Tag india media

(ایمرا نیوزآن لائن) وزیر ریلوے شیخ رشید نے اپوزیشن کو آڑے ہاتھوں لیتے ہوئے الزام عائد کیا ہے کہ منتخب حکومت کو گرانے کے لیے غیر جمہوری اور غیر پارلیمانی زبان استعمال ہو رہی ہے۔

راولپنڈی ریلوے اسٹیشن پر میڈیا سے بات کرتے ہوئے شیخ رشید کا کہنا تھا کہ آصف زرداری کی ضمانت ہوئی جو اچھی بات ہے، نیب کی ریکوری آ رہی ہے جو اچھی چیز ہے، اب ملک بہتری کی طرف جائے گا۔ شیخ رشید کا کہنا تھا حکومت نے معیشت کومستحکم کردیا ہے، تین ماہ میں مہنگائی میں بھی کمی آئے گی، بجلی گیس کے بل ٹھیک ہو جائیں گے۔

ریلوے کے حوالے سے بات کرتے ہوئے وفاقی وزیر نے ایک بار پھر 3 سال میں ریلوے کا خسارہ ختم کرنے کا دعویٰ کرتے ہوئے کہا کہ فری ٹریڈ پالیسی لا رہے ہیں اور 12 سے 15 فریٹ ٹرینیں چلا رہے ہیں۔ مارچ تک 5 کیسز میں پلی بارگین آجائے گی، بلاول بچپن سے ان پانچ کیسز میں ڈائریکٹر ہیں، پلی بارگین نہ ہوئی تو بلاول کا سیاسی مستقل ختم ہو جائے گا، شیخ رشید

شیخ رشید نے کہا کہ سرگودھا ڈویژن سے بھی آج ٹرین چلا رہے ہیں اور رائیونڈ اسٹیشن سے بھی ٹرین چلائیں گے۔ ان کا کہنا تھا ریلوے کے گریڈ ایک سے گریڈ 6 تک کے ملازمین کی مراعات کے لیے وزیراعظم سے بات کروں گا۔ گزشتہ روز اسلامک یونیورسٹی میں دو طلبہ تنظیموں کے درمیان ہونے والے تصام کے حوالے سے بات کرتے ہوئے شیخ رشید کا کہنا تھا اسلام آباد میں طلبہ تنظیموں کے درمیان تصادم کا واقعہ افسوسناک ہے۔

بھارت میں شہریت سے متعلق متنازع بل پر بات کرتے ہوئے وزیر ریلوے نے کہا کہ کشمیر کے علاوہ پورے بھارت میں مسلمانوں کے گردگھیرا تنگ کیا جا رہا ہے، ہندوستان کے مسلمان پوری دنیا کی طرف دیکھ رہے ہیں۔ شیخ رشید نے کہا کہ ہم ایٹمی طاقت ہیں اور مسلمانوں کی ذمہ داری اب ہم پر ہے۔

چیف الیکشن کمشنر کی تعیناتی کے حوالے سے پوچھے گئے سوال پر شیخ رشید نے کہا کہ تمام جماعتوں کا فرض ہے کہ مشترکہ الیکشن کمشنر لے کر آئیں۔ اپوزیشن کو تنقید کا نشانہ بناتے ہوئے وزیر ریلوے کا کہنا تھا منتخب حکومت کو گرانے کے لیے غیر جمہوری اور غیر آئینی زبان استعمال کی جا رہی ہے۔

(ایمرا نیوزآن لائن) بھارت میں شہریت سے متعلق متنازع ترمیمی بل کی شدید مذمت کرتے ہوئے مہاراشٹرا میں تعینات بھارتی پولیس سروس کے سینیئر افسر نے احتجاجاً استعفیٰ دے دیا۔

