Tag Gujranwala

پاکستان(نیٹ نیوز/ایمرا نیوز) پاکستان میں 2019ء کا پہلا پولیو کیس رپورٹ ہو گیا ہے، لکی مروت کے علاقے بھانہ منجی والا سے تعلق رکھنے والی 16ماہ کی بچی میں پولیو وائرس کی تصدیق ہوگئی۔لکی مروت کے علاقے بھانہ منجی والا کی رہائشی بچی کے والد افضل خان 16 دسمبر کو اسے بیماری کی حالت میں مقامی طبی مرکز لے گیا تھا۔طبی مرکز کے ڈاکٹروں نے بچی میں پولیوکی علامات کی موجودگی کا خدشہ ظاہر کیا اور اس کے سمپل لیبارٹری تجزیہ کے لیے نیشنل انسٹیٹیوٹ آف ہیلتھ اسلام آباد بھجوا دیے تھے۔نیشنل انسٹیٹیوٹ آف ہیلتھ اسلام آباد کی جانب سے بچی میں پولیو وائرس کی تصدیق ہوگئی ہے۔

سوئٹزر لینڈ (نیٹ نیوز/ایمرا نیوز) سوئٹزر لینڈ میں ایک مسلمان نوجوان نے اپنے دوست کے اچانک سامنے آنے پر ”اللہ واکبر“ کے الفاظ ادا کیے تو پولیس نے اس پر تیس ہزار روپے(210سوئس فرانک) جرمانہ عائد کردیا۔غیر ملکی میڈیا کے مطابق بائیس سالہ مسلمان نوجوان آرحان ای سوئٹزر لینڈ کے شہر شف ہاون کا ہی رہنے والا ہے، جہاں اس کی اچانک ملاقات اپنے دوست سے ہوگئی جسے دیکھتے ہی حیرانگی سے انہوں نے نعرہ تکبیر اللہ اکبر بلند کیا،جس پر پولیس نے دہشتگرد انہ حملے کے خوف سے ان پر جرمانہ عائد کردیا۔ یہ واقعہ گزشتہ برس مئی میں پیش آیا۔آرحان کا کہنا تھا کہ وہ اسی شہر میں پیدا ہوا،اسے پہلے کبھی ایسے تجربے کا سامنا نہیں ہوا۔ پولیس نے مسلح ہتھیاروں کے ساتھ ا ن کی تلاشی لی جب انہوں نے اپنے دوست کا سامنا کرنے پر حیرانگی سے ”اللہ اکبر“ کے الفاظ ادا کیے۔انہوں نے کہا کہ اچانک پولیس افسر نے مجھے بلایا اور پوچھا کہ اس اصطلاح یا الفاظ کا مطلب کیاہے جس پر انہوں نے پولیس افسر کو وضاحت سے بتایا کہ اس سے مرادکسی کو نقصان دینا نہیں بلکہ جب کسی سے ملاقات ہوتی ہے تو ا س وقت یہ بولتے ہیں اور تقریباً ہم ہر دوسرے جملے کے ساتھ ان الفاظ کو ادا کرتے ہیں جس پر پولیس حکام نے انہیں دھمکایا کہ اگر انہوں نے جرمانہ ادا نہ کیا تو انہیں جیل بھیج دیں گے، پولیس نے 150 سوئس فرانک کا جرمانہ کیا اور مزید ساٹھ فرانک کے ساتھ210فرانک جمع کرانے کا حکم دیا۔پولیس نے اپنے اقدام کا دفاع کرتے ہوئے کہا کہ ان کے یہ الفاظ لوگوں کو خوفزدہ کرسکتے تھے، پولیس نے ویسا ہی کیا جیسا اس صورت حال میں کیا جاسکتا ہے۔پولیس ترجمان کا کہنا تھا کہ ممکنہ طور پر لوگوں میں خوف وہراس پھیل سکتا تھا، یہی وجہ تھی کہ پولیس افسر کواس صورتحال کا معائنہ کرنا پڑا کیونکہ حالیہ سالوں میں دہشت گرد حملوں میں اس اصطلاح کا استعمال کیا گیا۔ایک اورپولیس افسر کا کہنا تھا کہ اظہار کا یہ انداز ایسا تھا جو جرمانے کا سبب بنا۔

