Tag heavy rain

ملبورن(ایمرا نیوز آن لائن) آسٹریلیا میں حالیہ عرصے کے دوران سخت ترین موسم چل رہا ہے، کچھ ریاستوں میں خشک سالی ہے جبکہ ’بش فائر‘ کی وجہ سے لاکھوں افراد نقل مکانی کرگئے ہیں، مالی نقصان کے ساتھ جانی نقصان بھی برداشت کرنا پڑا ہے،تاہم ایک اور حیران کن خبر نے سب کو پریشان کر ڈالا ہے، کینبرا میں طوفانی بارش کے ساتھ ’گالف‘ جتنے اولے پڑے ہیں جن سے گاڑیوں کے شیشے ٹوٹ گئے۔
غیر ملکی خبر رساں ادارے کے مطابق آسٹریلوی دارالحکومت کے شہریوں کو غیر معمولی صورت حال سے دوچار ہونا پڑا جب طوفانی بارش کے ساتھ آسمان سے گالف کی گیند جتنے بڑے اولے گرے۔ کئی مقامات پر معمولات زندگی میں مصروف شہریوں نے خوفزدہ ہو کر گاڑیوں سے نکل کر شیڈز کے نیچے پناہ لی۔
خبر رساں ادارے رائٹرز کے مطابق آسٹریلوی ساحلی علاقے میں تیز ہواؤں کے ساتھ طوفانی ہوائیں چل رہی ہیں اور سڈنی میں بھی شدید بارش اور بھاری اولے گرنے کی پیش گوئی کی گئی ہے۔
آسٹریلوی محکمہ موسمیات کے مطابق ملک کے جنوب مشرقی ساحلی علاقے تیز ہوا کے ساتھ سمندری طوفان سے متاثر ہو سکتے ہیں۔ شہریوں کو ساحل پر احتیاطی تدابیر اختیار کرنے کے لیے کہا گیا ہے۔
آسٹریلوی خبر رساں اداروں کی جاری کردہ ویڈیوز اور تصاویر میں دکھایا گیا ہے کہ گالف کی گیند جتنے حجم کے اولے آسٹریلوی پارلیمنٹ کی عمارت کو ڈھانپے ہوئے ہیں اور گھروں و گاڑیوں کے شیشے ٹوٹے ہوئے ہیں۔ ویڈیوز میں لوگوں کو طوفانی بارش اور بھاری اولوں سے بچنے کے لیے بھاگتے ہوئے بھی دیکھا جا رہا ہے۔
محکمہ موسمیات کے مطابق دارالحکومت کینبرا میں خوف پھیلانے کے بعد طوفانی بارش اور اولے دیگر شہروں کا رخ کر رہے ہیں اور برسبین شہر میں بھی تیز بارش کا امکان ہے۔
یاد رہے کہ آسٹریلیا ان دنوں آگ کی وجہ سے بھی خبروں میں ہے جہاں ریاست وکٹوریا کے جنگلات میں لگنے والی آگ نے لاکھوں ایکڑ کو جلا کر راکھ کر دیا ہے۔ آگ سے ریسکیو کارکنوں سمیت 25 سے زائد افراد ہلاک ہوئے جبکہ ایک اندازے کے مطابق کروڑوں جنگلی جانور بھی ہلاک ہو گئے ہیں۔

الاکوٹ: (ایمرا نیوزآن لائن) بالا کوٹ میں شدید بارش سے 10 دکانیں اور ہوٹل تباہ ہوگئے، کوئی جانی نقصان نہیں ہوا۔ملک کے بالائی علاقوں میں طوفانی بارش سے نقصانات ہوئے، بالا کوٹ میں 10 دکانیں اور ہوٹل تباہ ہوگئے، پلدراں کے مقام پر لاکھوں کی املاک تباہ ہوئی تاہم کوئی جانی نقصان نہیں ہوا۔ادھر لاہور میں بادل برسنے کے بعد دھوپ نکل آئی، گرمی بھی پہلے کی نسبت کم ہوگئی۔ اسلام آباد اور راولپنڈی میں بھی تیز بارش نے نظام زندگی درہم برہم کر دیا۔