گزشتہ ہفتے بھارتی پارلیمنٹ کے ایوانِ زیریں میں وزیرِ داخلہ امیت شاہ کی جانب سے ایک بل پیش کیا گیا تھا جس کے تحت پاکستان، بنگلا دیش اور افغانستان سے بھارت جانے والے غیر مسلموں کو شہریت دی جائے گی لیکن مسلمانوں کو نہیں۔ تارکینِ وطن کی شہریت سے متعلق اس متنازع ترمیمی بل کو ایوان میں 12 گھنٹے تک بحث کے بعد کثرتِ رائے سے منظور کر لیا گیا تھا۔

ایوان زیریں کے بعد ایوان بالا میں بھی اس متنازع بل کو کثرت رائے سے منظور کیا جا چکا ہے۔ متنازع شہریت بل کے خلاف بھارت کی مختلف ریاستوں میں بڑے پیمانے پر احتجاج کیے جا رہے ہیں جب کہ امریکا سمیت دنیا بھر سے بھی اس کے خلاف آوازیں اٹھائی جا رہی ہیں۔

بھارتی میڈیا رپورٹس کے مطابق مذکورہ بل کی شدید مذمت کرتے ہوئے بھارتی ریاست مہاراشٹرا میں تعینات پولیس سروس کے سینیئر افسر عبدالرحمٰن احتجاجاً مستعفی ہو گئے ہیں۔ مستعفی ہونے سے متعلق بھارتی پولیس افسر عبدالرحمٰن نے کہا کہ بل کی مذمت کرتا ہوں، اس لیے سول نافرمانی کرتے ہوئے عہدہ چھوڑ رہا ہوں۔

ان کا کہنا تھا کہ اس بل کا مقصد مسلمانوں میں خوف پھیلانا اور قوم کو تقسیم کرنا ہے، شہریت ترمیمی بل آئین کی بنیادی خصوصیات کے منافی ہے۔ بھارتی افسر عبدالرحمٰن نے برہمی کا اظہار کرتے ہوئے مزید کہا کہ وزیر داخلہ نے پارلیمنٹ میں غلط حقائق اور گمراہ کُن معلومات پیش کیں۔

(ایمرا نیوزآن لائن) انسانی حقوق کے عالمی دن کو یوم سیاہ کے طورپر منانے کا مقصد عالمی برداری کی توجہ مقبوضہ کشمیر میں انسانی حقوق کی بگڑتی ہوئی صورتحال کی جانب مبذول کرانا ہے ۔

یوم سیاہ منانے کی اپیل گزشتہ روز کُل جماعتی حریت کانفرنس کے چیئرمین سید علی گیلانی نے کی تھی۔ اس موقع پر آج مقبوضہ کشمیرمیں بھارت کی طرف سے بڑے پیمانے پر جاری انسانی حقوق کی سنگین خلاف ورزیوں کی مذمت کے لیے مکمل ہڑتال ہے۔ سید علی گیلانی نے اپنے ایک بیان میں عالمی برادری سے مقبوضہ کشمیر میں بھارتی مظالم بند کرانے کا مطالبہ کرتے ہوئے کہا ہے کہ کشمیریوں کے انسانی حقوق کی پامالیوں کا سنجیدگی سے نوٹس لیا جائے۔

کُل جماعتی حریت کانفرنس کے چیئرمین کا کہنا تھا کہ کشمیریوں کےحق خود ارادیت سے مسلسل انکار انسانی حقوق کی سب سے بڑی خلاف ورزی ہے، بھارت کی ہٹ دھرمی کشمیر تنازع کے پرامن حل میں سب سے بڑی رکاوٹ ہے۔ سید علی گیلانی نے عالمی برادری پر زور دیا ہے کہ وہ مقبوضہ کشمیر میں مظالم پر بھارت سے اس کے جرائم کا حساب مانگے۔