ممبئی(شوبز ڈیسک/ایمرا نیوز) بالی ووڈ اداکار عمران ہاشمی کی نئی آنے والی فلم ’چیٹ انڈیا‘ ریلیز سے قبل مشکلات کا شکار ہوگئی۔تفصیلات کے مطابق عمران ہاشمی کی فلم’چیٹ انڈیا‘کا نام بھارتی سنسر بورڈ کے اعتراض کے بعد ریلیز سے ایک ہفتے قبل تبدیل کردیاگیا۔میڈیا رپورٹس کے مطابق بھارتی سنسر بورڈ کو فلم کے پرانے نام پر اعتراض ہے سنسر بورڈ کمیٹی کا کہنا ہے کہ فلم کا نام ’چیٹ انڈیا‘فلم کے مواد کی غلط انداز میں تشریح کررہاہے۔لہٰذا فلم کا نام ’چیٹ انڈیا‘سے تبدیل کرکے’وہائے چیٹ انڈیا‘کردیاگیاہے۔

اس فیصلے کے بعد ’وائے چیٹ انڈیا‘ ٹائٹل کے ساتھ فلم کا نیا پوسٹر بھی ریلیز کردیا گیا۔عمران ہاشمی نے فلم کا نام تبدیل ہونے کی تصدیق کرتے ہوئے کہا کہ ’شاید نام سے غلط تاثر پیدا ہورہا تھا مگر عوام کو فلم میں وہ تمام مسائل اور خامیاں دکھائیں گے جو ہمارے معاشرے میں پھیلی ہوئی ہیں‘۔فلم میں عمران ہاشمی اپنی پچھلی فلموں سے بالکل مختلف کردار میں نظر آرہے ہیں۔فلم کی کہانی تعلیمی نظام میں موجود نقل مافیا کے گرد گھومتی ہے جس نے تعلیمی نظام کا بیڑہ غرق کردیا ہے۔عمران ہاشمی فلم میں نقل مافیا کے سرگرم کارکن کے طور پر کردار ادا کرتے نظرآئیں گے۔فلم کی کہانی سومک سین نے لکھی ہے جب کہ عمران ہاشمی کی پروڈکشن کمپنی ایلپسس انٹرٹینمنٹ نے فلم کو پروڈیوس کیا ہے۔فلم 18 جنوری کو نمائش کے لیے پیش کی جائے گی۔اس سے قبل اعلان کیا گیا تھا کہ اس فلم کو 25 جنوری کو ریلیز کیا جائے گا، تاہم اس ہی تاریخ کو بھارت کی ہندو انتہا پسند جماعت شیوسینا کے بانی بال ٹھاکرے کی زندگی پر مبنی فلم بھی سامنے آرہی ہے جس کی وجہ سے فلم کی تاریخ تبدیل کی گئی۔یاد رہے کہ چند روز قبل ہندو انتہا پسند جماعت شیوسینا کی دھمکی کے بعد فلم کی ریلیز کی تاریخ تبدیل کی گئی۔

بھارت(نیٹ نیوز/ایمرا نیوز) بھارت کا ایک ’امیر ترین‘ جوڑا جو کہ دنیا کے مختلف ممالک کی سیر کرنے کا خواہش مند ہے اور اس کے لیے پیسے جمع کرنےکے لیے دونوں میاں بیوی چائے کا اسٹال لگاتے ہیں۔’ انڈیا ٹوڈے‘ کی ایک رپورٹ کے مطابق بھارت کےشہر کوچی کے رہائشی 70 سالہ ’ویجاین‘ اور اُن کی اہلیہ کا دنیا کے 23 ممالک گھومنے کا خواب ہے جس کے لیے پیسے جمع کرنے کے لیے انہوں نے چائے کا اسٹال لگانے کا فیصلہ کیا اور یہ کام وہ دونوں تقریباً 55 سال سے کررہے ہیں۔بھارت کے معروف بزنس مین ’آنندمہندرا‘ کو جب اس جوڑے کے بارے میں علم ہوا کہ یہ دونوں دنیا گھومنے کے لیے پیسے جمع کررہے ہیں اور اس کے لیے وہ چائے کا اسٹال لگاتے ہیں تو انہوں نے ٹوئٹ کرتے ہوئے کہا کہ اس جوڑے کا نام فوربز امیر لوگوں کی فہرست میں شامل نہیں ہے لیکن اُن کے خیال میں یہ دونوں بھارت کے امیر ترین افراد کی فہرست میں شامل ہیں اور اُن کی دولت زندگی کا انحصار ہے۔

