Tag in

گوجرانوالہ(ایمرا نیوزآن لائن) پنجاب کے شہر گوجرانوالہ میں مٹھائی کی دکان میں آگ لگ گئی، جس نے ساتھ والی دکان کو بھی اپنی لپیٹ میں لے لیا۔ریسکیو ذرائع کے مطابق گوجرانوالہ کےعلاقے شاہین آباد میں واقع مٹھائی کی دکان میں اچانک آگ بھڑک اٹھی، جس نے کچھ ہی دیرمیں ایک اور دکان کو بھی اپنی لپیٹ میں لے لیا۔آگ مزید پھیلنے کے خدشے کے پیشِ نظر ریسکیو حکام نے قریبی گھروں کو خالی کروا لیا تھا۔

آگ لگنے کی اطلاع ملتے ہی فائر بریگیڈ اور ریسکیو کا عملہ آگ لگنے کے مقام پر پہنچ گیا، جس نے آگ بجھانے کی کارروائی میں حصہ لیا، فائر بریگیڈ کی 5 گاڑیوں نے کافی جدوجہد کے بعد آگ پر قابو پایا۔ریسکیو حکام کے مطابق آگ دکان میں موجود ایل پی جی سلنڈر پھٹنے کے باعث لگی، جس سے صرف عمارت کو نقصان پہنچا، کوئی جانی نقصان نہیں ہوا۔

لاہور(ایمرا نیوزآن لائن) اپوزیشن لیڈر قومی اسمبلی شہباز شریف بیرون ملک ہونے کے باعث آج نیب لاہور میں پیش نہیں ہوں گے۔ نیب نے اپوزیشن لیڈرکو لاہور ویسٹ مینجمنٹ کمپنی کی تحقیقات کے لیے طلب کر رکھا ہے۔نیب کی جانب سےشہباز شریف کو لاہور ویسٹ مینجمنٹ کمپنی کے حوالے سے 7سوالات پر مشتمل سمن جاری کیا گیا تھا۔

جن میں کمپنی کے قیام کی سمری فنانس اور محکمہ قانون کی رائے لیے بغیر منظور کیے جانے سمیت دیگر سوالات شامل ہیں۔شہباز شریف کو ان سوالات کے جوابات کےساتھ آج سہ پہر 3 بجے نیب لاہور میں پیش ہونےکی ہدایت کی گئی تھی۔ن لیگی رہنما کے سیکرٹری عطا تارڑکےمطابق شہباز شریف بیرون ملک ہونے کے باعث آج نیب کے سامنے پیش نہیں ہوں گے۔

لاہور(ایمرا نیوزآن لائن) سُپر ہیروز فلم ’ایونجرز اینڈ گیم‘ نے امریکی باکس آفس پر قبضہ جمالیا، مسلسل تیسرے ہفتے بھی پہلی پوزیشن برقرار جبکہ پوکیمون کی نئی فلم ’پکاچو‘ دوسرے نمبر پر اور ’دی ہسل‘ تیسرے نمبر پر رہی۔سُپر ہیروز فلم ’ایونجرز اینڈ گیم‘ نے ویک اینڈ کے تین دنوں میں 8 ارب 93 کروڑ روپے سے زائد کمائی کرلی، مجموعی طور پر فلم نے صرف امریکا میں ایک کھرب دو ارب چھیالیس کروڑ روپے سے زیادہ کا بزنس کرلیا۔

دنیا بھر میں تین کھرب چون ارب باسٹھ کروڑ روپے سے زیادہ آمدنی کر کے تاریخ رقم کردی۔ ’ ایونجرز اینڈ گیم‘ دنیا میں سب سے زیادہ کمائی کرنے والی فلم ’اواتار‘ کا ریکارڈ توڑنے کے در پہ پہنچ گئی، جس نے دنیا بھر سے تین کھرب پچانوے ارب تیرہ کروڑ روپے سمیٹے تھے۔

اس ہفتے ریلیز ہونے والی ایک اور سُپر ہیرو پوکیمون سلسلے کی فلم ’پوکیمون: ڈیٹیکٹیو پکاچو‘ نے بھی شاندار اوپننگ بزنس کیا ہے، صرف تین دنوں میں آٹھ ارب اکیس کروڑ روپے بٹور کر یہ دلچسپ فلم دوسرے نمبر پر آگئی ہے۔اسی ہفتے ریلیز ہونے والی فلم ’دی ہسل‘ ایک ارب اکانوے کروڑ سے زیادہ کا بزنس کر کے تیسرے نمبر پر رہی۔