آندھی سے درخت اور سائن بورڈ گرگئے۔ سرگودھا، چشتیاں سمیت پنجاب کے مختلف علاقوں بھی موسلا دھار بارش سے موسم خوشگوار ہوگیا۔بھکر میں آندھی اور بارش سے گندم اور چنے کی فصل کو نقصان پہنچا۔ کراچی میں آج درجہ حرارت 34 سے 36 ڈگری سینٹی گریڈ کے درمیان رہے گا۔ سندھ کے میدانی علاقے شدید گرمی کی لپیٹ میں رہیں گے۔ محکمہ موسمیات کا کہنا ہے کہ ملک کے بیشتر علاقوں میں آج موسم گرم اور خشک رہیگا، مالاکنڈ ڈویژن، گلگت بلتستان، کشمیر اور اس کے ملحقہ پہاڑی علاقوں میں تیز بارش کا امکان ہے۔

ملتان(ایمرا نیوزآن لائن) ملتان کے نواحی علاقوں میں 15 منٹ کی ژالہ باری نے تباہی مچاتے ہوئے ہزاروں ایکڑ پر کھڑی تیار فصلیں تباہ کردیں۔ملتان کے نواحی علاقوں میں تیز بارش اور صرف 15 منٹ کی ژالہ باری سے ہزاروں کاشت کار متاثر ہوگئے ہیں۔ژالہ باری سے سبزیاں، چارے، مکئی اور گندم کی فصلیں اجڑ گئیں جس کے باعث کاشت کاروں نے حکومت سے مطالبہ کیا ہے کہ متاثرہ علاقوں کے لیے امدادی پیکیج کا اعلان کیا جائے۔ادھر راجن پور کے مقام کوہِ سلیمان پر بھی بارشوں اور سیلاب نے تباہی مچا رکھی ہے جس سے سیکڑوں گھر اور ہزاروں ایکڑ پر تیار گندم کی فصلیں تباہ ہوگئیں۔فلڈ کنٹرول روم کے مطابق کاہا سلطان کے سیلابی ریلے نے راجن پور میں تباہی مچا دی کوہ سلیمان کے برساتی ندی نالوں میں طغیانی آگئی ہے۔اس حوالے سے وزیراعظم کے ترجمان ندیم افضل چن کا کہنا ہے کہ وزیراعظم عمران خان فصلوں کے نقصانات سے آگاہ ہیں، حکومت اور متعلقہ ادارے ہر ممکن کردار ادا کریں گے۔وزیر خوراک پنجاب سمیع اللہ چوہدری نے فصلوں کو پہنچنے والے نقصان کا جائزہ لینے کے لیے لاہور، قصور، ملتان اور بہاولپور کے اضلاع کا دورہ کیا ہے۔وزیر زراعت پنجاب نعمان لنگڑیال کا کہنا ہے کہ 35 ہزار ایکڑ اراضی پر گندم اور مکئی کی فصل کو نقصان پہنچا ہے، متاثرہ کسانوں کے نقصان کا ازالہ کیا جائے گا جب کہ وزیر اعلیٰ پنجاب نے کل کابینہ کا اجلاس بھی طلب کرلیا ہے۔دوسری جانب پیپلز پارٹی کے رہنما چودھری منظور کا کسانوں سے ہمدردی کا اظہار اور حکومت پر تنقید کرتے ہوئے کہنا تھا کہ کسانوں پر قیامت ٹوٹ پڑی ہے، حکومتی اہل کاروں میں اتنی جرات نہیں کہ متاثرہ علاقوں میں جاکر کسانوں کی ڈھارس بندھائیں۔انہوں نے مزید کہا کہ یہی حکومت رہی تو وہ وقت دور نہیں جب فاقہ کش کسان اور ورکرز سڑکوں پر ہوں گے، حکومت کو چاہیے کہ وہ موجودہ صورت حال میں کسانوں کو ریلیف دے ۔