ان کا کہنا تھا کہ کشمیر کی آزادی اور حق خودارادیت کے لیے جدوجہد ہر صورت جاری رہے گی۔ واضح رہے کہ مقبوضہ کشمیر میں قابض بھارت کی جانب سے عائد کرفیو کو 4 ماہ سے زائدعرصہ ہو چکا ہے اور وادی میں لاک ڈاؤن کے سبب کشمیری عوام شدید اذیت کا شکار ہیں۔ 128 روز سے جاری کرفیو اور پابندیوں کے باعث مقبوضہ وادی میں نظام زندگی مفلوج ہے، تعلیمی ادارے، دکانیں، کاروباری مراکز بند جب کہ سڑکوں پر ٹرانسپورٹ اب بھی غائب ہے۔

ان سب کے علاوہ انٹرنیٹ، موبائل فون اور لینڈ لائن سروس بھی تاحال بند ہے جب کہ حریت رہنما اور مقامی سیاسی قیادت سمیت 11 ہزار کشمیری گرفتار ہیں۔ کشمیر میڈیا سروس کے مطابق مسلسل 4 ماہ سے زائد کرفیو کے باعث مقبوضہ کشمیر کی معیشت کو 15 ہزار کروڑ روپے کا نقصان ہو چکا ہے۔ یہی وجہ ہے کہ انسانی حقو ق کے عالمی دن پر دنیا بھر میں کشمیری آج یوم سیاہ منا رہے ہیں۔

(ایمرا نیوزآن لائن) بھارتی پارلیمنٹ کے ایوانِ زیریں نے 12 گھنٹے کی بحث کے بعد تارکینِ وطن کی شہریت سے متعلق متنازع ترمیمی بل کثرتِ رائے سے منظور کر لیا جس کے خلاف امریکا سمیت دنیا کے مختلف حصوں اور خود بھارت کے اندر سے بھی آوازیں اٹھنے لگیں۔

یاد رہے کہ بھارتی پارلیمنٹ کے ایوانِ زیریں میں وزیرِ داخلہ امیت شاہ کی جانب سے ایک بل پیش کیا گیا جس کے تحت پاکستان ، بنگلہ دیش اور افغانستان سے بھارت جانے والے غیر مسلموں کو شہریت دی جائے گی ہے لیکن مسلمانوں کو نہیں۔

گزشتہ روز تارکینِ وطن کی شہریت سے متعلق اس متنازع ترمیمی بل کو ایوان میں 12 گھنٹے تک بحث کے بعد کثرتِ رائے سے منظور کر لیا تھا۔ اس بل کے حق میں 311 ووٹ جب کہ مخالفت میں 80 ووٹ پڑے۔

امریکی کمیشن برائےعالمی مذہبی آزادی نے تشویش کا اظہار کرتے ہوئے امریکا کو بھارتی وزیر داخلہ دیگرقیادت کیخلاف پابندیوں کی تجویز پیش کردی جب کہ بل کی منظوری کیخلاف خود بھارت کے اندر سے ہی آوازیں اٹھنے لگیں اور آسام سمیت مختلف ریاستوں میں عوام سڑکوں پر نکل آئے، ٹائر جلا کرسڑکیں بلاک کردیں۔

آسام ،منی پور ،تریپورہ سمیت بھارت کی شمال مشرقی ریاستوں میں آج 12 گھنٹے تک ہڑتال ہے اور آسام میں تعلیمی ادارے اور کاروباری مراکز بند جب کہ امتحانات ملتوی کردیئے گئے ہیں۔ خود حکمران بھارتیہ جنتا پارٹی (بی جے پی )کےاتحادی اکالی دل نے بھی بل میں مسلمان تارکین وطن کو بھی شامل کرنے کا مطالبہ کردیا ہے۔ حیدر آباد سے رکنِ پارلیمان اسد الدین اویسی نے بل کی مخالفت کرتے ہوئے اس کی کاپی پھاڑ دی اور مسودہ قانون کو ہٹلر کے قوانین سے بھی زیادہ برا قراردے دیا۔ اس سے قبل کانگریس رہنما ششی تھرور نے کہا تھا کہ متعصبانہ بل کی منظوری جناح کے نظریے کی جیت اور گاندھی کے نظریے کی ہار ہوگی۔