لاہور(ایمرا نیوزآن لائن) انگلینڈ کے خلاف دوسرے ون ڈے میں پاکستان نے ٹاس جیت کر فیلڈنگ کا فیصلہ ہے۔ساؤتھمپٹن میں کھیلے جا رہے میچ میں قومی ٹیم کے کپتان سرفراز احمد نے ٹاس جیت کر انگلینڈ کو پہلے بیٹنگ کی دعوت دی۔سرفراز احمد نے کہا کہ جلدی وکٹ لیکر انگلینڈ پر پریشر ڈالنے کی کوشش کریں گے۔ان کا کہنا تھا کہ قومی ٹیم میں محمد عامر کی جگہ یاسر شاہ کو موقع دیا گیا ہے۔یاد رہے کہ انگلینڈ کےدورے کے دوران گرین شرٹس کو واحد ٹی20 میں شکست ہوچکی ہے جبکہ پہلا ون ڈے بارش کی وجہ سے منسوخ کردیا گیا تھا۔

برازیل(ایمرا نیوزآن لائن) برازیل میں جاری بیچ ریسلنگ ورلڈ سیریز میں پاکستان کے انعام بٹ نے شاندار آغاز کرتے ہوئے پہلے روز دونوں فائٹس جیت لی۔برازیل کے شہر ریو ڈی جنیرو میں بیچ ریسلنگ ورلڈ سیریز میں پاکستان کے انعام بٹ نے پہلے روز دو فائٹس کی اور دونوں میں کامیابی حاصل کی۔پہلے راؤنڈ میں انعام بٹ نے ترکی کے ریسلر کو چت کیا جبکہ دوسرے راؤنڈ میں انہوں نے آزربائیجان کے پہلوان کو مات دی۔کامن ویلتھ گیمز کے گولڈ میڈلسٹ پاکستانی ریسلرز آج بیچ ریسلنگ ورلڈ سیریز میں میزبان ملک کے ریسلر سے مقابلہ کریں گے، سیمی فائنل فائٹ بھی آج ہی ہوگی ۔قومی ریسلر انعام بٹ مقابلوں میں گولڈ میڈل حاصل کرنے کیلئے پرعزم ہیں۔

لندن: (ایمرا نیوزآن لائن) چراغ سے جن نکلنے کی کہانی اب بڑی سکرین پر، لندن میں ہالی وڈ فلم “الہ دین ” کا رنگا رنگ پریمئیر ہوا۔ ول اسمتھ سمیت فلم کی تمام کاسٹ شریک ہوئی۔لندن میں ہالی وڈ فلم الہ دین کا بلیو کارپٹ پریمئیر ہوا، الہ دین، شہزادی جیسمین سمیت فلم کی کاسٹ نے جادوئی قالین پر واک کی۔ چراغ کے جن کا کردار نبھانے والے اداکار ول سمتھ بھی مرکز نگاہ رہے۔فلم الہ دین کی کہانی ایک نوجوان لڑکے کے گرد گھومتی ہے جسے جادوئی چراغ ملتا ہے۔ فینٹسی فلم چوبیس مئی کو امریکی سینما گھروں کی زینت بنے گی۔

نئی دہلی(ایمرا نیوزآن لائن) بھارت کے دارلحکومت نئی دہلی میں اپنے طرز کی منفرد سپر ہیرو ٹیکسی متعارف کروائی گئی ہے جس کو مختلف قسم کے کرتب کرتے ہیروز سے سجایا گیا ہے۔بھارتی ویب سائٹ ہندوستان ٹائمز کے مطابق اس منفرد ٹیکسی کو پرتھ ورما نامی ڈرائیور چلاتے ہیں جو ٹیکسی چلانے کے ساتھ ساتھ اپنی ٹیکسی میں سوار سواریوں کو مختلف چاکلیٹس، پرفیومز اور دیگر اشیاء بھی پیش کرتے ہیں۔غیر ملکی ویب سائٹ سے بات کرتے ہوئے پرتھ ورما نے اپنی تعلیم کے بارے میں بتایا کہ انہو ں نے فنانس اور بزنس مینجمنٹ میں پوسٹ گریجویٹ کے ساتھ ساتھ کاسٹ اینڈ مینجمنٹ اکاؤنٹینسی کی ڈگری بھی حاصل کر رکھی ہے جبکہ ٹیکسی چلانے کا کام وہ شوقیہ کرتے ہیں اور یہ شوق اُن میں ہالی ووڈ فلمیں دیکھنے سے پیدا ہوا ہے۔