کراچی(ایمرا نیوزآن لائن) کراچی کے مختلف علاقوں میں کہیں ہلکی، کہیں تیز بارش اور بوندا باندی کا سلسلہ شروع ہو گیا ہے۔جن علاقوں میں بارش اور بوندا باندی ہو رہی ہے ان میں نارتھ کراچی، سرجانی ٹاؤن، اورنگی ٹاؤن، صدر، برنس روڈ، آئی آئی چندریگر روڈ شامل ہیں۔محکمہ موسمیات نے پہلے ہی کراچی میں آج سے بارش ہونے کی پیش گوئی کی تھی، گزشتہ شب سے شہر میں گرد آلود ہوائیں چل رہی ہیں۔محکمہ موسمیات کے ڈائریکٹر سردار سرفراز کا کہنا ہے کہ کل رات اور صبح سویرے بھی گرج چمک کے ساتھ معتدل بارش کا امکان ہے۔انہوں نے بتایا کہ کل رات گردوغبارکاطوفان توقع سےزیادہ تھا،اس طوفان کے دوران حدِ نگاہ 500 میٹر ریکارڈ کی گئی۔ڈائریکٹر محکمہ موسمیات کامزید کہنا ہے کہ مغربی ہواؤں کا سسٹم شہر میں موجود ہے، جس کے باعث کراچی میں آج ہلکی بارش کا امکان ہے۔انہوں نے مزید بتایا کہ آج بھی شہر قائد میں ہواؤں کی رفتار زائد رہے گی، طوفان کے دوران ہوائیں 65 کلومیٹر فی گھنٹہ کی رفتار سے چلیں گی۔ڈائریکٹر محکمہ موسمیات سردار سرفراز کا یہ بھی کہنا ہےکہ کل شام تک مغربی ہواؤں کا سسٹم شہر سے نکل جائے گا۔

ریاض(ایمرا نیوزآن لائن) ریاض سمیت سعودی عرب کے مختلف شہروں میں طوفانی بارش اورژالہ باری سے نظام زندگی درہم برہم ہوگیا ۔گرج چمک کےساتھ بارش اور ژالہ باری کےبعد کئی شاہراہیں ٹریفک کیلئے بند کردی گئیں جبکہ گاڑیوں کی لمبی قطاریں لگ گئیں ۔بارشوں کےباعث نشیبی علاقوں میں بڑی تعداد میں پانی جمع ہوگیا۔محکمہ شہری دفاع اور ٹریفک پولیس کاعملہ حرکت میں آگیا۔

کابل(ایمرا نیوز آن لائن) افغانستان میں طوفانی بارشوں اور سیلاب کے باعث آٹھ افراد ہلاک جبکہ متعدد لاپتہ ہو گئے ۔ غیر ملکی خبررساں ادارے کے مطابق حکام نے بتایا کہ صوبہ ہرات کے ضلع کاراخ میں پانچ افراد سیلابی ریلوں کی نذر ہو گئے ۔ مذکورہ ضلع میں سترہ افراد لاپتہ ہیں ۔ صوبہ پغلان کے ضلع دریح صالح میں تین افراد سیلابی پانی میں بہہ کر ہلاک جبکہ چھ زخمی ہو گئے ۔ سیلاب کے باعث سینکڑوں گھر اور ہزاروں ایکڑ زرعی اراضی بھی تباہ ہو گئی ۔ ریسکیو عملہ لاپتہ افراد کی تلاش جاری رکھے ہوئے ہے ۔( جاوید)

فوج اور سیکورٹی فورسز کے اہل کار امدادی کارروائیوں میں مصروف،حکام کا ہلاکتوں میں اضافے کا خدشہ
کھٹمنڈو (ایمرا نیوز آن لائن) نیپال میں شدید بارشوں، طوفانی ہواوں اور سیلاب سے ہلاک افراد کی تعداد 35ہو گئی جبکہ تقریبا 600سے زائد زخمی ہیں،متاثرہ علاقوں میں عارضی شیلٹرز ہوم بنا دئیے گئے ، فوج اور سیکورٹی فورسز کے اہل کار امدادی کارروائیوں میں مصروف ہیں،حکام کی جانب سے ہلاکتوں میں اضافے اور مزید بارشوں خدشہ ظاہر کیا گیاہے۔غیرملکی خبر رساں ادارے کے مطابق نیپال کے جنوبی علاقوں میں گرج چمک کےساتھ طوفانی ہواوں اور موسلا دھار بارش نے تباہی مچا دی، طوفانی ہواوں سے سیکڑوں مکانات تباہ ہوئے، سیکڑوں درخت اور بجلی کے کھمبے گر گئے، درخت اور بجلی کے کھمبے گرنے سے متعدد گاڑیوں کو نقصان پہنچا جبکہ مختلف حادثات میں35 افراد ہلاک ہو چکے ۔#