہوگی۔کرتار پور راہداری سے متعلق مذاکرات کا ایک اور دور ہوگا۔ انہوں نے بتایا کابینہ اجلاس میں جہانگیر ترین بھی شریک ہوئے اور انہوں نے زرعی شعبے میں اصلاحات سے متعلق بریفنگ دی۔ گزشتہ 8 برس میں زراعت پر خرچ میں 60 فیصد کمی ہوئی، آئندہ پانچ سال میں زراعت پر خصوصی توجہ دی جائے گی اور کسانوں کیلئے قرضوں میں اضافہ کیا جائے گا۔ زرعی شعبے میں 18سکیمیں لانچ کی جائیں گی۔290ارب روپے زرعی سیکٹر پر خرچ کیے جائیں گے ۔ خوردنی تیل کا استعمال کم کرنے کیلئے آگاہی مہم شروع کی جائے گی ۔ لائیوسٹاک اور فشریز میں ہم بڑا کام کرنے جارہے ہیں۔ ایف بی آر میں اصلاحات جاری ہیں۔جرنلسٹ پروٹیکشن ایکٹ کا بل سٹینڈنگ کمیٹی کو بھجوا رہے ہیں۔ اب اخبارات ، میڈیا ہاؤسز بغیر لیگل پراسیس صحافیوں کوفارغ نہیں کرسکتے ۔ ملائیشین وزیراعظم کا پاکستان آنا ہمارے لیے اعزاز کی بات ہے ۔ کابینہ نے ملائیشیا کیساتھ ویزا شرائط میں نرمی کی منظوری دیدی ہے ۔جب سے وزیراعظم نے اقتدار سنبھالا غیرملکی سربراہان پاکستان کے دورے پر آ رہے ہیں۔ اسد عمر سے بھائیوں والا تعلق ہے ،تلخ کلامی نہیں ہوئی۔مانیٹرنگ ڈیسک کے مطابق وفاقی کابینہ کا اجلاس5گھنٹے جاری رہا۔اجلاس میں 30نکاتی ایجنڈے کے متعدد نکات کی منظوری دی گئی اور ملکی سیاسی اور سکیورٹی صورتحال کا جائزہ لیا گیا۔مختلف ممالک کیساتھ مفاہمتی یادداشتوں کی بھی منظوری دی گئی۔ اجلاس میں قومی زرعی ایمرجنسی پروگرام کا جائزہ لیا گیا۔صباح نیوز کے مطابق متروکہ وقف املاک کیلئے ٹاسک فورس قائم کر دی گئی۔

اسلام آباد(نیٹ نیوز/ایمرا نیوز) سوئی ناردرن گیس نے کمپریسر استعمال کرنیوالے صارفین کے خلاف کارروائی کا فیصلہ کرلیا ہے جس کے بعد پنجاب بھر میں آپریشن آج سے شروع ہوگا ۔ذرائع سوئی گیس کے مطابق سوئی ناردرن گیس کمپنی نے کمپریسر کے استعمال پر صارف کا گیس کنکشن منقطع کیے جانے کا عندیہ دے دیا ہے۔سوئی گیس ذرائع کا کہنا ہے کہ کمپریسر استعمال کرنے والے صارفین کے خلاف مقدمات بھی درج ہوں گے ۔واضح رہے کہ موسم سرما کی آمد کے ساتھ ہی ملک بھر میں گیس کا بحران شدت اختیار کر گیا ہے اور اس کے سبب گھریلو و صنعتی صارفین شدید اذیت کا شکار ہیں۔