اپنے پیشہ ورانہ تجربے کے بارے میں بات کرتے ہوئے پرتھ ورما نے بتایا کہ وہ گزشتہ ڈھائی سال سے ایک معروف ٹیکسی کمپنی کے ساتھ منسلک تھے، اس سے قبل وہ مختلف کمپنیوں میں بھی ملازمت کرچکے ہیں۔پرتھ ورما نے اپنے بارے میں بتایا کہ اُن کا تعلق بھارت کے شہر لکھنو سے ہے لیکن وہ بھارتی علاقے نوئیڈا میں رہائش پذیر ہیں۔اپنی ٹیکسی کے حوالے سے بات کرتے ہوئے پرتھ ورما نے بتایا کہ میری کار مختلف کرتب کرتے ہیروز کی وجہ سے منفرد ہے جو انہوں نے خود جمع کئے ہیں۔

انہوں نے بتایا کہ ایسی ٹیکسی چلانے پر شروع میں گھر والوں کی خصوصاً والد صاحب کی جانب سے منفی رد عمل دیکھنے کو ملا تاہم بعد ازاں انہوں نے اپنے والد کو منا لیا۔ پرتھ کا مزید کہنا تھا کہ اُن میں یہ شوق اپنے مشغلے ہالی ووڈ فلمیں دیکھنے کی وجہ سے پیدا ہوا تھا۔پرتھ ورما کا کہنا تھا کہ مجھے خوشی ہے کہ میں نے اپنے شوق کو اپنی ملازمت بنایا۔ اُنہوں نے کہا کہ میری ٹیکسی میں سفر کر کے میری تمام سواریاں بے حد لطف اندوز ہوتی ہیں۔انہوں نے کہا کہ عام طور پر لوگ بہت زیادہ ذہنی الجھنوں کا شکار ہوتے ہیں لیکن میری ٹیکسی میں سفر کرنے کے بعد لوگ اپنی پریشانیاں بھول جاتے ہیں اور ایک بچے کی مانند میری ٹیکسی میں موجود مختلف کرتب کرتے ہیروز کو دیکھ کر خو ش ہوتے ہیں۔

فیصل آباد: (ایمرا نیوزآن لائن) رمضان المبارک میں چینی کی طلب میں اضافے کے ساتھ ہی ذخیرہ اندوز سرگرم ہو گئے، فیصل آباد کی اوپن مارکیٹ میں چینی ایک ہفتے میں 18 روپے مہنگی کر دی گئی، شہری بلیک میں چینی خریدنے پر مجبور ہو گئے۔ دوسری جانب گوجرانوالہ میں بھی منافع خوروں نے عوام کا خون چوسنا شروع کردیا۔ رمضان المبارک میں پھلوں، سبزیوں اور دیگر اشیاء خورونوش کی قیمتیں دگنی کر دی گئیں۔رمضان المبارک میں زخیرہ اندوز بھی سرگرم ہونے لگے، چینی کی طلب میں اضافے کے ساتھ ہی اوپن مارکیٹ میں چینی کی مصنوعی قلت پیدا کر دی گئی۔ رواں مہینے کے دوران چینی 52 روپے کلو سے 70 روپے کلو تک پہنچ گئی، شہری کہتے ہیں اوپن مارکیٹ میں چینی بلیک میں خریدنے پر مجبور ہیں۔

چینی کی قلت کا جزوی طور پر بحران پیدا کرکے ذخیرہ اندوز کئی گنا زیادہ منافع کما رہے ہیں، ڈپٹی کمشنر سردار سیف اللہ ڈوگر کہتے ہیں ذخیرہ اندوزوں کے خلاف کاروائی جاری ہے۔ذرائع نے دعوی کیا ہے کہ ذخیرہ اندوزوں کی جانب سے آنے والے دنوں میں چینی کی مزید قلت کا بحران پیدا کرکے قیمتیں مزید بڑھا دی جائیں گی۔دوسری جانب گوجرانوالہ میں بھی ماہ رمضان کی آمد کے ساتھ ہی منافع خور سرگرم ہو گئے۔ پھل، سبزیاں اور دیگراشیائے خورونوش کی قیمتیں آسمان سے باتیں کرنے لگی ہیں۔