(ایمرا نیوزآن لائن) وزیر خارجہ شاہ محمود قریشی نے استنبول میں ہارٹ آف ایشیا کانفرنس کے دوران مقبوضہ جموں و کشمیر میں جاری بھارتی مظالم کے خلاف احتجاج کرتے ہوئے بھارتی وزیر کی تقریر کا بائیکاٹ کر دیا۔

ترکی کے شہر استنبول میں آٹھویں منسٹریل ہارٹ آف ایشیا کانفرنس میں وزیرخارجہ شاہ محمود قریشی نے شرکت کی جہاں انہوں نے ترک صدر رجب طیب اردوان، ترک وزیر خارجہ میولوت چاوش اولو اور اور امریکا کی قائم مقام معاون وز یرخارجہ ایلس ویلز سمیت دیگر عالمی رہنماؤں سے ملاقات کی۔

وزیرخارجہ نے ترک صدر رجب طیب اردوان سے ملاقات میں پاکستانی قیادت کا پیغام انہیں پہنچایا اور کہا کہ مقبوضہ جموں و کشمیر میں جاری انسانی حقوق کی سنگین خلاف ورزیوں اور بھارتی مظالم کے خلاف ترک صدر کی آواز نے نہتے کشمیریوں کو بے پناہ حوصلہ دیا ہے۔ وزیر خارجہ شاہ محمود قریشی نے کانفرنس میں امریکا کی قائم مقام معاون وزیر خارجہ ایلس ویلز سے بھی ملاقات کی جس میں پاک افغان دو طرفہ تجارت سے متعلقہ امور پر تبادلہ خیال کیا گیا۔

شاہ محمود قریشی کا کہنا تھا کہ امن و استحکام کے لیے افغانستان پاکستان ایکشن پلان کے تحت پاک افغان تجارت و سرمایہ کاری ورکنگ گروپ موجود ہے جو دو طرفہ تجارت کے فروغ میں اہم کردار ادا کرے گا۔ ان کا کہنا تھا کہ پاکستان افغانستان کی تعمیر و ترقی کے لیے امریکا کے ساتھ معاونت کے لیے تیار ہے، ہمیں بھرپور توقع ہے کہ امریکا اور طالبان کے درمیان مذاکرات سے انٹرا افغان مذاکرات کی راہ ہموار ہو گی اور نتیجتاً افغانستان میں امن کی شمع روشن ہو گی۔

اسی موقع پر وزیر خارجہ شاہ محمود قریشی نے مقبوضہ جموں و کشمیر میں جاری بھارتی مظالم کے خلاف احتجاج کرتے ہوئے بھارتی وزیر کی تقریر کا بائیکاٹ کیا۔ جیسے ہی بھارتی وزیر کی تقریر شروع ہوئی وزیرخارجہ احتجاجاً وہاں سے اٹھ کر باہر چلے گئے۔

بھارت(ایمرا نیوزآن لائن) میں دولہے کو بارات تاخیر سے لانا مہنگا پڑ گیا، دلہن نے مقررہ وقت سے کئی گھنٹے بعد پہنچنے پر گھر والوں کے ساتھ مل کر نا صرف دولہے کی پٹائی کر دی بلکہ اپنے پڑوسی سے شادی بھی کر لی۔

بھارتی میڈیا کے مطابق گاؤں بجنور ننگلجات میں شادی کے دن باراتیوں کے دیر سے آنے پر دلہن اور ان کے گھر والوں نے باراتیوں کو تشدد کا نشانہ بنایا، بعد ازاں دلہن نے اپنے پڑوسی سے شادی کر لی۔ صرف یہی نہیں دلہن کے گھر والوں نے دولہے کے خاندان کو مارنے پیٹنے کے بعد ان کا قیمتی سامان چھین کر انہیں جیل بھی بھجوا دیا۔