مقامی میڈیا سے گفتگو کرتے ہوئے ویجاین نے بتایا کہ دنیا کے مختلف ممالک میں گھومنا اُن کے بچپن کا خواب تھا لیکن اس کے لیے ان کے پاس اتنے پیسے نہیں تھے پھر انہوں نے فیصلہ کیا کہ وہ اپنا خواب پورا کرنے کے لیے چائے کا اسٹال لگائیں گے لہذا انہوں نے بھارت کے شہر ’کوچی‘ کی گلیوں پر چائے کی فروخت کا کام شروع کردیا۔ویجاین نے میڈیا سے بات کرتے ہوئےمزید بتایا کہ انہوں نے چائے کا اسٹال لگانے کا کام سال 1963 میں شروع کیا تھا اور دیکھتے ہی دیکھتے ان کی چائے پورے شہر میں مقبول ہوگئی اور اب نا صرف کوچی بلکہ پورے بھارت سے لوگ ان کے اسٹال چائے پینے آتے ہیں۔انہوں نے بتایا کہ وہ ایک دن میں تقریباً 300 سے 350 روپے کما لیتے تھے جس میں سےوہ 300 گھومنے کے لیے جمع کرتےہیں اور باقی رقم سے روز کا خرچہ نکالتے ہیں۔اس کے علاوہ ویجاین نے بتایا کہ وہ اور اُن کی اہلیہ اب تک سنگاپور، ارجنٹینا، پیرو، سوئٹزرلینڈ، برازیل اور دیگر ممالک گھوم چکے ہیں تاہم وہ مزید پیسے جمع کررہے ہیں تاکہ اور دیگر مختلف ممالک کی بھی سیر کے لیے جاسکیں۔

اسلام آباد(نیٹ نیوز/ایمرا نیوز) پنجاب سمیت اسلام آباد میں 14 روز بعد سی این جی اسٹیشنز کھل گئے، جبکہ سی این جی کی قیمت میں 5 روپے فی کلو کمی بھی کی گئی ہے۔ذرائع کے مطابق 28 دسمبر سے بند ایل این جی ٹرمینل کی مرمت کا کام مکمل کرلیا گیا اور دو ہفتے کی بندش کے بعد پنجاب بھر میں سی این جی اسٹیشن کھل گئے جہاں سی این جی کی فروخت جاری ہے۔اس موقع پر چیئرمین آل پاکستان سی این جی ایسوسی ایشن غیاث پراچہ نے صارفین کیلئے سی این جی فی کلو 5 روپے کم کرنے کا اعلان بھی کیا ہے۔دو ہفتوں بعد سی این جی اسٹیشنز کھلتے ہی وہاں گاڑیوں کی لمبی قطاریں لگی ہوئی ہیں۔

اسلام آباد(نیٹ نیوز/ایمرا نیوز) چیف جسٹس پاکستان میاں ثاقب نثار کا کہنا ہے کہ خواہش تھی کہ میرے ہوتے ہوئے گج ڈیم کی تعمیر کا معاملہ حل ہو جاتا، مگر بعض خواہشیں خواہشیں ہی رہ جاتی ہیں۔گج ڈیم کی تعمیر سے متعلق کیس میں سپریم کورٹ نے وزیر توانائی، وزیر خزانہ اور سیکریٹری کابینہ کو منگل کے روز طلب کر لیا۔سپریم کورٹ آف پاکستان میں گج ڈیم کی تعمیر سے متعلق کیس کی سماعت چیف جسٹس پاکستان میاں ثاقب نثار اور جسٹس اعجاز الاحسن پر مشتمل 2 رکنی بنچ نے کی۔ایڈیشنل اٹارنی جنرل نے عدالت کو بتایا کہ سی ڈی ڈبلیو پی کی میٹنگ میں ڈیم کی تعمیرکی سفارش ایکنک کو کر دی گئی ہے۔چیف جسٹس نے کہا کہ اس طرح تو یہ معاملہ ایکنک میں جا کر پھنس جائے گا، خواہش تھی کہ میرے ہوتے ہوئے معاملہ حل ہو جاتا، مگر بعض خواہشیں خواہشیں ہی رہ جاتی ہیں۔جسٹس اعجازالاحسن نے کہا کہ ابھی ایک ہفتہ باقی ہے۔عدالت عظمیٰ نے حکم دیا کہ آئندہ پیر تک سی ڈی ڈبلیو پی کے اجلاس کے منٹس عدالت میں پیش کیے جائیں۔سپریم کورٹ نے وزیر توانائی، وزیر خزانہ اور سیکریٹری کابینہ کو منگل کے روز طلب کر لیا۔