رمضان کی آمد سے قبل فی درجن 120روپے والے کیلے 200 روپے درجن کر دئیے گئے۔ 280 روپے کلو بکنے والے سیب اب 360 روپے کلو ہو چکے ہیں جبکہ سبزیوں میں ٹماٹر 80 روپے، پیاز 70 روپے، آلو چالیس روپے، لہسن 240 روپے فی کلو کے حساب سے فروخت ہو رہا ہے۔مہنگائی کے سونامی نے غریب عوام کے لیے سحر و افطار کا انتظام کرنا مشکل بنا دیا ہے جس پر ڈپٹی کمشنر کی جانب سے منافع خوروں کے خلاف مقدمات درج کرنے کا اعلان کیا گیا ہے۔ شہریوں کا کہنا ہے کہ وہ قیمتوں میں روز بروز اضافہ سے پریشان ہیں۔ پرائس کنٹرول مجسٹریٹس کو منافع خوروں کے خلاف سخت سے سخت کارروائی کرنی چاہیے۔

لندن: (ایمرا نیوزآن لائن) پاکستان اور انگلینڈ کی ٹیمیں لندن سے ساؤتھمپٹن پہنچ گئیں، شاہین آج پریکٹس سیشن میں خوب پسینہ بہائیں گے، پانچ میچز کی سیریز کا دوسرا ون ڈے کل کھیلا جائے گا۔ورلڈ کپ کی تیاری، انگلش سرزمین پر پاک انگلینڈ ون ڈے سیریزجاری ہے۔ لندن میں اوول کا میدان بارش کے نام رہا۔ کل (ہفتے کو) دوسرا ون ڈے ساؤتھمپٹن میں سہ پہر تین بجے شیڈول ہے۔شاہین آج پریکٹس کے دوران بولنگ، بیٹنگ اور فیلڈنگ کی خامیوں پر قابو پانے کی کوشش کریں گے۔ انگلش ٹیم بھی مہمان سائیڈ سے دودو ہاتھ کرنے کو تیار ہے۔گرین شرٹس نے اوول ون ڈے کی حتمی الیون برقرار رکھنے کا فیصلہ کیا ہے، ساؤتھمپٹن میں دونوں ٹیمیں تین بار آمنے سامنے ہوئیں۔ دو میں انگلینڈ اور ایک میچ میں پاکستان فاتح رہا۔

لاڑکانہ: (ایمرا نیوزآن لائن) رتو ڈیرو میں ایچ آئی وی متاثرہ افرد کی تعداد 287 ہوگئی جس میں 220 بچے بھی شامل ہیں، سندھ ایڈز کنٹرول پروگرام نے تصدیق کر دی۔رتو ڈیرو کے گرد و نواح میں ایچ آئی وی پھیلنے کے بعد لگائے جانے والے اسکریننگ کیمپ میں عوام کی اسکریننگ کا عمل تاحال جاری ہے، انچارج سندھ ایڈز کنٹرول پروگرام ڈاکٹر سکندر میمن کے مطابق اب تک 6200 افراد کی اسکریننگ مکمل ہوئی ہے جس میں سے 287 افراد میں ایچ آئی وی کی تشخیص ہو گئی، جن میں 220 بچے اور 67 بڑے شامل ہیں، جس کے بعد 82 متاثرہ بچوں کے علاج کا آغاز کر دیا گیا۔

ڈاکٹر سکندر میمن کے مطابق اسکریننگ کا عمل تاحال جاری ہے، ایک سوال کے جواب میں ڈاکٹر سکندر میمن نے بتایا کے ایڈز پھیلانے کے الزام میں گرفتار ڈاکٹر مظفر بضد ہیں کہ ان کا ایچ آئی وی ٹیسٹ نہ ہو جبکہ قانون بھی کہتا ہے کہ اگر کوئی ٹیسٹ نہ کروانا چاہے تو اسے مجبور نہیں کیا جاسکتا تاہم ابھی تک کسی اتھارٹی نے ہمیں ڈاکٹر مظفر کا ٹیسٹ کرنے کے لیے نہیں کہا، جب کوئی کہے گا تو دیکھیں گے کہ قانون کیا کہتا ہے۔