پولیس نے انکشاف کیا کہ یہ جوڑا رسم و رواج کے ساتھ ایک روایتی شادی کی تقریب کرنا چاہتا تھا، چھ ہفتے قبل جوڑے نے ایک اجتماعی شادی کی تقریب کے موقع پر شادی کی تھی، اور اس وقت دلہن اپنے سسرال نہیں گئی تھی کیونکہ وہ ایک روایتی شادی کرنا چاہتی تھی۔

علاوہ ازیں پولیس نے یہ بھی بتایا کہ دونوں خاندانوں میں جہیز کے معاملے کو لے کر بھی اختلافات تھے، دلہن کے خاندان نے دعویٰ کیا کہ دولہا اور اس کے والد نے اُن سے موٹرسائیکل اور نقد رقم کا مطالبہ کیا تھا اور جب ان کا مطالبہ پورا نہیں کیا گیا تو یہ ان کے گھر والوں کو دھمکیاں دے رہے تھے۔

بھارتی میڈیا کے مطابق باراتیوں کو دن کے 2 بجے آنا تھا لیکن وہ رات میں بارات لے کر آئے، تاخیر سے آنے کی وجہ سے دلہن آگ بگولہ ہوگئی اور دلہن کے گھر والوں نے باراتیوں کی مار لگا دی۔ اس تمام تر صورتحال کے بعد پولیس نے معاملے کو سلجھایا جس کے بعد دلہن نے کسی اور سے شادی کر لی۔

سری نگر(ایمرا نیوزآن لائن) مقبوضہ کشمیر میں قابض بھارت کی جانب سے عائد کرفیو کو 4 ماہ سے زائدعرصہ ہو چکا ہے اور وادی میں لاک ڈاؤن کے سبب معیشت کو 15ہزار کروڑ روپے کا نقصان ہو چکا ہے۔

کشمیر میڈیا سروس کے مطابق بھارتی حکومت کی بربریت کے خلاف بڈگام، گاندربل، پلوامہ، کلگام، شوپیاں، بانڈی پورہ،کپواڑہ سمیت دیگر علاقوں میں مظاہرے جاری ہیں۔ مظاہرین کو کو روکنے کے لیے بھارتی فورسز طاقت کا استعمال کر رہی ہے جس سے متعدد کشمیری زخمی ہو گئے ہیں۔ 125 روز سے جاری کرفیو اور پابندیوں کے باعث مقبوضہ وادی میں نظام زندگی مفلوج ہے، تعلیمی ادارے، دکانیں، کاروباری مراکز بند جب کہ سڑکوں پر ٹرانسپورٹ اب بھی غائب ہے۔

ان سب کے علاوہ انٹرنیٹ، موبائل فون اور لینڈ لائن سروس بھی تاحال بند ہے جب کہ حریت رہنما اور مقامی سیاسی قیادت سمیت 11 ہزار کشمیری گرفتار ہیں۔ کشمیر میڈیا سروس کے مطابق مسلسل 4 ماہ سے زائد کرفیو کے باعث مقبوضہ کشمیر کی معیشت کو 15 ہزار کروڑ روپے کا نقصان ہو چکا ہے۔ رپورٹ کے مطابق مقبوضہ وادی میں مسلسل 18ویں ہفتے جمعہ کی نماز پر بھی پابندی برقرار رہی۔

بھارت نے 5 اگست کو راجیہ سبھا میں کشمیر کی خصوصی حیثیت ختم کرنے کا بل پیش کرنے سے قبل ہی صدارتی حکم نامے کے ذریعے کشمیر کی خصوصی حیثیت ختم کردی اور ساتھ ساتھ مقبوضہ کشمیر کو وفاق کے زیرِ انتظام دو حصوں یعنی (UNION TERRITORIES) میں تقسیم کردیا جس کے تحت پہلا حصہ لداخ جبکہ دوسرا جموں اور کشمیر پر مشتمل ہوگا۔ بھارت نے یہ دونوں بل لوک سبھا سے بھی بھاری اکثریت کے ساتھ منظور کرالیے ہیں۔