اسلام آباد (نیٹ نیوز/ایمرا نیوز) وزیراعظم عمران خان کی ہمشیرہ علیمہ خان جنہیں پاکستان میں ٹیکس حکام سے متحدہ عرب امارات میں موجود پرتعیش فلیٹ چھپانے پر مقدمہ کا سامنا ہے۔ ان کی امریکا میں بھی جائیداد ہے۔ امریکی پراپرٹی ریکارڈ کے مطابق ریاست نیوجرسی میں تین فلیٹوں پر مشتمل چار منزلہ عمارت کی بھی وہ مالک ہیں۔ انہیں فروخت کرنے میں ناکامی کے بعد مالی سال 2018 میں انہیں ظاہرکیا گیا۔ تاہم انہوں نے اپنی فروخت شدہ جائیدادیں ظاہر نہیں کیں۔ امارات میں اپنا فلیٹ ظاہر نہ کرنے پر انہیں سپریم کورٹ میں مقدمےکا سامنا ہے۔ واضح رہے کہ لندن فلیٹ کی مالک آف شور کمپنی نیازی سروسز کی آفیشل دستاویزات میں علیمہ خان کو کمپنی کی واحد ڈائریکٹر دکھایا گیا ہے ۔ تاہم پاناما پیپرز افشا کے وقت جس کا سلسلہ 2010 سے جاری تھا نیو جرسی امریکا میں جائیداد کاروباری شراکت دار کے ساتھ مشترکہ ملکیت تھی۔ کاروباری شراکت دار نے پراپرٹی فروخت کرنے سے انکار کردیا تھا۔ علیمہ خان امریکا میں اپنی جائیداد فروخت کرنے میں ناکام رہیں جو ظاہر ہوکر اب سامنے آئی ہے۔ یہ پراپرٹی دریائے ہڈسن سے 400میٹرز، مین ہٹن سے 4کلومیٹرز اور وال اسٹریٹ سے 3کلومیٹرز کے فاصلے پر واقع ہے۔ یہ عمارت 2004میں امریکی شہریوں پریبولا ،کیتھ اینڈ سوزن اور ایٹلز سے خریدی گئی جسے 30جون 2017کو ختم ہونے والے مالی سال تک ظاہر نہیں کیا گیا تھا۔ علیمہ خان نے اپریل 2016 میں پاناما پیپرز کے حوالے سے انکشافات کے بعد دی نیوز کی درجنوں ای میلز اور پیغامات کا کوئی جواب نہیں دیا۔ جن میں ان کے امریکا، برطانیہ اور متحدہ عرب امارات میں اثاثوں کے بارے میں استفسار کیا گیا ا ور جواب دینے کے بجائے انہوں نے اپنے اثاثے اور جائیدادیں فروخت کرنے کی کوششیں شروع کردیں۔ تاکہ بظاہر یہ دعویٰ کرسکیں کہ جب میڈیا عدالت میں سوال اٹھایا گیا تو ان کی کوئی ان سے پاکستان میںکوئی جائیداد نہیں تھی۔ ٹیکس حکام کو 30 جون 2017 تک آگاہ نہیں کیا گیا تھا۔ ان کے ٹیکس گوشوارے بتاتے ہیں کہ وہ سالانہ معمولی ٹیکس ادا کرتی رہی ہیں۔ وزیراعظم دفتر کا کہنا ہے کہ یہ نیا پاکستان ہے جس میں وزیراعظم کے اعزاء اور اقرباء اپنے کئے کے خود ذمہ دار ہیں اور حکومت کا اس سے کوئی لینا دینا نہیں ہے۔ سرکاری دستاویزات میں علیمہ خان کو نیازی سروسز لمیٹڈ کا ڈائریکٹر دکھایا گیا جبکہ عمران خان کا کوئی ذکر نہیں ہے۔ امریکا میں علیمہ خان کی جائیداد کا پتہ 154، سکستھ اسٹریٹ، ہوبوکن سٹی، نیو جرسی (این جے 17030-) ہے۔ یہ جائیداد اپنے شراکت دار کے ساتھ علیمہ خان (علیمہ خانم) نے 5اگست 2004کو خریدی۔ دستاویزات میں اس کی قیمت 7لاکھ 58ہزار ڈالرز ظاہر کی گئی ہے جس کے مطابق مذکورہ جائیداد میں 75فیصد ملکیت علیمہ خان اور باقی 25فیصد کا حصہ دار ان کی شراکت دار ہے۔ اس کی موجودہ مارکیٹ قیمت 30لاکھ ڈالرز (تقریباً 45کروڑ روپے ) ہے ۔ بعدازاں اسے رہن رکھ کر علیمہ خان اور ان کے بیٹے شاہ ریز نے قرضے حاصل کئے۔ اس کے لئے شاہ ریز نے اپنی والدہ کے سابق کاروباری شراکت دار کا پاور آف اٹارنی بھی استعمال کیا۔ شاہ ریز علیمہ خان اور سہیل امیر خان کے بڑے بیٹے ہیں ۔ جنوری 2018کے ریکارڈ کے مطابق شاہ ریز نے پراپرٹی کے لئے رابطہ کار کا کردار ادا کیا۔ گوکہ علیمہ خان نے دنیا کے مختلف ممالک میں پرتعیش جائدادیں خریدیں لیکن پاکستان کے اندر اپنے ٹیکس گوشواروں میں کبھی ظاہر نہیں کیا۔ انہوں نے 2011تا 2016بالترتیب 107960، 188000، 140000، 158900، 186620 اور 130794 روپے ٹیکس کی مد میں ادا کئے۔ علیمہ خان نے شوکت خانم کینسر اسپتال اور نمل کے لئے عطیاتی مہم کے سلسلے میں گزشتہ 20 سال کے دوران مختلف ممالک کے دورے کئے ۔ انہوں نے ای میل، واٹس ایپ اور ایس ایم ایس کے ذریعے رابطوں کے لئے متواتر کوششوں کا کوئی جواب نہیں دیا، البتہ ان کے دو بیٹوں، وکیل اور چند قریبی ذرائع سے بات ہوئی۔ علیمہ خان کے چھوٹے بیٹے شیرشاہ خان نے استفسار پر کہا کہ پوچھے گئے سوالات کا صرف ان کی والدہ ہی جواب دے سکتی ہیں۔ تاہم بڑے بیٹے شاہ ریز خان نے بتایا کہ ہوبوکن میں املاک کی موجودہ ملکیت کے بارے میں انہیں کوئی علم نہیں ہے۔ وہ اس نمائدنے کا رابطہ نمبر والدہ کی سابق کاروباری شراکت کار کو دے دیں گے جو جائیداد کی موجودہ صورتحال کے بارے میں بتا سکتی ہیں۔ جب شاہ ریز سے کہا گیا کہ وہ امریکا میں تو اپنی والدہ کے رابطہ کار تھے۔ ان کا موقف تھا کہ علیمہ خان نے دستاویزات کے لئے اس وقت نام دیا ہوگا لیکن اب ان کے پاس بتانے کے لئے کوئی تفصیل نہیں ہے۔ انہوں نے کہا کہ وہ کچھ عرصہ امریکا میں رہے لیکن ایک سال ہوا پاکستان واپس آگئے ہیں۔ علیمہ خان کے وکیل سلمان اکرم راجا نے کہا کہ ان کے موکل کو 30لاکھ روپے جمع کرانے کے لئے کہا گیا جو جرمانہ نہیں بلکہ ریگولرائزیشن فیس ہے۔ استفسار پر وزیراعظم کے خصوصی معاون افتخار درانی نے کہا کہ وزیراعظم اپنے رشتہ داروں کے نجی امور کے ذمہ دار نہیں ہیں۔ علیمہ خان کا نام آف شور کمپنی نیازی سروسز کے رجسٹرڈ ڈائریکٹر کی حیثیت سے بھی دیا گیا ہے۔ یہ کمپنی لندن میں عمران خان کے فلیٹ کی مالک ہے۔ دستاویزات میں اس کا ذکر نہیں ہے۔ تاہم 2001میں سابق صدر جنرل (ر) پرویز مشرف کی جاری کردہ ٹیکس ایمنسٹی اسکیم اور سالانہ گوشواروں میں اس کو ظاہر کیا گیا۔