آرٹیکل 370 کیا ہے؟ بھارتی آئین کا آرٹیکل 370 مقبوضہ کشمیر میں خصوصی اختیارات سے متعلق ہے۔ آرٹیکل 370 ریاست مقبوضہ کشمیر کو اپنا آئین بنانے، اسے برقرار رکھنے، اپنا پرچم رکھنے اور دفاع، خارجہ و مواصلات کے علاوہ تمام معاملات میں آزادی دیتا ہے۔ بھارتی آئین کی جو دفعات و قوانین دیگر ریاستوں پر لاگو ہوتے ہیں وہ اس دفعہ کے تحت ریاست مقبوضہ کشمیر پر نافذ نہیں کیے جا سکتے۔ بھارتی آئین کے آرٹیکل 370 کے تحت کسی بھی دوسری ریاست کا شہری مقبوضہ کشمیر کا شہری نہیں بن سکتا اور نہ ہی وادی میں جگہ خرید سکتا ہے۔

(ایمرا نیوزآن لائن) نئی دہلی: بھارت کے شہر حیدرآباد دکن میں خاتون ڈاکٹر سے اجتماعی زیادتی کے بعد اسے قتل کرنے والے چاروں ملزمان پولیس مقابلے میں ہلاک ہو گئے۔

بھارتی میڈیا رپورٹ کے مطابق ریاست تلنگانہ میں خاتون ڈاکٹر سے اجتماعی زیادتی کے بعد قتل کے ملزمان پولیس کی حراست سے فرار ہونے کی کوشش کر رہے تھے جس پر پولیس نے کارروائی کرتے ہوئے چاروں کو ہلاک کر دیا۔

خاتون کے والد نے بھارتی خبر رساں ادارے کو بتایا کہ ’میری بیٹی کی موت کو 10 دن گزر گئے ہیں، چاروں ملزمان کو مارنے پر میں پولیس اور حکومت کا شکر گزار ہوں، اب میری بیٹی کی روح کو سکون مل گیا ہو گا‘۔

واضح رہے کہ 26 نومبر کو بھارتی ریاست تلنگانہ کے شہر حیدر آباد میں 26 سالہ خاتون ڈاکٹر کو 4 افراد نے اجتماعی زیادتی کا نشانہ بنانے کے بعد قتل کر دیا تھا۔ پولیس نے واقعے کے فوراً بعد ہی ملزمان کو گرفتار کر کے تحقیقات کا آغاز کر دیا تھا۔

(ایمرا نیوزآن لائن) بھارت میں ایک اور ہولناک اور انسانیت سوز واقعہ پیش آیا ہے جہاں ایک لڑکی کو اجتماعی زیادتی کا نشانہ بنانے کے بعدقتل کرکے لاش جلادی گئی۔

فرانسیسی خبر رساں ایجنسی کے مطابق یہ واقعہ شمالی بھارتی ریاست بہار کے علاقے بکسر میں پیش آیا۔ واقعے کے بعد بھارتی عوام میں شدید غصہ پایا جاتا ہے اور ملک کے مختلف علاقوں میں اس مذموم واقعے کے خلاف احتجاج کیا جارہا ہے۔

مقامی پولیس کے مطابق مقتولہ لڑکی ‘جس کی شناخت اور عمر ظاہر نہیں کی گئی’ کو نامعلوم ملزمان نے اجتماعی زیادتی کا نشانہ بنایا اور اس کے سرمیں گولی مار کر قتل کرنے کے بعد اس کی لاش کو جلادیا اور اسے بکسر میں ہی ایک ویران علاقے میں دفن کردیا۔

مقامی پولیس افسر کے مطابق لڑکی بہار کے علاقے بکسر کی رہائشی اور گذشتہ روز سے لاپتہ تھی، لاش کی میڈیکل رپورٹ کا انتظار کیا جارہا ہے جس کے بعد تحقیقات آگے بڑھائی جائیں گی۔ واضح رہے کہ گذشتہ ہفتے بھی بھارتی شہر حیدرآباد سے ایک 27 سالہ ویٹرنری ڈاکٹر کی جلی ہوئی لاش برآمد ہوئی تھی جسے اجتماعی زیادتی کے بعد قتل کردیا گیا تھا۔