لاہور:(نیٹ نیوز/ایمرا نیوز) مسلم لیگ (ن) کے تاحیات قائد اور سابق وزیراعظم نوازشریف نے کہا ہےکہ پنجاب کی اہل حکومت کی جگہ نااہل حکومت نے لے لی اور مسلم لیگ (ن) کے ترقیاتی کاموں پر اختلاف کرنے والے آج تعریف کررہے ہیں۔کوٹ لکھپت جیل میں ملاقات کے لیے آنے والے پارٹی رہنماؤں کے وفود سے گفتگو کرتے ہوئے میاں نوازشریف نے کہا کہ شہباز شریف کے ساتھ ناروا سلوک روا رکھا جارہا ہے، انہوں نے پنجاب میں دن رات کام کیا اور صلہ یہ ملا؟ پنجاب میں میٹرو 11 ماہ میں مکمل ہوئی اور کے پی کے میں اب بھی دھول اڑ رہی ہے۔انہوں نے کہا کہ مسلم لیگ (ن) کے ترقیاتی کاموں پر اختلاف کرنے والے آج تعریف کررہے ہیں، پنجاب کی اہل حکومت کی جگہ نااہل حکومت نے لے لی جب کہ کے پی کے کی نااہل حکومت کو دوبارہ اہل قرار دیا گیا۔ایک صحافی نے نوازشریف سے سوال کیا کہ آپ چپ کا روزہ کب توڑیں گے؟سابق وزیراعظم نے جواب دیا کہ کیسے سنے گا میری کہانی میری زبانی۔نوازشریف سے سوال کیا گیا کہ کیا آپ یا مریم نواز مارچ سے عوامی رابطہ مہم شروع کریں گے؟ اس پر انہوں نے کہا کہ یہ جیل سے باہر آنے کے بعد بتاؤں گا۔سابق وزیراعظم نے بتایا کہ جیل کے کمرے ٹھنڈے ہوتے ہیں، ہیٹر دیا گیا ہے وہ بھی اپنے مطابق چلتا ہے۔اس موقع پر جیل حکام نے کہا کہ جیل میں نواز شریف کو ہیٹر دے کر ہم نے مہربانی کی ہے، اس پر نوازشریف نے کہا کہ دیکھ لیں یہ ہیٹر دے کر میرے پر احسان کررہے ہیں۔اس دوران وفد میں شامل مسلم لیگ (ن) کے رہنما احسن اقبال نے اپنے قائد سے مکالمہ کیا کہ آپ کی گرفتاری کے بعد عوام کے پیغام آرہے ہیں، اس پر نوازشریف نے مسکراتے ہوئے تبصرہ کیا کہ کتنی دیر تک جیل میں پیغام آئیں گے۔گفتگو کے دوران ایک وکیل کی آمد ہوئی تو نوازشریف نے انہیں دیکھ کر کہا کہ تاریخوں پر تاریخیں ڈلوانے والے آگئے۔اس موقع پر خواجہ آصف نے سابق وزیراعظم سے سوال کیا کہ جیل میں بجلی نہیں جاتی؟نوازشریف نے جواب دیا کہ خواجہ صاحب، پتہ نہیں کس قسم کی بجلی آتی ہے، ہیٹر گرم نہیں ہوتا۔