واقعے کے بعد بھارت بھر میں احتجاج کیا جارہا تھا جس میں مظاہرین کا مطالبہ تھا کہ ریپ کے ملزمان کو بلا کسی تاخیر کے فوری سزائیں دی جائیں کہ بہار میں یہ ایک اور واقعہ پیش آگیا۔ واضح رہے کہ حکومت کی حالیہ عرصے کے دوران کوششوں کے باجود بھارت میں پیچیدہ قوانین کی وجہ سے مقدمات کے فیصلے ہونے میں برسوں لگ جاتے ہیں۔

بھارت میں اجتماعی زیادتی کے بعد خواتین کو قتل کرنے کے واقعات آئے روز پیش آتے رہتے ہیں اور اس حوالے سے بھارت کا شمار بدترین ممالک میں ہوتا ہے۔ بھارتی حکام کی اپنی رپورٹ کے مطابق صرف 2017 میں 33 ہزار سے زائد خواتین کو زیادتی کا نشانہ بنایا گیا۔

بھارتی جنونی ملزمان کی جانب سے ان کی حوس کا نشانہ اکثر اوقات غیر ملکی خواتین سیاح بھی بنتی ہیں اور متعد د بار غیر ملکی خواتین سیاحوں کو بھارت میں جنسی زیادتی کا نشانہ بنایا جاچکا ہے۔

یہی وجہ ہے کہ بھارت کا شمار خواتین سیاحوں کے لیے غیر محفوظ ممالک میں ہوتا ہے اور گذشتہ سال عالمی ماہرین کی رائے پر مشتمل ایک سروے میں جنسی زیادتی کے واقعات کی بناء پر بھارت کو خواتین کے لیے سب سے زیادہ خطرناک ملک قرار دے دیا گیا تھا۔

بھارت(ایمرا نیوزآن لائن) کے دارالحکومت نئی دہلی میں کانگریس کی جانب سے نکالی گئی ریلی میں ایک سیاسی رہنما کی زبان ہی پھسل گئی اور انہوں نے فرط جذبات میں پریانکا گاندھی کو پریانکا چوپڑا بنا ڈالا۔

کانگریس پارٹی کے سابق ایم ایل اے سریندر کمار نے ریلی میں غلطی سے پریانکا چوپڑا کا نعرہ لگا دیا جو سوشل میڈیا پر خوب وائرل ہو گیا ہے۔ سریندر کمار نے ریلی میں کانگریس پارٹی کی لیڈر پریانکا گاندھی کے نعرے کے جگہ غلطی سے ’پریانکا چوپڑا زندہ باد‘ کا نعرہ لگایا تھا۔

سوشل میڈیا پر وائرل ہونے والی ویڈیو میں دیکھا جا سکتا ہے کہ کانگریس کے سابق ایم ایل اے سریندر کمار نے سب سے پہلے ’سونیا گاندھی زندہ باد‘ کا نعرہ لگایا، پھر انہوں نے ’کانگریس پارٹی زندہ باد‘ ’راہول گاندھی زندہ باد‘ اور آخر میں ’پریانکا چوپڑا زندہ باد‘ کا نعرہ لگایا۔

زبان پھسل جانے کے فوراً بعد ہی کانگریس رہنما نے معافی مانگتے ہوئے اپنی غلطی کو ٹھیک کیا اور ’پریانکا گاندھی زندہ باد‘ کا نعرہ لگایا۔ سوشل میڈیا پر صارفین نے اس ویڈیو کو خوب شیئر کیا اور چند ہی گھنٹوں میں اس وائرل ویڈیو پر دلچسپ تبصروں کا تانتا بندھ گیا۔ ٹوئٹر پر ایک صارف نے ویڈیو پر تبصرہ کرتے ہوئے خود بھی پریانکا چوپڑا زندہ باد کا نعرہ لگایا۔