بیجنگ:(نیٹ نیوز/ایمرا نیوز) نت نئے آلات اور فون خریدنے کا جنون ایک نوجوان کو عمربھر کے لیے گردے کا مریض بنا کر معذور کرگیا۔ چین سے آنے والی خبر کے مطابق ایک نوجوان نے آئی فون خریدنے کے لیے اپنا گردہ بیچا جس کے کچھ عرصے بعد وہ گردوں کی بیماری میں مبتلا ہوکر ڈائلیسِس کا محتاج ہوکر رہ گیا ہے۔آٹھ سال قبل چینی نوجوان ژیاؤ وینگ کی عمر 17 برس تھی جب آئی فون فور ریلیز ہوا اور اس غریب نوجوان نے اسے خریدنے کے لیے بلیک مارکیٹ میں اپنا گردہ فروخت کیا تھا۔ اس کے بعد سے وہ آٹھ برس سے گردے کے مریض ہوچکے ہیں اور ڈائلیسِس مشین سے اپنا خون صاف کروارہے ہیں۔

2011 میں آئی فون فور کا شہرہ تھا جو اسٹیٹس کی علامت بن چکا تھا۔ تاہم یہ فون اسکول کے ایک غریب طالب علم ژیاؤ وینگ کی پہنچ سے باہر تھا جس کے بعد اس نے گردہ بیچ کر فون خریدنے کا فیصلہ کیا۔ انسانی اعضا کے ایک اسمگلر کے ہاتھوں اس نے 3200 ڈالر میں اپنا صحت مند عضو فروخت کردیا لیکن اس کے بعد اس کی زندگی تباہ ہوکر رہ گئی ۔اسے کہا گیا کہ تھا کہ وہ ایک گردے پر زندہ رہ سکتا ہے لیکن گردہ فروش اسمگلر اسےجہاں لے گئے وہاں کے غیرقانونی آپریشن تھیئٹر میں صفائی کا انتظام نہ تھا اور اس کے زخم میں انفیکشن ہوگیا ۔ وینگ نے یہ خبر گھر والوں کو نہیں دی تھی اور یہ ہوا کہ آخر کار اس کی خراب صحت سب کے سامنے عیاں ہوگئی۔انفیکشن پھیل کر اس کے دوسرے گردے کو متاثر کرگیا اور وہ مستقل ڈائلائسِس کا محتاج ہوچکا ہے۔ لیکن کمزوری کی وجہ سے وہ بستر سے اٹھ بھی نہیں سکتا اور بہت مشکل سے دوچار ہے۔ تاہم اس کے والدین نے گردے فروخت کرنے میں معاون مڈل مین کو تلاش کرکے اس پر مقدمہ کردیا جس نے 3 لاکھ 20 ہزار ڈالر ہرجانے کے طور پر دیئے جو اب اس نوجوان کے علاج پر خرچ ہورہے ہیں۔چینی سوشل میڈیا پر یہ خبر آنے کے بعد لوگوں نے زیادہ تر اس نوجوان کو قصور وار ٹھہرایا ہے ۔ ان کا کہنا ہے کہ انسانی اعضا برقی مصنوعات سے زیادہ اہم ہوتے ہیں جن کی قدر کی جانی چاہیے۔

کراچی:(سپورٹس ڈیسک/ایمرا نیوز) پاکستان کرکٹ بورڈ کے چیئرمین احسان مانی نے کرکٹ کمیٹی کے سربراہ محسن خان کو لاہور طلب کرلیا ہے۔پاکستان کرکٹ بورڈ کے چیئرمین احسان مانی اور کرکٹ کمیٹی کے سربراہ محسن خان کے درمیان جمعے کو لاہور میں ہونے والی ملاقات میں پاکستان ٹیم کی دورہ جنوبی افریقا میں کارکردگی،ڈومیسٹک کرکٹ اور دیگر اہم معاملات پر تبادلہ خیال کیا جائے گا۔واضح رہے کہ قومی ٹیم کی ناقص کارکردگی کے سبب ان دنوں بورڈ پر خاصا دباؤ ہے،البتہ فوری طور پر کسی بڑے فیصلے کا امکان نہیں ہے، محسن خان نے تصدیق کی کہ جمعے کو چیئرمین بورڈ سے ملاقات ہو گی البتہ یہ بتانے سے گریز کیا کہ اس دوران کیا بات ہونی ہے۔